༡. མཱ་ཏུ་པོ་ས་ཀ་ཙ་རི་ཡཱ
༡. ‘‘ཡ་དཱ ཨ་ཧོ་སིཾ པ་ཝ་ནེ, ཀུ་ཉྫ་རོ མཱ་ཏུ་པོ་ས་ཀོ;
ན ཏ་དཱ ཨ་ཏྠི མ་ཧི་ཡཱ, གུ་ཎེ་ན མ་མ སཱ་དི་སོ.
༢. ‘‘པ་ཝ་ནེ དི་སྭཱ ཝ་ན་ཙ་རོ, ར་ཉྙོ མཾ པ་ཊི་ཝེ་ད་ཡི;
‘ཏ་ཝཱ་ནུ་ཙྪ་ཝོ མ་ཧཱ་རཱ་ཛ, ག་ཛོ ཝ་ས་ཏི ཀཱ་ན་ནེ.
༣. ‘‘‘ན ཏ་སྶ པ་རི་ཀྑཱ་ཡ་ཏྠོ, ན་པི ཨཱ་ལ༹་ཀ་ཀཱ་སུ་ཡཱ;
ས་ཧ ག་ཧི་ཏེ [ས་མཾ ག་ཧི་ཏེ (སཱི.)] སོ་ཎྜཱ་ཡ, ས་ཡ་མེ་ཝ ཨི་དྷེ་ཧི’ཏི.
༤. ‘‘ཏ་སྶ ཏཾ ཝ་ཙ་ནཾ སུ་ཏྭཱ, རཱ་ཛཱ་པི ཏུ་ཊྛ་མཱ་ན་སོ;
པེ་སེ་སི ཧ་ཏྠི་ད་མ་ཀཾ, ཚེ་ཀཱ་ཙ་རི་ཡཾ སུ་སི་ཀྑི་ཏཾ.
༥. ‘‘ག་ནྟྭཱ སོ ཧ་ཏྠི་ད་མ་ཀོ, ཨ་དྡ་ས པ་དུ་མ་སྶ་རེ;
བྷི་ས་མུ་ལཱ༹་ལཾ [བྷི་ས་མཱུ་ལཾ (ཀ.)] ཨུ་དྡྷ་ར་ནྟཾ, ཡཱ་པ་ན་ཏྠཱ་ཡ མཱ་ཏུ་ཡཱ.
༦. ‘‘ཝི་ཉྙཱ་ཡ མེ སཱི་ལ་གུ་ཎཾ, ལ་ཀྑ་ཎཾ ཨུ་པ་དྷཱ་ར་ཡི;
‘ཨེ་ཧི པུ་ཏྟཱ’ཏི པ་ཏྭཱ་ན, མ་མ སོ་ཎྜཱ་ཡ ཨ་གྒ་ཧི.
༧. ‘‘ཡཾ མེ ཏ་དཱ པཱ་ཀ་ཏི་ཀཾ, ས་རཱི་རཱ་ནུ་ག་ཏཾ བ་ལཾ;
ཨ་ཛྫ ནཱ་ག་ས་ཧ་སྶཱ་ནཾ, བ་ལེ་ན ས་མ་སཱ་དི་སཾ.
༨. ‘‘ཡ་དི་ཧཾ ཏེ་སཾ པ་ཀུ་པྤེ་ཡྻཾ, ཨུ་པེ་ཏཱ་ནཾ ག་ཧ་ཎཱ་ཡ མཾ;
པ་ཊི་བ་ལོ བྷ་ཝེ ཏེ་སཾ, ཡཱ་ཝ ར་ཛྫ་མྤི མཱ་ནུ་སཾ.
༩. ‘‘ཨ་པི ཙཱ་ཧཾ སཱི་ལ་ར་ཀྑཱ་ཡ, སཱི་ལ་པཱ་ར་མི་པཱུ་རི་ཡཱ;
ན ཀ་རོ་མི ཙི་ཏྟེ ཨ་ཉྙ་ཐ་ཏྟཾ, པ་ཀྑི་པ་ནྟཾ མ་མཱ་ལ༹་ཀེ.
༡༠. ‘‘ཡ་དི ཏེ མཾ ཏ་ཏྠ ཀོ་ཊྚེ་ཡྻུཾ, ཕ་ར་སཱུ་ཧི ཏོ་མ་རེ་ཧི ཙ;
ནེ་ཝ ཏེ་སཾ པ་ཀུ་པྤེ་ཡྻཾ, སཱི་ལ་ཁ་ཎྜ་བྷ་ཡཱ མ་མཱ’’ཏི.
མཱ་ཏུ་པོ་ས་ཀ་ཙ་རི་ཡཾ པ་ཋ་མཾ.