ས་ནྟི་ཀེ་ནི་དཱ་ན་ཀ་ཐཱ
ཨུ་དཱ་ནཾ ཨུ་དཱ་ནེ་ཏྭཱ ནི་སི་ནྣ་སྶ བྷ་ག་ཝ་ཏོ ཨེ་ཏ་ད་ཧོ་སི – ‘‘ཨ་ཧཾ ཀ་པྤ་ས་ཏ་ས་ཧ་སྶཱ་དྷི་ཀཱ་ནི ཙ་ཏྟཱ་རི ཨ་ས་ངྑྱེ་ཡྻཱ་ནི ཨི་མ་སྶ པ་ལླ་ངྐ་སྶ ཀཱ་ར་ཎཱ ས་ནྡྷཱ་ཝིཾ, ཨ་ཡཾ མེ པ་ལླ་ངྐོ ཝི་ཛ་ཡ་པ་ལླ་ངྐོ མ་ངྒ་ལ་པ་ལླ་ངྐོ, ཨེ་ཏྠ མེ ནི་སི་ནྣ་སྶ ཡཱ་ཝ ས་ངྐ་པྤོ ན པ་རི་པུ་ཎྞོ, ན ཏཱ་ཝ ཨི་ཏོ ཝུ་ཊྛ་ཧི་སྶཱ་མཱི’’ཏི ཨ་ནེ་ཀ་ཀོ་ཊི་ས་ཏ་ས་ཧ་སྶ་ས་ངྑཱ ས་མཱ་པ་ཏྟི་ཡོ ས་མཱ་པ་ཛྫ་ནྟོ ས་ཏྟཱ་ཧཾ ཏ་ཏྠེ་ཝ ནི་སཱི་དི. ཡཾ ས་ནྡྷཱ་ཡ ཝུ་ཏྟཾ – ‘‘ཨ་ཐ ཁོ བྷ་ག་ཝཱ ས་ཏྟཱ་ཧཾ ཨེ་ཀ་པ་ལླ་ངྐེ་ན ནི་སཱི་དི ཝི་མུ་ཏྟི་སུ་ཁ་པ་ཊི་སཾ་ཝེ་དཱི’’ཏི (མ་ཧཱ་ཝ. ༡).
ཨ་ཐེ་ཀ་ཙྩཱ་ནཾ དེ་ཝ་ཏཱ་ནཾ – ‘‘ཨ་ཛྫཱ་པི ཏཱ་ཝ ནཱུ་ན སི་དྡྷ་ཏྠ་སྶ ཀ་ཏྟ་བྦ་ཀི་ཙྩཾ ཨ་ཏྠི. པ་ལླ་ངྐ་སྨི་ཉྷི ཨཱ་ལ་ཡཾ ན ཝི་ཛ་ཧ་ཏཱི’’ཏི པ་རི་ཝི་ཏ་ཀྐོ ཨུ་ད་པཱ་དི. ཨ་ཐ ས་ཏྠཱ དེ་ཝ་ཏཱ་ནཾ ཝི་ཏ་ཀྐཾ ཉ་ཏྭཱ ཏཱ་སཾ ཝི་ཏ་ཀྐཱུ་པ་ས་མ་ན་ཏྠཾ ཝེ་ཧཱ་སཾ ཨ་བྦྷུ་གྒ་ནྟྭཱ ཡ་མ་ཀ་པཱ་ཊི་ཧཱ་རི་ཡཾ ད་སྶེ་སི. ཨེ་ཝཾ ཨི་མི་ནཱ པཱ་ཊི་ཧཱ་རི་ཡེ་ན དེ་ཝ་ཏཱ་ནཾ ཝི་ཏ་ཀྐཾ ཝཱུ་པ་ས་མེ་ཏྭཱ པ་ལླ་ངྐ་ཏོ ཨཱི་ས་ཀཾ པཱ་ཙཱི་ན་ནི་སྶི་ཏེ ཨུ་ཏྟ་ར་དི་སཱ་བྷཱ་གེ ཋ་ཏྭཱ – ‘‘ཨི་མ་སྨིཾ ཝ་ཏ མེ པ་ལླ་ངྐེ ས་བྦ་ཉྙུ་ཏ་ཉྙཱ་ཎཾ པ་ཊི་ཝི་དྡྷ’’ནྟི ཙ་ཏྟཱ་རི ཨ་ས་ངྑྱེ་ཡྻཱ་ནི ཀ་པྤ་ས་ཏ་ས་ཧ་སྶ་ཉྩ པཱུ་རི་ཏཱ་ནཾ པཱ་ར་མཱི་ནཾ ཕ་ལཱ་དྷི་ག་མ་ན་ཊྛཱ་ནཾ པ་ལླ་ངྐ་ཉྩ བོ་དྷི་རུ་ཀྑ་ཉྩ ཨ་ནི་མི་སེ་ཧི ཨ་ཀྑཱི་ཧི ཨོ་ལོ་ཀ་ཡ་མཱ་ནོ ས་ཏྟཱ་ཧཾ ཝཱི་ཏི་ནཱ་མེ་སི, ཏཾ ཋཱ་ནཾ ཨ་ནི་མི་ས་ཙེ་ཏི་ཡཾ ནཱ་མ ཛཱ་ཏཾ.
ཨ་ཐ པ་ལླ་ངྐ་སྶ ཙ ཋི་ཏ་ཊྛཱ་ན་སྶ ཙ ཨ་ནྟ་རཱ ཙ་ངྐ་མཾ མཱ་པེ་ཏྭཱ པུ་ར་ཏྠི་མ་པ་ཙྪི་མ་ཏོ ཨཱ་ཡ་ཏེ ར་ཏ་ན་ཙ་ངྐ་མེ ཙ་ངྐ་མ་ནྟོ ས་ཏྟཱ་ཧཾ ཝཱི་ཏི་ནཱ་མེ་སི, ཏཾ ཋཱ་ནཾ ར་ཏ་ན་ཙ་ངྐ་མ་ཙེ་ཏི་ཡཾ ནཱ་མ ཛཱ་ཏཾ.
ཙ་ཏུ་ཏྠེ པ་ན ས་ཏྟཱ་ཧེ བོ་དྷི་ཏོ པ་ཙྪི་མུ་ཏྟ་ར་དི་སཱ་བྷཱ་གེ དེ་ཝ་ཏཱ ར་ཏ་ན་གྷ་རཾ མཱ་པ་ཡིཾ་སུ. ཏ་ཏྠ པ་ལླ་ངྐེ་ན ནི་སཱི་དི་ཏྭཱ ཨ་བྷི་དྷ་མྨ་པི་ཊ་ཀཾ ཝི་ཙི་ན་ནྟོ ས་ཏྟཱ་ཧཾ ཝཱི་ཏི་ནཱ་མེ་སི, ཏཾ པ་ན ཋཱ་ནཾ ར་ཏ་ན་གྷ་ར་ཙེ་ཏི་ཡཾ ནཱ་མ ཛཱ་ཏཾ.
ཨེ་ཝཾ བྷ་ག་ཝཱ བོ་དྷི་ས་མཱི་པེ་ཡེ་ཝ ཙ་ཏྟཱ་རི ས་ཏྟཱ་ཧཱ་ནི ཝཱི་ཏི་ནཱ་མེ་ཏྭཱ པ་ཉྩ་མེ ས་ཏྟཱ་ཧེ བོ་དྷི་རུ་ཀྑ་མཱུ་ལཱ ཡེ་ན ཨ་ཛ་པཱ་ལ་ནི་གྲོ་དྷོ ཏེ་ནུ་པ་ས་ངྐ་མི. ཏ་ཏྲཱ་པི དྷ་མྨཾ ཝི་ཙི་ན་ནྟོ ཝི་མུ་ཏྟི་སུ་ཁ་ཉྩ པ་ཊི་སཾ་ཝེ་དེ་ནྟོ ནི་སཱི་དི.
ས་ཏྠཱ ཏ་ཏྠ ས་ཏྟཱ་ཧཾ ཝཱི་ཏི་ནཱ་མེ་ཏྭཱ མུ་ཙ་ལི་ནྡམཱུ་ལཾ ཨ་ག་མཱ་སི. ཏ་ཏྠ ས་ཏྟཱ་ཧ་ཝ་དྡ་ལི་ཀཱ་ཡ ཨུ་པྤ་ནྣཱ་ཡ སཱི་ཏཱ་དི་པ་ཊི་བཱ་ཧ་ན་ཏྠཾ མུ་ཙ་ལི་ནྡེ་ན ནཱ་ག་རཱ་ཛེ་ན ས་ཏྟ་ཀྑ་ཏྟུཾ བྷོ་གེ་ཧི པ་རི་ཀྑི་ཏྟོ ཨ་ས་མྦཱ་དྷཱ་ཡ ག་ནྡྷ་ཀུ་ཊི་ཡཱ ཝི་ཧ་ར་ནྟོ ཝི་ཡ ཝི་མུ་ཏྟི་སུ་ཁཾ པ་ཊི་སཾ་ཝེ་དི་ཡ་མཱ་ནོ ཏ་ཏྠ ས་ཏྟཱ་ཧཾ ཝཱི་ཏི་ནཱ་མེ་ཏྭཱ རཱ་ཛཱ་ཡ་ཏ་ན་མཱུ་ལཾ ཨུ་པ་ས་ངྐ་མི. ཏ་ཏྠ་པི ཝི་མུ་ཏྟི་སུ་ཁཾ པ་ཊི་སཾ་ཝེ་དི་ཡ་མཱ་ནོ་ཝ ས་ཏྟཱ་ཧཾ ནི་སཱི་དི. ཨེ་ཏྟཱ་ཝ་ཏཱ ས་ཏྟ ས་ཏྟཱ་ཧཱ་ནི པ་རི་པུ་ཎྞཱ་ནི. ཨེ་ཏྠ་ནྟ་རེ བྷ་ག་ཝ་ཏོ ནེ་ཝ མུ་ཁ་དྷོ་ཝ་ནཾ ན ས་རཱི་ར་པ་ཊི་ཛ་གྒ་ནཾ ནཱ་ཧཱ་ར་ཀི་ཙྩཾ ཨ་ཧོ་སི, ཕ་ལ་སུ་ཁེ་ནེ་ཝ ཝཱི་ཏི་ཝ་ཏྟེ་སི. ཨ་ཐ ས་ཏྟ་ས་ཏྟཱ་ཧ་མ་ཏྠ་ཀེ ཨེ་ཀཱུ་ན་པ་ཉྙཱ་ས་ཏི་མེ དི་ཝ་སེ ས་ཀྐེ་ན དེ་ཝཱ་ན་མི་ནྡེ་ན ཨུ་པ་ནཱི་ཏེ་ན ནཱ་ག་ལ་ཏཱ་ད་ནྟ་ཀ་ཊྛེ་ན ཙ ཨ་ནོ་ཏ་ཏྟ་ད་ཧོ་ད་ཀེ་ན ཙ མུ་ཁཾ དྷོ་ཝི་ཏྭཱ ཏ་ཏྠེ་ཝ རཱ་ཛཱ་ཡ་ཏ་ནམཱུ་ལེ ནི་སཱི་དི.
ཏ་སྨིཾ ས་མ་ཡེ ཏ་པུ་སྶ་བྷ་ལླི་ཀཱ ནཱ་མ དྭེ ཝཱ་ཎི་ཛཱ ཉཱ་ཏི་སཱ་ལོ་ཧི་ཏཱ་ཡ དེ་ཝ་ཏཱ་ཡ ས་ཏྠུ ཨཱ་ཧཱ་ར་དཱ་ནེ ཨུ་སྶཱ་ཧི་ཏཱ མ་ནྠ་ཉྩ མ་དྷུ་པི་ཎྜི་ཀ་ཉྩ ཨཱ་དཱ་ཡ – ‘‘པ་ཊི་གྒ་ཎྷཱ་ཏུ བྷ་ག་ཝཱ ཨི་མཾ ཨཱ་ཧཱ་རཾ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི ས་ཏྠཱ་རཾ ཨུ་པ་ས་ངྐ་མི་ཏྭཱ ཨ་ཊྛཾ་སུ. བྷ་ག་ཝཱ པཱ་ཡཱ་ས་པ་ཊི་གྒ་ཧ་ཎ་དི་ཝ་སེ་ཡེ་ཝ དེ་ཝ་ད་ཏྟི་ཡ་སྶ པ་ཏྟ་སྶ ཨ་ནྟ་ར་ཧི་ཏ་ཏྟཱ – ‘‘ན ཁོ ཏ་ཐཱ་ག་ཏཱ ཧ་ཏྠེ་སུ ཨཱ་ཧཱ་རཾ པ་ཊི་གྒ་ཎྷ་ནྟི, ཀི་མྷི ནུ ཁོ ཨ་ཧཾ ཨི་མཾ པ་ཊི་གྒ་ཎྷེ་ཡྻ’’ནྟི ཙི་ནྟེ་སི. ཨ་ཐ་སྶ བྷ་ག་ཝ་ཏོ ཨ་ཛ྄ཛྷཱ་ས་ཡཾ ཝི་དི་ཏྭཱ ཙ་ཏཱུ་ཧི དི་སཱ་ཧི ཙ་ཏྟཱ་རོ མ་ཧཱ་རཱ་ཛཱ་ནོ ཨི་ནྡ་ནཱི་ལ་མ་ཎི་མ་ཡེ ཙ་ཏྟཱ་རོ པ་ཏྟེ ཨུ་པ་ནཱ་མེ་སུཾ. བྷ་ག་ཝཱ ཏེ པ་ཊི་ཀྑི་པི. པུ་ན མུ་གྒ་ཝ་ཎྞེ སི་ལཱ་མ་ཡེ ཙ་ཏྟཱ་རོ པ་ཏྟེ ཨུ་པ་ནཱ་མེ་སུཾ. བྷ་ག་ཝཱ ཏེ་སཾ ཙ་ཏུ་ནྣ་མྤི དེ་ཝ་པུ་ཏྟཱ་ནཾ ཨ་ནུ་ཀ་མྤཾ ཨུ་པཱ་དཱ་ཡ པ་ཊི་གྒ་ཧེ་ཏྭཱ ཨེ་ཀཱི་བྷཱ་ཝཾ ཨུ་པ་ནེ་ཏྭཱ ཏ་སྨིཾ པ་ཙྩ་གྒྷེ སེ་ལ་མ་ཡེ པ་ཏྟེ ཨཱ་ཧཱ་རཾ པ་ཊི་གྒ་ཧེ་ཏྭཱ པ་རི་བྷུ་ཉྫི་ཏྭཱ ཨ་ནུ་མོ་ད་ན་མ་ཀཱ་སི. ཏེ དྭེ བྷཱ་ཏ་རོ ཝཱ་ཎི་ཛཱ བུ་དྡྷ་ཉྩ དྷ་མྨ་ཉྩ ས་ར་ཎཾ ག་ནྟྭཱ དྭེ་ཝཱ་ཙི་ཀཱ ཨུ་པཱ་ས་ཀཱ ཨ་ཧེ་སུཾ.
ཨ་ཐ ས་ཏྠཱ པུ་ན ཨ་ཛ་པཱ་ལ་ནི་གྲོ་དྷ་མེ་ཝ ག་ནྟྭཱ ནི་གྲོ་དྷ་མཱུ་ལེ ནི་སཱི་དི. ཨ་ཐ་སྶ ཏ་ཏྠ ནི་སི་ནྣ་མ་ཏྟ་སྶེ་ཝ ཨ་དྷི་ག་ཏ་སྶ དྷ་མྨ་སྶ ག་མྦྷཱི་ར་ཏཾ པ་ཙྩ་ཝེ་ཀྑ་ནྟ་སྶ ས་བྦ་བུ་དྡྷཱ་ནཾ ཨཱ་ཙི་ཎྞོ – ‘‘ཨ་དྷི་ག་ཏོ ཁོ མྱཱ་ཡཾ དྷ་མྨོ’’ཏི་ཨཱ་དི་ནཱ (དཱི. ནི. ༢.༦༤; མ. ནི. ༡.༢༨༡; ༢.༣༣༧; སཾ. ནི. ༡.༡༧༢; མ་ཧཱ་ཝ. ༧) པ་རེ་སཾ དྷ་མྨཾ ཨ་དེ་སེ་ཏུ་ཀཱ་མ་ཏཱ་ཀཱ་ར་པྤ་ཏྟོ པ་རི་ཝི་ཏ་ཀྐོ ཨུ་ད་པཱ་དི. ཨ་ཐ བྲ་ཧྨཱ ས་ཧ་མྤ་ཏི ‘‘ན་སྶ་ཏི ཝ་ཏ བྷོ ལོ་ཀོ, ཝི་ན་སྶ་ཏི ཝ་ཏ བྷོ ལོ་ཀོ’’ཏི (དཱི. ནི. ༢.༦༦; མ. ནི. ༡.༢༨༢; ༢.༣༣༨; སཾ. ནི. ༡.༡༧༢; མ་ཧཱ་ཝ. ༨) ད་ས་སུ ཙ་ཀྐ་ཝཱ་ལ༹་ས་ཧ་སྶེ་སུ ས་ཀྐ་སུ་ཡཱ་མ་ས་ནྟུ་སི་ཏ་ནི་མྨཱ་ན་ར་ཏི་པ་ར་ནི་མྨི་ཏ་ཝ་ས་ཝ་ཏྟི་མ་ཧཱ་བྲ་ཧྨཱ་ནོ ཙ ག་ཧེ་ཏྭཱ ས་ཏྠུ ས་ནྟི་ཀཾ ཨཱ་ག་ནྟྭཱ – ‘‘དེ་སེ་ཏུ, བྷ་ནྟེ, བྷ་ག་ཝཱ དྷ་མྨ’’ནྟི་ཨཱ་དི་ནཱ (དཱི. ནི. ༢.༦༦; མ. ནི. ༡.༢༨༢; ༢.༣༣༨; སཾ. ནི. ༡.༡༧༢; མ་ཧཱ་ཝ. ༨) ན་ཡེ་ན དྷ་མྨ་དེ་ས་ནཾ ཨཱ་ཡཱ་ཙི.
ཨ་ཐ ས་ཏྠཱ ཏ་སྶ པ་ཊི་ཉྙཾ ད་ཏྭཱ – ‘‘ཀ་སྶ ནུ ཁོ ཨ་ཧཾ པ་ཋ་མཾ དྷ་མྨཾ དེ་སེ་ཡྻ’’ནྟི ཙི་ནྟེ་ནྟོ ཨཱ་ལཱ༹་རུ་ད་ཀཱ་ནཾ ཀཱ་ལ་ངྐ་ཏ་བྷཱ་ཝཾ ཉ་ཏྭཱ – ‘‘བ་ཧཱུ་པ་ཀཱ་རཱ ཁོ མེ པ་ཉྩ་ཝ་གྒི་ཡཱ བྷི་ཀྑཱུ’’ཏི པ་ཉྩ་ཝ་གྒི་ཡེ ཨཱ་ར་བྦྷ མ་ན་སི་ཀཱ་རཾ ཀ་ཏྭཱ – ‘‘ཀ་ཧཾ ནུ ཁོ ཏེ ཨེ་ཏ་ར་ཧི ཝི་ཧ་ར་ནྟཱི’’ཏི ཨཱ་ཝ་ཛྫེ་ནྟོ – ‘‘བཱ་རཱ་ཎ་སི་ཡཾ ཨི་སི་པ་ཏ་ནེ མི་ག་དཱ་ཡེ’’ཏི ཉ་ཏྭཱ – ‘‘ཏ་ཏྠ ག་ནྟྭཱ དྷ་མྨ་ཙ་ཀྐཾ པ་ཝ་ཏྟེ་སྶཱ་མཱི’’ཏི ཀ་ཏི་པཱ་ཧཾ བོ་དྷི་མ་ཎྜ་སཱ་མ་ནྟེ་ཡེ་ཝ པི་ཎྜཱ་ཡ ཙ་ར་ནྟོ ཝི་ཧ་རི་ཏྭཱ ཨཱ་སཱ་ལ༹ྷི་པུ་ཎྞ་མི་ཡཾ བཱ་རཱ་ཎ་སིཾ ག་མི་སྶཱ་མཱི’’ཏི པ་ཏྟ་ཙཱི་ཝ་ར་མཱ་དཱ་ཡ ཨ་ཊྛཱ་ར་ས་ཡོ་ཛ་ན་མ་གྒཾ པ་ཊི་པ་ཛྫི. ཨ་ནྟ་རཱ་མ་གྒེ ཧ་ཊྛ་ཏུ་པ་གཾ ཨུ་པ་ཀཾ ནཱ་མ ཨཱ་ཛཱི་ཝ་ཀཾ དི་སྭཱ ཏ་སྶ ཨ་ཏྟ་ནོ བུ་དྡྷ་བྷཱ་ཝཾ ཨཱ་ཙི་ཀྑི་ཏྭཱ ཏཾ་དི་ཝ་སཾ་ཡེ་ཝ སཱ་ཡ་ནྷ་ས་མ་ཡེ ཨི་སི་པ་ཏ་ནཾ ཨ་ག་མཱ་སི.
པ་ཉྩ་ཝ་གྒི་ཡཱ པ་ན ཏ་ཐཱ་ག་ཏཾ དཱུ་ར་ཏོ་ཝ ཨཱ་ག་ཙྪ་ནྟཾ དི་སྭཱ – ‘‘ཨ་ཡཾ, ཨཱ་ཝུ་སོ, ས་མ་ཎོ གོ་ཏ་མོ པ་ཙྩ་ཡ་བཱ་ཧུ་ལླཱ་ཡ ཨཱ་ཝ་ཏྟོ པ་རི་པུ་ཎྞ་ཀཱ་ཡོ པཱི་ཎི་ནྡྲི་ཡོ སུ་ཝ་ཎྞ་ཝ་ཎྞོ ཧུ་ཏྭཱ ཨཱ་ག་ཙྪ་ཏི, ཨི་མ་སྶ ཨ་བྷི་ཝཱ་ད་ནཱ་དཱི་ནི ན ཀ་རི་སྶཱ་མ, ཨཱ་ས་ན་མ་ཏྟཾ པ་ན པ་ཉྙཱ་པེ་ཡྻཱ་མཱ’’ཏི ཀ་ཏི་ཀཾ ཨ་ཀཾ་སུ. བྷ་ག་ཝཱ ཏེ་སཾ ཙི་ཏྟཱ་ཙཱ་རཾ ཉ་ཏྭཱ ས་བྦ་ས་ཏྟེ་སུ ཨ་ནོ་དྷི་སྶ་ཀ་ཝ་སེ་ན ཕ་ར་ཎ་ས་མ་ཏྠཾ མེ་ཏྟ་ཙི་ཏྟཾ སཾ་ཁི་པི་ཏྭཱ ཨོ་དྷི་སྶ་ཀ་ཝ་སེ་ན མེ་ཏྟ་ཙི་ཏྟེ་ན ཕ་རི. ཏེ བྷ་ག་ཝ་ཏོ མེ་ཏྟ་ཙི་ཏྟེ་ན ཕུ་ཊྛཱ ཏ་ཐཱ་ག་ཏེ ཨུ་པ་ས་ངྐ་མ་ནྟེ ས་ཀཱ་ཡ ཀ་ཏི་ཀཱ་ཡ ས་ཎྛཱ་ཏུཾ ཨ་ས་ཀྐོ་ནྟཱ ཨ་བྷི་ཝཱ་ད་ནཱ་དཱི་ནི ས་བྦ་ཀི་ཙྩཱ་ནི ཨ་ཀཾ་སུ. ཝི་ཏྠཱ་ར་ཀ་ཐཱ ཝི་ན་ཡ་མ་ཧཱ་ཝ་གྒཱདཱི་སུ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ.
ཨ་ཐ བྷ་ག་ཝཱ ཨ་ཏྟ་ནོ བུ་དྡྷ་བྷཱ་ཝཾ ཏེ ཉཱ་པེ་ཏྭཱ པ་ཉྙ་ཏྟ་ཝ་ར་བུ་དྡྷཱ་ས་ནེ ནི་སཱི་དི་ཏྭཱ ཨུ་ཏྟ་རཱ་སཱ་ལ༹ྷ་ན་ཀྑ་ཏྟ་ཡོ་གེ ཝ་ཏྟ་མཱ་ནེ ཨ་ཊྛཱ་ར་ས་ཧི བྲ་ཧྨ་ཀོ་ཊཱི་ཧི པ་རི་ཝུ་ཏོ པ་ཉྩ་ཝ་གྒི་ཡེ ཐེ་རེ ཨཱ་མ་ནྟེ་ཏྭཱ དྷ་མྨ་ཙ་ཀྐ་པྤ་ཝ་ཏྟ་ན་སུ་ཏྟ་ནྟཾ དེ་སེ་སི. ཏེ་སུ ཨ་ཉྙཱ་སི་ཀོ་ཎྜ་ཉྙོ དེ་ས་ནཱ་ནུ་སཱ་རེ་ན ཉཱ་ཎཾ པེ་སེ་ནྟོ སུ་ཏྟ་པ་རི་ཡོ་སཱ་ནེ ཨ་ཊྛཱ་ར་ས་ཧི བྲ་ཧྨ་ཀོ་ཊཱི་ཧི ས་དྡྷིཾ སོ་ཏཱ་པ་ཏྟི་ཕ་ལེ པ་ཏི་ཊྛཱ་སི. ཏེ་ན ཝུ་ཏྟཾ –
༡. ‘‘ཨ་ཧ་མེ་ཏ་ར་ཧི ས་མྦུ་དྡྷོ, གོ་ཏ་མོ ས་ཀྱ་ཝ་ཌྜྷ་ནོ;
པ་དྷཱ་ནཾ པ་ད་ཧི་ཏྭཱ་ན, པ་ཏྟོ ས་མྦོ་དྷི་མུ་ཏྟ་མཾ.
༢. ‘‘བྲ་ཧྨུ་ནཱ ཡཱ་ཙི་ཏོ ས་ནྟོ, དྷ་མྨ་ཙ་ཀྐཾ པ་ཝ་ཏྟ་ཡིཾ;
ཨ་ཊྛཱ་ར་ས་ནྣཾ ཀོ་ཊཱི་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཨ་ཧནྟི ཨ་ཏྟཱ་ནཾ ནི་དྡི་ས་ཏི. ཨེ་ཏ་ར་ཧཱིཏི ཨ་སྨིཾ ཀཱ་ལེ. ས་ཀྱ་ཝ་ཌྜྷ་ནོཏི སཱ་ཀི་ཡ་ཀུ་ལ་ཝ་ཌྜྷ་ནོ. ‘‘ས་ཀྱ་པུ་ངྒ་ཝོ’’ཏི་པི པཱ་ཋོ. པ་དྷཱ་ནནྟི ཝཱི་རི་ཡཾ ཝུ་ཙྩ་ཏི. པ་ད་ཧི་ཏྭཱ་ནཱཏི གྷ་ཊེ་ཏྭཱ ཝཱ་ཡ་མི་ཏྭཱ, དུ་ཀྐ་ར་ཀཱ་རི་ཀཾ ཀ་ཏྭཱ་ཏི ཨ་ཏྠོ. ཨ་ཊྛཱ་ར་ས་ནྣཾ ཀོ་ཊཱི་ནནྟི བཱ་རཱ་ཎ་སི་ཡཾ ཨི་སི་པ་ཏ་ནེ མི་ག་དཱ་ཡེ དྷ་མྨ་ཙ་ཀྐ་པྤ་ཝ་ཏྟ་ན་སུ་ཏྟ་ནྟ་ཀ་ཐཱ་ཡ ཨ་ཉྙཱ་སི་ཀོ་ཎྜ་ཉྙ་ཏྠེ་ར་པྤ་མུ་ཁཱ་ནཾ ཨ་ཊྛཱ་ར་ས་ནྣཾ བྲ་ཧྨ་ཀོ་ཊཱི་ནཾ པ་ཋ་མཱ་བྷི་ས་མ་ཡོ ཨ་ཧོ་སཱི་ཏི ཨ་ཏྠོ.
ཨི་དཱ་ནི བྷ་ག་ཝཱ ཨ་ཏཱི་ཏཾ ཀ་ཐེ་ཏྭཱ ཨ་ནཱ་ག་ཏཾ ཨ་བྷི་ས་མ་ཡཾ ཀ་ཐེ་ནྟོ –
༣. ‘‘ཏ་ཏོ པ་ར་ཉྩ དེ་སེ་ནྟེ, ན་ར་དེ་ཝ་ས་མཱ་ག་མེ;
ག་ཎ་ནཱ་ཡ ན ཝ་ཏྟ་བྦོ, དུ་ཏི་ཡཱ་བྷི་ས་མ་ཡོ ཨ་ཧཱུ’’ཏི. – ཨཱ་དི་མཱ་ཧ;
ཏ་ཏྠ ན་ར་དེ་ཝ་ས་མཱ་ག་མེཏི ཏ་ཏོ ཨ་པ་རེ་ན ས་མ་ཡེ་ན མ་ཧཱ་མ་ངྒ་ལ་ས་མཱ་ག་མེ ད་ས་སུ ཙ་ཀྐ་ཝཱ་ལ༹་ས་ཧ་སྶེ་སུ དེ་ཝ་མ་ནུ་སྶཱ་ནཾ མ་ཛ྄ཛྷེ མ་ངྒ་ལ་སུ་ཏྟཔ་རི་ཡོ་སཱ་ནེ (ཁུ. པཱ. ༥.༡ ཨཱ་ད་ཡོ; སུ. ནི. ༢༦༡ ཨཱ་ད་ཡོ) ག་ཎ་ན་པ་ཐཾ ཝཱི་ཏི་ཝ་ཏྟཱ་ནཾ ན་ར་དེ་ཝཱ་ནཾ. དུ་ཏི་ཡཱ་བྷི་ས་མ་ཡོ ཨ་ཧཱུཏི ཧེ་སྶ་ཏཱི་ཏི ཨ་ཏྠོ. ཨ་ནཱ་ག་ཏ་ཝ་ཙ་ནེ ཝ་ཏྟ་བྦེ སོ་ཏ་པ་ཏི་ཏ་ཏྟཱ ‘‘ཨ་ཧཱུ’’ཏི ཨ་ཏཱི་ཏ་ཝ་ཙ་ནཾ ཝུ་ཏྟཾ, ཀཱ་ལ་ཝི་པ་རི་ཡཱ་ཡ་ཝ་སེ་ན ཝཱ. ཨེ་ས ན་ཡོ ཨི་ཏོ པ་རེ་སུ ཨཱི་དི་སེ་སུ ཝ་ཙ་ནེ་སུ ཙ. པུ་ན རཱ་ཧུ་ལོ་ཝཱ་ད་སུ་ཏྟ་ནྟདེ་ས་ནཱ་ཡ (མ. ནི. ༣.༤༡༦ ཨཱ་ད་ཡོ) ག་ཎ་ན་པ་ཐ་ཝཱི་ཏི་ཝ་ཏྟེ ས་ཏྟེ ཨ་བྷི་ས་མ་ཡཱ་མ་ཏ་པཱ་ནཾ པཱ་ཡེ་སི. ཨ་ཡཾ ཏ་ཏི་ཡཱ་བྷི་ས་མ་ཡོ. ཏེ་ན ཝུ་ཏྟཾ –
༤. ‘‘ཨི་དྷེ་ཝཱ་ཧཾ ཨེ་ཏ་ར་ཧི, ཨོ་ཝ་དིཾ མ་མ ཨ་ཏྲ་ཛཾ;
ག་ཎ་ནཱ་ཡ ན ཝ་ཏྟ་བྦོ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
བྷ་ག་ཝ་ཏོ ཀི་ར ཨེ་ཀོ་ཝ སཱ་ཝ་ཀ་ས་ནྣི་པཱ་ཏོ ཨ་ཧོ་སི. ཨུ་རུ་ཝེ་ལ་ཀ་སྶ་པཱ་དཱི་ནཾ ཛ་ཊི་ལཱ་ནཾ ས་ཧ་སྶཾ, དྭི་ནྣཾ ཨ་གྒ་སཱ་ཝ་ཀཱ་ནཾ ཨ་ཌྜྷ་ཏྟི་ཡ་ས་ཏཱ་ནཱི་ཏི ཨི་མེ་སཾ ཨ་ཌྜྷ་ཏེ་ལ༹་ས་ས་ཏཱ་ནཾ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༥. ‘‘ཨེ་ཀོ་སི ས་ནྣི་པཱ་ཏོ མེ, སཱ་ཝ་ཀཱ་ནཾ མ་ཧེ་སི་ནཾ;
ཨ་ཌྜྷ་ཏེ་ལ༹་ས་ས་ཏཱ་ནཾ, བྷི་ཀྑཱུ་ནཱ་སི ས་མཱ་ག་མོ’’ཏི.
ཏ་ཏྠ ཨེ་ཀོ་སཱིཏི ཨེ་ཀོ་ཝ ཨཱ་སི. ཨ་ཌྜྷ་ཏེ་ལ༹་ས་ས་ཏཱ་ནནྟི མ་མ སཱ་ཝ་ཀཱ་ནཾ པ་ཉྙཱ་སཱ་དྷི་ཀཱ་ནཾ དྭཱ་ད་ས་ས་ཏཱ་ནཾ. བྷི་ཀྑཱུ་ནཱ་སཱིཏི བྷི་ཀྑཱུ་ནཾ ཨཱ་སི. ཏེ་སཾ པ་ན མ་ཛ྄ཛྷ་ག་ཏོ བྷ་ག་ཝཱ ཙ་ཏུ་ར་ངྒ་ས་ནྣི་པཱ་ཏེ པཱ་ཏི་མོ་ཀྑཾ ཨུ་དྡི་སི.
ཨ་ཐ བྷ་ག་ཝཱ ཨ་ཏྟ་ནོ པ་ཝ་ཏྟིཾ ད་སྶེ་ནྟོ –
༦. ‘‘ཝི་རོ་ཙ་མཱ་ནོ ཝི་མ་ལོ, བྷི་ཀྑུ་ས་ངྒྷ་སྶ མ་ཛ྄ཛྷ་གོ;
ད་དཱ་མི པ་ཏྠི་ཏཾ ས་བྦཾ, མ་ཎཱི་ཝ ས་བྦ་ཀཱ་མ་དོ’’ཏི. – ཨཱ་དི་མཱ་ཧ;
ཏ་ཏྠ ཝི་རོ་ཙ་མཱ་ནོཏི ཨ་ན་ནྟ་བུ་དྡྷ་སི་རི་ཡཱ ཝི་རོ་ཙ་མཱ་ནོ. ཝི་མ་ལོཏི ཝི་ག་ཏ་རཱ་གཱ་དི་ཀི་ལེ་ས་མ་ལོ. མ་ཎཱི་ཝ ས་བྦ་ཀཱ་མ་དོཏི ཙི་ནྟཱ་མ་ཎི ཝི་ཡ ས་བྦ་ཀཱ་མ་ད་དོ ཨ་ཧ་མྤི ཨི་ཙྪི་ཏཾ པ་ཏྠི་ཏཾ ས་བྦཾ ལོ་ཀི་ཡ་ལོ་ཀུ་ཏྟ་ར་སུ་ཁ་ཝི་སེ་སཾ དེ་མཱི་ཏི ཨ་ཏྠོ.
ཨི་དཱ་ནི པ་ཏྠི་ཏ་པ་ཏྠ་ནཾ ད་སྶེ་ནྟོ –
༧. ‘‘ཕ་ལ་མཱ་ཀ་ངྑ་མཱ་ནཱ་ནཾ, བྷ་ཝ་ཙྪ་ནྡ་ཛ་ཧེ་སི་ནཾ;
ཙ་ཏུ་ས་ཙྩཾ པ་ཀཱ་སེ་མི, ཨ་ནུ་ཀ་མྤཱ་ཡ པཱ་ཎི་ན’’ནྟི. – ཨཱ་དི་མཱ་ཧ;
ཏ་ཏྠ ཕ་ལནྟི སོ་ཏཱ་པ་ཏྟི་ཕ་ལཱ་དི་ཀཾ ཙ་ཏུ་བྦི་དྷཾ ཕ་ལཾ. བྷ་ཝ་ཙྪ་ནྡ་ཛ་ཧེ་སི་ནནྟི བྷ་ཝ་ཏ་ཎྷཱ་པ་ཧཱ་ཡི་ནཾ, བྷ་ཝ་ཏ་ཎྷཾ པ་ཛ་ཧི་ཏུ་ཀཱ་མཱ་ནཾ. ཨ་ནུ་ཀ་མྤཱ་ཡཱཏི ཨ་ནུ་དྡ་ཡཱ་ཡ.
༨. ཨི་དཱ་ནི ཙ་ཏུ་ས་ཙྩ་པྤ་ཀཱ་ས་ནེ, ཨ་བྷི་ས་མ་ཡཾ ད་སྶེ་ནྟོ ‘‘ད་ས་ཝཱི་ས་ས་ཧ་སྶཱ་ན’’ནྟི ཨཱ་དི་མཱ་ཧ.
ཏ་ཏྠ ད་ས་ཝཱི་ས་ས་ཧ་སྶཱ་ནནྟི ད་ས་ས་ཧ་སྶཱ་ན་ཉྩ ཝཱི་ས་ཏི་ས་ཧ་སྶཱ་ན་ཉྩ. ཨེ་ཀ་དྭི་ནྣནྟི་ཨཱ་དི་ནཱ ན་ཡེ་ནཱ་ཏི ཨ་ཏྠོ. ན་ཝ་མ་ད་ས་མ་གཱ་ཐཱ ཨུ་ཏྟཱ་ན་ཏྠཱ་ཝ.
༡༡-༡༢. ཨེ་ཀཱ་ད་ས་མ་དྭཱ་ད་ས་མ་གཱ་ཐཱ་སུ ཨི་དཱ་ནེ་ཏ་ར་ཧཱིཏི ཨུ་བྷོ་པི ཨེ་ཀ་ཏྠཱ, ཝེ་ནེ་ཡྻ་ཝ་སེ་ན པུ་རི་ས་པུ་གྒ་ལཱ ཝི་ཡ ཝུ་ཏྟཱ. ཨ་ཐ ཝཱ ཨི་དཱ་ནཱིཏི མ་ཡི ཨུ་པྤ་ནྣེ. ཨེ་ཏ་ར་ཧཱིཏི མ་ཡི དྷ་མྨཾ དེ་སེ་ནྟེ. ཨ་པ་ཏྟ་མཱ་ན་སཱཏི ཨ་པྤ་ཏྟ་ཨ་ར་ཧ་ཏྟ་ཕ་ལཱ. ཨ་རི་ཡ་ཉྫ་སནྟི ཨ་རི་ཡཾ ཨ་ཊྛ་ངྒི་ཀཾ མ་གྒཾ. ཐོ་མ་ཡ་ནྟཱཏི པ་སཾ་ས་ནྟཱ. བུ་ཛ྄ཛྷི་སྶ་ནྟཱིཏི ཨ་ནཱ་ག་ཏེ ཙ་ཏུ་ས་ཙྩ་དྷ་མྨཾ པ་ཊི་ཝི་ཛ྄ཛྷི་སྶ་ནྟཱི་ཏི ཨ་ཏྠོ. སཾ་སཱ་ར་ས་རི་ཏནྟི སཾ་སཱ་ར་སཱ་ག་རཾ.
ཨི་དཱ་ནི ཨ་ཏྟ་ནོ ཛཱ་ཏ་ན་ག་རཱ་དིཾ ད་སྶེ་ནྟོ –
༡༣. ‘‘ན་ག་རཾ ཀ་པི་ལ་ཝ་ཏྠུ མེ, རཱ་ཛཱ སུ་དྡྷོ་ད་ནོ པི་ཏཱ;
མ་ཡ྄ཧཾ ཛ་ནེ་ཏྟི་ཀཱ མཱ་ཏཱ, མཱ་ཡཱ་དེ་ཝཱི་ཏི ཝུ་ཙྩ་ཏི.
༡༤. ‘‘ཨེ་ཀཱུ་ན་ཏིཾ་ས་ཝ་སྶཱ་ནི, ཨ་གཱ་རཾ ཨ་ཛ྄ཛྷ་ཧཾ ཝ་སིཾ;
ར་མྨོ སུ་ར་མྨོ སུ་བྷ་ཀོ, ཏ་ཡོ པཱ་སཱ་ད་མུ་ཏྟ་མཱ.
༡༥. ‘‘ཙ་ཏྟཱ་ལཱི་ས་ས་ཧ་སྶཱ་ནི, ནཱ་རི་ཡོ ས་མ་ལ་ངྐ་ཏཱ;
བྷ་དྡ་ཀ་ཉྩ་ནཱ ནཱ་མ ནཱ་རཱི, རཱ་ཧུ་ལོ ནཱ་མ ཨ་ཏྲ་ཛོ.
༡༦. ‘‘ནི་མི་ཏྟེ ཙ་ཏུ་རོ དི་སྭཱ, ཨ་སྶ་ཡཱ་ནེ་ན ནི་ཀྑ་མིཾ;
ཚ་བྦ་སྶཾ པ་དྷཱ་ན་ཙཱ་རཾ, ཨ་ཙ་རིཾ དུ་ཀྐ་རཾ ཨ་ཧཾ.
༡༧. ‘‘བཱ་རཱ་ཎ་སི་ཡཾ ཨི་སི་པ་ཏ་ནེ, ཙ་ཀྐཾ པ་ཝ་ཏྟི་ཏཾ མ་ཡཱ;
ཨ་ཧཾ གོ་ཏ་མ་ས་མྦུ་དྡྷོ, ས་ར་ཎཾ ས་བྦ་པཱ་ཎི་ནཾ.
༡༨. ‘‘ཀོ་ལི་ཏོ ཨུ་པ་ཏི་སྶོ ཙ, དྭེ བྷི་ཀྑཱུ ཨ་གྒ་སཱ་ཝ་ཀཱ;
ཨཱ་ན་ནྡོ ནཱ་མུ་པ་ཊྛཱ་ཀོ, ས་ནྟི་ཀཱ་ཝ་ཙ་རོ མ་མ;
ཁེ་མཱ ཨུ་པྤ་ལ་ཝ་ཎྞཱ ཙ, བྷི་ཀྑུ་ནཱི ཨ་གྒ་སཱ་ཝི་ཀཱ.
༡༩. ‘‘ཙི་ཏྟོ ཧ་ཏྠཱ་ལ༹་ཝ་ཀོ ཙ, ཨ་གྒུ་པ་ཊྛཱ་ཀུ་པཱ་ས་ཀཱ;
ན་ནྡ་མཱ་ཏཱ ཙ ཨུ་ཏྟ་རཱ, ཨ་གྒུ་པ་ཊྛཱ་ཀུ་པཱ་སི་ཀཱ.
༢༠. ‘‘ཨ་ཧཾ ཨ་སྶ་ཏྠ་མཱུ་ལ་མྷི, པ་ཏྟོ ས་མྦོ་དྷི་མུ་ཏྟ་མཾ;
བྱཱ་མ་པྤ་བྷཱ ས་དཱ མ་ཡ྄ཧཾ, སོ་ལ༹་ས་ཧ་ཏྠ་མུ་གྒ་ཏཱ.
༢༡. ‘‘ཨ་པྤཾ ཝ་སྶ་ས་ཏཾ ཨཱ་ཡུ, ཨི་དཱ་ནེ་ཏ་ར་ཧི ཝི་ཛྫ་ཏི;
ཏཱ་ཝ་ཏཱ ཏི་ཊྛ་མཱ་ནོ་ཧཾ, ཏཱ་རེ་མི ཛ་ན་ཏཾ བ་ཧུཾ.
༢༢. ‘‘ཋ་པ་ཡི་ཏྭཱ་ན དྷ་མྨུ་ཀྐཾ, པ་ཙྪི་མཾ ཛ་ན་བོ་དྷ་ནཾ;
ཨ་ཧ་མྤི ན ཙི་ར་སྶེ་ཝ, ས་དྡྷིཾ སཱ་ཝ་ཀ་ས་ངྒྷ་ཏོ;
ཨི་དྷེ་ཝ པ་རི་ནི་བྦི་སྶཾ, ཨ་གྒཱི་ཝཱ་ཧཱ་ར་ས་ངྑ་ཡཱ’’ཏི. – ཨཱ་དི་མཱ་ཧ;
མ་མ པ་ན ར་མྨ་སུ་ར་མྨ་སུ་བྷ་ནཱ་མ་ཀཱ ཏ་ཡོ པཱ་སཱ་དཱ ན་ཝ་བྷཱུ་མི་ཀ་ས་ཏྟ་བྷཱུ་མི་ཀ་པ་ཉྩ་བྷཱུ་མི་ཀཱ, ཙ་ཏྟཱ་ལཱི་ས་ས་ཧ་སྶཱ ནཱ་ཊ་ཀི་ཏྠི་ཡོ, ཡ་སོ་དྷ་རཱ ནཱ་མ མ་མ ཨ་གྒ་མ་ཧེ་སཱི, སོ་ཧཾ ཙ་ཏྟཱ་རོ ནི་མི་ཏྟེ དི་སྭཱ ཨ་སྶ་ཡཱ་ནེ་ན མ་ཧཱ་བྷི་ནི་ཀྑ་མ་ནཾ ནི་ཀྑ་མིཾ. ཏ་ཏོ ཚ་བྦ་སྶཱ་ནི པ་དྷཱ་ནཾ པ་ད་ཧི་ཏྭཱ ཝི་སཱ་ཁ་པུ་ཎྞ་མཱ་ཡ ཨུ་རུ་ཝེ་ལཱ་ཡཾ སེ་ནཱ་ནི་ག་མེ སེ་ནཱ་ཀུ་ཊུ་མྦི་ཀ་སྶ དྷཱི་ཏཱ་ཡ ས་མྤ་སཱ་ད་ཛཱ་ཏཱ་ཡ སུ་ཛཱ་ཏཱ་ཡ ནཱ་མ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ སཱ་ལ་ཝ་ནེ དི་ཝཱ་ཝི་ཧཱ་རཾ ཀ་ཏྭཱ སཱ་ཡ་ནྷ་ས་མ་ཡེ སོ་ཏྠི་ཡེ་ན ནཱ་མ ཏི་ཎ་ཧཱ་ར་ཀེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ཨ་སྶ་ཏྠ་བོ་དྷི་རུ་ཀྑ་མཱུ་ལཾ ཨུ་པ་ག་ནྟྭཱ ཏ་ཏྠ མཱ་ར་བ་ལཾ ཝི་དྡྷཾ་སེ་ཏྭཱ ས་མྦོ་དྷིཾ པ་ཏྟོ་སྨཱི་ཏི ས་བྦཾ བྱཱ་ཀཱ་སི.
ཏ་ཏྠ ས་དྡྷིཾ སཱ་ཝ་ཀ་ས་ངྒྷ་ཏོཏི ས་དྡྷིཾ སཱ་ཝ་ཀ་ས་ངྒྷེ་ན. པ་རི་ནི་བྦི་སྶནྟི པ་རི་ནི་བྦཱ་ཡི་སྶཱ་མི. ཨ་གྒཱི་ཝཱ་ཧཱ་ར་ས་ངྑ་ཡཱཏི ཨ་གྒི ཝི་ཡ ཨི་ནྡྷ་ན་ཀྑ་ཡེ་ན ཡ་ཐཱ ཨ་གྒི ནི་རུ་པཱ་དཱ་ནོ ནི་བྦཱ་ཡ་ཏི, ཨེ་ཝཾ ཨ་ཧ་མྤི ནི་རུ་པཱ་དཱ་ནོ པ་རི་ནི་བྦཱ་ཡི་སྶཱ་མཱི་ཏི ཨ་ཏྠོ.
༢༣-༤. ཏཱ་ནི ཙ ཨ་ཏུ་ལ་ཏེ་ཛཱ་ནཱིཏི ཨ་གྒ་སཱ་ཝ་ཀ་ཡུ་གཱ་དཱི་ནི ཏཱ་ནི ཨ་ས་དི་ས་ཏེ་ཛཱ་ནི. ཨི་མཱ་ནི ཙ ད་ས་བ་ལཱ་ནཱིཏི ཨེ་ཏཱ་ནི ཙ སཱ་རཱི་ར་ད་ས་བ་ལཱ་ནི གུ་ཎ་དྷཱ་ར་ཎོ དེ་ཧོཏི ཚ་ཨ་སཱ་དྷཱ་ར་ཎ་ཉཱ་ཎཱ་དི་གུ་ཎ་དྷ་རོ ཨ་ཡཾ དེ་ཧོ ཙ. ཏ་མ་ནྟ་ར་ཧི་སྶ་ནྟཱིཏི ས་བྦཱ་ནི ཨེ་ཏཱ་ནི ཝུ་ཏྟ་པྤ་ཀཱ་རཱ་ནི ཨ་ནྟ་ར་དྷཱ་ཡི་སྶ་ནྟི ཝི་ན་སྶི་སྶ་ནྟི. ན་ནུ རི་ཏྟཱ ས་བྦ་ས་ངྑཱ་རཱཏི ཨེ་ཏྠ ན་ནཱུཏི ཨ་ཡཾ ཨ་ནུ་མ་ཏི་ཨ་ཏྠེ ནི་པཱ་ཏོ. རི་ཏྟཱཏི ནི་ཙྩ་སཱ་ར་དྷུ་ཝ་སཱ་ར་ར་ཧི་ཏ་ཏྟཱ ཏུ་ཙྪཱ, ས་བྦ་མེ་ཝ པ་ན ས་ངྑ་ཏཾ ཁ་ཡ་དྷ་མྨཾ ཝ་ཡ་དྷ་མྨཾ ཝི་རཱ་ག་དྷ་མྨཾ ནི་རོ་དྷ་དྷ་མྨཾ ཧུ་ཏྭཱ ཨ་བྷཱ་ཝ་ཏོ ཨ་ནི་ཙྩཾ, ཨུ་པྤཱ་དཱ་དི་པ་ཊི་པཱི་ལི༹་ཏ་ཏྟཱ དུ་ཀྑཾ, ཨ་ཝ་ས་ཝ་ཏྟ་ན་ཏོ ཨ་ན་ཏྟཱ. ཏ་སྨཱ ས་ངྑཱ་རེ་སུ ལ་ཀྑ་ཎ་ཏྟ་ཡཾ ཨཱ་རོ་པེ་ཏྭཱ ཝི་པ་སྶ་ནཾ ཝ་ཌྜྷེ་ཏྭཱ ཨ་མ་ཏ་མ་ས་ངྑ་ཏཾ ཨ་ཙྩུ་ཏཾ ནི་བྦཱ་ནཾ ཨ་དྷི་ག་ཙྪ་ཐ. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱི ཨི་དཾ ཨ་མྷཱ་ཀཾ སཱ་ས་ནཾ ཨ་པྤ་མཱ་དེ་ན ས་མྤཱ་དེ་ཐཱ་ཏི. དེ་ས་ནཱ་པ་རི་ཡོ་སཱ་ནེ ཀི་ར དེ་ཝ་ཏཱ་ནཾ ཀོ་ཊི་ས་ཏ་ས་ཧ་སྶ་སྶ ཨ་ནུ་པཱ་དཱ་ཡ ཨཱ་ས་ཝེ་ཧི ཙི་ཏྟཱ་ནི ཝི་མུ་ཙྩིཾ་སུ. སེ་ས་མ་གྒ་ཕ་ལེ་སུ པ་ཏི་ཊྛི་ཏཱ པ་ན ག་ཎ་ན་པ་ཐཾ ཝཱི་ཏི་ཝ་ཏྟཱ ཨ་ཧེ་སུཾ.
ཨེ་ཝཾ བྷ་ག་ཝཱ ཀ་པྤ་ནཱ་མ་ཛཱ་ཏི་ཨཱ་དི་ཝ་ཝ་ཏྠི་ཏཾ ས་ཀ་ལ་མྤི བུ་དྡྷ་ཝཾ་སཾ ཨཱ་ཀཱ་སེ ར་ཏ་ན་ཙ་ངྐ་མེ ཙ་ངྐ་མ་ནྟོ་ཝ ཀ་ཐེ་ཏྭཱ ཉཱ་ཏི་ཛ་ནཾ ཝ་ནྡཱ་པེ་ཏྭཱ ཨཱ་ཀཱ་ས་ཏོ ཨོ་ཏ་རི་ཏྭཱ པ་ཉྙ་ཏྟ་ཝ་ར་བུ་དྡྷཱ་ས་ནེ ནི་སཱི་དི. ཨེ་ཝཾ ནི་སི་ནྣེ པ་ན བྷ་ག་ཝ་ཏི ལོ་ཀ་ནཱ་ཐེ སི་ཁཱ་པྤ་ཏྟོ ཉཱ་ཏི་ས་མཱ་ག་མོ ཨ་ཧོ་སི. ས་བྦེ ཨེ་ཀ་གྒ་ཙི་ཏྟཱ ནི་སཱི་དིཾ་སུ. ཏ་ཏོ མ་ཧཱ་མེ་གྷོ པོ་ཀྑ་ར་ཝ་སྶཾ ཝ་སྶི. ཏ་ངྑ་ཎེ ཨུ་ད་ཀཾ ཧེ་ཊྛཱ ཝི་ར་ཝ་ནྟཾ ག་ཙྪ་ཏི. ཏེ་མེ་ཏུ་ཀཱ་མོ་ཝ ཏེ་མེ་ཏི, ཨ་ཏེ་མི་ཏུ་ཀཱ་མ་སྶ ས་རཱི་རེ ཨེ་ཀ་བི་ནྡུ་མ་ཏྟ་མྤི ན པ་ཏ་ཏི. ཏཾ དི་སྭཱ ས་བྦེ ཨ་ཙྪ་རི་ཡ་བྦྷུ་ཏ་ཙི་ཏྟ་ཛཱ་ཏཱ ཧུ་ཏྭཱ – ‘‘ཨ་ཧོ ཨ་ཙྪ་རི་ཡཾ, ཨ་ཧོ ཨ་བྦྷུ་ཏ’’ནྟི ཀ་ཐཾ ས་མུ་ཊྛཱ་པེ་སུཾ. ཏཾ སུ་ཏྭཱ ས་ཏྠཱ – ‘‘ན ཨི་དཱ་ནེ་ཝ མ་ཡ྄ཧཾ ཉཱ་ཏི་ས་མཱ་ག་མེ པོ་ཀྑ་ར་ཝ་སྶཾ ཝ་སྶི, ཨ་ཏཱི་ཏེ་པི ཝ་སྶཱི’’ཏི ཨི་མི་སྶཱ ཨ་ཊྛུ་པྤ་ཏྟི་ཡཱ ཝེ་སྶ་ནྟ་ར་ཛཱ་ཏ་ཀཾ (ཛཱ. ༢.༢༢.༡༦༥༥ ཨཱ་ད་ཡོ) ཀ་ཐེ་སི. སཱ དྷ་མྨ་དེ་ས་ནཱ སཱ་ཏྠི་ཀཱ ཛཱ་ཏཱ. ཏ་ཏོ བྷ་ག་ཝཱ ཨུ་ཊྛཱ་ཡཱ་ས་ནཱ ཝི་ཧཱ་རཾ པཱ་ཝི་སི.
ཨི་ཏི མ་དྷུ་ར་ཏྠ་ཝི་ལཱ་སི་ནི་ཡཱ བུ་དྡྷ་ཝཾ་ས་ཊྛ་ཀ་ཐཱ་ཡ
གོ་ཏ་མ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ པ་ཉྩ་ཝཱི་ས་ཏི་མོ བུ་དྡྷ་ཝཾ་སོ.