༢. པ་ཝ་ཏྟི་ཝཱ་ར་ཝ་ཎྞ་ནཱ
༡༩. པ་ཝ་ཏྟི་ཝཱ་རེ པ་ནེ་ཏྠ པ་ཙྩུ་པྤ་ནྣ་ཀཱ་ལེ པུ་གྒ་ལ་ཝཱ་ར་སྶ ཨ་ནུ་ལོ་མ་ན་ཡེ ‘‘ཡ་སྶ ཀཱ་ཡ་ས་ངྑཱ་རོ ཨུ་པྤ་ཛྫ་ཏི, ཏ་སྶ ཝ་ཙཱི་ས་ངྑཱ་རོ ཨུ་པྤ་ཛྫ་ཏཱི’’ཏི ཀཱ་ཡ་ས་ངྑཱ་ར་མཱུ་ལ་ཀཱ་ནི དྭེ, ཝ་ཙཱི་ས་ངྑཱ་ར་མཱུ་ལ་ཀཾ ཨེ་ཀ་ནྟི ཏཱི་ཎེ་ཝ ཡ་མ་ཀཱ་ནི ལ་བྦྷ་ནྟི; ཏཱ་ནི ག་ཧི་ཏཱ་ནེ་ཝ. ཏ་སྶ པ་ཊི་ལོ་མ་ན་ཡེ་པི ཨོ་ཀཱ་ས་ཝཱ་རཱ་དཱི་སུ་པི ཨེ་སེ་ཝ ན་ཡོ. ཨེ་ཝ་མེ་ཏྠ ས་བྦ་ཝཱ་རེ་སུ ཏི་ཎྞཾ ཏི་ཎྞཾ ཡ་མ་ཀཱ་ནཾ ཝ་སེ་ན ཡ་མ་ཀ་ག་ཎ་ནཱ ཝེ་དི་ཏ་བྦཱ.
ཨ་ཏྠ་ཝི་ནི་ཙྪ་ཡེ པ་ནེ་ཏྠ ཨི་དཾ ལ་ཀྑ་ཎཾ – ཨི་མ་སྨི་ཉྷི ས་ངྑཱ་ར་ཡ་མ་ཀེ ‘‘ཨ་སྶཱ་ས་པ་སྶཱ་སཱ་ནཾ ཨུ་པྤཱ་ད་ཀྑ་ཎེ ཝི་ཏ་ཀྐ་ཝི་ཙཱ་རཱ་ནཾ ཨུ་པྤཱ་ད་ཀྑ་ཎེ’’ཏི་ཨཱ་དི་ཝ་ཙ་ན་ཏོ པ་ཙྩུ་པྤ་ནྣཱ་དི་ཀཱ་ལ་བྷེ་དོ པ་ཝ་ཏྟི་ཝ་སེ་ནཱ་པི ག་ཧེ་ཏ་བྦོ, ན ཙུ་ཏི་པ་ཊི་ས་ནྡྷི་ཝ་སེ་ནེ་ཝ. ‘‘དུ་ཏི་ཡ་ཛ྄ཛྷཱ་ནེ ཏ་ཏི་ཡ་ཛ྄ཛྷཱ་ནེ ཏ་ཏྠ ཀཱ་ཡ་ས་ངྑཱ་རོ ཨུ་པྤ་ཛྫ་ཏཱི’’ཏི་ཨཱ་དི་ཝ་ཙ་ན་ཏོ ཙ ཛྷཱ་ན་མྤི ཨོ་ཀཱ་ས་ཝ་སེ་ན ག་ཧི་ཏ་ནྟི ཝེ་དི་ཏ་བྦཾ. ཨེ་ཝ་མེ་ཏྠ ཡཾ ཡཾ ལ་བྦྷ་ཏི, ཏ་སྶ ཏ་སྶ ཝ་སེ་ན ཨ་ཏྠ་ཝི་ནི་ཙྪ་ཡོ ཝེ་དི་ཏ་བྦོ.
ཏ་ཏྲི་དཾ ན་ཡ་མུ་ཁཾ – ཝི་ནཱ ཝི་ཏ་ཀྐ་ཝི་ཙཱ་རེ་ཧཱིཏི དུ་ཏི་ཡ་ཏ་ཏི་ཡ་ཛ྄ཛྷཱ་ན་ཝ་སེ་ན ཝུ་ཏྟཾ. ཏེ་སནྟི ཏེ་སཾ དུ་ཏི་ཡ་ཏ་ཏི་ཡ་ཛ྄ཛྷཱ་ན་ས་མ་ངྒཱི་ནཾ. ཀཱ་མཱ་ཝ་ཙ་རཱ་ནནྟི ཀཱ་མཱ་ཝ་ཙ་རེ ཨུ་པྤ་ནྣ་ས་ཏྟཱ་ནཾ. རཱུ་པཱ་ཝ་ཙ་ར་དེ་ཝཱ་ནཾ པ་ན ཨ་སྶཱ་ས་པ་སྶཱ་སཱ ན་ཏྠི. ཨ་རཱུ་པཱ་ཝ་ཙ་རཱ་ནཾ རཱུ་པ་མེ་ཝ ན་ཏྠི. ཝི་ནཱ ཨ་སྶཱ་ས་པ་སྶཱ་སེ་ཧཱིཏི རཱུ་པཱ་རཱུ་པ་བྷ་ཝེ་སུ ནི་བྦ་ཏྟ་ས་ཏྟཱ་ནཾ ཝི་ཏ་ཀྐ་ཝི་ཙཱ་རུ་པྤ་ཏྟིཾ ས་ནྡྷཱ་ཡ ཝུ་ཏྟཾ.
༢༡. པ་ཋ་མ་ཛ྄ཛྷཱ་ནེ ཀཱ་མཱ་ཝ་ཙ་རེཏི ཀཱ་མཱ་ཝ་ཙ་ར་བྷཱུ་མི་ཡཾ ཨུ་པྤ་ནྣེ པ་ཋ་མ་ཛ྄ཛྷཱ་ནེ. ཨ་ངྒ་མ་ཏྟ་ཝ་སེ་ན ཙེ་ཏྠ པ་ཋ་མ་ཛ྄ཛྷཱ་ནཾ ག་ཧེ་ཏ་བྦཾ, ན ཨ་པྤ་ནཱ་ཝ་སེ་ནེ་ཝ. ཨ་ན་པྤ་ནཱ་པ་ཏྟེ་པི ཧི ས་ཝི་ཏ་ཀྐ་ས་ཝི་ཙཱ་ར་ཙི་ཏྟེ ཨི་དཾ ས་ངྑཱ་ར་དྭ་ཡཾ ཨུ་པྤ་ཛྫ་ཏེ་ཝ.
༢༤. ཙི་ཏྟ་སྶ བྷ་ངྒ་ཀྑ་ཎེཏི ཨི་དཾ ཀཱ་ཡ་ས་ངྑཱ་ར་སྶ ཨེ་ཀ་ནྟ་ཙི་ཏྟ་ས་མུ་ཊྛཱ་ན་ཏྟཱ ཝུ་ཏྟཾ. ཨུ་པྤ་ཛྫ་མཱ་ན་མེ་ཝ ཧི ཙི་ཏྟཾ རཱུ་པཾ ཝཱ ཨ་རཱུ་པཾ ཝཱ ས་མུ་ཊྛཱ་པེ་ཏི, ན བྷི་ཛྫ་མཱ་ནཾ.
༣༧. སུ་དྡྷཱ་ཝཱ་སཱ་ནཾ དུ་ཏི་ཡེ ཙི་ཏྟེ ཝ་ཏྟ་མཱ་ནེཏི པ་ཊི་ས་ནྡྷི་ཏོ དུ་ཏི་ཡེ བྷ་ཝ་ངྒ་ཙི་ཏྟེ. ཀཱ་མ་ཉྩེ་ཏཾ པ་ཊི་ས་ནྡྷི་ཙི་ཏྟེ་པི ཝ་ཏྟ་མཱ་ནེ ཏེ་སཾ ཏ་ཏྠ ནུ་པྤ་ཛྫི་ཏྠེ་ཝ. ཡཱ་ཝ པ་ན ཨ་བྦོ་ཀི་ཎྞཾ ཝི་པཱ་ཀ་ཙི་ཏྟཾ ཝ་ཏྟ་ཏི, ཏཱ་ཝ ནུ་པྤ་ཛྫི་ཏྠེ་ཝ ནཱ་མཱ་ཏི ད་སྶ་ན་ཏྠ་མེ་ཏཾ ཝུ་ཏྟཾ. ཡ་སྶ ཝཱ ཛྷཱ་ན་སྶ ཝི་པཱ་ཀ་ཙི་ཏྟེ་ན ཏེ ནི་བྦ་ཏྟཱ, ཏཾ ས་ཏ་སོ་པི ས་ཧ་སྶ་སོ་པི ཨུ་པྤ་ཛྫ་མཱ་ནཾ པ་ཋ་མ་ཙི་ཏྟ་མེ་ཝ. ཝི་པཱ་ཀ་ཙི་ཏྟེ་ན པ་ན ཝི་ས་དི་སཾ བྷ་ཝ་ནི་ཀ་ནྟི་ཡཱ ཨཱ་ཝ་ཛྫ་ན་ཙི་ཏྟཾ དུ་ཏི་ཡ་ཙི་ཏྟཾ ནཱ་མ. ཏཾ ས་ནྡྷཱ་ཡེ་ཏཾ ཝུ་ཏྟ་ནྟི ཝེ་དི་ཏ་བྦཾ.
༤༤. པ་ཙྪི་མ་ཙི་ཏྟ་ས་མ་ངྒཱི་ནནྟི ས་བྦ་པ་ཙྪི་མེ་ན ཨ་པྤ་ཊི་ས་ནྡྷི་ཀ་ཙི་ཏྟེ་ན ས་མ་ངྒཱི་བྷཱུ་ཏཱ་ནཾ ཁཱི་ཎཱ་ས་ཝཱ་ནཾ. ཨ་ཝི་ཏ་ཀྐ་ཨ་ཝི་ཙཱ་རཾ པ་ཙྪི་མ་ཙི་ཏྟནྟི རཱུ་པཱ་ཝ་ཙ་རཱ་ནཾ དུ་ཏི་ཡ་ཛ྄ཛྷཱ་ནི་ཀཱ་དི་ཙུ་ཏི་ཙི་ཏྟ་ཝ་སེ་ན, ཨ་རཱུ་པཱ་ཝ་ཙ་རཱ་ན་ཉྩ ཙ་ཏུ་ཏྠ་ཛ྄ཛྷཱ་ནི་ཀ་ཙུ་ཏི་ཙི་ཏྟ་ཝ་སེ་ནེ་ཏཾ ཝུ་ཏྟཾ. ཏེ་སནྟི ཏེ་སཾ པ་ཙྪི་མ་ཙི་ཏྟ་ས་མ་ངྒཱི་ཨཱ་དཱི་ནཾ.
༧༩. ཡ་སྶ ཀཱ་ཡ་ས་ངྑཱ་རོ ནི་རུ་ཛ྄ཛྷ་ཏི, ཏ་སྶ ཙི་ཏྟ་ས་ངྑཱ་རོ ནི་རུ་ཛ྄ཛྷ་ཏཱིཏི ཨེ་ཏྠ ནི་ཡ་མ་ཏོ ཀཱ་ཡ་ས་ངྑཱ་ར་སྶ ཙི་ཏྟ་ས་ངྑཱ་རེ་ན ས་དྡྷིཾ ཨེ་ཀ་ཀྑ་ཎེ ནི་རུ་ཛ྄ཛྷ་ན་ཏོ ཨཱ་མ་ནྟཱ་ཏི པ་ཊི་ཝ་ཙ་ནཾ དི་ནྣཾ. ན ཙི་ཏྟ་ས་ངྑཱ་ར་སྶ ཀཱ་ཡ་ས་ངྑཱ་རེ་ན ས་དྡྷིཾ. ཀིཾ ཀཱ་ར་ཎཱ? ཙི་ཏྟ་ས་ངྑཱ་རོ ཧི ཀཱ་ཡ་ས་ངྑཱ་རེ་ན ཝི་ནཱ་པི ཨུ་པྤ་ཛྫ་ཏི ཙ ནི་རུ་ཛ྄ཛྷ་ཏི ཙ. ཀཱ་ཡ་ས་ངྑཱ་རོ པ་ན ཙི་ཏྟ་ས་མུ་ཊྛཱ་ནོ ཨ་སྶཱ་ས་པ་སྶཱ་ས་ཝཱ་ཏོ. ཙི་ཏྟ་ས་མུ་ཊྛཱ་ན་རཱུ་པ་ཉྩ ཙི་ཏྟ་སྶ ཨུ་པྤཱ་ད་ཀྑ་ཎེ ཨུ་པྤ་ཛྫི་ཏྭཱ ཡཱ་ཝ ཨ་ཉྙཱ་ནི སོ་ལ༹་ས་ཙི་ཏྟཱ་ནི ཨུ་པྤ་ཛྫ་ནྟི, ཏཱ་ཝ ཏི་ཊྛ་ཏི. ཏེ་སཾ སོ་ལ༹་ས་ནྣཾ ས་བྦ་པ་ཙྪི་མེ་ན ས་དྡྷིཾ ནི་རུ་ཛ྄ཛྷ་ཏཱི་ཏི ཡེ་ན ཙི་ཏྟེ་ན ས་དྡྷིཾ ཨུ་པྤ་ཛྫ་ཏི, ཏ་ཏོ པ་ཊྛཱ་ཡ ས་ཏྟ་ར་ས་མེ་ན ས་དྡྷིཾ ནི་རུ་ཛ྄ཛྷ་ཏི. ན ཀ་སྶ་ཙི ཙི་ཏྟ་སྶ ཨུ་པྤཱ་ད་ཀྑ་ཎེ ཝཱ ཋི་ཏི་ཀྑ་ཎེ ཝཱ ནི་རུ་ཛ྄ཛྷ་ཏི, ནཱ་པི ཋི་ཏི་ཀྑ་ཎེ ཝཱ བྷ་ངྒ་ཀྑ་ཎེ ཝཱ ཨུ་པྤ་ཛྫ་ཏི. ཨེ་སཱ ཙི་ཏྟ་ས་མུ་ཊྛཱ་ན་རཱུ་པ་སྶ དྷ་མྨ་ཏཱ་ཏི ནི་ཡ་མ་ཏོ ཙི་ཏྟ་ས་ངྑཱ་རེ་ན ས་དྡྷིཾ ཨེ་ཀ་ཀྑ་ཎེ ནི་རུ་ཛ྄ཛྷ་ན་ཏོ ཨཱ་མ་ནྟཱ་ཏི ཝུ་ཏྟཾ. ཡཾ པ་ན ཝི་བྷ་ངྒ་པྤ་ཀ་ར་ཎ་སྶ སཱི་ཧ་ལ༹་ཊྛ་ཀ་ཐཱ་ཡཾ ‘‘ཙི་ཏྟ་ས་མུ་ཊྛཱ་ནཾ རཱུ་པཾ ས་ཏྟ་ར་ས་མ་སྶ ཙི་ཏྟ་སྶ ཨུ་པྤཱ་ད་ཀྑ་ཎེ ནི་རུ་ཛ྄ཛྷ་ཏཱི’’ཏི ཝུ་ཏྟཾ, ཏཾ ཨི་མཱ་ཡ པཱ་ལི༹་ཡཱ ཝི་རཱུ་ཛ྄ཛྷ་ཏི. ཨ་ཊྛ་ཀ་ཐཱ་ཏོ ཙ པཱ་ལི༹་ཡེ་ཝ བ་ལ་ཝ་ཏ་རཱ་ཏི པཱ་ལི༹་ཡཾ ཝུ་ཏྟ་མེ་ཝ པ་མཱ་ཎཾ.
༡༢༨. ཡ་སྶ ཀཱ་ཡ་ས་ངྑཱ་རོ ཨུ་པྤ་ཛྫ་ཏི, ཏ་སྶ ཝ་ཙཱི་ས་ངྑཱ་རོ ནི་རུ་ཛ྄ཛྷ་ཏཱིཏི ཨེ་ཏྠ ཡ་སྨཱ ཀཱ་ཡ་ས་ངྑཱ་རོ ཙི་ཏྟ་སྶ ཨུ་པྤཱ་ད་ཀྑ་ཎེ ཨུ་པྤ་ཛྫ་ཏི, ན ཙ ཏ་སྨིཾ ཁ་ཎེ ཝི་ཏ་ཀྐ་ཝི་ཙཱ་རཱ ནི་རུ་ཛ྄ཛྷ་ནྟི, ཏ་སྨཱ ནོ་ཏི པ་ཊི་སེ་དྷོ ཀ་ཏོ་ཏི. ཨི་མི་ནཱ ན་ཡ་མུ་ཁེ་ན ས་བྦ་ཏྠ ཨ་ཏྠ་ཝི་ནི་ཙྪ་ཡོ ཝེ་དི་ཏ་བྦོ. པ་རི་ཉྙཱ་ཝཱ་རོ པཱ་ཀ་ཏི་ཀོ་ཡེ་ཝཱ་ཏི.
པ་ཝ་ཏྟི་ཝཱ་ར་ཝ་ཎྞ་ནཱ.
ས་ངྑཱ་ར་ཡ་མ་ཀ་ཝ་ཎྞ་ནཱ ནི་ཊྛི་ཏཱ.