༢. སཱ་རི་པུ་ཏྟ་ཏྠེ་ར་གཱ་ཐཱ་ཝ་ཎྞ་ནཱ
ཡ་ཐཱ་ཙཱ་རཱི ཡ་ཐཱ་ས་ཏོཏི་ཨཱ་དི་ཀཱ ཨཱ་ཡ་སྨ་ཏོ སཱ་རི་པུ་ཏྟ་ཏྠེ་ར་སྶ གཱ་ཐཱ. ཏ་སྶ ཨཱ་ཡ་སྨ་ཏོ མ་ཧཱ་མོ་གྒ་ལླཱ་ན་ཏྠེ་ར་སྶ ཙ ཝ་ཏྠུ ཨེ་ཝཾ ཝེ་དི་ཏ་བྦཾ – ཨ་ཏཱི་ཏེ ཨི་ཏོ ས་ཏ་ས་ཧ་སྶ་ཀ་པྤཱ་དྷི་ཀེ ཨ་ས་ངྑྱེ་ཡྻ་མ་ཏྠ་ཀེ ཨཱ་ཡ་སྨཱ སཱ་རི་པུ་ཏྟོ བྲཱ་ཧྨ་ཎ་མ་ཧཱ་སཱ་ལ་ཀུ་ལེ ནི་བྦ་ཏྟི, ནཱ་མེ་ན ས་ར་ད་མཱ་ཎ་ཝོ ནཱ་མ ཨ་ཧོ་སི. མ་ཧཱ་མོ་གྒ་ལླཱ་ནོ ག་ཧ་པ་ཏི་མ་ཧཱ་སཱ་ལ་ཀུ་ལེ ནི་བྦ་ཏྟི, ནཱ་མེ་ན སི་རི་ཝ་ཌྜྷ་ཀུ་ཊུ་མྦི་ཀོ ནཱ་མ ཨ་ཧོ་སི. ཏེ ཨུ་བྷོ་པི ས་ཧ་པཾ་སུ་ཀཱི་ལ༹་ཀ་ས་ཧཱ་ཡཱ ཨ་ཧེ་སུཾ. ཏེ་སུ ས་ར་ད་མཱ་ཎ་ཝོ པི་ཏུ ཨ་ཙྩ་ཡེ་ན ཀུ་ལ་ས་ནྟ་ཀཾ དྷ་ནཾ པ་ཊི་པ་ཛྫི་ཏྭཱ ཨེ་ཀ་དི་ཝ་སཾ ར་ཧོ་ག་ཏོ ཙི་ནྟེ་སི – ‘‘ཨི་མེ་སཾ ས་ཏྟཱ་ནཾ མ་ར་ཎཾ ནཱ་མ ཨེ་ཀ་ནྟི་ཀཾ, ཏ་སྨཱ མ་ཡཱ ཨེ་ཀཾ པ་བྦ་ཛྫཾ ཨུ་པ་ག་ནྟྭཱ མོ་ཀྑ་མ་གྒོ ག་ཝེ་སི་ཏ་བྦོ’’ཏི ས་ཧཱ་ཡཾ ཨུ་པ་ས་ངྐ་མི་ཏྭཱ, ས་མྨ, ཨ་ཧཾ པ་བྦ་ཛི་ཏུ་ཀཱ་མོ, ཀིཾ ཏྭཾ པ་བྦ་ཛི་ཏུཾ ས་ཀྑི་སྶ་སཱི’’ཏི ཝ་ཏྭཱ ཏེ་ན ‘‘ན ས་ཀྑི་སྶཱ་མཱི’’ཏི ཝུ་ཏྟེ ‘‘ཧོ་ཏུ ཨ་ཧ་མེ་ཝ པ་བྦ་ཛི་སྶཱ་མཱི’’ཏི ར་ཏ་ན་ཀོ་ཊྛཱ་གཱ་རཱ་ནི ཝི་ཝ་རཱ་པེ་ཏྭཱ ཀ་པ་ཎ་དྡྷི་ཀཱ་དཱི་ནཾ མ་ཧཱ་དཱ་ནཾ ད་ཏྭཱ པ་བྦ་ཏ་པཱ་དཾ ག་ནྟྭཱ ཨི་སི་པ་བྦ་ཛྫཾ པ་བྦ་ཛི. ཏ་སྶ པ་བྦ་ཛྫཾ ཨ་ནུ་པ་བྦ་ཛི་ཏཱ ཙ་ཏུ་ས་ཏྟ་ཏི་ས་ཧ་སྶ་མ་ཏྟཱ བྲཱ་ཧྨ་ཎ་པུ་ཏྟཱ ཨ་ཧེ་སུཾ. སོ པ་ཉྩ ཨ་བྷི་ཉྙཱ་ཡོ ཨ་ཊྛ ཙ ས་མཱ་པ་ཏྟི་ཡོ ནི་བྦ་ཏྟེ་ཏྭཱ ཏེ་ས་མྤི ཛ་ཊི་ལཱ་ནཾ ཀ་སི་ཎ་པ་རི་ཀ་མྨཾ ཨཱ་ཙི་ཀྑི. ཏེ་པི ས་བྦེ པ་ཉྩཱ་བྷི་ཉྙཱ ཨ་ཊྛ ས་མཱ་པ་ཏྟི་ཡོ ནི་བྦ་ཏྟེ་སུཾ.
ཏེ་ན ས་མ་ཡེ་ན ཨ་ནོ་མ་ད་སྶཱི ནཱ་མ ས་མྨཱ་ས་མྦུ་དྡྷོ ལོ་ཀེ ཨུ་པྤ་ཛྫི་ཏྭཱ པ་ཝ་ཏྟི་ཏ་ཝ་ར་དྷ་མྨ་ཙ་ཀྐོ ས་ཏྟེ སཾ་སཱ་ར་མ་ཧོ་གྷ་ཏོ ཏཱ་རེ་ཏྭཱ ཨེ་ཀ་དི་ཝ་སཾ ‘‘ས་ར་ད་ཏཱ་པ་ས་སྶ ཙ ཨ་ནྟེ་ཝཱ་སི་ཀཱ་ན་ཉྩ ས་ངྒ་ཧཾ ཀ་རི་སྶཱ་མཱི’’ཏི ཨེ་ཀོ ཨ་དུ་ཏི་ཡོ པ་ཏྟ་ཙཱི་ཝ་ར་མཱ་དཱ་ཡ ཨཱ་ཀཱ་སེ་ན ག་ནྟྭཱ ‘‘བུ་དྡྷ་བྷཱ་ཝཾ མེ ཛཱ་ནཱ་ཏཱུ’’ཏི ཏཱ་པ་ས་སྶ པ་སྶ་ནྟ་སྶེ་ཝ ཨཱ་ཀཱ་ས་ཏོ ཨོ་ཏ་རི་ཏྭཱ པ་ཐ་ཝི་ཡཾ པ་ཏི་ཊྛཱ་སི. ས་ར་ད་ཏཱ་པ་སོ ས་ཏྠུ ས་རཱི་རེ མ་ཧཱ་པུ་རི་ས་ལ་ཀྑ་ཎཱ་ནི ཨུ་པ་དྷཱ་རེ་ཏྭཱ ‘‘ས་བྦ་ཉྙུ་བུ་དྡྷོ་ཡེ་ཝཱ་ཡ’’ནྟི ནི་ཊྛཾ ག་ནྟྭཱ པ་ཙྩུ་གྒ་མ་ནཾ ཀ་ཏྭཱ ཨཱ་ས་ནཾ པ་ཉྙཱ་པེ་ཏྭཱ ཨ་དཱ་སི. ནི་སཱི་དི བྷ་ག་ཝཱ པ་ཉྙ་ཏྟེ ཨཱ་ས་ནེ. ས་ར་ད་ཏཱ་པ་སོ ས་ཏྠུ ས་ནྟི་ཀེ ཨེ་ཀ་མ་ནྟཾ ནི་སཱི་དི.
ཏ་སྨིཾ ས་མ་ཡེ ཏ་སྶ ཨ་ནྟེ་ཝཱ་སི་ཀཱ ཙ་ཏུ་ས་ཏྟ་ཏི་ས་ཧ་སྶ་མ་ཏྟཱ ཛ་ཊི་ལཱ པ་ཎཱི་ཏ་པ་ཎཱི་ཏཱ་ནི ཨོ་ཛ་ཝ་ནྟཱ་ནི ཕ་ལཱ་ཕ་ལཱ་ནི ག་ཧེ་ཏྭཱ ཨཱ་ག་ཏཱ ས་ཏྠཱ་རཾ དི་སྭཱ ས་ཉྫཱ་ཏ་པྤ་སཱ་དཱ ཨ་ཏྟ་ནོ ཨཱ་ཙ་རི་ཡ་སྶ ཙ ས་ཏྠུ ཙ ནི་སི་ནྣཱ་ཀཱ་རཾ ཨོ་ལོ་ཀེ་ཏྭཱ, ‘‘ཨཱ་ཙ་རི་ཡ, མ་ཡཾ པུ་བྦེ ‘ཏུ་མྷེ་ཧི མ་ཧ་ནྟ་ཏ་རོ ཀོ་ཙི ན་ཏྠཱི’ཏི ཝི་ཙ་རཱ་མ, ཨ་ཡཾ པ་ན པུ་རི་སོ ཏུ་མྷེ་ཧི མ་ཧ་ནྟ་ཏ་རོ མ་ཉྙེ’’ཏི ཨཱ་ཧཾ་སུ. ‘‘ཀིཾ ཝ་དེ་ཐ, ཏཱ་ཏཱ? སཱ་ས་པེ་ན ས་དྡྷིཾ ཨ་ཊྛ་ས་ཊྛི་ཡོ་ཛ་ན་ས་ཏ་ས་ཧ་སྶུ་བྦེ་དྷཾ སི་ནེ་རུཾ ས་མཾ ཀཱ་ཏུཾ ཨི་ཙྪ་ཐ? ས་བྦ་ཉྙུ་བུ་དྡྷེ་ན མཾ ཏུ་ལྱཾ མཱ ཀ་རི་ཏྠཱ’’ཏི. ཨ་ཐ ཏེ ཏཱ་པ་སཱ ཨཱ་ཙ་རི་ཡ་སྶ ཝ་ཙ་ནཾ སུ་ཏྭཱ ‘‘ཡཱ་ཝ མ་ཧཱ ཝ་ཏཱ་ཡཾ པུ་རི་སུ་ཏྟ་མོ’’ཏི ས་བྦེ་ཝ པཱ་དེ་སུ ནི་པ་ཏི་ཏྭཱ ས་ཏྠཱ་རཾ ཝ་ནྡིཾ་སུ.
ཨ་ཐ ཏེ ཨཱ་ཙ་རི་ཡོ ཨཱ་ཧ – ‘‘ཏཱ་ཏཱ, ས་ཏྠུ ཨ་ནུ་ཙྪ་ཝི་ཀོ ནོ དེ་ཡྻ་དྷ་མྨོ ན་ཏྠི, ས་ཏྠཱ ཙ བྷི་ཀྑཱ་ཙཱ་ར་ཝེ་ལཱ་ཡ ཨི་དྷཱ་ག་ཏོ, ཧ་ནྡ མ་ཡཾ དེ་ཡྻ་དྷ་མྨཾ ཡ་ཐཱ་བ་ལཾ ད་སྶཱ་མ. ཏུ་མྷེ་ཧི ཡཾ ཡཾ པ་ཎཱི་ཏཾ ཕ་ལཱ་ཕ་ལཾ ཨཱ་བྷ་ཏཾ, ཏཾ ཏཾ ཨཱ་ཧ་ར་ཐཱ’’ཏི ཨཱ་ཧ་རཱ་པེ་ཏྭཱ ཧ་ཏྠེ དྷོ་ཝི་ཏྭཱ ས་ཡཾ ཏ་ཐཱ་ག་ཏ་སྶ པ་ཏྟེ པ་ཏི་ཊྛཱ་པེ་སི. ས་ཏྠཱ་རཱ ཙ ཕ་ལཱ་ཕ་ལེ པ་ཊི་གྒ་ཎྷི་ཏ་མ་ཏྟེ དེ་ཝ་ཏཱ དི་བྦོ་ཛཾ པ་ཀྑི་པིཾ་སུ. ཏཱ་པ་སོ ཨུ་ད་ཀ་མྤི ས་ཡ་མེ་ཝ པ་རི་སྶཱ་ཝེ་ཏྭཱ ཨ་དཱ་སི. ཏ་ཏོ བྷོ་ཛ་ན་ཀི་ཙྩཾ ནི་ཊྛཱ་པེ་ཏྭཱ ས་ཏྠ་རི ནི་སི་ནྣེ ས་བྦེ ཨ་ནྟེ་ཝཱ་སི་ཀེ པ་ཀྐོ་སི་ཏྭཱ ས་ཏྠུ ས་ནྟི་ཀེ སཱ་ར་ཎཱི་ཡཾ ཀ་ཐཾ ཀ་ཐེ་ནྟོ ནི་སཱི་དི. ས་ཏྠཱ ‘‘དྭེ ཨ་གྒ་སཱ་ཝ་ཀཱ བྷི་ཀྑུ་ས་ངྒྷེ་ན ས་དྡྷིཾ ཨཱ་ག་ཙྪ་ནྟཱུ’’ཏི ཙི་ནྟེ་སི. ཏེ ས་ཏྠུ ཙི་ཏྟཾ ཉ་ཏྭཱ ཏཱ་ཝ་དེ་ཝ ས་ཏ་ས་ཧ་སྶ་ཁཱི་ཎཱ་ས་ཝ་པ་རི་ཝཱ་རཱ ཨ་གྒ་སཱ་ཝ་ཀཱ ཨཱ་ག་ནྟྭཱ ས་ཏྠཱ་རཾ ཝ་ནྡི་ཏྭཱ ཨེ་ཀ་མ་ནྟཾ ཨ་ཊྛཾ་སུ.
ཏ་ཏོ ས་ར་ད་ཏཱ་པ་སོ ཨ་ནྟེ་ཝཱ་སི་ཀེ ཨཱ་མ་ནྟེ་སི – ‘‘ཏཱ་ཏཱ, ས་ཏྠུ བྷི་ཀྑུ་ས་ངྒྷ་སྶ ཙ པུ་པྥཱ་ས་ནེ་ན པཱུ་ཛཱ ཀཱ་ཏ་བྦཱ, ཏ་སྨཱ པུ་པྥཱ་ནི ཨཱ་ཧ་ར་ཐཱ’’ཏི. ཏེ ཏཱ་ཝ་དེ་ཝ ཨི་དྡྷི་ཡཱ ཝ་ཎྞ་ག་ནྡྷ་ས་མྤ་ནྣཱ་ནི པུ་པྥཱ་ནི ཨཱ་ཧ་རི་ཏྭཱ བུ་དྡྷ་སྶ ཡོ་ཛ་ན་པྤ་མཱ་ཎཾ པུ་པྥཱ་ས་ནཾ པ་ཉྙཱ་པེ་སུཾ, ཨུ་བྷི་ནྣཾ ཨ་གྒ་སཱ་ཝ་ཀཱ་ནཾ ཏི་གཱ་ཝུ་ཏཾ, སེ་ས་བྷི་ཀྑཱུ་ནཾ ཨ་ཌྜྷ་ཡོ་ཛ་ནི་ཀཱ་དི་བྷེ་དཾ, ས་ངྒྷ་ན་ཝ་ཀ་སྶ ཨུ་ས་བྷ་མ་ཏྟཾ པ་ཉྙཱ་པེ་སུཾ. ཨེ་ཝཾ ཏེ་སཾ པ་ཉྙ་ཏྟེ་སུ ཨཱ་ས་ནེ་སུ ས་ར་ད་ཏཱ་པ་སོ ཏ་ཐཱ་ག་ཏ་སྶ པུ་ར་ཏོ ཨ་ཉྫ་ལིཾ པ་གྒ་ཡ྄ཧ ཋི་ཏོ – ‘‘བྷ་ནྟེ, མ་ཡ྄ཧཾ ཨ་ནུ་གྒ་ཧ་ཏྠཱ་ཡ ཨི་མཾ པུ་པྥཱ་ས་ནཾ ཨ་བྷི་རུ་ཧ་ཐཱ’’ཏི ཨཱ་ཧ. ནི་སཱི་དི བྷ་ག་ཝཱ པུ་པྥཱ་ས་ནེ. ས་ཏྠ་རི ནི་སི་ནྣེ དྭེ ཨ་གྒ་སཱ་ཝ་ཀཱ སེ་ས་བྷི་ཀྑཱུ ཙ ཨ་ཏྟ་ནོ ཨ་ཏྟ་ནོ པ་ཏྟཱ་ས་ནེ ནི་སཱི་དིཾ་སུ. ས་ཏྠཱ ‘‘ཏེ་སཾ མ་ཧ་པྥ་ལཾ ཧོ་ཏཱུ’’ཏི ནི་རོ་དྷཾ ས་མཱ་པ་ཛྫི. ས་ཏྠུ ས་མཱ་པ་ནྣ་བྷཱ་ཝཾ ཉ་ཏྭཱ དྭེ ཨ་གྒ་སཱ་ཝ་ཀཱ་པི སེ་ས་བྷི་ཀྑཱུ་པི ནི་རོ་དྷཾ ས་མཱ་པ་ཛྫིཾ་སུ. ཏཱ་པ་སོ ས་ཏྟཱ་ཧཾ ནི་ར་ནྟ་རཾ པུ་པྥ་ཙྪ་ཏྟཾ དྷཱ་རེ་ནྟོ ཨ་ཊྛཱ་སི. ཨི་ཏ་རེ པ་ན ཝ་ན་མཱུ་ལ་ཕ་ལཱ་ཕ་ལཾ པ་རི་བྷུ་ཉྫི་ཏྭཱ སེ་ས་ཀཱ་ལེ ཨ་ཉྫ་ལིཾ པ་གྒ་ཡ྄ཧ ཨ་ཊྛཾ་སུ.
ས་ཏྠཱ ས་ཏྟཱ་ཧ་སྶ ཨ་ཙྩ་ཡེ་ན ནི་རོ་དྷ་ཏོ ཝུ་ཊྛཱ་ཡ ཨ་གྒ་སཱ་ཝ་ཀཾ ནི་ས་བྷ་ཏྠེ་རཾ ཨཱ་མ་ནྟེ་སི – ‘‘ཏཱ་པ་སཱ་ནཾ པུ་པྥཱ་ས་ནཱ་ནུ་མོ་ད་ནཾ ཀ་རོ་ཧཱི’’ཏི. ཐེ་རོ སཱ་ཝ་ཀ་པཱ་ར་མཱི་ཉཱ་ཎེ ཋ་ཏྭཱ ཏེ་སཾ པུ་པྥཱ་ས་ནཱ་ནུ་མོ་ད་ནཾ ཨ་ཀཱ་སི. ཏ་སྶ དེ་ས་ནཱ་ཝ་སཱ་ནེ ས་ཏྠཱ དུ་ཏི་ཡཾ ཨ་གྒ་སཱ་ཝ་ཀཾ ཨ་ནོ་མ་ཏྠེ་རཾ ཨཱ་མ་ནྟེ་སི – ‘‘ཏྭ་མྤི ཨི་མེ་སཾ དྷ་མྨཾ དེ་སེ་ཧཱི’’ཏི. སོ་པི ཏེ་པི་ཊ་ཀཾ བུ་དྡྷ་ཝ་ཙ་ནཾ ས་མྨ་སི་ཏྭཱ ཏེ་སཾ དྷ་མྨཾ ཀ་ཐེ་སི. དྭི་ནྣ་མྤི དེ་ས་ནཱ་ཡ ཨེ་ཀ་སྶ་པི དྷ་མྨཱ་བྷི་ས་མ་ཡོ ནཱ་ཧོ་སི. ཨ་ཐ ས་ཏྠཱ བུ་དྡྷ་ཝི་ས་ཡེ ཋ་ཏྭཱ དྷ་མྨ་དེ་ས་ནཾ ཨཱ་ར་བྷི. དེ་ས་ནཱ་ཝ་སཱ་ནེ ཋ་པེ་ཏྭཱ ས་ར་ད་ཏཱ་པ་སཾ ཨ་ཝ་སེ་སཱ ས་བྦེ་པི ཙ་ཏུ་ས་ཏྟ་ཏི་ས་ཧ་སྶ་མ་ཏྟཱ ཛ་ཊི་ལཱ ཨ་ར་ཧ་ཏྟཾ པཱ་པུ་ཎིཾ་སུ. ས་ཏྠཱ ‘‘ཨེ་ཐ, བྷི་ཀྑ་ཝོ’’ཏི ཧ་ཏྠཾ པ་སཱ་རེ་སི. ཏེ ཏཱ་ཝ་དེ་ཝ ཨ་ནྟ་ར་ཧི་ཏ་ཏཱ་པ་ས་ཝེ་སཱ ཨ་ཊྛ་པ་རི་ཀྑཱ་ར་ཝ་ར་དྷ་རཱ ས་ཊྛི་ཝ་སྶི་ཀ་ཏྠེ་རཱ ཝི་ཡ ཨ་ཧེ་སུཾ.
ས་ར་ད་ཏཱ་པ་སོ པ་ན ‘‘ཨ་ཧོ ཝ་ཏཱ་ཧ་མྤི ཨ་ཡཾ ནི་ས་བྷ་ཏྠེ་རོ ཝི་ཡ ཨ་ནཱ་ག་ཏེ ཨེ་ཀ་སྶ བུ་དྡྷ་སྶ ཨ་གྒ་སཱ་ཝ་ཀོ བྷ་ཝེ་ཡྻ’’ནྟི ས་ཏྠུ དེ་ས་ནཱ་ཀཱ་ལེ ཨུ་པྤ་ནྣ་པ་རི་ཝི་ཏ་ཀྐ་ཏཱ་ཡ ཨ་ཉྙ་ཝི་ཧི་ཏོ ཧུ་ཏྭཱ མ་གྒ་ཕ་ལཱ་ནི པ་ཊི་ཝི་ཛ྄ཛྷི་ཏུཾ ནཱ་ས་ཀྑི. ཨ་ཐ ཏ་ཐཱ་ག་ཏཾ ཝ་ནྡི་ཏྭཱ ཏ་ཐཱ པ་ཎི་དྷཱ་ནཾ ཨ་ཀཱ་སི. ས་ཏྠཱ་པི་སྶ ཨ་ན་ནྟ་རཱ་ཡེ་ན ས་མི་ཛ྄ཛྷ་ན་བྷཱ་ཝཾ དི་སྭཱ – ‘‘ཨི་ཏོ ཏྭཾ ཀ་པྤ་ས་ཏ་ས་ཧ་སྶཱ་དྷི་ཀཾ ཨེ་ཀཾ ཨ་ས་ངྑྱེ་ཡྻཾ ཨ་ཏི་ཀྐ་མི་ཏྭཱ གོ་ཏ་མ་སྶ ནཱ་མ ས་མྨཱ་ས་མྦུ་དྡྷ་སྶ ཨ་གྒ་སཱ་ཝ་ཀོ སཱ་རི་པུ་ཏྟོ ནཱ་མ བྷ་ཝི་སྶ་སཱི’’ཏི བྱཱ་ཀ་རི་ཏྭཱ དྷ་མྨ་ཀ་ཐཾ ཝ་ཏྭཱ བྷི་ཀྑུ་ས་ངྒྷ་པ་རི་ཝུ་ཏོ ཨཱ་ཀཱ་སཾ པ་ཀྑ་ནྡི.
ས་ར་ད་ཏཱ་པ་སོ་པི ས་ཧཱ་ཡ་ཀ་སྶ སི་རི་ཝ་ཌྜྷ་སྶ ས་ནྟི་ཀཾ ག་ནྟྭཱ, ས་མྨ, མ་ཡཱ ཨ་ནོ་མ་ད་སྶི་སྶ བྷ་ག་ཝ་ཏོ པཱ་ད་མཱུ་ལེ ཨ་ནཱ་ག་ཏེ ཨུ་པྤ་ཛྫ་ན་ཀ་སྶ གོ་ཏ་མ་སྶ ནཱ་མ ས་མྨཱ་ས་མྦུ་དྡྷ་སྶ ཨ་གྒ་སཱ་ཝ་ཀ་ཊྛཱ་ནཾ པ་ཏྠི་ཏཾ, ཏྭ་མྤི ཏ་སྶ དུ་ཏི་ཡ་སཱ་ཝ་ཀ་ཊྛཱ་ནཾ པ་ཏྠེ་ཧཱི་ཏི.
སི་རི་ཝ་ཌྜྷོ ཏཾ ཨུ་པ་དེ་སཾ སུ་ཏྭཱ ཨ་ཏྟ་ནོ ནི་ཝེ་ས་ན་དྭཱ་རེ ཨ་ཊྛ་ཀ་རཱི་ས་མ་ཏྟཾ ཋཱ་ནཾ ས་མ་ཏ་ལཾ ཀཱ་རེ་ཏྭཱ ལཱ་ཛ་པ་ཉྩ་མཱ་ནི པུ་པྥཱ་ནི ཝི་ཀི་རི་ཏྭཱ ནཱི་ལུ་པྤ་ལ་ཙྪ་ད་ནཾ མ་ཎྜ་པཾ ཀཱ་རེ་ཏྭཱ བུ་དྡྷཱ་ས་ནཾ པ་ཉྙཱ་པེ་ཏྭཱ བྷི་ཀྑཱུ་ན་མྤི ཨཱ་ས་ནཱ་ནི པ་ཉྙཱ་པེ་ཏྭཱ མ་ཧ་ནྟཾ ས་ཀྐཱ་ར་ས་མྨཱ་ནཾ ས་ཛྫེ་ཏྭཱ, ས་ར་ད་ཏཱ་པ་སེ་ན ས་ཏྠཱ་རཾ ནི་མ་ནྟཱ་པེ་ཏྭཱ ས་ཏྟཱ་ཧཾ མ་ཧཱ་དཱ་ནཾ པ་ཝ་ཏྟེ་ཏྭཱ, བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ མ་ཧཱ་ར་ཧེ་ཧི ཝ་ཏྠེ་ཧི ཨ་ཙྪཱ་དེ་ཏྭཱ, དུ་ཏི་ཡ་སཱ་ཝ་ཀ་བྷཱ་ཝཱ་ཡ པ་ཎི་དྷཱ་ནཾ ཨ་ཀཱ་སི. ས་ཏྠཱ་པི་སྶ ཨ་ན་ནྟ་རཱ་ཡེ་ན ས་མི་ཛ྄ཛྷ་ན་བྷཱ་ཝཾ དི་སྭཱ ཝུ་ཏྟ་ན་ཡེ་ན བྱཱ་ཀ་རི་ཏྭཱ བྷ་ཏྟཱ་ནུ་མོ་ད་ནཾ ཀ་ཏྭཱ པ་ཀྐཱ་མི. སི་རི་ཝ་ཌྜྷོ ཧ་ཊྛ་པ་ཧ་ཊྛོ ཡཱ་ཝ་ཛཱི་ཝཾ ཀུ་ས་ལ་ཀ་མྨཾ ཀ་ཏྭཱ དུ་ཏི་ཡ་ཙི་ཏྟ་ཝཱ་རེ ཀཱ་མཱ་ཝ་ཙ་ར་དེ་ཝ་ལོ་ཀེ ནི་བྦ་ཏྟི. ས་ར་ད་ཏཱ་པ་སོ ཙ་ཏྟཱ་རོ བྲ་ཧྨ་ཝི་ཧཱ་རེ བྷཱ་ཝེ་ཏྭཱ བྲ་ཧྨ་ལོ་ཀེ ནི་བྦ་ཏྟི.
ཏ་ཏོ པ་ཊྛཱ་ཡ ནེ་སཾ ཨུ་བྷི་ནྣ་མྤི ཨ་ནྟ་རཱ་ཀ་མྨཾ ན ཀ་ཐི་ཏཾ. ཨ་མྷཱ་ཀཾ པ་ན བྷ་ག་ཝ་ཏོ ཨུ་པྤ་ཏྟི་ཏོ པུ་རེ་ཏ་ར་མེ་ཝ ས་ར་ད་ཏཱ་པ་སོ རཱ་ཛ་ག་ཧ་སྶ ཨ་ཝི་དཱུ་རེ ཨུ་པ་ཏི་སྶ་གཱ་མེ རཱུ་པ་སཱ་རི་ཡཱ བྲཱ་ཧྨ་ཎི་ཡཱ ཀུ་ཙྪི་མྷི པ་ཊི་ས་ནྡྷིཾ ག་ཎྷི. ཏཾ་དི་ཝ་ས་མེ་ཝ་སྶ ས་ཧཱ་ཡོ་པི རཱ་ཛ་ག་ཧ་སྶེ་ཝ ཨ་ཝི་དཱུ་རེ ཀོ་ལི་ཏ་གཱ་མེ མོ་གྒ་ལི་ཡཱ བྲཱ་ཧྨ་ཎི་ཡཱ ཀུ་ཙྪི་མྷི པ་ཊི་ས་ནྡྷིཾ ག་ཎྷི. ཏཱ་ནི ཀི་ར དྭེ་པི ཀུ་ལཱ་ནི ཡཱ་ཝ ས་ཏྟ་མཱ ཀུ་ལ་པ་རི་ཝ་ཊྚཱ ཨཱ་བ་དྡྷ་པ་ཊི་བ་དྡྷ་ས་ཧཱ་ཡ་ཀཱ་ནེ་ཝ. ཏེ་སཾ དྭི་ནྣཾ ཨེ་ཀ་དི་ཝ་ས་མེ་ཝ ག་བྦྷ་པ་རི་ཧཱ་ར་མ་དཾ་སུ. ད་ས་མཱ་ས་ཙྩ་ཡེ་ན ཛཱ་ཏཱ་ན་མྤི ཏེ་སཾ ཚ་ས་ཊྛི དྷཱ་ཏི་ཡོ ཨུ་པ་ཊྛཱ་པེ་སུཾ, ནཱ་མ་གྒ་ཧ་ཎ་དི་ཝ་སེ རཱུ་པ་སཱ་རི་བྲཱ་ཧྨ་ཎི་ཡཱ པུ་ཏྟ་སྶ ཨུ་པ་ཏི་སྶ་གཱ་མེ ཛེ་ཊྛ་ཀུ་ལ་སྶ པུ་ཏྟ་ཏྟཱ ཨུ་པ་ཏི་སྶོཏི ནཱ་མཾ ཨ་ཀཾ་སུ. ཨི་ཏ་ར་སྶ ཀོ་ལི་ཏ་གཱ་མེ ཛེ་ཊྛ་ཀུ་ལ་སྶ པུ་ཏྟ་ཏྟཱ ཀོ་ལི་ཏོཏི ནཱ་མཾ ཨ་ཀཾ་སུ. ཏེ ཨུ་བྷོ་པི མ་ཧ་ཏཱ པ་རི་ཝཱ་རེ་ན ཝ་ཌྜྷ་ནྟཱ ཝུ་དྡྷི་མ་ནྭཱ་ཡ ས་བྦ་སི་པྤཱ་ནཾ པཱ་རཾ ཨ་ག་མཾ་སུ.
ཨ་ཐེ་ཀ་དི་ཝ་སཾ ཏེ རཱ་ཛ་ག་ཧེ གི་ར་གྒ་ས་མ་ཛྫཾ པ་སྶ་ནྟཱ མ་ཧཱ་ཛ་ནཾ ས་ནྣི་པ་ཏི་ཏཾ དི་སྭཱ ཉཱ་ཎ་སྶ པ་རི་པཱ་ཀ་ག་ཏ་ཏྟཱ ཡོ་ནི་སོ ཨུ་མྨུ་ཛྫ་ནྟཱ ‘‘ས་བྦེ་པི་མེ ཨོ་རཾ ཝ་སྶ་ས་ཏཱ་ནཾ མ་ཙྩུ་མུ་ཁེ པ་ཏི་སྶ་ནྟཱི’’ཏི སཾ་ཝེ་གཾ པ་ཊི་ལ་བྷི་ཏྭཱ ‘‘ཨ་མྷེ་ཧི མོ་ཀྑ་དྷ་མྨོ པ་རི་ཡེ་སི་ཏ་བྦོ, ཏ་ཉྩ པ་རི་ཡེ་ས་ནྟེ་ཧི ཨེ་ཀཾ པ་བྦ་ཛྫཾ ལ་དྡྷུཾ ཝ་ཊྚ་ཏཱི’’ཏི ནི་ཙྪ་ཡཾ ཀ་ཏྭཱ པ་ཉྩ་ཧི མཱ་ཎ་ཝ་ཀ་ས་ཏེ་ཧི ས་དྡྷིཾ ས་ཉྩ་ཡ་སྶ པ་རི་བྦཱ་ཛ་ཀ་སྶ ས་ནྟི་ཀེ པ་བྦ་ཛིཾ་སུ. ཏེ་སཾ པ་བྦ་ཛི་ཏ་ཀཱ་ལ་ཏོ པ་ཊྛཱ་ཡ ས་ཉྩ་ཡོ ལཱ་བྷ་གྒ་ཡ་ས་གྒ་པྤ་ཏྟོ ཨ་ཧོ་སི. ཏེ ཀ་ཏི་པཱ་ཧེ་ནེ་ཝ ས་བྦཾ ས་ཉྩ་ཡ་སྶ ས་མ་ཡཾ པ་རི་གྒ་ཎྷི་ཏྭཱ ཏ་ཏྠ སཱ་རཾ ཨ་དི་སྭཱ ཏ་ཏོ ནི་ཀྑ་མི་ཏྭཱ ཏ་ཏྠ ཏ་ཏྠ ཏེ ཏེ པ་ཎྜི་ཏ་ས་མྨ་ཏེ ས་མ་ཎ་བྲཱ་ཧྨ་ཎེ པ་ཉྷཾ པུ་ཙྪ་ནྟི, ཏེ ཏེ་ཧི པུ་ཊྛཱ ནེ་ཝ ས་མྤཱ་ཡ་ནྟི, ཨ་ཉྙ་ད་ཏྠུ ཏེ་ཡེ་ཝ ཏེ་སཾ པ་ཉྷཾ ཝི་སྶ་ཛྫེ་ནྟི. ཨེ་ཝཾ ཏེ མོ་ཀྑཾ པ་རི་ཡེ་ས་ནྟཱ ཀ་ཏི་ཀཾ ཨ་ཀཾ་སུ – ‘‘ཨ་མྷེ་སུ ཡོ པ་ཋ་མཾ ཨ་མ་ཏཾ ཨ་དྷི་ག་ཙྪ་ཏི, སོ ཨི་ཏ་ར་སྶ ཨཱ་རོ་ཙེ་ཏཱུ’’ཏི.
ཏེ་ན ཙ ས་མ་ཡེ་ན ཨ་མྷཱ་ཀཾ ས་ཏྠ་རི པ་ཋ་མཱ་བྷི་ས་མྦོ་དྷིཾ པ་ཏྭཱ པ་ཝ་ཏྟི་ཏ་ཝ་ར་དྷ་མྨ་ཙ་ཀྐེ ཨ་ནུ་པུ་བྦེ་ན ཨུ་རུ་ཝེ་ལ་ཀ་སྶ་པཱ་དི་ཀེ ས་ཧ་སྶ་ཛ་ཊི་ལེ ད་མེ་ཏྭཱ རཱ་ཛ་ག་ཧེ ཝི་ཧ་ར་ནྟེ ཨེ་ཀ་དི་ཝ་སཾ ཨུ་པ་ཏི་སྶོ པ་རི་བྦཱ་ཛ་ཀོ པ་རི་བྦཱ་ཛ་ཀཱ་རཱ་མཾ ག་ཙྪ་ནྟོ ཨཱ་ཡ་སྨ་ནྟཾ ཨ་སྶ་ཛི་ཏྠེ་རཾ རཱ་ཛ་ག་ཧེ པི་ཎྜཱ་ཡ ཙ་ར་ནྟཾ དི་སྭཱ ‘‘ན མ་ཡཱ ཨེ་ཝ་རཱུ་པོ ཨཱ་ཀ་པྤ་ས་མྤ་ནྣོ པ་བྦ་ཛི་ཏོ དི་ཊྛ་པུ་བྦོ, ས་ནྟ་དྷ་མྨེ་ན ནཱ་མ ཨེ་ཏྠ བྷ་ཝི་ཏ་བྦ’’ནྟི ས་ཉྫཱ་ཏ་པྤ་སཱ་དོ པ་ཉྷཾ པུ་ཙྪི་ཏུཾ ཨཱ་ཡ་སྨ་ནྟཾ ཨུ་དི་ཀྑ་ནྟོ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷི. ཐེ་རོ་པི ལ་དྡྷ་པི་ཎྜ་པཱ་ཏོ པ་རི་བྷུ་ཉྫི་ཏུཾ པ་ཏི་རཱུ་པཾ ཨོ་ཀཱ་སཾ ག་ཏོ. པ་རི་བྦཱ་ཛ་ཀོ ཨ་ཏྟ་ནོ པ་རི་བྦཱ་ཛ་ཀ་པཱི་ཋཾ པ་ཉྙཱ་པེ་ཏྭཱ ཨ་དཱ་སི. བྷ་ཏྟ་ཀི་ཙྩ་པ་རི་ཡོ་སཱ་ནེ ཙ་སྶ ཨ་ཏྟ་ནོ ཀུ་ཎྜི་ཀཱ་ཡ ཨུ་ད་ཀཾ ཨ་དཱ་སི.
ཨེ་ཝཾ སོ ཨཱ་ཙ་རི་ཡ་ཝ་ཏྟཾ ཀ་ཏྭཱ ཀ་ཏ་བྷ་ཏྟ་ཀི་ཙྩེ་ན ཐེ་རེ་ན ས་དྡྷིཾ པ་ཊི་ས་ནྠཱ་རཾ ཀ་ཏྭཱ ‘‘ཀོ ཝཱ ཏེ ས་ཏྠཱ, ཀ་སྶ ཝཱ ཏྭཾ དྷ་མྨཾ རོ་ཙེ་སཱི’’ཏི པུ་ཙྪི. ཐེ་རོ ས་མྨཱ་ས་མྦུ་དྡྷཾ ཨ་པ་དི་སི. པུ་ན ཏེ་ན ‘‘ཀིཾ་ཝཱ་དཱི པ་ནཱ་ཡ་སྨ་ཏོ ས་ཏྠཱ’’ཏི པུ་ཊྛོ ‘‘ཨི་མ་སྶ སཱ་ས་ན་སྶ ག་མྦྷཱི་ར་ཏཾ ད་སྶེ་སྶཱ་མཱི’’ཏི ཨ་ཏྟ་ནོ ན་ཝ་ཀ་བྷཱ་ཝཾ པ་ཝེ་དེ་ཏྭཱ ས་ངྑེ་པ་ཝ་སེ་ན ཙ་སྶ སཱ་ས་ན་དྷ་མྨཾ ཀ་ཐེ་ནྟོ ‘‘ཡེ དྷ་མྨཱ ཧེ་ཏུ་པྤ་བྷ་ཝཱ’’ཏི (མ་ཧཱ་ཝ. ༦༠; ཨ་པ. ཐེ་ར ༡.༡.༢༨༦; པེ་ཊ་ཀོ. ༩) གཱ་ཐ་མཱ་ཧ. པ་རི་བྦཱ་ཛ་ཀོ པ་ཋ་མ་པ་ད་དྭ་ཡ་མེ་ཝ སུ་ཏྭཱ ས་ཧ་སྶ་ན་ཡ་ས་མྤ་ནྣེ སོ་ཏཱ་པ་ཏྟི་ཕ་ལེ པ་ཏི་ཊྛཱ་སི, ཨི་ཏ་རཾ པ་ད་དྭ་ཡཾ སོ་ཏཱ་པ་ནྣ་ཀཱ་ལེ ནི་ཊྛཱ་སི. གཱ་ཐཱ་པ་རི་ཡོ་སཱ་ནེ པ་ན སོ་ཏཱ་པ་ནྣོ ཧུ་ཏྭཱ ཨུ་པ་རི ཝི་སེ་སེ ཨ་པྤ་ཝ་ཏྟེ་ནྟེ ‘‘བྷ་ཝི་སྶ་ཏི ཨེ་ཏྠ ཀཱ་ར་ཎ’’ནྟི ས་ལླ་ཀྑེ་ཏྭཱ ཐེ་རཾ ཨཱ་ཧ – ‘‘མཱ, བྷ་ནྟེ, ཨུ་པ་རི དྷ་མྨ་དེ་ས་ནཾ ཝ་ཌྜྷ་ཡི་ཏྠ, ཨེ་ཏྟ་ཀ་མེ་ཝ ཧོ་ཏུ, ཀ་ཧཾ ཨ་མྷཱ་ཀཾ ས་ཏྠཱ ཝ་ས་ཏཱི’’ཏི? ‘‘ཝེ་ལུ༹་ཝ་ནེ’’ཏི. ‘‘བྷ་ནྟེ, ཏུ་མྷེ པུ་ར་ཏོ ག་ཙྪ་ཐ, ཨ་ཧཾ མ་ཡ྄ཧཾ ས་ཧཱ་ཡ་ཀ་སྶ ཀ་ཏ་པ་ཊི་ཉྙཾ མོ་ཙེ་ཏྭཱ ཏཾ ག་ཧེ་ཏྭཱ ཨཱ་ག་མི་སྶཱ་མཱི’’ཏི པ་ཉྩ་པ་ཏི་ཊྛི་ཏེ་ན ཝ་ནྡི་ཏྭཱ ཏི་ཀྑ་ཏྟུཾ པ་ད་ཀྑི་ཎཾ ཀ་ཏྭཱ ཐེ་རཾ ཨུ་ཡྻོ་ཛེ་ཏྭཱ པ་རི་བྦཱ་ཛ་ཀཱ་རཱ་མཾ ཨ་ག་མཱ་སི.
ཀོ་ལི་ཏ་པ་རི་བྦཱ་ཛ་ཀོ ཏཾ དཱུ་ར་ཏོ་ཝ ཨཱ་ག་ཙྪ་ནྟཾ དི་སྭཱ ‘‘མུ་ཁ་ཝ་ཎྞོ ན ཨ་ཉྙ་དི་ཝ་སེ་སུ ཝི་ཡ, ཨ་དྡྷཱ་ནེ་ན ཨ་མ་ཏཾ ཨ་དྷི་ག་ཏཾ བྷ་ཝི་སྶ་ཏཱི’’ཏི ཏེ་ནེ་ཝ་སྶ ཝི་སེ་སཱ་དྷི་ག་མཾ ས་མྦྷཱ་ཝེ་ཏྭཱ ཨ་མ་ཏཱ་དྷི་ག་མཾ པུ་ཙྪི. སོ་པི་སྶ ‘‘ཨཱ་མཱ་ཝུ་སོ, ཨ་མ་ཏཾ ཨ་དྷི་ག་ཏ’’ནྟི པ་ཊི་ཛཱ་ནི་ཏྭཱ ཏ་མེ་ཝ གཱ་ཐཾ ཨ་བྷཱ་སི. གཱ་ཐཱ་པ་རི་ཡོ་སཱ་ནེ ཀོ་ལི་ཏོ སོ་ཏཱ་པ་ཏྟི་ཕ་ལེ པ་ཏི་ཊྛ་ཧི་ཏྭཱ ཨཱ་ཧ – ‘‘ཀ་ཧཾ ནོ ས་ཏྠཱ’’ཏི? ‘‘ཝེ་ལུ༹་ཝ་ནེ’’ཏི. ‘‘ཏེ་ན ཧི, ཨཱ་ཝུ་སོ, ཨཱ་ཡཱ་མ, ས་ཏྠཱ་རཾ པ་སྶི་སྶཱ་མཱ’’ཏི. ཨུ་པ་ཏི་སྶོ ས་བྦ་ཀཱ་ལ་མྤི ཨཱ་ཙ་རི་ཡ་པཱུ་ཛ་ཀོ་ཝ, ཏ་སྨཱ ས་ཉྩ་ཡ་སྶ ས་ནྟི་ཀཾ ག་ནྟྭཱ ས་ཏྠུ གུ་ཎེ པ་ཀཱ་སེ་ཏྭཱ ཏ་མྤི ས་ཏྠུ ས་ནྟི་ཀཾ ནེ་ཏུ་ཀཱ་མོ ཨ་ཧོ་སི. སོ ལཱ་བྷཱ་སཱ་པ་ཀ་ཏོ ཨ་ནྟེ་ཝཱ་སི་ཀ་བྷཱ་ཝཾ ཨ་ནི་ཙྪ་ནྟོ ‘‘ན ས་ཀྐོ་མི ཙཱ་ཊི ཧུ་ཏྭཱ ཨུ་ད་ཀ་སི་ཉྩ་ནཾ ཧོ་ཏུ’’ནྟི པ་ཊི་ཀྑི་པི. ཏེ ཨ་ནེ་ཀེ་ཧི ཀཱ་ར་ཎེ་ཧི ཏཾ ས་ཉྙཱ་པེ་ཏུཾ ཨ་ས་ཀྐོ་ནྟཱ ཨ་ཏྟ་ནོ ཨོ་ཝཱ་དེ ཝ་ཏྟ་མཱ་ནེ་ཧི ཨ་ཌྜྷ་ཏེ་ཡྻ་ས་ཏེ་ཧི ཨ་ནྟེ་ཝཱ་སི་ཀེ་ཧི ས་དྡྷིཾ ཝེ་ལུ༹་ཝ་ནཾ ཨ་ག་མཾ་སུ. ས་ཏྠཱ ཏེ དཱུ་ར་ཏོ་ཝ ཨཱ་ག་ཙྪ་ནྟེ དི་སྭཱ ‘‘ཨེ་ཏཾ མེ སཱ་ཝ་ཀ་ཡུ་གཾ བྷ་ཝི་སྶ་ཏི ཨ་གྒཾ བྷ་དྡ་ཡུ་ག’’ནྟི ཝ་ཏྭཱ ཏེ་སཾ པ་རི་སཱ་ཡ ཙ་རི་ཡ་ཝ་སེ་ན དྷ་མྨཾ དེ་སེ་ཏྭཱ ཨ་ར་ཧ་ཏྟེ པ་ཏི་ཊྛཱ་པེ་ཏྭཱ ཨེ་ཧི་བྷི་ཀྑུ་བྷཱ་ཝེ་ན ཨུ་པ་ས་མྤ་དཾ ཨ་དཱ་སི. ཡ་ཐཱ ཏེ་སཾ, ཨེ་ཝཾ ཨ་གྒ་སཱ་ཝ་ཀཱ་ན་མྤི ཨི་དྡྷི་མ་ཡ་པ་ཏྟ་ཙཱི་ཝ་རཾ ཨཱ་ག་ཏ་མེ་ཝ. ཨུ་པ་རི་མ་གྒ་ཏྟ་ཡ་ཀི་ཙྩཾ པ་ན ན ནི་ཊྛཱ་ཏི. ཀ་སྨཱ? སཱ་ཝ་ཀ་པཱ་ར་མཱི་ཉཱ་ཎ་སྶ མ་ཧ་ནྟ་ཏཱ་ཡ.
ཏེ་སུ ཨཱ་ཡ་སྨཱ མ་ཧཱ་མོ་གྒ་ལླཱ་ནོ པ་བྦ་ཛི་ཏ་དི་ཝ་ས་ཏོ ས་ཏྟ་མེ དི་ཝ་སེ མ་ག་དྷ་ར་ཊྛེ ཀ་ལླ་ཝཱ་ལ་གཱ་མེ ས་མ་ཎ་དྷ་མྨཾ ཀ་རོ་ནྟོ ཐི་ན་མི་དྡྷེ ཨོ་ཀྐ་ནྟེ ས་ཏྠཱ་རཱ སཾ་ཝེ་ཛི་ཏོ ཐི་ན་མི་དྡྷཾ ཝི་ནོ་དེ་ཏྭཱ དྷཱ་ཏུ་ཀ་མྨ་ཊྛཱ་ནཾ (ཨ. ནི. ༧.༦༡) སུ་ཎ་ནྟོ ཨེ་ཝ ཨུ་པ་རི་མ་གྒ་ཏྟ་ཡཾ ཨ་དྷི་ག་ནྟྭཱ སཱ་ཝ་ཀ་པཱ་ར་མཱི་ཉཱ་ཎ་སྶ མ་ཏྠ་ཀཾ པཱ་པུ་ཎི. ཨཱ་ཡ་སྨཱ སཱ་རི་པུ་ཏྟོ པ་བྦ་ཛི་ཏ་དི་ཝ་ས་ཏོ ཨ་ཌྜྷ་མཱ་སཾ ཨ་ཏི་ཀྐ་མི་ཏྭཱ ས་ཏྠཱ་རཱ ས་དྡྷིཾ རཱ་ཛ་ག་ཧེ སཱུ་ཀ་ར་ཁ་ཏ་ལེ་ཎེ ཝི་ཧ་ར་ནྟོ ཨ་ཏྟ་ནོ བྷཱ་གི་ནེ་ཡྻ་སྶ དཱི་གྷ་ན་ཁ་པ་རི་བྦཱ་ཛ་ཀ་སྶ ཝེ་ད་ནཱ་པ་རི་གྒ་ཧ་སུ་ཏྟ་ནྟེ (མ. ནི. ༢.༢༠༡ ཨཱ་ད་ཡོ) དེ་སི་ཡ་མཱ་ནེ དེ་ས་ནཱ་ནུ་སཱ་རེ་ན ཉཱ་ཎཾ པེ་སེ་ཏྭཱ པ་ར་སྶ ཝ་ཌྜྷི་ཏཾ བྷ་ཏྟཾ བྷུ་ཉྫ་ནྟོ ཝི་ཡ སཱ་ཝ་ཀ་པཱ་ར་མཱི་ཉཱ་ཎ་སྶ མ་ཏྠ་ཀཾ པཱ་པུ་ཎི. ཨི་ཏི དྭི་ནྣ་མྤི ཨ་གྒ་སཱ་ཝ་ཀཱ་ནཾ ས་ཏྠུ ས་མཱི་པེ ཨེ་ཝ སཱ་ཝ་ཀ་པཱ་ར་མཱི་ཉཱ་ཎཾ མ་ཏྠ་ཀཾ པ་ཏྟཾ. ཏེ་ན ཝུ་ཏྟཾ ཨ་པ་དཱ་ནེ (ཨ་པ. ཐེ་ར ༡.༡.༡༤༡-༣༧༤) –
‘‘ཧི་མ་ཝ་ནྟ་སྶ ཨ་ཝི་དཱུ་རེ, ལ་མྦ་ཀོ ནཱ་མ པ་བྦ་ཏོ;
ཨ་སྶ་མོ སུ་ཀ་ཏོ མ་ཡ྄ཧཾ, པ་ཎྞ་སཱ་ལཱ སུ་མཱ་པི་ཏཱ.
‘‘ཨུ་ཏྟཱ་ན་ཀཱུ་ལཱ ན་དི་ཀཱ, སུ་པ་ཏི་ཏྠཱ མ་ནོ་ར་མཱ;
སུ་སུ་དྡྷ་པུ་ལི་ནཱ་ཀི་ཎྞཱ, ཨ་ཝི་དཱུ་རེ མ་མ་སྶ་མཾ.
‘‘ཨ་ས་ཀྑ་རཱ ཨ་པ་བྦྷཱ་རཱ, སཱ་དུ ཨ་པྤ་ཊི་ག་ནྡྷི་ཀཱ;
ས་ནྡ་ཏཱི ན་དི་ཀཱ ཏ་ཏྠ, སོ་བྷ་ཡ་ནྟཱ མ་མ་སྶ་མཾ.
‘‘ཀུ་མྦྷཱི་ལཱ མ་ཀ་རཱ ཙེ་ཏྠ, སུ་སུ་མཱ་རཱ ཙ ཀ་ཙྪ་པཱ;
ཙ་ར་ནྟི ན་དི་ཡཱ ཏ་ཏྠ, སོ་བྷ་ཡ་ནྟཱ མ་མ་སྶ་མཾ.
‘‘པཱ་ཋཱི་ནཱ པཱ་ཝུ་སཱ མ་ཙྪཱ, བ་ལ་ཛཱ མུ་ཉྫ་རོ་ཧི་ཏཱ;
ཝ་གྒ་ལཱ༹ པ་པ་ཏཱ་ཡ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘ཨུ་བྷོ ཀཱུ་ལེ་སུ ན་དི་ཡཱ, པུ་པྥི་ནོ ཕ་ལི་ནོ དུ་མཱ;
ཨུ་བྷ་ཏོ ཨ་བྷི་ལ་མྦ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘ཨ་མྦཱ སཱ་ལཱ ཙ ཏི་ལ་ཀཱ, པཱ་ཊ་ལཱི སི་ནྡུ་ཝཱ་ར་ཀཱ;
དི་བྦ་ག་ནྡྷཱ ས་མྤ་ཝ་ནྟི, པུ་པྥི་ཏཱ མ་མ ཨ་སྶ་མེ.
‘‘ཙ་མྨ་ཀཱ ས་ལ༹་ལཱ ནཱི་པཱ, ནཱ་ག་པུ་ནྣཱ་ག་ཀེ་ཏ་ཀཱ;
དི་བྦ་ག་ནྡྷཱ ས་མྤ་ཝ་ནྟི, པུ་པྥི་ཏཱ མ་མ ཨ་སྶ་མེ.
‘‘ཨ་ཏི་མུ་ཏྟཱ ཨ་སོ་ཀཱ ཙ, བྷ་གི་ནཱི་མཱ་ལཱ ཙ པུ་པྥི་ཏཱ;
ཨ་ངྐོ་ལཱ བི་མྦི་ཛཱ་ལཱ ཙ, པུ་པྥི་ཏཱ མ་མ ཨ་སྶ་མེ.
‘‘ཀེ་ཏ་ཀཱ ཀ་ནྡ་ལི ཙེ་ཝ, གོ་དྷུ་ཀཱ ཏི་ཎ་སཱུ་ལི་ཀཱ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘ཀ་ཎི་ཀཱ་རཱ ཀ་ཎྞི་ཀཱ ཙ, ཨ་ས་ནཱ ཨ་ཛྫུ་ནཱ བ་ཧཱུ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘པུ་ནྣཱ་གཱ གི་རི་པུ་ནྣཱ་གཱ, ཀོ་ཝི་ལཱ༹་རཱ ཙ པུ་པྥི་ཏཱ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘ཨུ་དྡཱ་ལ་ཀཱ ཙ ཀུ་ཊ་ཛཱ, ཀ་ད་མྦཱ ཝ་ཀུ་ལཱ བ་ཧཱུ;
དི་བྦ་ག་ནྡྷཾ ས་མྤ་ཝ་ནྟཱ, སོ་བྷ་ཡ་ནྟི མ་མ་སྶ་མཾ.
‘‘ཨཱ་ལ༹་ཀཱ ཨི་སི་མུ་གྒཱ ཙ, ཀ་ད་ལི་མཱ་ཏུ་ལུ་ངྒི་ཡོ;
ག་ནྡྷོ་ད་ཀེ་ན སཾ་ཝ་ཌྜྷཱ, ཕ་ལཱ་ནི དྷཱ་ར་ཡ་ནྟི ཏེ.
‘‘ཨ་ཉྙེ པུ་པྥ་ནྟི པ་དུ་མཱ, ཨ་ཉྙེ ཛཱ་ཡ་ནྟི ཀེ་ས་རཱི;
ཨ་ཉྙེ ཨོ་པུ་པྥཱ པ་དུ་མཱ, པུ་པྥི་ཏཱ ཏ་ལཱ༹་ཀེ ཏ་དཱ.
‘‘ག་བྦྷཾ ག་ཎྷ་ནྟི པ་དུ་མཱ, ནི་དྡྷཱ་ཝ་ནྟི མུ་ལཱ༹་ལི་ཡོ;
སི་ངྒྷཱ་ཊི་པ་ཏྟ་མཱ་ཀི་ཎྞཱ, སོ་བྷ་ནྟི ཏ་ལཱ༹་ཀེ ཏ་དཱ.
‘‘ན་ཡི་ཏཱ ཨ་མྦ་ག་ནྡྷཱི ཙ, ཨུ་ཏྟ་ལཱི བ་ནྡྷུ་ཛཱི་ཝ་ཀཱ;
དི་བྦ་ག་ནྡྷཱ ས་མྤ་ཝ་ནྟི, པུ་པྥི་ཏཱ ཏ་ལཱ༹་ཀེ ཏ་དཱ.
‘‘པཱ་ཋཱི་ནཱ པཱ་ཝུ་སཱ མ་ཙྪཱ, བ་ལ་ཛཱ མུ་ཉྫ་རོ་ཧི་ཏཱ;
སཾ་གུ་ལཱ མ་གྒུ་རཱ ཙེ་ཝ, ཝ་ས་ནྟི ཏ་ལཱ༹་ཀེ ཏ་དཱ.
‘‘ཀུ་མྦྷཱི་ལཱ སུ་སུ་མཱ་རཱ ཙ, ཏ་ནྟི་གཱ་ཧཱ ཙ ར་ཀྑ་སཱ;
ཨོ་གུ་ཧཱ ཨ་ཛ་ག་རཱ ཙ, ཝ་ས་ནྟི ཏ་ལཱ༹་ཀེ ཏ་དཱ.
‘‘པཱ་རེ་ཝ་ཏཱ ར་ཝི་ཧཾ་སཱ, ཙ་ཀྐ་ཝཱ་ཀཱ ན་དཱི་ཙ་རཱ;
ཀོ་ཀི་ལཱ སུ་ཀ་སཱ་ལི༹་ཀཱ, ཨུ་པ་ཛཱི་ཝ་ནྟི ཏཾ ས་རཾ.
‘‘ཀུ་ཀུ་ཏྠ་ཀཱ ཀུ་ལཱི༹་ར་ཀཱ, ཝ་ནེ པོ་ཀྑ་ར་སཱ་ཏ་ཀཱ;
དི་ནྡི་བྷཱ སུ་ཝ་པོ་ཏཱ ཙ, ཨུ་པ་ཛཱི་ཝ་ནྟི ཏཾ ས་རཾ.
‘‘ཧཾ་སཱ ཀོ་ཉྩཱ མ་ཡཱུ་རཱ ཙ, ཀོ་ཀི་ལཱ ཏ་མྦ་ཙཱུ་ལ༹་ཀཱ;
པ་མྤ་ཀཱ ཛཱི་ཝཾ་ཛཱི་ཝཱ ཙ, ཨུ་པ་ཛཱི་ཝ་ནྟི ཏཾ ས་རཾ.
‘‘ཀོ་སི་ཀཱ པོ་ཊྛ་སཱི་སཱ ཙ, ཀུ་ར་རཱ སེ་ན་ཀཱ བ་ཧཱུ;
མ་ཧཱ་ཀཱ་ལཱ༹ ཙ ས་ཀུ་ཎཱ, ཨུ་པ་ཛཱི་ཝ་ནྟི ཏཾ ས་རཾ.
‘‘པ་ས་དཱ ཙ ཝ་རཱ་ཧཱ ཙ, ཙ་མ་རཱ ག་ཎྜ་ཀཱ བ་ཧཱུ;
རོ་ཧི་ཙྩཱ སུ་ཀ་པོ་ཏཱ ཙ, ཨུ་པ་ཛཱི་ཝ་ནྟི ཏཾ ས་རཾ.
‘‘སཱི་ཧ་བྱ་གྒྷཱ ཙ དཱི་པཱི ཙ, ཨ་ཙྪ་ཀོ་ཀ་ཏ་ར་ཙྪ་ཀཱ;
ཏི་དྷཱ པ་བྷི་ནྣ་མཱ་ཏ་ངྒཱ, ཨུ་པ་ཛཱི་ཝ་ནྟི ཏཾ ས་རཾ.
‘‘ཀི་ནྣ་རཱ ཝཱ་ན་རཱ ཙེ་ཝ, ཨ་ཐོ་པི ཝ་ན་ཀ་མྨི་ཀཱ;
ཙེ་ཏཱ ཙ ལུ་དྡ་ཀཱ ཙེ་ཝ, ཨུ་པ་ཛཱི་ཝ་ནྟི ཏཾ ས་རཾ.
‘‘ཏི་ནྡུ་ཀཱ་ནི པི་ཡཱ་ལཱ་ནི, མ་དྷུ་ཀེ ཀཱ་སུ་མཱ་རི་ཡོ;
དྷུ་ཝཾ ཕ་ལཱ་ནི དྷཱ་རེ་ནྟི, ཨ་ཝི་དཱུ་རེ མ་མ་སྶ་མཾ.
‘‘ཀོ་ས་མྦཱ ས་ལ༹་ལཱ ནི་མྦཱ, སཱ་དུ་ཕ་ལ་ས་མཱ་ཡུ་ཏཱ;
དྷུ་ཝཾ ཕ་ལཱ་ནི དྷཱ་རེ་ནྟི, ཨ་ཝི་དཱུ་རེ མ་མ་སྶ་མཾ.
‘‘ཧ་རཱི་ཏ་ཀཱ ཨཱ་མ་ལ་ཀཱ, ཨ་མྦ་ཛ་མྦུ་ཝི་བྷཱི་ཏ་ཀཱ;
ཀོ་ལཱ བྷ་ལླཱ་ཏ་ཀཱ བི་ལླཱ, ཕ་ལཱ་ནི དྷཱ་ར་ཡ་ནྟི ཏེ.
‘‘ཨཱ་ལུ་ཝཱ ཙ ཀ་ལ༹་མྦཱ ཙ, བི་ལཱ༹་ལཱི་ཏ་ཀྐ་ལཱ༹་ནི ཙ;
ཛཱི་ཝ་ཀཱ སུ་ཏ་ཀཱ ཙེ་ཝ, བ་ཧུ་ཀཱ མ་མ ཨ་སྶ་མེ.
‘‘ཨ་སྶ་མ་སྶཱ་ཝི་དཱུ་ར་མྷི, ཏ་ལཱ༹་ཀཱ་སུཾ སུ་ནི་མྨི་ཏཱ;
ཨ་ཙྪོ་ད་ཀཱ སཱི་ཏ་ཛ་ལཱ, སུ་པ་ཏི་ཏྠཱ མ་ནོ་ར་མཱ.
‘‘པ་དུ་མུ་པྤ་ལ་ས་ཉྪ་ནྣཱ, པུ་ཎྜ་རཱི་ཀ་ས་མཱ་ཡུ་ཏཱ;
མ་ནྡཱ་ལ་ཀེ་ཧི ས་ཉྪ་ནྣཱ, དི་བྦ་ག་ནྡྷོ་པ་ཝཱ་ཡ་ཏི.
‘‘ཨེ་ཝཾ ས་བྦ་ངྒ་ས་མྤ་ནྣེ, པུ་པྥི་ཏེ ཕ་ལི་ཏེ ཝ་ནེ;
སུ་ཀ་ཏེ ཨ་སྶ་མེ ར་མྨེ, ཝི་ཧ་རཱ་མི ཨ་ཧཾ ཏ་དཱ.
‘‘སཱི་ལ་ཝཱ ཝ་ཏ་ས་མྤ་ནྣོ, ཛྷཱ་ཡཱི ཛྷཱ་ན་ར་ཏོ ས་དཱ;
པ་ཉྩཱ་བྷི་ཉྙཱ་བ་ལ་པྤ་ཏྟོ, སུ་རུ་ཙི ནཱ་མ ཏཱ་པ་སོ.
‘‘ཙ་ཏུ་ཝཱི་ས་ས་ཧ་སྶཱ་ནི, སི་སྶཱ མ་ཡ྄ཧཾ ཨུ་པ་ཊྛ་ཧུཾ;
ས་བྦེ མཾ བྲཱ་ཧྨ་ཎཱ ཨེ་ཏེ, ཛཱ་ཏི་མ་ནྟོ ཡ་ས་སྶི་ནོ.
‘‘ལ་ཀྑ་ཎེ ཨི་ཏི་ཧཱ་སེ ཙ, ས་ནི་གྷ་ཎྜུ་ས་ཀེ་ཊུ་བྷེ;
པ་ད་ཀཱ ཝེ་ཡྻཱ་ཀ་ར་ཎཱ, ས་དྷ་མྨེ པཱ་ར་མིཾ ག་ཏཱ.
‘‘ཨུ་པྤཱ་ཏེ་སུ ནི་མི་ཏྟེ་སུ, ལ་ཀྑ་ཎེ་སུ ཙ ཀོ་ཝི་དཱ;
པ་ཐ་བྱཱ བྷཱུ་མ་ནྟ་ལི་ཀྑེ, མ་མ སི་སྶཱ སུ་སི་ཀྑི་ཏཱ.
‘‘ཨ་པྤི་ཙྪཱ ནི་པ་ཀཱ ཨེ་ཏེ, ཨ་པྤཱ་ཧཱ་རཱ ཨ་ལོ་ལུ་པཱ;
ལཱ་བྷཱ་ལཱ་བྷེ་ན ས་ནྟུ་ཊྛཱ, པ་རི་ཝཱ་རེ་ནྟི མཾ ས་དཱ.
‘‘ཛྷཱ་ཡཱི ཛྷཱ་ན་ར་ཏཱ དྷཱི་རཱ, ས་ནྟ་ཙི་ཏྟཱ ས་མཱ་ཧི་ཏཱ;
ཨཱ་ཀི་ཉྩ་ཉྙཾ པ་ཏྠ་ཡ་ནྟཱ, པ་རི་ཝཱ་རེ་ནྟི མཾ ས་དཱ.
‘‘ཨ་བྷི་ཉྙཱ་པཱ་ར་མི་པྤ་ཏྟཱ, པེ་ཏྟི་ཀེ གོ་ཙ་རེ ར་ཏཱ;
ཨ་ནྟ་ལི་ཀྑ་ཙ་རཱ དྷཱི་རཱ, པ་རི་ཝཱ་རེ་ནྟི མཾ ས་དཱ.
‘‘སཾ་ཝུ་ཏཱ ཚ་སུ དྭཱ་རེ་སུ, ཨ་ནེ་ཛཱ ར་ཀྑི་ཏི་ནྡྲི་ཡཱ;
ཨ་སཾ་ས་ཊྛཱ ཙ ཏེ དྷཱི་རཱ, མ་མ སི་སྶཱ དུ་རཱ་ས་དཱ.
‘‘པ་ལླ་ངྐེ་ན ནི་ས་ཛྫཱ་ཡ, ཋཱ་ན་ཙ་ངྐ་མ་ནེ་ན ཙ;
ཝཱི་ཏི་ནཱ་མེ་ནྟི ཏེ ར་ཏྟིཾ, མ་མ སི་སྶཱ དུ་རཱ་ས་དཱ.
‘‘ར་ཛྫ་ནཱི་ཡེ ན ར་ཛྫ་ནྟི, དུ་སྶ་ནཱི་ཡེ ན དུ་སྶ་རེ;
མོ་ཧ་ནཱི་ཡེ ན མུ་ཡ྄ཧ་ནྟི, མ་མ སི་སྶཱ དུ་རཱ་ས་དཱ.
‘‘ཨི་དྡྷིཾ ཝཱི་མཾ་ས་མཱ་ནཱ ཏེ, ཝ་ཏྟ་ནྟི ནི་ཙྩ་ཀཱ་ལི་ཀཾ;
པ་ཐ་ཝིཾ ཏེ པ་ཀ་མྤེ་ནྟི, སཱ་ར་བྦྷེ་ན དུ་རཱ་ས་དཱ.
‘‘ཀཱི་ལ༹་མཱ་ནཱ ཙ ཏེ སི་སྶཱ, ཀཱི་ལ༹་ནྟི ཛྷཱ་ན་ཀཱི་ལི༹་ཏཾ.
ཛ་མྦུ་ཏོ ཕ་ལ་མཱ་ནེ་ནྟི, མ་མ སི་སྶཱ དུ་རཱ་ས་དཱ.
‘‘ཨ་ཉྙེ ག་ཙྪ་ནྟི གོ་ཡཱ་ནཾ, ཨ་ཉྙེ པུ་བྦ་ཝི་དེ་ཧ་ཀཾ;
ཨ་ཉྙེ ཙ ཨུ་ཏྟ་ར་ཀུ་རུཾ, ཨེ་ས་ནཱ་ཡ དུ་རཱ་ས་དཱ.
‘‘པུ་ར་ཏོ པེ་སེ་ནྟི ཁཱ་རིཾ, པ་ཙྪ་ཏོ ཙ ཝ་ཛ་ནྟི ཏེ;
ཙ་ཏུ་ཝཱི་ས་ས་ཧ་སྶེ་ཧི, ཚཱ་དི་ཏཾ ཧོ་ཏི ཨ་མྦ་རཾ.
‘‘ཨ་གྒི་པཱ་ཀཱི ཨ་ན་གྒཱི ཙ, ད་ནྟོ་དུ་ཀྑ་ལི་ཀཱ་པི ཙ;
ཨ་སྨེ་ན ཀོ་ཊྚི་ཏཱ ཀེ་ཙི, པ་ཝ་ཏྟ་ཕ་ལ་བྷོ་ཛ་ནཱ.
‘‘ཨུ་ད་ཀོ་རོ་ཧ་ཎཱ ཀེ་ཙི, སཱ་ཡཾ པཱ་ཏོ སུ་ཙཱི་ར་ཏཱ;
ཏོ་ཡཱ་བྷི་སེ་ཙ་ན་ཀ་རཱ, མ་མ སི་སྶཱ དུ་རཱ་ས་དཱ.
‘‘པ་རཱུ་ལ༹ྷ་ཀ་ཙྪ་ན་ཁ་ལོ་མཱ, པ་ངྐ་ད་ནྟཱ ར་ཛ་སྶི་རཱ;
ག་ནྡྷི་ཏཱ སཱི་ལ་ག་ནྡྷེ་ན, མ་མ སི་སྶཱ དུ་རཱ་ས་དཱ.
‘‘པཱ་ཏོ་ཝ ས་ནྣི་པ་ཏི་ཏྭཱ, ཛ་ཊི་ལཱ ཨུ་གྒ་ཏཱ་པ་ནཱ;
ལཱ་བྷཱ་ལཱ་བྷཾ པ་ཀི་ཏྟེ་ཏྭཱ, ག་ཙྪ་ནྟི ཨ་མྦ་རེ ཏ་དཱ.
‘‘ཨེ་ཏེ་སཾ པ་ཀྐ་མ་ནྟཱ་ནཾ, མ་ཧཱ་ས་དྡོ པ་ཝ་ཏྟ་ཏི;
ཨ་ཛི་ན་ཙ་མྨ་ས་དྡེ་ན, མུ་དི་ཏཱ ཧོ་ནྟི དེ་ཝ་ཏཱ.
‘‘དི་སོ་དི་སཾ པ་ཀྐ་མ་ནྟི, ཨ་ནྟ་ལི་ཀྑ་ཙ་རཱ ཨི་སཱི;
ས་ཀེ བ་ལེ་ནུ་པ་ཏྠ་དྡྷཱ, ཏེ ག་ཙྪ་ནྟི ཡ་དི་ཙྪ་ཀཾ.
‘‘པ་ཐ་ཝཱི་ཀ་མྤ་ཀཱ ཨེ་ཏེ, ས་བྦེ་ཝ ན་བྷ་ཙཱ་རི་ནོ;
ཨུ་གྒ་ཏེ་ཛཱ དུ་པྤ་ས་ཧཱ, སཱ་ག་རོ་ཝ ཨ་ཁོ་བྷི་ཡཱ.
‘‘ཋཱ་ན་ཙ་ངྐ་མི་ནོ ཀེ་ཙི, ཀེ་ཙི ནེ་ས་ཛྫི་ཀཱ ཨི་སཱི;
པ་ཝ་ཏྟ་བྷོ་ཛ་ནཱ ཀེ་ཙི, མ་མ སི་སྶཱ དུ་རཱ་ས་དཱ.
‘‘མེ་ཏྟཱ་ཝི་ཧཱ་རི་ནོ ཨེ་ཏེ, ཧི་ཏེ་སཱི ས་བྦ་པཱ་ཎི་ནཾ;
ཨ་ན་ཏྟུ་ཀྐཾ་ས་ཀཱ ས་བྦེ, ན ཏེ ཝ་མྦྷེ་ནྟི ཀ་སྶ་ཙི.
‘‘སཱི་ཧ་རཱ་ཛཱ་ཝ་ས་མྦྷཱི་ཏཱ, ག་ཛ་རཱ་ཛཱ་ཝ ཐཱ་མ་ཝཱ;
དུ་རཱ་ས་དཱ བྱ་གྒྷཱ་རི་ཝ, ཨཱ་ག་ཙྪ་ནྟི མ་མ་ནྟི་ཀེ.
‘‘ཝི་ཛྫཱ་དྷ་རཱ དེ་ཝ་ཏཱ ཙ, ནཱ་ག་ག་ནྡྷ་བྦ་ར་ཀྑ་སཱ;
ཀུ་མྦྷ་ཎྜཱ དཱ་ན་ཝཱ ག་རུ་ལཱ༹, ཨུ་པ་ཛཱི་ཝ་ནྟི ཏཾ ས་རཾ.
‘‘ཏེ ཛ་ཊཱ་ཁཱ་རི་བྷ་རི་ཏཱ, ཨ་ཛི་ནུ་ཏྟ་ར་ཝཱ་ས་ནཱ;
ཨ་ནྟ་ལི་ཀྑ་ཙ་རཱ ས་བྦེ, ཨུ་པ་ཛཱི་ཝ་ནྟི ཏཾ ས་རཾ.
‘‘ས་དཱ་ནུ་ཙྪ་ཝི་ཀཱ ཨེ་ཏེ, ཨ་ཉྙ་མ་ཉྙཾ ས་གཱ་ར་ཝཱ;
ཙ་ཏུ་བྦཱི་ས་ས་ཧ་སྶཱ་ནཾ, ཁི་པི་ཏ་ས་དྡོ ན ཝི་ཛྫ་ཏི.
‘‘པཱ་དེ པཱ་དཾ ནི་ཀྑི་པ་ནྟཱ, ཨ་པྤ་ས་དྡཱ སུ་སཾ་ཝུ་ཏཱ;
ཨུ་པ་ས་ངྐ་མྨ ས་བྦེ་ཝ, སི་ར་སཱ ཝ་ནྡ་རེ མ་མཾ.
‘‘ཏེ་ཧི སི་སྶེ་ཧི པ་རི་ཝུ་ཏོ, ས་ནྟེ་ཧི ཙ ཏ་པ་སྶི་བྷི;
ཝ་སཱ་མི ཨ་སྶ་མེ ཏ་ཏྠ, ཛྷཱ་ཡཱི ཛྷཱ་ན་ར་ཏོ ཨ་ཧཾ.
‘‘ཨི་སཱི་ནཾ སཱི་ལ་ག་ནྡྷེ་ན, པུ་པྥ་ག་ནྡྷེ་ན ཙཱུ་བྷ་ཡཾ;
ཕ་ལཱི་ནཾ ཕ་ལ་ག་ནྡྷེ་ན, ག་ནྡྷི་ཏོ ཧོ་ཏི ཨ་སྶ་མོ.
‘‘ར་ཏྟི་ནྡི་ཝཾ ན ཛཱ་ནཱ་མི, ཨ་ར་ཏི མེ ན ཝི་ཛྫ་ཏི;
ས་ཀེ སི་སྶེ ཨོ་ཝ་ད་ནྟོ, བྷི་ཡྻོ ཧཱ་སཾ ལ་བྷཱ་མ་ཧཾ.
‘‘པུ་པྥཱ་ནཾ པུ་པྥ་མཱ་ནཱ་ནཾ, ཕ་ལཱ་ན་ཉྩ ཝི་པ་ཙྩ་ཏཾ;
དི་བྦ་ག་ནྡྷཱ པ་ཝཱ་ཡ་ནྟི, སོ་བྷ་ཡ་ནྟཱ མ་མ་སྶ་མཾ.
‘‘ས་མཱ་དྷི་མྷཱ ཝུ་ཊྛ་ཧི་ཏྭཱ, ཨ་ཏཱ་པཱི ནི་པ་ཀོ ཨ་ཧཾ;
ཁཱ་རི་བྷཱ་རཾ ག་ཧེ་ཏྭཱ་ན, ཝ་ནཾ ཨ་ཛ྄ཛྷོ་ག་ཧིཾ ཨ་ཧཾ.
‘‘ཨུ་པྤཱ་ཏེ སུ་པི་ནེ ཙཱ་པི, ལ་ཀྑ་ཎེ་སུ སུ་སི་ཀྑི་ཏོ;
པ་ཝ་ཏྟ་མཱ་ནཾ མ་ནྟ་པ་དཾ, དྷཱ་ར་ཡཱ་མི ཨ་ཧཾ ཏ་དཱ.