༤. གཱ་ཝཱི་ཨུ་པ་མཱ་སུ་ཏྟཾ
༣༥. ‘‘སེ་ཡྻ་ཐཱ་པི, བྷི་ཀྑ་ཝེ, གཱ་ཝཱི པ་བྦ་ཏེ་ཡྻཱ བཱ་ལཱ ཨ་བྱ་ཏྟཱ ཨ་ཁེ་ཏྟ་ཉྙཱུ ཨ་ཀུ་ས་ལཱ ཝི་ས་མེ པ་བྦ་ཏེ ཙ་རི་ཏུཾ. ཏ་སྶཱ ཨེ་ཝ་མ་སྶ – ‘ཡཾ་ནཱུ་ནཱ་ཧཾ ཨ་ག་ཏ་པུ་བྦ་ཉྩེ་ཝ དི་སཾ ག་ཙྪེ་ཡྻཾ, ཨ་ཁཱ་དི་ཏ་པུ་བྦཱ་ནི ཙ ཏི་ཎཱ་ནི ཁཱ་དེ་ཡྻཾ, ཨ་པཱི་ཏ་པུ་བྦཱ་ནི ཙ པཱ་ནཱི་ཡཱ་ནི པི་ཝེ་ཡྻ’ནྟི. སཱ པུ་རི་མཾ པཱ་དཾ ན སུ་པྤ་ཏི་ཊྛི་ཏཾ པ་ཏི་ཊྛཱ་པེ་ཏྭཱ པ་ཙྪི་མཾ པཱ་དཾ ཨུ་དྡྷ་རེ་ཡྻ. སཱ ན ཙེ་ཝ ཨ་ག་ཏ་པུ་བྦཾ དི་སཾ ག་ཙྪེ་ཡྻ, ན ཙ ཨ་ཁཱ་དི་ཏ་པུ་བྦཱ་ནི ཏི་ཎཱ་ནི ཁཱ་དེ་ཡྻ, ན ཙ ཨ་པཱི་ཏ་པུ་བྦཱ་ནི པཱ་ནཱི་ཡཱ་ནི པི་ཝེ་ཡྻ; ཡ་སྨིཾ ཙ་སྶཱ པ་དེ་སེ ཋི་ཏཱ་ཡ ཨེ་ཝ་མ་སྶ – ‘ཡཾ་ནཱུ་ནཱ་ཧཾ ཨ་ག་ཏ་པུ་བྦ་ཉྩེ་ཝ དི་སཾ ག་ཙྪེ་ཡྻཾ, ཨ་ཁཱ་དི་ཏ་པུ་བྦཱ་ནི ཙ ཏི་ཎཱ་ནི ཁཱ་དེ་ཡྻཾ, ཨ་པཱི་ཏ་པུ་བྦཱ་ནི ཙ པཱ་ནཱི་ཡཱ་ནི པི་ཝེ་ཡྻ’ནྟི ཏ་ཉྩ པ་དེ་སཾ ན སོ་ཏྠི་ནཱ པ་ཙྩཱ་ག་ཙྪེ་ཡྻ. ཏཾ ཀི་སྶ ཧེ་ཏུ? ཏ་ཐཱ ཧི སཱ, བྷི་ཀྑ་ཝེ, གཱ་ཝཱི པ་བྦ་ཏེ་ཡྻཱ བཱ་ལཱ ཨ་བྱ་ཏྟཱ ཨ་ཁེ་ཏྟ་ཉྙཱུ ཨ་ཀུ་ས་ལཱ ཝི་ས་མེ པ་བྦ་ཏེ ཙ་རི་ཏུཾ. ཨེ་ཝ་མེ་ཝཾ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ བཱ་ལོ ཨ་བྱ་ཏྟོ ཨ་ཁེ་ཏྟ་ཉྙཱུ ཨ་ཀུ་ས་ལོ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི; སོ ཏཾ ནི་མི་ཏྟཾ ན ཨཱ་སེ་ཝ་ཏི ན བྷཱ་ཝེ་ཏི ན བ་ཧུ་ལཱི་ཀ་རོ་ཏི ན སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ན ས་ཀྐོ་ཏི ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ན ས་ཀྐོ་ཏི ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རི་ཏུཾ. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘བྷི་ཀྑུ ཨུ་བྷ་ཏོ བྷ་ཊྛོ ཨུ་བྷ་ཏོ པ་རི་ཧཱི་ནོ, སེ་ཡྻ་ཐཱ་པི སཱ གཱ་ཝཱི པ་བྦ་ཏེ་ཡྻཱ བཱ་ལཱ ཨ་བྱ་ཏྟཱ ཨ་ཁེ་ཏྟ་ཉྙཱུ ཨ་ཀུ་ས་ལཱ ཝི་ས་མེ པ་བྦ་ཏེ ཙ་རི་ཏུཾ’’’.
‘‘སེ་ཡྻ་ཐཱ་པི, བྷི་ཀྑ་ཝེ, གཱ་ཝཱི པ་བྦ་ཏེ་ཡྻཱ པ་ཎྜི་ཏཱ བྱ་ཏྟཱ ཁེ་ཏྟ་ཉྙཱུ ཀུ་ས་ལཱ ཝི་ས་མེ པ་བྦ་ཏེ ཙ་རི་ཏུཾ. ཏ་སྶཱ ཨེ་ཝ་མ་སྶ – ‘ཡཾ་ནཱུ་ནཱ་ཧཾ ཨ་ག་ཏ་པུ་བྦ་ཉྩེ་ཝ དི་སཾ ག་ཙྪེ་ཡྻཾ, ཨ་ཁཱ་དི་ཏ་པུ་བྦཱ་ནི ཙ ཏི་ཎཱ་ནི ཁཱ་དེ་ཡྻཾ, ཨ་པཱི་ཏ་པུ་བྦཱ་ནི ཙ པཱ་ནཱི་ཡཱ་ནི པི་ཝེ་ཡྻ’ནྟི. སཱ པུ་རི་མཾ པཱ་དཾ སུ་པྤ་ཏི་ཊྛི་ཏཾ པ་ཏི་ཊྛཱ་པེ་ཏྭཱ པ་ཙྪི་མཾ པཱ་དཾ ཨུ་དྡྷ་རེ་ཡྻ. སཱ ཨ་ག་ཏ་པུ་བྦ་ཉྩེ་ཝ དི་སཾ ག་ཙྪེ་ཡྻ, ཨ་ཁཱ་དི་ཏ་པུ་བྦཱ་ནི ཙ ཏི་ཎཱ་ནི ཁཱ་དེ་ཡྻ, ཨ་པཱི་ཏ་པུ་བྦཱ་ནི ཙ པཱ་ནཱི་ཡཱ་ནི པི་ཝེ་ཡྻ. ཡ་སྨིཾ ཙ་སྶཱ པ་དེ་སེ ཋི་ཏཱ་ཡ ཨེ་ཝ་མ་སྶ – ‘ཡཾ་ནཱུ་ནཱ་ཧཾ ཨ་ག་ཏ་པུ་བྦ་ཉྩེ་ཝ དི་སཾ ག་ཙྪེ་ཡྻཾ, ཨ་ཁཱ་དི་ཏ་པུ་བྦཱ་ནི ཙ ཏི་ཎཱ་ནི ཁཱ་དེ་ཡྻཾ, ཨ་པཱི་ཏ་པུ་བྦཱ་ནི ཙ པཱ་ནཱི་ཡཱ་ནི པི་ཝེ་ཡྻ’ནྟི ཏ་ཉྩ པ་དེ་སཾ སོ་ཏྠི་ནཱ པ་ཙྩཱ་ག་ཙྪེ་ཡྻ. ཏཾ ཀི་སྶ ཧེ་ཏུ? ཏ་ཐཱ ཧི སཱ, བྷི་ཀྑ་ཝེ, གཱ་ཝཱི པ་བྦ་ཏེ་ཡྻཱ པ་ཎྜི་ཏཱ བྱ་ཏྟཱ ཁེ་ཏྟ་ཉྙཱུ ཀུ་ས་ལཱ ཝི་ས་མེ པ་བྦ་ཏེ ཙ་རི་ཏུཾ. ཨེ་ཝ་མེ་ཝཾ ཁོ, བྷི་ཀྑ་ཝེ, ཨི་དྷེ་ཀ་ཙྩོ བྷི་ཀྑུ པ་ཎྜི་ཏོ བྱ་ཏྟོ ཁེ་ཏྟ་ཉྙཱུ ཀུ་ས་ལོ ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ ཨ་ཛ྄ཛྷ་ཏྟཾ ས་མྤ་སཱ་ད་ནཾ ཙེ་ཏ་སོ ཨེ་ཀོ་དི་བྷཱ་ཝཾ ཨ་ཝི་ཏ་ཀྐཾ ཨ་ཝི་ཙཱ་རཾ ས་མཱ་དྷི་ཛཾ པཱི་ཏི་སུ་ཁཾ དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ དུ་ཏི་ཡཾ ཛྷཱ་ནཾ ཨ་ན་བྷི་ཧིཾ་ས་མཱ་ནོ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ པཱི་ཏི་ཡཱ ཙ ཝི་རཱ་གཱ ཨུ་པེ་ཀྑ་ཀོ ཙ ཝི་ཧ་རེ་ཡྻཾ ས་ཏོ ཙ ས་མྤ་ཛཱ་ནོ, སུ་ཁ་ཉྩ ཀཱ་ཡེ་ན པ་ཊི་སཾ་ཝེ་དེ་ཡྻཾ ཡཾ ཏཾ ཨ་རི་ཡཱ ཨཱ་ཙི་ཀྑ་ནྟི – ཨུ་པེ་ཀྑ་ཀོ ས་ཏི་མཱ སུ་ཁ་ཝི་ཧཱ་རཱི་ཏི ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ཏ་ཏི་ཡཾ ཛྷཱ་ནཾ ཨ་ན་བྷི་ཧིཾ་ས་མཱ་ནོ པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ སུ་ཁ་སྶ ཙ པ་ཧཱ་ནཱ དུ་ཀྑ་སྶ ཙ པ་ཧཱ་ནཱ པུ་བྦེ་ཝ སོ་མ་ན་སྶ་དོ་མ་ན་སྶཱ་ནཾ ཨ་ཏྠ་ངྒ་མཱ ཨ་དུ་ཀྑ་མ་སུ་ཁཾ ཨུ་པེ་ཀྑཱ་ས་ཏི་པཱ་རི་སུ་དྡྷིཾ ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ཙ་ཏུ་ཏྠཾ ཛྷཱ་ནཾ ཨ་ན་བྷི་ཧིཾ་ས་མཱ་ནོ སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ཨ་ན་ནྟོ ཨཱ་ཀཱ་སོ་ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ཨ་ན་བྷི་ཧིཾ་ས་མཱ་ནོ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ …པེ… ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ཨ་ན་ནྟཾ ཝི་ཉྙཱ་ཎ་ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ཝི་ཉྙཱ་ཎ་ཉྩཱ་ཡ་ཏ་ནཾ ཨ་ན་བྷི་ཧིཾ་ས་མཱ་ནོ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ན་ཏྠི ཀི་ཉྩཱི་ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ཨཱ་ཀི་ཉྩ་ཉྙཱ་ཡ་ཏ་ནཾ ཨ་ན་བྷི་ཧིཾ་ས་མཱ་ནོ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨ་ན་བྷི་ཧིཾ་ས་མཱ་ནོ ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. སོ ཏཾ ནི་མི་ཏྟཾ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི སྭཱ་དྷི་ཊྛི་ཏཾ ཨ་དྷི་ཊྛཱ་ཏི.
‘‘ཏ་སྶ ཨེ་ཝཾ ཧོ་ཏི – ‘ཡཾ་ནཱུ་ནཱ་ཧཾ ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི. སོ ས་ཉྙཱ་ཝེ་ད་ཡི་ཏ་ནི་རོ་དྷཾ ཨ་ན་བྷི་ཧིཾ་ས་མཱ་ནོ ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་ར་ཏི.
‘‘ཡ་ཏོ ཁོ, བྷི་ཀྑ་ཝེ, བྷི་ཀྑུ ཏཾ ཏ་དེ་ཝ ས་མཱ་པ་ཏྟིཾ ས་མཱ་པ་ཛྫ་ཏི་པི ཝུ་ཊྛཱ་ཏི་པི, ཏ་སྶ མུ་དུ ཙི་ཏྟཾ ཧོ་ཏི ཀ་མྨ་ཉྙཾ. མུ་དུ་ནཱ ཀ་མྨ་ཉྙེ་ན ཙི་ཏྟེ་ན ཨ་པྤ་མཱ་ཎོ ས་མཱ་དྷི ཧོ་ཏི སུ་བྷཱ་ཝི་ཏོ. སོ ཨ་པྤ་མཱ་ཎེ་ན ས་མཱ་དྷི་ནཱ སུ་བྷཱ་ཝི་ཏེ་ན ཡ་སྶ ཡ་སྶ ཨ་བྷི་ཉྙཱ་ས་ཙྪི་ཀ་ར་ཎཱི་ཡ་སྶ དྷ་མྨ་སྶ ཙི་ཏྟཾ ཨ་བྷི་ནི་ནྣཱ་མེ་ཏི ཨ་བྷི་ཉྙཱ་ས་ཙྪི་ཀི་རི་ཡཱ་ཡ ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – ‘ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷ་ཝེ་ཡྻཾ, ཨེ་ཀོ་པི ཧུ་ཏྭཱ བ་ཧུ་དྷཱ ཨ་སྶཾ, བ་ཧུ་དྷཱ་པི ཧུ་ཏྭཱ ཨེ་ཀོ ཨ་སྶཾ…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཡྻ’ནྟི, ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – དི་བྦཱ་ཡ སོ་ཏ་དྷཱ་ཏུ་ཡཱ…པེ… ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – ‘པ་ར་ས་ཏྟཱ་ནཾ པ་ར་པུ་གྒ་ལཱ་ནཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནེ་ཡྻཾ, ས་རཱ་གཾ ཝཱ ཙི་ཏྟཾ ས་རཱ་གཾ ཙི་ཏྟ་ནྟི པ་ཛཱ་ནེ་ཡྻཾ, ཝཱི་ཏ་རཱ་གཾ ཝཱ ཙི་ཏྟཾ ཝཱི་ཏ་རཱ་གཾ ཙི་ཏྟ་ནྟི པ་ཛཱ་ནེ་ཡྻཾ, ས་དོ་སཾ ཝཱ ཙི་ཏྟཾ ས་དོ་སཾ ཙི་ཏྟ་ནྟི པ་ཛཱ་ནེ་ཡྻཾ, ཝཱི་ཏ་དོ་སཾ ཝཱ ཙི་ཏྟཾ ཝཱི་ཏ་དོ་སཾ ཙི་ཏྟ་ནྟི པ་ཛཱ་ནེ་ཡྻཾ, ས་མོ་ཧཾ ཝཱ ཙི་ཏྟཾ ས་མོ་ཧཾ ཙི་ཏྟ་ནྟི པ་ཛཱ་ནེ་ཡྻཾ, ཝཱི་ཏ་མོ་ཧཾ ཝཱ ཙི་ཏྟཾ… སཾ་ཁི་ཏྟཾ ཝཱ ཙི་ཏྟཾ… ཝི་ཀྑི་ཏྟཾ ཝཱ ཙི་ཏྟཾ… མ་ཧ་གྒ་ཏཾ ཝཱ ཙི་ཏྟཾ… ཨ་མ་ཧ་གྒ་ཏཾ ཝཱ ཙི་ཏྟཾ… ས་ཨུ་ཏྟ་རཾ ཝཱ ཙི་ཏྟཾ… ཨ་ནུ་ཏྟ་རཾ ཝཱ ཙི་ཏྟཾ… ས་མཱ་ཧི་ཏཾ ཝཱ ཙི་ཏྟཾ… ཨ་ས་མཱ་ཧི་ཏཾ ཝཱ ཙི་ཏྟཾ… ཝི་མུ་ཏྟཾ ཝཱ ཙི་ཏྟཾ… ཨ་ཝི་མུ་ཏྟཾ ཝཱ ཙི་ཏྟཾ ཨ་ཝི་མུ་ཏྟཾ ཙི་ཏྟ་ནྟི པ་ཛཱ་ནེ་ཡྻ’ནྟི, ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – ‘ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རེ་ཡྻཾ, སེ་ཡྻ་ཐི་དཾ – ཨེ་ཀ་མྤི ཛཱ་ཏིཾ དྭེ་པི ཛཱ་ཏི་ཡོ…པེ… ཨི་ཏི སཱ་ཀཱ་རཾ ས་ཨུ་དྡེ་སཾ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་རེ་ཡྻ’ནྟི, ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – ‘དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན…པེ… ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནེ་ཡྻ’ནྟི, ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ.
‘‘སོ ས་ཙེ ཨཱ་ཀ་ངྑ་ཏི – ‘ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་རེ་ཡྻ’ནྟི, ཏ་ཏྲ ཏ་ཏྲེ་ཝ ས་ཀྑི་བྷ་བྦ་ཏཾ པཱ་པུ་ཎཱ་ཏི ས་ཏི ས་ཏི ཨཱ་ཡ་ཏ་ནེ’’ཏི. ཙ་ཏུ་ཏྠཾ.