༨. དུ་ཏི་ཡ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟཾ

༡༢༨. ‘‘ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཙ་ཏྟཱ་རོ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ པཱ་ཏུ་བྷ་ཝ་ནྟི. ཀ་ཏ་མེ ཙ་ཏྟཱ་རོ? ཨཱ་ལ་ཡཱ་རཱ་མཱ [ཨཱ་ལ་ཡ་རཱ་མཱ (ཨ་ཉྙ་སུ་ཏྟེ་སུ)], བྷི་ཀྑ་ཝེ, པ་ཛཱ ཨཱ་ལ་ཡ་ར་ཏཱ ཨཱ་ལ་ཡ་ས་མྨུ་དི་ཏཱ; སཱ ཏ་ཐཱ་ག་ཏེ་ན ཨ་ནཱ་ལ་ཡེ དྷ་མྨེ དེ་སི་ཡ་མཱ་ནེ སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཨ་ཡཾ པ་ཋ་མོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པཱ་ཏུ་བྷ་ཝ་ཏི.

‘‘མཱ་ནཱ་རཱ་མཱ, བྷི་ཀྑ་ཝེ, པ་ཛཱ མཱ་ན་ར་ཏཱ མཱ་ན་ས་མྨུ་དི་ཏཱ. སཱ ཏ་ཐཱ་ག་ཏེ་ན མཱ་ན་ཝི་ན་ཡེ དྷ་མྨེ དེ་སི་ཡ་མཱ་ནེ སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཨ་ཡཾ དུ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པཱ་ཏུ་བྷ་ཝ་ཏི.

‘‘ཨ་ནུ་པ་ས་མཱ་རཱ་མཱ, བྷི་ཀྑ་ཝེ, པ་ཛཱ ཨ་ནུ་པ་ས་མ་ར་ཏཱ ཨ་ནུ་པ་ས་མ་ས་མྨུ་དི་ཏཱ. སཱ ཏ་ཐཱ་ག་ཏེ་ན ཨོ་པ་ས་མི་ཀེ དྷ་མྨེ དེ་སི་ཡ་མཱ་ནེ སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཨ་ཡཾ ཏ་ཏི་ཡོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པཱ་ཏུ་བྷ་ཝ་ཏི.

‘‘ཨ་ཝི་ཛྫཱ་ག་ཏཱ, བྷི་ཀྑ་ཝེ, པ་ཛཱ ཨ་ཎྜ་བྷཱུ་ཏཱ པ་རི་ཡོ་ན་དྡྷཱ. སཱ ཏ་ཐཱ་ག་ཏེ་ན ཨ་ཝི་ཛྫཱ་ཝི་ན་ཡེ དྷ་མྨེ དེ་སི་ཡ་མཱ་ནེ སུ་སྶཱུ་ས་ཏི སོ་ཏཾ ཨོ་ད་ཧ་ཏི ཨ་ཉྙཱ ཙི་ཏྟཾ ཨུ་པ་ཊྛ་པེ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཨ་ཡཾ ཙ་ཏུ་ཏྠོ ཨ་ཙྪ་རི་ཡོ ཨ་བྦྷུ་ཏོ དྷ་མྨོ པཱ་ཏུ་བྷ་ཝ་ཏི. ཏ་ཐཱ་ག་ཏ་སྶ, བྷི་ཀྑ་ཝེ, ཨ་ར་ཧ་ཏོ ས་མྨཱ་ས་མྦུ་དྡྷ་སྶ པཱ་ཏུ་བྷཱ་ཝཱ ཨི་མེ ཙ་ཏྟཱ་རོ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ པཱ་ཏུ་བྷ་ཝ་ནྟཱི’’ཏི. ཨ་ཊྛ་མཾ.