༩. ཨ་ཀུ་ས་ལ་མཱུ་ལ་སུ་ཏྟཾ
༧༠. ‘‘ཏཱི་ཎི་མཱ་ནི, བྷི་ཀྑ་ཝེ, ཨ་ཀུ་ས་ལ་མཱུ་ལཱ་ནི. ཀ་ཏ་མཱ་ནི ཏཱི་ཎི? ལོ་བྷོ ཨ་ཀུ་ས་ལ་མཱུ་ལཾ, དོ་སོ ཨ་ཀུ་ས་ལ་མཱུ་ལཾ, མོ་ཧོ ཨ་ཀུ་ས་ལ་མཱུ་ལཾ.
‘‘ཡ་ད་པི, བྷི་ཀྑ་ཝེ, ལོ་བྷོ ཏ་ད་པི ཨ་ཀུ་ས་ལ་མཱུ་ལཾ [ཨ་ཀུ་ས་ལཾ (སཱི. སྱཱ. ཀཾ. པཱི.)]; ཡ་ད་པི ལུ་དྡྷོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཨ་ཀུ་ས་ལཾ [ཨ་ཀུ་ས་ལ་མཱུ་ལཾ (ཀ.)]; ཡ་ད་པི ལུ་དྡྷོ ལོ་བྷེ་ན ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི [ཨུ་པ་ད་ཧ་ཏི (སཱི. སྱཱ. ཀཾ. པཱི.)] ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཨ་ཀུ་ས་ལཾ [ཨི་དཾ པ་ན ས་བྦ་ཏྠ་པི ཨེ་ཝ་མེ་ཝ དི་སྶ་ཏི]. ཨི་ཏི་སྶ་མེ ལོ་བྷ་ཛཱ ལོ་བྷ་ནི་དཱ་ནཱ ལོ་བྷ་ས་མུ་ད་ཡཱ ལོ་བྷ་པ་ཙྩ་ཡཱ ཨ་ནེ་ཀེ པཱ་པ་ཀཱ ཨ་ཀུ་ས་ལཱ དྷ་མྨཱ ས་མྦྷ་ཝ་ནྟི.
‘‘ཡ་ད་པི, བྷི་ཀྑ་ཝེ, དོ་སོ ཏ་ད་པི ཨ་ཀུ་ས་ལ་མཱུ་ལཾ; ཡ་ད་པི དུ་ཊྛོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཨ་ཀུ་ས་ལཾ; ཡ་ད་པི དུ་ཊྛོ དོ་སེ་ན ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཨ་ཀུ་ས་ལཾ. ཨི་ཏི་སྶ་མེ དོ་ས་ཛཱ དོ་ས་ནི་དཱ་ནཱ དོ་ས་ས་མུ་ད་ཡཱ དོ་ས་པ་ཙྩ་ཡཱ ཨ་ནེ་ཀེ པཱ་པ་ཀཱ ཨ་ཀུ་ས་ལཱ དྷ་མྨཱ ས་མྦྷ་ཝ་ནྟི.
‘‘ཡ་ད་པི, བྷི་ཀྑ་ཝེ, མོ་ཧོ ཏ་ད་པི ཨ་ཀུ་ས་ལ་མཱུ་ལཾ; ཡ་ད་པི མཱུ་ལ༹ྷོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཨ་ཀུ་ས་ལཾ; ཡ་ད་པི མཱུ་ལ༹ྷོ མོ་ཧེ་ན ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཨ་ཀུ་ས་ལཾ. ཨི་ཏི་སྶ་མེ མོ་ཧ་ཛཱ མོ་ཧ་ནི་དཱ་ནཱ མོ་ཧ་ས་མུ་ད་ཡཱ མོ་ཧ་པ་ཙྩ་ཡཱ ཨ་ནེ་ཀེ པཱ་པ་ཀཱ ཨ་ཀུ་ས་ལཱ དྷ་མྨཱ ས་མྦྷ་ཝ་ནྟི. ཨེ་ཝ་རཱུ་པོ ཙཱ་ཡཾ, བྷི་ཀྑ་ཝེ, པུ་གྒ་ལོ ཝུ་ཙྩ་ཏི ཨ་ཀཱ་ལ་ཝཱ་དཱི་ཏི་པི, ཨ་བྷཱུ་ཏ་ཝཱ་དཱི་ཏི་པི, ཨ་ན་ཏྠ་ཝཱ་དཱི་ཏི་པི, ཨ་དྷ་མྨ་ཝཱ་དཱི་ཏི་པི, ཨ་ཝི་ན་ཡ་ཝཱ་དཱི་ཏི་པི.
‘‘ཀ་སྨཱ ཙཱ་ཡཾ, བྷི་ཀྑ་ཝེ, ཨེ་ཝ་རཱུ་པོ པུ་གྒ་ལོ ཝུ་ཙྩ་ཏི ཨ་ཀཱ་ལ་ཝཱ་དཱི་ཏི་པི, ཨ་བྷཱུ་ཏ་ཝཱ་དཱི་ཏི་པི, ཨ་ན་ཏྠ་ཝཱ་དཱི་ཏི་པི, ཨ་དྷ་མྨ་ཝཱ་དཱི་ཏི་པི, ཨ་ཝི་ན་ཡ་ཝཱ་དཱི་ཏི་པི? ཏ་ཐཱ་ཧཱ་ཡཾ, བྷི་ཀྑ་ཝེ, པུ་གྒ་ལོ པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི. བྷཱུ་ཏེ་ན ཁོ པ་ན ཝུ་ཙྩ་མཱ་ནོ ཨ་ཝ་ཛཱ་ནཱ་ཏི, ནོ པ་ཊི་ཛཱ་ནཱ་ཏི; ཨ་བྷཱུ་ཏེ་ན ཝུ་ཙྩ་མཱ་ནོ ན ཨཱ་ཏ་པྤཾ ཀ་རོ་ཏི, ཏ་སྶ ནི་བྦེ་ཋ་ནཱ་ཡ ཨི་ཏི་པེ་ཏཾ ཨ་ཏ་ཙྪཾ ཨི་ཏི་པེ་ཏཾ ཨ་བྷཱུ་ཏ་ནྟི. ཏ་སྨཱ ཨེ་ཝ་རཱུ་པོ པུ་གྒ་ལོ ཝུ་ཙྩ་ཏི ཨ་ཀཱ་ལ་ཝཱ་དཱི་ཏི་པི, ཨ་བྷཱུ་ཏ་ཝཱ་དཱི་ཏི་པི, ཨ་ན་ཏྠ་ཝཱ་དཱི་ཏི་པི, ཨ་དྷ་མྨ་ཝཱ་དཱི་ཏི་པི, ཨ་ཝི་ན་ཡ་ཝཱ་དཱི་ཏི་པི.
‘‘ཨེ་ཝ་རཱུ་པོ, བྷི་ཀྑ་ཝེ, པུ་གྒ་ལོ ལོ་བྷ་ཛེ་ཧི པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ དི་ཊྛེ ཙེ་ཝ དྷ་མྨེ དུ་ཀྑཾ ཝི་ཧ་ར་ཏི, ས་ཝི་གྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ. ཀཱ་ཡ་སྶ ཙ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ.
‘‘དོ་ས་ཛེ་ཧི…པེ… མོ་ཧ་ཛེ་ཧི པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ དི་ཊྛེ ཙེ་ཝ དྷ་མྨེ དུ་ཀྑཾ ཝི་ཧ་ར་ཏི, ས་ཝི་གྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ. ཀཱ་ཡ་སྶ ཙ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ. སེ་ཡྻ་ཐཱ་པི, བྷི་ཀྑ་ཝེ, སཱ་ལོ ཝཱ དྷ་ཝོ ཝཱ ཕ་ནྡ་ནོ ཝཱ ཏཱི་ཧི མཱ་ལུ་ཝཱ་ལ་ཏཱ་ཧི ཨུ་དྡྷ་སྟོ པ་རི་ཡོ་ན་དྡྷོ ཨ་ན་ཡཾ ཨཱ་པ་ཛྫ་ཏི, བྱ་ས་ནཾ ཨཱ་པ་ཛྫ་ཏི, ཨ་ན་ཡ་བྱ་ས་ནཾ ཨཱ་པ་ཛྫ་ཏི; ཨེ་ཝ་མེ་ཝཾ ཁོ, བྷི་ཀྑ་ཝེ, ཨེ་ཝ་རཱུ་པོ པུ་གྒ་ལོ ལོ་བྷ་ཛེ་ཧི པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ དི་ཊྛེ ཙེ་ཝ དྷ་མྨེ དུ་ཀྑཾ ཝི་ཧ་ར་ཏི, ས་ཝི་གྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ. ཀཱ་ཡ་སྶ ཙ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ.
‘‘དོ་ས་ཛེ་ཧི…པེ… མོ་ཧ་ཛེ་ཧི པཱ་པ་ཀེ་ཧི ཨ་ཀུ་ས་ལེ་ཧི དྷ་མྨེ་ཧི ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ དི་ཊྛེ ཙེ་ཝ དྷ་མྨེ དུ་ཀྑཾ ཝི་ཧ་ར་ཏི ས་ཝི་གྷཱ་ཏཾ ས་ཨུ་པཱ་ཡཱ་སཾ ས་པ་རི་ལཱ༹་ཧཾ. ཀཱ་ཡ་སྶ ཙ བྷེ་དཱ པ་རཾ མ་ར་ཎཱ དུ་གྒ་ཏི པཱ་ཊི་ཀ་ངྑཱ. ཨི་མཱ་ནི ཁོ, བྷི་ཀྑ་ཝེ, ཏཱི་ཎི ཨ་ཀུ་ས་ལ་མཱུ་ལཱ་ནཱི་ཏི.
‘‘ཏཱི་ཎི་མཱ་ནི, བྷི་ཀྑ་ཝེ, ཀུ་ས་ལ་མཱུ་ལཱ་ནི. ཀ་ཏ་མཱ་ནི ཏཱི་ཎི? ཨ་ལོ་བྷོ ཀུ་ས་ལ་མཱུ་ལཾ, ཨ་དོ་སོ ཀུ་ས་ལ་མཱུ་ལཾ, ཨ་མོ་ཧོ ཀུ་ས་ལ་མཱུ་ལཾ.
‘‘ཡ་ད་པི, བྷི་ཀྑ་ཝེ, ཨ་ལོ་བྷོ ཏ་ད་པི ཀུ་ས་ལ་མཱུ་ལཾ [ཀུ་ས་ལཾ (སཱི. སྱཱ. ཀཾ. པཱི.)]; ཡ་ད་པི ཨ་ལུ་དྡྷོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཀུ་ས་ལཾ [ཀུ་ས་ལ་མཱུ་ལཾ (ཀ.)]; ཡ་ད་པི ཨ་ལུ་དྡྷོ ལོ་བྷེ་ན ཨ་ན་བྷི་བྷཱུ་ཏོ ཨ་པ་རི་ཡཱ་དི་ནྣ་ཙི་ཏྟོ ན པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཀུ་ས་ལཾ. ཨི་ཏི་སྶ་མེ ཨ་ལོ་བྷ་ཛཱ ཨ་ལོ་བྷ་ནི་དཱ་ནཱ ཨ་ལོ་བྷ་ས་མུ་ད་ཡཱ ཨ་ལོ་བྷ་པ་ཙྩ་ཡཱ ཨ་ནེ་ཀེ ཀུ་ས་ལཱ དྷ་མྨཱ ས་མྦྷ་ཝ་ནྟི.
‘‘ཡ་ད་པི, བྷི་ཀྑ་ཝེ, ཨ་དོ་སོ ཏ་ད་པི ཀུ་ས་ལ་མཱུ་ལཾ; ཡ་ད་པི ཨ་དུ་ཊྛོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཀུ་ས་ལཾ; ཡ་ད་པི ཨ་དུ་ཊྛོ དོ་སེ་ན ཨ་ན་བྷི་བྷཱུ་ཏོ ཨ་པ་རི་ཡཱ་དི་ནྣ་ཙི་ཏྟོ ན པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཀུ་ས་ལཾ. ཨི་ཏི་སྶ་མེ ཨ་དོ་ས་ཛཱ ཨ་དོ་ས་ནི་དཱ་ནཱ ཨ་དོ་ས་ས་མུ་ད་ཡཱ ཨ་དོ་ས་པ་ཙྩ་ཡཱ ཨ་ནེ་ཀེ ཀུ་ས་ལཱ དྷ་མྨཱ ས་མྦྷ་ཝ་ནྟི.
‘‘ཡ་ད་པི, བྷི་ཀྑ་ཝེ, ཨ་མོ་ཧོ ཏ་ད་པི ཀུ་ས་ལ་མཱུ་ལཾ; ཡ་ད་པི ཨ་མཱུ་ལ༹ྷོ ཨ་བྷི་ས་ངྑ་རོ་ཏི ཀཱ་ཡེ་ན ཝཱ་ཙཱ་ཡ མ་ན་སཱ ཏ་ད་པི ཀུ་ས་ལཾ; ཡ་ད་པི ཨ་མཱུ་ལ༹ྷོ མོ་ཧེ་ན ཨ་ན་བྷི་བྷཱུ་ཏོ ཨ་པ་རི་ཡཱ་དི་ནྣ་ཙི་ཏྟོ ན པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི ཏ་ད་པི ཀུ་ས་ལཾ. ཨི་ཏི་སྶ་མེ ཨ་མོ་ཧ་ཛཱ ཨ་མོ་ཧ་ནི་དཱ་ནཱ ཨ་མོ་ཧ་ས་མུ་ད་ཡཱ ཨ་མོ་ཧ་པ་ཙྩ་ཡཱ ཨ་ནེ་ཀེ ཀུ་ས་ལཱ དྷ་མྨཱ ས་མྦྷ་ཝ་ནྟི. ཨེ་ཝ་རཱུ་པོ ཙཱ་ཡཾ, བྷི་ཀྑ་ཝེ, པུ་གྒ་ལོ ཝུ་ཙྩ་ཏི ཀཱ་ལ་ཝཱ་དཱི་ཏི་པི, བྷཱུ་ཏ་ཝཱ་དཱི་ཏི་པི, ཨ་ཏྠ་ཝཱ་དཱི་ཏི་པི, དྷ་མྨ་ཝཱ་དཱི་ཏི་པི, ཝི་ན་ཡ་ཝཱ་དཱི་ཏི་པི.
‘‘ཀ་སྨཱ ཙཱ་ཡཾ, བྷི་ཀྑ་ཝེ, ཨེ་ཝ་རཱུ་པོ པུ་གྒ་ལོ ཝུ་ཙྩ་ཏི ཀཱ་ལ་ཝཱ་དཱི་ཏི་པི, བྷཱུ་ཏ་ཝཱ་དཱི་ཏི་པི, ཨ་ཏྠ་ཝཱ་དཱི་ཏི་པི, དྷ་མྨ་ཝཱ་དཱི་ཏི་པི, ཝི་ན་ཡ་ཝཱ་དཱི་ཏི་པི? ཏ་ཐཱ་ཧཱ་ཡཾ, བྷི་ཀྑ་ཝེ, པུ་གྒ་ལོ ན པ་ར་སྶ ཨ་ས་ཏཱ དུ་ཀྑཾ ཨུ་པྤཱ་ད་ཡ་ཏི ཝ་དྷེ་ན ཝཱ བ་ནྡྷ་ནེ་ན ཝཱ ཛཱ་ནི་ཡཱ ཝཱ ག་ར་ཧཱ་ཡ ཝཱ པ་བྦཱ་ཛ་ནཱ་ཡ ཝཱ བ་ལ་ཝ་མྷི བ་ལ་ཏྠོ ཨི་ཏི་པི. བྷཱུ་ཏེ་ན ཁོ པ་ན ཝུ་ཙྩ་མཱ་ནོ པ་ཊི་ཛཱ་ནཱ་ཏི ནོ ཨ་ཝ་ཛཱ་ནཱ་ཏི; ཨ་བྷཱུ་ཏེ་ན ཝུ་ཙྩ་མཱ་ནོ ཨཱ་ཏ་པྤཾ ཀ་རོ་ཏི ཏ་སྶ ནི་བྦེ་ཋ་ནཱ་ཡ – ‘ཨི་ཏི་པེ་ཏཾ ཨ་ཏ་ཙྪཾ, ཨི་ཏི་པེ་ཏཾ ཨ་བྷཱུ་ཏ’ནྟི. ཏ་སྨཱ ཨེ་ཝ་རཱུ་པོ པུ་གྒ་ལོ ཝུ་ཙྩ་ཏི ཀཱ་ལ་ཝཱ་དཱི་ཏི་པི, ཨ་ཏྠ་ཝཱ་དཱི་ཏི་པི, དྷ་མྨ་ཝཱ་དཱི་ཏི་པི, ཝི་ན་ཡ་ཝཱ་དཱི་ཏི་པི.
‘‘ཨེ་ཝ་རཱུ་པ་སྶ, བྷི་ཀྑ་ཝེ, པུ་གྒ་ལ་སྶ ལོ་བྷ་ཛཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. དི་ཊྛེ་ཝ དྷ་མྨེ སུ་ཁཾ ཝི་ཧ་ར་ཏི ཨ་ཝི་གྷཱ་ཏཾ ཨ་ནུ་པཱ་ཡཱ་སཾ ཨ་པ་རི་ལཱ༹་ཧཾ. དི་ཊྛེ་ཝ དྷ་མྨེ པ་རི་ནི་བྦཱ་ཡ་ཏི.
‘‘དོ་ས་ཛཱ…པེ… པ་རི་ནི་བྦཱ་ཡ་ཏི. མོ་ཧ་ཛཱ…པེ… པ་རི་ནི་བྦཱ་ཡ་ཏི. སེ་ཡྻ་ཐཱ་པི བྷི་ཀྑ་ཝེ, སཱ་ལོ ཝཱ དྷ་ཝོ ཝཱ ཕ་ནྡ་ནོ ཝཱ ཏཱི་ཧི མཱ་ལུ་ཝཱ་ལ་ཏཱ་ཧི ཨུ་དྡྷ་སྟོ པ་རི་ཡོ་ན་དྡྷོ. ཨ་ཐ པུ་རི་སོ ཨཱ་ག་ཙྪེ་ཡྻ ཀུ་དྡཱ་ལ-པི་ཊ་ཀཾ [ཀུ་དྡཱ་ལ་པི་ཊ་ཀཾ (སཱི. སྱཱ. ཀཾ. པཱི.)] ཨཱ་དཱ་ཡ. སོ ཏཾ མཱ་ལུ་ཝཱ་ལ་ཏཾ མཱུ་ལེ ཚི་ནྡེ་ཡྻ, མཱུ་ལེ ཚེ་ཏྭཱ པ་ལི་ཁ་ཎེ་ཡྻ, པ་ལི་ཁ་ཎི་ཏྭཱ མཱུ་ལཱ་ནི ཨུ་དྡྷ་རེ་ཡྻ, ཨ་ནྟ་མ་སོ ཨུ་སཱི་ར་ནཱ་ལི༹་མ་ཏྟཱ་ནི་པི [ཨུ་སཱི་ར་ནཱ་ལ༹་མ་ཏྟཱ་ནི་པི (སཱི. སྱཱ. ཀཾ. པཱི.)]. སོ ཏཾ མཱ་ལུ་ཝཱ་ལ་ཏཾ ཁ་ཎྜཱ་ཁ་ཎྜི་ཀཾ ཚི་ནྡེ་ཡྻ, ཁ་ཎྜཱ་ཁ་ཎྜི་ཀཾ ཚེ་ཏྭཱ ཕཱ་ལེ་ཡྻ, ཕཱ་ལེ་ཏྭཱ ས་ཀ་ལི་ཀཾ ས་ཀ་ལི་ཀཾ ཀ་རེ་ཡྻ, ས་ཀ་ལི་ཀཾ ས་ཀ་ལི་ཀཾ ཀ་རི་ཏྭཱ ཝཱ་ཏཱ་ཏ་པེ ཝི་སོ་སེ་ཡྻ, ཝཱ་ཏཱ་ཏ་པེ ཝི་སོ་སེ་ཏྭཱ ཨ་གྒི་ནཱ ཌ་ཧེ་ཡྻ, ཨ་གྒི་ནཱ ཌ་ཧི་ཏྭཱ མ་སིཾ ཀ་རེ་ཡྻ, མ་སིཾ ཀ་རི་ཏྭཱ མ་ཧཱ་ཝཱ་ཏེ ཝཱ ཨོ་ཕུ་ཎེ་ཡྻ ན་དི་ཡཱ ཝཱ སཱི་གྷ་སོ་ཏཱ་ཡ པ་ཝཱ་ཧེ་ཡྻ. ཨེ་ཝ་མ་སྶ [ཨེ་ཝ་མ་སྶུ (སཱི.), ཨེ་ཝ་སྶུ (ཀ.)] ཏཱ, བྷི་ཀྑ་ཝེ, མཱ་ལུ་ཝཱ་ལ་ཏཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. ཨེ་ཝ་མེ་ཝཾ ཁོ, བྷི་ཀྑ་ཝེ, ཨེ་ཝ་རཱུ་པ་སྶ པུ་གྒ་ལ་སྶ ལོ་བྷ་ཛཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. དི་ཊྛེ་ཝ དྷ་མྨེ སུ་ཁཾ ཝི་ཧ་ར་ཏི ཨ་ཝི་གྷཱ་ཏཾ ཨ་ནུ་པཱ་ཡཱ་སཾ ཨ་པ་རི་ལཱ༹་ཧཾ. དི་ཊྛེ་ཝ དྷ་མྨེ པ་རི་ནི་བྦཱ་ཡ་ཏི.
‘‘དོ་ས་ཛཱ …པེ… མོ་ཧ་ཛཱ པཱ་པ་ཀཱ ཨ་ཀུ་ས་ལཱ དྷ་མྨཱ པ་ཧཱི་ནཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ. དི་ཊྛེ་ཝ དྷ་མྨེ སུ་ཁཾ ཝི་ཧ་ར་ཏི ཨ་ཝི་གྷཱ་ཏཾ ཨ་ནུ་པཱ་ཡཱ་སཾ ཨ་པ་རི་ལཱ༹་ཧཾ. དི་ཊྛེ་ཝ དྷ་མྨེ པ་རི་ནི་བྦཱ་ཡ་ཏི. ཨི་མཱ་ནི ཁོ, བྷི་ཀྑ་ཝེ, ཏཱི་ཎི ཀུ་ས་ལ་མཱུ་ལཱ་ནཱི’’ཏི. ན་ཝ་མཾ.