༤. ར་ཊྛ་པཱ་ལ་ཏྠེ་ར་གཱ་ཐཱ་ཝ་ཎྞ་ནཱ
པ་སྶ ཙི་ཏྟ་ཀ་ཏནྟི་ཨཱ་དི་ཀཱ ཨཱ་ཡ་སྨ་ཏོ ར་ཊྛ་པཱ་ལ་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཨ་ཡཾ ཀི་ར པ་དུ་མུ་ཏྟ་ར་སྶ བྷ་ག་ཝ་ཏོ ཨུ་པྤ་ཏྟི་ཏོ པུ་རེ་ཏ་ར་མེ་ཝ ཧཾ་ས་ཝ་ཏཱི་ན་ག་རེ ག་ཧ་པ་ཏི་མ་ཧཱ་སཱ་ལ་ཀུ་ལེ ནི་བྦ་ཏྟི་ཏྭཱ ཝ་ཡ་པྤ་ཏྟོ པི་ཏུ ཨ་ཙྩ་ཡེ་ན གྷ་རཱ་ཝཱ་སེ པ་ཏི་ཊྛི་ཏོ ར་ཏ་ན་ཀོ་ཊྛཱ་གཱ་ར་ཀ་མྨི་ཀེ་ན ད་སྶི་ཏཾ ཨ་པ་རི་མཱ་ཎཾ ཀུ་ལ་ཝཾ་སཱ་ནུ་ག་ཏཾ དྷ་ནཾ དི་སྭཱ ‘‘ཨི་མཾ ཨེ་ཏྟ་ཀཾ དྷ་ན་རཱ་སིཾ མ་ཡ྄ཧཾ པི་ཏུ་ཨ་ཡྻ་ཀ་པ་ཡྻ་ཀཱ་ད་ཡོ ཨ་ཏྟ་ནཱ ས་དྡྷིཾ ག་ཧེ་ཏྭཱ ག་ནྟུཾ ནཱ་ས་ཀྑིཾ་སུ, མ་ཡཱ པ་ན ག་ཧེ་ཏྭཱ ག་ནྟུཾ ཝ་ཊྚ་ཏཱི’’ཏི ཙི་ནྟེ་ཏྭཱ ཀ་པ་ཎ་དྡྷི་ཀཱ་དཱི་ནཾ མ་ཧཱ་དཱ་ནཾ ཨ་དཱ་སི. སོ ཨ་བྷི་ཉྙཱ་ལཱ་བྷིཾ ཨེ་ཀཾ ཏཱ་པ་སཾ ཨུ་པ་ཊྛ་ཧ་ནྟོ ཏེ་ན དེ་ཝ་ལོ་ཀཱ་དྷི་པ་ཙྩེ ནི་ཡོ་ཛི་ཏོ ཡཱ་ཝ་ཛཱི་ཝཾ པུ་ཉྙཱ་ནི ཀ་ཏྭཱ ཏ་ཏོ ཙུ་ཏོ དེ་ཝ་ལོ་ཀེ ནི་བྦ་ཏྟི་ཏྭཱ དི་བྦ་ས་མྤ་ཏྟིཾ ཨ་ནུ་བྷ་ཝ་ནྟོ ཏ་ཏྠ ཡཱ་ཝ་ཏཱ་ཡུ་ཀཾ ཋ་ཏྭཱ ཏ་ཏོ ཙུ་ཏོ མ་ནུ་སྶ་ལོ་ཀེ བྷི་ནྣཾ ར་ཊྛཾ ས་ནྡྷཱ་རེ་ཏུཾ ས་མ་ཏྠ་སྶ ཀུ་ལ་སྶ ཨེ་ཀ་པུ་ཏྟ་ཀོ ཧུ་ཏྭཱ ནི་བྦ་ཏྟི.
ཏེ་ན ཙ ས་མ་ཡེ་ན པ་དུ་མུ་ཏྟ་རོ བྷ་ག་ཝཱ ལོ་ཀེ ཨུ་པྤ་ཛྫི་ཏྭཱ པ་ཝ་ཏྟི་ཏ་ཝ་ར་དྷ་མྨ་ཙ་ཀྐོ ཝེ་ནེ་ཡྻ་ས་ཏྟེ ནི་བྦཱ་ན་མ་ཧཱ་ན་ག་ར་ས་ངྑཱ་ཏཾ ཁེ་མ་ནྟ་བྷཱུ་མིཾ ས་མྤཱ་པེ་སི. ཨ་ཐ སོ ཀུ་ལ་པུ་ཏྟོ ཨ་ནུ་ཀྐ་མེ་ན ཝི་ཉྙུ་ཏཾ པ་ཏྟོ ཨེ་ཀ་དི་ཝ་སཾ ཨུ་པཱ་ས་ཀེ་ཧི ས་དྡྷིཾ ཝི་ཧཱ་རཾ ག་ནྟྭཱ ས་ཏྠཱ་རཾ དྷ་མྨཾ དེ་སེ་ནྟཾ དི་སྭཱ པ་ས་ནྣ་ཙི་ཏྟོ པ་རི་ས་པ་རི་ཡ་ནྟེ ནི་སཱི་དི. ཏེ་ན ཁོ པ་ན ས་མ་ཡེ་ན ས་ཏྠཱ ཨེ་ཀཾ བྷི་ཀྑུཾ ས་དྡྷཱ་པ་བྦ་ཛི་ཏཱ་ནཾ ཨ་གྒ་ཊྛཱ་ནེ ཋ་པེ་སི. ཏཾ དི་སྭཱ སོ པ་ས་ནྣ་མཱ་ན་སོ ཏ་ད་ཏྠཱ་ཡ ཙི་ཏྟཾ ཋ་པེ་ཏྭཱ ས་ཏ་ས་ཧ་སྶ་བྷི་ཀྑུ་པ་རི་ཝུ་ཏ་སྶ བྷ་ག་ཝ་ཏོ མ་ཧ་ཏཱ ས་ཀྐཱ་རེ་ན ས་ཏྟཱ་ཧཾ མ་ཧཱ་དཱ་ནཾ པ་ཝ་ཏྟེ་ཏྭཱ པ་ཎི་དྷཱ་ནཾ ཨ་ཀཱ་སི. ས་ཏྠཱ ཏ་སྶ ཨ་ན་ནྟ་རཱ་ཡེ་ན ཨི་ཛ྄ཛྷ་ན་བྷཱ་ཝཾ དི་སྭཱ ‘‘ཨ་ནཱ་ག་ཏེ གོ་ཏ་མ་སྶ ནཱ་མ ས་མྨཱ་ས་མྦུ་དྡྷ་སྶ སཱ་ས་ནེ ས་དྡྷཱ་པ་བྦ་ཛི་ཏཱ་ནཾ ཨ་གྒོ བྷ་ཝི་སྶ་ཏཱི’’ཏི བྱཱ་ཀཱ་སི. སོ ས་ཏྠཱ་རཾ བྷི་ཀྑུ་ས་ངྒྷ་ཉྩ ཝ་ནྡི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. སོ ཏ་ཏྠ ཡཱ་ཝ་ཏཱ་ཡུ་ཀཾ པུ་ཉྙཱ་ནི ཀ་ཏྭཱ ཏ་ཏོ ཙ་ཝི་ཏྭཱ དེ་ཝ་མ་ནུ་སྶེ་སུ སཾ་ས་ར་ནྟོ ཨི་ཏོ དྭེ་ན་ཝུ་ཏེ ཀ་པྤེ ཕུ་སྶ་སྶ བྷ་ག་ཝ་ཏོ ཀཱ་ལེ ས་ཏྠུ ཝེ་མཱ་ཏི་ཀ་བྷཱ་ཏི་ཀེ་སུ ཏཱི་སུ རཱ་ཛ་པུ་ཏྟེ་སུ ས་ཏྠཱ་རཾ ཨུ་པ་ཊྛ་ཧ་ནྟེ་སུ ཏེ་སཾ པུ་ཉྙ་ཀི་རི་ཡཱ་ཡ ཀི་ཙྩཾ ཨ་ཀཱ་སི.
ཨེ་ཝཾ ཏ་ཏྠ ཏ་ཏྠ བྷ་ཝེ ཏཾ ཏཾ བ་ཧུཾ ཀུ་ས་ལཾ ཨུ་པ་ཙི་ནི་ཏྭཱ སུ་ག་ཏཱི་སུ་ཡེ་ཝ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ ཀུ་རུ་ར་ཊྛེ ཐུ་ལླ་ཀོ་ཊྛི་ཀ་ནི་ག་མེ ར་ཊྛ་པཱ་ལ་སེ་ཊྛི་ནོ གེ་ཧེ ནི་བྦ་ཏྟི, ཏ་སྶ བྷི་ནྣཾ ར་ཊྛཾ ས་ནྡྷཱ་རེ་ཏུཾ ས་མ་ཏྠེ ཀུ་ལེ ནི་བྦ་ཏྟ་ཏྟཱ ར་ཊྛ་པཱ་ལོཏི ཝཾ་སཱ་ནུ་ག་ཏ་མེ་ཝ ནཱ་མཾ ཨ་ཧོ་སི. སོ མ་ཧ་ཏཱ པ་རི་ཝཱ་རེ་ན ཝ་ཌྜྷ་ནྟོ ཨ་ནུ་ཀྐ་མེ་ན ཡོ་བྦ་ན་པ་ཏྟོ མཱ་ཏཱ་པི་ཏཱུ་ཧི པ་ཏི་རཱུ་པེ་ན དཱ་རེ་ན སཾ་ཡོ་ཛི་ཏོ མ་ཧ་ནྟེ ཙ ཡ་སེ པ་ཏི་ཊྛཱ་པི་ཏོ དི་བྦ་ས་མྤ་ཏྟི་ས་དི་སཾ ས་མྤ་ཏྟིཾ པ་ཙྩ་ནུ་བྷོ་ཏི. ཨ་ཐ བྷ་ག་ཝཱ ཀུ་རུ་ར་ཊྛེ ཛ་ན་པ་ད་ཙཱ་རི་ཀཾ ཙ་ར་ནྟོ ཐུ་ལླ་ཀོ་ཊྛི་ཀཾ ཨ་ནུ་པཱ་པུ་ཎི. ཏཾ སུ་ཏྭཱ ར་ཊྛ་པཱ་ལོ ཀུ་ལ་པུ་ཏྟོ ས་ཏྠཱ་རཾ ཨུ་པ་ས་ངྐ་མི་ཏྭཱ ས་ཏྠུ ས་ནྟི་ཀེ དྷ་མྨཾ སུ་ཏྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏུ་ཀཱ་མོ ས་ཏྟཱ་ཧཾ བྷ་ཏྟ་ཙྪེ་དཾ ཀ་ཏྭཱ ཀི་ཙྪེ་ན ཀ་སི་རེ་ན མཱ་ཏཱ་པི་ཏ་རོ ཨ་ནུ་ཛཱ་ནཱ་པེ་ཏྭཱ ས་ཏྠཱ་རཾ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི་ཏྭཱ ས་ཏྠུ ཨཱ་ཎ་ཏྟི་ཡཱ ཨ་ཉྙ་ཏ་ར་སྶ ཐེ་ར་སྶ ས་ནྟི་ཀེ པ་བྦ་ཛི་ཏྭཱ ཡོ་ནི་སོ་མ་ན་སི་ཀཱ་རེ་ན ཀ་མྨཾ ཀ་རོ་ནྟོ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎི. ཏེ་ན ཝུ་ཏྟཾ ཨ་པ་དཱ་ནེ (ཨ་པ. ཐེ་ར ༡.༢.༩༧-༡༡༡) –
‘‘པ་དུ་མུ་ཏྟ་ར་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;
ཝ་ར་ནཱ་གོ མ་ཡཱ དི་ནྣོ, ཨཱི་སཱ་ད་ནྟོ ཨུ་རཱུ་ལ༹ྷ་ཝཱ.
‘‘སེ་ཏ་ཙྪ་ཏྟོ པ་སོ་བྷི་ཏོ, ས་ཀ་པྤ་ནོ ས་ཧ་ཏྠི་པོ;
ཨ་གྒྷཱ་པེ་ཏྭཱ་ན ཏཾ ས་བྦཾ, ས་ངྒྷཱ་རཱ་མཾ ཨ་ཀཱ་ར་ཡིཾ.
‘‘ཙ་ཏུ་པ་ཉྙཱ་ས་ས་ཧ་སྶཱ་ནི, པཱ་སཱ་དེ ཀཱ་ར་ཡིཾ ཨ་ཧཾ;
མ་ཧོ་གྷ་དཱ་ནཾ ཀ་རི་ཏྭཱ་ན, ནི་ཡྻཱ་དེ་སིཾ མ་ཧེ་སི་ནོ.
‘‘ཨ་ནུ་མོ་དི མ་ཧཱ་ཝཱི་རོ, ས་ཡ་མྦྷཱུ ཨ་གྒ་པུ་གྒ་ལོ;
ས་བྦེ ཛ་ནེ ཧཱ་ས་ཡ་ནྟོ, དེ་སེ་སི ཨ་མ་ཏཾ པ་དཾ.
‘‘ཏཾ མེ བུ་དྡྷོ ཝི་ཡཱ་ཀཱ་སི, ཛ་ལ་ཛུ་ཏྟ་ར་ནཱ་མ་ཀོ;
བྷི་ཀྑུ་ས་ངྒྷེ ནི་སཱི་དི་ཏྭཱ, ཨི་མཱ གཱ་ཐཱ ཨ་བྷཱ་ས་ཐ.
‘‘ཙ་ཏུ་པ་ཉྙཱ་ས་ས་ཧ་སྶཱ་ནི, པཱ་སཱ་དེ ཀཱ་ར་ཡཱི ཨ་ཡཾ;
ཀ་ཐ་ཡི་སྶཱ་མི ཝི་པཱ་ཀཾ, སུ་ཎོ་ཐ མ་མ བྷཱ་ས་ཏོ.
‘‘ཨ་ཊྛཱ་ར་ས་ས་ཧ་སྶཱ་ནི, ཀཱུ་ཊཱ་གཱ་རཱ བྷ་ཝི་སྶ་རེ;
བྱ་མྷུ་ཏྟ་མ་མྷི ནི་བྦ་ཏྟཱ, ས་བྦ་སོ་ཎྞ་མ་ཡཱ ཙ ཏེ.
‘‘པ་ཉྙཱ་ས་ཀྑ་ཏྟུཾ དེ་ཝི་ནྡོ, དེ་ཝ་ར་ཛྫཾ ཀ་རི་སྶ་ཏི;
ཨ་ཊྛ་པ་ཉྙཱ་ས་ཀྑ་ཏྟུ་ཉྩ, ཙ་ཀྐ་ཝ་ཏྟཱི བྷ་ཝི་སྶ་ཏི.
‘‘ཀ་པྤ་ས་ཏ་ས་ཧ་སྶ་མྷི, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
‘‘དེ་ཝ་ལོ་ཀཱ ཙ་ཝི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;
ཨ་ཌྜྷེ ཀུ་ལེ མ་ཧཱ་བྷོ་གེ, ནི་བྦ་ཏྟི་སྶ་ཏི ཏཱ་ཝ་དེ.
‘‘སོ པ་ཙྪཱ པ་བྦ་ཛི་ཏྭཱ་ན, སུ་ཀྐ་མཱུ་ལེ་ན ཙོ་དི་ཏོ;
ར་ཊྛ་པཱ་ལོ་ཏི ནཱ་མེ་ན, ཧེ་སྶ་ཏི ས་ཏྠུ སཱ་ཝ་ཀོ.
‘‘པ་དྷཱ་ན་པ་ཧི་ཏ་ཏྟོ སོ, ཨུ་པ་ས་ནྟོ ནི་རཱུ་པ་དྷི;
ས་བྦཱ་ས་ཝེ པ་རི་ཉྙཱ་ཡ, ནི་བྦཱ་ཡི་སྶ་ཏི་ནཱ་ས་ཝོ.
‘‘ཨུ་ཊྛཱ་ཡ ཨ་བྷི་ནི་ཀྑ་མྨ, ཛ་ཧི་ཏཱ བྷོ་ག་ས་མྤ་དཱ;
ཁེ་ལ༹་པི་ཎྜེ་ཝ བྷོ་ག་མྷི, པེ་མཾ མ་ཡ྄ཧཾ ན ཝི་ཛྫ་ཏི.
‘‘ཝཱི་རི་ཡཾ མེ དྷུ་ར་དྷོ་ར་ཡ྄ཧཾ, ཡོ་ག་ཀྑེ་མཱ་དྷི་ཝཱ་ཧ་ནཾ;
དྷཱ་རེ་མི ཨ་ནྟི་མཾ དེ་ཧཾ, ས་མྨཱ་ས་མྦུ་དྡྷ་སཱ་ས་ནེ.
‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ན’’ནྟི.
ཨ་ར་ཧ་ཏྟཾ པ་ན པ་ཏྭཱ ས་ཏྠཱ་རཾ ཨ་ནུ་ཛཱ་ནཱ་པེ་ཏྭཱ མཱ་ཏཱ་པི་ཏ་རོ པ་སྶི་ཏུཾ ཐུ་ལླ་ཀོ་ཊྛི་ཀཾ ག་ནྟྭཱ, ཏ་ཏྠ ས་པ་དཱ་ནཾ པི་ཎྜཱ་ཡ ཙ་ར་ནྟོ པི་ཏུ ནི་ཝེ་ས་ནེ ཨཱ་བྷི་དོ་སི་ཀཾ ཀུ་མྨཱ་སཾ ལ་བྷི་ཏྭཱ ཏཾ ཨ་མ་ཏཾ ཝི་ཡ པ་རི་བྷུ་ཉྫ་ནྟོ, པི་ཏ་རཱ ནི་མ་ནྟི་ཏོ སྭཱ་ཏ་ནཱ་ཡ ཨ་དྷི་ཝཱ་སེ་ཏྭཱ, དུ་ཏི་ཡ་དི་ཝ་སེ པི་ཏུ ནི་ཝེ་ས་ནེ པི་ཎྜ་པཱ་ཏཾ པ་རི་བྷུ་ཉྫི་ཏྭཱ ཨ་ལ་ངྐ་ཏ་པ་ཊི་ཡ་ཏྟེ ཨི་ཏྠཱ་གཱ་ར་ཛ་ནེ ཨུ་པ་ག་ནྟྭཱ ‘‘ཀཱི་དི་སཱ ནཱ་མ ཏཱ, ཨ་ཡྻ་པུ་ཏྟ, ཨ་ཙྪ་རཱ་ཡོ, ཡཱ་སཾ ཏྭཾ ཧེ་ཏུ བྲ་ཧྨ་ཙ་རི་ཡཾ ཙ་ར་སཱི’’ཏི་ཨཱ་དཱི་ནི (མ. ནི. ༢.༣༠༡) ཝ་ཏྭཱ, པ་ལོ་བྷ་ན་ཀ་མྨཾ ཀཱ་ཏུཾ ཨཱ་ར་དྡྷེ ཏ་སྶ ཨ་དྷི་པྤཱ་ཡཾ པ་རི་ཝ་ཏྟེ་ཏྭཱ ཨ་ནི་ཙྩ་ཏཱ་དི་པ་ཊི་སཾ་ཡུ་ཏྟཾ དྷ་མྨཾ ཀ་ཐེ་ནྟོ –
༧༦༩. ‘‘པ་སྶ ཙི་ཏྟ་ཀ་ཏཾ བི་མྦཾ, ཨ་རུ་ཀཱ་ཡཾ ས་མུ་སྶི་ཏཾ;
ཨཱ་ཏུ་རཾ བ་ཧུ་ས་ངྐ་པྤཾ, ཡ་སྶ ན་ཏྠི དྷུ་ཝཾ ཋི་ཏི.
༧༧༠. ‘‘པ་སྶ ཙི་ཏྟ་ཀ་ཏཾ རཱུ་པཾ, མ་ཎི་ནཱ ཀུ་ཎྜ་ལེ་ན ཙ;
ཨ་ཊྛིཾ ཏ་ཙེ་ན ཨོ་ན་དྡྷཾ, ས་ཧ ཝ་ཏྠེ་ཧི སོ་བྷ་ཏི.
༧༧༡. ‘‘ཨ་ལ་ཏྟ་ཀ་ཀ་ཏཱ པཱ་དཱ, མུ་ཁཾ ཙུ་ཎྞ་ཀ་མ་ཀྑི་ཏཾ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༧༧༢. ‘‘ཨ་ཊྛཱ་པ་ད་ཀ་ཏཱ ཀེ་སཱ, ནེ་ཏྟཱ ཨ་ཉྫ་ན་མ་ཀྑི་ཏཱ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༧༧༣. ‘‘ཨ་ཉྫ་ནཱི་ཝ ན་ཝཱ ཙི་ཏྟཱ, པཱུ་ཏི་ཀཱ་ཡོ ཨ་ལ་ངྐ་ཏོ;
ཨ་ལཾ བཱ་ལ་སྶ མོ་ཧཱ་ཡ, ནོ ཙ པཱ་ར་ག་ཝེ་སི་ནོ.
༧༧༤. ‘‘ཨོ་ད་ཧི མི་ག་ཝོ པཱ་སཾ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, ཀ་ནྡ་ནྟེ མི་ག་བ་ནྡྷ་ཀེ.
༧༧༥. ‘‘ཚི་ནྣོ པཱ་སོ མི་ག་ཝ་སྶ, ནཱ་ས་དཱ ཝཱ་གུ་རཾ མི་གོ;
བྷུ་ཏྭཱ ནི་ཝཱ་པཾ ག་ཙྪཱ་མ, སོ་ཙ་ནྟེ མི་ག་ལུ་དྡ་ཀེ’’ཏི. – ཨི་མཱ གཱ་ཐཱ ཨ་བྷཱ་སི;
ཏ་ཏྠ ཙི་ཏྟ་ཀ་ཏནྟི ཙི་ཏྟཾ ཀ་ཏཾ ཙི་ཏྟ་ཀ་ཏཾ, ཝ་ཏྠཱ་བྷ་ར་ཎ་མཱ་ལཱ་དཱི་ཧི ཝི་ཙི་ཏྟཾ ཀ་ཏ་ནྟི ཨ་ཏྠོ. བི་མྦནྟི དཱི་གྷཱ་དི་བྷཱ་ཝེ་ན ཡུ་ཏྟ་ཊྛཱ་ནེ་སུ དཱི་གྷཱ་དཱི་ཧི ཨ་ངྒ་པ་ཙྩ་ངྒེ་ཧི མ་ཎྜི་ཏཾ ཨ་ཏྟ་བྷཱ་ཝཾ. ཨ་རུ་ཀཱ་ཡནྟི ན་ཝ་ནྣཾ ཝ་ཎ་མུ་ཁཱ་ནཾ ལོ་མ་ཀཱུ་པཱ་ན་ཉྩ ཝ་སེ་ན ཝི་སྶ་ནྡ་མཱ་ན་ཨ་སུ་ཙིཾ, ས་བྦ་སོ ཙ ཨ་རུ་བྷཱུ་ཏཾ ཝ་ཎ་བྷཱུ་ཏཾ ཨ་རཱུ་ནཾ ཝཱ ཀཱ་ཡཾ. ས་མུ་སྶི་ཏནྟི ཏཱི་ཧི ཨ་ཊྛི་ས་ཏེ་ཧི ས་མུ་སྶི་ཏཾ. ཨཱ་ཏུ་རནྟི ས་བྦ་ཀཱ་ལཾ ཨི་རི་ཡཱ་པ་ཐ་ནྟ་རཱ་དཱི་ཧི པ་རི་ཧ་རི་ཏ་བྦ་ཏཱ་ཡ ནི་ཙྩཾ གི་ལཱ་ནཾ. བ་ཧུ་ས་ངྐ་པྤནྟི བཱ་ལ་ཛ་ནེ་ན ཨ་བྷཱུ་ཏཾ ཨཱ་རོ་པེ་ཏྭཱ བ་ཧུ་དྷཱ ས་ངྐ་པྤི་ཏ་བྦཾ. ཡ་སྶ ན་ཏྠི དྷུ་ཝཾ ཋི་ཏཱིཏི ཡ་སྶ ཀཱ་ཡ་སྶ དྷུ་ཝ་བྷཱ་ཝོ ཋི་ཏི་ས་བྷཱ་ཝོ ན་ཏྠི, ཨེ་ཀཾ་ས་ཏོ བྷེ་ད་ན་ཝི་ཀི་ར་ཎ་ཝི་དྡྷཾ་ས་ན་དྷ་མྨོ་ཡེ་ཝ. ཏཾ པ་སྶཱཏི ས་མཱི་པེ ཋི་ཏཾ ཛ་ནཾ, ཨ་ཏྟཱ་ན་མེ་ཝ ཝཱ ས་ནྡྷཱ་ཡ ཝ་ད་ཏི.
རཱུ་པནྟི ས་རཱི་རཾ. ས་རཱི་ར་མྤི ཧི ‘‘ཨ་ཊྛི་ཉྩ པ་ཊི་ཙྩ, ནྷཱ་རུ་ཉྩ པ་ཊི་ཙྩ, མཾ་ས་ཉྩ པ་ཊི་ཙྩ, ཙ་མྨ་ཉྩ པ་ཊི་ཙྩ, ཨཱ་ཀཱ་སོ པ་རི་ཝཱ་རི་ཏོ ‘རཱུ་པ་ནྟྭེ་ཝ ས་ངྑཾ ག་ཙྪ་ཏཱི’’ཏི་ཨཱ་དཱི་སུ (མ. ནི. ༡.༣༠༦) རཱུ་པ་ནྟི ཝུ་ཙྩ་ཏི. མ་ཎི་ནཱ ཀུ་ཎྜ་ལེ་ན ཙཱཏི སཱི་སཱུ་པ་གཱ་དི་ཨཱ་བྷ་ར་ཎ་ག་ཏེ་ན མ་ཎི་ནཱ ཀུ་ཎྜ་ལེ་ན ཙི་ཏྟ་ཀ་ཏཾ. ཨ་ཊྛིཾ ཏ་ཙེ་ན ཨོ་ན་དྡྷནྟི ཨ་ལླ་ཙ་མྨེ་ན པ་རི་ཡོ་ན་དྡྷཾ ཨ་ཏི་རེ་ཀ་ཏི་ས་ཏ་པ་བྷེ་དཾ ཨ་ཊྛིཾ པ་སྶཱ་ཏི ཡོ་ཛ་ནཱ. ཀུ་ཎྜ་ལེ་ན ཙཱ་ཏི ཙ-ས་དྡེ་ན སེ་སཱ་བྷ་ར་ཎཱ་ལ་ངྐཱ་རེ ས་ངྒ་ཎྷཱ་ཏི. ས་ཧ ཝ་ཏྠེ་ཧི སོ་བྷ་ཏཱིཏི ཏ་ཡི་དཾ རཱུ་པཾ མ་ཎི་ནཱ ཙི་ཏྟ་ཀ་ཏ་མྤི ཝ་ཏྠེ་ཧི པ་ཊི་ཙྪཱ་དི་ཏ་མེ་ཝ སོ་བྷ་ཏི, ན ཨ་པ་ཊི་ཙྪཱ་དི་ཏ་ནྟི ཨ་ཏྠོ. ཡེ པ་ན ‘‘ཨ་ཊྛི་ཏ་ཙེ་ནཱ’’ཏི པ་ཋ་ནྟི, ཏེ་སཾ ཨ་ཊྛི་ཏ་ཙེ་ནཾ ཨོ་ན་དྡྷཾ སོ་བྷ་ཏི, ཨོ་ན་དྡྷ་ཏྟཱ ཨ་ཊྛི་ཏ་ཙེ་ནཱ་ཏི ཨ་ཏྠོ.
ཨ་ལ་ཏྟ་ཀ་ཀ་ཏཱཏི ཨ་ལ་ཏྟ་ཀེ་ན ཀ་ཏ་ར་ཉྫ་ནཱ ལཱ་ཁཱ་ཡ སཾ་ར་ཉྫི་ཏཱ. པཱ་དཱཏི ཙ་ར་ཎཱ. མུ་ཁཾ ཙུ་ཎྞ་ཀ་མ་ཀྑི་ཏནྟི མུ་ཁཾ ཙུ་ཎྞ་ཀེ་ན མ་ཀྑི་ཏཾ, ཡཾ མ་ཎྜ་ན་མ་ནུ་ཡུ་ཏྟཱ སཱ་ས་པ་ཀ་ཀྐེ་ན མུ་ཁ་པཱི་ལ༹་ཀཱ་དཱི་ནི ཧ་རི་ཏྭཱ ལོ་ཎ་མ་ཏྟི་ཀཱ་ཡ དུ་ཊྛ་ལོ་ཧི་ཏཾ ཧ་རི་ཏྭཱ མུ་ཁ་ཙུ་ཎྞ་ཀ་ཝི་ལེ་པ་ནཾ ཀ་རོ་ནྟི, ཏཾ ས་ནྡྷཱ་ཡ ཝུ་ཏྟཾ. ཨ་ལནྟི བཱ་ལ་སྶ ཨ་ནྡྷ་པུ་ཐུ་ཛྫ་ན་སྶ ནོ ཙ པཱ་ར་ག་ཝེ་སི་ནོ ཝ་ཊྚཱ་བྷི་ར་ཏ་སྶ མོ་ཧཱ་ཡ ས་མྨོ་ཧ་ནཱ་ཡ ས་མ་ཏྠཾ ཏ་སྶ ཙི་ཏྟཾ མོ་ཧེ་ཏུཾ པ་རི་ཡ་ཏྟཾ, པཱ་ར་ག་ཝེ་སི་ནོ པ་ན ཝི་ཝ་ཊྚཱ་བྷི་ར་ཏ་སྶ ནོ ཨ་ལཾ ན པ་རི་ཡ་ཏྟཾ.
ཨ་ཊྛཱ་པ་ད་ཀ་ཏཱཏི ཨ་ཊྛ་པ་དཱ་ཀཱ་རེ་ན ཀ་ཏཱ ས་ཉྩི་ཏཱ པུ་རི་མ་བྷཱ་གེ ཀེ་སེ ཀ་པྤེ་ཏྭཱ ན་ལཱ་ཊ་སྶ པ་ཊི་ཙྪཱ་ད་ན་ཝ་སེ་ན ཀ་ཏཱ ཀེ་ས་ར་ཙ་ནཱ ཨ་ཊྛ་པ་དཾ ནཱ་མ, ཡཾ ‘‘ཨ་ལ་ཀ’’ནྟི་པི ཝུ་ཙྩ་ཏི. ནེ་ཏྟཱ ཨ་ཉྫ་ན་མ་ཀྑི་ཏཱཏི ཨུ་བྷོ་པི ན་ཡ་ནཱ་ནི ཨ་ནྟོ དྭཱི་སུ ཨ་ནྟེ་སུ ཙ ཡ་ཐཱ ཨ་ཉྫ་ན་ཙྪཱ་ཡཱ དི་སྶ་ཏི, ཨེ་ཝཾ ཨ་ཉྫི་ཏ་ཉྫ་ནཱ་ནི.
ཨ་ཉྫ་ནཱི་ཝ ན་ཝཱ ཙི་ཏྟཱ, པཱུ་ཏི་ཀཱ་ཡོ ཨ་ལ་ངྐ་ཏོཏི ཡ་ཐཱ ཨ་ཉྫ་ནཱི ཨ་ཉྫ་ན་ནཱ་ལི༹་ཀཱ ན་ཝཱ ཨ་བྷི་ན་ཝཱ མཱ་ལཱ་ཀ་མྨ་མ་ཀ་ར་ད་ནྟཱ་དི་ཝ་སེ་ན ཙི་ཏྟཱ བ་ཧི མ་ཊྛཱ ཨུ་ཛྫ་ལཱ ད་སྶ་ནཱི་ཡཱ, ཨ་ནྟོ པ་ན ན ད་སྶ་ནཱི་ཡཱ ཧོ་ཏི, ཨེ་ཝ་མེ་ཝ ཏཱ་སཾ ཀཱ་ཡོ ནྷཱ་ན་བྦྷ་ཉྫ་ན་ཝ་ཏྠཱ་ལ་ངྐཱ་རེ་ཧི ཨ་ལ་ངྐ་ཏོ བ་ཧི ཨུ་ཛྫ་ལོ, ཨ་ནྟོ པ་ན པཱུ་ཏི ནཱ་ན་པྤ་ཀཱ་ར་ཨ་སུ་ཙཱི་ཧི བྷ་རི་ཏོ ཏི་ཊྛ་ཏཱི་ཏི ཨ་ཏྠོ.
ཨོ་ད་ཧཱིཏི ཨོ་ཌྜེ་སི. མི་ག་ཝོཏི, མི་ག་ལུ་དྡ་ཀོ. པཱ་སནྟི, ད་ཎྜ་ཝཱ་གུ་རཾ. ནཱ་ས་དཱཏི ན ས་ངྒྷ་ཊྚེ་སི. ཝཱ་གུ་རནྟི པཱ་སཾ. ནི་ཝཱ་པནྟི མི་གཱ་ནཾ ཁཱ་ད་ན་ཏྠཱ་ཡ ཁི་ཏྟཾ ཏི་ཎཱ་དི་གྷཱ་སཾ. ཨུ་པ་མཱ ཁོ ཨ་ཡཾ ཐེ་རེ་ན ཀ་ཏཱ ཨ་ཏྠ་སྶ ཝི་ཉྙཱ་པ་ནཱ་ཡ. ཨ་ཡ་ཉྷེ་ཏྠ ཨ་ཏྠོ – ཡ་ཐཱ མི་གཱ་ནཾ མཱ་ར་ཎ་ཏྠཱ་ཡ ད་ཎྜ་ཝཱ་གུ་རཾ ཨོ་ཌྜེ་ཏྭཱ ཏ་ཏྠ ནི་ཝཱ་པཾ ཝི་ཀི་རི་ཡ མི་ག་ལུ་དྡ་ཀེ ནི་ལཱི་ནེ ཋི་ཏེ ཏ་ཏྠེ་ཀོ ཛ་ཝ་པ་ར་ཀྐ་མ་ས་མྤ་ནྣོ ཚེ་ཀོ མི་གོ པཱ་སཾ ཨ་ཕུ་ས་ནྟོ ཨེ་ཝ ཡ་ཐཱ་སུ་ཁཾ ནི་ཝཱ་པཾ ཁཱ་དི་ཏྭཱ, ‘‘ཝ་ཉྩེ་སི ཝ་ཏ མི་གོ’’ཏི མི་ག་ལུ་དྡ་ཀེ ཝི་ར་ཝ་ནྟེ ཨེ་ཝ ག་ཙྪ་ཏི. ཨ་པ་རོ མི་གོ བ་ལ་ཝཱ ཚེ་ཀོ ཛ་ཝ་ས་མྤ་ནྣོ་ཝ ཏ་ཏྠ ག་ནྟྭཱ ནི་ཝཱ་པཾ ཁཱ་དི་ཏྭཱ ཏ་ཏྠ ཏ་ཏྠ པཱ་སཾ ཚི་ནྡི་ཏྭཱ, ‘‘ཝ་ཉྩེ་སི ཝ་ཏ མི་གོ, པཱ་སོ ཚི་ནྣོ’’ཏི མི་ག་ལུ་དྡ་ཀེ སོ་ཙ་ནྟེ ཨེ་ཝ ག་ཙྪ་ཏི, ཨེ་ཝཾ མ་ཡ་མྤི པུ་བྦེ པུ་ཐུ་ཛྫ་ན་ཀཱ་ལེ མཱ་ཏཱ་པི་ཏཱུ་ཧི ཨཱ་ས་ཛྫ་ན་ཏྠཱ་ཡ ནི་ཡྻཱ་དི་ཏེ བྷོ་གེ བྷུ་ཉྫི་ཏྭཱ ཏ་ཏྠ ཏ་ཏྠ ཨ་ས་ཛྫ་མཱ་ནཱ ནི་ཀྑ་ནྟཱ. ཨི་དཱ་ནི པ་ན ས་བྦ་སོ ཚི་ནྣ་ཀི་ལེ་སཱ ཨ་པཱ་སཱ ཧུ་ཏྭཱ ཋི་ཏཱ, ཏེ་ཧི དི་ནྣ་བྷོ་ཛ་ནཾ བྷུ་ཉྫི་ཏྭཱ ཏེ་སུ སོ་ཙ་ནྟེ་སུ ཨེ་ཝ ག་ཙྪཱ་མཱ་ཏི.
ཨེ་ཝཾ ཐེ་རོ མི་ག་ལུ་དྡ་ཀཾ ཝི་ཡ མཱ་ཏཱ་པི་ཏ་རོ, ཧི་ར་ཉྙ་སུ་ཝ་ཎྞཾ ཨི་ཏྠཱ་གཱ་ར་ཉྩ ཝཱ་གུ་ར་ཛཱ་ལཾ ཝི་ཡ, ཨ་ཏྟ་ནཱ པུ་བྦེ བྷུ་ཏྟ་བྷོ་གེ ཙ ཨི་དཱ་ནི བྷུ་ཏྟ་བྷོ་ཛ་ན་ཉྩ ནི་ཝཱ་པ་ཏི་ཎཾ ཝི་ཡ, ཨ་ཏྟཱ་ནཾ མ་ཧཱ་མི་གཾ ཝི་ཡ ཙ ཀ་ཏྭཱ ད་སྶེ་ཏི. ཨི་མཱ གཱ་ཐཱ ཝ་ཏྭཱ ཝེ་ཧཱ་སཾ ཨ་བྦྷུ་གྒ་ནྟྭཱ ར་ཉྙོ ཀོ་ར་བྱ་སྶ མི་གཱ་ཛི་ན་ཨུ་ཡྻཱ་ནེ མ་ངྒ་ལ་སི་ལཱ་པ་ཊྚེ ནི་སཱི་དི. ཐེ་ར་སྶ ཀི་ར པི་ཏཱ ས་ཏྟ་སུ དྭཱ་ར་ཀོ་ཊྛ་ཀེ་སུ ཨ་གྒ་ལ༹ཾ དཱ་པེ་ཏྭཱ མ་ལླེ ཨཱ་ཎཱ་པེ་སི ‘‘ནི་ཀྑ་མི་ཏུཾ མཱ དེ་ཐ, ཀཱ་སཱ་ཡཱ་ནི ཨ་པ་ནེ་ཏྭཱ སེ་ཏ་ཀཱ་ནི ནི་ཝཱ་སེ་ཐཱ’’ཏི, ཏ་སྨཱ ཐེ་རོ ཨཱ་ཀཱ་སེ་ན ཨ་ག་མཱ་སི. ཨ་ཐ རཱ་ཛཱ ཀོ་ར་བྱོ ཐེ་ར་སྶ ཏ་ཏྠ ནི་སི་ནྣ་བྷཱ་ཝཾ སུ་ཏྭཱ ཏཾ ཨུ་པ་ས་ངྐ་མི་ཏྭཱ ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ‘‘ཨི་དྷ, བྷོ ར་ཊྛ་པཱ་ལ, པ་བྦ་ཛ་ནྟོ བྱཱ་དྷི་པཱ་རི་ཛུ་ཉྙཾ ཝཱ ཛ་རཱ་བྷོ་ག་ཉཱ་ཏི་པཱ་རི་ཛུ་ཉྙཾ ཝཱ པ་ཏྟོ པ་བྦ་ཛ་ཏི. ཏྭཾ པ་ན ཀི་ཉྩི་པི པཱ་རི་ཛུ་ཉྙཾ ཨ་ནུ་པ་ག་ཏོ ཨེ་ཝ ཀ་སྨཱ པ་བྦ་ཛི་ཏོ’’ཏི པུ་ཙྪི. ཨ་ཐ་སྶ ཐེ་རོ, ‘‘ཨུ་པ་ནི་ཡྻ་ཏི ལོ་ཀོ ཨ་དྡྷུ་ཝོ, ཨ་ཏཱ་ཎོ ལོ་ཀོ ཨ་ན་བྷི་སྶ་རོ, ཨ་སྶ་ཀོ ལོ་ཀོ ས་བྦཾ པ་ཧཱ་ཡ ག་མ་ནཱི་ཡཾ, ཨཱུ་ནོ ལོ་ཀོ ཨ་ཏི་ཏྟོ ཏ་ཎྷཱ་དཱ་སོ’’ཏི (མ. ནི. ༢.༣༠༥) ཨི་མེ་སཾ ཙ་ཏུ་ནྣཾ དྷ་མྨུ་དྡེ་སཱ་ནཾ ཨ་ཏྟཱ་ནཾ ཝི་ཝི་ཏྟ་བྷཱ་ཝཾ ཀ་ཐེ་ཏྭཱ ཏ་སྶཱ དེ་ས་ནཱ་ཡ ཨ་ནུ་གཱི་ཏིཾ ཀ་ཐེ་ནྟོ –
༧༧༦. ‘‘པ་སྶཱ་མི ལོ་ཀེ ས་དྷ་ནེ མ་ནུ་སྶེ, ལ་དྡྷཱ་ན ཝི་ཏྟཾ ན ད་ད་ནྟི མོ་ཧཱ;
ལུ་དྡྷཱ དྷ་ནཾ ས་ནྣི་ཙ་ཡཾ ཀ་རོ་ནྟི, བྷི་ཡྻོ་ཝ ཀཱ་མེ ཨ་བྷི་པ་ཏྠ་ཡ་ནྟི.
༧༧༧. ‘‘རཱ་ཛཱ པ་ས་ཡ྄ཧ་པྤ་ཐ་ཝིཾ ཝི་ཛེ་ཏྭཱ, ས་སཱ་ག་ར་ནྟཾ མ་ཧི་མཱ་ཝ་ས་ནྟོ;
ཨོ་རཾ ས་མུ་དྡ་སྶ ཨ་ཏི་ཏྟ་རཱུ་པོ, པཱ་རཾ ས་མུ་དྡ་སྶ་པི པ་ཏྠ་ཡེ་ཐ.
༧༧༨. ‘‘རཱ་ཛཱ ཙ ཨ་ཉྙེ ཙ བ་ཧཱུ མ་ནུ་སྶཱ, ཨ་ཝཱི་ཏ་ཏ་ཎྷཱ མ་ར་ཎཾ ཨུ་པེ་ནྟི;
ཨཱུ་ནཱ་ཝ ཧུ་ཏྭཱ་ན ཛ་ཧ་ནྟི དེ་ཧཾ, ཀཱ་མེ་ཧི ལོ་ཀ་མྷི ན ཧ་ཏྠི ཏི་ཏྟི.
༧༧༩. ‘‘ཀ་ནྡ་ནྟི ནཾ ཉཱ་ཏཱི པ་ཀི་རི་ཡ ཀེ་སེ, ‘ཨ་ཧོ ཝ་ཏཱ ནོ ཨ་མ་རཱ’ཏི ཙཱ་ཧུ;
ཝ་ཏྠེ་ན ནཾ པཱ་རུ་ཏཾ ནཱི་ཧ་རི་ཏྭཱ, ཙི་ཏཾ ས་མོ་དྷཱ་ཡ ཏ་ཏོ ཌ་ཧ་ནྟི.
༧༨༠. ‘‘སོ ཌ་ཡ྄ཧ་ཏི སཱུ་ལེ་ཧི ཏུ་ཛྫ་མཱ་ནོ, ཨེ་ཀེ་ན ཝ་ཏྠེ་ན པ་ཧཱ་ཡ བྷོ་གེ;
ན མཱི་ཡ་མཱ་ན་སྶ བྷ་ཝ་ནྟི ཏཱ་ཎཱ, ཉཱ་ཏཱི ཙ མི་ཏྟཱ ཨ་ཐ ཝཱ ས་ཧཱ་ཡཱ.
༧༨༡. ‘‘དཱ་ཡཱ་ད་ཀཱ ཏ་སྶ དྷ་ནཾ ཧ་ར་ནྟི, ས་ཏྟོ པ་ན ག་ཙྪ་ཏི ཡེ་ན་ཀ་མྨཾ;
ན མཱི་ཡ་མཱ་ནཾ དྷ་ན་མ་ནྭེ་ཏི ཀི་ཉྩི, པུ་ཏྟཱ ཙ དཱ་རཱ ཙ དྷ་ན་ཉྩ ར་ཊྛཾ.
༧༨༢. ‘‘ན དཱི་གྷ་མཱ་ཡུཾ ལ་བྷ་ཏེ དྷ་ནེ་ན, ན ཙཱ་པི ཝི་ཏྟེ་ན ཛ་རཾ ཝི་ཧ་ནྟི;
ཨ་པྤཾ ཧི་དཾ ཛཱི་ཝི་ཏ་མཱ་ཧུ དྷཱི་རཱ, ཨ་ས་སྶ་ཏཾ ཝི་པྤ་རི་ཎཱ་མ་དྷ་མྨཾ.
༧༨༣. ‘‘ཨ་ཌྜྷཱ ད་ལི་དྡཱ ཙ ཕུ་ས་ནྟི ཕ་སྶཾ, བཱ་ལོ ཙ དྷཱི་རོ ཙ ཏ་ཐེ་ཝ ཕུ་ཊྛོ;
བཱ་ལོ ཧི བཱ་ལྱཱ ཝ་དྷི་ཏོ་ཝ སེ་ཏི, དྷཱི་རོ ཙ ནོ ཝེ་དྷ་ཏི ཕ་སྶ་ཕུ་ཊྛོ.
༧༨༤. ‘‘ཏ་སྨཱ ཧི པ་ཉྙཱ་ཝ དྷ་ནེ་ན སེ་ཡྻཱ, ཡཱ་ཡ ཝོ་སཱ་ན་མི་དྷཱ་དྷི་ག་ཙྪ་ཏི;
ཨ་བྱོ་སི་ཏ་ཏྟཱ ཧི བྷ་ཝཱ་བྷ་ཝེ་སུ, པཱ་པཱ་ནི ཀ་མྨཱ་ནི ཀ་རོ་ཏི མོ་ཧཱ.
༧༨༥. ‘‘ཨུ་པེ་ཏི ག་བྦྷ་ཉྩ པ་ར་ཉྩ ལོ་ཀཾ, སཾ་སཱ་ར་མཱ་པ་ཛྫ པ་ར་མྤ་རཱ་ཡ;
ཏ་སྶ་པྤ་པ་ཉྙོ ཨ་བྷི་ས་དྡ་ཧ་ནྟོ, ཨུ་པེ་ཏི ག་བྦྷ་ཉྩ པ་ར་ཉྩ ལོ་ཀཾ.
༧༨༦. ‘‘ཙོ་རོ ཡ་ཐཱ ས་ནྡྷི་མུ་ཁེ ག་ཧཱི་ཏོ, ས་ཀ་མྨུ་ནཱ ཧ་ཉྙ་ཏི པཱ་པ་དྷ་མྨོ;
ཨེ་ཝཾ པ་ཛཱ པེ་ཙྩ པ་ར་མྷི ལོ་ཀེ, ས་ཀ་མྨུ་ནཱ ཧ་ཉྙ་ཏི པཱ་པ་དྷ་མྨོ.
༧༨༧. ‘‘ཀཱ་མཱ ཧི ཙི་ཏྲཱ མ་དྷུ་རཱ མ་ནོ་ར་མཱ, ཝི་རཱུ་པ་རཱུ་པེ་ན མ་ཐེ་ནྟི ཙི་ཏྟཾ;
ཨཱ་དཱི་ན་ཝཾ ཀཱ་མ་གུ་ཎེ་སུ དི་སྭཱ, ཏ་སྨཱ ཨ་ཧཾ པ་བྦ་ཛི་ཏོ་མྷི རཱ་ཛ.
༧༨༨. ‘‘དུ་མ་པྥ་ལཱ་ནཱི་ཝ པ་ཏ་ནྟི མཱ་ཎ་ཝཱ, ད་ཧ་རཱ ཙ ཝུ་ཌྜྷཱ ཙ ས་རཱི་ར་བྷེ་དཱ;
ཨེ་ཏ་མྤི དི་སྭཱ པ་བྦ་ཛི་ཏོ་མྷི རཱ་ཛ, ཨ་པ་ཎྞ་ཀཾ སཱ་མ་ཉྙ་མེ་ཝ སེ་ཡྻོ.
༧༨༩. ‘‘ས་དྡྷཱ་ཡཱ་ཧཾ པ་བྦ་ཛི་ཏོ, ཨུ་པེ་ཏོ ཛི་ན་སཱ་ས་ནེ;
ཨ་ཝ་ཉྫྷཱ མ་ཡ྄ཧཾ པ་བྦ་ཛྫཱ, ཨ་ན་ཎོ བྷུ་ཉྫཱ་མི བྷོ་ཛ་ནཾ.
༧༩༠. ‘‘ཀཱ་མེ ཨཱ་དི་ཏྟ་ཏོ དི་སྭཱ, ཛཱ་ཏ་རཱུ་པཱ་ནི ས་ཏྠ་ཏོ;
ག་བྦྷ་ཝོ་ཀྐ་ནྟི་ཏོ དུ་ཀྑཾ, ནི་ར་ཡེ་སུ མ་ཧ་བྦྷ་ཡཾ.
༧༩༡. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, སཾ་ཝེ་གཾ ཨ་ལ་བྷིཾ ཏ་དཱ;
སོ་ཧཾ ཝི་དྡྷོ ཏ་དཱ ས་ནྟོ, ས་མྤ་ཏྟོ ཨཱ་ས་ཝ་ཀྑ་ཡཾ.
༧༩༢. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༧༩༣. ‘‘ཡ་སྶ་ཏྠཱ་ཡ པ་བྦ་ཛི་ཏོ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ’’ཏི. – ཨི་མཱ གཱ་ཐཱ ཨ་ཝོ་ཙ;
ཏ་ཏྠ པ་སྶཱ་མི ལོ་ཀེཏི ཨ་ཧཾ, མ་ཧཱ་རཱ་ཛ, ཨི་མ་སྨིཾ ལོ་ཀེ ས་དྷ་ནེ དྷ་ན་ས་མྤ་ནྣེ ཨ་ཌྜྷེ མ་ནུ་སྶེ པ་སྶཱ་མི, ཏེ པ་ན ལ་དྡྷཱ་ན ཝི་ཏྟཾ དྷ་ནཾ ལ་བྷི་ཏྭཱ བྷོ་ག་ས་མྤ་ཏྟི་ཡཾ ཋི་ཏཱ ས་མ་ཎ་བྲཱ་ཧྨ་ཎཱ་དཱི་སུ ཀ་སྶ་ཙི ཀི་ཉྩི་པི ན ད་ད་ནྟི. ཀ་སྨཱ? མོ་ཧཱ ཀ་མྨ་སྶ་ཀ་ཏཱ་པ་ཉྙཱ་ཡ ཨ་བྷཱ་ཝ་ཏོ. ལུ་དྡྷཱ ལོ་བྷཱ་བྷི་བྷཱུ་ཏཱ ཡ་ཐཱ་ལ་དྡྷཾ དྷ་ནཾ ས་ནྣི་ཙ་ཡཾ ས་བྦ་སོ ནི་ཙེ་ཏ་བྦཾ ནི་དྷེ་ཏ་བྦཾ ཀ་རོ་ནྟི. བྷི་ཡྻོ་ཝ ཡ་ཐཱ་དྷི་ག་ཏ་ཀཱ་མ་ཏོ ཨུ་པ་རི ཀཱ་མེ ཀཱ་མ་གུ་ཎེ ‘‘ཏ་ཐཱ་ཧཾ ཨེ་དི་སེ ཙ བྷོ་གེ པ་ཊི་ལ་བྷེ་ཡྻ’’ནྟི ཨ་བྷི་པ་ཏྠ་ཡ་ནྟི པ་ཙྩཱ་སཱི་ས་ནྟི ཏ་ཛྫ་ཉྩ ཝཱ་ཡཱ་མཾ ཀ་རོ་ནྟི.
བྷི་ཡྻོ ཀཱ་མ་པ་ཏྠ་ནཱ་ཡ ཨུ་དཱ་ཧ་ར་ཎཾ ད་སྶེ་ནྟོ ‘‘རཱ་ཛཱ’’ཏི་ཨཱ་དི་མཱ་ཧ. ཏ་ཏྠ པ་ས་ཡ྄ཧ་པྤ་ཐ་ཝིཾ ཝི་ཛེ་ཏྭཱཏི ཨ་ཏྟ་ནོ ཝཾ་སཱ་ནུ་ག་ཏཾ པ་ཐ་ཝིཾ བ་ལ་ཀྐཱ་རེ་ན ཨ་བྷི་ཝི་ཛི་ཡ. ཨཱ་ཝ་ས་ནྟོཏི པ་སཱ་སེ་ནྟོ. ཨོ་རཾ ས་མུ་དྡ་སྶཱཏི ཨ་ན་ཝ་སེ་སཾ ས་མུ་དྡ་སྶ ཨོ་ར་བྷཱ་གཾ ལ་བྷི་ཏྭཱ་པི ཏེ་ན ཨ་ཏི་ཏྟ་རཱུ་པོ པཱ་རཾ ས་མུ་དྡ་སྶ དཱི་པ་ནྟ་ར་མྤི པ་ཏྠ་ཡེ་ཡྻ.
ཨ་ཝཱི་ཏ་ཏ་ཎྷཱཏི ཨ་ཝི་ག་ཏ་ཏ་ཎྷཱ. ཨཱུ་ནཱ་ཝཱཏི ཨ་པ་རི་པུ་ཎྞ་མ་ནོ་ར་ཐཱ་ཝ. ཀཱ་མེ་ཧི ལོ་ཀ་མྷི ན ཧ་ཏྠི ཏི་ཏྟཱིཏི ཏ་ཎྷཱ་ཝི་པ་ནྣཱ་ནཾ ཨི་མ་སྨིཾ ལོ་ཀེ ཝ་ཏྠུ་ཀཱ་མེ་ཧི ཏི་ཏྟི ནཱ་མ ན་ཏྠི.
ཀ་ནྡ་ནྟི ནནྟི མ་ཏ་པུ་རི་སཾ ཨུ་དྡི་སྶ ཏ་སྶ གུ་ཎེ ཀི་ཏྟེ་ནྟཱ ཀ་ནྡ་ནཾ ཀ་རོ་ནྟི. ཨ་ཧོ ཝ་ཏཱ ནོ ཨ་མ་རཱ་ཏི ཙཱ་ཧཱུཏི ཨ་ཧོ ཝ་ཏ ཨ་མྷཱ་ཀཾ ཉཱ་ཏཱི ཨ་མ་རཱ སི་ཡུ་ནྟི ཙ ཀ་ཐེ་ནྟི, གཱ་ཐཱ་སུ་ཁ་ཏྠ་ཉྷེ་ཏྠ ཝ་ཏཱ-ཨི་ཏི དཱི་གྷཾ ཀ་ཏྭཱ ཝུ་ཏྟཾ.
སོ ཌ་ཡ྄ཧ་ཏི སཱུ་ལེ་ཧི ཏུ་ཛྫ་མཱ་ནོཏི སོ མ་ཏ་ས་ཏྟོ ཚ་ཝ་ཌཱ་ཧ་ཀེ་ཧི ས་མྨཱ ཛྷཱ་པེ་ཏུཾ སཱུ་ལེ་ཧི ཏུ་ཛྫ་མཱ་ནོ. ཏཱ་ཎཱཏི པ་རི་ཏྟཱ་ཎ་ཀ་རཱ.
ཡེ་ན་ཀ་མྨནྟི ཡ་ཐཱ་ཀ་མྨཾ. དྷ་ནནྟི དྷ་ནཱ་ཡི་ཏ་བྦཾ ཡཾ་ཀི་ཉྩི ཝ་ཏྠུ. པུ་ན དྷ་ནནྟི ཧི་ར་ཉྙ་སུ་ཝ་ཎྞཾ ས་ནྡྷཱ་ཡ ཝ་ད་ཏི.
‘‘ན དཱི་གྷ་མཱ་ཡུ’’ནྟི་ཨཱ་དི་ནཱ ཀཱ་མ་གུ་ཎ་སྶ ཛ་རཱ་ཡ ཙ པ་ཊི་ཀཱ་རཱ་བྷཱ་ཝཾ ཝ་ཏྭཱ པུ་ན ཏ་སྶ ཨེ་ཀ་ནྟི་ཀ་བྷཱ་ཝཾ ད་སྶེ་ཏུཾ ‘‘ཨ་པྤཾ ཧཱི’’ཏི་ཨཱ་དི ཝུ་ཏྟཾ. ཕུ་ས་ནྟཱིཏི ཨ་ནི་ཊྛ་ཕ་སྶཾ ཕུ་ས་ནྟི པཱ་པུ་ཎ་ནྟི, ཏ་ཏྠ ཨ་ཌྜྷ་ད་ལི་དྡ་ཏཱ ཨ་ཀཱ་ར་ཎ་ནྟི ད་སྶེ་ཏི. ཕ་སྶཾ བཱ་ལོ ཙ དྷཱི་རོ ཙ ཏ་ཐེ་ཝ ཕུ་ཊྛོཏི ཡ་ཐཱ བཱ་ལོ ཨི་ཊྛཱ་ནི་ཊྛ་ས་མྥ་སྶཾ ཕུ་ཊྛོ, ཏ་ཐེ་ཝ དྷཱི་རོ ཨི་ཊྛཱ་ནི་ཊྛ་ཕ་སྶཾ ཕུ་ཊྛོ ཧོ་ཏི, ན ཨེ་ཏྠ བཱ་ལ་པ་ཎྜི་ཏཱ་ནཾ ཀོ་ཙི ཝི་སེ་སོ. ཨ་ཡཾ པ་ན ཝི་སེ་སོ, བཱ་ལོ ཧི བཱ་ལྱཱ ཝ་དྷི་ཏོ་ཝ སེ་ཏཱིཏི བཱ་ལ་པུ་གྒ་ལོ ཀེ་ན་ཙི དུ་ཀྑ་དྷ་མྨེ་ན ཕུ་ཊྛོ སོ་ཙ་ནྟོ ཀི་ལ་མ་ནྟོ ཨུ་ར་ཏྟཱ་ལི༹ཾ ཀ་ནྡ་ནྟོ བཱ་ལ་བྷཱ་ཝེ་ན ཝ་དྷི་ཏོ པཱི་ལི༹་ཏོ་ཝ ཧུ་ཏྭཱ སེ་ཏི ས་ཡ་ཏི. ཨི་ཏོ ཙི་ཏོ ཙ ཨཱ་ཝ་ཊྚ་ནྟོ ཝི་ཝ་ཊྚ་ནྟོ ཝི་རོ་དྷེ་ནྟོ ཝེ་དྷ་ཏི ཕ་སྶ་ཕུ་ཊྛོཏི དྷཱི་རོ པ་ན པ་ཎྜི་ཏོ དུ་ཀྑ་ས་མྥ་སྶེ་ན ས་མྥུ་ཊྛོ ན ཝེ་དྷ་ཏི ཀ་མྤ་ན་མ་ཏྟ་མྤི ཏ་སྶ ན ཧོ་ཏཱི་ཏི.
ཏ་སྨཱཏི ཡ་སྨཱ བཱ་ལ་པ་ཎྜི་ཏཱ་ནཾ ལོ་ཀ་དྷ་མྨེ ཨེ་དི་སཱི པ་ཝ་ཏྟི, ཏ་སྨཱ ཧི པ་ཉྙཱ་ཝ དྷ་ནེ་ན སེ་ཡྻཱ, ཡཱ་ཡ ཝོ་སཱ་ན་མི་དྷཱ་དྷི་ག་ཙྪ་ཏཱིཏི པ་ཉྙཱ་ཝ དྷ་ན་ཏོ པཱ་སཾ་ས་ཏ་རཱ, ཡཱ་ཡ པ་ཉྙཱ་ཡ ཝོ་སཱ་ནཾ བྷ་ཝ་སྶ པ་རི་ཡོ་སཱ་ན་བྷཱུ་ཏཾ ནི་བྦཱ་ནཾ ཨ་དྷི་ག་ཙྪ་ཏི. ཨ་བྱོ་སི་ཏ་ཏྟཱ ཧཱིཏི ཨ་ན་དྷི་ག་ཏ་ནི་ཊྛ་ཏྟཱ. བྷ་ཝཱ་བྷ་ཝེ་སཱུཏི མ་ཧ་ནྟཱ་མ་ཧ་ནྟེ་སུ བྷ་ཝེ་སུ.
ཨུ་པེ་ཏི ག་བྦྷ་ཉྩ པ་ར་ཉྩ ལོ་ཀཾ, སཾ་སཱ་ར་མཱ་པ་ཛྫ པ་ར་མྤ་རཱ་ཡཱཏི ཡོ པཱ་པཱ་ནི ཀ་ཏྭཱ ཨ་པ་རཱ་པ་རཾ སཾ་ས་ར་ཎ་མཱ་པ་ཛྫི་ཏྭཱ ཨུ་པེ་ཏི ག་བྦྷ་ཉྩ པ་ར་ཉྩ ལོ་ཀཾ ག་བྦྷ་སེ་ཡྻཱ་ཡ པ་ར་ལོ་ཀུ་པྤ་ཏྟི་ཡཱ ཙ ན མུ་ཙྩ་ཏི, ཏ་སྶ པཱ་པ་ཀ་མྨ་ཀཱ་རི་ནོ པུ་གྒ་ལ་སྶ ཀི་རི་ཡཾ ཨ་བྷི་ས་དྡ་ཧ་ནྟོ ‘‘ཨ་ཏྟཱ ཙ མེ ཧོ་ཏཱི’’ཏི པ་ཏྟི་ཡཱ་ཡ་ནྟོ ཨ་ཉྙོ་པི ཨ་པྤ་པ་ཉྙོ བཱ་ལོ ཡ་ཐཱ པ་ཊི་པ་ཛྫི་ཏྭཱ ཨུ་པེ་ཏི ག་བྦྷ་ཉྩ པ་ར་ཉྩ ལོ་ཀཾ, ན ཏ་ཏོ པ་རི་མུ་ཙྩ་ཏི.
ཙོ་རོ ཡ་ཐཱཏི ཡ་ཐཱ ཙོ་རོ པཱ་པ་དྷ་མྨོ གྷ་ར་ས་ནྡྷིཾ ཚི་ནྡ་ནྟོ ས་ནྡྷི་མུ་ཁེ ཨཱ་ར་ཀྑ་ཀ་པུ་རི་སེ་ཧི ག་ཧི་ཏོ ས་ཀ་མྨུ་ནཱ ཏེ་ན ཨ་ཏྟ་ནོ ས་ནྡྷི་ཙྪེ་ད་ཀ་མྨུ་ནཱ ཀཱ་ར་ཎ་བྷཱུ་ཏེ་ན ཀ་སཱ་དཱི་ཧི ཏཱ་ལ༹་ནཱ་དི་ཝ་སེ་ན ཧ་ཉྙ་ཏི རཱ་ཛ་པུ་རི་སེ་ཧི བཱ་དྷི་ཡྻ་ཏི བ་ཛ྄ཛྷ་ཏི ཙ. ཨེ་ཝཾ པ་ཛཱཏི ཨེ་ཝ་མ་ཡཾ ས་ཏྟ་ལོ་ཀོ ཨི་དྷ པཱ་པཱ་ནི ཀ་རི་ཏྭཱ པེ་ཙྩ པ་ཏྭཱ ཏེ་ན ཀ་མྨུ་ནཱ པ་ར་མྷི ལོ་ཀེ ནི་ར་ཡཱ་དཱི་སུ ཧ་ཉྙ་ཏི, པ་ཉྩ་ཝི་དྷ་བ་ནྡྷ་ན་ཀ་མྨ་ཀཱ་ར་ཎཱ་དི་ཝ་སེ་ན བཱ་དྷི་ཡྻ་ཏི.
ཨེ་ཝ་མེ་ཏཱ་ཧི ཨེ་ཀཱ་ད་ས་ཧི གཱ་ཐཱ་ཧི ཡ་ཐཱ་ར་ཧཾ ཙ་ཏྟཱ་རོ དྷ་མྨུ་དྡེ་སེ པ་ཀཱ་སེ་ཏྭཱ ཨི་དཱ་ནི ཀཱ་མེ་སུ སཾ་སཱ་རེ ཙ ཨཱ་དཱི་ན་ཝཾ དི་སྭཱ ས་དྡྷཱ་ཡ ཨ་ཏྟ་ནོ པ་བྦ་ཛི་ཏ་བྷཱ་ཝཾ པ་བྦ་ཛི་ཏ་ཀི་ཙྩ་སྶ ཙ མ་ཏྠ་ཀ་པྤ་ཏྟིཾ ཝི་བྷཱ་ཝེ་ནྟོ ‘‘ཀཱ་མཱ ཧཱི’’ཏི་ཨཱ་དི་མཱ་ཧ. ཏ་ཏྠ ཀཱ་མཱཏི ཝ་ཏྠུ་ཀཱ་མཱ མ་ནཱ་པི་ཡཱ རཱུ་པཱ་ད་ཡོ དྷ་མྨཱ, ཀི་ལེ་ས་ཀཱ་མཱ ས་བྦེ་པི རཱ་ག་པྤ་བྷེ་དཱ. ཨི་དྷ པ་ན ཝ་ཏྠུ་ཀཱ་མཱ ཝེ་དི་ཏ་བྦཱ. ཏེ ཧི རཱུ་པཱ་དི་ཝ་སེ་ན ཨ་ནེ་ཀ་པྤ་ཀཱ་ར་ཏཱ་ཡ ཙི་ཏྲཱ. ལོ་ཀ་སྶཱ་ད་ཝ་སེ་ན ཨི་ཊྛཱ་ཀཱ་ར་ཏཱ་ཡ མ་དྷུ་རཱ. བཱ་ལ་པུ་ཐུ་ཛྫ་ནཱ་ནཾ མ་ནཾ ར་མེ་ནྟཱི་ཏི མ་ནོ་ར་མཱ. ཝི་རཱུ་པ་རཱུ་པེ་ནཱཏི ཝི་ཝི་དྷ་རཱུ་པེ་ན, ཨ་ནེ་ཀ་ཝི་དྷ་ས་བྷཱ་ཝེ་ནཱ་ཏི ཨ་ཏྠོ. ཏེ ཧི རཱུ་པཱ་དི་ཝ་སེ་ན ཙི་ཏྲཱ, ནཱི་ལཱ་དི་ཝ་སེ་ན ཝི་ཝི་དྷ་རཱུ་པཱ. ཨེ་ཝཾ ཏེ་ན ཝི་རཱུ་པ་རཱུ་པེ་ན ཏ་ཐཱ ཏ་ཐཱ ཨ་སྶཱ་དཾ ད་སྶེ་ཏྭཱ མ་ཐེ་ནྟི ཙི་ཏྟཾ པ་བྦ་ཛྫཱ་ཡ ཨ་བྷི་ར་མི་ཏུཾ ན དེ་ནྟཱི་ཏི ཨི་མི་ནཱ ཨ་པྤ་སྶཱ་ད་བ་ཧུ་དུ་ཀྑ་ཏཱ་དི་ནཱ ཨཱ་དཱི་ན་ཝཾ ཀཱ་མ་གུ་ཎེ་སུ དི་སྭཱ ཏ་སྨཱ ཏཾ་ནི་མི་ཏྟཾ ཨ་ཧཾ པ་བྦ་ཛི་ཏོ ཨ་མྷི. དུ་མ་པྥ་ལཱ་ནི པ་ཀྐ་ཀཱ་ལེ ཨ་པ་རི་པ་ཀྐ་ཀཱ་ལེ ཙ ཡ་ཏྠ ཀ་ཏྠ་ཙི པ་རཱུ་པ་ཀྐ་མ་ཏོ ས་ར་ས་ཏོ ཝཱ པ་ཏ་ནྟི, ཨེ་ཝཾ ས་ཏྟཱ ད་ཧ་རཱ ཙ ཝུ་ཌྜྷཱ ཙ ས་རཱི་ར་སྶ བྷེ་དཱ པ་ཏ་ནྟི་ཡེ་ཝ. ཨེ་ཏ་མྤི དི་སྭཱཏི ཨེ་ཝཾ ཨ་ནི་ཙྩ་ཏ་མྤི པ་ཉྙཱ་ཙ་ཀྑུ་ནཱ དི་སྭཱ, ན ཀེ་ཝ་ལཾ ཨ་པྤ་སྶཱ་ད་ཏཱ་དི་ཏཱ་ཡ ཨཱ་དཱི་ན་ཝ་མེ་ཝཱ་ཏི ཨ་དྷི་པྤཱ་ཡོ. ཨ་པ་ཎྞ་ཀནྟི ཨ་ཝི་ར་དྡྷ་ན་ཀཾ སཱ་མ་ཉྙ་མེ་ཝ ས་མ་ཎ་བྷཱ་ཝོ་ཝ སེ་ཡྻོ ཨུ་ཏྟ་རི་ཏ་རོ.
ས་དྡྷཱ་ཡཱཏི ཀ་མྨཾ ཀ་མྨ་ཕ་ལཾ བུ་དྡྷ་སུ་བུ་དྡྷ་ཏཾ དྷ་མྨ་སུ་དྷ་མྨ་ཏཾ ས་ངྒྷ་སུ་པྤ་ཊི་པ་ཏྟི་ཉྩ ས་དྡ་ཧི་ཏྭཱ. ཨུ་པེ་ཏོ ཛི་ན་སཱ་ས་ནེཏི ས་ཏྠུ སཱ་ས་ནེ ས་མྨཱ་པ་ཊི་པ་ཏྟིཾ ཨུ་པ་ག་ཏོ. ཨ་ཝ་ཉྫྷཱ མ་ཡ྄ཧཾ པ་བྦ་ཛྫཱ ཨ་ར་ཧ་ཏྟ་སྶ ཨ་དྷི་ག་ཏ་ཏྟཱ. ཏ་ཏོ ཨེ་ཝ ཨ་ན་ཎོ བྷུ་ཉྫཱ་མི བྷོ་ཛ་ནཾ ནི་ཀྐི་ལེ་ས་ཝ་སེ་ན སཱ་མི་བྷཱ་ཝ་ཏོ སཱ་མི་པ་རི་བྷོ་གེ་ན པ་རི་བྷུ་ཉྫ་ན་ཏོ.
ཀཱ་མེ ཨཱ་དི་ཏྟ་ཏོ དི་སྭཱཏི ཝ་ཏྠུ་ཀཱ་མེ ཀི་ལེ་ས་ཀཱ་མེ ཙ ཨེ་ཀཱ་ད་ས་ཧི ཨ་གྒཱི་ཧི ཨཱ་དི་ཏྟ་བྷཱ་ཝ་ཏོ དི་སྭཱ. ཛཱ་ཏ་རཱུ་པཱ་ནི ས་ཏྠ་ཏོཏི ཀ་ཏཱ་ཀ་ཏ་པྤ་བྷེ་དཱ ས་བྦ་སུ་ཝ་ཎྞ་ཝི་ཀ་ཏི་ཡོ ཨ་ན་ཏྠཱ་ཝ་ཧ་ཏཱ་ཡ ནི་སི་ཏ་ས་ཏྠ་ཏོ. ག་བྦྷ་ཝོ་ཀྐ་ནྟི་ཏོ དུ་ཀྑནྟི ག་བྦྷ་ཝོ་ཀྐ་ནྟི་ཏོ པ་ཊྛཱ་ཡ ས་བྦ་སཾ་སཱ་ར་པ་ཝ་ཏྟི་དུ་ཀྑཾ. ནི་ར་ཡེ་སུ མ་ཧ་བྦྷ་ཡནྟི ས་ཨུ་སྶ་དེ་སུ ཨ་ཊྛ་སུ མ་ཧཱ་ནི་ར་ཡེ་སུ ལ་བྦྷ་མཱ་ནཾ མ་ཧཱ་བྷ་ཡ་ཉྩ ས་བྦ་ཏྠ དི་སྭཱ་ཏི ཡོ་ཛ་ནཱ.
ཨེ་ཏ་མཱ་དཱི་ན་ཝཾ ཉ་ཏྭཱཏི ཨེ་ཏཾ ཀཱ་མཱ་ནཾ ཨཱ་དི་ཏྟ་ཏཱ་དིཾ སཾ་སཱ་རེ ཨཱ་དཱི་ན་ཝཾ དོ་སཾ ཉ་ཏྭཱ. སཾ་ཝེ་གཾ ཨ་ལ་བྷིཾ ཏ་དཱཏི ཏ་སྨིཾ ས་ཏྠུ ས་ནྟི་ཀེ དྷ་མྨ་སྶ སུ་ཏ་ཀཱ་ལེ བྷ་ཝཱ་དི་ཀེ སཾ་ཝེ་གཾ ཨ་ལ་ཏྠཾ. ཝི་དྡྷོ ཏ་དཱ ས་ནྟོཏི ཏ་སྨིཾ ག་ཧ་ཊྛ་ཀཱ་ལེ རཱ་ག་ས་ལླཱ་དཱི་ཧི ཝི་དྡྷོ ས་མཱ་ནོ ཨི་དཱ་ནི ས་ཏྠུ སཱ་ས་ནཾ ཨཱ་ག་མྨ ས་མྤ་ཏྟོ ཨཱ་ས་ཝ་ཀྑ་ཡཾ, ཝི་དྡྷོ ཝཱ ཙ་ཏྟཱ་རི ས་ཙྩཱ་ནི, པ་ཊི་ཝི་དྡྷོ་ཏི ཨ་ཏྠོ. སེ་སཾ ཨ་ནྟ་ར་ནྟ་རཱ་དཱི་སུ ཝུ་ཏྟ་ཏྟཱ སུ་ཝི་ཉྙེ་ཡྻ་མེ་ཝ.
ཨེ་ཝཾ ཐེ་རོ ར་ཉྙོ ཀོ་ར་བྱ་སྶ དྷ་མྨཾ དེ་སེ་ཏྭཱ ས་ཏྠུ ས་ནྟི་ཀ་མེ་ཝ ག་ཏོ. ས་ཏྠཱ ཙ ཨ་པ་ར་བྷཱ་གེ ཨ་རི་ཡ་ག་ཎ་མ་ཛ྄ཛྷེ ནི་སི་ནྣོ ཐེ་རཾ ས་དྡྷཱ་པ་བྦ་ཛི་ཏཱ་ནཾ ཨ་གྒ་ཊྛཱ་ནེ ཋ་པེ་སཱི་ཏི.
ར་ཊྛ་པཱ་ལ་ཏྠེ་ར་གཱ་ཐཱ་ཝ་ཎྞ་ནཱ ནི་ཊྛི་ཏཱ.