༢. བྷཱུ་རི་ད་ཏྟ་ཙ་རི་ཡཱ
༡༡. ‘‘པུ་ནཱ་པ་རཾ ཡ་དཱ ཧོ་མི, བྷཱུ་རི་ད་ཏྟོ མ་ཧི་དྡྷི་ཀོ;
ཝི་རཱུ་པ་ཀྑེ་ན མ་ཧཱ་ར་ཉྙཱ, དེ་ཝ་ལོ་ཀ་མ་ག་ཉྪ་ཧཾ.
༡༢. ‘‘ཏ་ཏྠ པ་སྶི་ཏྭཱ་ཧཾ དེ་ཝེ, ཨེ་ཀ་ནྟཾ སུ་ཁ་ས་མ་པྤི་ཏེ;
ཏཾ ས་གྒ་ག་མ་ན་ཏྠཱ་ཡ, སཱི་ལ་བྦ་ཏཾ ས་མཱ་དི་ཡིཾ.
༡༣. ‘‘ས་རཱི་ར་ཀི་ཙྩཾ ཀ་ཏྭཱ་ན, བྷུ་ཏྭཱ ཡཱ་པ་ན་མ་ཏྟ་ཀཾ;
ཙ་ཏུ་རོ ཨ་ངྒེ ཨ་དྷི་ཊྛཱ་ཡ, སེ་མི ཝ་མྨི་ཀ་མུ་དྡྷ་ནི.
༡༤. ‘‘ཚ་ཝི་ཡཱ ཙ་མྨེ་ན མཾ་སེ་ན, ན་ཧཱ་རུ་ཨ་ཊྛི་ཀེ་ཧི ཝཱ;
ཡ་སྶ ཨེ་ཏེ་ན ཀ་ར་ཎཱི་ཡཾ, དི་ནྣཾ་ཡེ་ཝ ཧ་རཱ་ཏུ སོ.
༡༥. ‘‘སཾ་སི་ཏོ ཨ་ཀ་ཏ་ཉྙུ་ནཱ, ཨཱ་ལ་མྤཱ་ཡ་ནོ [ཨཱ་ལ་མྦ་ཎོ (སཱི.)] མ་མ་གྒ་ཧི;
པེ་ལཱ༹་ཡ པ་ཀྑི་པི་ཏྭཱ་ན, ཀཱི་ལེ༹་ཏི མཾ ཏ་ཧིཾ ཏ་ཧིཾ.
༡༦. ‘‘པེ་ལཱ༹་ཡ པ་ཀྑི་པ་ནྟེ་པི, ས་མྨ་དྡ་ནྟེ་པི པཱ་ཎི་ནཱ;
ཨཱ་ལ་མྤཱ་ཡ་ནེ [ཨཱ་ལ་མྦ་ཎེ (སཱི.)] ན ཀུ་པྤཱ་མི, སཱི་ལ་ཁ་ཎྜ་བྷ་ཡཱ མ་མ.
༡༧. ‘‘ས་ཀ་ཛཱི་ཝི་ཏ་པ་རི་ཙྩཱ་གོ, ཏི་ཎ་ཏོ ལ་ཧུ་ཀོ མ་མ;
སཱི་ལ་ཝཱི་ཏི་ཀྐ་མོ མ་ཡ྄ཧཾ, པ་ཐ་ཝཱི་ཨུ་པྤ་ཏ་ནཾ ཝི་ཡ.
༡༨. ‘‘ནི་ར་ནྟ་རཾ ཛཱ་ཏི་ས་ཏཾ, ཙ་ཛེ་ཡྻཾ མ་མ ཛཱི་ཝི་ཏཾ;
ནེ་ཝ སཱི་ལཾ པ་བྷི་ནྡེ་ཡྻཾ, ཙ་ཏུ་དྡཱི་པཱ་ན ཧེ་ཏུ་པི.
༡༩. ‘‘ཨ་པི ཙཱ་ཧཾ སཱི་ལ་ར་ཀྑཱ་ཡ, སཱི་ལ་པཱ་ར་མི་པཱུ་རི་ཡཱ;
ན ཀ་རོ་མི ཙི་ཏྟེ ཨ་ཉྙ་ཐ་ཏྟཾ, པ་ཀྑི་པ་ནྟ་མྤི པེ་ལ༹་ཀེ’’ཏི.
བྷཱུ་རི་ད་ཏྟ་ཙ་རི་ཡཾ དུ་ཏི་ཡཾ.