༡. ཨ་དྷི་མུ་ཏྟ་ཏྠེ་ར་གཱ་ཐཱ་ཝ་ཎྞ་ནཱ
ཝཱི་ས་ཏི་ནི་པཱ་ཏེ ཡ་ཉྙ་ཏྠཾ ཝཱཏི་ཨཱ་དི་ཀཱ ཨཱ་ཡ་སྨ་ཏོ ཨ་པ་ར་སྶ ཨ་དྷི་མུ་ཏྟ་ཏྠེ་ར་སྶ གཱ་ཐཱ. ཀཱ ཨུ་པྤ་ཏྟི? ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ པུ་ཉྙཱ་ནི ཨུ་པ་ཙི་ན་ནྟོ ཨ་ཏྠ་ད་སྶི་སྶ བྷ་ག་ཝ་ཏོ ཀཱ་ལེ ཝི་བྷ་ཝ་ས་མྤ་ནྣེ ཀུ་ལེ ནི་བྦ་ཏྟི་ཏྭཱ ཝི་ཉྙུ་ཏཾ པ་ཏྟོ ས་ཏྠ་རི པ་རི་ནི་བྦུ་ཏེ བྷི་ཀྑུ་ས་ངྒྷཾ ཨུ་པ་ཊྛ་ཧ་ནྟོ མ་ཧཱ་དཱ་ནཱ་ནི པ་ཝ་ཏྟེ་སི. སོ ཏེ་ན པུ་ཉྙ་ཀ་མྨེ་ན དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ ཨཱ་ཡ་སྨ་ཏོ སཾ་ཀི་ཙྩ་ཏྠེ་ར་སྶ བྷ་གི་ནི་ཡཱ ཀུ་ཙྪི་མྷི ནི་བྦ་ཏྟི, ཨ་དྷི་མུ་ཏྟོཏི་སྶ ནཱ་མཾ ཨ་ཧོ་སི. སོ ཝ་ཡ་པྤ་ཏྟོ མཱ་ཏུ་ལ་ཏྠེ་ར་སྶ ས་ནྟི་ཀེ པ་བྦ་ཛི་ཏྭཱ ཝི་པ་སྶ་ནཱ་ཡ ཀ་མྨཾ ཀ་རོ་ནྟོ སཱ་མ་ཎེ་ར་བྷཱུ་མི་ཡཾ་ཡེ་ཝ ཋི་ཏོ ཨ་ར་ཧ་ཏྟཾ པཱ་པུ་ཎི. ཏེ་ན ཝུ་ཏྟཾ ཨ་པ་དཱ་ནེ (ཨ་པ. ཐེ་ར ༡.༤.༨༤-༨༨) –
‘‘ནི་བྦུ་ཏེ ལོ་ཀ་ནཱ་ཐ་མྷི, ཨ་ཏྠ་ད་སྶཱི་ན་རུ་ཏྟ་མེ;
ཨུ་པ་ཊྛ་ཧིཾ བྷི་ཀྑུ་ས་ངྒྷཾ, ཝི་པྤ་ས་ནྣེ་ན ཙེ་ཏ་སཱ.
‘‘ནི་མ་ནྟེ་ཏྭཱ བྷི་ཀྑུ་ས་ངྒྷཾ, ཨུ་ཛུ་བྷཱུ་ཏཾ ས་མཱ་ཧི་ཏཾ;
ཨུ་ཙྪུ་ནཱ མ་ཎྜ་པཾ ཀ་ཏྭཱ, བྷོ་ཛེ་སིཾ ས་ངྒྷ་མུ་ཏྟ་མཾ.
‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ་མཱ་ནུ་སཾ;
ས་བྦེ ས་ཏྟེ ཨ་བྷི་བྷོ་མི, པུ་ཉྙ་ཀ་མྨ་སྶི་དཾ ཕ་ལཾ.
‘‘ཨ་ཊྛཱ་ར་སེ ཀ་པྤ་ས་ཏེ, ཡཾ དཱ་ན་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨུ་ཙྪུ་དཱ་ན་སྶི་དཾ ཕ་ལཾ.
‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ན’’ནྟི.
ཨ་ར་ཧ་ཏྟཾ པ་ན པ་ཏྭཱ ས་མཱ་པ་ཏྟི་སུ་ཁེ་ན ཝཱི་ཏི་ནཱ་མེ་ནྟོ ཨུ་པ་ས་མྤ་ཛྫི་ཏུ་ཀཱ་མོ ‘‘མཱ་ཏ་རཾ ཨཱ་པུ་ཙྪི་སྶཱ་མཱི’’ཏི མཱ་ཏུ ས་ནྟི་ཀཾ ག་ཙྪ་ནྟོ ཨ་ནྟ་རཱ་མ་གྒེ དེ་ཝ་ཏཱ་ཡ བ་ལི་ཀ་མྨ་ཀ་ར་ཎ་ཏྠཾ མཾ་ས་པ་རི་ཡེ་ས་ནཾ ཙ་ར་ནྟེ་ཧི པ་ཉྩ་ས་ཏེ་ཧི ཙོ་རེ་ཧི ས་མཱ་ག་ཙྪི. ཙོ་རཱ ཙ ཏཾ ཨ་གྒ་ཧེ་སུཾ ‘‘དེ་ཝ་ཏཱ་ཡ བ་ལི བྷ་ཝི་སྶ་ཏཱི’’ཏི. སོ ཙོ་རེ་ཧི ག་ཧི་ཏོ་པི ཨ་བྷཱི་ཏོ ཨ་ཙྪ་མྦྷཱི ཝི་པྤ་ས་ནྣ་མུ་ཁོ་ཝ ཨ་ཊྛཱ་སི. ཏཾ དི་སྭཱ ཙོ་ར་གཱ་མ་ཎི་ཨ་ཙྪ་རི་ཡ་བྦྷུ་ཏ་ཙི་ཏྟ་ཛཱ་ཏོ པ་སཾ་ས་ནྟོ –
༧༠༥. ‘‘ཡ་ཉྙ་ཏྠཾ ཝཱ དྷ་ན་ཏྠཾ ཝཱ, ཡེ ཧ་ནཱ་མ མ་ཡཾ པུ་རེ;
ཨ་ཝ་སེ་སཾ བྷ་ཡཾ ཧོ་ཏི, ཝེ་དྷ་ནྟི ཝི་ལ་པ་ནྟི ཙ.
༧༠༦. ‘‘ཏ་སྶ ཏེ ན་ཏྠི བྷཱི་ཏ་ཏྟཾ, བྷི་ཡྻོ ཝ་ཎྞོ པ་སཱི་ད་ཏི;
ཀ་སྨཱ ན པ་རི་དེ་ཝེ་སི, ཨེ་ཝ་རཱུ་པེ མ་ཧ་བྦྷ་ཡེ’’ཏི. – དྭེ གཱ་ཐཱ ཨ་བྷཱ་སི;
ཏ་ཏྠ ཡ་ཉྙ་ཏྠནྟི ཡ་ཛ་ན་ཏྠཾ དེ་ཝ་ཏཱ་ནཾ བ་ལི་ཀ་མྨ་ཀ་ར་ཎ་ཏྠཾ ཝཱ. ཝཱ-ས་དྡོ ཝི་ཀ་པྤ་ན་ཏྠོ. དྷ་ན་ཏྠནྟི སཱ་པ་ཏེ་ཡྻ་ཧ་ར་ཎ་ཏྠཾ. ཡེ ཧ་ནཱ་མ མ་ཡཾ པུ་རེཏི ཡེ ས་ཏྟེ མ་ཡཾ པུ་བྦེ ཧ་ནི་མྷ. ཨ་ཏཱི་ཏ་ཏྠེ ཧི ཨི་དཾ ཝ་ཏྟ་མཱ་ན་ཝ་ཙ་ནཾ. ཨ་ཝ་སེཏི ཨ་ཝ་སེ ཨ་སེ་རི་ཀེ ཀ་ཏྭཱ. ཏནྟི ཏེ་སཾ. ‘‘ཨ་ཝ་སེ་ས་ནྟི’’པི པ་ཋ་ནྟི. ཨ་མྷེ་ཧི ག་ཧི་ཏེ་སུ ཏཾ ཨེ་ཀཾ ཋ་པེ་ཏྭཱ ཨ་ཝ་སེ་སཱ་ནཾ; ཨ་ཡ་མེ་ཝ ཝཱ པཱ་ཋོ. བྷ་ཡཾ ཧོ་ཏཱིཏི མ་ར་ཎ་བྷ་ཡཾ ཧོ་ཏི. ཡེ་ན ཏེ ཝེ་དྷ་ནྟི ཝི་ལ་པ་ནྟི,ཙི་ཏྟུ་ཏྲཱ་སེ་ན ཝེ་དྷ་ནྟི, ‘‘སཱ་མི, ཏུ་མྷཱ་ཀཾ ཨི་ད་ཉྩི་ད་ཉྩ ད་སྶཱ་མ, དཱ་སཱ བྷ་ཝི་སྶཱ་མཱ’’ཏི་ཨཱ་དི་ཀཾ ཝ་ད་ནྟཱ ཝི་ལ་པ་ནྟི.
ཏ་སྶ ཏེཏི ཡོ ཏྭཾ ཨ་མྷེ་ཧི དེ་ཝ་ཏཱ་ཡ བ་ལི་ཀ་མྨ་ཏྠཾ ཛཱི་ཝི་ཏཱ ཝོ་རོ་པེ་ཏུ་ཀཱ་མེ་ཧི ཨུ་ཀྑི་ཏྟཱ་སི་ཀེ་ཧི ས་ནྟ་ཛྫི་ཏོ, ཏ་སྶ ཏེ. བྷཱི་ཏ་ཏྟནྟི བྷཱི་ཏ་བྷཱ་ཝོ, བྷ་ཡ་ནྟི ཨ་ཏྠོ. བྷི་ཡྻོ ཝ་ཎྞོ པ་སཱི་ད་ཏཱིཏི པ་ཀ་ཏི་ཝ་ཎྞ་ཏོ ཨུ་པ་རི་པི ཏེ མུ་ཁ་ཝ་ཎྞོ ཝི་པྤ་སཱི་ད་ཏི. ཐེ་ར་སྶ ཀི་ར ཏ་དཱ ‘‘ས་ཙེ ཨི་མེ མཱ་རེ་སྶ་ནྟི, ཨི་དཱ་ནེ་ཝཱ་ཧཾ ཨ་ནུ་པཱ་དཱ་ཡ པ་རི་ནི་བྦཱ་ཡི་སྶཱ་མི, དུ་ཀྑ་བྷཱ་རོ ཝི་ག་ཙྪི་སྶ་ཏཱི’’ཏི ཨུ་ལཱ༹་རཾ པཱི་ཏི་སོ་མ་ན་སྶཾ ཨུ་པྤ་ཛྫི. ཨེ་ཝ་རཱུ་པེ མ་ཧ་བྦྷ་ཡེཏི ཨེ་དི་སེ མ་ཧ་ཏི མ་ར་ཎ་བྷ་ཡེ ཨུ་པ་ཊྛི་ཏེ. ཧེ་ཏུ་ཨ་ཏྠེ ཝཱ ཨེ་ཏཾ བྷུ་མྨ་ཝ་ཙ་ནཾ.
ཨི་དཱ་ནི ཐེ་རོ ཙོ་ར་གཱ་མ་ཎི་སྶ པ་ཊི་ཝ་ཙ་ན་དཱ་ན་མུ་ཁེ་ན དྷ་མྨཾ དེ་སེ་ནྟོ –
༧༠༧. ‘‘ན་ཏྠི ཙེ་ཏ་སི་ཀཾ དུ་ཀྑཾ, ཨ་ན་པེ་ཀྑ་སྶ གཱ་མ་ཎི;
ཨ་ཏི་ཀྐ་ནྟཱ བྷ་ཡཱ ས་བྦེ, ཁཱི་ཎ་སཾ་ཡོ་ཛ་ན་སྶ ཝེ.
༧༠༨. ‘‘ཁཱི་ཎཱ་ཡ བྷ་ཝ་ནེ་ཏྟི་ཡཱ, དི་ཊྛེ དྷ་མྨེ ཡ་ཐཱ་ཏ་ཐེ;
ན བྷ་ཡཾ མ་ར་ཎེ ཧོ་ཏི, བྷཱ་ར་ནི་ཀྑེ་པ་ནེ ཡ་ཐཱ.
༧༠༩. ‘‘སུ་ཙི་ཎྞཾ བྲ་ཧྨ་ཙ་རི་ཡཾ མེ, མ་གྒོ ཙཱ་པི སུ་བྷཱ་ཝི་ཏོ;
མ་ར་ཎེ མེ བྷ་ཡཾ ན་ཏྠི, རོ་གཱ་ན་མི་ཝ ས་ངྑ་ཡེ.
༧༡༠. ‘‘སུ་ཙི་ཎྞཾ བྲ་ཧྨ་ཙ་རི་ཡཾ མེ, མ་གྒོ ཙཱ་པི སུ་བྷཱ་ཝི་ཏོ;
ནི་ར་སྶཱ་དཱ བྷ་ཝཱ དི་ཊྛཱ, ཝི་སཾ པི་ཏྭཱ་ཝ ཚ་ཌྜི་ཏཾ.
༧༡༡. ‘‘པཱ་ར་གཱུ ཨ་ནུ་པཱ་དཱ་ནོ, ཀ་ཏ་ཀི་ཙྩོ ཨ་ནཱ་ས་ཝོ;
ཏུ་ཊྛོ ཨཱ་ཡུ་ཀྑ་ཡཱ ཧོ་ཏི, མུ་ཏྟོ ཨཱ་གྷཱ་ཏ་ནཱ ཡ་ཐཱ.
༧༡༢. ‘‘ཨུ་ཏྟ་མཾ དྷ་མྨ་ཏཾ པ་ཏྟོ, ས་བྦ་ལོ་ཀེ ཨ་ན་ཏྠི་ཀོ;
ཨཱ་དི་ཏྟཱ་ཝ གྷ་རཱ མུ་ཏྟོ, མ་ར་ཎ་སྨིཾ ན སོ་ཙ་ཏི.
༧༡༣. ‘‘ཡ་ད་ཏྠི ས་ངྒ་ཏཾ ཀི་ཉྩི, བྷ་ཝོ ཝཱ ཡ་ཏྠ ལ་བྦྷ་ཏི;
ས་བྦཾ ཨ་ནི་སྶ་རཾ ཨེ་ཏཾ, ཨི་ཏི ཝུ་ཏྟཾ མ་ཧེ་སི་ནཱ.
༧༡༤. ‘‘ཡོ ཏཾ ཏ་ཐཱ པ་ཛཱ་ནཱ་ཏི, ཡ་ཐཱ བུ་དྡྷེ་ན དེ་སི་ཏཾ;
ན ག་ཎྷཱ་ཏི བྷ་ཝཾ ཀི་ཉྩི, སུ་ཏ་ཏྟཾ་ཝ ཨ་ཡོ་གུ་ལ༹ཾ.
༧༡༥. ‘‘ན མེ ཧོ་ཏི ‘ཨ་ཧོ་སི’ནྟི, ‘བྷ་ཝི་སྶ’ནྟི ན ཧོ་ཏི མེ;
ས་ངྑཱ་རཱ ཝི་ག་མི་སྶ་ནྟི, ཏ་ཏྠ ཀཱ པ་རི་དེ་ཝ་ནཱ.
༧༡༦. ‘‘སུ་དྡྷཾ དྷ་མྨ་ས་མུ་པྤཱ་དཾ, སུ་དྡྷཾ ས་ངྑཱ་ར་ས་ནྟ་ཏིཾ;
པ་སྶ་ནྟ་སྶ ཡ་ཐཱ་བྷཱུ་ཏཾ, ན བྷ་ཡཾ ཧོ་ཏི གཱ་མ་ཎི.
༧༡༧. ‘‘ཏི་ཎ་ཀ་ཊྛ་ས་མཾ ལོ་ཀཾ, ཡ་དཱ པ་ཉྙཱ་ཡ པ་སྶ་ཏི;
མ་མ་ཏྟཾ སོ ཨ་སཾ་ཝི་ནྡཾ, ‘ན་ཏྠི མེ’ཏི ན སོ་ཙ་ཏི.
༧༡༨. ‘‘ཨུ་ཀྐ་ཎྛཱ་མི ས་རཱི་རེ་ན, བྷ་ཝེ་ན་མྷི ཨ་ན་ཏྠི་ཀོ;
སོ་ཡཾ བྷི་ཛྫི་སྶ་ཏི ཀཱ་ཡོ, ཨ་ཉྙོ ཙ ན བྷ་ཝི་སྶ་ཏི.
༧༡༩. ‘‘ཡཾ ཝོ ཀི་ཙྩཾ ས་རཱི་རེ་ན, ཏཾ ཀ་རོ་ཐ ཡ་དི་ཙྪ་ཐ;
ན མེ ཏ་པྤ་ཙྩ་ཡཱ ཏ་ཏྠ, དོ་སོ པེ་མ་ཉྩ ཧེ་ཧི་ཏཱི’’ཏི. –
ཨི་མཱ གཱ་ཐཱ ཨ་བྷཱ་སི.
༧༢༠. ‘‘ཏ་སྶ ཏཾ ཝ་ཙ་ནཾ སུ་ཏྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
ས་ཏྠཱ་ནི ནི་ཀྑི་པི་ཏྭཱ་ན, མཱ་ཎ་ཝཱ ཨེ་ཏ་ད་བྲ་ཝུ’’ནྟི. –
ཨ་ཡཾ ས་ངྒཱི་ཏི་ཀཱ་རེ་ཧི ཝུ་ཏྟ་གཱ་ཐཱ. ཨི་ཏོ ཨ་པ་རཱ ཏི་སྶོ ཙོ་རཱ་ནཾ, ཐེ་ར་སྶ ཙ ཝ་ཙ་ན་པ་ཊི་ཝ་ཙ་ན་གཱ་ཐཱ –
༧༢༡. ‘‘ཀིཾ བྷ་ད་ནྟེ ཀ་རི་ཏྭཱ་ན, ཀོ ཝཱ ཨཱ་ཙ་རི་ཡོ ཏ་ཝ;
ཀ་སྶ སཱ་ས་ན་མཱ་ག་མྨ, ལ་བྦྷ་ཏེ ཏཾ ཨ་སོ་ཀ་ཏཱ.
༧༢༢. ‘‘ས་བྦ་ཉྙཱུ ས་བྦ་ད་སྶཱ་ཝཱི, ཛི་ནོ ཨཱ་ཙ་རི་ཡོ མ་མ;
མ་ཧཱ་ཀཱ་རུ་ཎི་ཀོ ས་ཏྠཱ, ས་བྦ་ལོ་ཀ་ཏི་ཀི་ཙྪ་ཀོ.
༧༢༣. ‘‘ཏེ་ནཱ་ཡཾ དེ་སི་ཏོ དྷ་མྨོ, ཁ་ཡ་གཱ་མཱི ཨ་ནུ་ཏྟ་རོ;
ཏ་སྶ སཱ་ས་ན་མཱ་ག་མྨ, ལ་བྦྷ་ཏེ ཏཾ ཨ་སོ་ཀ་ཏཱ.
༧༢༤. ‘‘སུ་ཏྭཱ་ན ཙོ་རཱ ཨི་སི་ནོ སུ་བྷཱ་སི་ཏཾ, ནི་ཀྑི་པྤ ས་ཏྠཱ་ནི ཙ ཨཱ་ཝུ་དྷཱ་ནི ཙ;
ཏ་མྷཱ ཙ ཀ་མྨཱ ཝི་ར་མིཾ་སུ ཨེ་ཀེ, ཨེ་ཀེ ཙ པ་བྦ་ཛྫ་མ་རོ་ཙ་ཡིཾ་སུ.
༧༢༥. ‘‘ཏེ པ་བྦ་ཛི་ཏྭཱ སུ་ག་ཏ་སྶ སཱ་ས་ནེ, བྷཱ་ཝེ་ཏྭ བོ་ཛ྄ཛྷ་ངྒ་བ་ལཱ་ནི པ་ཎྜི་ཏཱ;
ཨུ་ད་གྒ་ཙི་ཏྟཱ སུ་མ་ནཱ ཀ་ཏི་ནྡྲི་ཡཱ, ཕུ་སིཾ་སུ ནི་བྦཱ་ན་པ་དཾ ཨ་ས་ངྑ་ཏ’’ནྟི. –
ཨི་མཱ་པི ས་ངྒཱི་ཏི་ཀཱ་རེ་ཧི ཝུ་ཏྟ་གཱ་ཐཱ.
ཏ་ཏྠ ན་ཏྠི ཙེ་ཏ་སི་ཀཾ དུ་ཀྑཾ, ཨ་ན་པེ་ཀྑ་སྶ, གཱ་མ་ཎཱིཏི གཱ་མ་ཎི, ཨ་པེ་ཀྑཱ་ཡ, ཏ་ཎྷཱ་ཡ, ཨ་བྷཱ་ཝེ་ན ཨ་ན་པེ་ཀྑ་སྶ མཱ་དི་ས་སྶ, ལོ་ཧི་ཏ་ས་བྷཱ་ཝོ པུ་བྦོ ཝི་ཡ, ཙེ་ཏ་སི་ཀཾ དུ་ཀྑཾ དོ་མ་ན་སྶཾ ན་ཏྠི, དོ་མ་ན་སྶཱ་བྷཱ་ཝཱ་པ་དེ་སེ་ན བྷ་ཡཱ་བྷཱ་ཝཾ ཝ་ད་ཏི. ཏེ་ནཱ་ཧ ‘‘ཨ་ཏི་ཀྐ་ནྟཱ བྷ་ཡཱ ས་བྦེ’’ཏི. ཨ་ཏི་ཀྐ་ནྟཱ བྷ་ཡཱ ས་བྦེཏི ཁཱི་ཎ་སཾ་ཡོ་ཛ་ན་སྶ ཨ་ར་ཧ་ཏོ པ་ཉྩ་ཝཱི་ས་ཏི མ་ཧཱ་བྷ་ཡཱ, ཨ་ཉྙེ ཙ ས་བྦེ་པི བྷ་ཡཱ ཨེ་ཀཾ་སེ་ན ཨ་ཏི་ཀྐ་ནྟཱ ཨ་ཏཱི་ཏཱ, ཨ་པ་ག་ཏཱ་ཏི ཨ་ཏྠོ.
དི་ཊྛེ དྷ་མྨེ ཡ་ཐཱ་ཏ་ཐེཏི ཙ་ཏུ་ས་ཙྩ་དྷ་མྨེ པ་རི་ཉྙཱ་པ་ཧཱ་ན་ས་ཙྪི་ཀི་རི་ཡ་བྷཱ་ཝ་ནཱ་ཝ་སེ་ན མ་གྒ་པ་ཉྙཱ་ཡ ཡ་ཐཱ་བྷཱུ་ཏཾ དི་ཊྛེ. མ་ར་ཎེཏི མ་ར་ཎ་ཧེ་ཏུ. བྷཱ་ར་ནི་ཀྑེ་པ་ནེ ཡ་ཐཱཏི ཡ་ཐཱ ཀོ་ཙི པུ་རི་སོ སཱི་སེ ཋི་ཏེ་ན མ་ཧ་ཏཱ ག་རུ་བྷཱ་རེ་ན སཾ་སཱི་ད་ནྟོ ཏ་སྶ ནི་ཀྑེ་པ་ནེ, ཨ་པ་ན་ཡ་ནེ ན བྷཱ་ཡ་ཏི, ཨེ་ཝཾ ས་མྤ་ད་མི་ད་ནྟི ཨ་ཏྠོ. ཝུ་ཏྟ་ཉྷེ་ཏཾ བྷ་ག་ཝ་ཏཱ –
‘‘བྷཱ་རཱ ཧ་ཝེ པ་ཉྩ་ཀྑ་ནྡྷཱ, བྷཱ་ར་ཧཱ་རོ ཙ པུ་གྒ་ལོ;
བྷཱ་རཱ་དཱ་ནཾ དུ་ཁཾ ལོ་ཀེ, བྷཱ་ར་ནི་ཀྑེ་པ་ནཾ སུ་ཁ’’ནྟི. (སཾ. ནི. ༣.༢༢);
སུ་ཙི་ཎྞནྟི སུ་ཊྛུ ཙ་རི་ཏཾ. བྲ་ཧྨ་ཙ་རི་ཡནྟི, སི་ཀྑ་ཏྟ་ཡ་ས་ངྒ་ཧཾ སཱ་ས་ན་བྲ་ཧྨ་ཙ་རི་ཡཾ. ཏ་ཏོ ཨེ་ཝ མ་གྒོ ཙཱ་པི སུ་བྷཱ་ཝི་ཏོ ཨ་ཊྛ་ངྒི་ཀོ ཨ་རི་ཡ་མ་གྒོ་པི ས་མྨ་དེ་ཝ བྷཱ་ཝི་ཏོ. རོ་གཱ་ན་མི་ཝ ས་ངྑ་ཡེཏི ཡ་ཐཱ བ་ཧཱུ་ཧི རོ་གེ་ཧི ཨ་བྷི་བྷཱུ་ཏ་སྶ ཨཱ་ཏུ་ར་སྶ རོ་གཱ་ནཾ ས་ངྑ་ཡེ པཱི་ཏི་སོ་མ་ན་སྶ་མེ་ཝ ཧོ་ཏི, ཨེ་ཝཾ ཁ་ནྡྷ་རོ་ག་ས་ངྑ་ཡེ མ་ར་ཎེ མཱ་དི་ས་སྶ བྷ་ཡཾ ན་ཏྠི.
ནི་ར་སྶཱ་དཱ བྷ་ཝཱ དི་ཊྛཱཏི ཏཱི་ཧི དུ་ཀྑ་ཏཱ་ཧི ཨ་བྷི་བྷཱུ་ཏཱ, ཨེ་ཀཱ་ད་ས་ཧི ཨ་གྒཱི་ཧི ཨཱ་དི་ཏྟཱ, ཏ་ཡོ བྷ་ཝཱ ནི་ར་སྶཱ་དཱ, ཨ་སྶཱ་ད་ར་ཧི་ཏཱ, མ་ཡཱ དི་ཊྛཱ. ཝི་སཾ པི་ཏྭཱ་ཝ ཚ་ཌྜི་ཏནྟི པ་མཱ་ད་ཝ་སེ་ན ཝི་སཾ པི་ཝི་ཏྭཱ ཏཱ་དི་སེ་ན པ་ཡོ་གེ་ན ཚ་ཌྜི་ཏཾ ཝི་ཡ མ་ར་ཎེ མེ བྷ་ཡཾ ན་ཏྠཱི་ཏི ཨ་ཏྠོ.
མུ་ཏྟོ ཨཱ་གྷཱ་ཏ་ནཱ ཡ་ཐཱཏི ཡ་ཐཱ ཙོ་རེ་ཧི མཱ་ར་ཎ་ཏྠཾ ཨཱ་གྷཱ་ཏ་ནཾ ནཱི་ཏོ ཀེ་ན་ཙི ཨུ་པཱ་ཡེ་ན ཏ་ཏོ མུ་ཏྟོ ཧ་ཊྛ་ཏུ་ཊྛོ ཧོ་ཏི, ཨེ་ཝཾ སཾ་སཱ་ར་པཱ་རཾ, ནི་བྦཱ་ནཾ, ག་ཏ་ཏྟཱ པཱ་ར་གཱུ, ཙ་ཏཱུ་ཧི་པི ཨུ་པཱ་དཱ་ནེ་ཧི ཨ་ནུ་པཱ་དཱ་ནོ, པ་རི་ཉྙཱ་དཱི་ནཾ སོ་ལ༹་ས་ནྣཾ ཀི་ཙྩཱ་ནཾ ཀ་ཏ་ཏྟཱ ཀ་ཏ་ཀི་ཙྩོ ཀཱ་མཱ་ས་ཝཱ་དཱི་ཧི ཨ་ནཱ་ས་ཝོ, ཨཱ་ཡུ་ཀྑ་ཡཱ ཨཱ་ཡུ་ཀྑ་ཡ་ཧེ་ཏུ ཏུ་ཊྛོ སོ་མ་ན་སྶི་ཀོ ཧོ་ཏི.
ཨུ་ཏྟ་མནྟི སེ་ཊྛཾ. དྷ་མྨ་ཏནྟི, དྷ་མྨ་ས་བྷཱ་ཝཾ. ཨ་ར་ཧ་ཏྟེ སི་དྡྷེ སི་ཛ྄ཛྷ་ན་ཧེ་ཏུ ཨི་ཊྛཱ་དཱི་སུ ཏཱ་དི་བྷཱ་ཝཾ. ས་བྦ་ལོ་ཀེཏི ས་བྦ་ལོ་ཀ་སྨི་མྤི, དཱི་གྷཱ་ཡུ་ཀ་སུ་ཁ་བ་ཧུ་ལ་ཏཱ་དི་ཝ་སེ་ན སཾ་ཡུ་ཏྟེ་པི ལོ་ཀེ. ཨ་ན་ཏྠི་ཀོཏི, ཨ་ན་པེ་ཀྑོ. ཨཱ་དི་ཏྟཱ་ཝ གྷ་རཱ མུ་ཏྟོཏི ཡ་ཐཱ ཀོ་ཙི པུ་རི་སོ ས་མ་ནྟ་ཏོ ཨཱ་དི་ཏྟ་ཏོ པ་ཛྫ་ལི་ཏ་ཏོ གེ་ཧ་ཏོ ནི་སྶ་ཊོ, ཏ་ཏོ ནི་སྶ་ར་ཎ་ནི་མི་ཏྟཾ ན སོ་ཙ་ཏི, ཨེ་ཝཾ ཁཱི་ཎཱ་ས་ཝོ མ་ར་ཎ་ནི་མི་ཏྟཾ ན སོ་ཙ་ཏི.
ཡ་ད་ཏྠི ས་ངྒ་ཏཾ ཀི་ཉྩཱིཏི ཡཾ་ཀི་ཉྩི ཨི་མ་སྨིཾ ལོ་ཀེ ཨ་ཏྠི, ཝི་ཛྫ་ཏི, ཨུ་པ་ལ་བྦྷ་ཏི ས་ངྒ་ཏཾ, ས་ཏྟེ་ཧི ས་ངྑཱ་རེ་ཧི ཝཱ ས་མཱ་ག་མོ, ས་མོ་དྷཱ་ནཾ. ‘‘ས་ངྑ་ཏ’’ནྟི་པི པཱ་ཋོ, ཏ་སྶ ཡཾ་ཀི་ཉྩི པ་ཙྩ་ཡེ་ཧི ས་མ་ཙྩ ས་མྦྷུ་ཡྻ ཀ་ཏཾ, པ་ཊི་ཙྩ་ས་མུ་པྤ་ནྣ་ནྟི ཨ་ཏྠོ. བྷ་ཝོ ཝཱ ཡ་ཏྠ ལ་བྦྷ་ཏཱིཏི ཡ་སྨིཾ ས་ཏྟ་ནི་ཀཱ་ཡེ ཡོ ཨུ་པ་པ་ཏྟི་བྷ་ཝོ ལ་བྦྷ་ཏི. ས་བྦཾ ཨ་ནི་སྶ་རཾ ཨེ་ཏནྟི ས་བྦ་མེ་ཏཾ ཨི་སྶ་ར་ར་ཧི་ཏཾ, ན ཨེ་ཏྠ ཀེ་ན་ཙི ‘‘ཨེ་ཝཾ ཧོ་ཏཱུ’’ཏི ཨི་སྶ་རི་ཡཾ ཝ་ཏྟེ་ཏུཾ ས་ཀྐཱ. ཨི་ཏི ཝུ་ཏྟཾ མ་ཧེ་སི་ནཱཏི ‘‘ས་བྦེ དྷ་མྨཱ ཨ་ན་ཏྟཱ’’ཏི ཨེ་ཝཾ ཝུ་ཏྟཾ མ་ཧེ་སི་ནཱ ས་མྨཱ་ས་མྦུ་དྡྷེ་ན. ཏ་སྨཱ ‘‘ཨ་ནི་སྶ་རཾ ཨེ་ཏ’’ནྟི པ་ཛཱ་ན་ནྟོ མ་ར་ཎ་སྨིཾ ན སོ་ཙ་ཏཱི་ཏི ཡོ་ཛ་ནཱ.
ན ག་ཎྷཱ་ཏི བྷ་ཝཾ ཀི་ཉྩཱིཏི ཡོ ཨ་རི་ཡ་སཱ་ཝ་ཀོ ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི་ཨཱ་དི་ནཱ (དྷ. པ. ༢༧༧) ཡ་ཐཱ བུ་དྡྷེ་ན བྷ་ག་ཝ་ཏཱ དེ་སི་ཏཾ, ཏ་ཐཱ ཏཾ བྷ་ཝ་ཏྟ་ཡཾ ཝི་པ་སྶ་ནཱ་པ་ཉྙཱ་ས་ཧི་ཏཱ་ཡ མ་གྒ་པ་ཉྙཱ་ཡ པ་ཛཱ་ནཱ་ཏི. སོ ཡ་ཐཱ ཀོ་ཙི པུ་རི་སོ སུ་ཁ་ཀཱ་མོ དི་ཝ་སཾ ས་ནྟ་ཏྟཾ ཨ་ཡོ་གུ་ལ༹ཾ ཧ་ཏྠེ་ན ན ག་ཎྷཱ་ཏི, ཨེ་ཝཾ ཀི་ཉྩི ཁུ་དྡ་ཀཾ ཝཱ མ་ཧ་ནྟཾ ཝཱ བྷ་ཝཾ ན ག་ཎྷཱ་ཏི, ན ཏ་ཏྠ ཏ་ཎྷཾ ཀ་རོ་ཏཱི་ཏི ཨ་ཏྠོ.
ན མེ ཧོ་ཏི ‘‘ཨ་ཧོ་སི’’ནྟི ‘‘ཨ་ཏཱི་ཏ་མ་དྡྷཱ་ནཾ ཨ་ཧཾ ཨཱི་དི་སོ ཨ་ཧོ་སི’’ནྟི ཨ་ཏྟ་དི་ཊྛི་ཝ་སེ་ན ན མེ ཙི་ཏྟ་པྤ་ཝ་ཏྟི ཨ་ཏྠི དི་ཊྛི་ཡཱ ས་མྨ་དེ་ཝ ཨུ་གྒྷཱ་ཊི་ཏ་ཏྟཱ, དྷ་མྨ་ས་བྷཱ་ཝ་སྶ ཙ སུ་དི་ཊྛ་ཏྟཱ. ‘‘བྷ་ཝི་སྶ’’ནྟི ན ཧོ་ཏི མེཏི ཏ་ཏོ ཨེ་ཝ ‘‘ཨ་ནཱ་ག་ཏ་མ་དྡྷཱ་ནཾ ཨ་ཧཾ ཨེ་དི་སོ ཀ་ཐཾ ནུ ཁོ བྷ་ཝི་སྶཾ བྷ་ཝེ་ཡྻ’’ནྟི ཨེ་ཝ་མྤི མེ ན ཧོ་ཏི. ས་ངྑཱ་རཱ ཝི་ག་མི་སྶ་ནྟཱིཏི ཨེ་ཝཾ པ་ན ཧོ་ཏི ‘‘ཡ་ཐཱ་པ་ཙྩ་ཡཾ པ་ཝ་ཏྟ་མཱ་ནཱ ས་ངྑཱ་རཱ་ཝ, ན ཨེ་ཏྠ ཀོ་ཙི ཨ་ཏྟཱ ཝཱ ཨ་ཏྟ་ནི་ཡཾ ཝཱ, ཏེ ཙ ཁོ ཝི་ག་མི་སྶ་ནྟི, ཝི་ན་སྶི་སྶ་ནྟི, ཁ་ཎེ ཁ་ཎེ བྷི་ཛྫི་སྶ་ནྟཱི’’ཏི. ཏ་ཏྠ ཀཱ པ་རི་དེ་ཝ་ནཱཏི ཨེ་ཝཾ པ་སྶ་ནྟ་སྶ མཱ་དི་ས་སྶ ཏ་ཏྠ ས་ངྑཱ་ར་ག་ཏེ ཀཱ ནཱ་མ པ་རི་དེ་ཝ་ནཱ.
སུ་དྡྷནྟི ཀེ་ཝ་ལཾ, ཨ་ཏྟ་སཱ་རེ་ན ཨ་ས་མྨི་སྶཾ. དྷ་མྨ་ས་མུ་པྤཱ་དནྟི པ་ཙྩ་ཡ་པ་ཙྩ་ཡུ་པྤ་ནྣ་དྷ་མྨ་ས་མུ་པྤ་ཏྟིཾ ཨ་ཝི་ཛྫཱ་དི་པ་ཙྩ་ཡེ་ཧི ས་ངྑཱ་རཱ་དི་དྷ་མྨ་མ་ཏྟ་པྤ་ཝ་ཏྟིཾ. ས་ངྑཱ་ར་ས་ནྟ་ཏིནྟི ཀི་ལེ་ས་ཀ་མྨ་ཝི་པཱ་ཀ་པྤ་བྷེ་ད་ས་ངྑཱ་ར་པ་བ་ནྡྷཾ. པ་སྶ་ནྟ་སྶ ཡ་ཐཱ་བྷཱུ་ཏནྟི ས་ཧ ཝི་པ་སྶ་ནཱ་ཡ མ་གྒ་པ་ཉྙཱ་ཡ ཡཱ་ཐཱ་ཝ་ཏོ ཛཱ་ན་ནྟ་སྶ.
ཏི་ཎ་ཀ་ཊྛ་ས་མཾ ལོ་ཀནྟི ཡ་ཐཱ ཨ་ར་ཉྙེ ཨ་པ་རི་གྒ་ཧེ ཏི་ཎ་ཀ་ཊྛེ ཀེ་ན་ཙི ག་ཡ྄ཧ་མཱ་ནེ ཨ་པ་ར་སྶ ‘‘མ་ཡ྄ཧཾ ས་ནྟ་ཀཾ ཨ་ཡཾ ག་ཎྷ་ཏཱི’’ཏི ན ཧོ་ཏི, ཨེ་ཝཾ སོ ཨ་སཱ་མི་ཀ་ཏཱ་ཡ ཏི་ཎ་ཀ་ཊྛ་ས་མཾ ས་ངྑཱ་ར་ལོ་ཀཾ ཡ་དཱ པ་ཉྙཱ་ཡ པ་སྶ་ཏི, སོ ཏ་ཏྠ མ་མ་ཏྟཾ ཨ་སཾ་ཝི་ནྡཾ ཨ་སཾ་ཝི་ནྡ་ནྟོ ཨ་ལ་བྷ་ནྟོ ཨ་ཀ་རོ་ནྟོ. ན་ཏྠི མེཏི ‘‘ཨ་ཧུ ཝ་ཏ སོ་ཧཾ, ཏཾ མེ ན་ཏྠཱི’’ཏི ན སོ་ཙ་ཏི.
ཨུ་ཀྐ་ཎྛཱ་མི ས་རཱི་རེ་ནཱཏི ཨ་སཱ་ར་ཀེ་ན ཨ་བྷི་ནུ་དེ་ན དུ་ཀྑེ་ན ཨ་ཀ་ཏ་ཉྙུ་ནཱ ཨ་སུ་ཙི་དུ་གྒ་ནྡྷ་ཛེ་གུ་ཙྪ་པ་ཊི་ཀྐཱུ་ལ་ས་བྷཱ་ཝེ་ན ཨི་མི་ནཱ ཀཱ་ཡེ་ན ཨུ་ཀྐ་ཎྛཱ་མི ཨི་མཾ ཀཱ་ཡཾ ནི་བྦི་ནྡ་ནྟོ ཨེ་ཝཾ ཏི་ཊྛཱ་མི. བྷ་ཝེ་ན་མྷི ཨ་ན་ཏྠི་ཀོཏི ས་བྦེ་ན་པི བྷ་ཝེ་ན ཨ་ན་ཏྠི་ཀོ ཨ་མྷི, ན ཀི་ཉྩི བྷ་ཝཾ པ་ཏྠེ་མི. སོ་ཡཾ བྷི་ཛྫི་སྶ་ཏི ཀཱ་ཡོཏི ཨ་ཡཾ མ་མ ཀཱ་ཡོ ཨི་དཱ་ནི ཏུ་མྷཱ་ཀཾ པ་ཡོ་གེ་ན ཨ་ཉྙ་ཐཱ ཝཱ ཨ་ཉྙ་ཏྠ བྷི་ཛྫི་སྶ་ཏི. ཨ་ཉྙོ ཙ ན བྷ་ཝི་སྶ་ཏཱིཏི ཨ་ཉྙོ ཀཱ་ཡོ མ་ཡ྄ཧཾ ཨཱ་ཡ་ཏིཾ ན བྷ་ཝི་སྶ་ཏི, པུ་ན་བྦྷ་ཝཱ་བྷཱ་ཝ་ཏོ.
ཡཾ ཝོ ཀི་ཙྩཾ ས་རཱི་རེ་ནཱཏི ཡཾ ཏུ་མྷཱ་ཀཾ ཨི་མི་ནཱ ས་རཱི་རེ་ན པ་ཡོ་ཛ་ནཾ, ཏཾ ཀ་རོ་ཐ ཡ་དི་ཙྪ་ཐ, ཨི་ཙྪ་ཐ ཙེ. ན མེ ཏ་པྤ་ཙྩ་ཡཱཏི, ཏཾ ནི་མི་ཏྟཾ ཨི་མ་སྶ ས་རཱི་ར་སྶ ཏུ་མྷེ་ཧི ཡ་ཐི་ཙྪི་ཏ་ཀི་ཙྩ་སྶ ཀ་ར་ཎ་ཧེ་ཏུ. ཏ་ཏྠཱཏི ཏེ་སུ ཀ་རོ་ནྟེ་སུ ཙ ཨ་ཀ་རོ་ནྟེ་སུ ཙ. དོ་སོ པེ་མ་ཉྩ ཧེ་ཧི་ཏཱིཏི ཡ་ཐཱ་ཀྐ་མཾ པ་ཊི་གྷོ ཨ་ནུ་ན་ཡོ ན བྷ་ཝི་སྶ་ཏི, ཨ་ཏྟ་ནོ བྷ་ཝེ ཨ་པེ་ཀྑཱ་ཡ ས་བྦ་སོ པ་ཧཱི་ན་ཏྟཱ་ཏི ཨ་དྷི་པྤཱ་ཡོ. ཨ་ཉྙ་པ་ཙྩ་ཡཱ ཨ་ཉྙ་ཏྠ ཙ པ་ཊི་གྷཱ་ནུ་ན་ཡེ་སུ ཨ་ས་ནྟེ་སུ་པི ཏ་པྤ་ཙྩ་ཡཱ, ‘‘ཏ་ཏྠཱ’’ཏི ཝ་ཙ་ནཾ ཡ་ཐཱ་དྷི་ག་ཏ་ཝ་སེ་ན ཝུ་ཏྟཾ.
ཏ་སྶཱཏི ཨ་དྷི་མུ་ཏྟ་ཏྠེ་ར་སྶ. ཏཾ ཝ་ཙ་ནནྟི ‘‘ན་ཏྠི ཙེ་ཏ་སི་ཀཾ དུ་ཀྑ’’ནྟི་ཨཱ་དི་ཀཾ མ་ར་ཎེ བྷ་ཡཱ་བྷཱ་ཝཱ་དི་དཱི་པ་ཀཾ, ཏ་ཏོ ཨེ་ཝ ཨ་བྦྷུ་ཏཾ ལོ་མ་ཧཾ་ས་ནཾ ཝ་ཙ་ནཾ སུ་ཏྭཱ. མཱ་ཎ་ཝཱཏི ཙོ་རཱ. ཙོ་རཱ ཧི ‘‘མཱ་ཎ་ཝཱ’’ཏི ཝུ་ཙྩ་ནྟི ‘‘མཱ་ཎ་ཝེ་ཧི ས་ཧ ག་ཙྪ་ནྟི ཀ་ཏ་ཀ་མྨེ་ཧི ཨ་ཀ་ཏ་ཀ་མྨེ་ཧི་པཱི’’ཏི་ཨཱ་དཱི་སུ (མ. ནི. ༢.༡༤༩) ཝི་ཡ.
ཀིཾ བྷ་ད་ནྟེ ཀ་རི་ཏྭཱ་ནཱཏི, བྷ་ནྟེ, ཀིཾ ནཱ་མ ཏ་པོ་ཀ་མྨཾ ཀ་ཏྭཱ. ཀོ ཝཱ ཏ་ཝ ཨཱ་ཙ་རི་ཡོ ཀ་སྶ སཱ་ས་ནཾ, ཨོ་ཝཱ་དཾ ནི་སྶཱ་ཡ ཨ་ཡཾ ཨ་སོ་ཀ་ཏཱ མ་ར་ཎ་ཀཱ་ལེ སོ་ཀཱ་བྷཱ་ཝོ ལ་བྦྷ་ཏཱི་ཏི ཨེ་ཏཾ ཨ་ཏྠཾ ཨ་བྲ་ཝུཾ, པུ་ཙྪཱ་ཝ་སེ་ན ཀ་ཐེ་སུཾ, བྷཱ་སིཾ་སུ.
ཏཾ སུ་ཏྭཱ ཐེ་རོ ཏེ་སཾ པ་ཊི་ཝ་ཙ་ནཾ དེ་ནྟོ ‘‘ས་བྦ་ཉྙཱུ’’ཏི་ཨཱ་དི་མཱ་ཧ. ཏ་ཏྠ ས་བྦ་ཉྙཱུཏི པ་རོ་པ་དེ་སེ་ན ཝི་ནཱ ས་བྦ་པ་ཀཱ་རེ་ན ས་བྦ་དྷ་མྨཱ་ཝ་བོ་དྷ་ན་ས་མ་ཏྠ་སྶ ཨཱ་ཀ་ངྑཱ་པ་ཊི་བ་དྡྷ་ཝུ་ཏྟི་ནོ ཨ་ནཱ་ཝ་ར་ཎ་ཉཱ་ཎ་སྶ ཨ་དྷི་ག་མེ་ན ཨ་ཏཱི་ཏཱ་དི་བྷེ་དཾ ས་བྦཾ ཛཱ་ནཱ་ཏཱི་ཏི, ས་བྦ་ཉྙཱུ. ཏེ་ནེ་ཝ ས་མ་ནྟ་ཙ་ཀྑུ་ནཱ ས་བྦ་སྶ ད་སྶ་ན་ཏོ ས་བྦ་ད་སྶཱ་ཝཱི. ཡ་མྷི ཨ་ནཱ་ཝ་ར་ཎ་ཉཱ་ཎཾ, ཏ་དེ་ཝ ས་བྦ་ཉྙུ་ཏ་ཉྙཱ་ཎཾ, ན་ཏྠེ་ཝ ཨ་སཱ་དྷཱ་ར་ཎ་ཉཱ་ཎ་པཱ་ལི༹་ཡཱ ཝི་རོ་དྷོ ཝི་ས་ཡུ་པྤ་ཏྟི་མུ་ཁེ་ན ཨ་ཉྙེ་ཧི ཨ་སཱ་དྷཱ་ར་ཎ་བྷཱ་ཝ་ད་སྶ་ན་ཏྠཾ ཨེ་ཀ་སྶེ་ཝ ཉཱ་ཎ་སྶ དྭི་དྷཱ ཝུ་ཏྟ་ཏྟཱ. ཡཾ པ་ནེ་ཏྠ ཝ་ཏྟ་བྦཾ, ཏཾ ཨི་ཏི་ཝུ་ཏྟ་ཀ་ཝ་ཎྞ་ནཱ་ཡཾ (ཨི་ཏི་ཝུ. ཨ་ཊྛ. ༣༨) ཝི་ཏྠཱ་ར་ཏོ ཝུ་ཏྟ་མེ་ཝཱ་ཏི ཏ་ཏྠ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པ་ཉྩ་ནྣ་མྤི མཱ་རཱ་ནཾ ཝི་ཛ་ཡ་ཏོ ཛི་ནོ, ཧཱི་ནཱ་དི་ཝི་བྷཱ་ག་བྷི་ནྣེ ས་བྦ་སྨིཾ ས་ཏྟ་ནི་ཀཱ་ཡེ ཨ་དྷི་མུ་ཏྟ་ཝུ་ཏྟི་ཏཱ་ཡ མ་ཧ་ཏི་ཡཱ ཀ་རུ་ཎཱ་ཡ ས་མ་ནྣཱ་ག་ཏ་ཏྟཱ མ་ཧཱ་ཀཱ་རུ་ཎི་ཀོ, དི་ཊྛ་དྷ་མྨི་ཀ་ས་མྤ་རཱ་ཡི་ཀ་པ་ར་མ་ཏྠེ་ཧི ཡ་ཐཱ་ར་ཧཾ ཝེ་ནེ་ཡྻཱ་ནཾ ཨ་ནུ་སཱ་ས་ན་ཏོ ས་ཏྠཱ, ཏ་ཏོ ཨེ་ཝ ས་བྦ་ལོ་ཀ་སྶ ཀི་ལེ་ས་རོ་ག་ཏི་ཀི་ཙྪ་ན་ཏོ ས་བྦ་ལོ་ཀ་ཏི་ཀི་ཙྪ་ཀོ, ས་མྨཱ་ས་མྦུ་དྡྷོ ཨཱ་ཙ་རི་ཡོ མ་མཱ་ཏི ཡོ་ཛ་ནཱ. ཁ་ཡ་གཱ་མཱིཏི ནི་བྦཱ་ན་གཱ་མཱི.
ཨེ་ཝཾ ཐེ་རེ་ན ས་ཏྠུ སཱ་ས་ན་སྶ ཙ གུ་ཎེ པ་ཀཱ་སི་ཏེ པ་ཊི་ལ་དྡྷ་ས་དྡྷཱ ཨེ་ཀ་ཙྩེ ཙོ་རཱ པ་བྦ་ཛིཾ་སུ, ཨེ་ཀ་ཙྩེ ཨུ་པཱ་ས་ཀ་ཏྟཾ པ་ཝེ་དེ་སུཾ. ཏ་མ་ཏྠཾ དཱི་པེ་ནྟོ དྷ་མྨ་ས་ངྒཱ་ཧ་ཀཱ ‘‘སུ་ཏྭཱ་ན ཙོ་རཱ’’ཏི་ཨཱ་དི་ནཱ དྭེ གཱ་ཐཱ ཨ་བྷཱ་སིཾ་སུ. ཏ་ཏྠ ཨི་སི་ནོཏི ཨ་དྷི་སཱི་ལ་སི་ཀྑཱ་དཱི་ནཾ ཨེ་ས་ན་ཊྛེ་ན ཨི་སི་ནོ, ཨ་དྷི་མུ་ཏྟ་ཏྠེ་ར་སྶ. ནི་ཀྑི་པྤཱཏི པ་ཧཱ་ཡ. ས་ཏྠཱ་ནི ཙ ཨཱ་ཝུ་དྷཱ་ནི ཙཱཏི ཨ་སི་ཨཱ་དི་ས་ཏྠཱ་ནི ཙེ་ཝ དྷ་ནུ་ཀ་ལཱ་པཱ་དི་ཨཱ་ཝུ་དྷཱ་ནི ཙ. ཏ་མྷཱ ཙ ཀ་མྨཱཏི ཏ་ཏོ ཙོ་ར་ཀ་མྨ་ཏོ.
ཏེ པ་བྦ་ཛི་ཏྭཱ སུ་ག་ཏ་སྶ སཱ་ས་ནེཏི ཏེ ཙོ་རཱ སོ་བྷ་ན་ག་མ་ན་ཏཱ་དཱི་ཧི སུ་ག་ཏ་སྶ བྷ་ག་ཝ་ཏོ སཱ་ས་ནེ པ་བྦ་ཛྫཾ ཨུ་པ་ག་ནྟྭཱ. བྷཱ་ཝ་ནཱ་ཝི་སེ་སཱ་དྷི་ག་ཏཱ་ཡ ཨོ་ད་གྱ་ལ་ཀྑ་ཎཱ་ཡ པཱི་ཏི་ཡཱ ས་མ་ནྣཱ་ག་མེ་ན ཨུ་ད་གྒ་ཙི་ཏྟཱ. སུ་མ་ནཱཏི སོ་མ་ན་སྶ་པྤ་ཏྟཱ. ཀ་ཏི་ནྡྲི་ཡཱཏི བྷཱ་ཝི་ཏི་ནྡྲི་ཡཱ. ཕུ་སིཾ་སཱུཏི ཨ་གྒ་མ་གྒཱ་དྷི་ག་མེ་ན ཨ་ས་ངྑ་ཏཾ ནི་བྦཱ་ནཾ ཨ་དྷི་ག་ཙྪིཾ་སུ. ཨ་དྷི་མུ་ཏྟོ ཀི་ར ཙོ་རེ ནི་བྦི་སེ་ཝ་ནེ ཀ་ཏྭཱ, ཏེ ཏ་ཏྠེ་ཝ ཋ་པེ་ཏྭཱ, མཱ་ཏུ ས་ནྟི་ཀཾ ག་ནྟྭཱ, མཱ་ཏ་རཾ ཨཱ་པུ་ཙྪི་ཏྭཱ, པ་ཙྩཱ་ག་ནྟྭཱ ཏེ་ཧི ས་དྡྷིཾ ཨུ་པ་ཛ྄ཛྷཱ་ཡ་སྶ ས་ནྟི་ཀཾ ག་ནྟྭཱ, པ་བྦཱ་ཛེ་ཏྭཱ ཨུ་པ་ས་མྤ་དཾ ཨ་ཀཱ་སི. ཨ་ཐ ཏེ་སཾ ཀ་མྨ་ཊྛཱ་ནཾ ཨཱ་ཙི་ཀྑི, ཏེ ན་ཙི་ར་སྶེ་ཝ ཨ་ར་ཧ་ཏྟེ པ་ཏི་ཊྛ་ཧིཾ་སུ. ཏེ་ན ཝུ་ཏྟཾ ‘‘པ་བྦ་ཛི་ཏྭཱ…པེ… ཨ་ས་ངྑ་ཏ’’ནྟི.
ཨ་དྷི་མུ་ཏྟ་ཏྠེ་ར་གཱ་ཐཱ་ཝ་ཎྞ་ནཱ ནི་ཊྛི་ཏཱ.