༡༠. མཱ་ཏི་ཀཱ་ཀ་ཐཱ

མཱ་ཏི་ཀཱ་ཀ་ཐཱ་ཝ་ཎྞ་ནཱ

༤༠. ཨི་དཱ་ནི མ་ཧཱ་ཐེ་རོ ཝི་པ་སྶ་ནཱ་ཀ་ཐཱ་ན་ནྟ་རཾ ས་ཀ་ལེ པ་ཊི་ས་མྦྷི་དཱ་མ་གྒེ ནི་དྡི་ཊྛེ ས་མ་ཐ་ཝི་པ་སྶ་ནཱ་མ་གྒ་ནི་བྦཱ་ན་དྷ་མྨེ ཨཱ་ཀཱ་ར་ནཱ་ན་ཏྟ་ཝ་སེ་ན ནཱ་ནཱ་པ་རི་ཡཱ་ཡེ་ཧི ཐོ་མེ་ཏུ་ཀཱ་མོ ནི་ཙྪཱ་ཏོཏི་ཨཱ་དཱི་ནི ཨེ་ཀཱུ་ན་ཝཱི་ས་ཏི མཱ་ཏི་ཀཱ་པ་དཱ་ནི ཨུ་དྡི་སི་ཏྭཱ ཏེ་སཾ ནི་དྡེ་ས་ཝ་སེ་ན མཱ་ཏི་ཀཱ་ཀ་ཐཾ ནཱ་མ ཀ་ཐེ་སི. ཏ་སྶཱ ཨ་ཡཾ ཨ་པུ་བྦ་ཏྠཱ་ནུ་ཝ་ཎྞ་ནཱ. མཱ་ཏི་ཀཱ་ཡ ཏཱ་ཝ ནི་ཙྪཱ་ཏོཏི ཨ་མི་ལཱ་ཏོ. ས་བྦེ་པི ཧི ཀི་ལེ་སཱ པཱི་ལཱ༹་ཡོ་ག་ཏོ མི་ལཱ་ཏཱ, རཱ་གོ་པི ཏཱ་ཝ ནི་ར་ནྟ་ར་པྤ་ཝ་ཏྟོ ས་རཱི་རཾ ད་ཧ་ཏི, ཀིཾ པ་ན་ཉྙེ ཀི་ལེ་སཱ. ‘‘ཏ་ཡོ་མེ, བྷི་ཀྑ་ཝེ, ཨ་གྒཱི རཱ་ག་གྒི དོ་ས་གྒི མོ་ཧ་གྒཱི’’ཏི (ཨི་ཏི་ཝུ. ༩༣; དཱི. ནི. ༣.༣༠༥) པ་ན ཀི་ལེ་ས་ནཱ་ཡ་ཀཱ ཏ་ཡོ ཨེ་ཝ ཀི་ལེ་སཱ ཝུ་ཏྟཱ, ཏཾ་ས་མྤ་ཡུ་ཏྟཱ་པི པ་ན ད་ཧ་ནྟི་ཡེ་ཝ. ཨེ་ཝཾ ཚཱ་ཏ་ཀི་ལེ་སཱ་བྷཱ་ཝ་ཏོ ནི་ཙྪཱ་ཏོ. ཀོ སོ? ཝི་མོ་ཀྑ་ས་མྦ་ནྡྷེ་ན ཝི་མོ་ཀྑོ་ཏི ད་ཊྛ་བྦོ. མུ་ཙྩ་ཏཱི་ཏི མོ་ཀྑོ. ཝི་མུ་ཙྩ་ཏཱི་ཏི ཝི་མོ་ཀྑོཏི ཨ་ཏྠོ. ཨི་ད་མེ་ཀཾ མཱ་ཏི་ཀཱ་པ་དཾ. ཝི་ཛྫཱ་ཝི་མུ་ཏྟཱིཏི ཝི་ཛྫཱ་ཡེ་ཝ ཝི་མུ་ཏྟི. ཨི་ད་མེ་ཀཾ མཱ་ཏི་ཀཱ་པ་དཾ. ཛྷཱ་ན་ཝི་མོ་ཀྑོཏི ཛྷཱ་ན་མེ་ཝ ཝི་མོ་ཀྑོ. ཨི་ད་མེ་ཀཾ མཱ་ཏི་ཀཱ་པ་དཾ. སེ་སཱ་ནི ཨེ་ཀེ་ཀཱ་ནེ་ཝཱ་ཏི ཨེ་ཝཾ ཨེ་ཀཱུ་ན་ཝཱི་ས་ཏི མཱ་ཏི་ཀཱ་པ་དཱ་ནི.

༤༡. ནེ་ཀྑ་མྨེ་ན ཀཱ་མ་ཙྪ་ནྡ་ཏོ ནི་ཙྪཱ་ཏོཏི ནེ་ཀྑ་མྨེ་ན ཀཱ་མ་ཙྪ་ནྡ་ཏོ ཨ་པེ་ཏ་ཏྟཱ ཀཱ་མ་ཙྪ་ནྡ་ཏོ ནི་ཀྐི་ལེ་སོ ཡོ་གཱི. ཏེ་ན པ་ཊི་ལ་དྡྷཾ ནེ་ཀྑ་མྨ་མྤི ནི་ཙྪཱ་ཏོ ནི་ཀྐི་ལེ་སོ ཝི་མོ་ཀྑོ. ཨེ་ཝཾ སེ་སེ་སུ་པི. ནེ་ཀྑ་མྨེ་ན ཀཱ་མ་ཙྪ་ནྡ་ཏོ མུ་ཙྩ་ཏཱི་ཏི ཝི་མོ་ཀྑོཏི ནེ་ཀྑ་མྨེ་ན ཀཱ་མ་ཙྪ་ནྡ་ཏོ ཡོ་གཱི མུ་ཙྩ་ཏཱི་ཏི ཏཾ ནེ་ཀྑ་མྨཾ ཝི་མོ་ཀྑོ་ཏི ཨ་ཏྠོ. ཨེ་ཝཾ སེ་སེ་སུ་པི. ཝི་ཛྫ་ཏཱི་ཏི ཝི་ཛྫཱཏི ས་བྷཱ་ཝ་ཏོ ཝི་ཛྫ་ཏི ཨ་ཏྠི ཨུ་པ་ལ་བྦྷ་ཏཱི་ཏི ཝི་ཛྫཱ ནཱ་མཱ་ཏི ཨ་ཏྠོ. ཨ་ཐ ཝཱ ས་བྷཱ་ཝ་ཛཱ་ན་ན་ཏྠཾ པ་ཊི་པ་ནྣེ་ཧི ཡོ་གཱི་ཧི ས་བྷཱ་ཝཾ ཝེ་དཱི་ཡ་ཏི ཛཱ་ནཱི་ཡ་ཏཱི་ཏི ཝི་ཛྫཱ ནཱ་མཱ་ཏི ཨ་ཏྠོ. ཨ་ཐ ཝཱ ཝི་སེ་ས་ལཱ་བྷ་ཏྠཾ པ་ཊི་པ་ནྣེ་ཧི ཡོ་གཱི་ཧི ཝེ་དཱི་ཡ་ཏི པ་ཊི་ལཱ་བྷཱི་ཡ་ཏཱི་ཏི ཝི་ཛྫཱ ནཱ་མཱ་ཏི ཨ་ཏྠོ. ཨ་ཐ ཝཱ ཨ་ཏྟ་ནཱ ཝི་ནྡི་ཏ་བྦཾ བྷཱུ་མིཾ ཝི་ནྡ་ཏི ལ་བྷ་ཏཱི་ཏི ཝི་ཛྫཱ ནཱ་མཱ་ཏི ཨ་ཏྠོ. ཨ་ཐ ཝཱ ས་བྷཱ་ཝ་ད་སྶ་ན་ཧེ་ཏུ་ཏྟཱ ས་བྷཱ་ཝཾ ཝི་དི་ཏཾ ཀ་རོ་ཏཱི་ཏི ཝི་ཛྫཱ ནཱ་མཱ་ཏི ཨ་ཏྠོ. ཝི་ཛྫ་ནྟོ མུ་ཙྩ་ཏི, མུ་ཙྩ་ནྟོ ཝི་ཛྫ་ཏཱིཏི ཡ་ཐཱ་ཝུ་ཏྟོ དྷ་མྨོ ཡ་ཐཱ་ཝུ་ཏྟེ་ན་ཏྠེ་ན ཝི་ཛྫ་མཱ་ནོ ཡ་ཐཱ་ཝུ་ཏྟ་ཏོ མུ་ཙྩ་ཏི, ཡ་ཐཱ་ཝུ་ཏྟ་ཏོ མུ་ཙྩ་མཱ་ནོ ཡ་ཐཱ་ཝུ་ཏྟེ་ན་ཏྠེ་ན ཝི་ཛྫ་ཏཱི་ཏི ཝི་ཛྫཱ་ཝི་མུ་ཏྟི ནཱ་མཱ་ཏི ཨ་ཏྠོ.

ཀཱ་མ་ཙྪ་ནྡཾ སཾ་ཝ་ར་ཊྛེ་ནཱཏི ཀཱ་མ་ཙྪ་ནྡ་ནི་ཝཱ་ར་ཎ་ཊྛེ་ན ཏཾ ནེ་ཀྑ་མྨཾ སཱི་ལ་ཝི་སུ་དྡྷི ནཱ་མཱ་ཏི ཨ་ཏྠོ. ཏཾ་ཡེ་ཝ ཨ་ཝི་ཀྑེ་པ་ཧེ་ཏུ་ཏྟཱ ཨ་ཝི་ཀྑེ་པ་ཊྛེ་ན ཙི་ཏྟ་ཝི་སུ་དྡྷི. ད་སྶ་ན་ཧེ་ཏུ་ཏྟཱ ད་སྶ་ན་ཊྛེ་ན དི་ཊྛི་ཝི་སུ་དྡྷི. སེ་སེ་སུ་པི ཨེ་སེ་ཝ ན་ཡོ. པ་ཊི་པྤ་སྶ་མྦྷེ་ཏཱིཏི ནེ་ཀྑ་མྨཱ་དི་ནཱ ཀཱ་མ་ཙྪ་ནྡཱ་དི་ཀཾ ཡོ་གཱ་ཝ་ཙ་རོ པ་ཊི་པྤ་སྶ་མྦྷེ་ཏཱི་ཏི ནེ་ཀྑ་མྨཱ་དི་ཀོ དྷ་མྨོ པ་སྶ་དྡྷི ནཱ་མཱ་ཏི ཨ་ཏྠོ. པ་ཧཱི་ན་ཏྟཱཏི ཏེ་ན ཏེ་ན པ་ཧཱ་ནེ་ན པ་ཧཱི་ན་ཏྟཱ. ཉཱ་ཏ་ཊྛེ་ན ཉཱ་ཎནྟི ཛྷཱ་ན་པ་ཙྩ་ཝེ་ཀྑ་ཎཱ་ཝ་སེ་ན ཝི་པ་སྶ་ནཱ་ཝ་སེ་ན མ་གྒ་པ་ཙྩ་ཝེ་ཀྑ་ཎཱ་ཝ་སེ་ན ཉཱ་ཏ་ཊྛེ་ན ནེ་ཀྑ་མྨཱ་དི་ཀཾ ཉཱ་ཎཾ ནཱ་མཱ་ཏི ཨ་ཏྠོ. དི་ཊྛ་ཏྟཱ ད་སྶ་ནནྟི ཨེ་ཏྠཱ་པི ཨེ་སེ་ཝ ན་ཡོ. ཝི་སུ་ཛ྄ཛྷ་ཏཱིཏི ཡོ་གཱི, ནེ་ཀྑ་མྨཱ་དི་ཀཱ ཝི་སུ་དྡྷི.

ནེ་ཀྑ་མྨ་ནི་དྡེ་སེ ནེ་ཀྑ་མྨཾ ཨ་ལོ་བྷ་ཏྟཱ ཀཱ་མ་རཱ་ག་ཏོ ནི་སྶ་ཊ་ནྟི ནི་སྶ་ར་ཎཾ. ཏ་ཏོ ནི་ཀྑ་ནྟ་ནྟི ནེ་ཀྑ་མྨཾ. ‘‘རཱུ་པཱ་ན་མེ་ཏཾ ནི་སྶ་ར་ཎཾ ཡ་དི་དཾ ནེ་ཀྑ་མྨ’’ནྟི ཝུ་ཙྩ་མཱ་ནེ ཨཱ་རུ་པྤ་ཝི་སེ་ས་སྶ ཨ་དི་སྶ་ན་ཏོ ཝི་སེ་ས་སྶ ད་སྶ་ན་ཏྠཾ ཨ་ཉྙ་ཏྠ ཝུ་ཏྟ་པཱ་ཋ་ཀྐ་མེ་ནེ་ཝ ཡ་དི་དཾ ཨཱ་རུ་པྤནྟི ཝུ་ཏྟཾ. ཏ་ཉྩ ཨཱ་རུ་པྤཾ རཱུ་པ་ཏོ ནི་ཀྑ་ནྟ་ཏྟཱ ནེ་ཀྑ་མྨཾ ནཱ་མཱ་ཏི ཨ་དྷི་ཀཱ་ར་ཝ་སེ་ནེ་ཝ ཝུ་ཏྟཾ ཧོ་ཏི. བྷཱུ་ཏནྟི ཨུ་པྤཱ་ད་ས་མཱ་ཡོ་ག་དཱི་པ་ནཾ. ས་ངྑ་ཏནྟི པ་ཙྩ་ཡ་བ་ལ་ཝི་སེ་ས་ད་སྶ་ནཾ. པ་ཊི་ཙྩ་ས་མུ་པྤ་ནྣནྟི པ་ཙྩ་ཡ་ས་མཱ་ཡོ་གེ་པི པ་ཙྩ་ཡཱ་ནཾ ཨ་བྱཱ་པཱ་ར་བྷཱ་ཝ་ད་སྶ་ནཾ. ནི་རོ་དྷོ ཏ་སྶ ནེ་ཀྑ་མྨནྟི ནི་བྦཱ་ནཾ ཏ་ཏོ ས་ངྑ་ཏ་ཏོ ནི་ཀྑ་ནྟ་ཏྟཱ ཏ་སྶ ས་ངྑ་ཏ་སྶ ནེ་ཀྑ་མྨཾ ནཱ་མ. ཨཱ་རུ་པྤ་སྶ ཙ ནི་རོ་དྷ་སྶ ཙ ག་ཧ་ཎཾ ཨ་ཉྙ་ཏྠ པཱ་ཋེ ཝུ་ཏྟ་ཀྐ་མེ་ནེ་ཝ ཀ་ཏཾ. ‘‘ཀཱ་མ་ཙྪ་ནྡ་སྶ ནེ་ཀྑ་མྨཾ ནེ་ཀྑ་མྨ’’ནྟི ཝུ་ཙྩ་མཱ་ནེ པུ་ན་རུ་ཏྟཾ ཧོ་ཏི. ནེ་ཀྑ་མྨ་ཝ་ཙ་ནེ་ནེ་ཝ ཙ ཏ་སྶ ནེ་ཀྑ་མྨ་སི་དྡྷཱི་ཏི ཏཾ ཨ་ཝ་ཏྭཱ སེ་ས་ནེ་ཀྑ་མྨ་མེ་ཝ ཝུ་ཏྟཾ. ཏཾ ཨུ་ཛུ་ཀ་མེ་ཝ. ནི་སྶ་ར་ཎ་ནི་དྡེ་སེ་པི ཨི་མི་ནཱ་ཝ ན་ཡེ་ན ཨ་ཏྠོ ཝེ་དི་ཏ་བྦོ. ནི་སྶ་ར་ཎཱི་ཡཱ དྷཱ་ཏུ་ཡོ པ་ནེ་ཏྠ ཨུ་ཛུ་ཀ་མེ་ཝ ནེ་ཀྑ་མྨ་ནྟི ཝུ་ཏྟཾ. པ་ཝི་ཝེ་ཀོཏི པ་ཝི་ཝི་ཏྟ་བྷཱ་ཝོ ནེ་ཀྑ་མྨཱ་དི་ཀོ་ཡེ་ཝ. ཝོ་ས་ཛྫ་ཏཱིཏི ཡོ་གཱི, ནེ་ཀྑ་མྨཱ་ད་ཡོ ཝོ་ས་གྒོ. ནེ་ཀྑ་མྨཾ པ་ཝ་ཏྟེ་ནྟོ ཡོ་གཱི ནེ་ཀྑ་མྨེ་ན ཙ་ར་ཏཱི་ཏི ཝུ་ཙྩ་ཏི. ཏཾ པ་ན ནེ་ཀྑ་མྨཾ ཙ་རི་ཡཱ. ཨེ་ས ན་ཡོ སེ་སེ་སུ་པི. ཛྷཱ་ན་ཝི་མོ་ཀྑ་ནི་དྡེ་སེ ཝ་ཏྟ་བྦཾ ཝི་མོ་ཀྑ་ཀ་ཐཱ་ཡཾ ཝུ་ཏྟཾ. ཀེ་ཝ་ལཾ ཏ་ཏྠ ‘‘ཛཱ་ནཱ་ཏཱི་ཏི ཛྷཱ་ན་ཝི་མོ་ཀྑོ’’ཏི (པ་ཊི. མ. ༡.༢༡༧) ཝུ་ཏྟཾ, ཨི་དྷ པ་ན ‘‘ཛཱ་ནཱ་ཏཱི་ཏི, ཛྷཱ་ཡ་ཏཱི’’ཏི པུ་གྒ་ལཱ་དྷི་ཊྛཱ་ནཱ་ཝ དེ་ས་ནཱ ཀ་ཏཱ་ཏི ཨ་ཡཾ ཝི་སེ་སོ.

༤༢. བྷཱ་ཝ་ནཱ་དྷི་ཊྛཱ་ན་ཛཱི་ཝི་ཏ་ནི་དྡེ་སེ ཙ པུ་གྒ་ལཱ་དྷི་ཊྛཱ་ནཱ དེ་ས་ནཱ ཀ་ཏཱ. དྷ་མྨ་ཏོ པ་ན བྷཱ་ཝ་ནཱ ནཱ་མ ནེ་ཀྑ་མྨཱ་ད་ཡོ་ཝ. ཨ་དྷི་ཊྛཱ་ནཾ ནཱ་མ ནེ་ཀྑ་མྨཱ་དི་ཝ་སེ་ན པ་ཏི་ཊྛཱ་པི་ཏ་ཙི་ཏྟ་མེ་ཝ. ཛཱི་ཝི་ཏཾ ནཱ་མ ནེ་ཀྑ་མྨཱ་དི་ཝ་སེ་ན པ་ཏི་ཊྛཱ་པི་ཏ་ཙི་ཏྟ་སྶ ས་མྨཱ་ཨཱ་ཛཱི་ཝོ ནཱ་མ. ཀོ སོ ས་མྨཱ་ཨཱ་ཛཱི་ཝོ ནཱ་མ? མི་ཙྪཱ་ཛཱི་ཝཱ ཝི་ར་ཏི, དྷ་མྨེ་ན ས་མེ་ན པ་ཙྩ་ཡ་པ་རི་ཡེ་ས་ན་ཝཱ་ཡཱ་མོ ཙ. ཏ་ཏྠ ས་མཾ ཛཱི་ཝ་ཏཱིཏི ས་མཾ ཛཱི་ཝི་ཏཾ ཛཱི་ཝ་ཏི, བྷཱ་ཝ་ན་པུཾ་ས་ཀ་ཝ་ཙ་ནཾ ཝཱ, ས་མེ་ན ཛཱི་ཝ་ཏཱི་ཏི ཝུ་ཏྟཾ ཧོ་ཏི. ནོ ཝི་ས་མནྟི ‘‘ས་མཾ ཛཱི་ཝ་ཏཱི’’ཏི ཝུ་ཏྟ་སྶེ་ཝ ཨ་ཏྠ་སྶ པ་ཊི་སེ་དྷ་ཝ་སེ་ན ཨ་ཝ་དྷཱ་ར་ཎཾ ཀ་ཏཾ. ས་མྨཱ ཛཱི་ཝ་ཏཱིཏི ཨཱ་ཀཱ་ར་ནི་ད་སྶ་ནཾ. ནོ མི་ཙྪཱཏི ཏ་སྶེ་ཝ ནི་ཡ་མ་ནཾ. ཝི་སུ་དྡྷཾ ཛཱི་ཝ་ཏཱིཏི ས་བྷཱ་ཝ་ཝི་སུ་དྡྷི་ཡཱ ཝི་སུ་དྡྷཾ ཛཱི་ཝི་ཏཾ ཛཱི་ཝ་ཏི. ནོ ཀི་ལི་ཊྛནྟི ཏ་སྶེ་ཝ ནི་ཡ་མ་ནཾ. ཡ་ཉྙ་དེ་ཝཱཏི་ཨཱ་དཱི་ཧི ཡ་ཐཱ་ཝུ་ཏྟཱ་ནཾ ཏི་སྶ་ནྣཾ ས་མྤ་དཱ་ནཾ ཨཱ་ནི་སཾ་སཾ ད་སྶེ་ཏི. ཏ་ཏྠ ཡ་ཉྙ་དེ་ཝཱཏི ཡཾ ཡཾ ཨེ་ཝ. ཁ་ཏྟི་ཡ་པ་རི་སནྟི ཁ་ཏྟི་ཡཱ་ནཾ ས་ནྣི་པཱ་ཏཾ. སོ ཧི ས་མ་ནྟ་ཏོ སཱི་ད་ནྟི ཨེ་ཏྠ ཨ་ཀ་ཏ་བུ་དྡྷི་ནོ་ཏི པ་རི་སཱ་ཏི ཝུ་ཙྩ་ཏི. ཨེ་སེ་ཝ ན་ཡོ ཨི་ཏ་ར་ཏྟ་ཡེ. ཁ་ཏྟི་ཡཱ་དཱི་ནཾ་ཡེ་ཝ ཨཱ་ག་མ་ན་ས་མྤ་ཏྟི་ཡཱ ཉཱ་ཎ་ས་མྤ་ཏྟི་ཡཱ ཙ ས་མ་ནྣཱ་ག་ཏ་ཏྟཱ ཏཱ་སཾ་ཡེ་ཝ ཙ་ཏ་སྶ་ནྣཾ ག་ཧ་ཎཾ, ན སུ་དྡ་པ་རི་སཱ་ཡ. ཝི་སཱ་ར་དོཏི ཏཱི་ཧི ས་མྤ་དཱ་ཧི ས་མྤ་ནྣོ ཝི་ག་ཏ་སཱ་ར་ཛྫོ, ནི་བྦྷ་ཡོ་ཏི ཨ་ཏྠོ. ཨ་མ་ངྐུ་བྷཱུ་ཏོཏི ཨ་ས་ངྐུ་ཙི་ཏོ ན ནི་ཏྟེ་ཛ་བྷཱུ་ཏོ. ཏཾ ཀི་སྶ ཧེ་ཏཱུཏི ཏཾ ཝི་སཱ་ར་ད་ཏྟཾ ཀེ་ན ཧེ་ཏུ་ནཱ ཀེ་ན ཀཱ་ར་ཎེ་ན ཧོ་ཏཱི་ཏི ཙེ་ཏི ཨ་ཏྠོ. ཨི་དཱ་ནི ཏ་ཐཱ ཧཱིཏི ཏ་སྶ ཀཱ་ར་ཎ་ཝ་ཙ་ནཾ. ཡ་སྨཱ ཨེ་ཝཾ ཏི་ས་མྤ་དཱ་ས་མྤ་ནྣོ, ཏ་སྨཱ ‘‘ཝི་སཱ་ར་དོ ཧོ་ཏཱི’’ཏི ཝི་སཱ་ར་ད་བྷཱ་ཝ་སྶ ཀཱ་ར་ཎཾ ད་སྶེ་ཏྭཱ ནི་ཊྛ་པེ་སཱི་ཏི.

ས་དྡྷ་མྨ་པྤ་ཀཱ་སི་ནི་ཡཱ པ་ཊི་ས་མྦྷི་དཱ་མ་གྒ-ཨ་ཊྛ་ཀ་ཐཱ་ཡ

མཱ་ཏི་ཀཱ་ཀ་ཐཱ་ཝ་ཎྞ་ནཱ ནི་ཊྛི་ཏཱ.

པ་ཉྙཱ་ཝ་གྒ་ཝ་ཎྞ་ནཱ ནི་ཊྛི་ཏཱ.

ནི་ཊྛི་ཏཱ ཙཱུ་ལ༹་ཝ་གྒ་སྶ ཨ་པུ་བྦ་ཏྠཱ་ནུ་ཝ་ཎྞ་ནཱ.

ཨེ་ཏྟཱ་ཝ་ཏཱ ཙ ཏི་ཝ་གྒ་ས་ངྒ་ཧི་ཏ་སྶ

ས་མ་ཏིཾ་ས་ཀ་ཐཱ་པ་ཊི་མ་ཎྜི་ཏ་སྶ པ་ཊི་ས་མྦྷི་དཱ་མ་གྒ་སྶ ཨ་ཏྠ་ཝ་ཎྞ་ནཱ ནི་ཊྛི་ཏཱ ཧོ་ཏཱི་ཏི.

ནི་ག་མ་ན་ཀ་ཐཱ

མ་ཧཱ་ཝ་གྒོ མ་ཛ྄ཛྷི་མོ ཙ, ཙཱུ་ལ༹་ཝ་གྒོ ཙ ནཱ་མ་ཏོ;

ཏ་ཡོ ཝ་གྒཱ ཨི་དྷ ཝུ་ཏྟཱ, པ་མཱ་ཎ་པ་ཊི་པཱ་ཊི་ཡཱ.

ཝ་གྒེ ཝ་གྒེ ད་ས ད་ས, ཀ་ཐཱ ཡཱ ཏཱ ཨུ་དཱི་རི་ཏཱ;

ཨུ་དྡཱ་ན་གཱ་ཐཱ ས་བྦཱ་སཾ, ཨི་མཱ ཏཱ་སཾ ཡ་ཐཱ་ཀྐ་མཾ.

ཉཱ་ཎཾ དི་ཊྛི ཨཱ་ནཱ་པཱ་ནཾ, ཨི་ནྡྲི་ཡཾ ཝི་མོ་ཀྑ་པ་ཉྩ་མཾ;

ག་ཏི ཀ་མྨཾ ཝི་པ་ལླཱ་སོ, མ་གྒོ མ་ཎྜོ་ཏི ཏཱ ད་ས.

ཡུ་ག་ན་དྡྷ་ས་ཙྩ་བོ་ཛ྄ཛྷ་ངྒཱ, མེ་ཏྟཱ ཝི་རཱ་ག་པ་ཉྩ་མཱ;

པ་ཊི་ས་མྦྷི་དཱ དྷ་མྨ་ཙ་ཀྐཾ, ལོ་ཀུ་ཏྟ་ར་བ་ལ་སུ་ཉྙ་ཏཱ.

པ་ཉྙཱ ཨི་དྡྷི ཨ་བྷི་ས་མ་ཡོ, ཝི་ཝེ་ཀོ ཙ་རི་ཡ་པ་ཉྩ་མོ;

པཱ་ཊི་ཧཱི་རཾ ས་མ་སཱི་ས-ས་ཏི ཝི་པ་སྶ་ན་མཱ་ཏི་ཀཱ.

ཡོ སོ སུ་ག་ཏ་སུ་ཏཱ་ནཾ, ཨ་དྷི་པ་ཏི་བྷཱུ་ཏེ་ན བྷཱུ་ཏ་ཧི་ཏ་ར་ཏི་ནཱ;

ཐེ་རེ་ན ཐི་ར་གུ་ཎ་ཝ་ཏཱ, ཝུ་ཏྟོ པ་ཊི་ས་མྦྷི་དཱ་མ་གྒོ.

ཏ་སྶཏྠ་ཝ་ཎྞ་ནཱ ཡཱ, པུ་བྦ་ཊྛ་ཀ་ཐཱ་ན་ཡཾ ཏ་ཐཱ ཡུ་ཏྟིཾ;

ནི་སྶཱ་ཡ མ་ཡཱ་ར་དྡྷཱ, ནི་ཊྛཱ་ན་མུ་པཱ་ག་ཏཱ ཨེ་སཱ.

ཡཾ ཏཾ ཨུ་ཏྟ་ར་མ་ནྟཱི, མ་ནྟི་གུ་ཎ་ཡུ་ཏོ ཡུ་ཏོ ཙ ས་དྡྷཱ་ཡ;

ཀཱ་ར་ཡི མ་ཧཱ་ཝི་ཧཱ་རེ, པ་རི་ཝེ་ཎ་མ་ནེ་ཀ་སཱ་དྷུ་གུ་ཎཾ.

ཐེ་རེ་ནེ་ཏྠ ནི་ཝ་ས་ཏཱ, ས་མཱ་པི་ཏཱ་ཡཾ མ་ཧཱ་བྷི་དྷཱ་ནེ་ན;

ཏ་ཏི་ཡེ ཝ་སྶེ ཙུ་ཏི་ཏོ, མོ་གྒ་ལླཱ་ན་སྶ བྷཱུ་པ་ཏི་ནོ.

ས་མ་ཡཾ ཨ་ནུ་ལོ་མེ་ནྟཱི, ཐེ་རཱ་ནཾ ཐེ་ར་ཝཱ་ད་དཱི་པཱ་ནཾ;

ནི་ཊྛཾ ག་ཏཱ ཡ་ཐཱ་ཡཾ, ཨ་ཊྛ་ཀ་ཐཱ ལོ་ཀ་ཧི་ཏ་ཛ་ན་ནཱི.

དྷ་མྨཾ ཨ་ནུ་ལོ་མེ་ནྟཱ, ཨ་ཏྟ་ཧི་ཏཾ པ་ར་ཧི་ཏ་ཉྩ སཱ་དྷེ་ནྟཱ;

ནི་ཊྛཾ ག་ཙྪ་ནྟུ ཏ་ཐཱ, མ་ནོ་ར་ཐཱ ས་བྦ་ས་ཏྟཱ་ནཾ.

ས་དྡྷ་མྨ་པ་ཀཱ་སི་ནི་ཡཱ, ཨ་ཊྛ་ཀ་ཐཱ་ཡེ་ཏྠ ག་ཎི་ཏ་ཀུ་ས་ལེ་ཧི;

ག་ཎི་ཏཱ ཏུ བྷཱ་ཎ་ཝཱ་རཱ, ཝི་ཉྙེ་ཡྻཱ ཨ་ཊྛ་པ་ཉྙཱ་ས.

ཨཱ་ནུ་ཊྛུ་བྷེ་ན ཨ་སྶཱ, ཚ་ནྡོ་བ་ནྡྷེ་ན ག་ཎི་ཡ་མཱ་ནཱ ཏུ;

ཙུ་དྡ་ས་ས་ཧ་སྶ་ས་ངྑཱ, གཱ་ཐཱ་ཡོ པ་ཉྩ ཙ ས་ཏཱ་ནི.

སཱ་ས་ན་ཙི་ར་ཊྛི་ཏ་ཏྠཾ, ལོ་ཀ་ཧི་ཏ་ཏྠ་ཉྩ སཱ་ད་རེ་ན མ་ཡཱ;

པུ་ཉྙཾ ཨི་མཾ ར་ཙ་ཡ་ཏཱ, ཡཾ པ་ཏྟ་མ་ན་པྤ་ཀཾ ཝི་པུ་ལཾ.

པུ་ཉྙེ་ན ཏེ་ན ལོ་ཀོ, ས་དྡྷ་མྨ་ར་སཱ་ཡ་ནཾ ད་ས་བ་ལ་སྶ;

ཨུ་པ་བྷུ་ཉྫི་ཏྭཱ ཝི་མ་ལཾ, པ་པྤོ་ཏུ སུ་ཁཾ སུ་ཁེ་ནེ་ཝཱ་ཏི.

ས་དྡྷ་མྨ་པྤ་ཀཱ་སི་ནཱི ནཱ་མ

པ་ཊི་ས་མྦྷི་དཱ་མ་གྒ་པྤ་ཀ་ར་ཎ་སྶ ཨ་ཊྛ་ཀ་ཐཱ ནི་ཊྛི་ཏཱ.