དུ་ཏི་ཡ་མ་གྒ་ཉཱ་ཎ་ཀ་ཐཱ་ཝ་ཎྞ་ནཱ

༨༡༣. ཀཱ་མ་རཱ་ག་བྱཱ་པཱ་དཱ་ནཾ ཏ་ནུ་བྷཱ་ཝཱ་ཡཱཏི ཨེ་ཏེ་སཾ ཀི་ལེ་སཱ་ནཾ ཏ་ནུ་བྷཱ་ཝ་ཏྠཾ. ཏ་ཏྠ དྭཱི་ཧི ཀཱ་ར་ཎེ་ཧི ཏ་ནུ་བྷཱ་ཝོ ཨ་དྷི་ཙྩུ་པྤ་ཏྟི་ཡཱ, པ་རི་ཡུ་ཊྛཱ་ན་མ་ནྡ་ཏཱ་ཡ ཙ. ས་ཀ་དཱ་གཱ་མི་སྶ ཧི ཝ་ཊྚཱ་ནུ་སཱ་རི་མ་ཧཱ་ཛ་ན་སྶ ཝི་ཡ ཀི་ལེ་སཱ ཨ་བྷི་ཎྷཾ ན ཨུ་པྤ་ཛྫ་ནྟི, ཀ་དཱ་ཙི ཀ་དཱ་ཙི ཝི་ར་ལཱ༹་ཀཱ་རཱ ཧུ་ཏྭཱ ཨུ་པྤ་ཛྫ་ནྟི. ཏ་ཐཱ ཨུ་པྤ་ཛྫ་ནྟཱ་པི མ་དྡ་ནྟཱ ཚཱ་དེ་ནྟཱ ཨ་ནྡྷ་ཀཱ་རཾ ཀ་རོ་ནྟཱ ན ཨུ་པྤ་ཛྫ་ནྟི, དྭཱི་ཧི པ་ན མ་གྒེ་ཧི པ་ཧཱི་ན་ཏྟཱ མ་ནྡ་མ་ནྡཱ ཏ་ནུ་ཀཱ་ཀཱ་རཱ ཧུ་ཏྭཱ ཨུ་པྤ་ཛྫ་ནྟི. ཀེ་ཙི པ་ན ‘‘ས་ཀ་དཱ་གཱ་མི་སྶཱ་པི ཀི་ལེ་སཱ ཙི་རེ་ན ཨུ་པྤ་ཛྫ་ནྟི, ཨུ་པྤ་ཛྫ་ནྟཱ་པི བ་ཧ་ལཱ་ཝ ཨུ་པྤ་ཛྫ་ནྟི. ཏ་ཐཱ ཧི་སྶ པུ་ཏྟ་དྷཱི་ཏ་རོ དི་སྶ་ནྟཱི’’ཏི, ཏཾ ཨ་ཀཱ་ར་ཎཾ ཝ་ཏྠུ་པ་ཊི་སེ་ཝ་ནེ་ན ཝི་ནཱ་པི ག་བྦྷ་གྒ་ཧ་ཎ་ས་བྦྷཱ་ཝ་ཏོ. ཏ་སྨཱ ཝུ་ཏྟ་ན་ཡེ་ནེ་ཝ དྭཱི་ཧི ཀཱ་ར་ཎེ་ཧི ཏེ་སཾ ཏ་ནུ་བྷཱ་ཝོ ཝེ་དི་ཏ་བྦོ. དུ་ཏི་ཡཱ་ཡཱཏི ག་ཎ་ན་ཝ་སེ་ན་པི དུ་ཏི་ཡཱ་ཡ, ཨུ་པྤ་ཏྟི་ཝ་སེ་ན་པི དུ་ཏི་ཡཱ་ཡ བྷཱུ་མི་ཡཱ. པ་ཏྟི་ཡཱཏི སཱ་མ་ཉྙ་ཕ་ལ་སྶ པ་ཊི་ལཱ་བྷཱ་ཡ. ཏ་ཉྷི ས་མྤ་ཡུ་ཏྟཱ་ནཾ ནི་སྶ་ཡ་བྷཱ་ཝ་ཏོ ཏེ དྷ་མྨཱ བྷ་ཝ་ནྟི ཨེ་ཏྠཱ་ཏི བྷཱུ་མི. ཡ་སྨཱ ཝཱ ས་མཱ་ནེ་པི ལོ་ཀུ་ཏྟ་ར་བྷཱ་ཝེ ས་ཡ་མྤི བྷ་ཝ་ཏི ཨུ་པྤ་ཛྫ་ཏི, ན ནི་བྦཱ་ནཾ ཝི་ཡ ཨ་པཱ་ཏུ་བྷཱུ་ཏཾ, ཏ་སྨཱ་པི ‘‘བྷཱུ་མཱི’’ཏི ཝུ་ཙྩ་ཏི. ཡོ་གཾ ཀ་རོ་ཏཱིཏི ཝི་པ་སྶ་ནཱ་བྷི་ཡོ་གཾ ཀ་རོ་ཏི. ‘‘ན་ཝ་ཧཱ་ཀཱ་རེ་ཧི ཨི་ནྡྲི་ཡཱ་ནི ཏི་ཀྑཱ་ནི བྷ་ཝ་ནྟཱི’’ཏི་ཨཱ་དི་ནཱ (ཝི་སུ་དྡྷི. ༢.༦༩༩) ཝུ་ཏྟ་ན་ཡེ་ནེ་ཝ ཡ་ད་གྒེ་ན ཨི་ནྡྲི་ཡཱ་ནཾ ཏི་ཀྑ་ཏཾ ས་མྤཱ་དེ་ཏི, ཏ་ད་གྒེ་ན བ་ལཱ་ནི, བོ་ཛ྄ཛྷ་ངྒཱ་ནི ཙ པ་ཊུ་ཏ་ར་བྷཱ་ཝཾ ཨཱ་པཱ་དེ་ནྟོ ཨི་ནྡྲི་ཡ་བ་ལ་བོ་ཛ྄ཛྷ་ངྒཱ་ནི ས་མོ་དྷཱ་ནེ་ཏྭཱ ལ་ཀྑ་ཎ་ཏྟ་ཡ་ཏཱི་ར་ཎ་ཝ་སེ་ན ཉཱ་ཎེ་ན པ་རི་མ་དྡ་ཏི. ཏ་ཏྠ ཨ་པ་རཱ་པ་རཾ ཉཱ་ཎཾ ཙཱ་རེ་ནྟོ པ་རི་ཝ་ཏྟེ་ཏི. ཏེ་ནཱ་ཧ ‘‘ཝི་པ་སྶ་ནཱ་ཝཱི་ཐིཾ ཨོ་གཱ་ཧ་ཏཱི’’ཏི. ཝུ་ཏྟ་ན་ཡེ་ནེ་ཝཱཏི ཨུ་ད་ཡ་བྦ་ཡ་ཉཱ་ཎཱ་དཱི་ནཾ ཨུ་པྤཱ་ད་ནེ ཝུ་ཏྟ་ན་ཡེ་ན. གོ་ཏྲ་བྷུ་ཨ་ན་ནྟ་རནྟི ཨེ་ཏྠ གོ་ཏྲ་བྷུ ཝི་ཡ གོ་ཏྲ་བྷུ. པ་ཋ་མ་མ་གྒ་པུ་རེ་ཙཱ་རི་ཀ་ཉཱ་ཎ་ཉྷི པུ་ཐུ་ཛྫ་ན་གོ་ཏྟཱ་བྷི་བྷ་ཝ་ན་ཏོ, ཨ་རི་ཡ་གོ་ཏྟ་བྷ་ཝ་ན་ཏོ ཙ ནི་པྤ་རི་ཡཱ་ཡ་ཏོ གོ་ཏྲ་བྷཱུ་ཏི ཝུ་ཙྩ་ཏི, ཨི་དཾ པ་ན ཏཾ་ས་དི་ས་ཏཱ་ཡ པ་རི་ཡཱ་ཡ་ཏོ གོ་ཏྲ་བྷུ. ཨེ་ཀ་ཙྩ་སཾ་ཀི་ལེ་ས་ཝི་སུ་དྡྷི་ཡཱ, པ་ན ཨ་ཙྩ་ནྟ་ཝི་སུ་དྡྷི་ཡཱ ཨཱ་ར་མྨ་ཎ་ཀ་ར་ཎ་ཏོ ཙ ཝོ་དཱ་ན་ནྟི ཝུ་ཙྩ་ཏི. ཏེ་ནཱ་ཧ པ་ཊྛཱ་ནེ ‘‘ཨ་ནུ་ལོ་མཾ ཝོ་དཱ་ན་སྶ ཨ་ན་ནྟ་ར་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ ༡.༡.༤༡༧). ཡ་སྨཱ པ་ན པ་ཊི་ས་མྦྷི་དཱ་མ་གྒེ ཨུ་པྤཱ་དཱ་དི་ཨ་བྷི་བྷ་ཝ་ན་ཏྠཾ ཨུ་པཱ་དཱ་ཡ ‘‘ཨ་ཊྛ གོ་ཏྲ་བྷུ་དྷ་མྨཱ ས་མཱ་དྷི་ཝ་སེ་ན ཨུ་པྤ་ཛྫ་ནྟི, ད་ས གོ་ཏྲ་བྷུ་དྷ་མྨཱ ཝི་པ་སྶ་ནཱ་ཝ་སེ་ན ཨུ་པྤ་ཛྫ་ནྟཱི’’ཏི་ཨཱ་དཱི་སུ (པ་ཊི. མ. ༡.༦༠) གོ་ཏྲ་བྷུ་ནཱ་མེ་ནེ་ཝེ་ཏཾ ཨཱ་ག་ཏཾ, ཏ་སྨཱ ཨི་དྷཱ་པི ‘‘གོ་ཏྲ་བྷུ་ཨ་ན་ནྟ་ར’’ནྟི ཝུ་ཏྟ་ནྟི ད་ཊྛ་བྦཾ.

དུ་ཏི་ཡ་ཉཱ་ཎཾ ནི་ཊྛི་ཏཾ.