༦. ཨཱ་ན་ནྡ་སུ་ཏྟཾ
༣༧. ཨེ་ཀཾ ས་མ་ཡཾ ཨཱ་ཡ་སྨཱ ཨཱ་ན་ནྡོ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏ་ཏྲ ཁོ ཨཱ་ཡ་སྨཱ ཨཱ་ན་ནྡོ བྷི་ཀྑཱུ ཨཱ་མ་ནྟེ་སི – ‘‘ཨཱ་ཝུ་སོ བྷི་ཀྑ་ཝེ’’ཏི. ‘‘ཨཱ་ཝུ་སོ’’ཏི ཁོ ཏེ བྷི་ཀྑཱུ ཨཱ་ཡ་སྨ་ཏོ ཨཱ་ན་ནྡ་སྶ པ་ཙྩ་སྶོ་སུཾ. ཨཱ་ཡ་སྨཱ ཨཱ་ན་ནྡོ ཨེ་ཏ་ད་ཝོ་ཙ –
‘‘ཨ་ཙྪ་རི་ཡཾ, ཨཱ་ཝུ་སོ, ཨ་བྦྷུ་ཏཾ, ཨཱ་ཝུ་སོ! ཡཱ་ཝ་ཉྩི་དཾ ཏེ་ན བྷ་ག་ཝ་ཏཱ ཛཱ་ན་ཏཱ པ་སྶ་ཏཱ ཨ་ར་ཧ་ཏཱ ས་མྨཱ་ས་མྦུ་དྡྷེ་ན ས་མྦཱ་དྷེ ཨོ་ཀཱ་སཱ་དྷི་ག་མོ ཨ་ནུ་བུ་དྡྷོ ས་ཏྟཱ་ནཾ ཝི་སུ་དྡྷི་ཡཱ སོ་ཀ་པ་རི་དེ་ཝཱ་ནཾ ས་མ་ཏི་ཀྐ་མཱ་ཡ དུ་ཀྑ་དོ་མ་ན་སྶཱ་ནཾ ཨ་ཏྠ་ངྒ་མཱ་ཡ ཉཱ་ཡ་སྶ ཨ་དྷི་ག་མཱ་ཡ ནི་བྦཱ་ན་སྶ ས་ཙྪི་ཀི་རི་ཡཱ་ཡ. ཏ་དེ་ཝ ནཱ་མ ཙ་ཀྑུཾ བྷ་ཝི་སྶ་ཏི ཏེ རཱུ་པཱ ཏ་ཉྩཱ་ཡ་ཏ་ནཾ ནོ པ་ཊི་སཾ་ཝེ་དི་སྶ་ཏི [པ་ཊི་སཾ་ཝེ་ད་ཡ་ཏི (ཀ.)]. ཏ་དེ་ཝ ནཱ་མ སོ་ཏཾ བྷ་ཝི་སྶ་ཏི ཏེ ས་དྡཱ ཏ་ཉྩཱ་ཡ་ཏ་ནཾ ནོ པ་ཊི་སཾ་ཝེ་དི་སྶ་ཏི. ཏ་དེ་ཝ ནཱ་མ གྷཱ་ནཾ བྷ་ཝི་སྶ་ཏི ཏེ ག་ནྡྷཱ ཏ་ཉྩཱ་ཡ་ཏ་ནཾ ནོ པ་ཊི་སཾ་ཝེ་དི་སྶ་ཏི. སཱ་ཝ ནཱ་མ ཛི་ཝ྄ཧཱ བྷ་ཝི་སྶ་ཏི ཏེ ར་སཱ ཏ་ཉྩཱ་ཡ་ཏ་ནཾ ནོ པ་ཊི་སཾ་ཝེ་དི་སྶ་ཏི. སོ་ཝ ནཱ་མ ཀཱ་ཡོ བྷ་ཝི་སྶ་ཏི ཏེ ཕོ་ཊྛ་བྦཱ ཏ་ཉྩཱ་ཡ་ཏ་ནཾ ནོ པ་ཊི་སཾ་ཝེ་དི་སྶ་ཏཱི’’ཏི.
ཨེ་ཝཾ ཝུ་ཏྟེ ཨཱ་ཡ་སྨཱ ཨུ་དཱ་ཡཱི ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ས་ཉྙཱི་མེ་ཝ ནུ ཁོ, ཨཱ་ཝུ་སོ ཨཱ་ན་ནྡ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏི ཨུ་དཱ་ཧུ ཨ་ས་ཉྙཱི’’ཏི? ‘‘ས་ཉྙཱི་མེ་ཝ ཁོ, ཨཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏི, ནོ ཨ་ས་ཉྙཱི’’ཏི.
‘‘ཀིཾ་ས་ཉྙཱི པ་ནཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏཱི’’ཏི? ‘‘ཨི་དྷཱ་ཝུ་སོ, བྷི་ཀྑུ, ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘ཨ་ན་ནྟོ ཨཱ་ཀཱ་སོ’ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཝཾ་ས་ཉྙཱི་པི ཁོ, ཨཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏི.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཝཾ་ས་ཉྙཱི་པི ཁོ, ཨཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏི.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཝཾ་ས་ཉྙཱི་པི ཁོ, ཨཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏཱི’’ཏི.
‘‘ཨེ་ཀ་མི་དཱ་ཧཾ, ཨཱ་ཝུ་སོ, ས་མ་ཡཾ སཱ་ཀེ་ཏེ ཝི་ཧ་རཱ་མི ཨ་ཉྫ་ན་ཝ་ནེ མི་ག་དཱ་ཡེ. ཨ་ཐ ཁོ, ཨཱ་ཝུ་སོ, ཛ་ཊི་ལ་ཝཱ་སི་ཀཱ [ཛ་ཊི་ལ་གཱ་ཧི་ཡཱ (སཱི. པཱི.), ཛ་ཌི་ལ་བྷཱ་གི་ཀཱ (སྱཱ.)] བྷི་ཀྑུ་ནཱི ཡེ་ནཱ་ཧཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ མཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏཱ ཁོ, ཨཱ་ཝུ་སོ, ཛ་ཊི་ལ་ཝཱ་སི་ཀཱ བྷི་ཀྑུ་ནཱི མཾ ཨེ་ཏ་ད་ཝོ་ཙ – ‘ཡཱ་ཡཾ, བྷ་ནྟེ ཨཱ་ན་ནྡ, ས་མཱ་དྷི ན ཙཱ་བྷི་ན་ཏོ ན ཙཱ་པ་ན་ཏོ ན ཙ ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་ག་ཏོ [ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་ཝ་ཏོ (སཱི. སྱཱ. ཀཾ. པཱི.), ས་ས་ངྑཱ་ར་ནི་གྒ་ཡ྄ཧ་ཝཱ་རི་ཝཱ་ཝ་ཊོ (ཀ.) ཨ. ནི. ༣.༡༠༢; ༥.༢༧; དཱི. ནི. ༣.༣༥༥], ཝི་མུ་ཏྟ་ཏྟཱ ཋི་ཏོ, ཋི་ཏ་ཏྟཱ ས་ནྟུ་སི་ཏོ, ས་ནྟུ་སི་ཏ་ཏྟཱ ནོ པ་རི་ཏ་སྶ་ཏི. ཨ་ཡཾ, བྷ་ནྟེ ཨཱ་ན་ནྡ, ས་མཱ་དྷི ཀིཾ་ཕ་ལོ ཝུ་ཏྟོ བྷ་ག་ཝ་ཏཱ’’’ཏི?
‘‘ཨེ་ཝཾ ཝུ་ཏྟེ, སོ་ཧཾ, ཨཱ་ཝུ་སོ, ཛ་ཊི་ལ་ཝཱ་སི་ཀཾ བྷི་ཀྑུ་ནིཾ ཨེ་ཏ་ད་ཝོ་ཙཾ – ‘ཡཱ་ཡཾ, བྷ་གི་ནི, ས་མཱ་དྷི ན ཙཱ་བྷི་ན་ཏོ ན ཙཱ་པ་ན་ཏོ ན ཙ ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་ག་ཏོ, ཝི་མུ་ཏྟ་ཏྟཱ ཋི་ཏོ, ཋི་ཏ་ཏྟཱ ས་ནྟུ་སི་ཏོ, ས་ནྟུ་སི་ཏ་ཏྟཱ ནོ པ་རི་ཏ་སྶ་ཏི. ཨ་ཡཾ, བྷ་གི་ནི, ས་མཱ་དྷི ཨ་ཉྙཱ་ཕ་ལོ ཝུ་ཏྟོ བྷ་ག་ཝ་ཏཱ’ཏི. ཨེ་ཝཾ་ས་ཉྙཱི་པི ཁོ, ཨཱ་ཝུ་སོ, ཏ་དཱ་ཡ་ཏ་ནཾ ནོ པ་ཊི་སཾ་ཝེ་དེ་ཏཱི’’ཏི. ཚ་ཊྛཾ.