༨. དུ་ཏི་ཡ་ས་མ་ཡ་སུ་ཏྟཾ

༢༨. ཨེ་ཀཾ ས་མ་ཡཾ ས་མྦ་ཧུ་ལཱ ཐེ་རཱ བྷི་ཀྑཱུ བཱ་རཱ་ཎ་སི་ཡཾ ཝི་ཧ་ར་ནྟི ཨི་སི་པ་ཏ་ནེ མི་ག་དཱ་ཡེ. ཨ་ཐ ཁོ ཏེ་སཾ ཐེ་རཱ་ནཾ བྷི་ཀྑཱུ་ནཾ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟཱ་ནཾ མ་ཎྜ་ལ་མཱ་ལེ༹ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘‘ཀོ ནུ ཁོ, ཨཱ་ཝུ་སོ, ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི?

ཨེ་ཝཾ ཝུ་ཏྟེ ཨ་ཉྙ་ཏ་རོ བྷི་ཀྑུ ཐེ་རེ བྷི་ཀྑཱུ ཨེ་ཏ་ད་ཝོ་ཙ – ‘‘ཡ་སྨིཾ, ཨཱ་ཝུ་སོ, ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ པཱ་དེ པ་ཀྑཱ་ལེ་ཏྭཱ ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ, སོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི.

ཨེ་ཝཾ ཝུ་ཏྟེ ཨ་ཉྙ་ཏ་རོ བྷི་ཀྑུ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ན ཁོ, ཨཱ་ཝུ་སོ, སོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ. ཡ་སྨིཾ, ཨཱ་ཝུ་སོ, ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ པཱ་དེ པ་ཀྑཱ་ལེ་ཏྭཱ ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ, ཙཱ་རི་ཏྟ་ཀི་ལ་མ་ཐོ་པི་སྶ ཏ་སྨིཾ ས་མ་ཡེ ཨ་པྤ་ཊི་པྤ་སྶ་དྡྷོ ཧོ་ཏི, བྷ་ཏྟ་ཀི་ལ་མ་ཐོ་པི་སྶ ཏ་སྨིཾ ས་མ་ཡེ ཨ་པྤ་ཊི་པྤ་སྶ་དྡྷོ ཧོ་ཏི. ཏ་སྨཱ སོ ཨ་ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ. ཡ་སྨིཾ, ཨཱ་ཝུ་སོ, ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཝི་ཧཱ་ར་པ་ཙྪཱ་ཡཱ་ཡཾ ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ, སོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི.

ཨེ་ཝཾ ཝུ་ཏྟེ ཨ་ཉྙ་ཏ་རོ བྷི་ཀྑུ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ན ཁོ, ཨཱ་ཝུ་སོ, སོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ. ཡ་སྨིཾ, ཨཱ་ཝུ་སོ, ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཝི་ཧཱ་ར་པ་ཙྪཱ་ཡཱ་ཡཾ ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ, ཡ་དེ་ཝ་སྶ དི་ཝཱ ས་མཱ་དྷི་ནི་མི་ཏྟཾ མ་ན་སི་ཀ་ཏཾ ཧོ་ཏི ཏ་དེ་ཝ་སྶ ཏ་སྨིཾ ས་མ་ཡེ ས་མུ་དཱ་ཙ་ར་ཏི. ཏ་སྨཱ སོ ཨ་ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ. ཡ་སྨིཾ, ཨཱ་ཝུ་སོ, ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ ར་ཏྟི་ཡཱ པ་ཙྩཱུ་ས་ས་མ་ཡཾ པ་ཙྩུ་ཊྛཱ་ཡ ནི་སི་ནྣོ ཧོ་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ, སོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུ’’ནྟི.

ཨེ་ཝཾ ཝུ་ཏྟེ ཨཱ་ཡ་སྨཱ མ་ཧཱ་ཀ་ཙྩཱ་ནོ ཐེ་རེ བྷི་ཀྑཱུ ཨེ་ཏ་ད་ཝོ་ཙ – ‘‘ས་མྨུ་ཁཱ མེ་ཏཾ, ཨཱ་ཝུ་སོ, བྷ་ག་ཝ་ཏོ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ – ‘ཚ་ཡི་མེ, བྷི་ཀྑུ, ས་མ་ཡཱ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ’’’.

‘‘ཀ་ཏ་མེ ཚ? ཨི་དྷ, བྷི་ཀྑུ, ཡ་སྨིཾ ས་མ་ཡེ བྷི་ཀྑུ ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཏ་སྨིཾ ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ ཨུ་པ་ས་ངྐ་མི་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཧཾ ཁོ, ཨཱ་ཝུ་སོ, ཀཱ་མ་རཱ་ག་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་རཱ་མི ཀཱ་མ་རཱ་ག་པ་རེ་ཏེ་ན, ཨུ་པྤ་ནྣ་སྶ ཙ ཀཱ་མ་རཱ་ག་སྶ ནི་སྶ་ར་ཎཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་མི. སཱ་དྷུ ཝ་ཏ མེ ཨཱ་ཡ་སྨཱ ཀཱ་མ་རཱ་ག་སྶ པ་ཧཱ་ནཱ་ཡ དྷ་མྨཾ དེ་སེ་ཏཱུ’ཏི. ཏ་སྶ མ་ནོ་བྷཱ་ཝ་ནཱི་ཡོ བྷི་ཀྑུ ཀཱ་མ་རཱ་ག་སྶ པ་ཧཱ་ནཱ་ཡ དྷ་མྨཾ དེ་སེ་ཏི. ཨ་ཡཾ, བྷི་ཀྑུ, པ་ཋ་མོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ.

‘‘པུ་ན ཙ་པ་རཾ, བྷི་ཀྑུ, ཡ་སྨིཾ ས་མ་ཡེ བྷི་ཀྑུ བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི…པེ… ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི… ཨུ་དྡྷ་ཙྩ་ཀུ་ཀྐུ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི… ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ ཝི་ཧ་ར་ཏི… ཡཾ ནི་མི་ཏྟཾ ཨཱ་ག་མྨ ཡཾ ནི་མི་ཏྟཾ མ་ན་སི་ཀ་རོ་ཏོ ཨ་ན་ནྟ་རཱ ཨཱ་ས་ཝཱ་ནཾ ཁ་ཡོ ཧོ་ཏི, ཏཾ ནི་མི་ཏྟཾ ན ཛཱ་ནཱ་ཏི ན པ་སྶ་ཏི, ཏ་སྨིཾ ས་མ་ཡེ མ་ནོ་བྷཱ་ཝ་ནཱི་ཡོ བྷི་ཀྑུ ཨུ་པ་ས་ངྐ་མི་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཧཾ ཁོ, ཨཱ་ཝུ་སོ, ཡཾ ནི་མི་ཏྟཾ ཨཱ་ག་མྨ ཡཾ ནི་མི་ཏྟཾ མ་ན་སི་ཀ་རོ་ཏོ ཨ་ན་ནྟ་རཱ ཨཱ་ས་ཝཱ་ནཾ ཁ་ཡོ ཧོ་ཏི ཏཾ ནི་མི་ཏྟཾ ན ཛཱ་ནཱ་མི ན པ་སྶཱ་མི. སཱ་དྷུ ཝ་ཏ མེ ཨཱ་ཡ་སྨཱ ཨཱ་ས་ཝཱ་ནཾ ཁ་ཡཱ་ཡ དྷ་མྨཾ དེ་སེ་ཏཱུ’ཏི. ཏ་སྶ མ་ནོ་བྷཱ་ཝ་ནཱི་ཡོ བྷི་ཀྑུ ཨཱ་ས་ཝཱ་ནཾ ཁ་ཡཱ་ཡ དྷ་མྨཾ དེ་སེ་ཏི. ཨ་ཡཾ, བྷི་ཀྑུ, ཚ་ཊྛོ ས་མ་ཡོ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུཾ.

‘‘ས་མྨུ་ཁཱ མེ་ཏཾ, ཨཱ་ཝུ་སོ, བྷ་ག་ཝ་ཏོ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ – ‘ཨི་མེ ཁོ, བྷི་ཀྑུ, ཚ ས་མ་ཡཱ མ་ནོ་བྷཱ་ཝ་ནཱི་ཡ་སྶ བྷི་ཀྑུ་ནོ ད་སྶ་ནཱ་ཡ ཨུ་པ་ས་ངྐ་མི་ཏུ’’’ནྟི. ཨ་ཊྛ་མཾ.