༨. ཨ་ངྒུ་ལི་མཱ་ལ་ཏྠེ་ར་གཱ་ཐཱ་ཝ་ཎྞ་ནཱ

ག་ཙྪཾ ཝ་དེ་སཱིཏི་ཨཱ་དི་ཀཱ ཨཱ་ཡ་སྨ་ཏོ ཨ་ངྒུ་ལི་མཱ་ལ་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཾ ཀུ་ས་ལཾ ཨུ་པ་ཙི་ནི་ཏྭཱ ཨི་མ་སྨིཾ བུ་དྡྷུ་པྤཱ་དེ སཱ་ཝ་ཏྠི་ཡཾ ཀོ་ས་ལ་ར་ཉྙོ པུ་རོ་ཧི་ཏ་སྶ བྷ་གྒ་ཝ་སྶ ནཱ་མ བྲཱ་ཧྨ་ཎ་སྶ པུ་ཏྟོ ཧུ་ཏྭཱ ནི་བྦ་ཏྟི. ཏ་སྶ ཛཱ་ཏ་དི་ཝ་སེ ས་ཀ་ལ་ན་ག་རེ ཨཱ་ཝུ་དྷཱ་ནི པ་ཛྫ་ལིཾ་སུ, ར་ཉྙོ ཙ མ་ངྒ་ལཱ་ཝུ་དྷཾ ས་ཡ་ན་པཱི་ཋེ ཋ་པི་ཏཾ པ་ཛྫ་ལི, ཏཾ དི་སྭཱ རཱ་ཛཱ བྷཱི་ཏོ སཾ་ཝི་གྒོ ནི་དྡཾ ན ལ་བྷི. པུ་རོ་ཧི་ཏོ ཏཱ་ཡཾ ཝེ་ལཱ་ཡཾ ན་ཀྑ་ཏྟ་ཡོ་གཾ ཨུ་ལློ་ཀེ་ནྟོ ‘‘ཙོ་ར་ན་ཀྑ་ཏྟེ་ན ཛཱ་ཏོ’’ཏི ས་ནྣི་ཊྛཱ་ན་མ་ཀཱ་སི. སོ ཝི་བྷཱ་ཏཱ་ཡ ར་ཏྟི་ཡཱ ར་ཉྙོ ས་ནྟི་ཀཾ ག་ཏོ སུ་ཁ་སེ་ཡྻཾ པུ་ཙྪི. རཱ་ཛཱ ‘‘ཀུ་ཏོ, ཨཱ་ཙ་རི་ཡ, སུ་ཁ་སེ་ཡྻཾ, ར་ཏྟི་ཡཾ མ་ཡ྄ཧཾ མ་ངྒ་ལཱ་ཝུ་དྷཾ པ་ཛྫ་ལི, ཏ་སྶ ཀོ ནུ ཁོ ཝི་པཱ་ཀོ བྷ་ཝི་སྶ་ཏཱི’’ཏི? ‘‘མཱ བྷཱ་ཡི, མ་ཧཱ་རཱ་ཛ, མ་ཡ྄ཧཾ གྷ་རེ དཱ་ར་ཀོ ཛཱ་ཏོ. ཏ་སྶ ཨཱ་ནུ་བྷཱ་ཝེ་ན ས་ཀ་ལ་ན་ག་རེ་པི ཨཱ་ཝུ་དྷཱ་ནི པ་ཛྫ་ལིཾ་སཱུ’’ཏི. ‘‘ཀིཾ བྷ་ཝི་སྶ་ཏི, ཨཱ་ཙ་རི་ཡཱ’’ཏི? ‘‘དཱ་ར་ཀོ ཙོ་རོ བྷ་ཝི་སྶ་ཏཱི’’ཏི. ‘‘ཀིཾ ཨེ་ཀ་ཙཱ་རཱི ཙོ་རོ, ཨུ་དཱ་ཧུ ག་ཎ་ཛེ་ཊྛ་ཀོ’’ཏི? ‘‘ཨེ་ཀ་ཙཱ་རི་ཀོ, དེ་ཝ’’. ‘‘ཀིཾ ནཾ མཱ་རེ་མཱ’’ཏི? ‘‘ཨེ་ཀ་ཙཱ་རི་ཀོ ཙེ, པ་ཊི་ཛ་གྒ་ཐ ཏཱ་ཝ ན’’ནྟི ཨཱ་ཧ. ཏ་སྶ ནཱ་མཾ ཀ་རོ་ནྟཱ ཡ་སྨཱ ཛཱ་ཡ་མཱ་ནོ ར་ཉྙོ ཙི་ཏྟཾ ཝི་ཧེ་སེ་ནྟོ ཛཱ་ཏོ, ཏ་སྨཱ ཧིཾ་ས་ཀོཏི ཀ་ཏྭཱ པ་ཙྪཱ དི་ཊྛཾ ཨ་དི་ཊྛ་ནྟི ཝི་ཡ ཨ་ཧིཾ་ས་ཀོཏི ཝོ་ཧ་རིཾ་སུ.

སོ ཝ་ཡ་པྤ་ཏྟོ པུ་བྦ་ཀ་མྨ་བ་ལེ་ན ས་ཏྟ་ནྣཾ ཧ་ཏྠཱི་ནཾ བ་ལཾ དྷཱ་རེ་ཏི. ཏ་སྶི་དཾ པུ་བྦ་ཀ་མྨཾ – བུ་དྡྷ་སུ་ཉྙེ ལོ་ཀེ ཀ་སྶ་ཀོ ཧུ་ཏྭཱ ནི་བྦ་ཏྟོ ཨེ་ཀཾ པ་ཙྩེ་ཀ་བུ་དྡྷཾ ཝ་སྶོ་ད་ཀེ་ན ཏི་ནྟཾ ཨ་ལླ་ཙཱི་ཝ་རཾ སཱི་ཏ་པཱི་ལི༹་ཏཾ ཨ་ཏྟ་ནོ ཁེ་ཏྟ་བྷཱུ་མིཾ ཨུ་པ་ག་ཏཾ དི་སྭཱ ‘‘པུ་ཉྙ་ཀྑེ་ཏྟཾ མེ ཨུ་པ་ཊྛི་ཏ’’ནྟི སོ་མ་ན་སྶ་ཛཱ་ཏོ ཨ་གྒིཾ ཀ་ཏྭཱ ཨ་དཱ་སི. སོ ཏ་སྶ ཀ་མྨ་སྶ བ་ལེ་ན ནི་བྦ་ཏྟ་ནི་བྦ་ཏྟ་ཊྛཱ་ནེ ཐཱ་མ་ཛ་ཝ་བ་ལ་ས་མྤ་ནྣོ ཙ ཧུ་ཏྭཱ ཨི་མ་སྨིཾ པ་ཙྪི་མ་ཏྟ་བྷཱ་ཝེ ས་ཏྟ་ནྣཾ ཧ་ཏྠཱི་ནཾ བ་ལཾ དྷཱ་རེ་ཏི. སོ ཏ་ཀྐ་སི་ལཾ ག་ནྟྭཱ དི་སཱ་པཱ་མོ་ཀྑ་སྶ ཨཱ་ཙ་རི་ཡ་སྶ ས་ནྟི་ཀེ དྷ་མྨ་ནྟེ་ཝཱ་སཱི ཧུ་ཏྭཱ སི་པྤཾ ཨུ་གྒ་ཎྷ་ཏོ ཨཱ་ཙ་རི་ཡ་བྲཱ་ཧྨ་ཎཾ ཏ་སྶ བྷ་རི་ཡ་ཉྩ ས་ཀྐ་ཙྩཾ པ་ཊི་ཛ་གྒ་ཏི. ཏེ་ན་སྶ སཱ བྲཱ་ཧྨ་ཎཱི གེ་ཧེ ལ་བྦྷ་མཱ་ནེ་ན བྷ་ཏྟཱ་དི་ནཱ ས་ངྒ་ཧཾ ཀ་རོ་ཏི. ཏཾ ཨ་ས་ཧ་མཱ་ནཱ ཨ་ཉྙེ མཱ་ཎ་ཝཱ ཨཱ་ཙ་རི་ཡེ་ན ས་དྡྷིཾ བྷེ་དཾ ཨ་ཀཾ་སུ. བྲཱ་ཧྨ་ཎོ ཏེ་སཾ ཝ་ཙ་ནཾ དྭེ ཏ་ཡོ ཝཱ་རེ ཨ་ས་དྡ་ཧ་ནྟོ ཧུ་ཏྭཱ པ་ཙྪཱ ས་དྡ་ཧི་ཏྭཱ ‘‘མ་ཧཱ་བ་ལོ མཱ་ཎ་ཝོ, ན ས་ཀྐཱ ཀེ་ན་ཙི མཱ་རཱ་པེ་ཏུཾ, ཨུ་པཱ་ཡེ་ན ནཾ མཱ་རེ་སྶཱ་མཱི’’ཏི ཙི་ནྟེ་ཏྭཱ ནི་ཊྛི་ཏ་སི་པྤཾ ཨ་ཏྟ་ནོ ན་ག་རཾ ག་ནྟུཾ ཨཱ་པུ་ཙྪ་ནྟཾ མཱ་ཎ་ཝཾ ཨཱ་ཧ – ‘‘ཏཱ་ཏ ཨ་ཧིཾ་ས་ཀ, ནི་ཊྛི་ཏ་སི་པྤེ་ན ནཱ་མ ཨ་ནྟེ་ཝཱ་སི་ནཱ ཨཱ་ཙ་རི་ཡ་སྶ ག་རུ་ད་ཀྑི་ཎཱ དཱ་ཏ་བྦཱ, ཏཾ མ་ཡ྄ཧཾ དེ་ཧཱི’’ཏི. ‘‘སཱ་དྷུ, ཨཱ་ཙ་རི་ཡ, ཀིཾ ད་སྶཱ་མཱི’’ཏི? ‘‘མ་ནུ་སྶཱ་ནཾ ས་ཧ་སྶ་ད་ཀྑི་ཎ་ཧ་ཏྠ་ངྒ་ལི་ཡོ ཨཱ་ནེ་ཧཱི’’ཏི. བྲཱ་ཧྨ་ཎ་སྶ ཀི་ར ཨ་ཡ་མ་སྶ ཨ་དྷི་པྤཱ་ཡོ – བ་ཧཱུ་སུ མཱ་རི་ཡ་མཱ་ནེ་སུ ཨེ་ཀ་ནྟ་ཏོ ཨེ་ཀོ ནཾ མཱ་རེ་ཡྻཱ་ཏི. ཏཾ སུ་ཏྭཱ ཨ་ཧིཾ་ས་ཀོ ཨ་ཏྟ་ནོ ཙི་ར་པ་རི་ཙི་ཏཾ ནི་ཀྐ་རུ་ཎ་ཏཾ པུ་ར་ཀྑ་ཏྭཱ ས་ནྣ་དྡྷ་པ་ཉྩཱ་ཝུ་དྷོ ཀོ་ས་ལ་ར་ཉྙོ ཝི་ཛི་ཏེ ཛཱ་ལི་ནཾ ཝ་ནཾ པ་ཝི་སི་ཏྭཱ མ་ཧཱ་མ་གྒ་ས་མཱི་པེ པ་བྦ་ཏ་ནྟ་རེ ཝ་ས་ནྟོ པ་བྦ་ཏ་སི་ཁ་རེ ཋ་ཏྭཱ མ་གྒེ་ན ག་ཙྪ་ནྟེ མ་ནུ་སྶེ ཨོ་ལོ་ཀེ་ཏྭཱ ཝེ་གེ་ན ག་ནྟྭཱ ཨ་ངྒུ་ལི་ཡོ ག་ཧེ་ཏྭཱ རུ་ཀྑ་གྒེ ཨོ་ལ་མྦེ་སི. ཏཱ གི་ཛ྄ཛྷཱ་པི ཀཱ་ཀཱ་པི ཁཱ་དིཾ་སུ, བྷཱུ་མི་ཡཾ ནི་ཀྑི་ཏྟཱ པཱུ་ཏི་བྷཱ་ཝཾ ཨ་ག་མཾ་སུ. ཨེ་ཝཾ ག་ཎ་ནཱ་ཡ ཨ་པ་རི་པཱུ་ར་མཱ་ནཱ་ཡ ལ་དྡྷཱ ལ་དྡྷཱ ཨ་ངྒུ་ལི་ཡོ སུ་ཏྟེ་ན ག་ནྠི་ཏྭཱ མཱ་ལཾ ཀ་ཏྭཱ ཡ་ཉྙོ་པ་ཙི་ཏཾ ཝི་ཡ ཨཾ་སེ ཨོ་ལ་མྦེ་སི. ཏ་ཏོ པ་ཊྛཱ་ཡ ཨ་ངྒུ་ལི་མཱ་ལོཏྭེ་ཝ་སྶ ས་མ་ཉྙཱ ཨ་ཧོ་སི.

ཨེ་ཝཾ ཏ་སྨིཾ མ་ནུ་སྶེ མཱ་རེ་ནྟེ མ་གྒོ ཨ་ཝ་ལ༹་ཉྫོ ཨ་ཧོ་སི. སོ མ་གྒེ མ་ནུ་སྶེ ཨ་ལ་བྷ་ནྟོ གཱ་མཱུ་པ་ཙཱ་རཾ ག་ནྟྭཱ ནི་ལཱི་ཡི་ཏྭཱ ཨཱ་ག་ཏཱ་ག་ཏེ མ་ནུ་སྶེ མཱ་རེ་ཏྭཱ ཨ་ངྒུ་ལི་ཡོ ག་ཧེ་ཏྭཱ ག་ཙྪ་ཏི. ཏཾ ཉ་ཏྭཱ མ་ནུ་སྶཱ གཱ་མ་ཏོ ཨ་པ་ཀྐ་མིཾ་སུ, གཱ་མཱ སུ་ཉྙཱ ཨ་ཧེ་སུཾ, ཏ་ཐཱ ནི་ག་མཱ ཛ་ན་པ་དཱ ཙ. ཨེ་ཝཾ ཏེ་ན སོ པ་དེ་སོ ཨུ་བྦཱ་སི་ཏོ ཨ་ཧོ་སི. ཨ་ངྒུ་ལི་མཱ་ལ་སྶ ཙ ཨེ་ཀཱ་ཡ ཨཱུ་ནཱ ས་ཧ་སྶ་ཨ་ངྒུ་ལི་ཡོ ས་ངྒ་ཧཱ ཨ་ཧེ་སུཾ. ཨ་ཐ མ་ནུ་སྶཱ ཏཾ ཙོ་རུ་པ་དྡ་ཝཾ ཀོ་ས་ལ་ར་ཉྙོ ཨཱ་རོ་ཙེ་སུཾ. རཱ་ཛཱ པཱ་ཏོ་ཝ ན་ག་རེ བྷེ་རིཾ ཙ་རཱ་པེ་སི, ‘‘སཱི་གྷཾ ཨ་ངྒུ་ལི་མཱ་ལ་ཙོ་རཾ ག་ཎྷཱ་མ, བ་ལ་ཀཱ་ཡོ ཨཱ་ག་ཙྪ་ཏཱུ’’ཏི. ཏཾ སུ་ཏྭཱ ཨ་ངྒུ་ལི་མཱ་ལ་སྶ མཱ་ཏཱ མ་ནྟཱ་ཎཱི ནཱ་མ བྲཱ་ཧྨ་ཎཱི ཏ་སྶ པི་ཏ་རཾ ཨཱ་ཧ – ‘‘པུ་ཏྟོ ཀི་ར ཏེ ཙོ་རོ ཧུ་ཏྭཱ ཨི་ད་ཉྩི་ད་ཉྩ ཀ་རོ་ཏི, ཏཾ ‘ཨཱི་དི་སཾ མཱ ཀ་རཱི’ཏི ས་ཉྙཱ་པེ་ཏྭཱ ཨཱ་ནེ་ཧི, ཨ་ཉྙ་ཐཱ ནཾ རཱ་ཛཱ གྷཱ་ཏེ་ཡྻཱ’’ཏི. བྲཱ་ཧྨ་ཎོ ‘‘ན མ་ཡ྄ཧཾ ཏཱ་དི་སེ་ཧི པུ་ཏྟེ་ཧི ཨ་ཏྠོ, རཱ་ཛཱ ཡཾ ཝཱ ཏཾ ཝཱ ཀ་རོ་ཏཱུ’’ཏི ཨཱ་ཧ. ཨ་ཐ བྲཱ་ཧྨ་ཎཱི པུ་ཏྟ་སི་ནེ་ཧེ་ན པཱ་ཐེ་ཡྻཾ ག་ཧེ་ཏྭཱ ‘‘མ་མ པུ་ཏྟཾ ས་ཉྙཱ་པེ་ཏྭཱ ཨཱ་ནེ་སྶཱ་མཱི’’ཏི མ་གྒཾ པ་ཊི་པ་ཛྫི.

བྷ་ག་ཝཱ ‘‘ཨ་ཡཾ ‘ཨ་ངྒུ་ལི་མཱ་ལཾ ཨཱ་ནེ་སྶཱ་མཱི’ཏི ག་ཙྪ་ཏི, ས་ཙེ སཱ ག་མི་སྶ་ཏི, ཨ་ངྒུ་ལི་མཱ་ལོ ‘ཨ་ངྒུ་ལི་ས་ཧ་སྶཾ པཱུ་རེ་སྶཱ་མཱི’ཏི མཱ་ཏ་ར་མྤི མཱ་རེ་སྶ་ཏི. སོ ཙ པ་ཙྪི་མ་བྷ་ཝི་ཀོ, ས་ཙཱ་ཧཾ ན ག་མི་སྶཾ, མ་ཧཱ་ཛཱ་ནི ཨ་བྷ་ཝི་སྶཱ’’ཏི ཉ་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ས་ཡ་མེ་ཝ པ་ཏྟ་ཙཱི་ཝ་རཾ ག་ཧེ་ཏྭཱ ཨ་ངྒུ་ལི་མཱ་ལཾ ཨུ་དྡི་སྶ ཏིཾ་ས་ཡོ་ཛ་ནི་ཀཾ མ་གྒཾ པ་ད་སཱ་ཝ པ་ཊི་པ་ཛྫ་མཱ་ནོ ཨ་ནྟ་རཱ་མ་གྒེ གོ་པཱ་ལ་ཀཱ་དཱི་ཧི ཝཱ་རི་ཡ་མཱ་ནོ་པི ཛཱ་ལི་ནཾ ཝ་ནཾ ཨུ་པ་ག་ཙྪི. ཏ་སྨི་ཉྩ ཁ་ཎེ ཏ་སྶ མཱ་ཏཱ ཏེ་ན དི་ཊྛཱ, སོ མཱ་ཏ་རཾ དཱུ་ར་ཏོ་ཝ དི་སྭཱ ‘‘མཱ་ཏ་ར་མྤི མཱ་རེ་ཏྭཱ ཨ་ཛྫ ཨཱུ་ན་ངྒུ་ལིཾ པཱུ་རེ་སྶཱ་མཱི’’ཏི ཨ་སིཾ ཨུ་ཀྑི་པི་ཏྭཱ ཨུ་པ་དྷཱ་ཝི. ཏེ་སཾ ཨུ་བྷི་ནྣཾ ཨ་ནྟ་རེ བྷ་ག་ཝཱ ཨ་ཏྟཱ་ནཾ ད་སྶེ་སི. ཨ་ངྒུ་ལི་མཱ་ལོ བྷ་ག་ཝ་ནྟཾ དི་སྭཱ ‘‘ཀིཾ མེ མཱ་ཏ་རཾ ཝ་དྷི་ཏྭཱ ཨ་ངྒུ་ལི་ཡཱ ག་ཧི་ཏེ་ན? ཛཱི་ཝ་ཏུ མེ མཱ་ཏཱ, ཡཾ་ནཱུ་ནཱ་ཧཾ ཨི་མཾ ས་མ་ཎཾ ཛཱི་ཝི་ཏཱ ཝོ་རོ་པེ་ཏྭཱ ཨ་ངྒུ་ལིཾ ག་ཎྷེ་ཡྻ’’ནྟི ཨུ་ཀྑི་ཏྟཱ་སི་ཀོ བྷ་ག་ཝ་ནྟཾ པི་ཊྛི་ཏོ པི་ཊྛི་ཏོ ཨ་ནུ་བ་ནྡྷི. ཨ་ཐ ཁོ བྷ་ག་ཝཱ ཏ་ཐཱ་རཱུ་པཾ ཨི་དྡྷཱ་བྷི་ས་ངྑཱ་རཾ ཨ་བྷི་ས་ངྑཱ་སི, ཡ་ཐཱ པ་ཀ་ཏི་ཨི་རི་ཡཱ་པ་ཐེ་ན ག་ཙྪ་ནྟ་མྤི ཨ་ཏྟཱ་ནཾ ཨ་ངྒུ་ལི་མཱ་ལོ ས་བྦ་ཐཱ་མེ་ན དྷཱ་ཝ་ནྟོ་པི ན ས་ཀྐོ་ཏི ས་མྤཱ་པུ་ཎི་ཏུཾ. སོ པ་རི་ཧཱི་ན་ཛ་ཝོ གྷུ་རུ་གྷུ་རུ་པ་སྶཱ་སཱི ཀ་ཙྪེ་ཧི སེ་དཾ མུ་ཉྩ་ནྟོ པ་དཾ ཨུ་དྡྷ་རི་ཏུ་མྤི ཨ་ས་ཀྐོ་ནྟོ ཁཱ་ཎུ ཝི་ཡ ཋི་ཏོ བྷ་ག་ཝ་ནྟཾ ‘‘ཏི་ཊྛ ཏི་ཊྛ, ས་མ་ཎཱ’’ཏི ཨཱ་ཧ. བྷ་ག་ཝཱ ག་ཙྪ་ནྟོ་ཝ ‘‘ཋི་ཏོ ཨ་ཧཾ, ཨ་ངྒུ་ལི་མཱ་ལ, ཏྭ་ཉྩ ཏི་ཊྛཱ’’ཏི ཨཱ་ཧ. སོ ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ ས་ཙྩ་ཝཱ་དི་ནོ, ཨ་ཡཾ ས་མ་ཎོ ག་ཙྪ་ནྟོ་ཡེ་ཝ ‘ཋི་ཏོ ཨ་ཧཾ, ཨ་ངྒུ་ལི་མཱ་ལ, ཏྭ་ཉྩ ཏི་ཊྛཱ’ཏི ཨཱ་ཧ, ཨ་ཧ་ཉྩ་མྷི ཋི་ཏོ, ཀོ ནུ ཁོ ཨི་མ་སྶ ཨ་དྷི་པྤཱ་ཡོ, པུ་ཙྪི་ཏྭཱ ནཾ ཛཱ་ནི་སྶཱ་མཱི’’ཏི བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –

༨༦༦. ‘‘ག་ཙྪཾ ཝ་དེ་སི ས་མ་ཎ ཋི་ཏོ་མྷི, མ་མ་ཉྩ བྲཱུ་སི ཋི་ཏ་མ་ཊྛི་ཏོ་ཏི;

པུ་ཙྪཱ་མི ཏཾ ས་མ་ཎ ཨེ་ཏ་མ་ཏྠཾ, ཀ་ཐཾ ཋི་ཏོ ཏྭཾ ཨ་ཧ་མ་ཊྛི་ཏོ་མྷཱི’’ཏི.

ཏ་ཏྠ ས་མ་ཎཱཏི བྷ་ག་ཝ་ནྟཾ ཨཱ་ལ་པ་ཏི. མ་མནྟི མཾ. ཀ་ཐནྟི ཀེ་ནཱ་ཀཱ་རེ་ན. ཨ་ཡ་ཉྷེ་ཏྠ ཨ་ཏྠོ – ས་མ་ཎ, ཏྭཾ ག་ཙྪ་ནྟོ་ཝ ས་མཱ་ནོ ‘‘ཋི་ཏོ་མྷཱི’’ཏི ཝ་དེ་སི. མ་མ་ཉྩ ཋི་ཏཾ་ཡེ་ཝ ‘‘ཨ་ཊྛི་ཏོ’’ཏི བྲཱུ་སི, ཝ་དེ་སི. ཀཱ་ར་ཎེ་ནེ་ཏྠ བྷ་ཝི་ཏ་བྦཾ, ཏ་སྨཱ ཏཾ ས་མ་ཎཾ ཨ་ཧཾ ཨེ་ཝ་མ་ཏྠཾ པུ་ཙྪཱ་མི. ཀ་ཐཾ ཀེ་ནཱ་ཀཱ་རེ་ན ཏྭཾ ཋི་ཏོ ཨ་ཧོ་སི, ཨ་ཧ་ཉྩ ཨ་ཊྛི་ཏོ་མྷཱི་ཏི. ཨེ་ཝཾ ཝུ་ཏྟེ བྷ་ག་ཝཱ –

༨༦༧. ‘‘ཋི་ཏོ ཨ་ཧཾ ཨ་ངྒུ་ལི་མཱ་ལ ས་བྦ་དཱ, ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜཾ;

ཏུ་ཝ་ཉྩ པཱ་ཎེ་སུ ཨ་ས་ཉྙ་ཏོ་སི, ཏ་སྨཱ ཋི་ཏོ་ཧཾ ཏུ་ཝ་མ་ཊྛི་ཏོ་སཱི’’ཏི. –

གཱ་ཐཱ་ཡ ཏཾ ཨ་ཛ྄ཛྷ་བྷཱ་སི.

ཏ་ཏྠ ཋི་ཏོ ཨ་ཧཾ, ཨ་ངྒུ་ལི་མཱ་ལ, ས་བྦ་དཱ, ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜནྟི, ཨ་ངྒུ་ལི་མཱ་ལ, ཨ་ཧཾ ས་བྦ་དཱ ས་བྦ་ཀཱ་ལེ ཨཱ་དི་མ་ཛ྄ཛྷ་པ་རི་ཡོ་སཱ་ནེ་སུ ཏ་ས་ཐཱ་ཝ་ར་བྷེ་དེ་སུ ས་བྦེ་སུ ས་ཏྟེ་སུ ད་ཎྜཾ ནི་དྷཱ་ཡ ནི་ཧི་ཏ་ད་ཎྜོ ནི་ཧི་ཏ་ས་ཏྠོ ལ་ཛྫཱི ད་ཡཱ་པ་ནྣོ, ཏ་ཏོ ཨ་ཉྙ་ཐཱ ཨ་ཝ་ཏྟ་ན་ཏོ ཨེ་ཝ་རཱུ་པེ་ནེ་ཝ ཋི་ཏོ. ཏུ་ཝ་ཉྩ པཱ་ཎེ་སུ ཨ་ས་ཉྙ་ཏོ་སཱིཏི ཏྭཾ པ་ན ས་ཏྟེ་སུ ས་ཉྙ་མ་ར་ཧི་ཏོ ཨ་སི, ལུ་དྡོ ལོ་ཧི་ཏ་པཱ་ཎི ཧ་ཏ་པ་ཧ་ཏེ ནི་ཝི་ཊྛོ ཨ་ད་ཡཱ་པ་ནྣོ, ཏ་སྨཱ ཨ་ས་ཉྙ་ཏོ ཝི་ར་ཏི་ཝ་སེ་ན ཨ་ཊྛི་ཏོ. ཏ་ཏོ ཨེ་ཝ ཏཱ་སུ ཏཱ་སུ ག་ཏཱི་སུ པ་རི་བྦྷ་མ་ན་ཏོ་པི ཏུ་ཝཾ ཨི་དཱ་ནི ཨི་རི་ཡཱ་པ་ཐེ་ན ཋི་ཏོ་པི ཨ་ཊྛི་ཏོ ཨ་སི, ཨ་ཧཾ པ་ན ཝུ་ཏྟ་པྤ་ཀཱ་རེ་ན ཋི་ཏོ་ཏི. ཏ་ཏོ ཨ་ངྒུ་ལི་མཱ་ལོ ཡ་ཐཱ་བྷུ་ཙྩ་གུ་ཎ་པྤ་བྷཱ་ཝི་ཏ་སྶ ཛ་ལ་ཏ་ལེ ཏེ་ལ་སྶ ཝི་ཡ ས་ཀ་ལཾ ལོ་ཀཾ ཨ་བྷི་བྱཱ་པེ་ཏྭཱ ཋི་ཏ་སྶ བྷ་ག་ཝ་ཏོ ཀི་ཏྟི་ས་དྡ་སྶ སུ་ཏ་པུ་བྦ་ཏྟཱ ཧེ་ཏུ་ས་མྤ་ཏྟི་ཡཱ ཉཱ་ཎ་སྶ ཙ པ་རི་པཱ་ཀ་ག་ཏ་ཏྟཱ ‘‘ཨ་ཡཾ སོ བྷ་ག་ཝཱ’’ཏི ས་ཉྫཱ་ཏ་པཱི་ཏི་སོ་མ་ན་སྶོ ‘‘མ་ཧཱ ཨ་ཡཾ སཱི་ཧ་ནཱ་དོ, མ་ཧ་ནྟཾ ག་ཛྫི་ཏཾ, ན་ཡི་དཾ ཨ་ཉྙ་སྶ བྷ་ཝི་སྶ་ཏི, ས་མ་ཎ་སྶ མ་ཉྙེ གོ་ཏ་མ་སྶ ཨེ་ཏཾ ག་ཛྫི་ཏཾ, དི་ཊྛོ ཝ་ཏ་མྷི མ་ཧེ་སི་ནཱ ས་མྨཱ་ས་མྦུ་དྡྷེ་ན, མ་ཡ྄ཧཾ ས་ངྒ་ཧ་ཀ་ར་ཎ་ཏྠཾ བྷ་ག་ཝཱ ཨི་དྷཱ་ག་ཏོ’’ཏི ཙི་ནྟེ་ཏྭཱ –

༨༦༨. ‘‘ཙི་ར་སྶཾ ཝ་ཏ མེ མ་ཧི་ཏོ མ་ཧེ་སཱི, མ་ཧཱ་ཝ་ནཾ ས་མ་ཎོ པ་ཙྩ་པཱ་དི;

སོ་ཧཾ ཙ་ཛི་སྶཱ་མི ས་ཧ་སྶ་པཱ་པཾ, སུ་ཏྭཱ་ན གཱ་ཐཾ ཏ་ཝ དྷ་མྨ་ཡུ་ཏྟ’’ནྟི. –

ཨི་མཾ གཱ་ཐཾ ཨ་བྷཱ་སི.

ཏ་ཏྠ ཙི་ར་སྶཾ ཝ་ཏཱཏི ཙི་ར་ཀཱ་ལེ་ན ཝ་ཏ. མེཏི མ་ཡ྄ཧཾ ཨ་ནུ་གྒ་ཧ་ཏྠཱ་ཡ. མ་ཧི་ཏོཏི ས་དེ་ཝ་ཀེ་ན ལོ་ཀེ་ན མ་ཧ་ཏི་ཡཱ པཱུ་ཛཱ་ཡ པཱུ་ཛི་ཏོ. མ་ཧ་ནྟེ སཱི་ལ་ཀྑ་ནྡྷཱ་དི་གུ་ཎེ ཨེ་སི, ག་ཝེ་སཱི་ཏི མ་ཧེ་སཱི. མ་ཧཱ་ཝ་ནཾ ས་མ་ཎོ པ་ཙྩ་པཱ་དཱིཏི ཨི་མཾ མ་ཧཱ་ར་ཉྙཾ ས་མི་ཏ་ས་བྦ་པཱ་པོ བྷ་ག་ཝཱ པ་ཊི་པ་ཛྫི. སོ་ཧཾ ཙ་ཛི་སྶཱ་མི ས་ཧ་སྶ་པཱ་པཾ, སུ་ཏྭཱ་ན གཱ་ཐཾ ཏ་ཝ དྷ་མྨ་ཡུ་ཏྟནྟི སོ་ཧཾ དྷ་མྨ་ཡུ་ཏྟཾ དྷ་མྨཱུ་པ་སཾ་ཧི་ཏཾ ཏ་ཝ གཱ་ཐཾ སུ་ཎིཾ. སོ་ཧཾ ཏཾ སུ་ཏྭཱ་ན ‘‘ཙི་ར་སྶ་མྤི ཙི་ར་ཀཱ་ལེ་ན་པི ས་ངྒ་ཏཾ པ་རི་ཙི་ཏཾ པཱ་པ་ས་ཧ་སྶཾ པ་ཛ་ཧི་སྶ’’ནྟི ཙི་ནྟེ་ཏྭཱ ཨི་དཱ་ནི ནཾ ཨ་ཉྙ་ད་ཏྠུ པ་རི་ཙྩ་ཛི་སྶཱ་མཱི་ཏི ཨ་ཏྠོ. ཨེ་ཝཾ པ་ན ཝ་ཏྭཱ ཡ་ཐཱ པ་ཊི་པ་ཛྫི, ཡ་ཐཱ ཙ བྷ་ག་ཝ་ཏཱ ཨ་ནུ་གྒ་ཧི་ཏོ, ཏཾ ད་སྶེ་ཏུཾ –

༨༦༩. ‘‘ཨི་ཙྩེ་ཝ ཙོ་རོ ཨ་སི་མཱ་ཝུ་དྷ་ཉྩ, སོ་བྦྷེ པ་པཱ་ཏེ ན་ར་ཀེ ཨ་ནྭ་ཀཱ་སི;

ཨ་ཝ་ནྡི ཙོ་རོ སུ་ག་ཏ་སྶ པཱ་དེ, ཏ་ཏྠེ་ཝ པ་བྦ་ཛྫ་མ་ཡཱ་ཙི བུ་དྡྷཾ.

༨༧༠. ‘‘བུ་དྡྷོ ཙ ཁོ ཀཱ་རུ་ཎི་ཀོ མ་ཧེ་སི, ཡོ ས་ཏྠཱ ལོ་ཀ་སྶ ས་དེ་ཝ་ཀ་སྶ;

ཏ་མེ་ཧི བྷི་ཀྑཱུ་ཏི ཏ་དཱ ཨ་ཝོ་ཙ, ཨེ་སེ་ཝ ཏ་སྶ ཨ་ཧུ བྷི་ཀྑུ་བྷཱ་ཝོ’’ཏི.

ས་ངྒཱི་ཏི་ཀཱ་རཱ ཨི་མཱ དྭེ གཱ་ཐཱ ཋ་པེ་སུཾ.

ཏ་ཏྠ ཨི་ཙྩེ་ཝཱཏི ཨི་ཏི ཨེ་ཝ ཨེ་ཝཾ ཝ་ཏྭཱ ཨ་ན་ནྟ་ར་མེ་ཝ. ཙོ་རོཏི ཨ་ངྒུ་ལི་མཱ་ལོ. ཨ་སིནྟི ཁ་གྒཾ. ཨཱ་ཝུ་དྷནྟི སེ་སཱ་ཝུ་དྷཾ. སོ་བྦྷེཏི ས་མ་ནྟ་ཏོ ཚི་ནྣ་ཏ་ཊེ. པ་པཱ་ཏེཏི ཨེ་ཀ་ཏོ ཚི་ནྣ་ཏ་ཊེ. ན་ར་ཀེཏི བྷཱུ་མི་ཡཱ ཕ་ལི་ཏ་ཝི་ཝ་རེ. ཨི་དྷ པ་ན ཏཱི་ཧི་པི པ་དེ་ཧི ཡ་ཏྠ པ་ཏི་ཏཾ ཨ་ཉྙེ་ན ག་ཧེ་ཏུཾ ན ས་ཀྐཱ, ཏཱ་དི་སཾ པ་བྦ་ཏ་ནྟ་ར་མེ་ཝ ཝ་ད་ཏི. ཨ་ནྭ་ཀཱ་སཱིཏི ཨ་ནུ ཨ་ཀཱ་སི, པ་ཉྩ་ཝི་དྷ་མྤི ཨ་ཏྟ་ནོ ཨཱ་ཝུ་དྷཾ ཨ་ནུ ཁི་པི ཚ་ཌྜེ་སི, ཏཱ་ནི ཚ་ཌྜེ་ཏྭཱ བྷ་ག་ཝ་ཏོ པཱ་དེ་སུ སི་ར་སཱ ནི་པ་ཏི་ཏྭཱ ‘‘པ་བྦཱ་ཛེ་ཐ མཾ, བྷ་ནྟེ’’ཏི ཨཱ་ཧ. ཏེ་ན ཝུ་ཏྟཾ ‘‘ཨ་ཝ་ནྡི ཙོ་རོ སུ་ག་ཏ་སྶ པཱ་དེ, ཏ་ཏྠེ་ཝ པ་བྦ་ཛྫ་མ་ཡཱ་ཙི བུ་དྡྷ’’ནྟི. ཨེ་ཝཾ ཏེ་ན པ་བྦ་ཛྫཱ་ཡ ཡཱ་ཙི་ཏཱ་ཡ ས་ཏྠཱ ཏ་སྶ པུ་རི་མ་ཀ་མྨཾ ཨོ་ལོ་ཀེ་ནྟོ ཨེ་ཧི་བྷི་ཀྑུ་བྷཱ་ཝཱ་ཡ ཧེ་ཏུ་ས་མྤ་ཏྟིཾ དི་སྭཱ ད་ཀྑི་ཎ་ཧ་ཏྠཾ པ་སཱ་རེ་ཏྭཱ – ‘‘ཨེ་ཧི, བྷི་ཀྑུ, སྭཱ་ཁཱ་ཏོ དྷ་མྨོ, ཙ་ར བྲ་ཧྨ་ཙ་རི་ཡཾ, ས་མྨཱ དུ་ཀྑ་སྶ ཨ་ནྟ་ཀི་རི་ཡཱ་ཡཱ’’ཏི ཨཱ་ཧ. སཱ ཨེ་ཝ ཙ ཏ་སྶ པ་བྦ་ཛྫཱ ཨུ་པ་ས་མྤ་དཱ ཙ ཨ་ཧོ་སི. ཏེ་ནཱ་ཧ ‘‘ཏ་མེ་ཧི བྷི་ཀྑཱུ་ཏི ཏ་དཱ ཨ་ཝོ་ཙ, ཨེ་སེ་ཝ ཏ་སྶ ཨ་ཧུ བྷི་ཀྑུ་བྷཱ་ཝོ’’ཏི.

ཨེ་ཝཾ ཐེ་རོ ས་ཏྠུ ས་ནྟི་ཀེ ཨེ་ཧི་བྷི་ཀྑུ་བྷཱ་ཝེ་ན པ་བྦ་ཛྫཾ ཨུ་པ་ས་མྤ་ད་ཉྩ ལ་བྷི་ཏྭཱ ཝི་པ་སྶ་ནཱ་ཡ ཀ་མྨཾ ཀ་རོ་ནྟོ ཨ་ར་ཧ་ཏྟཾ པ་ཏྭཱ ཝི་མུ་ཏྟི་སུ་ཁཾ པ་ཊི་སཾ་ཝེ་དེ་ནྟོ པཱི་ཏི་སོ་མ་ན་སྶ་ཛཱ་ཏོ ཨུ་དཱ་ན་ཝ་སེ་ན –

༨༧༡. ‘‘ཡོ ཙ པུ་བྦེ པ་མ་ཛྫི་ཏྭཱ, པ་ཙྪཱ སོ ན་པྤ་མ་ཛྫ་ཏི;

སོ་མཾ ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ.

༨༧༢. ‘‘ཡ་སྶ པཱ་པཾ ཀ་ཏཾ ཀ་མྨཾ, ཀུ་ས་ལེ་ན པི་དྷཱི་ཡ་ཏི;

སོ་མཾ ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ.

༨༧༣. ‘‘ཡོ ཧ་ཝེ ད་ཧ་རོ བྷི་ཀྑུ, ཡུ་ཉྫ་ཏི བུ་དྡྷ་སཱ་ས་ནེ;

སོ་མཾ ལོ་ཀཾ པ་བྷཱ་སེ་ཏི, ཨ་བྦྷཱ མུ་ཏྟོ་ཝ ཙ་ནྡི་མཱ’’ཏི. – གཱ་ཐ་ཏྟ་ཡཾ ཨ་བྷཱ་སི;

ཏ་སྶ་ཏྠོ – ཡོ པུ་གྒ་ལོ ག་ཧ་ཊྛོ ཝཱ པ་བྦ་ཛི་ཏོ ཝཱ ཀ་ལྱཱ་ཎ་མི་ཏྟ་སཾ་ས་གྒ་ཏོ པུ་བྦེ པཱ་པ་མི་ཏྟ་སཾ་ས་གྒེ་ན ཝཱ ཨ་ཏྟ་ནོ ཝཱ པ་ཊི་ས་ངྑཱ་ནཱ་བྷཱ་ཝེ་ན པ་མ་ཛྫི་ཏྭཱ ས་མྨཱ་པ་ཊི་པ་ཏྟི་ཡཾ པ་མཱ་དཾ ཨཱ་པ་ཛྫི་ཏྭཱ, པ་ཙྪཱ ཀ་ལྱཱ་ཎ་མི་ཏྟ་སཾ་ས་གྒེ་ན ཡོ་ནི་སོ ཨུ་མྨུ་ཛྫ་ནྟོ ན་པྤ་མ་ཛྫ་ཏི, ས་མྨཱ པ་ཊི་པ་ཛྫ་ཏི, ས་མ་ཐ་ཝི་པ་སྶ་ནཾ ཨ་ནུ་ཡུ་ཉྫ་ནྟོ ཏི་སྶོ ཝི་ཛྫཱ ཚ ཨ་བྷི་ཉྙཱ པཱ་པུ་ཎཱ་ཏི, སོ ཨ་བྦྷཱ་དཱི་ཧི མུ་ཏྟོ ཙ་ནྡོ ཝི་ཡ ཨོ་ཀཱ་ས་ལོ་ཀཾ ཨ་ཏྟ་ནཱ ཨ་དྷི་ག་ཏཱ་ཧི ཝི་ཛྫཱ་བྷི་ཉྙཱ་ཧི ཨི་མཾ ཁ་ནྡྷཱ་དི་ལོ་ཀཾ ཨོ་བྷཱ་སེ་ཏཱི་ཏི.

ཡ་སྶ པུ་གྒ་ལ་སྶ ཀ་ཏཾ ཨུ་པ་ཙི་ཏཾ པཱ་པ་ཀ་མྨཾ ཀ་མྨ་ཀྑ་ཡ་ཀ་རེ་ན ལོ་ཀུ་ཏྟ་ར་ཀུ་ས་ལེ་ན ཨ་ཝི་པཱ་ཀཱ་ར་ཧ་བྷཱ་ཝ་སྶ ཨཱ་ཧ་རི་ཏ་ཏྟཱ ཝི་པཱ་ཀུ་པྤཱ་ད་ནེ དྭཱ་ར་པི་དྷཱ་ནེ་ན པི་དྷཱི་ཡ་ཏི ཐ་ཀཱི་ཡ་ཏི. སེ་སཾ ཝུ་ཏྟ་ན་ཡ་མེ་ཝ.

ད་ཧ་རོཏི ཏ་རུ་ཎོ, ཏེ་ན་སྶ ཡོ་ག་ཀྑ་མ་ས་རཱི་ར་ཏཾ ད་སྶེ་ཏི. སོ ཧི ཨུ་པྤ་ནྣཾ ཝཱ་ཏཱ་ཏ་པ་པ་རི་སྶ་ཡཾ ཨ་བྷི་བྷ་ཝི་ཏྭཱ ཡོ་གཾ ཀཱ་ཏུཾ ས་ཀྐོ་ཏི. ཡུ་ཉྫ་ཏི བུ་དྡྷ་སཱ་ས་ནེ སི་ཀྑ་ཏྟ་ཡེ ཡུ་ཏྟ་པྤ་ཡུ་ཏྟོ ཧོ་ཏི, ས་ཀྐ་ཙྩཾ ས་མྤཱ་དེ་ཏཱི་ཏི ཨ་ཏྠོ.

ཨེ་ཝཾ པཱི་ཏི་སོ་མ་ན་སྶ་ཛཱ་ཏོ ཝི་མུ་ཏྟི་སུ་ཁེ་ན ཝི་ཧ་ར་ནྟོ ཡ་དཱ ན་ག་རཾ པི་ཎྜཱ་ཡ པ་ཝི་ས་ཏི, ཏ་དཱ ཨ་ཉྙེ་ན་པི ཁི་ཏྟོ ལེ་ཌྜུ ཐེ་ར་སྶ ཀཱ་ཡེ ནི་པ་ཏ་ཏི, ཨ་ཉྙེ་ན་པི ཁི་ཏྟོ ད་ཎྜོ ཏ་སྶེ་ཝ ཀཱ་ཡེ ནི་པ་ཏ་ཏི. སོ བྷི་ནྣེ་ན པ་ཏྟེ་ན ཝི་ཧཱ་རཾ པ་ཝི་སི་ཏྭཱ ས་ཏྠུ ས་ནྟི་ཀཾ ག་ཙྪ་ཏི. ས་ཏྠཱ ཏཾ ཨོ་ཝ་ད་ཏི ‘‘ཨ་དྷི་ཝཱ་སེ་ཧི, ཏྭཾ བྲཱ་ཧྨ་ཎ, ཨ་དྷི་ཝཱ་སེ་ཧི, ཏྭཾ བྲཱ་ཧྨ་ཎ, ཡ་སྶ ཁོ, ཏྭཾ བྲཱ་ཧྨ་ཎ, ཀ་མྨ་སྶ ཝི་པཱ་ཀེ་ན བ་ཧཱུ་ནི ཝ་སྶ་ས་ཧ་སྶཱ་ནི ནི་ར་ཡེ པ་ཙྩེ་ཡྻཱ་སི, ཏ་སྶ, ཏྭཾ བྲཱ་ཧྨ་ཎ, ཀ་མྨ་སྶ ཝི་པཱ་ཀཾ དི་ཊྛེ་ཝ དྷ་མྨེ པ་ཊི་སཾ་ཝེ་དེ་སཱི’’ཏི. ཨ་ཐ ཐེ་རོ ཨ་ནོ་དྷི་སོ ས་བྦ་ས་ཏྟེ་སུ མེ་ཏྟ་ཙི་ཏྟཾ ཨུ་པ་ཊྛ་པེ་ཏྭཱ –

༨༧༤. ‘‘དི་སཱ་པི མེ དྷ་མྨ་ཀ་ཐཾ སུ་ཎ་ནྟུ, དི་སཱ་པི མེ ཡུ་ཉྫ་ནྟུ བུ་དྡྷ་སཱ་ས་ནེ;

དི་སཱ་པི མེ ཏེ མ་ནུ་ཛེ བྷ་ཛ་ནྟུ, ཡེ དྷ་མྨ་མེ་ཝཱ་ད་པ་ཡ་ནྟི ས་ནྟོ.

༨༧༥. ‘‘དི་སཱ ཧི མེ ཁ་ནྟི་ཝཱ་དཱ་ནཾ, ཨ་ཝི་རོ་དྷ་པྤ་སཾ་སི་ནཾ;

སུ་ཎ་ནྟུ དྷ་མྨཾ ཀཱ་ལེ་ན, ཏ་ཉྩ ཨ་ནུ་ཝི་དྷཱི་ཡ་ནྟུ.

༨༧༦. ‘‘ན ཧི ཛཱ་ཏུ སོ མ་མཾ ཧིཾ་སེ, ཨ་ཉྙཾ ཝཱ པ་ན ཀ་ཉྩི ནཾ;

པ་པྤུ་ཡྻ པ་ར་མཾ ས་ནྟིཾ, ར་ཀྑེ་ཡྻ ཏ་ས་ཐཱ་ཝ་རེ.

༨༧༧. ‘‘ཨུ་ད་ཀ་ཉྷི ན་ཡ་ནྟི ནེ་ཏྟི་ཀཱ, ཨུ་སུ་ཀཱ་རཱ ད་མ་ཡ་ནྟི ཏེ་ཛ་ནཾ;

དཱ་རུཾ ད་མ་ཡ་ནྟི ཏ་ཙྪ་ཀཱ, ཨ་ཏྟཱ་ནཾ ད་མ་ཡ་ནྟི པ་ཎྜི་ཏཱ.

༨༧༨. ‘‘ད་ཎྜེ་ནེ་ཀེ ད་མ་ཡ་ནྟི, ཨ་ངྐུ་སེ་བྷི ཀ་སཱ་ཧི ཙ;

ཨ་ད་ཎྜེ་ན ཨ་ས་ཏྠེ་ན, ཨ་ཧཾ ད་ནྟོ་མྷི ཏཱ་དི་ནཱ.

༨༧༩. ‘‘ཨ་ཧིཾ་ས་ཀོ་ཏི མེ ནཱ་མཾ, ཧིཾ་ས་ཀ་སྶ པུ་རེ ས་ཏོ;

ཨ་ཛྫཱ་ཧཾ ས་ཙྩ་ནཱ་མོ་མྷི, ན ནཾ ཧིཾ་སཱ་མི ཀ་ཉྩི ནཾ.

༨༨༠. ‘‘ཙོ་རོ ཨ་ཧཾ པུ་རེ ཨཱ་སིཾ, ཨ་ངྒུ་ལི་མཱ་ལོ་ཏི ཝི་སྶུ་ཏོ;

ཝུ་ཡ྄ཧ་མཱ་ནོ མ་ཧོ་གྷེ་ན, བུ་དྡྷཾ ས་ར་ཎ་མཱ་ག་མཾ.

༨༨༡. ‘‘ལོ་ཧི་ཏ་པཱ་ཎི པུ་རེ ཨཱ་སིཾ, ཨ་ངྒུ་ལི་མཱ་ལོ་ཏི ཝི་སྶུ་ཏོ;

ས་ར་ཎ་ག་མ་ནཾ པ་སྶ, བྷ་ཝ་ནེ་ཏྟི ས་མཱུ་ཧ་ཏཱ.

༨༨༢. ‘‘ཏཱ་དི་སཾ ཀ་མྨཾ ཀ་ཏྭཱ་ན, བ་ཧུཾ དུ་གྒ་ཏི་གཱ་མི་ནཾ;

ཕུ་ཊྛོ ཀ་མྨ་ཝི་པཱ་ཀེ་ན, ཨ་ན་ཎོ བྷུ་ཉྫཱ་མི བྷོ་ཛ་ནཾ.

༨༨༣. ‘‘པ་མཱ་ད་མ་ནུ་ཡུ་ཉྫ་ནྟི, བཱ་ལཱ དུ་མྨེ་དྷི་ནོ ཛ་ནཱ;

ཨ་པྤ་མཱ་ད་ཉྩ མེ་དྷཱ་ཝཱི, དྷ་ནཾ སེ་ཊྛཾ་ཝ ར་ཀྑ་ཏི.

༨༨༤. ‘‘མཱ པ་མཱ་ད་མ་ནུ་ཡུ་ཉྫེ་ཐ, མཱ ཀཱ་མ་ར་ཏི་ས་ནྠ་ཝཾ;

ཨ་པྤ་མ་ཏྟོ ཧི ཛྷཱ་ཡ་ནྟོ, པ་པྤོ་ཏི པ་ར་མཾ སུ་ཁཾ.

༨༨༥. ‘‘སྭཱ་ག་ཏཾ ནཱ་པ་ག་ཏཾ, ནེ་ཏཾ དུ་མྨ་ནྟི་ཏཾ མ་མ;

ས་ཝི་བྷ་ཏྟེ་སུ དྷ་མྨེ་སུ, ཡཾ སེ་ཊྛཾ ཏ་དུ་པཱ་ག་མཾ.

༨༨༦. ‘‘སྭཱ་ག་ཏཾ ནཱ་པ་ག་ཏཾ, ནེ་ཏཾ དུ་མྨ་ནྟི་ཏཾ མ་མ;

ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.

༨༨༧. ‘‘ཨ་ར་ཉྙེ རུ་ཀྑ་མཱུ་ལེ ཝཱ, པ་བྦ་ཏེ་སུ གུ་ཧཱ་སུ ཝཱ;

ཏ་ཏྠ ཏ་ཏྠེ་ཝ ཨ་ཊྛཱ་སིཾ, ཨུ་བྦི་གྒ་མ་ན་སོ ཏ་དཱ.

༨༨༨. ‘‘སུ་ཁཾ ས་ཡཱ་མི ཋཱ་ཡཱ་མི, སུ་ཁཾ ཀ་པྤེ་མི ཛཱི་ཝི་ཏཾ;

ཨ་ཧ་ཏྠ་པཱ་སོ མཱ་ར་སྶ, ཨ་ཧོ ས་ཏྠཱ་ནུ་ཀ་མྤི་ཏོ.

༨༨༩. ‘‘བྲ་ཧྨ་ཛ་ཙྩོ པུ་རེ ཨཱ་སིཾ, ཨུ་དི་ཙྩོ ཨུ་བྷ་ཏོ ཨ་ཧུ.

སོ་ཛྫ པུ་ཏྟོ སུ་ག་ཏ་སྶ, དྷ་མྨ་རཱ་ཛ་སྶ ས་ཏྠུ་ནོ.

༨༩༠. ‘‘ཝཱི་ཏ་ཏ་ཎྷོ ཨ་ནཱ་དཱ་ནོ, གུ་ཏྟ་དྭཱ་རོ སུ་སཾ་ཝུ་ཏོ;

ཨ་གྷ་མཱུ་ལཾ ཝ་དྷི་ཏྭཱ་ན, པ་ཏྟོ མེ ཨཱ་ས་ཝ་ཀྑ་ཡོ.

༨༩༡. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;

ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ’’ཏི. – ཨི་མཱ གཱ་ཐཱ ཨ་བྷཱ་སི;

ཏ་ཏྠ དི་སཱ་པཱིཏི མ་ཡ྄ཧཾ དི་སཱ་པི ཨ་མི་ཏྟཱ པ་ཙྩ་ཏྠི་ཀཱ་པི ཡེ མཾ ཨེ་ཝཾ ཨུ་པ་ཝ་ད་ནྟི ‘‘ཡ་ཐཱ མ་ཡཾ ཨ་ངྒུ་ལི་མཱ་ལ་སྶ ཝ་སེ་ན ཉཱ་ཏི་ཝི་ཡོ་ག་དུ་ཀྑ་པ་རེ་ཏཱ དུ་ཀྑཾ པཱ་པུ་ཎཱ་མ, ཨེ་ཝཾ ཨ་ངྒུ་ལི་མཱ་ལོ་པི དུ་ཀྑཾ པཱ་པུ་ཎཱ་ཏཱུ’’ཏི. མེ དྷ་མྨ་ཀ་ཐཾ སུ་ཎ་ནྟཱུཏི མ་ཡཱ ས་ཏྠུ ས་ནྟི་ཀེ སུ་ཏཾ ཙ་ཏུ་ས་ཙྩ་དྷ་མྨ་པ་ཊི་སཾ་ཡུ་ཏྟཾ ཀ་ཐཾ སུ་ཎ་ནྟུ. ཡུ་ཉྫ་ནྟཱུཏི སུ་ཏྭཱ ཙ ཏ་ད་ཏྠཱ་ཡ པ་ཊི་པ་ཛྫ་ནྟུ. ཏེ མ་ནུ་ཛེ བྷ་ཛ་ནྟཱུཏི ཏཱ་དི་སེ ས་པྤུ་རི་སེ ཀ་ལྱཱ་ཎ་མི་ཏྟེ བྷ་ཛ་ནྟུ སེ་ཝ་ནྟུ. ཡེ དྷ་མྨ་མེ་ཝཱ་ད་པ་ཡ་ནྟི ས་ནྟོཏི ཡེ ས་པྤུ་རི་སཱ ཀུ་ས་ལ་དྷ་མྨ་མེ་ཝ, ཨུ་ཏྟ་རི་མ་ནུ་སྶ་དྷ་མྨ་མེ་ཝ, ནི་བྦ་ཏྟི་ཏ་ལོ་ཀུ་ཏྟ་ར་དྷ་མྨ་མེ་ཝ ཙ ཨཱ་ད་པེ་ནྟི ས་མཱ་ད་པེ་ནྟི ག་ཎྷཱ་པེ་ནྟི.

ཁ་ནྟི་ཝཱ་དཱ་ནནྟི ཨ་དྷི་ཝཱ་ས་ན་ཁ་ནྟི་མེ་ཝ ཝ་ད་ནྟཱ་ནཾ ཏ་ཏོ ཨེ་ཝ ཨ་ཝི་རོ་དྷ་པྤ་སཾ་སི་ནནྟི ཀེ་ན་ཙི ཨ་ཝི་རོ་དྷ་བྷཱུ་ཏཱ་ཡ མེ་ཏྟཱ་ཡ ཨེ་ཝ པ་སཾ་ས་ན་སཱི་ལཱ་ནཾ. སུ་ཎ་ནྟུ དྷ་མྨཾ ཀཱ་ལེ་ནཱཏི ཡུ་ཏྟ་པྤ་ཡུ་ཏྟ་ཀཱ་ལེ ཏེ་སཾ ས་ནྟི་ཀེ དྷ་མྨཾ སུ་ཎ་ནྟུ. ཏ་ཉྩ ཨ་ནུ་ཝི་དྷཱི་ཡ་ནྟཱུཏི ཏ་ཉྩ ཡ་ཐཱ་སུ་ཏཾ དྷ་མྨཾ ས་མྨ་དེ་ཝ ཨུ་གྒ་ཧི་ཏྭཱ ཨ་ནུ་ཀ་རོ་ནྟུ དྷ་མྨཱ་ནུ་དྷ་མྨཾ པ་ཊི་པ་ཛྫ་ནྟཱུ་ཏི ཨ་ཏྠོ.

ན ཧི ཛཱ་ཏུ སོ མ་མཾ ཧིཾ་སེཏི སོ མ་ཡ྄ཧཾ དི་སོ པ་ཙྩ་ཏྠི་ཀོ ཛཱ་ཏུ, ཨེ་ཀཾ་སེ་ནེ་ཝ མཾ ན ཧིཾ་སེ, ན བཱ་དྷེ་ཡྻ. ཨ་ཉྙཾ ཝཱ པ་ན ཀ་ཉྩི ནནྟི ན ཀེ་ཝ་ལཾ མཾ་ཡེ་ཝ, ཨ་ཉྙཾ ཝཱ་པི ཀ་ཉྩི ས་ཏྟཾ ན ཧིཾ་སེ་ཡྻ, པ་པྤུ་ཡྻ པ་ར་མཾ ས་ནྟིནྟི, པ་ར་མཾ ཨུ་ཏྟ་མཾ ས་ནྟིཾ ནི་བྦཱ་ནཾ པཱ་པུ་ཎེ་ཡྻ, པཱ་པུ་ཎི་ཏྭཱ ཙ ར་ཀྑེ་ཡྻ ཏ་ས་ཐཱ་ཝ་རེཏི ས་བྦེ ཙ ས་ཏྟེ པ་ར་མཱ་ཡ ར་ཀྑཱ་ཡ ར་ཀྑེ་ཡྻ, སི་སྶཾ པུ་ཏྟཾ ཝི་ཡ པ་རི་པཱ་ལེ་ཡྻཱ་ཏི ཨ་ཏྠོ.

ཨེ་ཝཾ ཐེ་རོ ཨི་མཱ་ཧི གཱ་ཐཱ་ཧི པ་རེ པཱ་པ་ཏོ པ་རི་མོ་ཙེ་ནྟོ པ་རི་ཏྟ་ཀི་རི་ཡཾ ནཱ་མ ཀ་ཏྭཱ ཨ་ཏྟ་ནོ པ་ཊི་པ་ཏྟིཾ པ་ཀཱ་སེ་ནྟོ ‘‘ཨུ་ད་ཀཾ ཧཱི’’ཏི གཱ་ཐ་མཱ་ཧ. ཏ་ཏྠ པ་ཐ་ཝི་ཡཱ ཐ་ལ་ཊྛཱ་ནཾ ཁ་ཎི་ཏྭཱ ནི་ནྣ་ཊྛཱ་ནཾ པཱུ་རེ་ཏྭཱ མཱ་ཏི་ཀཾ ཝཱ ཀ་ཏྭཱ རུ་ཀྑ་དོ་ཎིཾ ཝཱ ཋ་པེ་ཏྭཱ ཨ་ཏྟ་ནཱ ཨི་ཙྪི་ཀི་ཙྪི་ཏ་ཊྛཱ་ནཾ ཨུ་ད་ཀཾ ནེ་ནྟཱི་ཏི ནེ་ཏྟི་ཀཱ, ཨུ་ད་ཀ་ཧཱ་རི་ནོ. ཏེ་ཛ་ནནྟི ཀ་ཎྜཾ. ཨི་དཾ ཝུ་ཏྟཾ ཧོ་ཏི – ནེ་ཏྟི་ཀཱ ཨ་ཏྟ་ནོ རུ་ཙི་ཡཱ ཨུ་ད་ཀཾ ན་ཡ་ནྟི, ཨུ་སུ་ཀཱ་རཱ་པི ཏཱ་པེ་ཏྭཱ ཝ་ངྐཱ་བྷཱ་ཝཾ ཧ་ར་ནྟཱ ཏེ་ཛ་ནཾ ཨུ་སུཾ ད་མ་ཡ་ནྟི, ཨུ་ཛུ་ཀཾ ཀ་རོ་ནྟི, ཏ་ཙྪ་ཀཱ་པི ནེ་མི་ཨཱ་དཱི་ནཾ ཨ་ཏྠཱ་ཡ ཏ་ཙྪ་ནྟཱ དཱ་རུཾ ད་མ་ཡ་ནྟི ཨ་ཏྟ་ནོ རུ་ཙི་ཡཱ ཨུ་ཛུཾ ཝཱ ཝ་ངྐཾ ཝཱ ཀ་རོ་ནྟི. ཨེ་ཝཾ ཨེ་ཏྟ་ཀཾ ཨཱ་ར་མྨ་ཎཾ ཀ་ཏྭཱ པ་ཎྜི་ཏཱ ས་པྤ་ཉྙཱ ཨ་རི་ཡ་མ་གྒཾ ཨུ་པྤཱ་དེ་ནྟཱ ཨ་ཏྟཱ་ནཾ ད་མེ་ནྟི, ཨ་ར་ཧ་ཏྟ་པྤ་ཏྟཱ པ་ན ཨེ་ཀ་ནྟ་ད་ནྟཱ ནཱ་མ ཧོ་ནྟཱི་ཏི.

ཨི་དཱ་ནི པུ་རི་ས་ད་མྨ་སཱ་ར་ཐི་ནཱ ས་ཏྠཱ་རཱ ཨ་ཏྟ་ནོ ད་མི་ཏཱ་ཀཱ་རཾ ཀ་ཏ་ཉྙུ་ཏ་ཉྩ པ་ཀཱ་སེ་ནྟོ ‘‘ད་ཎྜེ་ནེ་ཀེ’’ཏི་ཨཱ་དི་ཀཱ པ་ཉྩ གཱ་ཐཱ ཨ་བྷཱ་སི. ཏ་ཏྠ ད་ཎྜེ་ནེ་ཀེ ད་མ་ཡ་ནྟཱིཏི རཱ་ཛ་རཱ་ཛ་མ་ཧཱ་མ་ཏྟཱ་ད་ཡོ ད་ཎྜེ་ན, ཧ་ཏྠི་ཨ་སྶཱ་དི་ནཱ བ་ལ་ཀཱ་ཡེ་ན ཙ པ་ཙྩ་ཏྠི་ཀཱ་དི་ཀེ ད་མེ་ནྟི, གོ་པཱ་ལཱ་ད་ཡོ ཙ གཱ་ཝཱ་དི་ཀེ ད་ཎྜེ་ན ཡ་ཊྛི་ཡཱ ད་མེ་ནྟི. ཧ་ཏྠཱ་ཙ་རི་ཡཱ ཧ་ཏྠིཾ ཨ་ངྐུ་སེ་ཧི, ཨ་སྶཱ་ཙ་རི་ཡཱ ཨ་སྶེ ཀ་སཱ་ཧི ཙ ད་མེ་ནྟི. ཨ་ད་ཎྜེ་ན ཨ་ས་ཏྠེ་ན, ཨ་ཧཾ ད་ནྟོ་མྷི ཏཱ་དི་ནཱཏི ཨ་ཧཾ པ་ན ཨི་ཊྛཱ་དཱི་སུ ཏཱ་དི་བྷཱ་ཝ་པྤ་ཏྟེ་ན ས་མྨཱ་ས་མྦུ་དྡྷེ་ན ཝི་ནཱ ཨེ་ཝ ད་ཎྜེ་ན, ཝི་ནཱ ས་ཏྠེ་ན, ནི་ཧི་ཏ་ད་ཎྜ་ནི་ཧི་ཏ་ས་ཏྠ་བྷཱ་ཝེ་ན ད་ནྟོ ད་མི་ཏོ ནི་བྦི་སེ་ཝ་ནོ ག་ཏོ ཨ་མྷི.

ཨ་ཧིཾ་ས་ཀོ་ཏི མེ ནཱ་མཾ, ཧིཾ་ས་ཀ་སྶ པུ་རེ ས་ཏོཏི ས་ཏྠཱ་རཱ ས་མཱ་ག་མ་ཏོ པུ་བྦེ ཧིཾ་ས་ཀ་སྶ མེ ས་མཱ་ན་སྶ ཨ་ཧིཾ་ས་ཀོ་ཏི ནཱ་མ་མ་ཏྟཾ ཨ་ཧོ་སི. ཨ་ཛྫཱ་ཧནྟི ཨི་དཱ་ནི པ་ནཱ་ཧཾ ‘‘ཨ་ཧིཾ་ས་ཀོ’’ཏི ས་ཙྩ་ནཱ་མོ ཨ་ཝི་ཏ་ཐ་ནཱ་མོ ཨ་མྷི. ཏ་སྨཱ ན ནཾ ཧིཾ་སཱ་མི ཀ་ཉྩི་པི ས་ཏྟཾ ན ཧིཾ་སཱ་མི ན བཱ་དྷེ་མི, ནནྟི ནི་པཱ་ཏ་མ་ཏྟཾ.

ཝི་སྶུ་ཏོཏི ‘‘པཱ་ཎཱ་ཏི་པཱ་ཏཱི ལུ་དྡོ ལོ་ཧི་ཏ་པཱ་ཎཱི’’ཏི་ཨཱ་དི་ནཱ པ་ཉྙཱ་ཏོ. མ་ཧོ་གྷེ་ནཱཏི ཀཱ་མོ་གྷཱ་དི་ནཱ མ་ཧ་ཏཱ ཨོ་གྷེ་ན, ཏ་སྶ ཨོ་གྷ་སྶ ཝི་ཙྪེ་ད་ཀ་རཾ བུ་དྡྷཾ ས་ར་ཎཾ བུ་དྡྷ་ས་ངྑཱ་ཏཾ ས་ར་ཎཾ ཨ་ག་མཾ ཨུ་པ་ག་ཙྪིཾ.

ལོ་ཧི་ཏ་པཱ་ཎཱིཏི པཱ་ཎ་མ་ཏི་པཱ་ཏ་ནེ་ན པ་རེ་སཾ ལོ་ཧི་ཏེ་ན རུ་ཧི་རེ་ན མ་ཀྑི་ཏ་པཱ་ཎི. ས་ར་ཎ་ག་མ་ནཾ པ་སྶཱཏི མ་ཧ་པྥ་ལཾ མ་མ ས་ར་ཎ་ག་མ་ནཾ པ་སྶཱ་ཏི ཨ་ཏྟཱ་ན་མེ་ཝཱ་ལ་པ་ཏི.

ཏཱ་དི་སཾ ཀ་མྨནྟི ཨ་ནེ་ཀ་ས་ཏ་པུ་རི་ས་ཝ་དྷཾ དཱ་རུ་ཎཾ ཏ་ཐཱ་རཱུ་པཾ པཱ་པ་ཀ་མྨཾ. ཕུ་ཊྛོ ཀ་མྨ་ཝི་པཱ་ཀེ་ནཱཏི པུ་བྦེ ཀ་ཏ་སྶ པཱ་པ་ཀ་མྨ་སྶ ཝི་པཱ་ཀེ་ན ཕུ་ཊྛོ, ས་བྦ་སོ པ་ཧཱི་ན་ཀ་མྨོ ཝི་པཱ་ཀ་མ་ཏྟཾ པ་ཙྩ་ནུ་བྷོ་ནྟོ. ཨ་ཐ ཝཱ ཕུ་ཊྛོ ཀ་མྨ་ཝི་པཱ་ཀེ་ནཱཏི ཨུ་པ་ནི་སྶ་ཡ་བྷཱུ་ཏ་སྶ ཀུ་ས་ལ་ཀ་མྨ་སྶ ཕ་ལ་བྷཱུ་ཏེ་ན ལོ་ཀུ་ཏྟ་ར་མ་གྒེ་ན, ལོ་ཀུ་ཏྟ་ར་ཀ་མྨ་སྶེ་ཝ ཝཱ ཕ་ལེ་ན ཝི་མུ་ཏྟི་སུ་ཁེ་ན ཕུ་ཊྛོ. ས་བྦ་སོ ཀི་ལེ་སཱ་ནཾ ཁཱི་ཎ་ཏྟཱ ཨ་ན་ཎོ བྷུ་ཉྫཱ་མི བྷོ་ཛ་ནཾ, བྷོ་ཛ་ནཱ་པ་དེ་སེ་ན ཙ་ཏྟཱ་རོ་པི པ་ཙྩ་ཡེ ཝ་ད་ཏི.

ཨི་དཱ་ནི པུ་བྦེ ཨ་ཏྟ་ནོ པ་མཱ་ད་ཝི་ཧཱ་རཾ ག་ར་ཧཱ་མུ་ཁེ་ན པ་ཙྪཱ ཨ་པྤ་མཱ་ད་པ་ཊི་པ་ཏྟིཾ པ་སཾ་ས་ནྟོ ཏ་ཏྠ ཙ པ་རེ་སཾ ཨུ་སྶཱ་ཧཾ ཛ་ནེ་ནྟོ ‘‘པ་མཱ་ད་མ་ནུ་ཡུ་ཉྫ་ནྟཱི’’ཏི་ཨཱ་དི་ཀཱ གཱ་ཐཱ ཨ་བྷཱ་སི. ཏ་ཏྠ བཱ་ལཱཏི བཱ་ལྱེ་ན ས་མ་ནྣཱ་ག་ཏཱ ཨི་དྷ་ལོ་ཀ་པ་ར་ལོ་ཀ་ཏྠཾ ཨ་ཛཱ་ན་ནྟཱ. དུ་མྨེ་དྷི་ནོཏི ནི་པྤ་ཉྙཱ, ཏེ པ་མཱ་དེ ཨཱ་དཱི་ན་ཝཾ ཨ་པ་སྶ་ནྟཱ པ་མཱ་དཾ ཨ་ནུ་ཡུ་ཉྫ་ནྟི པ་ཝ་ཏྟེ་ནྟི, པ་མཱ་དེ་ནེ་ཝ ཀཱ་ལཾ ཝཱི་ཏི་ནཱ་མེ་ནྟི. མེ་དྷཱ་ཝཱིཏི དྷ་མྨོ་ཛ་པ་ཉྙཱ་ཡ ས་མ་ནྣཱ་ག་ཏོ པ་ན པ་ཎྜི་ཏོ ཀུ་ལ་ཝཾ་སཱ་ག་ཏཾ སེ་ཊྛཾ ཨུ་ཏྟ་མཾ ས་ཏྟ་ར་ཏ་ན་དྷ་ནཾ ཝི་ཡ ཨ་པྤ་མཱ་དཾ ར་ཀྑ་ཏི. ཡ་ཐཱ ཧི ‘‘ཨུ་ཏྟ་མཾ དྷ་ནཾ ནི་སྶཱ་ཡ བྷོ་ག་ས་མྤ་ཏྟིཾ པཱ་པུ་ཎི་སྶཱ་མ, པུ་ཏྟ་དཱ་རཾ པོ་སེ་སྶཱ་མ, སུ་ག་ཏི་མ་གྒཾ སོ་དྷེ་སྶཱ་མཱ’’ཏི དྷ་ནེ ཨཱ་ནི་སཾ་སཾ པ་སྶ་ནྟཱ དྷ་ནཾ ར་ཀྑ་ནྟི; ཨེ་ཝཾ པ་ཎྜི་ཏོ་པི ‘‘ཨ་པྤ་མཱ་དཾ ནི་སྶཱ་ཡ པ་ཋ་མ་ཛ྄ཛྷཱ་ནཱ་དཱི་ནི པ་ཊི་ལ་བྷི་སྶཱ་མི, མ་གྒ་ཕ་ལཱ་ནི པཱ་པུ་ཎི་སྶཱ་མི, ཏི་སྶོ ཝི་ཛྫཱ ཚ ཨ་བྷི་ཉྙཱ ས་མྤཱ་དེ་སྶཱ་མཱི’’ཏི ཨ་པྤ་མཱ་དེ ཨཱ་ནི་སཾ་སཾ པ་སྶ་ནྟོ དྷ་ནཾ སེ་ཊྛཾ་ཝ ཨ་པྤ་མཱ་དཾ ར་ཀྑ་ཏཱི་ཏི ཨ་ཏྠོ.

མཱ པ་མཱ་དནྟི པ་མཱ་དཾ མཱ ཨ་ནུ་ཡུ་ཉྫེ་ཐ པ་མཱ་དེ་ན ཀཱ་ལཾ མཱ ཝཱི་ཏི་ནཱ་མ་ཡི་ཏྠ. ཀཱ་མ་ར་ཏི་ས་ནྠ་ཝནྟི ཝ་ཏྠུ་ཀཱ་མེ་སུ, ཀི་ལེ་ས་ཀཱ་མེ་སུ ཙ ར་ཏི་ས་ངྑཱ་ཏཾ ཏ་ཎྷཱ་ས་ནྠ་ཝ་མྤི མཱ ཨ་ནུ་ཡུ་ཉྫེ་ཐ མཱ ཝི་ནྡི་ཏྠ མཱ པ་ཊི་ལ་བྷི་ཏྠ. ཨ་པྤ་མ་ཏྟོ ཧཱིཏི ཨུ་པ་ཊྛི་ཏ་ས་ཏི་ཏཱ་ཡ ཨ་པྤ་མ་ཏྟོ པུ་གྒ་ལོ ཛྷཱ་ཡ་ནྟོ ཛྷཱ་ཡ་ན་པྤ་སུ་ཏོ པ་ར་མཾ ཨུ་ཏྟ་མཾ ནི་བྦཱ་ན་སུ་ཁཾ པཱ་པུ་ཎཱ་ཏི.

སྭཱ་ག་ཏཾ ནཱ་པ་ག་ཏནྟི ཡཾ ཏ་དཱ མ་མ ས་ཏྠུ ས་ནྟི་ཀེ ཨཱ་ག་ཏཾ ཨཱ་ག་མ་ནཾ, ས་ཏྠུ ཝཱ ཏ་སྨིཾ མ་ཧཱ་ཝ་ནེ ཨཱ་ག་མ་ནཾ, ཏཾ སྭཱ་ག་ཏཾ སྭཱ་ག་མ་ནཾ ནཱ་པ་ག་ཏཾ, ཨ་ཏྠ་ཏོ ཨ་པེ་ཏཾ ཝི་ག་ཏཾ ན ཧོ་ཏི. ནེ་ཏཾ དུ་མྨ་ནྟི་ཏཾ མ་མཱཏི ཡཾ ཏ་དཱ མ་ཡཱ ‘‘ས་ཏྠུ ས་ནྟི་ཀེ པ་བྦ་ཛི་སྶཱ་མཱི’’ཏི མ་ནྟི་ཏཾ, ཨི་ད་མྤི མ་མ ན དུ་མྨ་ནྟི་ཏཾ, སུ་མ་ནྟི་ཏ་མེ་ཝ. ཀ་སྨཱ? ས་ཝི་བྷ་ཏྟེ་སུ དྷ་མྨེ་སཱུཏི སཱ་ཝ་ཛྫཱ་ན་ཝ་ཛྫཱ་དི་ཝ་སེ་ན པ་ཀཱ་ར་ཏོ ཝི་བྷ་ཏྟེ་སུ དྷ་མྨེ་སུ ཡཾ སེ་ཊྛཾ ཨུ་ཏྟ་མཾ པ་ཝ་རཾ ནི་བྦཱ་ནཾ. ཏ་དུ་པཱ་ག་མཾ ཏ་དེ་ཝ ཨུ་པ་ག་ཙྪི་ནྟི ཨ་ཏྠོ.

‘‘ཏ་དཱ པུ་ཐུ་ཛྫ་ན་ཀཱ་ལེ པ་ཡོ་གཱ་ས་ཡ་ཝི་པ་ནྣ་ཏཱ་ཡ ཨ་ར་ཉྙཱ་དཱི་སུ དུ་ཀྑཾ ཝི་ཧཱ་སིཾ, ཨི་དཱ་ནི པ་ཡོ་གཱ་ས་ཡ་ས་མྤ་ནྣ་ཏཱ་ཡ ཏ་ཏྠ སུ་ཁཾ ཝི་ཧ་རཱ་མཱི’’ཏི སུ་ཁ་ཝི་ཧཱ་ར་བྷཱ་ཝ་ཉྩེ་ཝ ‘‘པུ་བྦེ ཛཱ་ཏི་མ་ཏྟེ་ན བྲཱ་ཧྨ་ཎོ, ཨི་དཱ་ནི ས་ཏྠུ ཨོ་ར་ས་པུ་ཏྟ་ཏཱ་ཡ བྲཱ་ཧྨ་ཎོ’’ཏི པ་ར་མ་ཏྠ་བྲཱ་ཧྨ་ཎ་བྷཱ་ཝ་ཉྩ ད་སྶེ་ནྟོ ‘‘ཨ་ར་ཉྙེ’’ཏི་ཨཱ་དི་མཱ་ཧ. ཏ་ཏྠ སུ་ཁཾ ས་ཡཱ་མཱིཏི ས་ཡ་ནྟོ་པི སུ་ཁཾ སུ་ཁེ་ན ནི་དུ་ཀྑེ་ན ཙི་ཏྟུ་ཏྲཱ་སཱ་དཱི་ནཾ ཨ་བྷཱ་ཝེ་ན ཙེ་ཏོ་དུ་ཀྑ་ར་ཧི་ཏོ ས་ཡཱ་མི. ཋཱ་ཡཱ་མཱིཏི ཋཱ་མི. ཨ་ཧ་ཏྠ་པཱ་སོ མཱ་ར་སྶཱཏི ཀི་ལེ་ས་མཱ་རཱ་དཱི་ནཾ ཨ་གོ་ཙ་རོ. ཨ་ཧོ ས་ཏྠཱ་ནུ་ཀ་མྤི་ཏོཏི ས་ཏྠཱ་རཱ་ནུ་ཀ་མྤི་ཏོ ཨ་ཧོ.

བྲ་ཧྨ་ཛ་ཙྩོཏི བྲཱ་ཧྨ་ཎ་ཛཱ་ཏི་ཀོ. ཨུ་དི་ཙྩོ ཨུ་བྷ་ཏོཏི མཱ་ཏི་ཏོ ཙ པི་ཏི་ཏོ ཙ ཨུ་བྷ་ཏོ ཨུ་དི་ཏོ སཾ་སུ་དྡྷ་ག་ཧ་ཎི་ཀོ. སེ་སཾ ཏ་ཏྠ ཏ་ཏྠ ཝུ་ཏྟ་ན་ཡ་མེ་ཝ.

ཨ་ངྒུ་ལི་མཱ་ལ་ཏྠེ་ར་གཱ་ཐཱ་ཝ་ཎྞ་ནཱ ནི་ཊྛི་ཏཱ.