༣. ཏེ་ལ་ཀཱ་ནི་ཏྠེ་ར་གཱ་ཐཱ་ཝ་ཎྞ་ནཱ
ཙི་ར་ར་ཏྟཾ ཝ་ཏཱ་ཏཱ་པཱིཏི་ཨཱ་དི་ཀཱ ཨཱ་ཡ་སྨ་ཏོ ཏེ་ལ་ཀཱ་ནི་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཾ ཀུ་ས་ལཾ ཨུ་པ་ཙི་ནི་ཏྭཱ ཨི་མ་སྨིཾ བུ་དྡྷུ་པྤཱ་དེ ས་ཏྠུ ཨ་བྷི་ཛཱ་ཏི་ཏོ པུ་རེ་ཏ་རཾ་ཡེ་ཝ སཱ་ཝ་ཏྠི་ཡཾ ཨ་ཉྙ་ཏ་ར་སྨིཾ བྲཱ་ཧྨ་ཎ་ཀུ་ལེ ནི་བྦ་ཏྟི་ཏྭཱ ཏེ་ལ་ཀཱ་ནཱིཏི ལ་དྡྷ་ནཱ་མོ ཝ་ཡ་པྤ་ཏྟོ ཧེ་ཏུ་ས་མྤ་ནྣ་ཏཱ་ཡ ཀཱ་མེ ཛི་གུ་ཙྪ་ནྟོ གྷ་རཱ་ཝཱ་སཾ པ་ཧཱ་ཡ པ་རི་བྦཱ་ཛ་ཀ་པ་བྦ་ཛྫཾ པ་བྦ་ཛི་ཏྭཱ ཝི་ཝ་ཊྚ་ཛ྄ཛྷཱ་ས་ཡོ ‘‘ཀོ སོ པཱ་ར་ངྒ་ཏོ ལོ་ཀེ’’ཏི་ཨཱ་དི་ནཱ ཝི་མོ་ཀྑ་པ་རི་ཡེ་ས་ནཾ ཙ་ར་མཱ་ནོ ཏེ ཏེ ས་མ་ཎ་བྲཱ་ཧྨ་ཎེ ཨུ་པ་ས་ངྐ་མི་ཏྭཱ པ་ཉྷཾ པུ་ཙྪ་ཏི, ཏེ ན ས་མྤཱ་ཡ་ནྟི. སོ ཏེ་ན ཨ་ནཱ་རཱ་དྷི་ཏ་ཙི་ཏྟོ ཝི་ཙ་ར་ཏི. ཨ་ཐ ཨ་མྷཱ་ཀཾ བྷ་ག་ཝ་ཏི ལོ་ཀེ ཨུ་པྤ་ཛྫི་ཏྭཱ པ་ཝ་ཏྟི་ཏ་ཝ་ར་དྷ་མྨ་ཙ་ཀྐེ ལོ་ཀ་ཧི་ཏཾ ཀ་རོ་ནྟེ ཨེ་ཀ་དི་ཝ་སཾ ས་ཏྠཱ་རཾ ཨུ་པ་ས་ངྐ་མི་ཏྭཱ དྷ་མྨཾ སུ་ཏྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏྭཱ ཝི་པ་སྶ་ནཱ་ཡ ཀ་མྨཾ ཀ་རོ་ནྟོ ན་ཙི་ར་སྶེ་ཝ ཨ་ར་ཧ་ཏྟེ པ་ཏི་ཊྛཱ་ཏི. སོ ཨེ་ཀ་དི་ཝ་སཾ བྷི་ཀྑཱུ་ཧི ས་དྡྷིཾ ནི་སི་ནྣོ ཨ་ཏྟ་ནཱ ཨ་དྷི་ག་ཏ་ཝི་སེ་སཾ པ་ཙྩ་ཝེ་ཀྑི་ཏྭཱ ཏ་ད་ནུ་སཱ་རེ་ན ཨ་ཏྟ་ནོ པ་ཊི་པ་ཏྟིཾ ཨ་ནུ་སྶ་རི་ཏྭཱ ཏཾ ས་བྦཾ བྷི་ཀྑཱུ་ནཾ ཨཱ་ཙི་ཀྑ་ནྟོ –
༧༤༧. ‘‘ཙི་ར་ར་ཏྟཾ ཝ་ཏཱ་ཏཱ་པཱི, དྷ་མྨཾ ཨ་ནུ་ཝི་ཙི་ནྟ་ཡཾ;
ས་མཾ ཙི་ཏྟ་སྶ ནཱ་ལ་ཏྠཾ, པུ་ཙྪཾ ས་མ་ཎ་བྲཱ་ཧྨ་ཎེ.
༧༤༨. ‘‘ཀོ སོ པཱ་ར་ངྒ་ཏོ ལོ་ཀེ, ཀོ པ་ཏྟོ ཨ་མ་ཏོ་ག་དྷཾ;
ཀ་སྶ དྷ་མྨཾ པ་ཊི་ཙྪཱ་མི, པ་ར་མ་ཏྠ་ཝི་ཛཱ་ན་ནཾ.
༧༤༩. ‘‘ཨ་ནྟོ་ཝ་ངྐ་ག་ཏོ ཨཱ་སི, མ་ཙྪོ་ཝ གྷ་ས་མཱ་མི་སཾ;
བ་དྡྷོ མ་ཧི་ནྡ་པཱ་སེ་ན, ཝེ་པ་ཙི་ཏྱ་སུ་རོ ཡ་ཐཱ.
༧༥༠. ‘‘ཨ་ཉྪཱ་མི ནཾ ན མུ་ཉྩཱ་མི, ཨ་སྨཱ སོ་ཀ་པ་རི་དྡ་ཝཱ;
ཀོ མེ བ་ནྡྷཾ མུ་ཉྩཾ ལོ་ཀེ, ས་མྦོ་དྷིཾ ཝེ་ད་ཡི་སྶ་ཏི.
༧༥༡. ‘‘ས་མ་ཎཾ བྲཱ་ཧྨ་ཎཾ ཝཱ ཀཾ, ཨཱ་དི་ས་ནྟཾ པ་བྷ་ངྒུ་ནཾ;
ཀ་སྶ དྷ་མྨཾ པ་ཊི་ཙྪཱ་མི, ཛ་རཱ་མ་ཙྩུ་པ་ཝཱ་ཧ་ནཾ.
༧༥༢. ‘‘ཝི་ཙི་ཀི་ཙྪཱ་ཀ་ངྑཱ་ག་ནྠི་ཏཾ, སཱ་ར་མྦྷ་བ་ལ་ས་ཉྙུ་ཏཾ;
ཀོ་དྷ་པྤ་ཏྟ་མ་ན་ཏྠ་དྡྷཾ, ཨ་བྷི་ཛ་པྤ་པྤ་དཱ་ར་ཎཾ.
༧༥༣. ‘‘ཏ་ཎྷཱ་དྷ་ནུ་ས་མུ་ཊྛཱ་ནཾ, དྭེ ཙ པ་ནྣ་ར་སཱ་ཡུ་ཏཾ;
པ་སྶ ཨོ་ར་སི་ཀཾ བཱ་ལ༹ྷཾ, བྷེ་ཏྭཱ་ན ཡ་དི ཏི་ཊྛ་ཏི.
༧༥༤. ‘‘ཨ་ནུ་དི་ཊྛཱི་ནཾ ཨ་པྤ་ཧཱ་ནཾ, ས་ངྐ་པྤ་པ་ར་ཏེ་ཛི་ཏཾ;
ཏེ་ན ཝི་དྡྷོ པ་ཝེ་དྷཱ་མི, པ་ཏྟཾ་ཝ མཱ་ལུ་ཏེ་རི་ཏཾ.
༧༥༥. ‘‘ཨ་ཛ྄ཛྷ་ཏྟཾ མེ ས་མུ་ཊྛཱ་ཡ, ཁི་པྤཾ པ་ཙྩ་ཏི མཱ་མ་ཀཾ;
ཚ་ཕ་སྶཱ་ཡ་ཏ་ནཱི ཀཱ་ཡོ, ཡ་ཏྠ ས་ར་ཏི ས་བྦ་དཱ.
༧༥༦. ‘‘ཏཾ ན པ་སྶཱ་མི ཏེ་ཀི་ཙྪཾ, ཡོ མེ་ཏཾ ས་ལླ་མུ་དྡྷ་རེ;
ནཱ་ནཱ་ར་ཛྫེ་ན ས་ཏྠེ་ན, ནཱ་ཉྙེ་ན ཝི་ཙི་ཀི་ཙྪི་ཏཾ.
༧༥༧. ‘‘ཀོ མེ ཨ་ས་ཏྠོ ཨ་ཝ་ཎོ, ས་ལླ་མ་བྦྷ་ནྟ་ར་པ་སྶ་ཡཾ;
ཨ་ཧིཾ་སཾ ས་བྦ་ག་ཏྟཱ་ནི, ས་ལླཾ མེ ཨུ་དྡྷ་རི་སྶ་ཏི.
༧༥༨. ‘‘དྷ་མྨ་པྤ་ཏི ཧི སོ སེ་ཊྛོ, ཝི་ས་དོ་ས་པྤ་ཝཱ་ཧ་ཀོ;
ག་མྦྷཱི་རེ པ་ཏི་ཏ་སྶ མེ, ཐ་ལཾ པཱ་ཎི་ཉྩ ད་སྶ་ཡེ.
༧༥༩. ‘‘ར་ཧ་དེ་ཧ་མ་སྨི ཨོ་གཱ་ལ༹ྷོ, ཨ་ཧཱ་རི་ཡ་ར་ཛ་མ་ཏྟི་ཀེ;
མཱ་ཡཱ་ཨུ་སཱུ་ཡ་སཱ་ར་མྦྷ, ཐི་ན་མི་དྡྷ་མ་པ་ཏྠ་ཊེ.
༧༦༠. ‘‘ཨུ་དྡྷ་ཙྩ་མེ་གྷ་ཐ་ནི་ཏཾ, སཾ་ཡོ་ཛ་ན་ཝ་ལཱ་ཧ་ཀཾ;
ཝཱ་ཧཱ ཝ་ཧ་ནྟི ཀུ་དྡི་ཊྛིཾ, ས་ངྐ་པྤཱ རཱ་ག་ནི་སྶི་ཏཱ.
༧༦༡. ‘‘ས་ཝ་ནྟི ས་བྦ་དྷི སོ་ཏཱ, ལ་ཏཱ ཨུ་བྦྷི་ཛྫ ཏི་ཊྛ་ཏི;
ཏེ སོ་ཏེ ཀོ ནི་ཝཱ་རེ་ཡྻ, ཏཾ ལ་ཏཾ ཀོ ཧི ཚེ་ཙྪ་ཏི.
༧༦༢. ‘‘ཝེ་ལཾ ཀ་རོ་ཐ བྷ་དྡ་ནྟེ, སོ་ཏཱ་ནཾ ས་ནྣི་ཝཱ་ར་ཎཾ;
མཱ ཏེ མ་ནོ་མ་ཡོ སོ་ཏཱ, རུ་ཀྑཾ་ཝ ས་ཧ་སཱ ལུ་ཝེ.
༧༦༣. ‘‘ཨེ་ཝཾ མེ བྷ་ཡ་ཛཱ་ཏ་སྶ, ཨ་པཱ་རཱ པཱ་ར་མེ་ས་ཏོ;
ཏཱ་ཎོ པ་ཉྙཱ་ཝུ་དྷོ ས་ཏྠཱ, ཨི་སི་ས་ངྒྷ་ནི་སེ་ཝི་ཏོ.
༧༦༤. ‘‘སོ་པཱ་ནཾ སུ་ག་ཏཾ སུ་དྡྷཾ, དྷ་མྨ་སཱ་ར་མ་ཡཾ ད་ལ༹ྷཾ;
པཱ་དཱ་སི ཝུ་ཡ྄ཧ་མཱ་ན་སྶ, མཱ བྷཱ་ཡཱི་ཏི ཙ མ་བྲ་ཝི.
༧༦༥. ‘‘ས་ཏི་པ་ཊྛཱ་ན་པཱ་སཱ་དཾ, ཨཱ་རུ་ཡ྄ཧ པ་ཙྩ་ཝེ་ཀྑི་སཾ;
ཡཾ ཏཾ པུ་བྦེ ཨ་མ་ཉྙི་སྶཾ, ས་ཀྐཱ་ཡཱ་བྷི་ར་ཏཾ པ་ཛཾ.
༧༦༦. ‘‘ཡ་དཱ ཙ མ་གྒ་མ་དྡ་ཀྑིཾ, ནཱ་ཝཱ་ཡ ཨ་བྷི་རཱུ་ཧ་ནཾ;
ཨ་ན་དྷི་ཊྛཱ་ཡ ཨ་ཏྟཱ་ནཾ, ཏི་ཏྠ་མ་དྡ་ཀྑི་མུ་ཏྟ་མཾ.
༧༦༧. ‘‘ས་ལླཾ ཨ་ཏྟ་ས་མུ་ཊྛཱ་ནཾ, བྷ་ཝ་ནེ་ཏྟི་པྤ་བྷཱ་ཝི་ཏཾ;
ཨེ་ཏེ་སཾ ཨ་པྤ་ཝ་ཏྟཱ་ཡ, དེ་སེ་སི མ་གྒ་མུ་ཏྟ་མཾ.
༧༦༨. ‘‘དཱི་གྷ་ར་ཏྟཱ་ནུ་ས་ཡི་ཏཾ, ཙི་ར་ར་ཏྟ་མ་དྷི་ཊྛི་ཏཾ;
བུ་དྡྷོ མེ་པཱ་ནུ་དཱི ག་ནྠཾ, ཝི་ས་དོ་ས་པྤ་ཝཱ་ཧ་ནོ’’ཏི. – ཨི་མཱ གཱ་ཐཱ ཨ་བྷཱ་སི;
ཏ་ཏྠ ཙི་ར་ར་ཏྟཾ ཝ་ཏཱཏི ཙི་ར་ཀཱ་ལཾ ཝ་ཏ. ཨཱ་ཏཱ་པཱིཏི ཝཱི་རི་ཡ་ཝཱ ཝི་མོ་ཀྑ་དྷ་མྨ་པ་རི་ཡེ་ས་ནེ ཨཱ་ར་དྡྷ་ཝཱི་རི་ཡོ. དྷ་མྨཾ ཨ་ནུ་ཝི་ཙི་ནྟ་ཡནྟི ‘‘ཀཱི་དི་སོ ནུ ཁོ ཝི་མོ་ཀྑ་དྷ་མྨོ, ཀ་ཐཾ ཝཱ ཨ་དྷི་ག་ནྟ་བྦོ’’ཏི ཝི་མུ་ཏྟི་དྷ་མྨཾ ཨ་ནུ་ཝི་ཙི་ན་ནྟོ ག་ཝེ་ས་ནྟོ. ས་མཾ ཙི་ཏྟ་སྶ ནཱ་ལ་ཏྠཾ, པུ་ཙྪཾ ས་མ་ཎ་བྲཱ་ཧྨ་ཎེཏི ཏེ ཏེ ནཱ་ནཱ་ཏི་ཏྠི་ཡེ ས་མ་ཎ་བྲཱ་ཧྨ་ཎེ ཝི་མུ་ཏྟི་དྷ་མྨཾ པུ་ཙྪ་ནྟོ པ་ཀ་ཏི་ཡཱ ཨ་ནུ་པ་ས་ནྟ་ས་བྷཱ་ཝ་སྶ ཙི་ཏྟ་སྶ ས་མཾ ཝཱུ་པ་ས་མ་བྷཱུ་ཏཾ ཝ་ཊྚ་དུ་ཀྑ་ཝི་སྶ་ར་ཎཾ ཨ་རི་ཡ་དྷ་མྨཾ ནཱ་ལ་ཏྠཾ ནཱ་དྷི་ག་ཙྪ་ནྟི ཨ་ཏྠོ.
ཀོ སོ པཱ་ར་ངྒ་ཏོཏི་ཨཱ་དི པུ་ཙྪི་ཏཱ་ཀཱ་ར་ད་སྶ་ནཾ. ཏ་ཏྠ ཀོ སོ པཱ་ར་ངྒ་ཏོ ལོ་ཀེཏི ཨི་མ་སྨིཾ ལོ་ཀེ ཏི་ཏྠ་ཀཱ་ར་པ་ཊི་ཉྙེ་སུ ས་མ་ཎ་བྲཱ་ཧྨ་ཎེ་སུ ཀོ ནུ ཁོ སོ སཾ་སཱ་ར་སྶ པཱ་རཾ ནི་བྦཱ་ནཾ ཨུ་པ་ག་ཏོ. ཀོ པ་ཏྟོ ཨ་མ་ཏོ་ག་དྷནྟི ནི་བྦཱ་ན་པ་ཏི་ཊྛཾ ཝི་མོ་ཀྑ་མ་གྒཾ ཀོ པ་ཏྟོ ཨ་དྷི་ག་ཏོ་ཏི ཨ་ཏྠོ. ཀ་སྶ དྷ་མྨཾ པ་ཊི་ཙྪཱ་མཱིཏི ཀ་སྶ ས་མ་ཎ་སྶ ཝཱ བྲཱ་ཧྨ་ཎ་སྶ ཝཱ ཨོ་ཝཱ་ད་དྷ་མྨཾ པ་ཊི་གྒ་ཎྷཱ་མི པ་ཊི་པ་ཛྫཱ་མི. པ་ར་མ་ཏྠ་ཝི་ཛཱ་ན་ནནྟི པ་ར་མ་ཏྠ་སྶ ཝི་ཛཱ་ན་ནཾ, ཨ་ཝི་པ་རཱི་ཏ་པྤ་ཝ་ཏྟི་ནི་ཝ་ཏྟི་ཡོ པ་ཝེ་དེ་ནྟ་ནྟི ཨ་ཏྠོ.
ཨ་ནྟོ་ཝ་ངྐ་ག་ཏོ ཨཱ་སཱིཏི ཝ་ངྐཾ ཝུ་ཙྩ་ཏི དི་ཊྛི་ག་ཏཾ མ་ནོ་ཝ་ངྐ་བྷཱ་ཝ་ཏོ, ས་བྦེ་པི ཝཱ ཀི་ལེ་སཱ, ཨ་ནྟོ་ཏི པ་ན ཧ་ད་ཡ་ཝ་ངྐ་སྶ ཨ་ནྟོ, ཧ་ད་ཡ་བྦྷ་ནྟ་ར་ག་ཏ་ཀི་ལེ་ས་ཝ་ངྐོ ཝཱ ཨ་ཧོ་སཱི་ཏི ཨ་ཏྠོ. མ་ཙྪོ་ཝ གྷ་ས་མཱ་མི་སནྟི ཨཱ་མི་སཾ གྷ་ས་ནྟོ ཁཱ་ད་ནྟོ མ་ཙྪོ ཝི་ཡ, གི་ལ་བ་ལི༹་སོ མ་ཙྪོ ཝི་ཡཱ་ཏི ཨ་དྷི་པྤཱ་ཡོ. བ་དྡྷོ མ་ཧི་ནྡ་པཱ་སེ་ན, ཝེ་པ་ཙི་ཏྱ་སུ་རོ ཡ་ཐཱཏི མ་ཧི་ནྡ་སྶ ས་ཀྐ་སྶ པཱ་སེ་ན བ་དྡྷོ ཡ་ཐཱ ཝེ་པ་ཙི་ཏྟི ཨ་སུ་རི་ནྡོ ཨ་སེ་རི་ཝི་ཧཱ་རཱི མ་ཧཱ་དུ་ཀྑ་པྤ་ཏྟོ, ཨེ་ཝ་མ་ཧཾ པུ་བྦེ ཀི་ལེ་ས་པཱ་སེ་ན བ་དྡྷོ ཨཱ་སིཾ, ཨ་སེ་རི་ཝི་ཧཱ་རཱི མ་ཧཱ་དུ་ཀྑ་པྤ་ཏྟོ་ཏི ཨ་དྷི་པྤཱ་ཡོ.
ཨ་ཉྪཱ་མཱིཏི ཨཱ་ཀ་ཌྜྷཱ་མི. ནནྟི ཀི་ལེ་ས་པཱ་སཾ. ན མུ་ཉྩཱ་མཱིཏི ན མོ་ཙེ་མི. ཨ་སྨཱ སོ་ཀ་པ་རི་དྡ་ཝཱཏི ཨི་མ་སྨཱ སོ་ཀ་པ་རི་དེ་ཝ་ཝ་ཊྚ་ཏོ. ཨི་དཾ ཝུ་ཏྟཾ ཧོ་ཏི – ཡ་ཐཱ་པཱ་སེ་ན བ་དྡྷོ མི་གོ སཱུ་ཀ་རོ ཝཱ མོ་ཙ་ནུ་པཱ་ཡཾ ཨ་ཛཱ་ན་ནྟོ པ་རི་པྥ་ནྡ་མཱ་ནོ ཏཾ ཨཱ་ཝི་ཉྪ་ནྟོ བ་ནྡྷ་ནཾ ད་ལ༹ྷཾ ཀ་རོ་ཏི, ཨེ་ཝཾ ཨ་ཧཾ པུ་བྦེ ཀི་ལེ་ས་པཱ་སེ་ན པ་ཊི་མུ་ཀྐོ མོ་ཙ་ནུ་པཱ་ཡཾ ཨ་ཛཱ་ན་ནྟོ ཀཱ་ཡ་ས་ཉྩེ་ཏ་ནཱ་དི་ཝ་སེ་ན པ་རི་པྥ་ནྡ་མཱ་ནོ ཏཾ ན མོ་ཙེ་སིཾ, ཨ་ཉྙ་ད་ཏྠུ ཏཾ ད་ལ༹ྷཾ ཀ་རོ་ནྟོ སོ་ཀཱ་དི་ནཱ པ་རཾ ཀི་ལེ་སཾ ཨེ་ཝ པཱ་པུ་ཎི་ནྟི. ཀོ མེ བ་ནྡྷཾ མུ་ཉྩཾ ལོ་ཀེ, ས་མྦོ་དྷིཾ ཝེ་ད་ཡི་སྶ་ཏཱིཏི ཨི་མ་སྨིཾ ལོ་ཀེ ཨེ་ཏཾ ཀི་ལེ་ས་བ་ནྡྷ་ནེ་ན བ་ནྡྷཾ མུ་ཉྩ་ནྟོ ས་མྦུ་ཛ྄ཛྷ་ཏི ཨེ་ཏེ་ནཱ་ཏི ‘‘ས་མྦོ་དྷཱི’’ཏི ལ་དྡྷ་ནཱ་མཾ ཝི་མོ་ཀྑ་མ་གྒཾ ཀོ མེ ཝེ་ད་ཡི་སྶ་ཏི ཨཱ་ཙི་ཀྑི་སྶ་ཏཱི་ཏི ཨ་ཏྠོ. ‘‘བ་ནྡྷ་མུ་ཉྩ’’ནྟི་པི པ་ཋ་ནྟི, བ་ནྡྷཱ, བ་ནྡྷ་སྶ ཝཱ མོ་ཙ་ཀཾ ས་མྦོ་དྷི་ནྟི ཡོ་ཛ་ནཱ.
ཨཱ་དི་ས་ནྟནྟི དེ་སེ་ནྟཾ. པ་བྷ་ངྒུ་ནནྟི པ་བྷ་ཉྫ་ནཾ ཀི་ལེ་སཱ་ནཾ ཝི་དྡྷཾ་ས་ནཾ, པ་བྷ་ངྒུ་ནཾ ཝཱ དྷ་མྨ་པྤ་ཝ་ཏྟིཾ ཨཱ་དི་ས་ནྟཾ ཀ་ཐེ་ནྟཾ ཛ་རཱ་ཡ མ་ཙྩུ་ནོ ཙ པ་ཝཱ་ཧ་ནཾ ཀ་སྶ དྷ་མྨཾ པ་ཊི་ཙྪཱ་མི. ‘‘པ་ཊི་པ་ཛྫཱ་མཱི’’ཏི ཝཱ པཱ་ཋོ, སོ ཨེ་ཝ་ཏྠོ. ཝི་ཙི་ཀི་ཙྪཱ་ཀ་ངྑཱ་ག་ནྠི་ཏནྟི ‘‘ཨ་ཧོ་སིཾ ནུ ཁོ ཨ་ཧ་མ་ཏཱི་ཏ་མ་དྡྷཱ་ན’’ནྟི་ཨཱ་དི་ན་ཡ་པྤ་ཝ་ཏྟཱ་ཡ (མ. ནི. ༡.༡༨; སཾ. ནི. ༢.༢༠) ཝི་ཙི་ཀི་ཙྪཱ་ཡ ཨཱ་ས་པྤ་ན་པ་རི་ས་པྤ་ནཱ་ཀཱ་ར་ཝུ་ཏྟི་ཡཱ ཀ་ངྑཱ་ཡ ཙ ག་ནྠི་ཏཾ. སཱ་ར་མྦྷ་བ་ལ་ས་ཉྙུ་ཏནྟི ཀ་ར་ཎུ་ཏྟ་རི་ཡ་ཀ་ར་ཎ་ལ་ཀྑ་ཎེ་ན བ་ལ་པྤ་ཏྟེ་ན སཱ་ར་མྦྷེ་ན ཡུ་ཏྟཾ. ཀོ་དྷ་པྤ་ཏྟ་མ་ན་ཏྠ་དྡྷནྟི ས་བྦ་ཏྠ ཀོ་དྷེ་ན ཡུ་ཏྟ་མ་ན་སཱ ཐ་དྡྷ་བྷཱ་ཝཾ ག་ཏཾ ཨ་བྷི་ཛ་པྤ་པྤ་དཱ་ར་ཎཾ. ཨི་ཙྪི་ཏཱ་ལཱ་བྷཱ་དི་ཝ་སེ་ན ཧི ཏ་ཎྷཱ ས་ཏྟཱ་ནཾ ཙི་ཏྟཾ པ་དཱ་ལེ་ནྟཱི ཝི་ཡ པ་ཝ་ཏྟ་ཏི. དཱུ་རེ ཋི་ཏ་སྶཱ་པི ཝི་ཛ྄ཛྷ་ནུ་པཱ་ཡ་ཏཱ་ཡ ཏ་ཎྷཱ་ཝ དྷ་ནུ ས་མུ་པ་ཏི་ཊྛ་ཏི ཨུ་པྤ་ཛྫ་ཏི ཨེ་ཏ་སྨཱ་ཏི ཏ་ཎྷཱ་དྷ་ནུ་ས་མུ་ཊྛཱ་ནཾ, དི་ཊྛི་ས་ལླཾ. ཏཾ པ་ན ཡ་སྨཱ ཝཱི་ས་ཏི་ཝ་ཏྠུ་ཀཱ ས་ཀྐཱ་ཡ་དི་ཊྛི, ད་ས་ཝ་ཏྠུ་ཀཱ མི་ཙྪཱ་དི་ཊྛཱི་ཏི ཏིཾ་ས་པྤ་བྷེ་དཾ, ཏ་སྨཱ ཝུ་ཏྟཾ ‘‘དྭེ ཙ པ་ནྣ་ར་སཱ་ཡུ་ཏ’’ནྟི, དྭི་ཀྑ་ཏྟུཾ པ་ནྣ་ར་ས་བྷེ་ད་ཝ་ནྟ་ནྟི ཨ་ཏྠོ. པ་སྶ ཨོ་ར་སི་ཀཾ བཱ་ལ༹ྷཾ, བྷེ་ཏྭཱ་ན ཡ་དི ཏི་ཊྛ་ཏཱིཏི ཡཾ ཨུ་ར་ས་མྦ་ནྡྷ་ནཱི་ཡ་ཏཱ་ཡ ཨོ་ར་སི་ཀཾ བཱ་ལ༹ྷཾ བ་ལ་ཝ་ཏ་རཾ བྷེ་ཏྭཱ་ན ཧ་ད་ཡཾ ཝི་ནི་ཝི་ཛ྄ཛྷི་ཏྭཱ ཏ་སྨིཾ་ཡེ་ཝ ཧ་ད་ཡེ ཏི་ཊྛ་ཏི, ཏཾ པ་སྶཱ་ཏི ཨ་ཏྟཱ་ན་མེ་ཝ ཨཱ་ལ་པ་ཏི.
ཨ་ནུ་དི་ཊྛཱི་ནཾ ཨ་པྤ་ཧཱ་ནནྟི ཨ་ནུ་དི་ཊྛི་བྷཱུ་ཏཱ་ནཾ སེ་ས་དི་ཊྛཱི་ནཾ ཨ་པྤ་ཧཱ་ན་ཀཱ་ར་ཎཾ. ཡཱ་ཝ ཧི ས་ཀྐཱ་ཡ་དི་ཊྛི ས་ནྟཱ་ན་ཏོ ན ཝི་ག་ཙྪ་ཏི, ཏཱ་ཝ ས་སྶ་ཏ་དི་ཊྛི་ཨཱ་དཱི་ནཾ ཨ་པྤ་ཧཱ་ན་མེ་ཝཱ་ཏི. ས་ངྐ་པྤ་པ་ར་ཏེ་ཛི་ཏནྟི ས་ངྐ་པྤེ་ན མི་ཙྪཱ་ཝི་ཏ་ཀྐེ་ན པ་རེ པ་ར་ཛ་ནེ ནི་སྶ་ཡ་ལ་ཀྑ་ཎཾ པ་ཏི་པ་ཏི་ཏེ ཏེ་ཛི་ཏཾ ཨུ་སྶཱ་ཧི་ཏཾ. ཏེ་ན ཝི་དྡྷོ པ་ཝེ་དྷཱ་མཱིཏི ཏེ་ན དི་ཊྛི་ས་ལླེ་ན ཡ་ཐཱ ཧ་ད་ཡཾ ཨཱ་ཧ་ཙྩ ཏི་ཊྛ་ཏི, ཨེ་ཝཾ ཝི་དྡྷོ པ་ཝེ་དྷཱ་མི ས་ངྐ་པྤཱ་མི ས་སྶ་ཏུ་ཙྪེ་དཱ་དི་ཝ་སེ་ན ཨི་ཏོ ཙི་ཏོ ཙ པ་རི་ཝ་ཊྚཱ་མི. པ་ཏྟཾ་ཝ མཱ་ལུ་ཏེ་རི་ཏནྟི མཱ་ལུ་ཏེ་ན ཝཱ་ཡུ་ནཱ ཨེ་རི་ཏཾ ཝ་ཎྚ་ཏོ མུ་ཏྟཾ དུ་མ་པ་ཏྟཾ ཝི་ཡ.
ཨ་ཛ྄ཛྷ་ཏྟཾ མེ ས་མུ་ཊྛཱ་ཡཱཏི ཡ་ཐཱ ལོ་ཀེ ས་ལླཾ ནཱ་མ བཱ་ཧི་ར་ཏོ ཨུ་ཊྛཱ་ཡ ཨ་ཛ྄ཛྷ་ཏྟཾ ནི་མྨ་ཐེ་ཏྭཱ བཱ་དྷ་ཏི, ན ཨེ་ཝ་མི་དཾ. ཨི་དཾ པ་ན ཨ་ཛ྄ཛྷ་ཏྟཾ མེ མ་མ ཨ་ཏྟ་བྷཱ་ཝེ ས་མུ་ཊྛཱ་ཡ སོ ཨ་ཏྟ་བྷཱ་ཝ་ས་ཉྙི་ཏོ ཚ་ཕ་སྶཱ་ཡ་ཏ་ན་ཀཱ་ཡོ ཡ་ཐཱ ཁི་པྤཾ སཱི་གྷཾ པ་ཙྩ་ཏི, ཌ་ཡ྄ཧ་ཏི. ཡ་ཐཱ ཀིཾ? ཨ་གྒི ཝི་ཡ ས་ནི་སྶ་ཡ་ཌཱ་ཧ་ཀོ ཏཾ་ཡེ་ཝ མཱ་མ་ཀཾ མ་མ ས་ནྟ་ཀཾ ཨ་ཏྟ་བྷཱ་ཝཾ ཌ་ཧ་ནྟོ ཡ་ཏྠ ཨུ་པྤ་ནྣོ, ཏ་ཏྠེ་ཝ ས་ར་ཏི པ་ཝ་ཏྟ་ཏི.
ཏཾ ན པ་སྶཱ་མི ཏེ་ཀི་ཙྪནྟི ཏཱ་དི་སཱ་ཡ ཏི་ཀི་ཙྪཱ་ཡ ནི་ཡུ་ཏྟ་ཏཱ་ཡ ཏེ་ཀི་ཙྪཾ ས་ལླ་ཀ་ཏྟཾ བྷི་ས་ཀྐཾ ཏཾ ན པ་སྶཱ་མི. ཡོ མེ་ཏཾ ས་ལླ་མུ་དྡྷ་རེཏི ཡོ བྷི་ས་ཀྐོ ཨེ་ཏཾ དི་ཊྛི་ས་ལླཾ ཀི་ལེ་ས་ས་ལླ་ཉྩ ཨུ་དྡྷ་རེ་ཡྻ, ཨུ་དྡྷ་ར་ནྟོ ཙ ནཱ་ནཱ་ར་ཛྫེ་ན ར་ཛྫུ་ས་དི་ས་ས་ངྑཱ་ཏཱ་ཡ ཨེ་ས་ནི་ས་ལཱ་ཀཱ་ཡ པ་ཝེ་སེ་ཏྭཱ་ན ས་ཏྠེ་ན ཀ་ནྟི་ཏྭཱ ནཱ་ཉྙེ་ན མ་ནྟཱ་ག་ད་པྤ་ཡོ་གེ་ན ཝི་ཙི་ཀི་ཙྪི་ཏཾ ས་ལླཾ ཏི་ཀི་ཙྪི་ཏུཾ ས་ཀྐཱ་ཏི ཨཱ་ཧ་རི་ཏྭཱ ཡོ་ཛེ་ཏ་བྦཾ. ཝི་ཙི་ཀི་ཙྪི་ཏ་ནྟི, ཙ ནི་ད་སྶ་ན་མ་ཏྟ་མེ་ཏཾ. ས་བྦ་སྶ་པི ཀི་ལེ་ས་ས་ལླ་སྶ ཝ་སེ་ན ཨ་ཏྠོ ཝེ་དི་ཏ་བྦོ.
ཨ་ས་ཏྠོཏི ས་ཏྠ་ར་ཧི་ཏོ. ཨ་ཝ་ཎོཏི ཝ་ཎེ་ན ཝི་ནཱ. ཨ་བྦྷ་ནྟ་ར་པ་སྶ་ཡནྟི ཨ་བྦྷ་ནྟ་ར་ས་ངྑཱ་ཏཾ ཧ་ད་ཡཾ ནི་སྶཱ་ཡ ཋི་ཏཾ. ཨ་ཧིཾ་སནྟི ཨ་པཱི་ལེ༹་ནྟོ. ‘‘ཨ་ཧིཾ་སཱ’’ཏི ཙ པཱ་ཋོ, ཨ་ཧིཾ་སཱ་ཡ ཨ་པཱི་ལ༹་ནེ་ནཱ་ཏི ཨ་ཏྠོ. ཨ་ཡ་ཉྷེ་ཏྠ ས་ངྑེ་པ་ཏྠོ – ཀོ ནུ ཁོ ཀི་ཉྩི ས་ཏྠཾ ཨ་གྒ་ཧེ་ཏྭཱ ཝ་ཎ་ཉྩ ཨ་ཀ་རོ་ནྟོ ཏ་ཏོ ཨེ་ཝ ས་བྦ་ག་ཏྟཱ་ནི ཨ་བཱ་དྷེ་ནྟོ མ་མ ཧ་ད་ཡ་བྦྷ་ནྟ་ར་ག་ཏཾ པཱི་ལཱ༹་ཛ་ན་ན་ཏོ ཨ་ནྟོ ཏུ་ད་ན་ཏོ ཨ་ནྟོ རུ་དྡྷ་ན་ཏོ ཙ པ་ར་མ་ཏྠེ་ནེ་ཝ ས་ལླ་བྷཱུ་ཏཾ ཀི་ལེ་ས་ས་ལླཾ ཨུ་དྡྷ་རི་སྶ་ཏཱི་ཏི.
ཨེ་ཝཾ ད་ས་ཧི གཱ་ཐཱ་ཧི པུ་བྦེ ཨ་ཏྟ་ནཱ ཙི་ནྟི་ཏཱ་ཀཱ་རཾ ད་སྶེ་ཏྭཱ པུ་ན་པི ཏཾ པ་ཀཱ་ར་ནྟ་རེ་ན ད་སྶེ་ཏུཾ ‘‘དྷ་མྨ་པྤ་ཏི ཧི སོ སེ་ཊྛོ’’ཏི་ཨཱ་དི་མཱ་ཧ. ཏ་ཏྠ དྷ་མྨ་པྤ་ཏཱིཏི དྷ་མྨ་ནི་མི་ཏྟཾ དྷ་མྨ་ཧེ་ཏུ. ཧཱིཏི ནི་པཱ་ཏ་མ་ཏྟཾ. སོ སེ་ཊྛོཏི སོ པུ་གྒ་ལོ ཨུ་ཏྟ་མོ. ཝི་ས་དོ་ས་པྤ་ཝཱ་ཧ་ཀོཏི ཡོ མ་ཡ྄ཧཾ རཱ་གཱ་དི་ཀི་ལེ་ས་སྶ པ་ཝཱ་ཧ་ཀོ ཨུ་ཙྪི་ནྣ་ཀོ. ག་མྦྷཱི་རེ པ་ཏི་ཏ་སྶ མེ, ཐ་ལཾ པཱ་ཎི་ཉྩ ད་སྶ་ཡེཏི ཀོ ནུ ཁོ ཨ་ཏི་ག་མྦྷཱི་རེ སཾ་སཱ་ར་མ་ཧོ་གྷེ པ་ཏི་ཏ་སྶ མ་ཡ྄ཧཾ ‘‘མཱ བྷཱ་ཡཱི’’ཏི ཨ་སྶཱ་སེ་ནྟོ ནི་བྦཱ་ན་ཐ་ལཾ ཏཾ་ས་མྤཱ་པ་ཀཾ ཨ་རི་ཡ་མ་གྒ་ཧ་ཏྠ་ཉྩ ད་སྶེ་ཡྻ.
ར་ཧ་དེ་ཧ་མ་སྨི ཨོ་གཱ་ལ༹ྷོཏི མ་ཧ་ཏི སཾ་སཱ་ར་ར་ཧ་དེ ཨ་ཧ་མ་སྨི ས་སཱི་སཾ ནི་མུ་ཛྫ་ན་ཝ་སེ་ན ཨོ་ཏི་ཎྞོ ཨ་ནུ་པ་ཝི་ཊྛོ. ཨ་ཧཱ་རི་ཡ་ར་ཛ་མ་ཏྟི་ཀེཏི ཨ་པ་ནེ་ཏུཾ ཨ་ས་ཀྐུ་ཎེ་ཡྻོ རཱ་གཱ་དི་ར་ཛོ མ་ཏྟི་ཀཱ ཀ་དྡ་མོ ཨེ་ཏ་སྶཱ་ཏི ཨ་ཧཱ་རི་ཡ་ར་ཛ་མ་ཏྟི་ཀོ, ར་ཧ་དོ. ཏ་སྨིཾ ར་ཧ་ད་སྨིཾ. ‘‘ཨ་ཧཱ་རི་ཡ་ར་ཛ་མ་ནྟི་ཀེ’’ཏི ཝཱ པཱ་ཋོ, ཨ་ནྟི་ཀེ ཋི་ཏ་རཱ་གཱ་དཱི་སུ དུ་ནྣཱི་ཧ་ར་ཎཱི་ཡ་རཱ་གཱ་དི་ར་ཛེ་ཏི ཨ་ཏྠོ. ས་ནྟ་དོ་ས་པ་ཊི་ཙྪཱ་ད་ན་ལ་ཀྑ་ཎཱ མཱ་ཡཱ, པ་ར་ས་མྤ་ཏྟི་ཨ་ས་ཧ་ན་ལ་ཀྑ་ཎཱ ཨུ་སཱུ་ཡཱ, ཀ་ར་ཎུ་ཏྟ་རི་ཡ་ཀ་ར་ཎ་ལ་ཀྑ་ཎོ སཱ་ར་མྦྷོ, ཙི་ཏྟཱ་ལ་སི་ཡ་ལ་ཀྑ་ཎཾ ཐི་ནཾ, ཀཱ་ཡཱ་ལ་སི་ཡ་ལ་ཀྑ་ཎཾ མི་དྡྷནྟི ཨི་མེ པཱ་པ་དྷ་མྨཱ པ་ཏྠ་ཊཱ ཡཾ ར་ཧ་དཾ, ཏ་སྨིཾ མཱ་ཡཱ་ཨུ་སཱུ་ཡ་སཱ་ར་མྦྷ་ཐི་ན་མི་དྡྷ་མ་པ་ཏྠ་ཊེ, མ་ཀཱ་རོ ཙེ་ཏྠ པ་ད་ས་ནྡྷི་ཀ་རོ ཝུ་ཏྟོ. ཡ་ཐཱ་ཝུ་ཏྟེ་ཧི ཨི་མེ་ཧི པཱ་པ་དྷ་མྨེ་ཧི པ་ཏྠ་ཊེ་ཏི ཨ་ཏྠོ.
ཨུ་དྡྷ་ཙྩ་མེ་གྷ་ཐ་ནི་ཏཾ, སཾ་ཡོ་ཛ་ན་ཝ་ལཱ་ཧ་ཀནྟི ཝ་ཙ་ན་ཝི་པ་ལླཱ་སེ་ན ཝུ་ཏྟཾ, བྷ་ནྟ་ས་བྷཱ་ཝཾ ཨུ་དྡྷ་ཙྩཾ མེ་གྷ་ཐ་ནི་ཏཾ མེ་གྷ་ག་ཛྫི་ཏཾ ཨེ་ཏེ་ས་ནྟི ཨུ་དྡྷ་ཙྩ་མེ་གྷ་ཐ་ནི་ཏཱ. ད་ས་ཝི་དྷཱ སཾ་ཡོ་ཛ་ནཱ ཨེ་ཝ ཝ་ལཱ་ཧ་ཀཱ ཨེ་ཏེ་ས་ནྟི སཾ་ཡོ་ཛ་ན་ཝ་ལཱ་ཧ་ཀཱ. ཝཱ་ཧཱ མ་ཧཱ་ཨུ་ད་ཀ་ཝཱ་ཧ་ས་དི་སཱ རཱ་ག་ནི་སྶི་ཏཱ མི་ཙྪཱ་ས་ངྐ་པྤཱ ཨ་སུ་བྷཱ་དཱི་སུ ཋི་ཏཱ ཀུ་དྡི་ཊྛིཾ མཾ ཝ་ཧ་ནྟི ཨ་པཱ་ཡ་ས་མུ་དྡ་མེ་ཝ ཨུ་དྡི་སྶ ཀ་ཌྜྷ་ནྟཱི་ཏི ཨ་ཏྠོ.
ས་ཝ་ནྟི ས་བྦ་དྷི སོ་ཏཱཏི ཏ་ཎྷཱ་སོ་ཏོ, དི་ཊྛི་སོ་ཏོ, མཱ་ན་སོ་ཏོ, ཨ་ཝི་ཛྫཱ་སོ་ཏོ, ཀི་ལེ་ས་སོ་ཏོ་ཏི ཨི་མེ པ་ཉྩ་པི་སོ་ཏཱ ཙ་ཀྑུ་དྭཱ་རཱ་དཱི་ནཾ ཝ་སེ་ན ས་བྦེ་སུ རཱུ་པཱ་དཱི་སུ ཨཱ་ར་མྨ་ཎེ་སུ ས་ཝ་ན་ཏོ ‘‘རཱུ་པ་ཏ་ཎྷཱ…པེ… དྷ་མྨ་ཏ་ཎྷཱ’’ཏི་ཨཱ་དི་ནཱ (ཝི་བྷ. ༢༠༤, ༢༣༢) ས་བྦ་བྷཱ་གེ་ཧི ཝཱ ས་ཝ་ན་ཏོ ས་བྦ་དྷི ས་ཝ་ནྟི. ལ་ཏཱཏི པ་ལི་ཝེ་ཋ་ན་ཊྛེ་ན སཾ་སི་བྦ་ན་ཊྛེ་ན ལ་ཏཱ ཝི་ཡཱ་ཏི ལ་ཏཱ, ཏ་ཎྷཱ. ཨུ་བྦྷི་ཛྫ ཏི་ཊྛ་ཏཱིཏི ཚ་ཧི དྭཱ་རེ་ཧི ཨུ་བྦྷི་ཛྫི་ཏྭཱ རཱུ་པཱ་དཱི་སུ ཨཱ་ར་མྨ་ཎེ་སུ ཏི་ཊྛ་ཏི. ཏེ སོ་ཏེཏི ཏ་ཎྷཱ་དི་ཀེ སོ་ཏེ མ་མ ས་ནྟཱ་ནེ ས་ནྡ་ནྟེ མ་གྒ་སེ་ཏུ་བ་ནྡྷ་ནེ་ན ཀོ པུ་རི་ས་ཝི་སེ་སོ ནི་ཝཱ་རེ་ཡྻ, ཏཾ ལ་ཏནྟི ཏ་ཎྷཱ་ལ་ཏཾ, མ་གྒ་ས་ཏྠེ་ན ཀོ ཚེ་ཙྪ་ཏི ཚི་ནྡི་སྶ་ཏི.
ཝེ་ལཾ ཀ་རོ་ཐཱཏི ཏེ་སཾ སོ་ཏཱ་ནཾ ཝེ་ལཾ སེ་ཏུཾ ཀ་རོ་ཐ ས་ནྣི་ཝཱ་ར་ཎཾ. བྷ་དྡ་ནྟེཏི ཨཱ་ལ་པ་ནཱ་ཀཱ་ར་ད་སྶ་ནཾ. མཱ ཏེ མ་ནོ་མ་ཡོ སོ་ཏོཏི ཨུ་ད་ཀ་སོ་ཏོ ཨོ་ལཱ༹་རི་ཀོ, ཏ་སྶ བཱ་ལ་མ་ཧཱ་ཛ་ནེ་ན་པི སེ་ཏུཾ ཀ་ཏྭཱ ནི་ཝཱ་ར་ཎཾ ས་ཀྐཱ. ཨ་ཡཾ པ་ན མ་ནོ་མ་ཡོ སོ་ཏོ སུ་ཁུ་མོ དུ་ནྣི་ཝཱ་ར་ཎོ. སོ ཡ་ཐཱ ཨུ་ད་ཀ་སོ་ཏོ ཝ་ཌྜྷ་ནྟོ ཀཱུ་ལེ ཋི་ཏཾ རུ་ཀྑཾ པཱ་ཏེ་ཏྭཱ་ཝ ནཱ་སེ་ཏི, ཨེ་ཝཾ ཏུ་མྷེ ཨ་པཱ་ཡ་ཏཱི་རེ ཋི་ཏེ ཏ་ཏྠ ས་ཧ་སཱ པཱ་ཏེ་ཏྭཱ ཨ་པཱ་ཡ་ས་མུ་དྡཾ པཱ་པེ་ནྟོ མཱ ལུ་ཝེ མཱ ཝི་ནཱ་སེ་ཡྻ མཱ ཨ་ན་ཡ་བྱ་ས་ནཾ པཱ་པེ་ཡྻཱ་ཏི ཨ་ཏྠོ.
ཨེ་ཝཾ ཨ་ཡཾ ཐེ་རོ པུ་རི་མ་ཏྟ་བྷཱ་ཝེ པ་རི་མ་དྡི་ཏ་ས་ངྑཱ་ར་ཏྟཱ ཉཱ་ཎ་པ་རི་པཱ་ཀཾ ག་ཏ་ཏྟཱ པ་ཝ་ཏྟི་དུ་ཀྑཾ ཨུ་པ་དྷཱ་རེ་ནྟོ ཡ་ཐཱ ཝི་ཙི་ཀི་ཙྪཱ་དི་ཀེ སཾ་ཀི་ལེ་ས་དྷ་མྨེ པ་རི་གྒ་ཎྷི, ཏ་མཱ་ཀཱ་རཾ ད་སྶེ་ཏྭཱ ཨི་དཱ་ནི ཛཱ་ཏ་སཾ་ཝེ་གོ ཀིཾ་ཀུ་ས་ལ་ག་ཝེ་སཱི ས་ཏྠུ ས་ནྟི་ཀཾ ག་ཏོ ཡཾ ཝི་སེ་སཾ ཨ་དྷི་མུ་ཙྩི, ཏཾ ད་སྶེ་ནྟོ ‘‘ཨེ་ཝཾ མེ བྷ་ཡ་ཛཱ་ཏ་སྶཱ’’ཏི་ཨཱ་དི་མཱ་ཧ. ཏ་ཏྠ ཨེ་ཝཾ མེ བྷ་ཡ་ཛཱ་ཏ་སྶཱཏི ཨེ་ཝཾ ཝུ་ཏྟ་པྤ་ཀཱ་རེ་ན སཾ་སཱ་རེ ཛཱ་ཏ་བྷ་ཡ་སྶ ཨ་པཱ་རཱ ཨོ་རི་མ་ཏཱི་ར་ཏོ ས་པྤ་ཊི་བྷ་ཡ་ཏོ སཾ་སཱ་ར་ཝ་ཊྚ་ཏོ ‘‘ཀ་ཐཾ ནུ ཁོ མུ་ཉྩེ་ཡྻ’’ནྟི པཱ་རཾ ནི་བྦཱ་ནཾ, ཨེ་ས་ཏོ ག་ཝེ་ས་ཏོ, ཏཱ་ཎོ ས་དེ་ཝ་ཀ་སྶ ལོ་ཀ་སྶ ཏཱ་ཎ་བྷཱུ་ཏོ ཀི་ལེ་ས་ས་མུ་ཙྪེ་ད་ནཱི པ་ཉྙཱ ཨཱ་ཝུ་དྷོ ཨེ་ཏ་སྶཱ་ཏི པ་ཉྙཱ་ཝུ་དྷོ. དི་ཊྛ་དྷ་མྨི་ཀཱ་དི་ཨ་ཏྠེ་ན ས་ཏྟཱ་ནཾ ཡ་ཐཱ་ར་ཧཾ ཨ་ནུ་སཱ་ས་ན་ཏོ ས་ཏྠཱ, ཨི་སི་ས་ངྒྷེ་ན ཨ་གྒ་སཱ་ཝ་ཀཱ་དི་ཨ་རི་ཡ་པུ་གྒ་ལ་ས་མཱུ་ཧེ་ན ནི་སེ་ཝི་ཏོ པ་ཡི་རུ་པཱ་སི་ཏོ ཨི་སི་ས་ངྒྷ་ནི་སེ་ཝི་ཏོ, སོ་པཱ་ནནྟི དེ་ས་ནཱ་ཉཱ་ཎེ་ན སུ་ཊྛུ ཀ་ཏ་ཏྟཱ ཨ་བྷི་ས་ངྑ་ཏ་ཏྟཱ སུ་ཀ་ཏཾ, ཨུ་པ་ཀྐི་ལེ་ས་ཝི་ར་ཧི་ཏ་ཏོ སུ་དྡྷཾ, ས་དྡྷཱ་པ་ཉྙཱ་དི་སཱ་ར་བྷཱུ་ཏཾ དྷ་མྨ་སཱ་ར་མ་ཡཾ པ་ཊི་པ་ཀྑེ་ཧི ཨ་ཙ་ལ་ནཱི་ཡ་ཏོ ད་ལ༹ྷཾ, ཝི་པ་སྶ་ནཱ་ས་ངྑཱ་ཏཾ སོ་པཱ་ནཾ མ་ཧོ་གྷེ་ན ཝུ་ཡ྄ཧ་མཱ་ན་སྶ མ་ཡ྄ཧཾ ས་ཏྠཱ པཱ་དཱ་སི, ད་ད་ནྟོ ཙ ‘‘ཨི་མི་ནཱ ཏེ སོ་ཏྠི བྷ་ཝི་སྶ་ཏཱི’’ཏི ས་མ་སྶཱ་སེ་ནྟོ མཱ བྷཱ་ཡཱི་ཏི ཙ ཨ་བྲ་ཝི, ཀ་ཐེ་སི.
ས་ཏི་པ་ཊྛཱ་ན་པཱ་སཱ་དནྟི ཏེ་ན ཝི་པ་སྶ་ནཱ་སོ་པཱ་ནེ་ན ཀཱ་ཡཱ་ནུ་པ་སྶ་ནཱ་དི་ནཱ ལ་དྡྷ་བྦ་ཙ་ཏུ་བྦི་དྷ་སཱ་མ་ཉྙ་ཕ་ལ་ཝི་སེ་སེ་ན ཙ་ཏུ་བྷཱུ་མི་ས་མྤ་ནྣཾ ས་ཏི་པ་ཊྛཱ་ན་པཱ་སཱ་དཾ ཨཱ་རུ་ཧི་ཏྭཱ པ་ཙྩ་ཝེ་ཀྑི་སཾ ཙ་ཏུ་ས་ཙྩ་དྷ་མྨཾ མ་གྒ་ཉཱ་ཎེ་ན པ་ཏི་ཨ་ཝེ་ཀྑིཾ པ་ཊི་ཝི་ཛ྄ཛྷིཾ. ཡཾ ཏཾ པུ་བྦེ ཨ་མ་ཉྙི་སྶཾ, ས་ཀྐཱ་ཡཱ་བྷི་ར་ཏཾ པ་ཛནྟི ཨེ་ཝཾ པ་ཊི་ཝི་དྡྷ་ས་ཙྩོ ཡཾ ས་ཀྐཱ་ཡེ ‘‘ཨ་ཧཾ མ་མཱ’’ཏི ཨ་བྷི་ར་ཏཾ པ་ཛཾ ཏི་ཏྠི་ཡ་ཛ་ནཾ ཏེ་ན པ་རི་ཀ་པྤི་ཏ་ཨ་ཏྟཱ་ན་ཉྩ པུ་བྦེ སཱ་ར་ཏོ ཨ་མ་ཉྙི་སྶཾ. ཡ་དཱ ཙ མ་གྒ་མ་དྡ་ཀྑིཾ, ནཱ་ཝཱ་ཡ ཨ་བྷི་རཱུ་ཧ་ནནྟི ཨ་རི་ཡ་མ་གྒ་ནཱ་ཝཱ་ཡ ཨ་བྷི་རུ་ཧ་ནཱུ་པཱ་ཡ་བྷཱུ་ཏཾ ཡ་དཱ ཝི་པ་སྶ་ནཱ་མ་གྒཾ ཡཱ་ཐཱ་ཝ་ཏོ ཨ་དྡ་ཀྑིཾ. ཏ་ཏོ པ་ཊྛཱ་ཡ ཏཾ ཏི་ཏྠི་ཡ་ཛ་ནཾ ཨ་ཏྟཱ་ན་ཉྩ ཨ་ན་དྷི་ཊྛཱ་ཡ ཙི་ཏྟེ ཨ་ཊྛ་པེ་ཏྭཱ ཨ་གྒ་ཧེ་ཏྭཱ ཏི་ཏྠཾ ནི་བྦཱ་ན་ས་ངྑཱ་ཏ་སྶ ཨ་མ་ཏ་མ་ཧཱ་པཱ་ར་སྶ ཏི་ཏྠ་བྷཱུ་ཏཾ ཨ་རི་ཡ་མ་གྒ་ད་སྶ་ནཾ ས་བྦེ་ཧི མ་གྒེ་ཧི ས་བྦེ་ཧི ཀུ་ས་ལ་དྷ་མྨེ་ཧི ཨུ་ཀྐ་ཊྛཾ ཨ་དྡ་ཀྑིཾ, ཡཱ་ཐཱ་ཝ་ཏོ ཨ་པ་སྶི་ནྟི ཨ་ཏྠོ.
ཨེ་ཝཾ ཨ་ཏྟ་ནོ ཨ་ནུ་ཏྟ་རཾ མ་གྒཱ་དྷི་ག་མཾ པ་ཀཱ་སེ་ཏྭཱ ཨི་དཱ་ནི ཏ་སྶ དེ་ས་ཀཾ ས་མྨཱ་ས་མྦུ་དྡྷཾ ཐོ་མེ་ནྟོ ‘‘ས་ལླཾ ཨ་ཏྟ་ས་མུ་ཊྛཱ་ན’’ནྟི་ཨཱ་དི་མཱ་ཧ. ཏ་ཏྠ ས་ལླནྟི དི་ཊྛི་མཱ་ནཱ་དི་ཀི་ལེ་ས་ས་ལླཾ. ཨ་ཏྟ་ས་མུ་ཊྛཱ་ནནྟི ‘‘ཨ་ཧ’’ནྟི མཱ་ན་ཊྛཱ་ན་ཏཱ་ཡ ‘‘ཨ་ཏྟཱ’’ཏི ཙ ལ་དྡྷ་ནཱ་མེ ཨ་ཏྟ་བྷཱ་ཝེ ས་མྦྷཱུ་ཏཾ. བྷ་ཝ་ནེ་ཏྟི་པྤ་བྷཱ་ཝི་ཏནྟི བྷ་ཝ་ཏ་ཎྷཱ་ས་མུ་ཊྛི་ཏཾ བྷ་ཝ་ཏ་ཎྷཱ་ས་ནྣི་སྶ་ཡཾ. སཱ ཧི དི་ཊྛི་མཱ་ནཱ་དཱི་ནཾ ས་མྦྷ་ཝོ. ཨེ་ཏེ་སཾ ཨ་པྤ་ཝ་ཏྟཱ་ཡཱཏི ཡ་ཐཱ་ཝུ་ཏྟཱ་ནཾ པཱ་པ་དྷ་མྨཱ་ནཾ ཨ་པྤ་ཝ་ཏྟི་ཡཱ ཨ་ནུ་པྤཱ་དཱ་ཡ. དེ་སེ་སི མ་གྒ་མུ་ཏྟ་མནྟི ཨུ་ཏྟ་མཾ སེ་ཊྛཾ ཨ་རི་ཡཾ ཨ་ཊྛ་ངྒི་ཀཾ མ་གྒཾ, ཏ་དུ་པཱ་ཡ་ཉྩ ཝི་པ་སྶ་ནཱ་མ་གྒཾ ཀ་ཐེ་སི.
དཱི་གྷ་ར་ཏྟཱ་ནུ་ས་ཡི་ཏནྟི ཨ་ན་མ་ཏ་གྒེ སཾ་སཱ་རེ ཙི་ར་ཀཱ་ལཾ ས་ནྟཱ་ནེ ཨ་ནུ ཨ་ནུ ས་ཡི་ཏཾ ཀཱ་ར་ཎ་ལཱ་བྷེ་ན ཨུ་པྤ་ཛྫ་ནཱ་ར་ཧ་བྷཱ་ཝེ་ན ཐཱ་མ་ག་ཏཾ, ཏ་ཏོ ཙ ཙི་ར་ར་ཏྟཾ ཨ་དྷི་ཊྛི་ཏཾ ས་ནྟཱ་ནཾ ཨ་ཛ྄ཛྷཱ་རུ་ཡ྄ཧ ཋི་ཏཾ. ག་ནྠནྟི ཨ་བྷི་ཛ྄ཛྷཱ་ཀཱ་ཡ་ག་ནྠཱ་དིཾ མ་མ ས་ནྟཱ་ནེ ག་ནྠ་བྷཱུ་ཏཾ ཀི་ལེ་ས་ཝི་ས་དོ་སཾ པ་ཝཱ་ཧ་ནོ བུ་དྡྷོ བྷ་ག་ཝཱ ཨ་ཏྟ་ནོ དེ་ས་ནཱ་ནུ་བྷཱ་ཝེ་ན ཨ་པཱ་ནུ་དཱི པ་རི་ཛ་ཧཱ་པེ་སི, ག་ནྠེ་སུ ཧི ཨ་ན་ཝ་སེ་ས་ཏོ པ་ཧཱི་ནེ་སུ ཨ་པྤ་ཧཱི་ནོ ནཱ་མ ཀི་ལེ་སོ ན་ཏྠཱི་ཏི.
ཏེ་ལ་ཀཱ་ནི་ཏྠེ་ར་གཱ་ཐཱ་ཝ་ཎྞ་ནཱ ནི་ཊྛི་ཏཱ.