༥. མཱ་ལུ་ཀྱ་པུ་ཏྟ་ཏྠེ་ར་གཱ་ཐཱ་ཝ་ཎྞ་ནཱ
རཱུ་པཾ དི་སྭཱ ས་ཏི མུ་ཊྛཱཏི་ཨཱ་དི་ཀཱ ཨཱ་ཡ་སྨ་ཏོ མཱ་ལུ་ཀྱ་པུ་ཏྟ་སྶ གཱ་ཐཱ. ཨི་མ་སྶ ཨཱ་ཡ་སྨ་ཏོ ཝ་ཏྠུ ཧེ་ཊྛཱ ཚ་ཀྐ་ནི་པཱ་ཏེ (ཐེ་ར་གཱ. ༣༩༩ ཨཱ་ད་ཡོ) ཝུ་ཏྟ་མེ་ཝ. ཏཱ པ་ན གཱ་ཐཱ ཐེ་རེ་ན ཨ་ར་ཧ་ཏྟེ པ་ཏི་ཊྛི་ཏེ་ན ཉཱ་ཏཱི་ནཾ དྷ་མྨ་དེ་ས་ནཱ་ཝ་སེ་ན བྷཱ་སི་ཏཱ. ཨི་དྷ པ་ན པུ་ཐུ་ཛྫ་ན་ཀཱ་ལེ ‘‘སཱ་དྷུ མེ, བྷ་ནྟེ, བྷ་ག་ཝཱ སཾ་ཁི་ཏྟེ་ན དྷ་མྨཾ དེ་སེ་ཏཱུ’’ཏི ཡཱ་ཙི་ཏེ་ན ས་ཏྠཱ་རཱ ‘‘ཏཾ ཀིཾ མ་ཉྙ་སི, མཱ་ལུ་ཀྱ་པུ་ཏྟ, ཡེ ཏེ ཙ་ཀྑུ་ཝི་ཉྙེ་ཡྻཱ རཱུ་པཱ ཨ་དི་ཊྛཱ ཨ་དི་ཊྛ་པུ་བྦཱ, ན ཙ པ་སྶ་སི, ན ཙ ཏེ ཧོ་ཏི པ་སྶེ་ཡྻ་ནྟི, ཨ་ཏྠི ཏེ ཏ་ཏྠ ཚ་ནྡོ ཝཱ རཱ་གོ ཝཱ པེ་མཾ ཝཱ’’ཏི? ‘‘ནོ ཧེ་ཏཾ, བྷ་ནྟེ’’. ‘‘ཡེ ཏེ སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན…ཛི་ཝ྄ཧཱ…ཀཱ་ཡ…མ་ནོ་ཝི་ཉྙེ་ཡྻཱ དྷ་མྨཱ ཨ་ཝི་ཉྙཱ་ཏཱ ཨ་ཝི་ཉྙཱ་ཏ་པུ་བྦཱ, ན ཙ ཝི་ཛཱ་ནཱ་སི, ན ཙ ཏེ ཧོ་ཏི ཝི་ཛཱ་ནེ་ཡྻ་ནྟི, ཨ་ཏྠི ཏེ ཏ་ཏྠ ཚ་ནྡོ ཝཱ རཱ་གོ ཝཱ པེ་མཾ ཝཱ’’ཏི? ‘‘ནོ ཧེ་ཏཾ, བྷ་ནྟེ’’. ‘‘ཨེ་ཏྠ ཙ ཏེ, མཱ་ལུ་ཀྱ་པུ་ཏྟ, དི་ཊྛ་སུ་ཏ་མུ་ཏ་ཝི་ཉྙཱ་ཏ་བྦེ་སུ དྷ་མྨེ་སུ དི་ཊྛེ དི་ཊྛ་མ་ཏྟཾ བྷ་ཝི་སྶ་ཏི, སུ་ཏེ སུ་ཏ་མ་ཏྟཾ, མུ་ཏེ མུ་ཏ་མ་ཏྟཾ, ཝི་ཉྙཱ་ཏེ ཝི་ཉྙཱ་ཏ་མ་ཏྟཾ བྷ་ཝི་སྶ་ཏི. ཡ་ཏོ ཁོ ཏེ, མཱ་ལུ་ཀྱ་པུ་ཏྟ, དི་ཊྛ་སུ་ཏ་མུ་ཏ་ཝི་ཉྙཱ་ཏ་བྦེ་སུ དྷ་མྨེ་སུ དི་ཊྛེ དི་ཊྛ་མ་ཏྟཾ, སུ་ཏེ སུ་ཏ་མ་ཏྟཾ, མུ་ཏེ མུ་ཏ་མ་ཏྟཾ, ཝི་ཉྙཱ་ཏེ ཝི་ཉྙཱ་ཏ་མ་ཏྟཾ བྷ་ཝི་སྶ་ཏི, ཏ་ཏོ ཏྭཾ, མཱ་ལུ་ཀྱ་པུ་ཏྟ, ན ཏེ་ན. ཡ་ཏོ ཏྭཾ, མཱ་ལུ་ཀྱ་པུ་ཏྟ, ན ཏེ་ན, ཏ་ཏོ ཏྭཾ, མཱ་ལུ་ཀྱ་པུ་ཏྟ, ན ཏ་ཏྠ. ཡ་ཏོ ཏྭཾ, མཱ་ལུ་ཀྱ་པུ་ཏྟ, ན ཏ་ཏྠ, ཏ་ཏོ ཏྭཾ, མཱ་ལུ་ཀྱ་པུ་ཏྟ, ནེ་ཝི་དྷ ན ཧུ་རཾ ན ཨུ་བྷ་ཡ་མ་ནྟ་རེ་ན, ཨེ་སེ་ཝ་ནྟོ དུ་ཀྑ་སྶཱ’’ཏི (སཾ. ནི. ༤.༩༥). སཾ་ཁི་ཏྟེ་ན དྷ་མྨེ དེ་སི་ཏེ ཏ་སྶ དྷ་མྨ་སྶ སཱ་དྷུ་ཀཾ ཨུ་གྒ་ཧི་ཏ་བྷཱ་ཝཾ པ་ཀཱ་སེ་ནྟེ་ན –
༧༩༤. ‘‘རཱུ་པཾ དི་སྭཱ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༧༩༥. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ རཱུ་པ་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༧༩༦. ‘‘ས་དྡཾ སུ་ཏྭཱ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༧༩༧. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ ས་དྡ་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༧༩༨. ‘‘ག་ནྡྷཾ གྷ་ཏྭཱ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༧༩༩. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ ག་ནྡྷ་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༨༠༠. ‘‘ར་སཾ བྷོ་ཏྭཱ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༨༠༡. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ ར་ས་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༨༠༢. ‘‘ཕ་སྶཾ ཕུ་སྶ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༨༠༣. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ ཕ་སྶ་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༨༠༤. ‘‘དྷ་མྨཾ ཉ་ཏྭཱ ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོ;
སཱ་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ཨ་ཛ྄ཛྷོ་ས ཏི་ཊྛ་ཏི.
༨༠༥. ‘‘ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ དྷ་མྨ་ས་མྦྷ་ཝཱ;
ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏི;
ཨེ་ཝ་མཱ་ཙི་ན་ཏོ དུ་ཀྑཾ, ཨཱ་རཱ ནི་བྦཱ་ན ཝུ་ཙྩ་ཏི.
༨༠༦. ‘‘ན སོ ར་ཛྫ་ཏི རཱུ་པེ་སུ, རཱུ་པཾ དི་སྭཱ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༠༧. ‘‘ཡ་ཐཱ་སྶ པ་སྶ་ཏོ རཱུ་པཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏི.
༨༠༨. ‘‘ན སོ ར་ཛྫ་ཏི ས་དྡེ་སུ, ས་དྡཾ སུ་ཏྭཱ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༠༩. ‘‘ཡ་ཐཱ་སྶ སུ་ཎ་ཏོ ས་དྡཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏི.
༨༡༠. ‘‘ན སོ ར་ཛྫ་ཏི ག་ནྡྷེ་སུ, ག་ནྡྷཾ གྷ་ཏྭཱ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༡༡. ‘‘ཡ་ཐཱ་སྶ གྷཱ་ཡ་ཏོ ག་ནྡྷཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏི.
༨༡༢. ‘‘ན སོ ར་ཛྫ་ཏི ར་སེ་སུ, ར་སཾ བྷོ་ཏྭཱ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༡༣. ‘‘ཡ་ཐཱ་སྶ སཱ་ཡ་ཏོ ར་སཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏི.
༨༡༤. ‘‘ན སོ ར་ཛྫ་ཏི ཕ་སྶེ་སུ, ཕ་སྶཾ ཕུ་སྶ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༡༥. ‘‘ཡ་ཐཱ་སྶ ཕུ་ས་ཏོ ཕ་སྶཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏི.
༨༡༦. ‘‘ན སོ ར་ཛྫ་ཏི དྷ་མྨེ་སུ, དྷ་མྨཾ ཉ་ཏྭཱ པ་ཊི་སྶ་ཏོ;
ཝི་ར་ཏྟ་ཙི་ཏྟོ ཝེ་དེ་ཏི, ཏ་ཉྩ ནཱ་ཛ྄ཛྷོ་ས ཏི་ཊྛ་ཏི.
༨༡༧. ‘‘ཡ་ཐཱ་སྶ ཝི་ཛཱ་ན་ཏོ དྷ་མྨཾ, སེ་ཝ་ཏོ ཙཱ་པི ཝེ་ད་ནཾ;
ཁཱི་ཡ་ཏི ནོ་པ་ཙཱི་ཡ་ཏི, ཨེ་ཝཾ སོ ཙ་ར་ཏཱི ས་ཏོ;
ཨེ་ཝཾ ཨ་པ་ཙི་ན་ཏོ དུ་ཀྑཾ, ས་ནྟི་ཀེ ནི་བྦཱ་ན ཝུ་ཙྩ་ཏཱི’’ཏི. –
ཨི་མཱ གཱ་ཐཱ ཨ་བྷཱ་སི.
ཏ་ཏྠ རཱུ་པཾ དི་སྭཱཏི ཙ་ཀྑུ་ཝི་ཉྙེ་ཡྻཾ རཱུ་པཾ ཙ་ཀྑུ་དྭཱ་རེ་ན ཨུ་པ་ལ་བྷི་ཏྭཱ. ས་ཏི མུ་ཊྛཱ, པི་ཡཾ ནི་མི་ཏྟཾ མ་ན་སི ཀ་རོ་ཏོཏི ཏ་སྨིཾ རཱུ་པེ དི་ཊྛ་མ་ཏྟེ ཨེ་ཝ ཨ་ཊྛ་ཏྭཱ སུ་བྷ་ནི་མི་ཏྟཾ མ་ན་སི ཀ་རོ་ཏོ སུ་བྷཱ་ཀཱ་ར་གྒ་ཧ་ཎ་ཝ་སེ་ན ཨ་ཡོ་ནི་སོ མ་ན་སི ཀ་རོ་ཏོ ས་ཏི མུ་ཊྛཱ ཧོ་ཏི. ཏ་ཐཱ ཙ ས་ཏི སཱ་ར་ཏྟ་ཙི་ཏྟོ ཝེ་དེ་ཏི ཏཾ རཱུ་པཱ་ར་མྨ་ཎཾ ར་ཏྟོ, གི་དྡྷོ, ག་དྷི་ཏོ ཧུ་ཏྭཱ ཨ་ནུ་བྷ་ཝ་ཏི, ཨ་སྶཱ་དེ་ཏི, ཨ་བྷི་ན་ནྡ་ཏི. ཏ་ཐཱ་བྷཱུ་ཏོ ཙ ཏ་ཉྩ ཨ་ཛ྄ཛྷོ་ས ཏི་ཊྛ་ཏཱིཏི ཏ་ཉྩ རཱུ་པཱ་ར་མྨ་ཎཾ ཨ་ཛ྄ཛྷོ་སཱ་ཡ ‘‘སུ་ཁཾ སུ་ཁ’’ནྟི ཨ་བྷི་ནི་ཝི་སྶ གི་ལི་ཏྭཱ པ་རི་ནི་ཊྛཱ་པེ་ཏྭཱ ཏི་ཊྛ་ཏི.
ཏ་སྶ ཝ་ཌྜྷ་ནྟི ཝེ་ད་ནཱ, ཨ་ནེ་ཀཱ རཱུ་པ་ས་མྦྷ་ཝཱཏི ཏ་སྶ ཨེ་ཝ་རཱུ་པ་སྶ པུ་གྒ་ལ་སྶ རཱུ་པ་ས་མྦྷ་ཝཱ རཱུ་པཱ་ར་མྨ་ཎཱ སུ་ཁཱ་དི་བྷེ་དེ་ན ཨ་ནེ་ཀཱ ཝེ་ད་ནཱ ཀི་ལེ་སུ་པྤ་ཏྟི་ཧེ་ཏུ་བྷཱུ་ཏཱ ཝ་ཌྜྷ་ནྟི. ཨ་བྷི་ཛ྄ཛྷཱ ཙ ཝི་ཧེ་སཱ ཙ, ཙི་ཏྟ་མ་སྶཱུ་པ་ཧ་ཉྙ་ཏཱིཏི པི་ཡ་རཱུ་པེ སཱ་ར་ཛྫ་ན་ཝ་སེ་ན ཨུ་པྤ་ཛྫ་མཱ་ནཱ་ཡ ཨ་བྷི་ཛ྄ཛྷཱ་ཡ, ཨ་པི་ཡ་རཱུ་པེ བྱཱ་པ་ཛྫ་ན་ཝ་སེ་ན པི་ཡ་རཱུ་པ་སྶེ་ཝ ཝི་པ་རི་ཎཱ་མ་ཉྙ་ཐཱ་བྷཱ་ཝཱ་ཡ ཨུ་པྤ་ཛྫ་མཱ་ནཱ་ཡ སོ་ཀཱ་དི་ལ་ཀྑ་ཎཱ་ཡ ཝི་ཧེ་སཱ་ཡ ཙ ཨ་སྶ པུ་གྒ་ལ་སྶ ཙི་ཏྟཾ ཨུ་པ་ཧ་ཉྙ་ཏི བཱ་དྷཱི་ཡ་ཏི. ཨེ་ཝ་མཱ་ཙི་ན་ཏོ དུ་ཀྑནྟི ཝུ་ཏྟཱ་ཀཱ་རེ་ན ཏཾ ཏཾ ཝེ་ད་ན་སྶཱ་ད་ཝ་སེ་ན བྷ་ཝཱ་བྷི་ས་ངྑཱ་རཾ ཨཱ་ཙི་ན་ཏོ ཝ་ཊྚ་དུ་ཀྑཾ པ་ཝ་ཏྟ་ཏི. ཏེ་ནཱ་ཧ བྷ་ག་ཝཱ – ‘‘ཝེ་ད་ནཱ་པ་ཙྩ་ཡཱ ཏ་ཎྷཱ…པེ… དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏཱི’’ཏི (ཝི་བྷ. ༢༢༥; སཾ. ནི. ༢.༡). ཏ་ཐཱ་བྷཱུ་ཏ་སྶ ཨཱ་རཱ ཨཱ་ར་ཀཱ དཱུ་རེ ནི་བྦཱ་ནཾ ཝུ་ཙྩ་ཏི, ཏ་སྶ ཏཾ དུ་ལླ་བྷ་ནྟི ཨ་ཏྠོ. ས་དྡཾ སུ་ཏྭཱཏི་ཨཱ་དི་གཱ་ཐཱ་སུ་པི ཝུ་ཏྟ་ན་ཡེ་ནེ་ཝ ཨ་ཏྠོ ཝེ་དི་ཏ་བྦོ. ཏ་ཏྠ གྷ་ཏྭཱཏི གྷཱ་ཡི་ཏྭཱ. བྷོ་ཏྭཱཏི སཱ་ཡི་ཏྭཱ. ཕུ་སྶཱཏི ཕུ་སི་ཏྭཱ. དྷ་མྨཾ ཉ་ཏྭཱཏི དྷ་མྨཱ་ར་མྨ་ཎཾ ཝི་ཛཱ་ནི་ཏྭཱ.
ཨེ་ཝཾ ཚ་དྭཱ་ར་གོ་ཙ་རེ སཱ་ར་ཛྫ་ནྟ་སྶ ཝ་ཊྚཾ ད་སྶེ་ཏྭཱ ཨི་དཱ་ནི ཏ་ཏྠ ཝི་ར་ཛྫ་ནྟ་སྶ ཝི་ཝ་ཊྚཾ ད་སྶེ་ནྟོ ‘‘ན སོ ར་ཛྫ་ཏི རཱུ་པེ་སཱུ’’ཏི་ཨཱ་དི་མཱ་ཧ. ཏ་ཏྠ ན སོ ར་ཛྫ་ཏི རཱུ་པེ་སུ, རཱུ་པཾ དི་སྭཱ པ་ཊི་སྶ་ཏོཏི ཡོ པུ་གྒ་ལོ རཱུ་པཾ དི་སྭཱ ཨཱ་པཱ་ཐ་ག་ཏཾ རཱུ་པཱ་ར་མྨ་ཎཾ ཙ་ཀྑུ་དྭཱ་རི་ཀེ་ན ཝི་ཉྙཱ་ཎ་ས་ནྟཱ་ནེ་ན ག་ཧེ་ཏྭཱ ཙ་ཏུ་ས་མྤ་ཛ་ཉྙ་ཝ་སེ་ན ས་མྤ་ཛཱ་ན་ཀཱ་རི་ཏཱ་ཡ པ་ཊི་སྶ་ཏོ ཧོ་ཏི, སོ རཱུ་པཱ་ར་མྨ་ཎེ་སུ ན ར་ཛྫ་ཏི རཱ་གཾ ན ཛ་ནེ་ཏི, ཨ་ཉྙ་ད་ཏྠུ ཝི་ར་ཏྟ་ཙི་ཏྟོ ཝེ་དེ་ཏི, རཱུ་པཱ་ར་མྨ་ཎ་མྷི ས་མུ་ད་ཡཱ་དི་ཏོ ཡ་ཐཱ་བྷཱུ་ཏཾ པ་ཛཱ་ན་ནྟོ ནི་བྦི་ནྡ་ཏི, ནི་བྦི་ནྡ་ནྟོ ཏཾ ཏ་ཏྠུ་པྤ་ནྣ་ཝེ་ད་ན་ཉྩ ཝི་ར་ཏྟ་ཙི་ཏྟོ ཝེ་དེ་ཏི, ཏ་ཐཱ་བྷཱུ་ཏོ ཙ ཏ་ཉྩ ན་ཛ྄ཛྷོ་ས ཏི་ཊྛ་ཏཱིཏི ཏཾ རཱུ་པཱ་ར་མྨ་ཎཾ ས་མྨ་དེ་ཝ ཝི་ར་ཏྟ་ཙི་ཏྟ་ཏཱ་ཡ ཨ་ཛ྄ཛྷོ་སཱ་ཡ ན ཏི་ཊྛ་ཏི ‘‘ཨེ་ཏཾ མ་མ, ཨེ་སོ་ཧ་མ་སྨི, ཨེ་སོ མེ ཨ་ཏྟཱ’’ཏི ཏ་ཎྷཱ་མཱ་ན་དི་ཊྛི་ཝ་སེ་ན ནཱ་བྷི་ནི་ཝི་ས་ཏི.
ཡ་ཐཱ་སྶ པ་སྶ་ཏོ རཱུ་པནྟི ཨ་སྶ ཡོ་གི་ནོ ཡ་ཐཱ ཏ་ཏྠ ཨ་བྷི་ཛ྄ཛྷཱ་ད་ཡོ ན་པྤ་ཝ་ཏྟ་ནྟི, ཨེ་ཝཾ ཨ་ནི་ཙྩཱ་དི་ཏོ རཱུ་པཾ པ་སྶ་ནྟ་སྶ. སེ་ཝ་ཏོ ཙཱ་པི ཝེ་ད་ནནྟི ཏཾ ཨཱ་ར་བྦྷ ཨུ་པྤ་ནྣཾ ཝེ་ད་ནཾ ཏཾ་ས་མྤ་ཡུ་ཏྟ་དྷ་མྨེ ཙ གོ་ཙ་ར་སེ་ཝ་ནཱ་ཡ སེ་ཝ་ཏོ ཙཱ་པི. ཁཱི་ཡ་ཏཱིཏི ས་བྦཾ ཀི་ལེ་ས་ཝ་ཊྚཾ པ་རི་ཀྑ་ཡཾ པ་རི་ཡཱ་དཱ་ནཾ ག་ཙྪ་ཏི. ནོ་པ་ཙཱི་ཡ་ཏཱིཏི ན ཨུ་པ་ཙི་ཡ་ཏི ན ཨཱ་ཙ་ཡཾ ག་ཙྪ་ཏི. ཨེ་ཝཾ སོ ཙ་ར་ཏཱི ས་ཏོཏི ཨེ་ཝཾ ཀི་ལེ་སཱ་པ་ན་ཡ་ན་པ་ཊི་པ་ཏྟི་ཡཱ ས་ཏོ ས་མྤ་ཛཱ་ནོ ཧུ་ཏྭཱ ཙ་ར་ཏི, ཝི་ཧ་ར་ཏི. ཨེ་ཝཾ ཨ་པ་ཙི་ན་ཏོ དུ་ཀྑནྟི ཝུ་ཏྟ་ན་ཡེ་ན ཨ་པ་ཙ་ཡ་གཱ་མི་ནི་ཡཱ མ་གྒ་པ་ཉྙཱ་ཡ ས་ཀ་ལཾ ཝ་ཊྚ་དུ་ཀྑཾ ཨ་པ་ཙི་ན་ནྟ་སྶ. ས་ནྟི་ཀེ ནི་བྦཱ་ན ཝུ་ཙྩ་ཏཱིཏི ས་ཨུ་པཱ་དི་སེ་ས་ཨ་ནུ་པཱ་དི་སེ་ས་ནི་བྦཱ་ན་དྷཱ་ཏུ་ས་མཱི་པེ ཨེ་ཝཱ་ཏི ཝུ་ཙྩ་ཏི ཨ་ས་ངྑ་ཏཱ་ཡ དྷཱ་ཏུ་ཡཱ ས་ཙྪི་ཀ་ཏ་ཏྟཱ. ན སོ ར་ཛྫ་ཏི ས་དྡེ་སཱུཏི་ཨཱ་དཱི་སུ་པི ཨི་མི་ནཱ་ཝ ན་ཡེ་ན ཨ་ཏྠོ ཝེ་དི་ཏ་བྦོ.
ཨེ་ཝཾ ཐེ་རོ ཨི་མཱ་ཧི གཱ་ཐཱ་ཧི ས་ཏྠུ ཨོ་ཝཱ་ད་སྶ ཨ་ཏྟ་ནཱ ཨུ་པ་དྷཱ་རི་ཏ་བྷཱ་ཝཾ པ་ཝེ་དེ་ཏྭཱ ཨུ་ཊྛཱ་ཡཱ་ས་ནཱ ས་ཏྠཱ་རཾ ཝ་ནྡི་ཏྭཱ ག་ཏོ ན་ཙི་ར་སྶེ་ཝ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎཱི་ཏི.
མཱ་ལུ་ཀྱ་པུ་ཏྟ་ཏྠེ་ར་གཱ་ཐཱ་ཝ་ཎྞ་ནཱ ནི་ཊྛི་ཏཱ.