༤. པ་རི་སཱ་སུ་ཏྟ་ཝ་ཎྞ་ནཱ

༩༦. ཙ་ཏུ་ཏྠེ ན བཱ་ཧུ་ལི་ཀཱ ཧོ་ནྟཱིཏི པ་ཙྩ་ཡ་བཱ་ཧུ་ལླི་ཀཱ ན ཧོ་ནྟི. ན སཱ་ཐ་ལི་ཀཱཏི ཏི་སྶོ སི་ཀྑཱ སི་ཐི་ལཾ ཀ་ཏྭཱ ན ག་ཎྷ་ནྟི. ཨོ་ཀྐ་མ་ནེ ནི་ཀྑི་ཏྟ་དྷུ་རཱཏི ཨོ་ཀྐ་མ་ནཾ ཝུ་ཙྩ་ཏི ཨ་ཝ་ག་མ་ན་ཊྛེ་ན པ་ཉྩ ནཱི་ཝ་ར་ཎཱ་ནི, ཏེ་སུ ནི་ཀྑི་ཏྟ་དྷུ་རཱ. པ་ཝི་ཝེ་ཀེ པུ་བྦ་ངྒ་མཱཏི ཀཱ་ཡ་ཙི་ཏྟ་ཨུ་པ་དྷི་ཝི་ཝེ་ཀ་ས་ངྑཱ་ཏེ ཏི་ཝི་དྷེ་པི ཝི་ཝེ་ཀེ པུ་བྦ་ངྒ་མཱ. ཝཱི་རི་ཡཾ ཨཱ་ར་བྷ་ནྟཱིཏི དུ་ཝི་དྷ་མྤི ཝཱི་རི་ཡཾ པ་གྒ་ཎྷ་ནྟི. ཨ་པྤ་ཏྟ་སྶཱཏི ཛྷཱ་ན་ཝི་པ་སྶ་ནཱ་མ་གྒ་ཕ་ལ་ས་ངྑཱ་ཏ་སྶ ཨ་པྤ་ཏྟ་ཝི་སེ་ས་སྶ. སེ་ས་པ་ད་དྭ་ཡེ་པི ཨེ་སེ་ཝ ན་ཡོ. པ་ཙྪི་མཱ ཛ་ན་ཏཱཏི ས་དྡྷི་ཝི་ཧཱ་རི་ཀ་ཨ་ནྟེ་ཝཱ་སི་ཀཱ་ད་ཡོ. དི་ཊྛཱ་ནུ་ག་ཏིཾ ཨཱ་པ་ཛྫ་ཏཱིཏི ཨཱ་ཙ་རི་ཡུ་པ་ཛ྄ཛྷཱ་ཡེ་ཧི ཀ་ཏཾ ཨ་ནུ་ཀ་རོ་ཏི. ཡཾ ཏཱ་ཡ ཛ་ན་ཏཱ་ཡ ཨཱ་ཙ་རི་ཡུ་པ་ཛ྄ཛྷཱ་ཡེ་སུ དི་ཊྛཾ, ཏ་སྶ ཨ་ནུ་ག་ཏིཾ ཨཱ་པ་ཛྫ་ཏི ནཱ་མ. ཨ་ཡཾ ཝུ་ཙྩ་ཏི, བྷི་ཀྑ་ཝེ, ཨ་གྒ་ཝ་ཏཱི པ་རི་སཱཏི, བྷི་ཀྑ་ཝེ, ཨ་ཡཾ པ་རི་སཱ ཨ་གྒ་པུ་གྒ་ལ་ཝ་ཏཱི ནཱ་མ ཝུ་ཙྩ་ཏི.

བྷ་ཎྜ་ན་ཛཱ་ཏཱཏི ཛཱ་ཏ་བྷ་ཎྜ་ནཱ. ཀ་ལ་ཧ་ཛཱ་ཏཱཏི ཛཱ་ཏ་ཀ་ལ་ཧཱ. བྷ་ཎྜ་ན་ནྟི ཙེ་ཏྠ ཀ་ལ་ཧ་སྶ པུ་བྦ་བྷཱ་གོ, ཧ་ཏྠ་པ་རཱ་མཱ་སཱ་དི་ཝ་སེ་ན ཝཱི་ཏི་ཀྐ་མོ ཀ་ལ་ཧོ ནཱ་མ. ཝི་ཝཱ་དཱ་པ་ནྣཱཏི ཝི་རུ་དྡྷ་ཝཱ་དཾ ཨཱ་པ་ནྣཱ. མུ་ཁ་ས་ཏྟཱི་ཧཱིཏི གུ་ཎ་ཝི་ཛ྄ཛྷ་ན་ཊྛེ་ན ཕ་རུ་སཱ ཝཱ་ཙཱ ‘‘མུ་ཁ་ས་ཏྟི་ཡོ’’ཏི ཝུ་ཙྩ་ནྟི, ཏཱ་ཧི མུ་ཁ་ས་ཏྟཱི་ཧི. ཝི་ཏུ་ད་ནྟཱ ཝི་ཧ་ར་ནྟཱིཏི ཝི་ཛ྄ཛྷ་ནྟཱ ཝི་ཙ་ར་ནྟི.

ས་མ་གྒཱཏི ས་ཧི་ཏཱ. ས་མྨོ་ད་མཱ་ནཱཏི ས་མ་པྤ་ཝ་ཏྟ་མོ་དཱ. ཁཱི་རོ་ད་ཀཱི་བྷཱུ་ཏཱཏི ཁཱི་རོ་ད་ཀཾ ཝི་ཡ བྷཱུ་ཏཱ. པི་ཡ་ཙ་ཀྑཱུ་ཧཱིཏི ཨུ་པ་ས་ནྟེ་ཧི མེ་ཏྟ་ཙ་ཀྑཱུ་ཧི. པཱི་ཏི ཛཱ་ཡ་ཏཱིཏི པ་ཉྩ་ཝ་ཎྞཱ པཱི་ཏི ཨུ་པྤ་ཛྫ་ཏི. ཀཱ་ཡོ པ་སྶ་མྦྷ་ཏཱིཏི ནཱ་མ་ཀཱ་ཡོ་པི རཱུ་པ་ཀཱ་ཡོ་པི ཝི་ག་ཏ་ད་ར་ཐོ ཧོ་ཏི. པ་སྶ་དྡྷ་ཀཱ་ཡོཏི ཨ་སཱ་ར་དྡྷ་ཀཱ་ཡོ. སུ་ཁཾ ཝེ་དི་ཡ་ཏཱིཏི ཀཱ་ཡི་ཀ་ཙེ་ཏ་སི་ཀ་སུ་ཁཾ ཝེ་དི་ཡ་ཏི. ས་མཱ་དྷི་ཡ་ཏཱིཏི ཨཱ་ར་མྨ་ཎེ ས་མྨཱ ཋ་པཱི་ཡ་ཏི.

ཐུ་ལླ་ཕུ་སི་ཏ་ཀེཏི མ་ཧཱ་ཕུ་སི་ཏ་ཀེ. པ་བྦ་ཏ་ཀ་ནྡ་ར་པ་ད་ར་སཱ་ཁཱཏི ཨེ་ཏྠ ཀ་ནྡ་རོ ནཱ་མ ‘‘ཀ’’ནྟི ལ་དྡྷ་ནཱ་མེ་ན ཨུ་ད་ཀེ་ན དཱ་རི་ཏོ ཨུ་ད་ཀ་བྷི་ནྣོ པ་བྦ་ཏ་པྤ་དེ་སོ, ཡོ ‘‘ནི་ཏ་མྦྷོ’’ཏི་པི ‘‘ན་དི་ཀུ་ཉྫོ’’ཏི་པི ཝུ་ཙྩ་ཏི. པ་ད་རཾ ནཱ་མ ཨ་ཊྛ མཱ་སེ དེ་ཝེ ཨ་ཝ་སྶ་ནྟེ ཕ་ལི་ཏོ བྷཱུ་མི་པྤ་དེ་སོ. སཱ་ཁཱཏི ཀུ་སོ་བྦྷ་གཱ་མི་ནི་ཡོ ཁུ་དྡ་ཀ་མཱ་ཏི་ཀཱ་ཡོ. ཀུ་སོ་བྦྷཱཏི ཁུ་དྡ་ཀ་ཨཱ་ཝཱ་ཊཱ. མ་ཧཱ་སོ་བྦྷཱཏི མ་ཧཱ་ཨཱ་ཝཱ་ཊཱ. ཀུ་ནྣ་དི་ཡོཏི ཁུ་དྡ་ཀ་ན་དི་ཡོ. མ་ཧཱ་ན་དི་ཡོཏི ག་ངྒཱ་ཡ་མུ་ནཱ་དི་ཀཱ མ་ཧཱ་ས་རི་ཏཱ.