༤. ས་ཏྟ་ཝ་སྶཱ་ནུ་བ་ནྡྷ་སུ་ཏྟ་ཝ་ཎྞ་ནཱ
༡༦༠. ཙ་ཏུ་ཏྠེ ས་ཏྟ ཝ་སྶཱ་ནཱིཏི པུ་རེ བོ་དྷི་ཡཱ ཚ་བྦ་སྶཱ་ནི, བོ་དྷི་ཏོ པ་ཙྪཱ ཨེ་ཀཾ ཝ་སྶཾ. ཨོ་ཏཱ་རཱ་པེ་ཀྑོཏི ‘‘ས་ཙེ ས་མ་ཎ་སྶ གོ་ཏ་མ་སྶ ཀཱ་ཡ་དྭཱ་རཱ་དཱི་སུ ཀི་ཉྩི་དེ་ཝ ཨ་ན་ནུ་ཙྪ་ཝི་ཀཾ པ་སྶཱ་མི, ཙོ་དེ་སྶཱ་མི ན’’ནྟི ཨེ་ཝཾ ཝི་ཝ་རཾ ཨ་པེ་ཀྑ་མཱ་ནོ. ཨ་ལ་བྷ་མཱ་ནོཏི ར་ཐ་རེ་ཎུ་མ་ཏྟ་མྤི ཨ་ཝ་ཀྑ་ལི་ཏཾ ཨ་པ་སྶ་ནྟོ. ཏེ་ནཱ་ཧ –
‘‘ས་ཏྟ ཝ་སྶཱ་ནི བྷ་ག་ཝ་ནྟཾ, ཨ་ནུ་བ་ནྡྷིཾ པ་དཱ་པ་དཾ;
ཨོ་ཏཱ་རཾ ནཱ་དྷི་ག་ཙྪི་སྶཾ, ས་མྦུ་དྡྷ་སྶ ས་ཏཱི་མ་ཏོ’’ཏི. (སུ. ནི. ༤༤༨);
ཨུ་པ་ས་ངྐ་མཱིཏི ‘‘ཨ་ཛྫ ས་མ་ཎཾ གོ་ཏ་མཾ ཨ་ཏི་ག་ཧེ་ཏྭཱ ག་མི་སྶཱ་མཱི’’ཏི ཨུ་པ་ས་ངྐ་མི.
ཛྷཱ་ཡ་སཱིཏི ཛྷཱ་ཡ་ནྟོ ཨ་ཝ་ཛ྄ཛྷཱ་ཡ་ནྟོ ནི་སི་ནྣོ་སཱི་ཏི ཝ་ད་ཏི. ཝི་ཏྟཾ ནུ ཛཱི་ནོཏི ས་ཏཾ ཝཱ ས་ཧ་སྶཾ ཝཱ ཛི་ཏོ་སི ནུ. ཨཱ་གུཾ ནུ གཱ་མ་སྨིནྟི, ཀིཾ ནུ ཨ་ནྟོ་གཱ་མེ པ་མཱ་ཎཱ་ཏི་ཀྐ་ནྟཾ པཱ་པ་ཀ་མྨཾ ཨ་ཀཱ་སི, ཡེ་ན ཨ་ཉྙེ་སཾ མུ་ཁཾ ཨོ་ལོ་ཀེ་ཏུཾ ཨ་ཝི་ས་ཧ་ནྟོ ཨ་ར་ཉྙེ ཝི་ཙ་ར་སི? ས་ཀྑིནྟི མི་ཏྟ་བྷཱ་ཝཾ.
པ་ལི་ཁཱ་ཡཱཏི ཁ་ཎི་ཏྭཱ. བྷ་ཝ་ལོ་བྷ་ཛ་པྤནྟི བྷ་ཝ་ལོ་བྷ་ས་ངྑཱ་ཏཾ ཏ་ཎྷཾ. ཨ་ནཱ་ས་ཝོ ཛྷཱ་ཡཱ་མཱིཏི ནི་ཏྟ་ཎྷོ ཧུ་ཏྭཱ དྭཱི་ཧི ཛྷཱ་ནེ་ཧི ཛྷཱ་ཡཱ་མི. པ་མ་ཏྟ་བ་ནྡྷཱུཏི མཱ་རཾ ཨཱ་ལ་པ་ཏི. སོ ཧི ཡེ་ཀེ་ཙི ལོ་ཀེ པ་མ་ཏྟཱ, ཏེ་སཾ བ་ནྡྷུ.
ས་ཙེ མ་གྒཾ ཨ་ནུ་བུ་དྡྷནྟི ཡ་དི ཏ་ཡཱ མ་གྒོ ཨ་ནུ་བུ་དྡྷོ. ཨ་པེ་ཧཱིཏི ཨ་པ་ཡཱ་ཧི. ཨ་མ་ཙྩུ་དྷེ་ཡྻནྟི མ་ཙྩུ་ནོ ཨ་ནོ་ཀཱ་ས་བྷཱུ་ཏཾ ནི་བྦཱ་ནཾ. པཱ་ར་གཱ་མི་ནོཏི ཡེ་པི པཱ་རཾ ག་ཏཱ, ཏེ་པི པཱ་ར་གཱ་མི་ནོ. ཡེ་པི པཱ་རཾ ག་ཙྪི་སྶ་ནྟི, ཡེ་པི པཱ་རཾ ག་ནྟུ་ཀཱ་མཱ, ཏེ་པི པཱ་ར་གཱ་མི་ནོ.
ཝི་སཱུ་ཀཱ་ཡི་ཀཱ་ནཱིཏི མཱ་ར་ཝི་སཱུ་ཀཱ་ནི. ཝི་སེ་ཝི་ཏཱ་ནཱིཏི ཝི་རུ་དྡྷ་སེ་ཝི་ཏཱ་ནི, ‘‘ཨ་པྤ་མཱ་ཡུ མ་ནུ་སྶཱ་ནཾ, ཨ་ཙྩ་ཡ་ནྟི ཨ་ཧོ་ར་ཏྟཱ’’ཏི ཝུ་ཏྟེ. ‘‘དཱི་གྷ་མཱ་ཡུ མ་ནུ་སྶཱ་ནཾ, ནཱ་ཙྩ་ཡ་ནྟི ཨ་ཧོ་ར་ཏྟཱ’’ཏི་ཨཱ་དཱི་ནི པ་ཊི་ལོ་མ་ཀཱ་ར་ཎཱ་ནི. ཝི་པྥ་ནྡི་ཏཱ་ནཱིཏི, ཏ་མྷི ཏ་མྷི ཀཱ་ལེ ཧ་ཏྠི་རཱ་ཛ་ཝ་ཎྞ་ས་པྤ་ཝ་ཎྞཱ་དི་ད་སྶ་ནཱ་ནི. ནི་བྦེ་ཛ་ནཱི་ཡཱཏི ཨུ་ཀྐ་ཎྛ་ནཱི་ཡཱ.
ཨ་ནུ་པ་རི་ཡ་གཱཏི་ཨཱ་དཱི་སུ ཀི་ཉྩཱ་པི ཨ་ཏཱི་ཏ་ཝ་ཙ་ནཾ ཀ་ཏཾ, ཨ་ཏྠོ པ་ན ཝི་ཀ་པྤ་ཝ་སེ་ན ཝེ་དི་ཏ་བྦོ. ཨི་དཾ ཝུ་ཏྟཾ ཧོ་ཏི – ཡ་ཐཱ མེ་ད་ཝ་ཎྞཾ པཱ་སཱ་ཎཾ ཝཱ་ཡ་སོ དི་སྭཱ – ‘‘ཨ་པི ནཱ་མེ་ཏྠ མུ་དུཾ ཝི་ནྡེ་ཡྻཱ་མ, ཨ་པི ཨ་སྶཱ་དོ སི་ཡཱ’’ཏི ཨ་ནུ་པ་རི་ག་ཙྪེ་ཡྻ, ཨ་ཐ སོ ཏ་ཏྠ ཨ་སྶཱ་དཾ ཨ་ལ་བྷི་ཏྭཱ་ཝ ཝཱ་ཡ་སོ ཨེ་ཏྟོ ཨ་པ་ཀྐ་མེ་ཡྻ, ཏ་ཏོ པཱ་སཱ་ཎཱ ཨ་པ་ག་ཙྪེ་ཡྻ, ཨེ་ཝཾ མ་ཡ་མྤི སོ ཀཱ་ཀོ ཝི་ཡ སེ་ལཾ གོ་ཏ་མཾ ཨཱ་ས་ཛྫ ཨ་སྶཱ་དཾ ཝཱ ས་ནྠ་ཝཾ ཝཱ ཨ་ལ་བྷ་ནྟཱ གོ་ཏ་མཱ ནི་བྦི་ནྡི་ཏྭཱ ཨ་པ་ག་ཙྪཱ་མ. ཙ་ཏུ་ཏྠཾ.