༦. ཀཱ་ལ་དཱ་ན་སུ་ཏྟཾ

༣༦. ‘‘པ་ཉྩི་མཱ་ནི, བྷི་ཀྑ་ཝེ, ཀཱ་ལ་དཱ་ནཱ་ནི. ཀ་ཏ་མཱ་ནི པ་ཉྩ? ཨཱ་ག་ནྟུ་ཀ་སྶ དཱ་ནཾ དེ་ཏི; ག་མི་ཀ་སྶ དཱ་ནཾ དེ་ཏི; གི་ལཱ་ན་སྶ དཱ་ནཾ དེ་ཏི; དུ་བྦྷི་ཀྑེ དཱ་ནཾ དེ་ཏི; ཡཱ་ནི ཏཱ་ནི ན་ཝ་ས་སྶཱ་ནི ན་ཝ་ཕ་ལཱ་ནི ཏཱ་ནི པ་ཋ་མཾ སཱི་ལ་ཝ་ནྟེ་སུ པ་ཏི་ཊྛཱ་པེ་ཏི. ཨི་མཱ་ནི ཁོ, བྷི་ཀྑ་ཝེ, པ་ཉྩ ཀཱ་ལ་དཱ་ནཱ་ནཱི’’ཏི.

‘‘ཀཱ་ལེ ད་ད་ནྟི ས་པྤ་ཉྙཱ, ཝ་ད་ཉྙཱུ ཝཱི་ཏ་མ་ཙྪ་རཱ;

ཀཱ་ལེ་ན དི་ནྣཾ ཨ་རི་ཡེ་སུ, ཨུ་ཛུ་བྷཱུ་ཏེ་སུ ཏཱ་དི་སུ.

‘‘ཝི་པྤ་ས་ནྣ་མ་ནཱ ཏ་སྶ, ཝི་པུ་ལཱ ཧོ་ཏི ད་ཀྑི་ཎཱ;

ཡེ ཏ་ཏྠ ཨ་ནུ་མོ་ད་ནྟི, ཝེ་ཡྻཱ་ཝ་ཙྩཾ ཀ་རོ་ནྟི ཝཱ;

ན ཏེ་ན [ན ཏེ་སཾ (པཱི. ཀ.)] ད་ཀྑི་ཎཱ ཨཱུ་ནཱ, ཏེ་པི པུ་ཉྙ་སྶ བྷཱ་གི་ནོ.

‘‘ཏ་སྨཱ ད་དེ ཨ་པྤ་ཊི་ཝཱ་ན་ཙི་ཏྟོ, ཡ་ཏྠ དི་ནྣཾ མ་ཧ་པྥ་ལཾ;

པུ་ཉྙཱ་ནི པ་ར་ལོ་ཀ་སྨིཾ, པ་ཏི་ཊྛཱ ཧོ་ནྟི པཱ་ཎི་ན’’ནྟི. ཚ་ཊྛཾ;