༣. ནི་བྦཱ་ན་སུ་ཁ་སུ་ཏྟཾ
༣༤. ཨེ་ཀཾ ས་མ་ཡཾ ཨཱ་ཡ་སྨཱ སཱ་རི་པུ་ཏྟོ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏ་ཏྲ ཁོ ཨཱ་ཡ་སྨཱ སཱ་རི་པུ་ཏྟོ བྷི་ཀྑཱུ ཨཱ་མ་ནྟེ་སི – ‘‘སུ་ཁ་མི་དཾ, ཨཱ་ཝུ་སོ, ནི་བྦཱ་ནཾ. སུ་ཁ་མི་དཾ, ཨཱ་ཝུ་སོ, ནི་བྦཱ་ན’’ནྟི. ཨེ་ཝཾ ཝུ་ཏྟེ ཨཱ་ཡ་སྨཱ ཨུ་དཱ་ཡཱི ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ – ‘‘ཀིཾ པ་ནེ་ཏྠ, ཨཱ་ཝུ་སོ སཱ་རི་པུ་ཏྟ, སུ་ཁཾ ཡ་དེ་ཏྠ ན་ཏྠི ཝེ་ད་ཡི་ཏ’’ནྟི? ‘‘ཨེ་ཏ་དེ་ཝ ཁྭེ་ཏྠ, ཨཱ་ཝུ་སོ, སུ་ཁཾ ཡ་དེ་ཏྠ ན་ཏྠི ཝེ་ད་ཡི་ཏཾ. པ་ཉྩི་མེ, ཨཱ་ཝུ་སོ, ཀཱ་མ་གུ་ཎཱ. ཀ་ཏ་མེ པ་ཉྩ? ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ, སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན་ཝི་ཉྙེ་ཡྻཱ ག་ནྡྷཱ… ཛི་ཝ྄ཧཱ་ཝི་ཉྙེ་ཡྻཱ ར་སཱ… ཀཱ་ཡ་ཝི་ཉྙེ་ཡྻཱ ཕོ་ཊྛ་བྦཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ – ཨི་མེ ཁོ, ཨཱ་ཝུ་སོ, པ་ཉྩ ཀཱ་མ་གུ་ཎཱ. ཡཾ ཁོ, ཨཱ་ཝུ་སོ, ཨི་མེ པ་ཉྩ ཀཱ་མ་གུ་ཎེ པ་ཊི་ཙྩ ཨུ་པྤ་ཛྫ་ཏི སུ་ཁཾ སོ་མ་ན་སྶཾ, ཨི་དཾ ཝུ་ཙྩ་ཏཱ་ཝུ་སོ, ཀཱ་མ་སུ་ཁཾ.
‘‘ཨི་དྷཱ་ཝུ་སོ, བྷི་ཀྑུ ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཀཱ་མ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཀཱ་མ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཝི་ཏ་ཀྐ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཝི་ཏ་ཀྐ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ པཱི་ཏི་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ པཱི་ཏི་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཨུ་པེ་ཀྑཱ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཨུ་པེ་ཀྑཱ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ཨ་ན་ནྟོ ཨཱ་ཀཱ་སོ་ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ རཱུ་པ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ རཱུ་པ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ཨ་ན་ནྟཾ ཝི་ཉྙཱ་ཎ་ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཨཱ་ཀཱ་སཱ་ན་ཉྩཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཨཱ་ཀཱ་སཱ་ན་ཉྩཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ, ན་ཏྠི ཀི་ཉྩཱི་ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཝི་ཉྙཱ་ཎ་ཉྩཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཝི་ཉྙཱ་ཎ་ཉྩཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏ་སྶ ཙེ, ཨཱ་ཝུ་སོ, བྷི་ཀྑུ་ནོ ཨི་མི་ནཱ ཝི་ཧཱ་རེ་ན ཝི་ཧ་ར་ཏོ ཨཱ་ཀི་ཉྩ་ཉྙཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, སྭ་སྶ ཧོ་ཏི ཨཱ་བཱ་དྷོ. སེ་ཡྻ་ཐཱ་པི, ཨཱ་ཝུ་སོ, སུ་ཁི་ནོ དུ་ཀྑཾ ཨུ་པྤ་ཛྫེ་ཡྻ ཡཱ་ཝ་དེ་ཝ ཨཱ་བཱ་དྷཱ་ཡ; ཨེ་ཝ་མེ་ཝ་སྶ ཏེ ཨཱ་ཀི་ཉྩ་ཉྙཱ་ཡ་ཏ་ན་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི. སྭ་སྶ ཧོ་ཏི ཨཱ་བཱ་དྷོ. ཡོ ཁོ པ་ནཱ་ཝུ་སོ, ཨཱ་བཱ་དྷོ དུ་ཀྑ་མེ་ཏཾ ཝུ་ཏྟཾ བྷ་ག་ཝ་ཏཱ. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ནཾ.
‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་ར་ཏི, པ་ཉྙཱ་ཡ ཙ་སྶ དི་སྭཱ ཨཱ་ས་ཝཱ པ་རི་ཀྑཱི་ཎཱ ཧོ་ནྟི. ཨི་མི་ནཱ་པི ཁོ ཨེ་ཏཾ, ཨཱ་ཝུ་སོ, པ་རི་ཡཱ་ཡེ་ན ཝེ་དི་ཏ་བྦཾ ཡ་ཐཱ སུ་ཁཾ ནི་བྦཱ་ན’’ནྟི. ཏ་ཏི་ཡཾ.