༣. པ་རི་ཉྙཱ་ཝཱ་ར་ཝ་ཎྞ་ནཱ

༢༠༦-༢༠༨. ཏ་ད་ན་ནྟ་རེ པ་རི་ཉྙཱ་ཝཱ་རེ་པི ཚ་ལེ༹་ཝ ཀཱ་ལ་བྷེ་དཱ. ཨ་ནུ་ལོ་མ་པ་ཊི་ལོ་མ་ཏོ དྭེ་ཡེ་ཝ ན་ཡཱ. པུ་གྒ་ལ་ཝཱ་རོ, ཨོ་ཀཱ་ས་ཝཱ་རོ, པུ་གྒ་ལོ་ཀཱ་ས་ཝཱ་རོ་ཏི ཨི་མེ་སུ པ་ན ཏཱི་སུ པུ་གྒ་ལ་ཝཱ་རོ་ཝ ལ་བྦྷ་ཏི, ན ཨི་ཏ་རེ དྭེ. ཀིཾ ཀཱ་ར་ཎཱ? ས་དི་ས་ཝི་སྶ་ཛྫ་ན་ཏཱ་ཡ. ཡོ ཧི ཀོ་ཙི པུ་གྒ་ལོ ཡ་ཏྠ ཀ་ཏྠ་ཙི ཋཱ་ནེ རཱུ་པ་ཀྑ་ནྡྷཾ ཙེ པ་རི་ཛཱ་ནཱ་ཏི, ཝེ་ད་ནཱ་ཀྑ་ནྡྷ་མྤི པ་རི་ཛཱ་ནཱ་ཏི་ཡེ་ཝ. ཝེ་ད་ནཱ་ཀྑ་ནྡྷཾ ཙེ པ་རི་ཛཱ་ནཱ་ཏི, རཱུ་པ་ཀྑ་ནྡྷ་མྤི པ་རི་ཛཱ་ནཱ་ཏི་ཡེ་ཝ. རཱུ་པ་ཀྑ་ནྡྷཾ ཙེ ན པ་རི་ཛཱ་ནཱ་ཏི, ཝེ་ད་ནཱ་ཀྑ་ནྡྷ་མྤི ན པ་རི་ཛཱ་ནཱ་ཏི་ཡེ་ཝ. ཝེ་ད་ནཱ་ཀྑ་ནྡྷཾ ཙེ ན པ་རི་ཛཱ་ནཱ་ཏི, རཱུ་པ་ཀྑ་ནྡྷ་མྤི ན པ་རི་ཛཱ་ནཱ་ཏི་ཡེ་ཝ. ཏ་སྨཱ ཏེ་སུ་པི ‘ཡ་ཏྠ རཱུ་པ་ཀྑ་ནྡྷཾ པ་རི་ཛཱ་ནཱ་ཏི, ཏ་ཏྠ ཝེ་ད་ནཱ་ཀྑ་ནྡྷཾ པ་རི་ཛཱ་ནཱ་ཏཱི’ཏི ཨཱ་དི་ཝ་སེ་ན པུ་ཙྪཾ ཀ་ཏྭཱ ‘ཨཱ་མ་ནྟཱ’ཏྭེ་ཝ ཝི་སྶ་ཛྫ་ནཾ ཀཱ་ཏ་བྦཾ. སི་ཡཱ་ཏི ས་དི་ས་ཝི་སྶ་ཛྫ་ན་ཏཱ་ཡ ཏེ ཨི་དྷ ན ལ་བྦྷ་ནྟཱི་ཏི ཝེ་དི་ཏ་བྦཱ.

ཨ་ཐ ཝཱ པ་རི་ཉྙཱ་ཀི་ཙྩཾ ནཱ་མ པུ་གྒ་ལ་སྶེ་ཝ ཧོ་ཏི, ནོ ཨོ་ཀཱ་ས་སྶ, པུ་གྒ་ལོ་ཝ པ་རི་ཛཱ་ནི་ཏུཾ ས་མ་ཏྠོ, ནོ ཨོ་ཀཱ་སོ་ཏི པུ་གྒ་ལ་ཝཱ་རོ་ཝེ་ཏྠ ག་ཧི་ཏོ, ན ཨོ་ཀཱ་ས་ཝཱ་རོ. ཏ་སྶ པ་ན ཨ་གྒ་ཧི་ཏ་ཏྟཱ ཏ་ད་ན་ནྟ་རོ པུ་གྒ་ལོ་ཀཱ་ས་ཝཱ་རོ ལ་བྦྷ་མཱ་ནོ་པི ན ག་ཧི་ཏོ. ཡོ པ་ནེ་ས པུ་གྒ་ལ་ཝཱ་རོ ག་ཧི་ཏོ, ཏ་ཏྠ པ་ཙྩུ་པྤ་ནྣ་ཀཱ་ལེ རཱུ་པ་ཀྑ་ནྡྷ་མཱུ་ལ་ཀཱ་ནི ཙ་ཏྟཱ་རི, ཝེ་ད་ནཱ་ཀྑ་ནྡྷ་མཱུ་ལ་ཀཱ་ནི ཏཱི་ཎི, ས་ཉྙཱ་ཀྑ་ནྡྷ་མཱུ་ལ་ཀཱ་ནི དྭེ, ས་ངྑཱ་ར་ཀྑ་ནྡྷ་མཱུ་ལ་ཀཾ ཨེ་ཀ་ནྟི ཧེ་ཊྛཱ ཝུ་ཏྟ་ན་ཡེ་ནེ་ཝ ཨ་ནུ་ལོ་མ་ན་ཡེ ཨ་གྒ་ཧི་ཏ་གྒ་ཧ་ཎེ་ན ད་ས ཡ་མ་ཀཱ་ནི. པ་ཊི་ལོ་མ་ན་ཡེ ད་སཱ་ཏི ཝཱི་ས་ཏི. ཏ་ཐཱ སེ་སེ་སུ་པཱི་ཏི ཨེ་ཀེ་ཀ་སྨིཾ ཀཱ་ལེ ཝཱི་ས་ཏི ཝཱི་ས་ཏི ཀ་ཏྭཱ ཚ་སུ ཀཱ་ལེ་སུ ཝཱི་སཾ ཡ་མ་ཀ་ས་ཏཾ, ཙ་ཏྟཱ་རཱི་སཱ་ནི དྭེ པུ་ཙྪཱ་ས་ཏཱ་ནི, ཨ་སཱི་ཏྱཱ་དྷི་ཀཱ་ནི ཙ་ཏྟཱ་རི ཨ་ཏྠ་ས་ཏཱ་ནི ཙ ཧོ་ནྟཱི་ཏི ཨི་ད་མེ་ཏྠ པཱ་ལི༹་ཝ་ཝ་ཏྠཱ་ནཾ.

ཨ་ཏྠ་ཝི་ནི་ཙྪ་ཡེ པ་ནེ་ཏྠ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་ས་ངྑཱ་ཏཱ ཏ་ཡོ ཨ་དྡྷཱ པ་ཝ་ཏྟི་ཝཱ་རེ ཝི་ཡ ཙུ་ཏི་པ་ཊི་ས་ནྡྷི་ཝ་སེ་ན ན ལ་བྦྷ་ནྟི. པ་ཝ་ཏྟེ ཙི་ཏྟ་ཀྑ་ཎ་ཝ་སེ་ནེ་ཝ ལ་བྦྷ་ནྟི. ཏེ་ནེ་ཝེ་ཏྠ ‘ཡོ རཱུ་པ་ཀྑ་ནྡྷཾ པ་རི་ཛཱ་ནཱ་ཏི, སོ ཝེ་ད་ནཱ་ཀྑ་ནྡྷཾ པ་རི་ཛཱ་ནཱ་ཏཱི’ཏི་ཨཱ་དཱི་སུ པུ་ཙྪཱ་སུ ‘ཨཱ་མ་ནྟཱ’ཏི ཝི་སྶ་ཛྫ་ནཾ ཀ་ཏཾ. ལོ་ཀུ་ཏྟ་ར་མ་གྒ་ཀྑ་ཎ་སྨི་ཉྷི ནི་བྦཱ་ནཱ་ར་མྨ་ཎེ་ན ཙི་ཏྟེ་ན པ་ཉྩ་སུ ཁ་ནྡྷེ་སུ པ་རི་ཉྙཱ་ཀི་ཙྩ་ནི་བྦ་ཏྟི་ཡཱ ཡཾ ཀི་ཉྩི ཨེ་ཀཾ ཁ་ནྡྷཾ པ་རི་ཛཱ་ན་ནྟོ ཨི་ཏ་ར་མྤི པ་རི་ཛཱ་ནཱ་ཏཱི་ཏི ཝུ་ཙྩ་ཏི. ཨེ་ཝ་མེ་ཏྠ ‘པ་རི་ཛཱ་ནཱ་ཏཱི’ཏི པ་ཉྷེ་སུ ཨ་ནུ་ལོ་མ་ན་ཡེ པ་རི་ཉྙཱ་ཀི་ཙྩ་སྶ མ་ཏྠ་ཀ་པྤ་ཏྟཾ ཨ་གྒ་མ་གྒ་ས་མ་ངྒིཾ ས་ནྡྷཱ་ཡ ‘ཨཱ་མ་ནྟཱ’ཏི ཝུ་ཏྟ་ནྟི ཝེ་དི་ཏ་བྦཾ. པ་ཊི་ལོ་མ་ན་ཡེ པ་ན ‘ན པ་རི་ཛཱ་ནཱ་ཏཱི’ཏི པ་ཉྷེ་སུ པུ་ཐུ་ཛྫ་ནཱ་ད་ཡོ ས་ནྡྷཱ་ཡ ‘ཨཱ་མ་ནྟཱ’ཏི ཝུ་ཏྟཾ. ‘པ་རི་ཛཱ་ནི་ཏྠཱ’ཏི ཨི་མ་སྨིཾ པ་ན ཨ་ཏཱི་ཏ་ཀཱ་ལ་ཝཱ་རེ མ་གྒཱ་ན་ནྟ་ར་ཨ་གྒ་ཕ་ལེ ཋི་ཏོ་པི པ་རི་ཉྙཱ་ཀི་ཙྩ་སྶ ནི་ཊྛི་ཏ་ཏྟཱ པ་རི་ཛཱ་ནི་ཏྠ་ཡེ་ཝ ནཱ་མ.

༢༠༩. ཡོ རཱུ་པ་ཀྑ་ནྡྷཾ པ་རི་ཛཱ་ནཱ་ཏི, སོ ཝེ་ད་ནཱ་ཀྑ་ནྡྷཾ པ་རི་ཛཱ་ནི་ཏྠཱཏི པ་ཉྷེ་ན ཨ་གྒ་མ་གྒ་ས་མ་ངྒིཾ པུ་ཙྪ་ཏི. ཡ་སྨཱ པ་ནེ་ས ཁ་ནྡྷ་པ་ཉྩ་ཀཾ པ་རི་ཛཱ་ནཱ་ཏི་ཡེ་ཝ ནཱ་མ, ན ཏཱ་ཝ ནི་ཊྛི་ཏ་པ་རི་ཉྙཱ་ཀི་ཙྩོ; ཏ་སྨཱ ‘ནོ’ཏི པ་ཊི་སེ་དྷོ ཀ་ཏོ. དུ་ཏི་ཡ་པ་ཉྷེ པ་ན པ་རི་ཛཱ་ནི་ཏྠཱཏི ཨ་ར་ཧ་ནྟཾ པུ་ཙྪ་ཏི. ཡ་སྨཱ པ་ནེ་སོ ནི་ཊྛི་ཏ་པ་རི་ཉྙཱ་ཀི་ཙྩོ. ན་ཏྠི ཏ་སྶ པ་རི་ཉྙེ་ཡྻཾ ནཱ་མ; ཏ་སྨཱ ‘ནོ’ཏི པ་ཊི་སེ་དྷོ ཀ་ཏོ. པ་ཊི་ལོ་མ་ན་ཡ་ཝི་སྶ་ཛྫ་ནེ པ་ནེ་ཏྠ ཨ་ར་ཧཱ རཱུ་པ་ཀྑ་ནྡྷཾ ན པ་རི་ཛཱ་ནཱ་ཏཱིཏི ཨ་ར་ཧ་ཏོ པ་རི་ཉྙཱ་ཡ ཨ་བྷཱ་ཝེ་ན ཝུ་ཏྟཾ. ཨ་གྒ་མ་གྒ་ས་མ་ངྒཱི ཝེ་ད་ནཱ་ཀྑ་ནྡྷཾ ན པ་རི་ཛཱ་ནི་ཏྠཱཏི ཨ་ར་ཧ་ཏྟ་མ་གྒ་ཊྛ་སྶ ཨ་ནི་ཊྛི་ཏ་པ་རི་ཉྙཱ་ཀི་ཙྩ་ཏཱ་ཡ ཝུ་ཏྟཾ. ན ཀེ་ཝ་ལ་ཉྩ ཝེ་ད་ནཱ་ཀྑ་ནྡྷ་མེ་ཝ, ཨེ་ཀ་དྷ་མྨ་མྤི སོ ན པ་རི་ཛཱ་ནི་ཏྠེ་ཝ. ཨི་དཾ པ་ན པུ་ཙྪཱ་ཝ་སེ་ན ཝུ་ཏྟཾ. ནོ ཙ རཱུ་པ་ཀྑ་ནྡྷནྟི ཨི་ད་མྤི པུ་ཙྪཱ་ཝ་སེ་ནེ་ཝ ཝུ་ཏྟཾ. ཨ་ཉྙ་མྤི པ་ན སོ ཁ་ནྡྷཾ པ་རི་ཛཱ་ནཱ་ཏི.

༢༡༠-༢༡༡. ཡོ རཱུ་པ་ཀྑ་ནྡྷཾ པ་རི་ཛཱ་ནཱ་ཏི, སོ ཝེ་ད་ནཱ་ཀྑ་ནྡྷཾ པ་རི་ཛཱ་ནི་སྶ་ཏཱིཏི ཨེ་ཏྠ ཡ་སྨཱ མ་གྒ་ཊྛ་པུ་གྒ་ལོ ཨེ་ཀ་ཙི་ཏྟ་ཀྑ་ཎི་ཀོ, ཏ་སྨཱ སོ པ་རི་ཛཱ་ནི་སྶ་ཏཱི་ཏི ས་ངྑཾ ན ག་ཙྪ་ཏི. ཏེ་ན ཝུ་ཏྟཾ ‘ནོ’ཏི. ཏེ རཱུ་པ་ཀྑ་ནྡྷ་ཉྩ ན པ་རི་ཛཱ་ནི་ཏྠཱཏི པུ་ཙྪཱ་ས་བྷཱ་གེ་ན ཝུ་ཏྟཾ, ན པ་རི་ཛཱ་ནིཾ་སཱུ་ཏི པ་ནེ་ཏྠ ཨ་ཏྠོ. ཨི་མི་ནཱ ཨུ་པཱ་ཡེ་ན ས་བྦ་ཏྠ ཨ་ཏྠ་ཝི་ནི་ཙྪ་ཡོ ཝེ་དི་ཏ་བྦོ་ཏི.

པ་རི་ཉྙཱ་ཝཱ་ར་ཝ་ཎྞ་ནཱ.

ཁ་ནྡྷ་ཡ་མ་ཀ་ཝ་ཎྞ་ནཱ ནི་ཊྛི་ཏཱ.