༣. ཨ་བྷི་ས་མ་ཡ་ཀ་ཐཱ
ཨ་བྷི་ས་མ་ཡ་ཀ་ཐཱ་ཝ་ཎྞ་ནཱ
༡༩. ཨི་དཱ་ནི ཨི་དྡྷི་ཀ་ཐཱ་ན་ནྟ་རཾ པ་ར་མི་དྡྷི་བྷཱུ་ཏཾ ཨ་བྷི་ས་མ་ཡཾ ད་སྶེ་ནྟེ་ན ཀ་ཐི་ཏཱ་ཡ ཨ་བྷི་ས་མ་ཡ་ཀ་ཐཱ་ཡ ཨ་པུ་བྦ་ཏྠཱ་ནུ་ཝ་ཎྞ་ནཱ. ཏ་ཏྠ ཨ་བྷི་ས་མ་ཡོཏི ས་ཙྩཱ་ནཾ ཨ་བྷི་མུ་ཁེ་ན ས་མཱ་ག་མོ, པ་ཊི་ཝེ་དྷོ་ཏི ཨ་ཏྠོ. ཀེ་ན ཨ་བྷི་ས་མེ་ཏཱིཏི ཀིཾ ཝུ་ཏྟཾ ཧོ་ཏི? ‘‘ཨེ་ཝཾ མ་ཧ་ཏྠི་ཡོ ཁོ, བྷི་ཀྑ་ཝེ, དྷ་མྨཱ་བྷི་ས་མ་ཡོ’’ཏི་ཨཱ་དཱི་སུ (སཾ. ནི. ༢.༧༤) སུ་ཏྟ་པ་དེ་སུ ཡོ སོ ཨ་བྷི་ས་མ་ཡོ་ཏི ཝུ་ཏྟོ, ཏ་སྨིཾ ཨ་བྷི་ས་མ་ཡེ ཝ་ཏྟ་མཱ་ནེ ཨ་བྷི་ས་མེ་ཏཱ པུ་གྒ་ལོ ཀེ་ན དྷ་མྨེ་ན ས་ཙྩཱ་ནི ཨ་བྷི་ས་མེ་ཏི, ཨ་བྷི་མུ་ཁོ ཧུ་ཏྭཱ ས་མཱ་ག་ཙྪ་ཏི, པ་ཊི་ཝི་ཛ྄ཛྷ་ཏཱི་ཏི ཝུ་ཏྟཾ ཧོ་ཏཱི་ཏི. ཨ་ཡཾ ཏཱ་ཝ ཙོ་ད་ཀ་སྶ པུ་ཙྪཱ. ཙི་ཏྟེ་ན ཨ་བྷི་ས་མེ་ཏཱིཏི ཙི་ཏྟཾ ཝི་ནཱ ཨ་བྷི་ས་མ་ཡཱ་བྷཱ་ཝ་ཏོ ཏ་ཐཱ ཝི་སྶ་ཛྫ་ནཾ. ཧ་ཉྩཱིཏི་ཨཱ་དི པུ་ན ཙོ་ད་ནཱ. ཧ་ཉྩི ཡ་དཱི་ཏི ཨ་ཏྠོ. ‘‘ཙི་ཏྟེ་ནཱ’’ཏི ཝུ་ཏྟ་ཏྟཱ ཏེ་ན ཧི ཨ་ཉྙཱ་ཎཱི ཨ་བྷི་ས་མེ་ཏཱིཏི ཨཱ་ཧ. ན ཨ་ཉྙཱ་ཎཱི ཨ་བྷི་ས་མེ་ཏཱིཏི ཙི་ཏྟ་མ་ཏྟེ་ནེ་ཝ ཨ་བྷི་ས་མ་ཡཱ་བྷཱ་ཝ་ཏོ པ་ཊི་ཀྑེ་པོ. ཉཱ་ཎེ་ན ཨ་བྷི་ས་མེ་ཏཱིཏི པ་ཊི་ཉྙཱ. པུ་ན ཧ་ཉྩཱིཏི་ཨཱ་དི ‘‘ཉཱ་ཎེ་ནཱ’’ཏི ཝུ་ཏྟ་ཏྟཱ ཨ་ཉྙཱ་ཎཱི ཨ་ཙི་ཏྟ་ཀོཏི ཙོ་ད་ནཱ. ན ཨ་ཙི་ཏྟ་ཀོ ཨ་བྷི་ས་མེ་ཏཱིཏི ཨ་ཙི་ཏྟ་ཀ་སྶ ཨ་བྷི་ས་མ་ཡཱ་བྷཱ་ཝ་ཏོ པ་ཊི་ཀྑེ་པོ. ཙི་ཏྟེ་ན ཙཱཏི་ཨཱ་དི པ་ཊི་ཉྙཱ. པུ་ན ཧ་ཉྩཱིཏི་ཨཱ་དི ས་བྦ་ཙི་ཏྟ་ཉཱ་ཎ་སཱ་དྷཱ་ར་ཎ་ཝ་སེ་ན ཙོ་ད་ནཱ. སེ་ས་ཙོ་ད་ནཱ་ཝི་སྶ་ཛྫ་ནེ་སུ་པི ཨེ་སེ་ཝ ན་ཡོ.
པ་ར་ཏོ པ་ན ཀ་མྨ་སྶ་ཀ་ཏ་ཙི་ཏྟེ་ན ཙ ཉཱ་ཎེ་ན ཙཱཏི ཀ་མྨ་སྶ་ཀཱ ས་ཏྟཱ་ཏི ཨེ་ཝཾ ཀ་མྨ་སྶ་ཀ་ཏཱ་ཡ པ་ཝ་ཏྟ་ཙི་ཏྟེ་ན ཙ ཉཱ་ཎེ་ན ཙ. ས་ཙྩཱ་ནུ་ལོ་མི་ཀ་ཙི་ཏྟེ་ན ཙ ཉཱ་ཎེ་ན ཙཱཏི ས་ཙྩ་པ་ཊི་ཝེ་དྷ་སྶ ཨ་ནུ་ཀཱུ་ལ་ཏྟཱ ས་ཙྩཱ་ནུ་ལོ་མི་ཀ་ས་ངྑཱ་ཏེ་ན ཝི་པ་སྶ་ནཱ་ས་མྤ་ཡུ་ཏྟ་ཙི་ཏྟེ་ན ཙ ཝི་པ་སྶ་ནཱ་ཉཱ་ཎེ་ན ཙ. ཀ་ཐནྟི ཡ་ཐཱ ཨ་བྷི་ས་མ་ཡོ ཧོ་ཏི, ཏ་ཐཱ ཀ་ཐེ་ཏུ་ཀ་མྱ་ཏཱ པུ་ཙྪཱ. ཨུ་པྤཱ་དཱ་དྷི་པ་ཏེ་ཡྻནྟི ཡ་སྨཱ ཙི་ཏྟ་སྶ ཨུ་པྤཱ་དེ ཨ་ས་ཏི ཙེ་ཏ་སི་ཀཱ་ནཾ ཨུ་པྤཱ་དོ ན་ཏྠི. ཨཱ་ར་མྨ་ཎ་གྒ་ཧ་ཎ་ཉྷི ཙི་ཏྟཾ ཏེ་ན ས་ཧ ཨུ་པྤ་ཛྫ་མཱ་ནཱ ཙེ་ཏ་སི་ཀཱ ཀ་ཐཾ ཨཱ་ར་མྨ་ཎེ ཨ་གྒ་ཧི་ཏེ ཨུ་པྤ་ཛྫི་སྶ་ནྟི. ཨ་བྷི་དྷ་མྨེ་པི ཙི་ཏྟུ་པྤཱ་དེ་ནེ་ཝ ཙེ་ཏ་སི་ཀཱ ཝི་བྷ་ཏྟཱ, ཏ་སྨཱ མ་གྒ་ཉཱ་ཎ་སྶ ཨུ་པྤཱ་དེ ཨ་དྷི་པ་ཏི་བྷཱུ་ཏཾ ཙི་ཏྟ་ནྟི ཨ་ཏྠོ. ཉཱ་ཎ་སྶཱཏི མ་གྒ་ཉཱ་ཎ་སྶ. ཧེ་ཏུ པ་ཙྩ་ཡོ ཙཱཏི ཛ་ན་ཀོ ཙ ཨུ་པ་ཏྠ་མྦྷ་ཀོ ཙ. ཏཾ་ས་མྤ་ཡུ་ཏྟནྟི ཏེ་ན ཉཱ་ཎེ་ན ས་མྤ་ཡུ་ཏྟཾ. ནི་རོ་དྷ་གོ་ཙ་རནྟི ནི་བྦཱ་ནཱ་ར་མྨ་ཎཾ. ད་སྶ་ནཱ་དྷི་པ་ཏེ་ཡྻནྟི སེ་སཱ་ནཾ ད་སྶ་ན་ཀི་ཙྩཱ་བྷཱ་ཝཱ ནི་བྦཱ་ན་ད་སྶ་ནེ ཨ་དྷི་པ་ཏི་བྷཱུ་ཏཾ. ཙི་ཏྟ་སྶཱཏི མ་གྒ་ས་མྤ་ཡུ་ཏྟ་ཙི་ཏྟ་སྶ. ཏཾ་ས་མྤ་ཡུ་ཏྟནྟི ཏེ་ན ཙི་ཏྟེ་ན ས་མྤ་ཡུ་ཏྟཾ.
༢༠. ཡ་སྨཱ ཨེ་ཏ་མྤི པ་རི་ཡཱ་ཡཾ, ན ཀེ་ཝ་ལཾ ཙི་ཏྟ་ཉཱ་ཎེ་ཧི་ཡེ་ཝ ཨ་བྷི་ས་མ་ཡོ, ཨ་ཐ ཁོ ས་བྦེ་པི མ་གྒ་ས་མྤ་ཡུ་ཏྟ་ཙི་ཏྟ་ཙེ་ཏ་སི་ཀཱ དྷ་མྨཱ ས་ཙྩཱ་བྷི་ས་མ་ཡ་ཀི་ཙྩ་སཱ་དྷ་ན་ཝ་སེ་ན ཨ་བྷི་ས་མ་ཡོ ནཱ་མ ཧོ་ནྟི, ཏ་སྨཱ ཏ་མྤི པ་རི་ཡཱ་ཡཾ ད་སྶེ་ཏུ་ཀཱ་མོ ཀིཾ ནུ ཨེ་ཏྟ་ཀོ་ཡེ་ཝ ཨ་བྷི་ས་མ་ཡོཏི པུ་ཙྪི་ཏྭཱ ན ཧཱིཏི ཏཾ ཝ་ཙ་ནཾ པ་ཊི་ཀྑི་པི་ཏྭཱ ལོ་ཀུ་ཏྟ་ར་མ་གྒ་ཀྑ་ཎེཏི་ཨཱ་དི་མཱ་ཧ. ད་སྶ་ནཱ་བྷི་ས་མ་ཡོཏི ད་སྶ་ན་བྷཱུ་ཏོ ཨ་བྷི་ས་མ་ཡོ. ཨེ་ས ན་ཡོ སེ་སེ་སུ་པི. ས་ཙྩཱཏི ས་ཙྩ་ཉཱ་ཎཱ་ནི. མ་གྒ་ཉཱ་ཎ་མེ་ཝ ནི་བྦཱ་ནཱ་ནུ་པ་སྶ་ན་ཊྛེ་ན ཝི་པ་སྶ་ནཱ. ཝི་མོ་ཀྑོཏི མ་གྒ་ཝི་མོ་ཀྑོ. ཝི་ཛྫཱཏི མ་གྒ་ཉཱ་ཎ་མེ་ཝ. ཝི་མུ་ཏྟཱིཏི ས་མུ་ཙྪེ་ད་ཝི་མུ་ཏྟི. ནི་བྦཱ་ནཾ ཨ་བྷི་ས་མཱི་ཡ་ཏཱི་ཏི ཨ་བྷི་ས་མ་ཡོ, སེ་སཱ ཨ་བྷི་ས་མེ་ནྟི ཨེ་ཏེ་ཧཱི་ཏི ཨ་བྷི་ས་མ་ཡཱ.
༢༡. པུ་ན མ་གྒ་ཕ་ལ་ཝ་སེ་ན ཨ་བྷི་ས་མ་ཡཾ བྷི་ནྡི་ཏྭཱ ད་སྶེ་ཏུཾ ཀིཾ ནཱུཏི་ཨཱ་དི་མཱ་ཧ. ཕ་ལ་ཀྑ་ཎེ པ་ནེ་ཏྠ ཡ་སྨཱ ས་མུ་ཙྪེ་ད་ན་ཊྛེ་ན ཁ་ཡེ ཉཱ་ཎཾ ན ལ་བྦྷ་ཏི, ཏ་སྨཱ པ་ཊི་པྤ་སྶ་དྡྷ་ཊྛེ་ན ཨ་ནུ་པྤཱ་དེ ཉཱ་ཎནྟི ཝུ་ཏྟཾ. སེ་སཾ པ་ན ཡ་ཐཱ་ནུ་རཱུ་པཾ ཝེ་དི་ཏ་བྦ་ནྟི. ཨི་དཱ་ནི ཡ་སྨཱ ཀི་ལེ་ས་པྤ་ཧཱ་ནེ ས་ཏི ཨ་བྷི་ས་མ་ཡོ ཧོ་ཏི, ཨ་བྷི་ས་མ་ཡེ ཙ ས་ཏི ཀི་ལེ་ས་པྤ་ཧཱ་ནཾ ཧོ་ཏི, ཏ་སྨཱ ཙོ་ད་ནཱ་པུ་བྦ་ངྒ་མཾ ཀི་ལེ་ས་པྤ་ཧཱ་ནཾ ད་སྶེ་ཏུ་ཀཱ་མོ ཡྭཱ་ཡནྟི་ཨཱ་དི་མཱ་ཧ. ཏ་ཏྠ ཡྭཱ་ཡནྟི ཡོ ཨ་ཡཾ མ་གྒ་ཊྛོ ཨ་རི་ཡ་པུ་གྒ་ལོ. ཨེ་ཝ་མཱ་དི་ཀཱ་ནི པ་ནེ་ཏྠ ཙ་ཏྟཱ་རི ཝ་ཙ་ནཱ་ནི ཙོ་ད་ཀ་སྶ པུ་ཙྪཱ. པུ་ན ཨ་ཏཱི་ཏེ ཀི་ལེ་སེ པ་ཛ་ཧ་ཏཱིཏི ཨི་དཾ ཙོ་ད་ནཱ་ཡ ཨོ་ཀཱ་ས་དཱ་ན་ཏྠཾ ཝི་སྶ་ཛྫ་ནཾ. ཁཱི་ཎནྟི བྷ་ངྒ་ཝ་སེ་ན ཁཱི་ཎཾ. ནི་རུ་དྡྷནྟི ས་ནྟཱ་ན་ཝ་སེ་ན པུ་ན་པྤུ་ནཾ ཨ་ནུ་པྤ་ཏྟི་ཡཱ ནི་རུ་དྡྷཾ. ཝི་ག་ཏནྟི ཝ་ཏྟ་མཱ་ན་ཀྑ་ཎ་ཏོ ཨ་པ་ག་ཏཾ. ཝི་ག་མེ་ཏཱིཏི ཨ་པ་ག་མ་ཡ་ཏི. ཨ་ཏྠ་ངྒ་ཏནྟི ཨ་བྷཱ་ཝཾ ག་ཏཾ. ཨ་ཏྠ་ངྒ་མེ་ཏཱིཏི ཨ་བྷཱ་ཝཾ ག་མ་ཡ་ཏི. ཏ་ཏྠ དོ་སཾ ད་སྶེ་ཏྭཱ ན ཨ་ཏཱི་ཏེ ཀི་ལེ་སེ པ་ཛ་ཧ་ཏཱིཏི པ་ཊི་ཀྑི་ཏྟཾ. ཨ་ནཱ་ག་ཏ་ཙོ་ད་ནཱ་ཡ ཨ་ཛཱ་ཏནྟི ཛཱ་ཏིཾ ཨ་པྤ་ཏྟཾ. ཨ་ནི་བྦ་ཏྟནྟི ས་བྷཱ་ཝཾ ཨ་པྤ་ཏྟཾ. ཨ་ནུ་པྤ་ནྣནྟི ཨུ་པྤཱ་ད་ཏོ པ་བྷུ་ཏི ཨུ་དྡྷཾ ན པ་ཊི་པ་ནྣཾ. ཨ་པཱ་ཏུ་བྷཱུ་ཏནྟི པ་ཙྩུ་པྤ་ནྣ་བྷཱ་ཝེ་ན ཙི་ཏྟ་སྶ ཨ་པཱ་ཏུ་བྷཱུ་ཏཾ. ཨ་ཏཱི་ཏཱ་ནཱ་ག་ཏེ པ་ཛ་ཧ་ཏོ པ་ཧཱ་ཏ་བྦཱ་ནཾ ན་ཏྠི་ཏཱ་ཡ ཨ་ཕ་ལོ ཝཱ་ཡཱ་མོ ཨཱ་པ་ཛྫ་ཏཱི་ཏི ཏ་དུ་བྷ་ཡ་མྤི པ་ཊི་ཀྑི་ཏྟཾ. ར་ཏྟོ རཱ་གཾ པ་ཛ་ཧ་ཏཱིཏི ཝ་ཏྟ་མཱ་ནེ་ན རཱ་གེ་ན ར་ཏྟོ ཏ་མེ་ཝ རཱ་གཾ པ་ཛ་ཧ་ཏི. ཝ་ཏྟ་མཱ་ན་ཀི་ལེ་སེ་སུ་པི ཨེ་སེ་ཝ ན་ཡོ. ཐཱ་མ་ག་ཏོཏི ཐི་ར་ས་བྷཱ་ཝཾ ག་ཏོ. ཀ་ཎྷ་སུ་ཀྐཱཏི ཨ་ཀུ་ས་ལཱ ཙ ཀུ་ས་ལཱ ཙ དྷ་མྨཱ ཡུ་ག་ན་དྡྷཱ ས་མ་མེ་ཝ ཝ་ཏྟ་ནྟཱིཏི ཨཱ་པ་ཛྫ་ཏཱི་ཏི ཨ་ཏྠོ. སཾ་ཀི་ལེ་སི་ཀཱཏི ཨེ་ཝཾ སཾ་ཀི་ལེ་སཱ་ནཾ ས་མྤ་ཡུ་ཏྟ་བྷཱ་ཝེ ས་ཏི སཾ་ཀི་ལེ་སེ ནི་ཡུ་ཏྟཱ མ་གྒ་བྷཱ་ཝ་ནཱ ཧོ་ཏཱིཏི ཨཱ་པ་ཛྫ་ཏཱི་ཏི ཨ་ཏྠོ. ཨེ་ཝཾ པ་ཙྩུ་པྤ་ནྣེ པ་ཛ་ཧ་ཏོ ཝཱ་ཡཱ་མེ་ན ས་དྡྷིཾ པ་ཧཱ་ཏ་བྦཱ་ནཾ ཨ་ཏྠི་ཏཱ་ཡ སཾ་ཀི་ལེ་སི་ཀཱ ཙ མ་གྒ་བྷཱ་ཝ་ནཱ ཧོ་ཏི, ཝཱ་ཡཱ་མོ ཙ ཨ་ཕ་ལོ ཧོ་ཏི. ན ཧི པ་ཙྩུ་པྤ་ནྣཱ་ནཾ ཀི་ལེ་སཱ་ནཾ ཙི་ཏྟ་ཝི་པྤ་ཡུ་ཏྟ་ཏཱ ནཱ་མ ཨ་ཏྠཱི་ཏི.
ན ཧཱིཏི ཙ་ཏུ་དྷཱ ཝུ་ཏྟ་སྶ ཝ་ཙ་ན་སྶ པ་ཊི་ཀྑེ་པོ. ཨ་ཏྠཱིཏི པ་ཊི་ཛཱ་ན་ནཾ. ཡ་ཐཱ ཀ་ཐཾ ཝི་ཡཱཏི ཨ་ཏྠི་བྷཱ་ཝ་སྶ ཨུ་དཱ་ཧ་ར་ཎ་ད་སྶ་ན་ཏྠཾ པུ་ཙྪཱ. ཡ་ཐཱ ཨ་ཏྠི, ཏཾ ཀེ་ན པ་ཀཱ་རེ་ན ཝི་ཡ ཨ་ཏྠི, ཀིཾ ཝི་ཡ ཨ་ཏྠཱི་ཏི ཨ་ཏྠོ. སེ་ཡྻ་ཐཱ་པཱིཏི ཡ་ཐཱ ནཱ་མ. ཏ་རུ་ཎ་རུ་ཀྑོཏི ཕ་ལ་དཱ་ཡ་ཀ་བྷཱ་ཝ་དཱི་པ་ན་ཏྠཾ ཏ་རུ་ཎ་གྒ་ཧ་ཎཾ. ཨ་ཛཱ་ཏ་ཕ་ལོཏི ཕ་ལ་དཱ་ཡ་ཀ་ཏྟེ་པི ས་ཏི ཕ་ལ་གྒ་ཧ་ཎ་ཏོ པུ་རེ་ཀཱ་ལ་གྒ་ཧ་ཎཾ. ཏ་མེ་ནནྟི ཏཾ རུ་ཀྑཾ. ཨེ་ནནྟི ནི་པཱ་ཏ་མ་ཏྟཾ, ཏཾ ཨེ་ཏ་ནྟི ཝཱ ཨ་ཏྠོ. མཱུ་ལཾ ཚི་ནྡེ་ཡྻཱཏི མཱུ་ལ་ཏོ ཚི་ནྡེ་ཡྻ. ཨ་ཛཱ་ཏ་ཕ་ལཱཏི ཨ་ཛཱ་ཏཱ་ནི ཕ་ལཱ་ནི. ཨེ་ཝ་མེ་ཝནྟི ཨེ་ཝཾ ཨེ་ཝཾ. ཨུ་པྤཱ་དོ པ་ཝ་ཏྟཾ ནི་མི་ཏྟཾ ཨཱ་ཡཱུ་ཧ་ནཱཏི ཙ་ཏཱུ་ཧི་པི པ་ཙྩུ་པྤ་ནྣ་ཁ་ནྡྷ་ས་ནྟཱ་ན་མེ་ཝ ཝུ་ཏྟཾ. ཡ་སྨི་ཉྷི ཁ་ནྡྷ་ས་ནྟཱ་ནེ ཡཾ ཡཾ མ་གྒ་ཉཱ་ཎཾ ཨུ་པྤ་ཛྫ་ཏི, ཏེ་ན ཏེ་ན མ་གྒ་ཉཱ་ཎེ་ན པ་ཧཱ་ཏ་བྦཱ་ནཾ ཀི་ལེ་སཱ་ནཾ ཏཾ ཁ་ནྡྷ་ས་ནྟཱ་ནཾ ཨ་བཱི་ཛཾ ཧོ་ཏི, ཏ་སྶ ཨ་བཱི་ཛ་བྷཱུ་ཏ་ཏྟཱ ཏ་པྤ་ཙྩ་ཡཱ ཏེ ཏེ ཀི་ལེ་སཱ ཨ་ནུ་པྤ་ནྣཱ ཨེ་ཝ ན ཨུ་པྤ་ཛྫ་ནྟི. ཨཱ་དཱི་ན་ཝཾ དི་སྭཱཏི ཨ་ནི་ཙྩཱ་དི་ཏོ ཨཱ་དཱི་ན་ཝཾ དི་སྭཱ. ཨ་ནུ་པྤཱ་དོཏི་ཨཱ་དཱི་ཧི ཙ་ཏཱུ་ཧི ནི་བྦཱ་ན་མེ་ཝ ཝུ་ཏྟཾ. ཙི་ཏྟཾ པ་ཀྑ་ནྡ་ཏཱིཏི མ་གྒ་ས་མྤ་ཡུ་ཏྟཾ ཙི་ཏྟཾ པ་ཀྑ་ནྡ་ཏི. ཧེ་ཏུ་ནི་རོ་དྷཱ དུ་ཀྑ་ནི་རོ་དྷོཏི ཀི་ལེ་སཱ་ནཾ བཱི་ཛ་བྷཱུ་ཏ་སྶ ས་ནྟཱ་ན་སྶ ཨ་ནུ་པྤཱ་ད་ནི་རོ་དྷཱ ཨ་ནཱ་ག་ཏ་ཀྑ་ནྡྷ་བྷཱུ་ཏ་སྶ དུ་ཀྑ་སྶ ཧེ་ཏུ་བྷཱུ་ཏཱ་ནཾ ཀི་ལེ་སཱ་ནཾ ཨ་ནུ་པྤཱ་ད་ནི་རོ་དྷོ ཧོ་ཏི. ཨེ་ཝཾ དུ་ཀྑ་སྶ ཧེ་ཏུ་བྷཱུ་ཏ་ཀི་ལེ་སཱ་ནཾ ཨ་ནུ་པྤཱ་ད་ནི་རོ་དྷཱ དུ་ཀྑ་སྶ ཨ་ནུ་པྤཱ་ད་ནི་རོ་དྷོ ཧོ་ཏི. ཨེ་ཝཾ ཀི་ལེ་ས་པྤ་ཧཱ་ན་ཡུ་ཏྟི་ས་བྦྷཱ་ཝ་ཏོ ཨེ་ཝ ཨ་ཏྠི མ་གྒ་བྷཱ་ཝ་ནཱཏི་ཨཱ་དི་མཱ་ཧ. ཨ་ཊྛ་ཀ་ཐཱ་ཡཾ (ཝི་སུ་དྡྷི. ༢.༨༣༢) པ་ན ‘‘ཨེ་ཏེ་ན ཀིཾ དཱི་པི་ཏཾ ཧོ་ཏི? བྷཱུ་མི་ལ་དྡྷཱ་ནཾ ཀི་ལེ་སཱ་ནཾ པ་ཧཱ་ནཾ དཱི་པི་ཏཾ ཧོ་ཏི. བྷཱུ་མི་ལ་དྡྷཱ པ་ན ཀིཾ ཨ་ཏཱི་ཏཱ ཨ་ནཱ་ག་ཏཱ, ཨུ་དཱ་ཧུ པ་ཙྩུ་པྤ་ནྣཱ་ཏི? བྷཱུ་མི་ལ་དྡྷུ་པྤ་ནྣཱ་ཡེ་ཝ ནཱ་མཱ’’ཏི ཝ་ཏྭཱ ཀ་ཐི་ཏ་ཀི་ལེ་ས་པྤ་ཧཱ་ན་སྶ ཝི་ཏྠཱ་ར་ཀ་ཐཱ སུ་ཏ་མ་ཡ་ཉཱ་ཎ་ཀ་ཐཱ་ཡ མ་གྒ་ས་ཙྩ་ནི་དྡེ་ས་ཝ་ཎྞ་ནཱ་ཡཾ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ, ཨི་དྷ པ་ན མ་གྒ་ཉཱ་ཎེ་ན པ་ཧཱ་ཏ་བྦཱ ཀི་ལེ་སཱ་ཡེ་ཝ ཨ་དྷི་པྤེ་ཏཱ་ཏི.
ཨ་བྷི་ས་མ་ཡ་ཀ་ཐཱ་ཝ་ཎྞ་ནཱ ནི་ཊྛི་ཏཱ.