༤. ཝི་ཝེ་ཀ་ཀ་ཐཱ
ཝི་ཝེ་ཀ་ཀ་ཐཱ་ཝ་ཎྞ་ནཱ
༢༢. ཨི་དཱ་ནི པ་ཧཱ་ནཱ་ཝ་སཱ་ནཱ་ཡ ཨ་བྷི་ས་མ་ཡ་ཀ་ཐཱ་ཡ ཨ་ན་ནྟ་རཾ པ་ཧཱ་ནཱ་ཀཱ་རཾ ད་སྶེ་ནྟེ་ན ཀ་ཐི་ཏཱ་ཡ སུ་ཏྟ་ནྟ་པུ་བྦ་ངྒ་མཱ་ཡ ཝི་ཝེ་ཀ་ཀ་ཐཱ་ཡ ཨ་པུ་བྦ་ཏྠཱ་ནུ་ཝ་ཎྞ་ནཱ. ཏ་ཏྠ སུ་ཏྟ་ནྟེ ཏཱ་ཝ ཡེ ཀེ་ཙཱིཏི ཨ་ན་ཝ་སེ་ས་པ་རི་ཡཱ་དཱ་ནཾ. བ་ལ་ཀ་ར་ཎཱི་ཡཱཏི ཨཱུ་རུ་བ་ལེ་ན བཱ་ཧུ་བ་ལེ་ན ཀ་ཏྟ་བྦཱ. ཀ་མྨ་ནྟཱཏི དྷཱ་ཝ་ན་ལ་ངྒྷ་ན་ཀ་ས་ན་ཝ་པ་ནཱ་དཱི་ནི ཀ་མྨཱ་ནི. ཀ་རཱི་ཡ་ནྟཱིཏི བ་ལ་ཝ་ནྟེ་ཧི ཀ་རཱི་ཡ་ནྟི. སཱི་ལཾ ནི་སྶཱ་ཡཱཏི ཙ་ཏུ་པཱ་རི་སུ་དྡྷི་སཱི་ལཾ ནི་སྶ་ཡཾ ཀ་ཏྭཱ. བྷཱ་ཝེ་ཏཱིཏི བྷི་ནྣ་སཱི་ལ་སྶ བྷཱ་ཝ་ནཱ་བྷཱ་ཝ་ཏོ ཨི་དྷ པ་ན ལོ་ཀི་ཡ་ལོ་ཀུ་ཏྟ་རཱ མ་གྒ་བྷཱ་ཝ་ནཱ ཨ་དྷི་པྤེ་ཏཱ་ཏི. ཝི་ཝེ་ཀ་ནི་སྶི་ཏནྟི ཏ་ད་ངྒ་ཝི་ཝེ་ཀཾ ས་མུ་ཙྪེ་ད་ཝི་ཝེ་ཀཾ ནི་སྶ་ར་ཎ་ཝི་ཝེ་ཀཾ ནི་སྶི་ཏཾ. ཝི་ཝེ་ཀོཏི ཝི་ཝི་ཏྟ་ཏཱ. ཨ་ཡ་ཉྷི ཨ་རི་ཡ་མ་གྒ་བྷཱ་ཝ་ནཱ་ནུ་ཡུ་ཏྟོ ཡོ་གཱི ཝི་པ་སྶ་ནཱ་ཀྑ་ཎེ ཀི་ཙྩ་ཏོ ཏ་ད་ངྒ་ཝི་ཝེ་ཀ་ནི་སྶི་ཏཾ, ཨ་ཛ྄ཛྷཱ་ས་ཡ་ཏོ ནི་སྶ་ར་ཎ་ཝི་ཝེ་ཀ་ནི་སྶི་ཏཾ, མ་གྒ་ཀྑ་ཎེ ཀི་ཙྩ་ཏོ ས་མུ་ཙྪེ་ད་ཝི་ཝེ་ཀ་ནི་སྶི་ཏཾ, ཨཱ་ར་མྨ་ཎ་ཏོ ནི་སྶ་ར་ཎ་ཝི་ཝེ་ཀ་ནི་སྶི་ཏཾ བྷཱ་ཝེ་ཏི. ཨེ་ས ན་ཡོ ཝི་རཱ་ག་ནི་སྶི་ཏཱདཱི་སུ. ཝི་ཝེ་ཀོ་ཡེ་ཝ ཧི ཝི་ར་ཛྫ་ན་ཊྛེ་ན ཝི་རཱ་གོ, ནི་རོ་དྷ་ཊྛེ་ན ནི་རོ་དྷོ, ཝོ་ས་ཛྫ་ན་ཊྛེ་ན ཝོ་ས་གྒོ. ཨ་ཐ ཝཱ ཀི་ལེ་སེ་ཧི ཝི་ཝི་ཏྟ་ཏྟཱ ཝི་ཝེ་ཀོ, ཀི་ལེ་སེ་ཧི ཝི་ར་ཏྟ་ཏྟཱ ཝི་རཱ་གོ, ཀི་ལེ་སཱ་ནཾ ནི་རུ་དྡྷ་ཏྟཱ ནི་རོ་དྷོ, ཀི་ལེ་སཱ་ན་ཉྩ པ་རི་ཙྩ་ཏྟ་ཏྟཱ ཝི་སྶ་ཊྛ་ཏྟཱ, ནི་བྦཱ་ནེ་ཙ་ཏྟ་སྶ ཙ ཝི་སྶ་ཊྛ་ཏྟཱ ཝོ་ས་གྒོ. ཝོ་ས་གྒོ པ་ན དུ་ཝི་དྷོ པ་རི་ཙྩཱ་ག་ཝོ་ས་གྒོ ཙ པ་ཀྑ་ནྡ་ན་ཝོ་ས་གྒོ ཙ. ཏ་ཏྠ པ་རི་ཙྩཱ་ག་ཝོ་ས་གྒོཏི ཝི་པ་སྶ་ནཱ་ཀྑ་ཎེ ཏ་ད་ངྒ་ཝ་སེ་ན, མ་གྒ་ཀྑ་ཎེ ས་མུ་ཙྪེ་ད་ཝ་སེ་ན ཀི་ལེ་ས་པྤ་ཧཱ་ནཾ. པ་ཀྑ་ནྡ་ན་ཝོ་ས་གྒོཏི ཝི་པ་སྶ་ནཱ་ཀྑ་ཎེ ཏ་ནྣི་ནྣ་བྷཱ་ཝེ་ན, མ་གྒ་ཀྑ་ཎེ ཨཱ་ར་མྨ་ཎ་ཀ་ར་ཎེ་ན ནི་བྦཱ་ན་པ་ཀྑ་ནྡ་ནཾ. ཏ་དུ་བྷ་ཡ་མྤི ཨི་མ་སྨིཾ ལོ་ཀི་ཡ་ལོ་ཀུ་ཏྟ་ར་མི་སྶ་ཀེ ཨ་ཏྠ་ཝ་ཎྞ་ནཱ་ན་ཡེ ཝ་ཊྚ་ཏི. ཏ་ཐཱ ཧི ཨ་ཡཾ ས་མྨཱ་དི་ཊྛི་ཨཱ་དཱི་སུ ཨེ་ཀེ་ཀོ དྷ་མྨོ ཡ་ཐཱ་ཝུ་ཏྟེ་ན པ་ཀཱ་རེ་ན ཀི་ལེ་སེ ཙ པ་རི་ཙྩ་ཛ་ཏི, ནི་བྦཱ་ན་ཉྩ པ་ཀྑ་ནྡ་ཏི. ཝོ་ས་གྒ་པ་རི་ཎཱ་མིནྟི ཨི་མི་ནཱ པ་ན ས་ཀ་ལེ་ན ཝ་ཙ་ནེ་ན ཝོ་ས་གྒ་ཏྠཾ པ་རི་ཎཱ་མི་ཏཾ པ་རི་ཎ་ཏཾ, པ་རི་པ་ཙྩི་ཏཾ པ་རི་པ་ཀྐ་ཉྩཱ་ཏི ཝུ་ཏྟཾ ཧོ་ཏི. ཨ་ཡ་མྤི ཨ་རི་ཡ་མ་གྒ་བྷཱ་ཝ་ནཱ་ནུ་ཡུ་ཏྟོ བྷི་ཀྑུ ཡ་ཐཱ ས་མྨཱ་དི་ཊྛི་ཨཱ་དཱི་སུ ཨེ་ཀེ་ཀོ དྷ་མྨོ ཀི་ལེ་ས་པ་རི་ཙྩཱ་ག་ཝོ་ས་གྒ་ཏྠ་ཉྩ ནི་བྦཱ་ན་པ་ཀྑ་ནྡ་ན་ཝོ་ས་གྒ་ཏྠ་ཉྩ པ་རི་པ་ཙྩ་ཏི, ཡ་ཐཱ ཙ པ་རི་པ་ཀྐོ ཧོ་ཏི, ཏ་ཐཱ ནཾ བྷཱ་ཝེ་ཏི.
༢༣. བཱི་ཛ་གཱ་མ་བྷཱུ་ཏ་གཱ་མཱཏི ཨེ་ཏྠ མཱུ་ལ་བཱི་ཛཾ ཁ་ནྡྷ་བཱི་ཛཾ ཨ་གྒ་བཱི་ཛཾ ཕ་ལུ༹་བཱི་ཛཾ བཱི་ཛ་བཱི་ཛ་ནྟི (པཱ་ཙི. ༩༡) པ་ཉྩ་ཝི་དྷཾ བཱི་ཛཾ, བཱི་ཛ་གཱ་མོ ནཱ་མ བཱི་ཛ་ས་མཱུ་ཧོ་ཏི ཨ་ཏྠོ. ཏ་དེ་ཝ པ་ན ས་མྤ་ནྣ་ནཱི་ལ་ངྐུ་ར་པཱ་ཏུ་བྷཱ་ཝ་ཏོ པ་ཊྛཱ་ཡ བྷཱུ་ཏ་གཱ་མོ ནཱ་མ, བྷཱུ་ཏཱ་ནཾ ཛཱ་ཏཱ་ནཾ ནི་བྦ་ཏྟ་མཱུ་ལ་ནཱི་ལ་ངྐུ་རཱ་ནཾ ས་མཱུ་ཧོ་ཏི ཨ་ཏྠོ. དེ་ཝ་ཏཱ་པ་རི་གྒ་ཧེ ས་ཏི ནཱི་ལ་ངྐུ་ར་ཀཱ་ལ་ཏོ པ་བྷུ་ཏི ཧོ་ཏཱི་ཏི ཏེ་སཾ དེ་ཝ་ཏཱ་ས་ངྑཱ་ཏཱ་ནཾ བྷཱུ་ཏཱ་ནཾ གཱ་མོ་ཏི་པི བྷཱུ་ཏ་གཱ་མོ་ཏི ཝ་ད་ནྟི. ཝུ་དྡྷིནྟི ཨ་ངྐུ་རཱ་དི་ཝ་སེ་ན. ཝི་རུ་ལ༹ྷིནྟི ཁ་ནྡྷཱ་དི་ཝ་སེ་ན. ཝེ་པུ་ལླནྟི པུ་པྥཱ་དི་ཝ་སེ་ན. དྷ་མྨེ་སུ པ་ན ཝུ་དྡྷིནྟི ཨ་པུ་བྦ་དྷ་མྨ་པྤ་ཝ་ཏྟི་ཝ་སེ་ན. ཝི་རུ་ལི༹ནྟི ས་ཀི་ཙྩ་ཀ་ར་ཎ་སཱ་དྷ་ན་ཝ་སེ་ན. ཝེ་པུ་ལླནྟི ཀི་ཙྩ་ནི་པྥ་ཏྟི་ཝ་སེ་ན ཝི་པུ་ལ་བྷཱ་ཝ་ནྟི ཨ་ཏྠོ. ཝི་པུ་ལ་ཏྟ་ནྟི་པི པཱ་ཋོ. ཨ་ཐ ཝཱ ཨེ་ཏཱ་ནི ཏཱི་ཎི པ་དཱ་ནི སཱི་ལ་ས་མཱ་དྷི་པ་ཉྙཱ་ཧི་པི ཡོ་ཛེ་ནྟི.
མ་གྒ་ངྒ་ནི་དྡེ་ས་ཝ་ཎྞ་ནཱ
༢༤. སུ་ཏྟ་ནྟ་ནི་དྡེ་སེ ས་མྨཱ་དི་ཊྛི་ཡཱཏི སཱ་མི་ཝ་ཙ་ནཾ. ཛྷཱ་ན་ཝི་པ་སྶ་ནཱ་མ་གྒ་ཕ་ལ་ནི་བྦཱ་ནེ་སུ ལོ་ཀི་ཡ་ཝི་ར་ཏི་ས་མྤ་ཡུ་ཏྟ་ཙི་ཏྟེ ཙ ཡ་ཐཱ་ཡོ་གཾ ས་མྤ་ཡོ་ག་ཏོ ཙ ཨཱ་ར་མྨ་ཎ་ཏོ ཙ ཝ་ཏྟ་མཱ་ནཱ་ཡ ས་མྨཱ་དི་ཊྛི་ཡཱ སཱ་མ་ཉྙ་ལ་ཀྑ་ཎ་ཏོ ཨེ་ཀཱི་བྷཱུ་ཏཱ་ཡ ས་མྨཱ་དི་ཊྛི་ཡཱ. ཝི་ཀྑ་མྦྷ་ན་ཝི་ཝེ་ཀོཏི ཝི་ཀྑ་མྦྷ་ན་ཝ་སེ་ན དཱུ་རཱི་ཀ་ར་ཎ་ཝ་སེ་ན ཝི་ཝེ་ཀོ. ཀེ་སཾ? ནཱི་ཝ་ར་ཎཱ་ནཾ. ཏ་སྶ པ་ཋ་མཾ ཛྷཱ་ནཾ བྷཱ་ཝ་ཡ་ཏོཏི་ཨཱ་དི ཝི་ཀྑ་མྦྷ་ན་ཝ་སེ་ན པ་ཋ་མ་ཛ྄ཛྷཱ་ན་མེ་ཝ ཝུ་ཏྟཾ. ཏ་སྨིཾ ཝུ་ཏྟེ སེ་ས་ཛ྄ཛྷཱ་ནཱ་ནི་པི ཝུ་ཏྟཱ་ནེ་ཝ ཧོ་ནྟི. ཛྷཱ་ནེ་སུ་པི ས་མྨཱ་དི་ཊྛི་ཡཱ ཝི་ཛྫ་མཱ་ན་ཏྟཱ ས་མྨཱ་དི་ཊྛི་ཡཱ ཝི་ཝེ་ཀོ ནཱ་མ ཧོ་ཏི. ཏ་ད་ངྒ་ཝི་ཝེ་ཀོཏི ཏེ་ན ཏེ་ན ཝི་པ་སྶ་ནཱ་ཉཱ་ཎ་ངྒེ་ན ཝི་ཝེ་ཀོ. དི་ཊྛི་ག་ཏཱ་ནནྟི དི་ཊྛི་ཝི་ཝེ་ཀ་སྶ དུ་ཀྐ་ར་ཏྟཱ པ་དྷཱ་ན་ཏྟཱ ཙ དི་ཊྛི་ཝི་ཝེ་ཀོ་ཝ ཝུ་ཏྟོ. ཏ་སྨིཾ ཝུ་ཏྟེ ནི་ཙྩ་ས་ཉྙཱ་དི་ཝི་ཝེ་ཀོ་པི ཝུ་ཏྟོ་ཝ ཧོ་ཏི. ནི་བྦེ་དྷ་བྷཱ་གི་ཡཾ ས་མཱ་དྷིནྟི ཝི་པ་སྶ་ནཱ་ས་མྤ་ཡུ་ཏྟ་ས་མཱ་དྷིཾ. ས་མུ་ཙྪེ་ད་ཝི་ཝེ་ཀོཏི ཀི་ལེ་སཱ་ནཾ ས་མུ་ཙྪེ་དེ་ན ཝི་ཝེ་ཀོ. ལོ་ཀུ་ཏྟ་རཾ ཁ་ཡ་གཱ་མི་མ་གྒནྟི ཁ་ཡ་ས་ངྑཱ་ཏ་ནི་བྦཱ་ན་གཱ་མི་ལོ་ཀུ་ཏྟ་ར་མ་གྒཾ. པ་ཊི་པྤ་སྶ་དྡྷི་ཝི་ཝེ་ཀོཏི ཀི་ལེ་སཱ་ནཾ པ་ཊི་པྤ་སྶ་དྡྷི་ཡཱ ཝི་ཝེ་ཀོ. ནི་སྶ་ར་ཎ་ཝི་ཝེ་ཀོཏི ས་བྦ་ས་ངྑ་ཏ་ནི་སྶ་ར་ཎ་བྷཱུ་ཏོ ས་ངྑཱ་ར་ཝི་ཝེ་ཀོ. ཚ་ནྡ་ཛཱ་ཏོ ཧོ་ཏཱིཏི པུ་བྦ་བྷཱ་གེ ཛཱ་ཏ་དྷ་མྨ་ཚ་ནྡོ ཧོ་ཏི. ས་དྡྷཱ་དྷི་མུ་ཏྟོཏི པུ་བྦ་བྷཱ་གེ་ཡེ་ཝ ས་དྡྷཱ་ཡ ཨ་དྷི་མུ་ཏྟོ ཧོ་ཏི. ཙི་ཏྟ་ཉྩ་སྶ སྭཱ་དྷི་ཊྛི་ཏནྟི པུ་བྦ་བྷཱ་གེ་ཡེ་ཝ ཙི་ཏྟ་ཉྩ ཨ་སྶ ཡོ་གི་སྶ སུ་ཨ་དྷི་ཊྛི་ཏཾ སུ་ཊྛུ པ་ཏི་ཊྛི་ཏཾ ཧོ་ཏི. ཨི་ཏི ཚ་ནྡོ ས་དྡྷཱ ཙི་ཏྟ་ནྟི ཨི་མེ ཏ་ཡོ དྷ་མྨཱ པུ་བྦ་བྷཱ་གེ ཨུ་པྤ་ནྣ་ཝི་ཝེ་ཀཱ་ནཾ ཨུ་པ་ནི་སྶ་ཡ་ཏྟཱ ནི་སྶ་ཡཱ ནཱ་མ. ཀེ་ཙི པ་ན ‘‘ཙི་ཏྟ་ཉྩ་སྶ སྭཱ་དྷི་ཊྛི་ཏ་ནྟི ས་མཱ་དྷི ཝུ་ཏྟོ’’ཏི ཝ་ད་ནྟི. ཝི་རཱ་གཱདཱི་སུ་པི ཨེ་སེ་ཝ ན་ཡོ.
ནི་རོ་དྷ་ཝཱ་རེ པ་ན ནི་རོ་དྷ་ས་དྡ་ཏོ ཨ་ཉྙཾ པ་རི་ཡཱ་ཡ་ཝ་ཙ་ནཾ ད་སྶེ་ནྟེ་ན ཨ་མ་ཏཱ དྷཱ་ཏཱུཏི ཝུ་ཏྟཾ, སེ་སེ་སུ ནི་རོ་དྷོ ནི་བྦཱ་ནནྟི ཨུ་བྷ་ཡ་ཏྠཱ་པི ནི་བྦཱ་ན་མེ་ཝ. དྭཱ་ད་ས ནི་སྶ་ཡཱཏི ཚ་ནྡ་ས་དྡྷཱ་ཙི་ཏྟཱ་ནི་ཡེ་ཝ ཝི་ཝེ་ཀཱ་དཱི་སུ ཙ་ཏཱུ་སུ ཨེ་ཀེ་ཀ་སྨིཾ ཏ་ཡོ ཏ་ཡོ ཀ་ཏྭཱ དྭཱ་ད་ས ནི་སྶ་ཡཱ ཧོ་ནྟི.
༢༥. ས་མྨཱ་ས་ངྐ་པྤ་ཝཱ་ཡཱ་མ་ས་ཏི་ས་མཱ་དྷཱི་ན་མྤི ཨི་མི་ནཱ་ཝ ན་ཡེ་ན ཨ་ཏྠ་ཡོ་ཛ་ནཱ ཝེ་དི་ཏ་བྦཱ. ས་མྨཱ་ཝཱ་ཙཱ་ཀ་མྨ་ནྟཱ ཛཱི་ཝཱ་ནཾ པ་ན ཛྷཱ་ན་ཀྑ་ཎེ ཝི་པ་སྶ་ནཱ་ཀྑ་ཎེ ཙ ཨ་བྷཱ་ཝཱ ཛྷཱ་ན་ཝི་པ་སྶ་ནཱ་ནཾ པུ་བྦ་བྷཱ་ག་པ་ར་བྷཱ་ག་ཝ་སེ་ན ཝ་ཏྟ་མཱ་ནཱ ཝི་ར་ཏི་ཡོ ཛྷཱ་ན་ཝི་པ་སྶ་ནཱ ས་ནྣི་སྶི་ཏཱ ཀ་ཏྭཱ ཝུ་ཏྟཱ་ཏི ཝེ་དི་ཏ་བྦཾ. ནཱི་ཝ་ར་ཎཱ་ནཾ དི་ཊྛི་ག་ཏཱ་ན་ཉྩ ཝི་ཝེ་ཀ་ཝི་རཱ་ག་ནི་རོ་དྷ་པ་ཊི་ནི་སྶ་གྒཱ ཏ་ཐཱ པ་ཝ་ཏྟ་མཱ་ནཱ་ནཾ ཝི་ར་ཏཱི་ནཾ ཝི་ཝེ་ཀཱ་ད་ཡོ ནཱ་མཱ་ཏི ཝེ་དི་ཏ་བྦཾ. ཡ་ཐཱ ཨ་ཊྛ་ཀ་ནི་པཱ་ཏེ ‘‘ཏ་ཏོ, ཏྭཾ བྷི་ཀྑུ, ཨི་མཾ ས་མཱ་དྷིཾ ས་ཝི་ཏ་ཀྐཾ ས་ཝི་ཙཱ་ར་མྤི བྷཱ་ཝེ་ཡྻཱ་སི, ཨ་ཝི་ཏ་ཀྐ་ཝི་ཙཱ་ར་མ་ཏྟ་མྤི བྷཱ་ཝེ་ཡྻཱ་སི, ཨ་ཝི་ཏ་ཀྐཾ ཨ་ཝི་ཙཱ་ར་མྤི བྷཱ་ཝེ་ཡྻཱ་སི, ས་པྤཱི་ཏི་ཀ་མྤི བྷཱ་ཝེ་ཡྻཱ་སི, ནི་པྤཱི་ཏི་ཀ་མྤི བྷཱ་ཝེ་ཡྻཱ་སི, སཱ་ཏ་ས་ཧ་ག་ཏ་མྤི བྷཱ་ཝེ་ཡྻཱ་སི, ཨུ་པེ་ཀྑཱ་ས་ཧ་ག་ཏ་མྤི བྷཱ་ཝེ་ཡྻཱ་སཱི’’ཏི (ཨ. ནི. ༨.༦༣) མེ་ཏྟཱ་ད་ཡོ ཀཱ་ཡཱ་ནུ་པ་སྶ་ནཱ་ད་ཡོ ཙ ནི་ཡ་ཀ་ཛ྄ཛྷ་ཏྟ་མཱུ་ལ་ས་མཱ་དྷི་ཝ་སེ་ན ཙ་ཏུ་ཀྐ་པ་ཉྩ་ཀ་ཛ྄ཛྷཱ་ནི་ཀཱ ཝི་ཡ ཝུ་ཏྟཱ, ཨེ་ཝ་མི་དྷཱ་པི པུ་བྦ་བྷཱ་ག་པ་ར་བྷཱ་ག་ཝ་སེ་ན ཝི་ར་ཏི་ཡོ ཝུ་ཏྟཱ་ཏི ཝེ་དི་ཏ་བྦཾ. བྱ་ཉྫ་ན་ཙྪཱ་ཡ་མ་ཏྟཾ ག་ཧེ་ཏྭཱ ན བྷ་ག་ཝཱ ཨ་བྦྷཱ་ཙི་ཀྑི་ཏ་བྦོ. ག་མྦྷཱི་ར་ཉྷི བུ་དྡྷ་ཝ་ཙ་ནཾ, ཨཱ་ཙ་རི་ཡེ པ་ཡི་རུ་པཱ་སི་ཏྭཱ ཨ་དྷི་པྤཱ་ཡ་ཏོ ག་ཧེ་ཏ་བྦཾ.
༢༦-༢༧. བོ་ཛ྄ཛྷ་ངྒ་བ་ལ་ཨི་ནྡྲི་ཡ་ཝཱ་རེ་སུ་པི ཨི་མི་ནཱ་ཝ ན་ཡེ་ན ཨ་ཏྠོ ཝེ་དི་ཏ་བྦོ་ཏི.
ཝི་ཝེ་ཀ་ཀ་ཐཱ་ཝ་ཎྞ་ནཱ ནི་ཊྛི་ཏཱ.