༦. རུ་རུ་རཱ་ཛ་ཙ་རི་ཡཱ
༤༨. ‘‘པུ་ནཱ་པ་རཾ ཡ་དཱ ཧོ་མི, སུ་ཏ་ཏྟ་ཀ་ན་ཀ་ས་ནྣི་བྷོ;
མི་ག་རཱ་ཛཱ རུ་རུ་ནཱ་མ, པ་ར་མ་སཱི་ལ་ས་མཱ་ཧི་ཏོ.
༤༩. ‘‘ར་མྨེ པ་དེ་སེ ར་མ་ཎཱི་ཡེ, ཝི་ཝི་ཏྟེ ཨ་མ་ནུ་སྶ་ཀེ;
ཏ་ཏྠ ཝཱ་སཾ ཨུ་པ་ག་ཉྪིཾ, ག་ངྒཱ་ཀཱུ་ལེ མ་ནོ་ར་མེ.
༥༠. ‘‘ཨ་ཐ ཨུ་པ་རི ག་ངྒཱ་ཡ, དྷ་ནི་ཀེ་ཧི པ་རི་པཱི་ལི༹་ཏོ;
པུ་རི་སོ ག་ངྒཱ་ཡ པ་པ་ཏི, ‘ཛཱི་ཝཱ་མི ཝཱ མ་རཱ་མི ཝཱ’.
༥༡. ‘‘ར་ཏྟི་ནྡི་ཝཾ སོ ག་ངྒཱ་ཡ, ཝུ་ཡ྄ཧ་མཱ་ནོ མ་ཧོ་ད་ཀེ;
ར་ཝ་ནྟོ ཀ་རུ་ཎཾ ར་ཝཾ, མ་ཛ྄ཛྷེ ག་ངྒཱ་ཡ ག་ཙྪ་ཏི.
༥༢. ‘‘ཏ་སྶཱ་ཧཾ ས་དྡཾ སུ་ཏྭཱ་ན, ཀ་རུ་ཎཾ པ་རི་དེ་ཝ་ཏོ;
ག་ངྒཱ་ཡ ཏཱི་རེ ཋ་ཏྭཱ་ན, ཨ་པུ་ཙྪིཾ ‘ཀོ་སི ཏྭཾ ན་རོ’.
༥༣. ‘‘སོ མེ པུ་ཊྛོ ཙ བྱཱ་ཀཱ་སི, ཨ་ཏྟ་ནོ ཀ་ར་ཎཾ ཏ་དཱ;
‘དྷ་ནི་ཀེ་ཧི བྷཱི་ཏོ ཏ་སི་ཏོ, པ་ཀྑ་ནྡོ་ཧཾ མ་ཧཱ་ན་དིཾ’.
༥༤. ‘‘ཏ་སྶ ཀ་ཏྭཱ་ན ཀཱ་རུ་ཉྙཾ, ཙ་ཛི་ཏྭཱ མ་མ ཛཱི་ཝི་ཏཾ;
པ་ཝི་སི་ཏྭཱ ནཱི་ཧ་རིཾ ཏ་སྶ, ཨ་ནྡྷ་ཀཱ་ར་མྷི ར་ཏྟི་ཡཱ.
༥༥. ‘‘ཨ་སྶ་ཏྠ་ཀཱ་ལ་མ་ཉྙཱ་ཡ, ཏ་སྶཱ་ཧཾ ཨི་ད་མ་བྲ་ཝིཾ;
‘ཨེ་ཀཾ ཏཾ ཝ་རཾ ཡཱ་ཙཱ་མི, མཱ མཾ ཀ་སྶ་ཙི པཱ་ཝ་ད’.
༥༦. ‘‘ན་ག་རཾ ག་ནྟྭཱ་ན ཨཱ་ཙི་ཀྑི, པུ་ཙྪི་ཏོ དྷ་ན་ཧེ་ཏུ་ཀོ;
རཱ་ཛཱ་ནཾ སོ ག་ཧེ་ཏྭཱ་ན, ཨུ་པ་ག་ཉྪི མ་མ་ནྟི་ཀཾ.
༥༧. ‘‘ཡཱ་ཝ་ཏཱ ཀ་ར་ཎཾ ས་བྦཾ, ར་ཉྙོ ཨཱ་རོ་ཙི་ཏཾ མ་ཡཱ;
རཱ་ཛཱ སུ་ཏྭཱ་ན ཝ་ཙ་ནཾ, ཨུ་སུཾ ཏ་སྶ པ་ཀ་པྤ་ཡི;
‘ཨི་དྷེ་ཝ གྷཱ་ཏ་ཡི་སྶཱ་མི, མི་ཏྟ་དུ་བྦྷིཾ [མི་ཏྟ་དཱུ་བྷིཾ (སཱི.)] ཨ་ནཱ་རི་ཡཾ’.
༥༨. ‘‘ཏ་མ་ཧཾ ཨ་ནུ་ར་ཀྑ་ནྟོ, ནི་མྨི་ནིཾ མ་མ ཨ་ཏྟ་ནཱ;
‘ཏི་ཊྛ་ཏེ་སོ མ་ཧཱ་རཱ་ཛ, ཀཱ་མ་ཀཱ་རོ བྷ་ཝཱ་མི ཏེ’.
༥༩. ‘‘ཨ་ནུ་ར་ཀྑིཾ མ་མ སཱི་ལཾ, ནཱ་ར་ཀྑིཾ མ་མ ཛཱི་ཝི་ཏཾ;
སཱི་ལ་ཝཱ ཧི ཏ་དཱ ཨཱ་སིཾ, བོ་དྷི་ཡཱ་ཡེ་ཝ ཀཱ་ར་ཎཱ’’ཏི.
རུ་རུ་རཱ་ཛ་ཙ་རི་ཡཾ ཚ་ཊྛཾ.