༡༠. མ་ཙྪ་རཱ་ཛ་ཙ་རི་ཡཱ
༨༣. ‘‘པུ་ནཱ་པ་རཾ ཡ་དཱ ཧོ་མི, མ་ཙྪ་རཱ་ཛཱ མ་ཧཱ་ས་རེ;
ཨུ་ཎྷེ སཱུ་རི་ཡ་ས་ནྟཱ་པེ, ས་རེ ཨུ་ད་ཀ ཁཱི་ཡ་ཐ.
༨༤. ‘‘ཏ་ཏོ ཀཱ་ཀཱ ཙ གི་ཛ྄ཛྷཱ ཙ, ཀ་ངྐཱ [བ་ཀཱ (སཱི.)] ཀུ་ལ་ལ་སེ་ན་ཀཱ;
བྷ་ཀྑ་ཡ་ནྟི དི་ཝཱ་ར་ཏྟིཾ, མ་ཙྪེ ཨུ་པ་ནི་སཱི་དི་ཡ.
༨༥. ‘‘ཨེ་ཝཾ ཙི་ནྟེ་ས་ཧཾ ཏ་ཏྠ, ས་ཧ ཉཱ་ཏཱི་ཧི པཱི་ལི༹་ཏོ;
‘ཀེ་ན ནུ ཁོ ཨུ་པཱ་ཡེ་ན, ཉཱ་ཏཱི དུ་ཀྑཱ པ་མོ་ཙ་ཡེ’.
༨༦. ‘‘ཝི་ཙི་ནྟ་ཡི་ཏྭཱ དྷ་མྨ་ཏྠཾ, ས་ཙྩཾ ཨ་དྡ་ས པ་སྶ་ཡཾ;
ས་ཙྩེ ཋ་ཏྭཱ པ་མོ་ཙེ་སིཾ, ཉཱ་ཏཱི་ནཾ ཏཾ ཨ་ཏི་ཀྑ་ཡཾ.
༨༧. ‘‘ཨ་ནུ་སྶ་རི་ཏྭཱ ས་ཏཾ དྷ་མྨཾ, པ་ར་མ་ཏྠཾ ཝི་ཙི་ནྟ་ཡཾ;
ཨ་ཀཱ་སི ས་ཙྩ་ཀི་རི་ཡཾ, ཡཾ ལོ་ཀེ དྷུ་ཝ་ས་སྶ་ཏཾ.
༨༨. ‘‘‘ཡ་ཏོ ས་རཱ་མི ཨ་ཏྟཱ་ནཾ, ཡ་ཏོ པ་ཏྟོ་སྨི ཝི་ཉྙུ་ཏཾ;
ནཱ་བྷི་ཛཱ་ནཱ་མི ས་ཉྩི་ཙྩ, ཨེ་ཀ་པཱ་ཎ་མྤི ཧིཾ་སི་ཏཾ.
༨༩. ‘‘‘ཨེ་ཏེ་ན ས་ཙྩ་ཝ་ཛྫེ་ན, པ་ཛྫུ་ནྣོ ཨ་བྷི་ཝ་སྶ་ཏུ;
ཨ་བྷི་ཏྠ་ན་ཡ པ་ཛྫུ་ནྣ, ནི་དྷིཾ ཀཱ་ཀ་སྶ ནཱ་ས་ཡ;
ཀཱ་ཀཾ སོ་ཀཱ་ཡ ར་ནྡྷེ་ཧི, མ་ཙྪེ སོ་ཀཱ པ་མོ་ཙ་ཡ’.
༩༠. ‘‘ས་ཧ་ཀ་ཏེ ས་ཙྩ་ཝ་རེ, པ་ཛྫུ་ནྣོ ཨ་བྷི་ག་ཛྫི་ཡ;
ཐ་ལཾ ནི་ནྣ་ཉྩ པཱུ་རེ་ནྟོ, ཁ་ཎེ་ན ཨ་བྷི་ཝ་སྶ་ཐ.
༩༡. ‘‘ཨེ་ཝ་རཱུ་པཾ ས་ཙྩ་ཝ་རཾ, ཀ་ཏྭཱ ཝཱི་རི་ཡ་མུ་ཏྟ་མཾ;
ཝ་སྶཱ་པེ་སིཾ མ་ཧཱ་མེ་གྷཾ, ས་ཙྩ་ཏེ་ཛ་བ་ལ་སྶི་ཏོ;
ས་ཙྩེ་ན མེ ས་མོ ན་ཏྠི, ཨེ་སཱ མེ ས་ཙྩ་པཱ་ར་མཱི’’ཏི.
མ་ཙྪ་རཱ་ཛ་ཙ་རི་ཡཾ ད་ས་མཾ.