༣. དྷ་ཛ་གྒ་སུ་ཏྟ་ཝ་ཎྞ་ནཱ

༢༤༩. ཏ་ཏི་ཡེ ས་མུ་པ་བྱཱུ་ལ༹ྷོཏི ས་མྤི་ཎྜི་ཏོ རཱ་སི་བྷཱུ་ཏོ. དྷ་ཛ་གྒཾ་ཨུ་ལློ་ཀེ་ཡྻ་ཐཱཏི ས་ཀྐ་སྶ ཀི་ར དི་ཡ་ཌྜྷ་ཡོ་ཛ་ན་ས་ཏཱ་ཡཱ་མོ ར་ཐོ. ཏ་སྶ ཧི པ་ཙྪི་མ་ནྟོ པ་ཎྞཱ་ས་ཡོ་ཛ་ནོ, མ་ཛ྄ཛྷེ ར་ཐ་པ་ཉྫ་རོ པ་ཎྞཱ་ས་ཡོ་ཛ་ནོ, ར་ཐ་ས་ནྡྷི་ཏོ ཡཱ་ཝ ར་ཐ་སཱི་སཱ པ་ཎྞཱ་ས་ཡོ་ཛ་ནཱ་ནི. ཏ་དེ་ཝ པ་མཱ་ཎཾ དི་གུ་ཎཾ ཀ་ཏྭཱ ཏི་ཡོ་ཛ་ན་ས་ཏཱ་ཡཱ་མོ་ཏི་པི ཝ་ད་ནྟི་ཡེ་ཝ. ཏ་སྨིཾ ཡོ་ཛ་ནི་ཀ་པ་ལླ་ངྐོ ཨ་ཏྠ་ཏོ, ཏི་ཡོ་ཛ་ནི་ཀཾ སེ་ཏ་ཙྪ་ཏྟཾ མ་ཏྠ་ཀེ ཋ་པི་ཏཾ, ཨེ་ཀ་སྨིཾ་ཡེ་ཝ ཡུ་གེ ས་ཧ་སྶ་ཨཱ་ཛ་ཉྙཱ ཡུ་ཏྟཱ, སེ་སཱ་ལ་ངྐཱ་ར་སྶ པ་མཱ་ཎཾ ན་ཏྠི. དྷ་ཛོ པ་ན་སྶ ཨ་ཌྜྷ་ཏི་ཡཱ་ནི ཡོ་ཛ་ན་ས་ཏཱ་ནི ཨུ་གྒ་ཏོ, ཡ་སྶ ཝཱ་ཏཱ་ཧ་ཏ་སྶ པ་ཉྩ་ངྒི་ཀ་ཏཱུ་རི་ཡ་སྶེ་ཝ ས་དྡོ ནི་ཙྪ་ར་ཏི, ཏཾ ཨུ་ལློ་ཀེ་ཡྻཱ་ཐཱ་ཏི ཝ་ད་ཏི. ཀ་སྨཱ? ཏཾ པ་སྶ་ནྟཱ་ན་ཉྷི རཱ་ཛཱ ནོ ཨཱ་ག་ནྟྭཱ པ་རི་ས་པ་རི་ཡ་ནྟེ ནི་ཁཱ་ཏ་ཐ་མྦྷོ ཝི་ཡ ཋི་ཏོ, ཀ་སྶ མ་ཡཾ བྷཱ་ཡཱ་མཱ་ཏི བྷ་ཡཾ ན ཧོ་ཏི. པ་ཛཱ་པ་ཏི་སྶཱཏི སོ ཀི་ར ས་ཀྐེ་ན ས་མཱ་ན་ཝ་ཎྞོ ས་མཱ་ནཱ་ཡུ་ཀོ དུ་ཏི་ཡཾ ཨཱ་ས་ནཾ ལ་བྷ་ཏི. ཏ་ཐཱ ཝ་རུ་ཎོ ཨཱི་སཱ་ནོ ཙ. ཝ་རུ་ཎོ པ་ན ཏ་ཏི་ཡཾ ཨཱ་ས་ནཾ ལ་བྷ་ཏི, ཨཱི་སཱ་ནོ ཙ་ཏུ་ཏྠཾ. པ་ལཱ་ཡཱིཏི ཨ་སུ་རེ་ཧི པ་རཱ་ཛི་ཏོ ཏ་སྨིཾ ར་ཐེ ཋི་ཏོ ཨ་པྤ་མ་ཏྟ་ཀ་མྤི ར་ཛ་དྷ་ཛཾ དི་སྭཱ པ་ལཱ་ཡ་ན་དྷ་མྨོ.

ཨི་ཏི་པི སོ བྷ་ག་ཝཱཏི་ཨཱ་དཱི་ནི ཝི་སུ་དྡྷི་མ་གྒེ ཝི་ཏྠཱ་རི་ཏཱ་ནེ་ཝ. ཨི་ད་མ་ཝོ་ཙཱཏི ཨི་དཾ དྷ་ཛ་གྒ་པ་རི་ཏྟཾ ནཱ་མ བྷ་ག་ཝཱ ཨ་ཝོ་ཙ, ཡ་སྶ ཨཱ་ཎཱ་ཁེ་ཏྟེ ཀོ་ཊི་ས་ཏ་ས་ཧ་སྶ་ཙ་ཀྐ་ཝཱ་ལེ༹ ཨཱ་ནུ་བྷཱ་ཝོ ཝ་ཏྟ་ཏི. ཨི་དཾ ཨཱ་ཝ་ཛྫེ་ཏྭཱ ཧི ཡ་ཀྑ་བྷ་ཡ་ཙོ་ར་བྷ་ཡཱ་དཱི་ཧི དུ་ཀྑེ་ཧི མུ་ཏྟཱ་ནཾ ཨ་ནྟོ ན་ཏྠི. ཏི་ཊྛ་ཏུ ཨ་ཉྙ་དུ་ཀྑ་ཝཱུ་པ་ས་མོ, ཨི་དཾ ཨཱ་ཝ་ཛྫ་མཱ་ནོ ཧི པ་ས་ནྣ་ཙི་ཏྟོ ཨཱ་ཀཱ་སེ་པི པ་ཏི་ཊྛཾ ལ་བྷ་ཏི.

ཏ་ཏྲི་དཾ ཝ་ཏྠུ – དཱི་གྷ་ཝཱ་པི་ཙེ་ཏི་ཡ་མྷི ཀི་ར སུ་དྷཱ་ཀ་མྨེ ཀ་ཡི་ར་མཱ་ནེ ཨེ་ཀོ ད་ཧ་རོ མུ་དྡྷ་ཝེ་དི་ཀཱ་པཱ་ད་ཏོ པ་ཏི་ཏྭཱ ཙེ་ཏི་ཡ་ཀུ་ཙྪི་ཡཱ བྷ་སྶ་ཏི. ཧེ་ཊྛཱ ཋི་ཏོ བྷི་ཀྑུ་ས་ངྒྷོ ‘‘དྷ་ཛ་གྒ་པ་རི་ཏྟཾ, ཨཱ་ཝུ་སོ, ཨཱ་ཝ་ཛྫཱ་ཧཱི’’ཏི ཨཱ་ཧ. སོ མ་ར་ཎ་བྷ་ཡེ་ན ཏ་ཛྫི་ཏོ ‘‘དྷ་ཛ་གྒ་པ་རི་ཏྟཾ མཾ ར་ཀྑ་ཏཱུ’’ཏི ཨཱ་ཧ. ཏཱ་ཝ་དེ་ཝ་སྶ ཙེ་ཏི་ཡ་ཀུ་ཙྪི་ཏོ དྭེ ཨི་ཊྛ་ཀཱ ནི་ཀྑ་མི་ཏྭཱ སོ་པཱ་ནཾ ཧུ་ཏྭཱ ཨ་ཊྛཾ་སུ, ཨུ་པ་རི་ཊྛི་ཏོ ཝ་ལླི་ནི་སྶེ་ཎིཾ ཨོ་ཏཱ་རེ་སུཾ. ཏ་སྨིཾ ནི་སྶེ་ཎི་ཡཾ ཋི་ཏེ ཨི་ཊྛ་ཀཱ ཡ་ཐཱ་ཊྛཱ་ནེ་ཡེ་ཝ ཨ་ཊྛཾ་སུ. ཏ་ཏི་ཡཾ.