༡༥-༡༨. ཉཱ་ཏ་ཀཱ་ནུ་ཡོ་གཱ་དི་ཝ་ཎྞ་ནཱ

༡༩༧. ཨི་དཱ་ནི མཱ་ཏཱཏི་ཨཱ་དི་ཀོ ཉཱ་ཏ་ཀཱ་ནུ་ཡོ་གོ. ཁ་ཏྟི་ཡོཏི་ཨཱ་དི་ཀོ ཛཱ་ཏི་ཨ་ནུ་ཡོ་གོ. ག་ཧ་ཊྛོ པ་བྦ་ཛི་ཏོཏི པ་ཊི་པ་ཏྟི་ཨ་ནུ་ཡོ་གོ. དེ་ཝོ མ་ནུ་སྶོཏི ཨུ་པ་པ་ཏྟི་ཨ་ནུ་ཡོ་གོ. སོ་ཏཱ་པ་ནྣོཏི་ཨཱ་དི་ཀོ པ་ཊི་ཝེ་དྷཱ་ནུ་ཡོ་གོ, ཨ་རི་ཡཱ་ནུ་ཡོ་གོ་ཏི་པི ཝུ་ཙྩ་ཏི. ཏེ ས་བྦེ ཨུ་ཏྟཱ་ན་ཏྠཱ་ཡེ་ཝ. ‘‘ཨ་ར་ཧཱ ཧུ་ཏྭཱ ན ཨ་ར་ཧཱ’’ཏི པ་ནེ་ཏྠ མོ་གྷ་པ་ཉྷ་ཏྟཱ ན ཝུ་ཏྟཾ.

༢༠༦. ཙ་ཏྟཱ་རོ པུ་རི་ས་ཡུ་གཱཏི་ཨཱ་དི སཾ་གྷཱ་ནུ་ཡོ་གོ, སོ་པི ཨུ་ཏྟཱ་ན་ཏྠོ་ཡེ་ཝ.

༢༠༩. ས་ངྑ་ཏོཏི་ཨཱ་དི ས་ཙྩི་ཀ་ཊྛ་ས་བྷཱ་ཝཱ་ནུ་ཡོ་གོ. ཏ་ཏྠ ཏ་ཏི་ཡཱ ཀོ་ཊཱིཏི པུ་ཙྪཱ ས་ཀ་ཝཱ་དི་སྶ. ཏ་ཐཱ་རཱུ་པ་སྶ ས་ཙྩི་ཀ་ཊྛ་སྶ ཨ་བྷཱ་ཝ་ཏོ པ་ཊི་ཀྑེ་པོ པ་ར་ཝཱ་དི་སྶ. པུ་ན པུ་ཊྛོ པུ་གྒ་ལཾ ས་ནྡྷཱ་ཡ པ་ཊི་ཉྙཱ ཏ་སྶེ་ཝ.

༢༡༡. ཨ་ཉྙོ པུ་གྒ་ལོཏི་པ་ཉྷེ་པི ས་ངྑ་ཏེ་ཧི ཁ་ནྡྷེ་ཧི ཨ་ཉྙ་ཏྟཾ ཨ་ནི་ཙྪ་ནྟོ པ་ཊི་ཀྑེ་པོ ཏ་སྶེ་ཝ.

༢༡༢. ཁ་ནྡྷཱ ས་ངྑ་ཏཱཏི་ཨཱ་དི ས་ངྑ་ཏཱ་ས་ངྑ་ཏཱ་ནི ས་རཱུ་པེ་ན ད་སྶེ་ཏྭཱ ཨ་ཉྙ་ཏྟ་པུ་ཙྪ་ན་ཏྠཾ ཝུ་ཏྟཾ.

༢༡༣. རཱུ་པཾ ས་ངྑ་ཏནྟི་ཨཱ་དི ཁ་ནྡྷེ ཝི་བྷཱ་ག་ཏོ ད་སྶེ་ཏྭཱ ཨ་ཉྙ་ཏྟ་པུ་ཙྪ་ན་ཏྠཾ ཝུ་ཏྟཾ.

༢༡༤. པུ་གྒ་ལ་སྶ ཨུ་པྤཱ་དོཏི པུ་ཙྪཱ ས་ཀ་ཝཱ་དི་སྶ, ‘‘ཛཱ་ཏི་དྷ་མྨཱ ཛ་རཱ་དྷ་མྨཱ, ཨ་ཐོ མ་ར་ཎ་དྷ་མྨི་ནོ’’ཏི་ཨཱ་དི་སུ་ཏྟ་ཝ་སེ་ན པ་ཊི་ཉྙཱ པ་ར་ཝཱ་དི་སྶ. ས་ངྑ་ཏ་བྷཱ་ཝཾ པ་ན་སྶ སོ ན ཨི་ཙྪ་ཏི, ཏ་སྨཱ པ་ཊི་ཀྑི་པ་ཏི.

༢༡༥. པུ་ན ན ཨུ་པྤཱ་དོ པ་ཉྙཱ་ཡ་ཏཱིཏི་ཨཱ་དི་ནཱ ན་ཡེ་ན པུ་ཊྛོ ‘‘དུ་ཀྑ་མེ་ཝ ཧི ས་མྦྷོ་ཏི, དུ་ཀྑཾ ཏི་ཊྛ་ཏི ཝེ་ཏི ཙཱ’’ཏི་ཨཱ་དི་ཝ་ཙ་ན་ཏོ (སཾ. ནི. ༡.༡༧༡) པུ་གྒ་ལ་སྶ ཨུ་པྤཱ་དཱ་ད་ཡོ ནཱ་མ ན ཡུ་ཛྫ་ནྟཱི་ཏི པ་ཊི་ཛཱ་ནཱ་ཏི.

༢༡༦. ཨ་ཏྠ་ཏྠ་མྷཱིཏི ཨ་ཏྠཾ ཝུ་ཙྩ་ཏི ནི་བྦཱ་ནཾ. ཏ་ཏྠ ཨ་ཏྠཱིཏི པུ་ཙྪ་ཏི. ཏ་སྶ ཨ་ཏྠི་ཏཱ་ཡ ས་སྶ་ཏཾ, ན་ཏྠི་ཏཱ་ཡ. ཨུ་ཙྪེ་དོ ཨཱ་པ་ཛྫ་ཏི. ཏ་དུ་བྷ་ཡ་མྤི ཨ་ནི་ཙྪ་ནྟོ པ་ཙྪཱ པ་ཊི་ཀྑི་པ་ཏི.

ཉཱ་ཏ་ཀཱ་ནུ་ཡོ་གཱ་དི་ཝ་ཎྞ་ནཱ.