༢༨. བུ་དྡྷ་པ་ཀི་ཎྞ་ཀ་ཀ་ཐཱ
༡-༡༨. ‘‘ཨ་པ་རི་མེ་ཡྻི་ཏོ ཀ་པྤེ, ཙ་ཏུ་རོ ཨཱ་སུཾ ཝི་ནཱ་ཡ་ཀཱ’’ཏི་ཨཱ་དི་ཀཱ ཨ་ཊྛཱ་ར་ས་གཱ་ཐཱ ས་ངྒཱི་ཏི་ཀཱ་ར་ཀེ་ཧི ཋ་པི་ཏཱ ནི་ག་མ་ན་གཱ་ཐཱ་ཏི ཝེ་དི་ཏ་བྦཱ. སེ་ས་གཱ་ཐཱ་སུ ས་བྦ་ཏྠ པཱ་ཀ་ཊ་མེ་ཝཱ་ཏི.
ཝེ་མ་ཏྟ་ཀ་ཐཱ
ཨི་མ་སྨིཾ པ་ན ས་ཀ་ལེ་པི བུ་དྡྷ་ཝཾ་སེ ནི་དྡི་ཊྛཱ་ནཾ པ་ཉྩ་ཝཱི་ས་ཏི་ཡཱ བུ་དྡྷཱ་ནཾ ཨ་ཊྛ ཝེ་མ་ཏྟཱ་ནི ཝེ་དི་ཏ་བྦཱ་ནི. ཀ་ཏ་མཱ་ནི ཨ་ཊྛ? ཨཱ་ཡུ་ཝེ་མ་ཏྟཾ, པ་མཱ་ཎ་ཝེ་མ་ཏྟཾ, ཀུ་ལ་ཝེ་མ་ཏྟཾ, པ་དྷཱ་ན་ཝེ་མ་ཏྟཾ, ར་སྨི་ཝེ་མ་ཏྟཾ, ཡཱ་ན་ཝེ་མ་ཏྟཾ, བོ་དྷི་ཝེ་མ་ཏྟཾ, པ་ལླ་ངྐ་ཝེ་མ་ཏྟ་ནྟི.
ཏ་ཏྠ ཨཱ་ཡུ་ཝེ་མ་ཏྟཾ ནཱ་མ ཀེ་ཙི དཱི་གྷཱ་ཡུ་ཀཱ ཧོ་ནྟི ཀེ་ཙི ཨ་པྤཱ་ཡུ་ཀཱ. ཏ་ཐཱ ཧི དཱི་པ་ངྐ་རོ ཀོ་ཎྜ་ཉྙོ ཨ་ནོ་མ་ད་སྶཱི པ་དུ་མོ པ་དུ་མུ་ཏྟ་རོ ཨ་ཏྠ་ད་སྶཱི དྷ་མྨ་ད་སྶཱི སི་དྡྷ་ཏྠོ ཏི་སྶོ་ཏི ཨི་མེ ན་ཝ བུ་དྡྷཱ ཝ་སྶ་ས་ཏ་ས་ཧ་སྶཱ་ཡུ་ཀཱ ཨ་ཧེ་སུཾ. མ་ངྒ་ལོ སུ་མ་ནོ སོ་བྷི་ཏོ ནཱ་ར་དོ སུ་མེ་དྷོ སུ་ཛཱ་ཏོ པི་ཡ་ད་སྶཱི ཕུ་སྶོ་ཏི ཨི་མེ ཨ་ཊྛ བུ་དྡྷཱ ན་ཝུ་ཏི་ཝ་སྶ་ས་ཧ་སྶཱ་ཡུ་ཀཱ ཨ་ཧེ་སུཾ. རེ་ཝ་ཏོ ཝེ་སྶ་བྷཱུ ཙཱ་ཏི ཨི་མེ དྭེ བུ་དྡྷཱ ས་ཊྛི་ཝ་སྶ་ས་ཧ་སྶཱ་ཡུ་ཀཱ ཨ་ཧེ་སུཾ. ཝི་པ་སྶཱི བྷ་ག་ཝཱ ཨ་སཱི་ཏི་ཝ་སྶ་ས་ཧ་སྶཱ་ཡུ་ཀཱ ཨ་ཧོ་སི. སི་ཁཱི ཀ་ཀུ་ས་ནྡྷོ ཀོ་ཎཱ་ག་མ་ནོ ཀ་སྶ་པོ་ཏི ཨི་མེ ཙ་ཏྟཱ་རོ བུ་དྡྷཱ ཡ་ཐཱ་ཀྐ་མེ་ན ས་ཏྟ་ཏི་ཙ་ཏྟཱ་ལཱི་ས་ཏིཾ་ས་ཝཱི་ས་ཝ་སྶ་ས་ཧ་སྶཱ་ཡུ་ཀཱ ཨ་ཧེ་སུཾ. ཨ་མྷཱ་ཀཾ པ་ན བྷ་ག་ཝ་ཏོ ཝ་སྶ་ས་ཏཾ ཨཱ་ཡུ་པྤ་མཱ་ཎཾ ཨ་ཧོ་སི. ཨུ་པ་ཙི་ཏ་པུ་ཉྙ་ས་མྦྷཱ་རཱ་ནཾ དཱི་གྷཱ་ཡུ་ཀ་སཾ་ཝ་ཏྟ་ནི་ཡ་ཀ་མྨ་ས་མུ་པེ་ཏཱ་ན་མྤི བུ་དྡྷཱ་ནཾ ཡུ་ག་ཝ་སེ་ན ཨཱ་ཡུ་པྤ་མཱ་ཎཾ ཨ་པྤ་མཱ་ཎཾ ཨ་ཧོ་སི. ཨ་ཡཾ པ་ཉྩ་ཝཱི་ས་ཏི་ཡཱ བུ་དྡྷཱ་ནཾ ཨཱ་ཡུ་ཝེ་མ་ཏྟཾ ནཱ་མ.
པ་མཱ་ཎ་ཝེ་མ་ཏྟཾ ནཱ་མ ཀེ་ཙི དཱི་གྷཱ ཧོ་ནྟི ཀེ་ཙི ར་སྶཱ. ཏ་ཐཱ ཧི དཱི་པ་ངྐ་ར-རེ་ཝ་ཏ-པི་ཡ་ད་སྶཱི-ཨ་ཏྠ་ད་སྶཱི-དྷ་མྨ་ད་སྶཱི-ཝི་པ་སྶཱི་བུ་དྡྷཱ་ནཾ ཨ་སཱི་ཏི་ཧ་ཏྠུ་བྦེ་དྷཾ ས་རཱི་ར་པྤ་མཱ་ཎཾ ཨ་ཧོ་སི. ཀོ་ཎྜ་ཉྙ-མ་ངྒ་ལ-ནཱ་ར་ད-སུ་མེ་དྷཱ་ནཾ ཨ་ཊྛཱ་སཱི་ཏི་ཧ་ཏྠུ་བྦེ་དྷོ ཀཱ་ཡོ ཨ་ཧོ་སི. སུ་མ་ན་སྶ ན་ཝུ་ཏི་ཧ་ཏྠུ་བྦེ་དྷཾ ས་རཱི་རཾ ཨ་ཧོ་སི. སོ་བྷི་ཏ-ཨ་ནོ་མ་ད་སྶཱི-པ་དུ་མ-པ་དུ་མུ་ཏྟ་ར-ཕུ་སྶ་བུ་དྡྷཱ་ནཾ ཨ་ཊྛ་པ་ཎྞཱ་ས་ཧ་ཏྠུ་བྦེ་དྷཾ ས་རཱི་རཾ ཨ་ཧོ་སི. སུ་ཛཱ་ཏོ པ་ཎྞཱ་ས་ཧ་ཏྠུ་བྦེ་དྷ་ས་རཱི་རོ ཨ་ཧོ་སི. སི་དྡྷ་ཏྠ-ཏི་སྶ-ཝེ་སྶ་བྷུ་ནོ ས་ཊྛི་ཧ་ཏྠུ་བྦེ་དྷཱ ཨ་ཧེ་སུཾ. སི་ཁཱི ས་ཏྟ་ཏི་ཧ་ཏྠུ་བྦེ་དྷོ ཨ་ཧོ་སི. ཀ་ཀུ་ས་ནྡྷ-ཀོ་ཎཱ་ག་མ་ན-ཀ་སྶ་པཱ ཡ་ཐཱ་ཀྐ་མེ་ན ཙ་ཏྟཱ་ལཱི་ས་ཏིཾ་ས་ཝཱི་ས་ཏི་ཧ་ཏྠུ་བྦེ་དྷཱ ཨ་ཧེ་སུཾ. ཨ་མྷཱ་ཀཾ བྷ་ག་ཝཱ ཨ་ཊྛཱ་ར་ས་ཧ་ཏྠུ་བྦེ་དྷོ ཨ་ཧོ་སི. ཨ་ཡཾ པ་ཉྩ་ཝཱི་ས་ཏི་ཡཱ བུ་དྡྷཱ་ནཾ པ་མཱ་ཎ་ཝེ་མ་ཏྟཾ ནཱ་མ.
ཀུ་ལ་ཝེ་མ་ཏྟཾ ནཱ་མ ཀེ་ཙི ཁ་ཏྟི་ཡ་ཀུ་ལེ ནི་བྦ་ཏྟིཾ་སུ ཀེ་ཙི བྲཱ་ཧྨ་ཎ་ཀུ་ལེ. ཏ་ཐཱ ཧི ཀ་ཀུ་ས་ནྡྷ་ཀོ་ཎཱ་ག་མ་ན་ཀ་སྶ་པ་ས་མྨཱ་ས་མྦུ་དྡྷཱ བྲཱ་ཧྨ་ཎ་ཀུ་ལེ ནི་བྦ་ཏྟིཾ་སུ. དཱི་པ་ངྐ་རཱ་དི་གོ་ཏ་མ་བུ་དྡྷ་པ་རི་ཡ་ནྟཱ དྭཱ་ཝཱི་ས་ཏི བུ་དྡྷཱ ཁ་ཏྟི་ཡ་ཀུ་ལེ་ཡེ་ཝ ནི་བྦ་ཏྟིཾ་སུ. ཨ་ཡཾ པ་ཉྩ་ཝཱི་ས་ཏི་ཡཱ བུ་དྡྷཱ་ནཾ ཀུ་ལ་ཝེ་མ་ཏྟཾ ནཱ་མ.
པ་དྷཱ་ན་ཝེ་མ་ཏྟཾ ནཱ་མ དཱི་པ་ངྐ་ར-ཀོ་ཎྜ་ཉྙ-སུ་མ་ན-ཨ་ནོ་མ་ད་སྶཱི-སུ་ཛཱ་ཏ་སི་དྡྷ་ཏྠ-ཀ་ཀུ་ས་ནྡྷཱ་ནཾ ད་ས་མཱ་སི་ཀཱ པ་དྷཱ་ན་ཙ་རི་ཡཱ. མ་ངྒ་ལ-སུ་མེ་དྷ་ཏི་སྶ སི་ཁཱི་ནཾ ཨ་ཊྛ་མཱ་སི་ཀཱ. རེ་ཝ་ཏ་སྶ ས་ཏྟ་མཱ་སི་ཀཱ. སོ་བྷི་ཏ་སྶ ཙ་ཏྟཱ་རོ མཱ་སཱ. པ་དུ་མ་ཨ་ཏྠ་ད་སྶཱི ཝི་པ་སྶཱི་ནཾ ཨ་ཌྜྷ་མཱ་སི་ཀཱ. ནཱ་ར་ད-པ་དུ་མུ་ཏྟ་ར-དྷ་མྨ་ད་སྶཱི-ཀ་སྶ་པཱ་ནཾ ས་ཏྟཱ་ཧཱ་ནི. པི་ཡ་ད་སྶཱི-ཕུ་སྶ-ཝེ་སྶ་བྷཱུ ཀོ་ཎཱ་ག་མ་ནཱ་ནཾ ཚ་མཱ་སི་ཀཱ. ཨ་མྷཱ་ཀཾ བུ་དྡྷ་སྶ ཚ་བྦ་སྶཱ་ནི པ་དྷཱ་ན་ཙ་རི་ཡཱ ཨ་ཧོ་སི. ཨ་ཡཾ པ་དྷཱ་ན་ཝེ་མ་ཏྟཾ ནཱ་མ.
ར་སྨི་ཝེ་མ་ཏྟཾ ནཱ་མ མ་ངྒ་ལ་སྶ ཀི་ར ས་མྨཱ་ས་མྦུ་དྡྷ་སྶ ས་རཱི་ར་སྨི ད་ས་ས་ཧ་སྶི་ལོ་ཀ་དྷཱ་ཏུཾ ཕ་རི་ཏྭཱ ཨ་ཊྛཱ་སི. པ་དུ་མུ་ཏྟ་ར་བུ་དྡྷ་སྶ དྭཱ་ད་ས་ཡོ་ཛ་ནི་ཀཱ ཨ་ཧོ་སི. ཝི་པ་སྶི་སྶ བྷ་ག་ཝ་ཏོ ས་ཏྟ་ཡོ་ཛ་ནི་ཀཱ ཨ་ཧོ་སི. སི་ཁི་སྶ ཏི་ཡོ་ཛ་ན་པྤ་མཱ་ཎཱ. ཀ་ཀུ་ས་ནྡྷ་སྶ ད་ས་ཡོ་ཛ་ནི་ཀཱ. ཨ་མྷཱ་ཀཾ བྷ་ག་ཝ་ཏོ ས་མ་ནྟ་ཏོ བྱཱ་མ་པྤ་མཱ་ཎཱ. སེ་སཱ་ནཾ ཨ་ནི་ཡ་ཏཱ ཨ་ཧོ་སི. ཨ་ཡཾ ར་སྨི་ཝེ་མ་ཏྟཾ ནཱ་མ ཨ་ཛ྄ཛྷཱ་ས་ཡ་པ་ཊི་བ་དྡྷཾ, ཡོ ཡ་ཏྟ་ཀཾ ཨི་ཙྪ་ཏི, ཏ་སྶ ས་རཱི་ར་པྤ་བྷཱ ཏ་ཏྟ་ཀཾ ཕ་ར་ཏི, པ་ཊི་ཝི་དྡྷ་གུ་ཎེ པ་ན ཀ་སྶ་ཙི ཝེ་མ་ཏྟཾ ནཱ་མ ན་ཏྠི. ཨ་ཡཾ ར་སྨི་ཝེ་མ་ཏྟཾ ནཱ་མ.
ཡཱ་ན་ཝེ་མ་ཏྟཾ ནཱ་མ ཀེ་ཙི ཧ་ཏྠི་ཡཱ་ནེ་ན ཀེ་ཙི ཨ་སྶ་ཡཱ་ནེ་ན ཀེ་ཙི ར་ཐ་པ་ད-པཱ་སཱ་ད-སི་ཝི་ཀཱ་དཱི་སུ ཨ་ཉྙ་ཏ་རེ་ན ནི་ཀྑ་མ་ནྟི. ཏ་ཐཱ ཧི དཱི་པ་ངྐ་ར-སུ་མ་ན-སུ་མེ་དྷ-ཕུ་སྶ-སི་ཁཱི-ཀོ་ཎཱ་ག་མ་ནཱ ཧ་ཏྠི་ཡཱ་ནེ་ན ནི་ཀྑ་མིཾ་སུ. ཀོ་ཎྜ་ཉྙ-རེ་ཝ་ཏ-པ་དུ་མ-པི་ཡ་ད་སྶཱི-ཝི་པ་སྶཱི-ཀ་ཀུ་ས་ནྡྷཱ ར་ཐ་ཡཱ་ནེ་ན. མ་ངྒ་ལ-སུ་ཛཱ་ཏ-ཨ་ཏྠ་ད་སྶཱི-ཏི་སྶ-གོ་ཏ་མཱ ཨ་སྶ་ཡཱ་ནེ་ན. ཨ་ནོ་མ་ད་སྶཱི་སི་དྡྷ་ཏྠ་ཝེ་སྶ་བྷུ་ནོ སི་ཝི་ཀཱ་ཡཱ་ནེ་ན. ནཱ་ར་དོ པ་ད་སཱ ནི་ཀྑ་མི. སོ་བྷི་ཏ-པ་དུ་མུ་ཏྟ་ར-དྷ་མྨ་ད་སྶཱི-ཀ་སྶ་པཱ པཱ་སཱ་དེ་ན ནི་ཀྑ་མིཾ་སུ. ཨ་ཡཾ ཡཱ་ན་ཝེ་མ་ཏྟཾ ནཱ་མ.
བོ་དྷི་ཝེ་མ་ཏྟཾ ནཱ་མ དཱི་པ་ངྐ་ར་སྶ བྷ་ག་ཝ་ཏོ ཀ་པཱི་ཏ་ན་རུ་ཀྑོ བོ་དྷི; ཀོ་ཎྜ་ཉྙ་སྶ བྷ་ག་ཝ་ཏོ སཱ་ལ་ཀ་ལྱཱ་ཎི་རུ་ཀྑོ, མ་ངྒ་ལ-སུ་མ་ན-རེ་ཝ་ཏ-སོ་བྷི་ཏཱ་ནཾ ནཱ་ག་རུ་ཀྑོ, ཨ་ནོ་མ་ད་སྶི་སྶ ཨ་ཛྫུ་ན་རུ་ཀྑོ, པ་དུ་མ་ནཱ་ར་དཱ་ནཾ མ་ཧཱ་སོ་ཎ་རུ་ཀྑོ, པ་དུ་མུ་ཏྟ་ར་སྶ ས་ལ་ལ་རུ་ཀྑོ, སུ་མེ་དྷ་སྶ ནཱི་པོ, སུ་ཛཱ་ཏ་སྶ ཝེ་ལུ༹, པི་ཡ་ད་སྶི་ནོ ཀ་ཀུ་དྷོ, ཨ་ཏྠ་ད་སྶི་སྶ ཙ་མྤ་ཀ་རུ་ཀྑོ, དྷ་མྨ་ད་སྶི་སྶ ར་ཏྟ་ཀུ་ར་ཝ་ཀ་རུ་ཀྑོ, སི་དྡྷ་ཏྠ་སྶ ཀ་ཎི་ཀཱ་ར་རུ་ཀྑོ, ཏི་སྶ་སྶ ཨ་ས་ན་རུ་ཀྑོ, ཕུ་སྶ་སྶ ཨཱ་མ་ལ་ཀ་རུ་ཀྑོ, ཝི་པ་སྶི་སྶ པཱ་ཊ་ལི་རུ་ཀྑོ, སི་ཁི་སྶ པུ་ཎྜ་རཱི་ཀ་རུ་ཀྑོ, ཝེ་སྶ་བྷུ་སྶ སཱ་ལ་རུ་ཀྑོ, ཀ་ཀུ་ས་ནྡྷ་སྶ སི་རཱི་ས་རུ་ཀྑོ, ཀོ་ཎཱ་ག་མ་ན་སྶ ཨུ་དུ་མྦ་ར་རུ་ཀྑོ, ཀ་སྶ་པ་སྶ ནི་གྲོ་དྷོ, གོ་ཏ་མ་སྶ ཨ་སྶ་ཏྠོ་ཏི ཨ་ཡཾ བོ་དྷི་ཝེ་མ་ཏྟཾ ནཱ་མ.
པ་ལླ་ངྐ་ཝེ་མ་ཏྟཾ ནཱ་མ དཱི་པ་ངྐ་ར-རེ་ཝ་ཏ-པི་ཡ་ད་སྶཱི-ཨ་ཏྠ་ད་སྶཱི-དྷ་མྨ་ད་སྶཱི-ཝི་པ་སྶཱི་ནཾ ཏེ་པ་ཎྞཱ་ས་ཧ་ཏྠ་པ་ལླ་ངྐཱ ཨ་ཧེ་སུཾ; ཀོ་ཎྜ་ཉྙ-མ་ངྒ་ལ-ནཱ་ར་ད-སུ་མེ་དྷཱ་ནཾ ས་ཏྟ་པ་ཎྞཱ་ས་ཧ་ཏྠཱ; སུ་མ་ན་སྶ ས་ཊྛི་ཧ་ཏྠོ པ་ལླ་ངྐོ ཨ་ཧོ་སི; སོ་བྷི་ཏ-ཨ་ནོ་མ་ད་སྶཱི-པ་དུ་མ-པ་དུ་མུ་ཏྟ་ར-ཕུ་སྶཱ་ནཾ ཨ་ཊྛ་ཏྟིཾ་ས་ཧ་ཏྠཱ, སུ་ཛཱ་ཏ་སྶ དྭ་ཏྟིཾ་ས་ཧ་ཏྠོ, སི་དྡྷ་ཏྠ-ཏི་སྶ-ཝེ་སྶ་བྷཱུ་ནཾ ཙ་ཏྟཱ་ལཱི་ས་ཧ་ཏྠཱ, སི་ཁི་སྶ དྭ་ཏྟིཾ་ས་ཧ་ཏྠོ, ཀ་ཀུ་ས་ནྡྷ་སྶ ཚ་བྦཱི་ས་ཏི་ཧ་ཏྠོ, ཀོ་ཎཱ་ག་མ་ན་སྶ ཝཱི་ས་ཏི་ཧ་ཏྠོ, ཀ་སྶ་པ་སྶ པ་ནྣ་ར་ས་ཧ་ཏྠོ, གོ་ཏ་མ་སྶ ཙུ་དྡ་ས་ཧ་ཏྠོ པ་ལླ་ངྐོ ཨ་ཧོ་སི. ཨ་ཡཾ པ་ལླ་ངྐ་ཝེ་མ་ཏྟཾ ནཱ་མ. ཨི་མཱ་ནི ཨ་ཊྛ ཝེ་མ་ཏྟཱ་ནི ནཱ་མ.
ཨ་ཝི་ཛ་ཧི་ཏ་ཊྛཱ་ན་ཀ་ཐཱ
ས་བྦ་བུ་དྡྷཱ་ནཾ པ་ན ཙ་ཏྟཱ་རི ཨ་ཝི་ཛ་ཧི་ཏ་ཊྛཱ་ནཱ་ནི ནཱ་མ ཧོ་ནྟི. ས་བྦ་བུ་དྡྷཱ་ན་ཉྷི བོ་དྷི་པ་ལླ་ངྐོ ཨ་ཝི་ཛ་ཧི་ཏོ ཨེ་ཀ་སྨིཾ་ཡེ་ཝ ཋཱ་ནེ ཧོ་ཏི. དྷ་མྨ་ཙ་ཀྐ་པྤ་ཝ་ཏྟ་ནཾ ཨི་སི་པ་ཏ་ནེ མི་ག་དཱ་ཡེ ཨ་ཝི་ཛ་ཧི་ཏ་མེ་ཝ ཧོ་ཏི. དེ་ཝོ་རོ་ཧ་ཎ་ཀཱ་ལེ ས་ངྐ་སྶ་ན་ག་ར་དྭཱ་རེ པ་ཋ་མ་ཀྐ་པཱ་ད་ཊྛཱ་ནཾ ཨ་ཝི་ཛ་ཧི་ཏ་མེ་ཝ ཧོ་ཏི. ཛེ་ཏ་ཝ་ནེ ག་ནྡྷ་ཀུ་ཊི་ཡཱ ཙ་ཏྟཱ་རི མ་ཉྩ་པཱ་ད་ཊྛཱ་ནཱ་ནི ཨ་ཝི་ཛ་ཧི་ཏཱ་ནེ་ཝ ཧོ་ནྟི. ཝི་ཧཱ་རོ པ་ན ཁུ་དྡ་ཀོ་པི མ་ཧ་ནྟོ་པི ཧོ་ཏི. ཝི་ཧཱ་རོ ན ཝི་ཛ་ཧ་ཏི་ཡེ་ཝ, ན་ག་རཾ པ་ན ཝི་ཛ་ཧ་ཏི.
ས་ཧ་ཛཱ་ཏ་པ་རི་ཙྪེ་ད-ན་ཀྑ་ཏྟ་པ་རི་ཙྪེ་ད་ཀ་ཐཱ
ཨ་པ་རཾ པ་ན ཨ་མྷཱ་ཀཾ་ཡེ་ཝ བྷ་ག་ཝ་ཏོ ས་ཧ་ཛཱ་ཏ་པ་རི་ཙྪེ་ད་ཉྩ ན་ཀྑ་ཏྟ་པ་རི་ཙྪེ་ད་ཉྩ དཱི་པེ་སུཾ. ཨ་མྷཱ་ཀཾ ས་བྦ་ཉྙུ་བོ་དྷི་ས་ཏྟེ་ན ཀི་ར ས་དྡྷིཾ རཱ་ཧུ་ལ་མཱ་ཏཱ ཨཱ་ན་ནྡ་ཏྠེ་རོ ཚ་ནྣོ ཀ་ཎྜ་ཀོ ཨ་སྶ་རཱ་ཛཱ ནི་དྷི་ཀུ་མྦྷོ མ་ཧཱ་བོ་དྷི ཀཱ་ལུ༹་དཱ་ཡཱི་ཏི ཨི་མཱ་ནི ས་ཏྟ ས་ཧ་ཛཱ་ཏཱ་ནི. ཨ་ཡཾ ས་ཧ་ཛཱ་ཏ་པ་རི་ཙྪེ་དོ. མ་ཧཱ་པུ་རི་སོ པ་ན ཨུ་ཏྟ་རཱ་སཱ་ལ༹ྷ་ན་ཀྑ་ཏྟེ་ནེ་ཝ མཱ་ཏུ་ཀུ་ཙྪིཾ ཨོ་ཀྐ་མི, མ་ཧཱ་བྷི་ནི་ཀྑ་མ་ནཾ ནི་ཀྑ་མི, དྷ་མྨ་ཙ་ཀྐཾ པ་ཝ་ཏྟེ་སི, ཡ་མ་ཀ་པཱ་ཊི་ཧཱ་རི་ཡཾ ཨ་ཀཱ་སི. ཝི་སཱ་ཁ་ན་ཀྑ་ཏྟེ་ན ཛཱ་ཏོ ཙ ཨ་བྷི་ས་མྦུ་དྡྷོ ཙ པ་རི་ནི་བྦུ་ཏོ ཙ. མཱ་གྷ་ན་ཀྑ་ཏྟེ་ན ཏ་སྶ སཱ་ཝ་ཀ་ས་ནྣི་པཱ་ཏོ ཙ ཨཱ་ཡུ་ས་ངྑཱ་ར་ཝོ་ས་ཛྫ་ན་ཉྩ ཨ་ཧོ་སི. ཨ་སྶ་ཡུ་ཛ་ན་ཀྑ་ཏྟེ་ན དེ་ཝོ་རོ་ཧ་ཎཾ. ཨ་ཡཾ ན་ཀྑ་ཏྟ་པ་རི་ཙྪེ་དོཏི.
ས་དྷ་མྨ་ཏཱ་ཀ་ཐཱ
ཨི་དཱ་ནི པ་ན ས་བྦེ་སཾ བུ་དྡྷཱ་ནཾ སཱ་དྷཱ་ར་ཎ་དྷ་མྨ་ཏཾ པ་ཀཱ་ས་ཡི་སྶཱ་མ. ས་བྦ་བུ་དྡྷཱ་ནཾ ས་མ་ཏྟིཾ་ས་ཝི་དྷཱ དྷ་མྨ་ཏཱ. སེ་ཡྻ་ཐི་དཾ – པ་ཙྪི་མ་བྷ་ཝི་ཀ་བོ་དྷི་ས་ཏྟ་སྶ ས་མྤ་ཛཱ་ན་སྶ མཱ་ཏུ་ཀུ་ཙྪི་ཨོ་ཀྐ་མ་ནཾ, མཱ་ཏུ་ཀུ་ཙྪི་ཡཾ པ་ལླ་ངྐེ་ན ནི་སཱི་དི་ཏྭཱ བ་ཧི་མུ་ཁོ་ལོ་ཀ་ནཾ, ཋི་ཏཱ་ཡ བོ་དྷི་ས་ཏྟ་མཱ་ཏུ་ཡཱ ཝི་ཛཱ་ཡ་ནཾ, ཨ་ར་ཉྙེ་ཡེ་ཝ མཱ་ཏུ་ཀུ་ཙྪི་ཏོ ནི་ཀྑ་མ་ནཾ, ཀ་ཉྩ་ན་པ་ཊྚེ་སུ པ་ཏི་ཊྛི་ཏ་པཱ་དཱ་ནཾ ཨུ་ཏྟ་རཱ་བྷི་མུ་ཁཱ་ནཾ ས་ཏྟ་པ་ད་ཝཱི་ཏི་ཧཱ་རཱ་ནཾ ག་ནྟྭཱ ཙ་ཏུ་དྡི་སཾ ཨོ་ལོ་ཀེ་ཏྭཱ སཱི་ཧ་ནཱ་ད་ན་ད་ནཾ, ཙ་ཏྟཱ་རི ནི་མི་ཏྟཱ་ནི དི་སྭཱ ཛཱ་ཏ་མ་ཏྟ་པུ་ཏྟཱ་ནཾ མ་ཧཱ་ས་ཏྟཱ་ནཾ མ་ཧཱ་བྷི་ནི་ཀྑ་མ་ནཾ, ཨ་ར་ཧ་དྡྷ་ཛ་མཱ་དཱ་ཡ པ་བྦ་ཛི་ཏྭཱ ས་བྦ་ཧེ་ཊྛི་མེ་ན པ་རི་ཙྪེ་དེ་ན ས་ཏྟཱ་ཧཾ པ་དྷཱ་ན་ཙ་རི་ཡཱ, ས་མྦོ་དྷིཾ པཱ་པུ་ཎ་ན་དི་ཝ་སེ པཱ་ཡཱ་ས་བྷོ་ཛ་ནཾ, ཏི་ཎ་ས་ནྠ་རེ ནི་སཱི་དི་ཏྭཱ ས་བྦ་ཉྙུ་ཏ་ཉྙཱ་ཎཱ་དྷི་ག་མོ, ཨཱ་ནཱ་པཱ་ན་སྶ་ཏི་ཀ་མྨ་ཊྛཱ་ན་པ་རི་ཀ་མྨཾ, མཱ་ར་བ་ལ་ཝི་དྡྷཾ་ས་ནཾ, བོ་དྷི་པ་ལླ་ངྐེ་ཡེ་ཝ ཏི་སྶོ ཝི་ཛྫཱ ཨཱ་དིཾ ཀ་ཏྭཱ ཨ་སཱ་དྷཱ་ར་ཎ་ཉཱ་ཎཱ་དི་གུ་ཎ་པ་ཊི་ལཱ་བྷོ, ས་ཏྟ་ས་ཏྟཱ་ཧཾ བོ་དྷི་ས་མཱི་པེ་ཡེ་ཝ ཝཱི་ཏི་ནཱ་མ་ནཾ, མ་ཧཱ་བྲ་ཧྨུ་ནོ དྷ་མྨ་དེ་ས་ན་ཏྠཱ་ཡ ཨཱ་ཡཱ་ཙ་ནཾ, ཨི་སི་པ་ཏ་ནེ མི་ག་དཱ་ཡེ དྷ་མྨ་ཙ་ཀྐ་པྤ་ཝ་ཏྟ་ནཾ, མཱ་གྷ་པུ་ཎྞ་མཱ་ཡ ཙ་ཏུ་ར་ངྒི་ཀ་ས་ནྣི་པཱ་ཏེ པཱ་ཏི་མོ་ཀྑུ་དྡེ་སོ, ཛེ་ཏ་ཝ་ན་ཊྛཱ་ནེ ནི་བ་དྡྷ་ཝཱ་སོ, སཱ་ཝ་ཏྠི་ན་ག་ར་དྭཱ་རེ ཡ་མ་ཀ་པཱ་ཊི་ཧཱ་རི་ཡ་ཀ་ར་ཎཾ, ཏཱ་ཝ་ཏིཾ་ས་བྷ་ཝ་ནེ ཨ་བྷི་དྷ་མྨ་དེ་ས་ནཱ, ས་ངྐ་སྶ་ན་ག་ར་དྭཱ་རེ དེ་ཝ་ལོ་ཀ་ཏོ ཨོ་ཏ་ར་ཎཾ ས་ཏ་ཏཾ ཕ་ལ་ས་མཱ་པ་ཏྟི་ས་མཱ་པ་ཛྫ་ནཾ, དྭཱི་སུ ཝཱ་རེ་སུ ཝེ་ནེ་ཡྻ་ཛ་ནཱ་ཝ་ལོ་ཀ་ནཾ, ཨུ་པྤ་ནྣེ ཝ་ཏྠུ་མྷི སི་ཀྑཱ་པ་ད་པ་ཉྙཱ་པ་ནཾ ཨུ་པྤ་ནྣཱ་ཡ ཨ་ཊྛུ་པྤ་ཏྟི་ཡཱ ཛཱ་ཏ་ཀ་ཀ་ཐ་ནཾ, ཉཱ་ཏི་ས་མཱ་ག་མེ བུ་དྡྷ་ཝཾ་ས་ཀ་ཐ་ནཾ, ཨཱ་ག་ནྟུ་ཀེ་ཧི བྷི་ཀྑཱུ་ཧི པ་ཊི་ས་ནྠཱ་ར་ཀ་ར་ཎཾ, ནི་མ་ནྟི་ཏཱ་ནཾ ཝུ་ཊྛ་ཝ་སྶཱ་ནཾ ཨ་ནཱ་པུ་ཙྪཱ ཨ་ག་མ་ནཾ, དི་ཝ་སེ དི་ཝ་སེ པུ་རེ་བྷ་ཏྟ་པ་ཙྪཱ་བྷ་ཏྟ་པ་ཋ་མ་མ་ཛ྄ཛྷི་མ་པ་ཙྪི་མ་ཡཱ་མ་ཀི་ཙྩ་ཀ་ར་ཎཾ, པ་རི་ནི་བྦཱ་ན་དི་ཝ་སེ མཾ་ས་ར་ས་བྷོ་ཛ་ནཾ, ཙ་ཏུ་ཝཱི་ས་ཏི་ཀོ་ཊི་ས་ཏ་ས་ཧ་སྶ་ས་མཱ་པ་ཏྟི་ཡོ ས་མཱ་པ་ཛྫི་ཏྭཱ པ་རི་ནི་བྦཱ་ན་ནྟི ཨི་མཱ ས་མ་ཏྟིཾ་ས ས་བྦ་བུ་དྡྷཱ་ནཾ དྷ་མྨ་ཏཱ་ཏི.
ཨ་ན་ནྟ་རཱ་ཡི་ཀ་དྷ་མྨ་ཀ་ཐཱ
ས་བྦ་བུ་དྡྷཱ་ནཾ ཙ་ཏྟཱ་རོ ཨ་ན་ནྟ་རཱ་ཡི་ཀཱ དྷ་མྨཱ. ཀ་ཏ་མེ ཙ་ཏྟཱ་རོ? བུ་དྡྷཱ་ནཾ ཨུ་དྡི་སྶ ཨ་བྷི་ཧ་ཊཱ་ནཾ ཙ་ཏུ་ནྣཾ པ་ཙྩ་ཡཱ་ནཾ ན ས་ཀྐཱ ཀེ་ན་ཙི ཨ་ནྟ་རཱ་ཡོ ཀཱ་ཏུཾ. བུ་དྡྷཱ་ནཾ ཨཱ་ཡུ་ནོ ན ས་ཀྐཱ ཀེ་ན་ཙི ཨ་ནྟ་རཱ་ཡོ ཀཱ་ཏུཾ. ཝུ་ཏྟ་ཉྷེ་ཏཾ – ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ, ཡཾ པ་རཱུ་པ་ཀྐ་མེ་ན ཏ་ཐཱ་ག་ཏཾ ཛཱི་ཝི་ཏཱ ཝོ་རོ་པེ་ཡྻཱ’’ཏི (ཙཱུ་ལ༹་ཝ. ༣༤༢). བུ་དྡྷཱ་ནཾ དྭ་ཏྟིཾ་ས་མ་ཧཱ་པུ་རི་ས་ལ་ཀྑ་ཎཱ་ནཾ ཨ་སཱི་ཏི་ཡཱ ཨ་ནུ་བྱ་ཉྫ་ནཱ་ན་ཉྩ ན ས་ཀྐཱ ཀེ་ན་ཙི ཨ་ནྟ་རཱ་ཡོ ཀཱ་ཏུཾ. བུ་དྡྷ་རཾ་སཱི་ནཾ ན ས་ཀྐཱ ཀེ་ན་ཙི ཨ་ནྟ་རཱ་ཡོ ཀཱ་ཏུ་ནྟི. ཨི་མེ ཙ་ཏྟཱ་རོ ཨ་ན་ནྟ་རཱ་ཡི་ཀཱ དྷ་མྨཱ ནཱ་མཱ་ཏི.
ནི་ག་མ་ན་ཀ་ཐཱ
ཨེ་ཏྟཱ་ཝ་ཏཱ ག་ཏཱ སི་དྡྷིཾ, བུ་དྡྷ་ཝཾ་ས་སྶ ཝ་ཎྞ་ནཱ;
སུ་ཝ་ཎྞ་པ་ད་ཝི་ཉྙཱ་ཏ་ཝི་ཙི་ཏྟ་ན་ཡ་སོ་བྷི་ཏཱ.
པོ་རཱ་ཎ་ཊྛ་ཀ་ཐཱ་མ་གྒཾ, པཱ་ལི༹་ཨ་ཏྠ་པྤ་ཀཱ་ས་ཀཾ;
ཨཱ་དཱ་ཡེ་ཝ ཀ་ཏཱ བུ་དྡྷ-ཝཾ་ས་སྶ་ཊྛ་ཀ་ཐཱ མ་ཡཱ.
པ་པ་ཉྩ་ཏྠཾ ཝི་ཝ་ཛྫེ་ཏྭཱ, མ་དྷུ་ར་ཏྠ་སྶ ས་བྦ་སོ;
ས་མྤ་ཀཱ་ས་ན་ཏོ ཏ་སྨཱ, མ་དྷུ་ར་ཏྠ་པྤ་ཀཱ་སི་ནཱི.
ཀཱ་ཝཱི་ར་ཛ་ལ་ས་མྤཱ་ཏ-པ་རི་པཱུ་ཏ་མ་ཧཱི་ཏ་ལེ;
ཀཱ་ཝཱི་ར་པ་ཊྚ་ནེ ར་མྨེ, ནཱ་ནཱ་ནཱ་རི་ན་རཱ་ཀུ་ལེ.
ཀཱ་རི་ཏེ ཀ་ཎྷ་དཱ་སེ་ན, ས་ཎྷ་ཝཱ་ཙེ་ན སཱ་དྷུ་ནཱ;
ཝི་ཧཱ་རེ ཝི་ཝི་དྷཱ་ཀཱ་ར-ཙཱ་རུ་པཱ་ཀཱ་ར་གོ་པུ་རེ.
ཚཱ་ཡཱ་ས་ལི་ལ་ས་མྤ་ནྣེ, ད་སྶ་ནཱི་ཡེ མ་ནོ་ར་མེ;
ཧ་ཏ་དུ་ཛྫ་ན་ས་མྦཱ་དྷེ, པ་ཝི་ཝེ་ཀ་སུ་ཁེ སི་ཝེ.
ཏ་ཏྠ པཱ་ཙཱི་ན་པཱ་སཱ་ད-ཏ་ལེ པ་ར་མ་སཱི་ཏ་ལེ;
ཝ་ས་ཏཱ བུ་དྡྷ་ཝཾ་ས་སྶ, མ་ཡཱ སཾ་ཝ་ཎྞ་ནཱ ཀ་ཏཱ.
ཡ་ཐཱ བུ་དྡྷ་ཝཾ་ས་སྶ སཾ་ཝ་ཎྞ་ནཱ་ཡཾ, ག་ཏཱ སཱ་དྷུ སི་དྡྷིཾ ཝི་ནཱ ཨ་ནྟ་རཱ་ཡཾ;
ཏ་ཐཱ དྷ་མྨ་ཡུ་ཏྟཱ ཛ་ནཱ་ནཾ ཝི་ཏ་ཀྐཱ, ཝི་ནཱ་ཝ་ནྟ་རཱ་ཡེ་ན སི་དྡྷིཾ ཝ་ཛ་ནྟུ.
ཨི་མཾ བུ་དྡྷ་ཝཾ་ས་སྶ སཾ་ཝ་ཎྞ་ནཾ མེ, ཀ་རོ་ནྟེ་ན ཡཾ པ་ཏྠི་ཏཾ པུ་ཉྙ་ཛཱ་ཏཾ;
ས་དཱ ཏ་སྶ དེ་ཝཱ་ནུ་བྷཱ་ཝེ་ན ལོ་ཀོ, དྷུ་ཝཾ ས་ནྟ་མ་ཙྩ་ནྟ་མ་ཏྠཾ པ་ཡཱ་ཏཾ.
ཝི་ན་སྶ་ནྟུ རོ་གཱ མ་ནུ་སྶེ་སུ ས་བྦེ, པ་ཝ་སྶ་ནྟུ དེ་ཝཱ་པི ཝ་སྶ་ནྟ་ཀཱ་ལེ;
སུ་ཁཾ ཧོ་ཏུ ནི་ཙྩཾ ཝ་རཾ ནཱ་ར་ཀཱ་པི, པི་སཱ་ཙཱ་པ་ཡཱ་ཏཱ པི་པཱ་སཱ བྷ་ཝ་ནྟུ.
སུ་རཱ ཨ་ཙྪ་རཱ་ནཾ ག་ཎཱ་དཱི་ཧི ས་དྡྷིཾ, ཙི་རཾ དེ་ཝ་ལོ་ཀེ སུ་ཁཾ ཙཱ་ནུ་བྷོ་ནྟུ;
ཙི་རཾ ཋཱ་ཏུ དྷ་མྨོ མུ་ནི་ནྡ་སྶ ལོ་ཀེ, སུ་ཁཾ ལོ་ཀ་པཱ་ལཱ མ་ཧིཾ པཱ་ལ་ཡ་ནྟུ.
ག་རཱུ་ཧི གཱི་ཏ་ནཱ་མེ་ན, བུ་དྡྷ་ད་ཏྟོ་ཏི ཝི་སྶུ་ཏོ;
ཐེ་རོ ཀ་ཏྭཱ ཨ་ཊྛ་ཀ་ཐཾ, མ་དྷུ་ར་ཏྠ་ཝི་ལཱ་སི་ནིཾ.
པོ་ཏྠ་ཀཾ ཋ་པ་ཡི་ཏྭེ་མཾ, པ་ར་མྤ་རེ ཧི་ཏཱ་ཝ་ཧཾ;
ཨ་ཙི་ར་ཊྛི་ཏ་བྷཱ་ཝེ་ན, ཨ་ཧོ མ་ཙྩུ་ཝ་སཾ ག་ཏོ.
ཨི་ཏི བྷཱ་ཎ་ཝཱ་ར་ཝ་སེ་ན ཚ་བྦཱི་ས་ཏི་བྷཱ་ཎ་ཝཱ་རཱ, ག་ནྠ་ཝ་སེ་ན པ་ཉྩ་ས་ཏཱ་དྷི་ཀ་ཚ་ས་ཧ་སྶ་ག་ནྠཱ, ཨ་ཀྑ་ར་ཝ་སེ་ན ཏི་ས་ཧ་སྶཱ་དྷི་ཀཱ་ནི དྭེ་ས་ཏ་ས་ཧ་སྶ་ཀྑ་རཱ་ནི.
ཨ་ནྟ་རཱ་ཡཾ ཝི་ནཱ ཨེ་སཱ, ཡ་ཐཱ ནི་ཊྛཾ ཨུ་པཱ་ག་ཏཱ;
ཏ་ཐཱ སི་ཛ྄ཛྷ་ནྟུ ས་ངྐ་པྤཱ, ས་ཏྟཱ་ནཾ དྷ་མྨ་ནི་སྶི་ཏཱ་ཏི.
ཨི་ཏི མ་དྷུ་ར་ཏྠ་ཝི་ལཱ་སི་ནཱི ནཱ་མ
བུ་དྡྷ་ཝཾ་ས-ཨ་ཊྛ་ཀ་ཐཱ ནི་ཊྛི་ཏཱ.