སོ་ཏཱ་པ་ནྣ་པུ་གྒ་ལ་ཀ་ཐཱ་ཝ་ཎྞ་ནཱ

༨༡༡. ཏ་སྶེ་ཝ སོ་ཏཱ་པ་ཏྟི་མ་གྒ་ཙི་ཏྟ་སྶ. ཀཱ་མ་ཉྩེ་ཏྠ ནཱ་ཏི་ཏི་ཀྑ་པ་ཉྙ་སྶ དྭེ, ཏི་ཀྑ་པ་ཉྙ་སྶ ཏཱི་ཎི ཕ་ལ་ཙི་ཏྟཱ་ནི ཧོ་ནྟི, ཨ་ཝི་སེ་ས་ཏོ པ་ན ག་ཧི་ཏ་སྶ མ་གྒ་སྶ ཝ་སེ་ན ‘‘དྭེ, ཏཱི་ཎི ཝཱ’’ཏི ཝུ་ཏྟཾ. ས་མཱ་དྷི་མཱ་ན་ནྟ་རི་ཀ་ཉྙ་མཱ་ཧཱུཏི ཡཾ ཨ་ཏྟ་ནོ པ་ཝ་ཏྟི་ས་མ་ན་ནྟ་རཾ ནི་ཡ་མེ་ནེ་ཝ ཕ་ལ་པྤ་དཱ་ན་ཏོ ཨཱ་ན་ནྟ་རི་ཀ་ས་མཱ་དྷཱི་ཏི ཨཱ་ཧཱུ་ཏི ཨ་ཏྠོ. ཨ་ན་ནྟ་ར་མེ་ཝ པ་ཝ་ཏྟ་ན་ཀཾ ཕ་ལཾ ཨ་ན་ནྟ་རཾ, ཏ་ཏྠ ནི་ཡུ་ཏྟོ, ཏཾ ཝཱ པ་ཡོ་ཛ་ནཾ ཨེ་ཏ་སྶཱ་ཏི ཨཱ་ན་ནྟ་རི་ཀོ, མ་གྒོ.

ཨཱ་སེ་ཝ་ན་ནྟེཏི ཨཱ་སེ་ཝ་ན་ཏོ ཨ་ནྟེ, ཨཱ་སེ་ཝ་ན་ལཱ་བྷི་ནོ ཨ་ནུ་ལོ་མ་ཉཱ་ཎ་སྶ ཨ་ན་ནྟ་ར་ནྟི ཨ་ཏྠོ. ལ་དྡྷཱ་སེ་ཝ་ན་མེ་ཝ ཨ་ནུ་ལོ་མཾ གོ་ཏྲ་བྷུཾ ཨུ་པྤཱ་དེ་ཏི. ཨུ་པ་རི པ་ན ཚ, ས་ཏྟ ཝཱ ཛ་ཝ་ནཱ་ནི པ་ཝ་ཏྟ་ནྟི, ཏ་སྨཱ ཙ་ཏྟཱ་རི ཕ་ལ་ཙི་ཏྟཱ་ནི ཧོ་ནྟཱི་ཏི ཝ་དེ་ཡྻཱ་ཏི ཨཱ་ཧ ‘‘ས་ཏྟ་ཙི་ཏྟ་པ་ར་མཱ ཙ ཨེ་ཀཱ་ཝ་ཛྫ་ན་ཝཱི་ཐཱི’’ཏི.

ཏཾ པ་ན ན སཱ་ར་ཏོ པ་ཙྩེ་ཏ་བྦ་ནྟི ཡོ་ཛ་ནཱ. ཡཾ པ་ནེ་ཏྠ ཝ་ཏྟ་བྦཾ, ཏཾ ཧེ་ཊྛཱ ཝུ་ཏྟ་མེ་ཝ.

༨༡༢. ཨེ་ཏྟཱ་ཝ་ཏཱཏི པ་ཋ་མ་མ་གྒཱ་ན་ནྟ་རཾ ཕ་ལ་སྶ ཨུ་པྤ་ཏྟི་མ་ཀྐེ་ན. བྷུ་སཾ པ་མ་ཏྟོ་པཱིཏི དེ་ཝ་ར་ཛྫ་ཙ་ཀྐ་ཝ་ཏྟི་ར་ཛྫཱ་དི་པ་མཱ་ད་ཊྛཱ་ནཾ ཨཱ་ག་མྨ བྷུ་སཾ པ་མ་ཏྟོ་པི. ཡེ་སཾ ཡ་ཐཱ་ཝུ་ཏྟ་ཨཱ་ཝ་ཛྫ་ན་ཛ་ཝ་ན་ཙི་ཏྟཱ་ནཾ ཨུ་པྤ་ཏྟི་ཡཱ ཨེ་ས སོ་ཏཱ་པ་ནྣོ པ་ཙྩ་ཝེ་ཀྑ་ཏི ནཱ་མཱ་ཏི ཨ་དྷི་པྤཱ་ཡོ.

ཨེ་ཏེ་ནེ་ཝ པ་ས་ངྒེ་ན སེ་སཱ་ནཾ ཨ་རི་ཡཱ་ནཾ པ་ཙྩ་ཝེ་ཀྑ་ཎཱ་ནི ད་སྶེ་ཏུཾ ‘‘ཡ་ཐཱ ཙཱ’’ཏི་ཨཱ་དི ཝུ་ཏྟཾ.

ཨུ་ཀྐ་ཊྛ་པ་རི་ཙྪེ་དོ་ཡེ་ཝ ཙེ་སོ, ཡ་དི་དཾ པ་ཉྩ་ནྣཾ, ཙ་ཏུ་ནྣ་ཉྩ པ་ཙྩ་ཝེ་ཀྑ་ཎཱ་ནཾ ད་སྶ་ན་ནྟི ཨ་ཏྠོ. ‘‘ཨ་བྷཱ་ཝེ་ནེ་ཝཱ’’ཏི ཨེ་ཏེ་ན པ་ཧཱི་ནཱ་ཝ་སི་ཊྛ་ཀི་ལེ་ས་པ་ཙྩ་ཝེ་ཀྑ་ཎ་ས་མ་ཏྠ་ཏཱ ཀ་སྶ་ཙི ཧོ་ཏི, ཀ་སྶ་ཙི ན ཧོ་ཏཱི་ཏི ད་སྶེ་ཏི. ལོ་བྷོ ཨེ་ཝ ལོ་བྷ་དྷ་མྨོ.