༦. དྭཱི་ཧི སཱི་ལེ་ཧཱི་ཏི་ཀ་ཐཱ་ཝ་ཎྞ་ནཱ

༥༨༧-༥༨༩. ཨི་དཱ་ནི དྭཱི་ཧི སཱི་ལེ་ཧཱི་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘སཱི་ལེ པ་ཏི་ཊྛཱ་ཡ ན་རོ ས་པ་ཉྙོ’’ཏི་ཨཱ་དི་ཝ་ཙ་ན་ཏོ (སཾ. ནི. ༡.༢༣) ཡ་སྨཱ ལོ་ཀི་ཡེ་ན སཱི་ལེ་ན སཱི་ལ་ཝཱ ལོ་ཀུ་ཏྟ་རཾ མ་གྒཾ བྷཱ་ཝེ་ཏི, ཏ་སྨཱ ‘‘པུ་རི་མེ་ན ཙ ལོ་ཀི་ཡེ་ན མ་གྒ་ཀྑ་ཎེ ལོ་ཀུ་ཏྟ་རེ་ན ཙཱ་ཏི དྭཱི་ཧི སཱི་ལེ་ཧི ས་མ་ནྣཱ་ག་ཏོ ནཱ་མ ཧོ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་སཾ་གྷི་ཀཱ་ནཾ་ཡེ་ཝ, ཏེ ས་ནྡྷཱ་ཡ མ་གྒ་ས་མ་ངྒཱིཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི སོ ཨེ་ཀ་ཀྑ་ཎེ ལོ་ཀི་ཡ་ལོ་ཀུ་ཏྟ་རེ་ཧི དྭཱི་ཧི སཱི་ལེ་ཧི ས་མ་ནྣཱ་ག་ཏོ, དྭཱི་ཧི ཕ་སྶཱ་དཱི་ཧི་པི ཏེ་ན ས་མ་ནྣཱ་ག་ཏེ་ན བྷ་ཝི་ཏ་བྦ’’ནྟི ཙོ་དེ་ཏུཾ དྭཱི་ཧི ཕ་སྶེ་ཧཱིཏི་ཨཱ་དི་མཱ་ཧ. ཨི་ཏ་རོ ཏ་ཐཱ་རཱུ་པཾ ན་ཡཾ ཨ་པ་སྶ་ནྟོ པ་ཊི་ཀྑི་པ་ཏི. ལོ་ཀི་ཡེ་ན ཙ ལོ་ཀུ་ཏྟ་རེ་ན ཙཱཏི པ་ཉྷེ པུ་བྦེ ས་མཱ་དི་ནྣ་ཉྩ མ་གྒ་ཀྑ་ཎེ ཨུ་པྤ་ནྣ་ས་མྨཱ་ཝཱ་ཙཱ་དཱི་ནི ཙ ས་ནྡྷཱ་ཡ པ་ཊི་ཛཱ་ནཱ་ཏི.

ལོ་ཀི་ཡེ སཱི་ལེ ནི་རུ་དྡྷེཏི པུ་ཙྪཱ པ་ར་ཝཱ་དི་སྶ, ཁ་ཎ་བྷ་ངྒ་ནི་རོ་དྷཾ ས་ནྡྷཱ་ཡ པ་ཊི་ཉྙཱ ས་ཀ་ཝཱ་དི་སྶ. ཨི་ཏ་རོ པ་ན ཏཾ ཝཱི་ཏི་ཀྐ་མཾ ཝི་ཡ ས་ལླ་ཀྑེ་ནྟོ དུ་སྶཱི་ལོཏི་ཨཱ་དི་མཱ་ཧ. ལ་དྡྷི་པ་ཏི་ཊྛཱ་པ་ནཾ པ་ན་སྶ པུ་བྦེ ཨ་བྷི་ནྣ་སཱི་ལ་ཏཾ་ཡེ་ཝ དཱི་པེ་ཏི, ན དྭཱི་ཧི ས་མ་ནྣཱ་ག་ཏ་ཏཾ. ཏ་སྨཱ ཨ་པྤ་ཏི་ཊྛི་ཏཱ་ཝ ལ་དྡྷཱི་ཏི.

དྭཱི་ཧི སཱི་ལེ་ཧཱི་ཏི་ཀ་ཐཱ་ཝ་ཎྞ་ནཱ.