༡༠. པ་རི་བྦཱ་ཛ་ཀ་སུ་ཏྟཾ
༣༠. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ པ་རི་བྦཱ་ཛ་ཀཱ སི་པྤི་ནི་ཀཱ་ཏཱི་རེ [ས་པྤི་ནི་ཡཱ ཏཱི་རེ (སཱི. པཱི.), སི་པྤི་ནི་ཡཱ ཏཱི་རེ (སྱཱ. ཀཾ.), སི་པྤི་ནི་ཡཱ ན་དི་ཡཱ ཏཱི་རེ (ཀ.)] པ་རི་བྦཱ་ཛ་ཀཱ་རཱ་མེ པ་ཊི་ཝ་ས་ནྟི, སེ་ཡྻ་ཐི་དཾ ཨ་ནྣ་བྷཱ་རོ ཝ་ར་དྷ་རོ ས་ཀུ་ལུ་དཱ་ཡཱི ཙ པ་རི་བྦཱ་ཛ་ཀོ ཨ་ཉྙེ ཙ ཨ་བྷི་ཉྙཱ་ཏཱ ཨ་བྷི་ཉྙཱ་ཏཱ པ་རི་བྦཱ་ཛ་ཀཱ. ཨ་ཐ ཁོ བྷ་ག་ཝཱ སཱ་ཡ་ནྷ་ས་མ་ཡཾ པ་ཊི་ས་ལླཱ་ནཱ ཝུ་ཊྛི་ཏོ ཡེ་ན སི་པྤི་ནི་ཀཱ་ཏཱི་རཾ པ་རི་བྦཱ་ཛ་ཀཱ་རཱ་མོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ནི་ས་ཛྫ ཁོ བྷ་ག་ཝཱ ཏེ པ་རི་བྦཱ་ཛ་ཀེ ཨེ་ཏ་ད་ཝོ་ཙ –
‘‘ཙ་ཏྟཱ་རི་མཱ་ནི, པ་རི་བྦཱ་ཛ་ཀཱ, དྷ་མྨ་པ་དཱ་ནི ཨ་གྒ་ཉྙཱ་ནི ར་ཏྟ་ཉྙཱ་ནི ཝཾ་ས་ཉྙཱ་ནི པོ་རཱ་ཎཱ་ནི ཨ་སཾ་ཀི་ཎྞཱ་ནི ཨ་སཾ་ཀི་ཎྞ་པུ་བྦཱ་ནི, ན སཾ་ཀཱི་ཡ་ནྟི ན སཾ་ཀཱི་ཡི་སྶ་ནྟི, ཨ་པྤ་ཊི་ཀུ་ཊྛཱ་ནི ས་མ་ཎེ་ཧི བྲཱ་ཧྨ་ཎེ་ཧི ཝི་ཉྙཱུ་ཧི. ཀ་ཏ་མཱ་ནི ཙ་ཏྟཱ་རི? ཨ་ན་བྷི་ཛ྄ཛྷཱ, པ་རི་བྦཱ་ཛ་ཀཱ, དྷ་མྨ་པ་དཾ ཨ་གྒ་ཉྙཾ ར་ཏྟ་ཉྙཾ ཝཾ་ས་ཉྙཾ པོ་རཱ་ཎཾ ཨ་སཾ་ཀི་ཎྞཾ ཨ་སཾ་ཀི་ཎྞ་པུ་བྦཾ, ན སཾ་ཀཱི་ཡ་ཏི ན སཾ་ཀཱི་ཡི་སྶ་ཏི, ཨ་པྤ་ཊི་ཀུ་ཊྛཾ ས་མ་ཎེ་ཧི བྲཱ་ཧྨ་ཎེ་ཧི ཝི་ཉྙཱུ་ཧི. ཨ་བྱཱ་པཱ་དོ, པ་རི་བྦཱ་ཛ་ཀཱ, དྷ་མྨ་པ་དཾ…པེ… ས་མྨཱ་ས་ཏི, པ་རི་བྦཱ་ཛ་ཀཱ, དྷ་མྨ་པ་དཾ…པེ… ས་མྨཱ་ས་མཱ་དྷི, པ་རི་བྦཱ་ཛ་ཀཱ, དྷ་མྨ་པ་དཾ ཨ་གྒ་ཉྙཾ ར་ཏྟ་ཉྙཾ ཝཾ་ས་ཉྙཾ པོ་རཱ་ཎཾ ཨ་སཾ་ཀི་ཎྞཾ ཨ་སཾ་ཀི་ཎྞ་པུ་བྦཾ, ན སཾ་ཀཱི་ཡ་ཏི ན སཾ་ཀཱི་ཡི་སྶ་ཏི, ཨ་པྤ་ཊི་ཀུ་ཊྛཾ ས་མ་ཎེ་ཧི བྲཱ་ཧྨ་ཎེ་ཧི ཝི་ཉྙཱུ་ཧི. ཨི་མཱ་ནི ཁོ, པ་རི་བྦཱ་ཛ་ཀཱ, ཙ་ཏྟཱ་རི དྷ་མྨ་པ་དཱ་ནི ཨ་གྒ་ཉྙཱ་ནི ར་ཏྟ་ཉྙཱ་ནི ཝཾ་ས་ཉྙཱ་ནི པོ་རཱ་ཎཱ་ནི ཨ་སཾ་ཀི་ཎྞཱ་ནི ཨ་སཾ་ཀི་ཎྞ་པུ་བྦཱ་ནི, ན སཾ་ཀཱི་ཡ་ནྟི ན སཾ་ཀཱི་ཡི་སྶ་ནྟི, ཨ་པྤ་ཊི་ཀུ་ཊྛཱ་ནི ས་མ་ཎེ་ཧི བྲཱ་ཧྨ་ཎེ་ཧི ཝི་ཉྙཱུ་ཧི.
‘‘ཡོ ཁོ, པ་རི་བྦཱ་ཛ་ཀཱ, ཨེ་ཝཾ ཝ་དེ་ཡྻ – ‘ཨ་ཧ་མེ་ཏཾ ཨ་ན་བྷི་ཛ྄ཛྷཾ དྷ་མྨ་པ་དཾ པ་ཙྩ་ཀྑཱ་ཡ ཨ་བྷི་ཛ྄ཛྷཱ་ལུཾ ཀཱ་མེ་སུ ཏི་བྦ་སཱ་རཱ་གཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶཱ་མཱི’ཏི, ཏ་མ་ཧཾ ཏ་ཏྠ ཨེ་ཝཾ ཝ་དེ་ཡྻཾ – ‘ཨེ་ཏུ ཝ་ད་ཏུ བྱཱ་ཧ་ར་ཏུ པ་སྶཱ་མི་སྶཱ་ནུ་བྷཱ་ཝ’ནྟི. སོ ཝ་ཏ, པ་རི་བྦཱ་ཛ་ཀཱ, ཨ་ན་བྷི་ཛ྄ཛྷཾ དྷ་མྨ་པ་དཾ པ་ཙྩ་ཀྑཱ་ཡ ཨ་བྷི་ཛ྄ཛྷཱ་ལུཾ ཀཱ་མེ་སུ ཏི་བྦ་སཱ་རཱ་གཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཡོ ཁོ, པ་རི་བྦཱ་ཛ་ཀཱ, ཨེ་ཝཾ ཝ་དེ་ཡྻ – ‘ཨ་ཧ་མེ་ཏཾ ཨ་བྱཱ་པཱ་དཾ དྷ་མྨ་པ་དཾ པ་ཙྩ་ཀྑཱ་ཡ བྱཱ་པ་ནྣ་ཙི་ཏྟཾ པ་དུ་ཊྛ་མ་ན་ས་ངྐ་པྤཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶཱ་མཱི’ཏི, ཏ་མ་ཧཾ ཏ་ཏྠ ཨེ་ཝཾ ཝ་དེ་ཡྻཾ – ‘ཨེ་ཏུ ཝ་ད་ཏུ བྱཱ་ཧ་ར་ཏུ པ་སྶཱ་མི་སྶཱ་ནུ་བྷཱ་ཝ’ནྟི. སོ ཝ་ཏ, པ་རི་བྦཱ་ཛ་ཀཱ, ཨ་བྱཱ་པཱ་དཾ དྷ་མྨ་པ་དཾ པ་ཙྩ་ཀྑཱ་ཡ བྱཱ་པ་ནྣ་ཙི་ཏྟཾ པ་དུ་ཊྛ་མ་ན་ས་ངྐ་པྤཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཡོ ཁོ, པ་རི་བྦཱ་ཛ་ཀཱ, ཨེ་ཝཾ ཝ་དེ་ཡྻ – ‘ཨ་ཧ་མེ་ཏཾ ས་མྨཱ་ས་ཏིཾ དྷ་མྨ་པ་དཾ པ་ཙྩ་ཀྑཱ་ཡ མུ་ཊྛ་སྶ་ཏིཾ ཨ་ས་མྤ་ཛཱ་ནཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶཱ་མཱི’ཏི, ཏ་མ་ཧཾ ཏ་ཏྠ ཨེ་ཝཾ ཝ་དེ་ཡྻཾ – ‘ཨེ་ཏུ ཝ་ད་ཏུ བྱཱ་ཧ་ར་ཏུ པ་སྶཱ་མི་སྶཱ་ནུ་བྷཱ་ཝ’ནྟི. སོ ཝ་ཏ, པ་རི་བྦཱ་ཛ་ཀཱ, ས་མྨཱ་ས་ཏིཾ དྷ་མྨ་པ་དཾ པ་ཙྩ་ཀྑཱ་ཡ མུ་ཊྛ་སྶ་ཏིཾ ཨ་ས་མྤ་ཛཱ་ནཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཡོ ཁོ, པ་རི་བྦཱ་ཛ་ཀཱ, ཨེ་ཝཾ ཝ་དེ་ཡྻ – ‘ཨ་ཧ་མེ་ཏཾ ས་མྨཱ་ས་མཱ་དྷིཾ དྷ་མྨ་པ་དཾ པ་ཙྩ་ཀྑཱ་ཡ ཨ་ས་མཱ་ཧི་ཏཾ ཝི་བྦྷ་ནྟ་ཙི་ཏྟཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶཱ་མཱི’ཏི, ཏ་མ་ཧཾ ཏ་ཏྠ ཨེ་ཝཾ ཝ་དེ་ཡྻཾ – ‘ཨེ་ཏུ ཝ་ད་ཏུ བྱཱ་ཧ་ར་ཏུ པ་སྶཱ་མི་སྶཱ་ནུ་བྷཱ་ཝ’ནྟི. སོ ཝ་ཏ, པ་རི་བྦཱ་ཛ་ཀཱ, ས་མྨཱ་ས་མཱ་དྷིཾ དྷ་མྨ་པ་དཾ པ་ཙྩ་ཀྑཱ་ཡ ཨ་ས་མཱ་ཧི་ཏཾ ཝི་བྦྷ་ནྟ་ཙི་ཏྟཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་ཉྙཱ་པེ་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི.
‘‘ཡོ ཁོ, པ་རི་བྦཱ་ཛ་ཀཱ, ཨི་མཱ་ནི ཙ་ཏྟཱ་རི དྷ་མྨ་པ་དཱ་ནི ག་ར་ཧི་ཏ་བྦཾ པ་ཊི་ཀྐོ་སི་ཏ་བྦཾ མ་ཉྙེ་ཡྻ, ཏ་སྶ དི་ཊྛེ་ཝ དྷ་མྨེ ཙ་ཏྟཱ་རོ ས་ཧ་དྷ་མྨི་ཀཱ ཝཱ་དཱ་ནུ་པཱ་ཏཱ གཱ་ར་ཡ྄ཧཱ ཋཱ་ནཱ [ཝཱ་དཱ་ནུ་ཝཱ་དཱ གཱ་ར་ཡ྄ཧཾ ཋཱ་ནཾ (མ. ནི. ༣.༨)] ཨཱ་ག་ཙྪ་ནྟི. ཀ་ཏ་མེ ཙ་ཏྟཱ་རོ? ཨ་ན་བྷི་ཛ྄ཛྷཾ ཙེ བྷ་ཝཾ དྷ་མྨ་པ་དཾ ག་ར་ཧ་ཏི པ་ཊི་ཀྐོ་ས་ཏི, ཡེ ཙ ཧི [ཡེ ཙ (མ. ནི. ༣.༡༤༢-༡༤༣)] ཨ་བྷི་ཛ྄ཛྷཱ་ལཱུ ཀཱ་མེ་སུ ཏི་བྦ་སཱ་རཱ་གཱ ས་མ་ཎ་བྲཱ་ཧྨ་ཎཱ ཏེ བྷོ་ཏོ པུ་ཛྫཱ ཏེ བྷོ་ཏོ པཱ་སཾ་སཱ. ཨ་བྱཱ་པཱ་དཾ ཙེ བྷ་ཝཾ དྷ་མྨ་པ་དཾ ག་ར་ཧ་ཏི པ་ཊི་ཀྐོ་ས་ཏི, ཡེ ཙ ཧི བྱཱ་པ་ནྣ་ཙི་ཏྟཱ པ་དུ་ཊྛ་མ་ན་ས་ངྐ་པྤཱ ས་མ་ཎ་བྲཱ་ཧྨ་ཎཱ ཏེ བྷོ་ཏོ པུ་ཛྫཱ ཏེ བྷོ་ཏོ པཱ་སཾ་སཱ. ས་མྨཱ་ས་ཏིཾ ཙེ བྷ་ཝཾ དྷ་མྨ་པ་དཾ ག་ར་ཧ་ཏི པ་ཊི་ཀྐོ་ས་ཏི, ཡེ ཙ ཧི མུ་ཊྛ་སྶ་ཏཱི ཨ་ས་མྤ་ཛཱ་ནཱ ས་མ་ཎ་བྲཱ་ཧྨ་ཎཱ ཏེ བྷོ་ཏོ པུ་ཛྫཱ ཏེ བྷོ་ཏོ པཱ་སཾ་སཱ. ས་མྨཱ་ས་མཱ་དྷིཾ ཙེ བྷ་ཝཾ དྷ་མྨ་པ་དཾ ག་ར་ཧ་ཏི པ་ཊི་ཀྐོ་ས་ཏི, ཡེ ཙ ཧི ཨ་ས་མཱ་ཧི་ཏཱ ཝི་བྦྷ་ནྟ་ཙི་ཏྟཱ ས་མ་ཎ་བྲཱ་ཧྨ་ཎཱ ཏེ བྷོ་ཏོ པུ་ཛྫཱ ཏེ བྷོ་ཏོ པཱ་སཾ་སཱ.
‘‘ཡོ ཁོ, པ་རི་བྦཱ་ཛ་ཀཱ, ཨི་མཱ་ནི ཙ་ཏྟཱ་རི དྷ་མྨ་པ་དཱ་ནི ག་ར་ཧི་ཏ་བྦཾ པ་ཊི་ཀྐོ་སི་ཏ་བྦཾ མ་ཉྙེ་ཡྻ, ཏ་སྶ དི་ཊྛེ་ཝ དྷ་མྨེ ཨི་མེ ཙ་ཏྟཱ་རོ ས་ཧ་དྷ་མྨི་ཀཱ ཝཱ་དཱ་ནུ་པཱ་ཏཱ གཱ་ར་ཡ྄ཧཱ ཋཱ་ནཱ ཨཱ་ག་ཙྪ་ནྟི. ཡེ་པི ཏེ པ་རི་བྦཱ་ཛ་ཀཱ ཨ་ཧེ་སུཾ ཨུ་ཀྐ་ལཱ ཝ་སྶ་བྷ་ཉྙཱ [ཝ་སྶ་བྷི་ཉྙཱ (ཀ.) སཾ. ནི. ༣.༦༢ པ་སྶི་ཏ་བྦཾ] ཨ་ཧེ་ཏུ་ཀ་ཝཱ་དཱ ཨ་ཀི་རི་ཡ་ཝཱ་དཱ ན་ཏྠི་ཀ་ཝཱ་དཱ, ཏེ་པི ཨི་མཱ་ནི ཙ་ཏྟཱ་རི དྷ་མྨ་པ་དཱ་ནི ན ག་ར་ཧི་ཏ་བྦཾ ན པ་ཊི་ཀྐོ་སི་ཏ་བྦཾ ཨ་མ་ཉྙིཾ་སུ. ཏཾ ཀི་སྶ ཧེ་ཏུ? ནི་ནྡཱ་བྱཱ་རོ་ས་ན་ཨུ་པཱ་ར་མྦྷ་བྷ་ཡཱ’’ཏི [ཨུ་པ་ཝཱ་ད་བྷ་ཡཱ་ཏི (ཀ.) མ. ནི. ༣.༡༥༠; སཾ. ནི. ༣.༦༢ པ་སྶི་ཏ་བྦཾ].
‘‘ཨ་བྱཱ་པ་ནྣོ ས་དཱ ས་ཏོ, ཨ་ཛ྄ཛྷ་ཏྟཾ སུ་ས་མཱ་ཧི་ཏོ;
ཨ་བྷི་ཛ྄ཛྷཱ་ཝི་ན་ཡེ སི་ཀྑཾ, ཨ་པྤ་མ་ཏྟོ་ཏི ཝུ་ཙྩ་ཏཱི’’ཏི. ད་ས་མཾ;
ཨུ་རུ་ཝེ་ལ་ཝ་གྒོ ཏ་ཏི་ཡོ.