༧. ཙོ་ད་ནཱ་སུ་ཏྟ་ཝ་ཎྞ་ནཱ

༡༦༧. ས་ཏྟ་མེ ཙོ་ད་ཀེ་ནཱཏི ཝ་ཏྠུ་ས་ནྡ་སྶ་ནཱ ཨཱ་པ་ཏྟི་ས་ནྡ་སྶ་ནཱ སཾ་ཝཱ་ས་པྤ་ཊི་ཀྑེ་པོ སཱ་མཱི་ཙི་པྤ་ཊི་ཀྑེ་པོ་ཏི ཙ་ཏཱུ་ཧི ཙོ་ད་ནཱ་ཝ་ཏྠཱུ་ཧི ཙོ་ད་ཡ་མཱ་ནེ་ན. ཀཱ་ལེ་ན ཝ་ཀྑཱ་མི ནོ ཨ་ཀཱ་ལེ་ནཱཏི ཨེ་ཏྠ ཙུ་དི་ཏ་ཀ་སྶ ཀཱ་ལོ ཀ་ཐི་ཏོ, ན ཙོ་ད་ཀ་སྶ. པ་རཾ ཙོ་དེ་ནྟེ་ན ཧི པ་རི་ས་མ་ཛ྄ཛྷེ ཝཱ ཨུ་པོ་ས་ཐ་པ་ཝཱ་ར་ཎ་གྒེ ཝཱ ཨཱ་ས་ན་སཱ་ལཱ་བྷོ་ཛ་ན་སཱ་ལཱ་དཱི་སུ ཝཱ ན ཙོ་དེ་ཏ་བྦོ, དི་ཝཱ་ཊྛཱ་ནེ ནི་སི་ནྣ་ཀཱ་ལེ ‘‘ཀ་རོ་ཏཱ་ཡ་སྨཱ ཨོ་ཀཱ་སཾ, ཨ་ཧཾ ཨཱ་ཡ་སྨ་ནྟཾ ཝ་ཏྟུ་ཀཱ་མོ’’ཏི ཨེ་ཝཾ ཨོ་ཀཱ་སཾ ཀཱ་རེ་ཏྭཱ ཙོ་དེ་ཏ་བྦོ. པུ་གྒ་ལཾ པ་ན ཨུ་པ་པ་རི་ཀྑི་ཏྭཱ ཡོ ལོ་ལ་པུ་གྒ་ལོ ཨ་བྷཱུ་ཏཾ ཝ་ཏྭཱ བྷི་ཀྑཱུ་ནཾ ཨ་ཡ་སཾ ཨཱ་རོ་པེ་ཏི, སོ ཨོ་ཀཱ་ས་ཀ་མྨཾ ཝི་ནཱ་པི ཙོ་དེ་ཏ་བྦོ. བྷཱུ་ཏེ་ནཱཏི ཏ་ཙྪེ་ན ས་བྷཱ་ཝེ་ན. ས་ཎྷེ་ནཱཏི མ་ཊྛེ་ན མུ་དུ་ཀེ་ན. ཨ་ཏྠ་སཾ་ཧི་ཏེ་ནཱཏི ཨ་ཏྠ་ཀཱ་མ་ཏཱ་ཡ ཧི་ཏ་ཀཱ་མ་ཏཱ་ཡ ཨུ་པེ་ཏེ་ན. ཨ་ཝི་པྤ་ཊི་སཱ་རོ ཨུ་པ་ད་ཧཱ་ཏ་བྦོཏི ཨ་མ་ངྐུ་བྷཱ་ཝོ ཨུ་པ་ནེ་ཏ་བྦོ. ཨ་ལཾ ཏེ ཨ་ཝི་པྤ་ཊི་སཱ་རཱ་ཡཱཏི ཡུ་ཏྟཾ ཏེ ཨ་མ་ངྐུ་བྷཱ་ཝཱ་ཡ. སེ་ས་མེ་ཏྠ ཨུ་ཏྟཱ་ན་མེ་ཝཱ་ཏི. ཨ་ཊྛ་མཾ ཧེ་ཊྛཱ ཝུ་ཏྟ་ན་ཡ་ཏྟཱ པཱ་ཀ་ཊ་མེ་ཝ.