ཝུ་ཊྛཱ་ན་བ་ལ་ས་མཱ་ཡོ་ག་ཀ་ཐཱ་ཝ་ཎྞ་ནཱ
༨༢༧. ཝུ་ཊྛཱ་ནཾ ནི་མི་ཏྟ་ཏོ, པ་ཝ་ཏྟ་ཏོ ཙ ཝུ་ཊྛཱ་ནཾ. བ་ལ་ས་མཱ་ཡོ་གོ ས་མ་ཐ་ཝི་པ་སྶ་ནཱ་བ་ལེ་ཧི ས་མྤ་ཡུ་ཏྟ་ཏཱ. པ་རི་ཉྙཱ་བྷི་ས་མ་ཡཱ་དི་ཝ་སེ་ན དུ་ཀྑཱ་དཱི་སུ ཝི་སེ་ས་ད་སྶ་ན་ཊྛེ་ན མ་གྒ་པ་ཉྙཱ་པི ཝི་པ་སྶ་ནཱ་ཏི ཝུ་ཙྩ་ཏཱི་ཏི ‘‘ལོ་ཀི་ཡ་ཝི་པ་སྶ་ནཱ’’ཏི ཝི་སེ་སེ་ཏྭཱ ཝུ་ཏྟཾ. ཏེ་ནེ་ཝཱ་ཧ ‘‘ཝུ་ཊྛཱ་ན་ཊྛེ་ན ས་མ་ཐ་ཝི་པ་སྶ་ནཾ ཡུ་ག་ན་དྡྷཾ བྷཱ་ཝེ་ཏཱི’’ཏི (པ་ཊི. མ. ༢.༥). ནི་མི་ཏྟཱ་ར་མྨ་ཎ་ཏྟཱ ནེ་ཝ་ནི་མི་ཏྟཱ ཝུ་ཊྛཱ་ཏི, པ་ཝ་ཏྟི…པེ… ཚི་ནྡ་ན་ཏོ ན པ་ཝ་ཏྟཱ ཝུ་ཊྛཱ་ཏཱི་ཏི ཡོ་ཛ་ནཱ. ཏ་ཏྠ ནི་མི་ཏྟ་ཏོ ཝུ་ཊྛཱ་ནཾ ས་ངྑཱ་ར་ནི་མི་ཏྟཾ ནི་སྶ་ཛྫི་ཏྭཱ ནི་བྦཱ་ནཱ་ར་མྨ་ཎ་ཀ་ར་ཎཾ. པ་ཝ་ཏྟ་ཏོ ཝུ་ཊྛཱ་ནཾ ཧེ་ཏུ་ནི་རོ་དྷེ་ན ཨཱ་ཡ་ཏིཾ ཝི་པཱ་ཀ་པྤ་ཝ་ཏྟ་སྶ ཨ་ནུ་པྤ་ཝ་ཏྟི་དྷ་མྨ་ཏཱ་པཱ་ད་ནཾ. ཏེ་ནཱ་ཧ ‘‘ས་མུ་ད་ཡ་སྶ ཨ་ས་མུ་ཙྪི་ནྡ་ན་ཏོ པ་ཝ་ཏྟཱ ན ཝུ་ཊྛཱ་ཏཱི’’ཏི.
དུ་བྷ་ཏོཏི ཨུ་བྷ་ཏོ, ད-ཀཱ་རཱ་ག་མཾ ཀ་ཏྭཱ ཨེ་ཝཾ ཝུ་ཏྟཾ. དུ་བྷཱཏི ཝཱ པ་ད་ནྟ་ར་མེ་ཝེ་ཏཾ ཨུ་བྷ་ཡ་ས་དྡེ་ན ས་མཱ་ན་ཏྠཾ. ད་སྶ་ན་ཊྛེ་ནཱཏི པ་རི་ཉྙཱ་བྷི་ས་མ་ཡཱ་དི་ལ་ཀྑ་ཎེ་ན ཙ་ཏུ་ས་ཙྩ་ད་སྶ་ན་ཊྛེ་ན. མི་ཙྪཱ་དི་ཊྛི་ཡཱཏི དྭཱ་ས་ཊྛི་པྤ་བྷེ་དཱ་ཡ་པི མི་ཙྪཱ་དི་ཊྛི་ཡཱ. ཏ་ད་ནུ་ཝ་ཏྟ་ཀ་ཀི་ལེ་སེ་ཧཱིཏི ཨ་པཱ་ཡ་ག་མ་ནཱི་ཡ་ཏཱ་ཡ ཏ་སྶཱ མི་ཙྪཱ་དི་ཊྛི་ཡཱ ཨ་ནུ་ཝ་ཏྟ་ཀེ་ཧི ཝི་ཙི་ཀི་ཙྪཱ་དི་ཀི་ལེ་སེ་ཧི. ཁ་ནྡྷེ་ཧཱིཏི ཨེ་ཏྠཱ་པི ཏ་ད་ནུ་ཝ་ཏྟ་ཀ་ས་དྡོ ཨཱ་ནེ་ཏྭཱ ས་མྦ་ནྡྷི་ཏ་བྦོ. ཏེ ཙ མི་ཙྪཱ་དི་ཊྛི་ཨཱ་དི་པ་ཙྩ་ཡཱ ཨུ་པྤ་ཛྫ་ནཱ་ར་ཧཱ ཝེ་དི་ཏ་བྦཱ. མི་ཙྪཱ་ས་ངྐ་པྤཱཏི་ཨཱ་དཱི་སུ་པི ཏ་ད་ནུ་ཝ་ཏྟ་ཀ་ཀི་ལེ་སེ་ཧི ཙ ཁ་ནྡྷེ་ཧི ཙ ཝུ་ཊྛཱ་ཏི. བ་ཧི་དྡྷཱ ཙ ས་བྦ་ནི་མི་ཏྟེ་ཧི ཝུ་ཊྛཱ་ཏཱིཏི པཱ་ལི༹ སཾ་ཁི་ཏྟཱ. ཡ་ཐཱ མི་ཙྪཱ་དི་ཊྛི་མི་ཙྪཱ་ས་ངྐ་པྤཱ, ཨེ་ཝཾ མི་ཙྪཱ་ཝཱ་ཙཱ་ད་ཡོ་པི ཨ་པཱ་ཡ་ག་མ་ནཱི་ཡཱ ཨེ་ཝ ཝེ་དི་ཏ་བྦཱ. མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝཱ ཙེ་ཏ་ནཱ་ས་བྷཱ་ཝཱ. མི་ཙྪཱ་ས་ཏི ཏ་ཐཱ་པ་ཝ་ཏྟཱ ཙ་ཏྟཱ་རོ ཁ་ནྡྷཱ. ཨུ་པ་རི་མ་གྒ་ཏྟ་ཡེ ས་མྨཱ་དི་ཊྛི ཏཾ་ཏཾ་མ་གྒ་ཝ་ཛ྄ཛྷཱ མཱ་ན་ཏོ ཝུ་ཊྛཱ་ཏི. སོ ཧི ‘‘ཨ་ཧ་མ་སྨཱི’’ཏི པ་ཝ་ཏྟི་ཡཱ དི་ཊྛི་ཊྛཱ་ནི་ཡོ, མི་ཙྪཱ་མ་གྒ་ཏོ པ་ནེ་ཏྠ ཝུ་ཊྛཱ་ནཾ ཨ་ནུ་དྡྷ་རི་ཏྭཱ ཏཾ་ཏཾ་མ་གྒ་ཝ་ཛ྄ཛྷ་སཾ་ཡོ་ཛ་ནཱ་ནུ་ས་ཡེ་ཧེ་ཝ ཝུ་ཊྛཱ་ནཾ ཨུ་དྡྷ་ཊཾ.
ཨ་ཎུ་ས་ཧ་ག་ཏཱཏི ཨ་ཎུ་བྷཱ་ཝཾ ག་ཏཱ པ་ཏྟཱ, ཏ་ནུ་བྷཱུ་ཏཱ་ཏི ཨ་ཏྠོ.
༨༢༨. ཨེ་ཝཾ ཝུ་ཊྛཱ་ནཾ ད་སྶེ་ཏྭཱ ཨི་དཱ་ནི བ་ལ་ས་མཱ་ཡོ་གཾ ད་སྶེ་ཏུཾ ‘‘ལོ་ཀི་ཡཱ་ན་ཉྩཱ’’ཏི་ཨཱ་དི ཝུ་ཏྟཾ. ས་མ་ཐ་བ་ལཾ ཨ་དྷི་ཀཾ ཧོ་ཏི ས་མཱ་དྷི་བྷཱ་ཝ་ནཱ་བྷཱ་ཝ་ཏོ. ཝི་པ་སྶ་ནཱ་བ་ལཾ ཨ་དྷི་ཀཾ ཧོ་ཏི ཉཱ་ཎུ་ཏྟ་ར་ཏྟཱ ཝི་པ་སྶ་ནཱ་བྷཱ་ཝ་ནཱ་ཡ. ས་མཱ་ན་བྷཱ་ཝེ་ན ཡུ་གེ ན་དྡྷཱ བ་དྡྷཱ ཝི་ཡ ཧོ་ནྟཱི་ཏི ཡུ་ག་ན་དྡྷཱ. ཏེ་ནཱ་ཧ ‘‘ཨ་ཉྙ་མ་ཉྙཾ ཨ་ན་ཏི་ཝ་ཏྟ་ན་ཊྛེ་ནཱ’’ཏི, ཀི་ཙྩ་ཏོ ཨ་ནཱུ་ནཱ་དྷི་ཀ་བྷཱ་ཝེ་ནཱ་ཏི ཨ་ཏྠོ. ཏ་ཏོ ཨེ་ཝ ས་མཱ་ཡོ་གོཏི ས་མ་པ་རི་ཙྪེ་ད་ཡོ་གོ་ཏི ཨ་ཏྠོ.
ས་མཱ་དྷི་པ་ཊི་པ་ཀྑ་ད་སྶ་ན་ཏྠཾ ‘‘ཨུ་དྡྷ་ཙྩ་ས་ཧ་ག་ཏ་ཀི་ལེ་སེ་ཧཱི’’ཏི ཝུ་ཏྟཾ, ཨུ་དྡྷ་ཙྩ་པ་དྷཱ་ནེ་ཧི ཀི་ལེ་སེ་ཧཱི་ཏི ཨ་དྷི་པྤཱ་ཡོ. ཨ་ཝི་ཀྑེ་པོ ས་མཱ་དྷཱིཏི ས་མུ་ཙྪི་ནྡ་ནེ་ན ཝི་ཀྑེ་པ་སྶ ཨུ་ཛུ་པ་ཊི་པ་ཀྑ་བྷཱུ་ཏོ ས་མཱ་དྷི. ནི་རོ་དྷ་གོ་ཙ་རོཏི ནི་བྦཱ་ནཱ་ར་མྨ་ཎོ. ཝུ་ཊྛཱ་ན་ཊྛེ་ནཱཏི ཝུ་ཊྛཱ་ན་ཀ་བྷཱ་ཝེ་ན ནི་མི་ཏྟ་ཏོ, པ་ཝ་ཏྟ་ཏོ ཙ ཝུ་ཊྛ་ཧ་མཱ་ན་ཝ་སེ་ན. ཨེ་ཀ་ར་སཱཏི ས་མཱ་ན་ཀི་ཙྩཱ.