༩. ཨཱ་ན་ནྡ་ཨ་ཙྪ་རི་ཡ་སུ་ཏྟཾ

༡༢༩. ‘‘ཙ་ཏྟཱ་རོ་མེ, བྷི་ཀྑ་ཝེ, ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ ཨཱ་ན་ནྡེ. ཀ་ཏ་མེ ཙ་ཏྟཱ་རོ? ས་ཙེ, བྷི་ཀྑ་ཝེ, བྷི་ཀྑུ་པ་རི་སཱ ཨཱ་ན་ནྡཾ ད་སྶ་ནཱ་ཡ ཨུ་པ་ས་ངྐ་མ་ཏི, ད་སྶ་ནེ་ན་པི སཱ ཨ་ཏྟ་མ་ནཱ ཧོ་ཏི. ཏ་ཏྲ ཙེ ཨཱ་ན་ནྡོ དྷ་མྨཾ བྷཱ་ས་ཏི, བྷཱ་སི་ཏེ་ན་པི སཱ ཨ་ཏྟ་མ་ནཱ ཧོ་ཏི. ཨ་ཏི་ཏྟཱ་ཝ, བྷི་ཀྑ་ཝེ, བྷི་ཀྑུ་པ་རི་སཱ ཧོ་ཏི, ཨ་ཐ ཨཱ་ན་ནྡོ ཏུ་ཎྷཱི བྷ་ཝ་ཏི.

‘‘ས་ཙེ, བྷི་ཀྑ་ཝེ, བྷི་ཀྑུ་ནི་པ་རི་སཱ ཨཱ་ན་ནྡཾ ད་སྶ་ནཱ་ཡ ཨུ་པ་ས་ངྐ་མ་ཏི, ད་སྶ་ནེ་ན་པི སཱ ཨ་ཏྟ་མ་ནཱ ཧོ་ཏི. ཏ་ཏྠ ཙེ ཨཱ་ན་ནྡོ དྷ་མྨཾ བྷཱ་ས་ཏི, བྷཱ་སི་ཏེ་ན་པི སཱ ཨ་ཏྟ་མ་ནཱ ཧོ་ཏི. ཨ་ཏི་ཏྟཱ་ཝ, བྷི་ཀྑ་ཝེ, བྷི་ཀྑུ་ནི་པ་རི་སཱ ཧོ་ཏི, ཨ་ཐ ཨཱ་ན་ནྡོ ཏུ་ཎྷཱི བྷ་ཝ་ཏི.

‘‘ས་ཙེ, བྷི་ཀྑ་ཝེ, ཨུ་པཱ་ས་ཀ་པ་རི་སཱ ཨཱ་ན་ནྡཾ ད་སྶ་ནཱ་ཡ ཨུ་པ་ས་ངྐ་མ་ཏི, ད་སྶ་ནེ་ན་པི སཱ ཨ་ཏྟ་མ་ནཱ ཧོ་ཏི. ཏ་ཏྲ ཙེ ཨཱ་ན་ནྡོ དྷ་མྨཾ བྷཱ་ས་ཏི, བྷཱ་སི་ཏེ་ན་པི སཱ ཨ་ཏྟ་མ་ནཱ ཧོ་ཏི. ཨ་ཏི་ཏྟཱ་ཝ, བྷི་ཀྑ་ཝེ, ཨུ་པཱ་ས་ཀ་པ་རི་སཱ ཧོ་ཏི, ཨ་ཐ ཨཱ་ན་ནྡོ ཏུ་ཎྷཱི བྷ་ཝ་ཏི.

‘‘ས་ཙེ, བྷི་ཀྑ་ཝེ, ཨུ་པཱ་སི་ཀཱ་པ་རི་སཱ ཨཱ་ན་ནྡཾ ད་སྶ་ནཱ་ཡ ཨུ་པ་ས་ངྐ་མ་ཏི, ད་སྶ་ནེ་ན་པི སཱ ཨ་ཏྟ་མ་ནཱ ཧོ་ཏི. ཏ་ཏྲ ཙེ ཨཱ་ན་ནྡོ དྷ་མྨཾ བྷཱ་ས་ཏི, བྷཱ་སི་ཏེ་ན་པི སཱ ཨ་ཏྟ་མ་ནཱ ཧོ་ཏི. ཨ་ཏི་ཏྟཱ་ཝ, བྷི་ཀྑ་ཝེ, ཨུ་པཱ་སི་ཀཱ་པ་རི་སཱ ཧོ་ཏི, ཨ་ཐ ཨཱ་ན་ནྡོ ཏུ་ཎྷཱི བྷ་ཝ་ཏི. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨ་ཙྪ་རི་ཡཱ ཨ་བྦྷུ་ཏཱ དྷ་མྨཱ ཨཱ་ན་ནྡེ’’ཏི. ན་ཝ་མཾ.