༡༠. ཨུ་པོ་ས་ཐ་སུ་ཏྟཾ
༧༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཨ་ཐ ཁོ ཝི་སཱ་ཁཱ མི་གཱ་ར་མཱ་ཏཱ ཏ་ད་ཧུ་པོ་ས་ཐེ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཝི་སཱ་ཁཾ མི་གཱ་ར་མཱ་ཏ་རཾ བྷ་ག་ཝཱ ཨེ་ཏ་ད་ཝོ་ཙ – ‘‘ཧ་ནྡ ཀུ་ཏོ ནུ ཏྭཾ, ཝི་སཱ་ཁེ, ཨཱ་ག་ཙྪ་སི དི་ཝཱ དི་ཝ་སྶཱ’’ཏི? ‘‘ཨུ་པོ་ས་ཐཱ་ཧཾ, བྷ་ནྟེ, ཨ་ཛྫ ཨུ་པ་ཝ་སཱ་མཱི’’ཏི.
‘‘ཏ་ཡོ ཁོ་མེ, ཝི་སཱ་ཁེ, ཨུ་པོ་ས་ཐཱ. ཀ་ཏ་མེ ཏ་ཡོ? གོ་པཱ་ལ་ཀུ་པོ་ས་ཐོ, ནི་ག་ཎྛུ་པོ་ས་ཐོ, ཨ་རི་ཡུ་པོ་ས་ཐོ. ཀ་ཐ་ཉྩ, ཝི་སཱ་ཁེ, གོ་པཱ་ལ་ཀུ་པོ་ས་ཐོ ཧོ་ཏི? སེ་ཡྻ་ཐཱ་པི, ཝི་སཱ་ཁེ, གོ་པཱ་ལ་ཀོ སཱ་ཡ་ནྷ་ས་མ་ཡེ སཱ་མི་ཀཱ་ནཾ གཱ་ཝོ ནི་ཡྻཱ་ཏེ་ཏྭཱ ཨི་ཏི པ་ཊི་ས་ཉྩི་ཀྑ་ཏི – ‘ཨ་ཛྫ ཁོ གཱ་ཝོ ཨ་མུ་ཀ་སྨི་ཉྩ ཨ་མུ་ཀ་སྨི་ཉྩ པ་དེ་སེ ཙ་རིཾ་སུ, ཨ་མུ་ཀ་སྨི་ཉྩ ཨ་མུ་ཀ་སྨི་ཉྩ པ་དེ་སེ པཱ་ནཱི་ཡཱ་ནི པི་ཝིཾ་སུ; སྭེ དཱ་ནི གཱ་ཝོ ཨ་མུ་ཀ་སྨི་ཉྩ ཨ་མུ་ཀ་སྨི་ཉྩ པ་དེ་སེ ཙ་རི་སྶ་ནྟི, ཨ་མུ་ཀ་སྨི་ཉྩ ཨ་མུ་ཀ་སྨི་ཉྩ པ་དེ་སེ པཱ་ནཱི་ཡཱ་ནི པི་ཝི་སྶ་ནྟཱི’ཏི; ཨེ་ཝ་མེ་ཝཾ ཁོ, ཝི་སཱ་ཁེ, ཨི་དྷེ་ཀ་ཙྩོ ཨུ་པོ་ས་ཐི་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཨ་ཧཾ ཁྭ་ཛྫ ཨི་ད་ཉྩི་ད་ཉྩ ཁཱ་ད་ནཱི་ཡཾ ཁཱ་དིཾ, ཨི་ད་ཉྩི་ད་ཉྩ བྷོ་ཛ་ནཱི་ཡཾ བྷུ་ཉྫིཾ; སྭེ དཱ་ནཱ་ཧཾ ཨི་ད་ཉྩི་ད་ཉྩ ཁཱ་ད་ནཱི་ཡཾ ཁཱ་དི་སྶཱ་མི, ཨི་དཾ ཙི་ད་ཉྩ བྷོ་ཛ་ནཱི་ཡཾ བྷུ་ཉྫི་སྶཱ་མཱི’ཏི. སོ ཏེ་ན ཨ་བྷི་ཛ྄ཛྷཱ་ས་ཧ་ག་ཏེ་ན ཙེ་ཏ་སཱ དི་ཝ་སཾ ཨ་ཏི་ནཱ་མེ་ཏི. ཨེ་ཝཾ ཁོ ཝི་སཱ་ཁེ, གོ་པཱ་ལ་ཀུ་པོ་ས་ཐོ ཧོ་ཏི. ཨེ་ཝཾ ཨུ་པ་ཝུ་ཏྠོ ཁོ, ཝི་སཱ་ཁེ, གོ་པཱ་ལ་ཀུ་པོ་ས་ཐོ ན མ་ཧ་པྥ་ལོ ཧོ་ཏི ན མ་ཧཱ་ནི་སཾ་སོ ན མ་ཧཱ་ཛུ་ཏི་ཀོ ན མ་ཧཱ་ཝི་པྥཱ་རོ.
‘‘ཀ་ཐ་ཉྩ, ཝི་སཱ་ཁེ, ནི་ག་ཎྛུ་པོ་ས་ཐོ ཧོ་ཏི? ཨ་ཏྠི, ཝི་སཱ་ཁེ, ནི་ག་ཎྛཱ ནཱ་མ ས་མ་ཎ་ཛཱ་ཏི་ཀཱ. ཏེ སཱ་ཝ་ཀཾ ཨེ་ཝཾ ས་མཱ་ད་པེ་ནྟི – ‘ཨེ་ཧི ཏྭཾ, ཨ་མྦྷོ པུ་རི་ས, ཡེ པུ་ར་ཏྠི་མཱ་ཡ དི་སཱ་ཡ པཱ་ཎཱ པ་རཾ ཡོ་ཛ་ན་ས་ཏཾ ཏེ་སུ ད་ཎྜཾ ནི་ཀྑི་པཱ་ཧི; ཡེ པ་ཙྪི་མཱ་ཡ དི་སཱ་ཡ པཱ་ཎཱ པ་རཾ ཡོ་ཛ་ན་ས་ཏཾ ཏེ་སུ ད་ཎྜཾ ནི་ཀྑི་པཱ་ཧི; ཡེ ཨུ་ཏྟ་རཱ་ཡ དི་སཱ་ཡ པཱ་ཎཱ པ་རཾ ཡོ་ཛ་ན་ས་ཏཾ ཏེ་སུ ད་ཎྜཾ ནི་ཀྑི་པཱ་ཧི; ཡེ ད་ཀྑི་ཎཱ་ཡ དི་སཱ་ཡ པཱ་ཎཱ པ་རཾ ཡོ་ཛ་ན་ས་ཏཾ ཏེ་སུ ད་ཎྜཾ ནི་ཀྑི་པཱ་ཧཱི’ཏི. ཨི་ཏི ཨེ་ཀ་ཙྩཱ་ནཾ པཱ་ཎཱ་ནཾ ཨ་ནུ་དྡ་ཡཱ་ཡ ཨ་ནུ་ཀ་མྤཱ་ཡ ས་མཱ་ད་པེ་ནྟི, ཨེ་ཀ་ཙྩཱ་ནཾ པཱ་ཎཱ་ནཾ ནཱ་ནུ་དྡ་ཡཱ་ཡ ནཱ་ནུ་ཀ་མྤཱ་ཡ ས་མཱ་ད་པེ་ནྟི. ཏེ ཏ་ད་ཧུ་པོ་ས་ཐེ སཱ་ཝ་ཀཾ ཨེ་ཝཾ ས་མཱ་ད་པེ་ནྟི – ‘ཨེ་ཧི ཏྭཾ, ཨ་མྦྷོ པུ་རི་ས, ས་བྦ་ཙེ་ལཱ་ནི [ས་བྦ་ཝེ་རཱ་ནི (ཀ.)] ནི་ཀྑི་པི་ཏྭཱ ཨེ་ཝཾ ཝ་དེ་ཧི – ནཱ་ཧཾ ཀྭ་ཙ་ནི ཀ་སྶ་ཙི ཀི་ཉྩ་ན་ཏ་སྨིཾ [ཀི་ཉྩ་ན་ཏ་སྨི (?) ཀི་རི་ཡཱ་པ་ད་མེ་ཏཾ ཡ་ཐཱ ཀི་ཉྩ་ན་ཏ་ཏྠཱི་ཏི], ན ཙ མ་མ ཀྭ་ཙ་ནི ཀ་ཏྠ་ཙི ཀི་ཉྩ་ན་ཏ་ཏྠཱི’ཏི. ཛཱ་ན་ནྟི ཁོ པ་ན་སྶ མཱ་ཏཱ་པི་ཏ་རོ – ‘ཨ་ཡཾ ཨ་མྷཱ་ཀཾ པུ་ཏྟོ’ཏི; སོ་པི ཛཱ་ནཱ་ཏི – ‘ཨི་མེ མ་ཡ྄ཧཾ མཱ་ཏཱ་པི་ཏ་རོ’ཏི. ཛཱ་ནཱ་ཏི ཁོ པ་ན་སྶ པུ་ཏྟ་དཱ་རོ – ‘ཨ་ཡཾ མ་ཡ྄ཧཾ བྷ་ཏྟཱ’ཏི; སོ་པི ཛཱ་ནཱ་ཏི – ‘ཨ་ཡཾ མ་ཡ྄ཧཾ པུ་ཏྟ་དཱ་རོ’ཏི. ཛཱ་ན་ནྟི ཁོ པ་ན་སྶ དཱ་ས་ཀ་མྨ་ཀ་ར་པོ་རི་སཱ – ‘ཨ་ཡཾ ཨ་མྷཱ་ཀཾ ཨ་ཡྻོ’ཏི; སོ་པི ཛཱ་ནཱ་ཏི – ‘ཨི་མེ མ་ཡ྄ཧཾ དཱ་ས་ཀ་མྨ་ཀ་ར་པོ་རི་སཱ’ཏི. ཨི་ཏི ཡ་སྨིཾ ས་མ་ཡེ ས་ཙྩེ ས་མཱ་ད་པེ་ཏ་བྦཱ མུ་སཱ་ཝཱ་དེ ཏ་སྨིཾ ས་མ་ཡེ ས་མཱ་ད་པེ་ནྟི. ཨི་དཾ ཏ་སྶ མུ་སཱ་ཝཱ་ད་སྨིཾ ཝ་དཱ་མི. སོ ཏ་སྶཱ ར་ཏྟི་ཡཱ ཨ་ཙྩ་ཡེ་ན བྷོ་གེ ཨ་དི་ནྣཾ་ཡེ་ཝ པ་རི་བྷུ་ཉྫ་ཏི. ཨི་དཾ ཏ་སྶ ཨ་དི་ནྣཱ་དཱ་ན་སྨིཾ ཝ་དཱ་མི. ཨེ་ཝཾ ཁོ, ཝི་སཱ་ཁེ, ནི་ག་ཎྛུ་པོ་ས་ཐོ ཧོ་ཏི. ཨེ་ཝཾ ཨུ་པ་ཝུ་ཏྠོ ཁོ, ཝི་སཱ་ཁེ, ནི་ག་ཎྛུ་པོ་ས་ཐོ ན མ་ཧ་པྥ་ལོ ཧོ་ཏི ན མ་ཧཱ་ནི་སཾ་སོ ན མ་ཧཱ་ཛུ་ཏི་ཀོ ན མ་ཧཱ་ཝི་པྥཱ་རོ.
‘‘ཀ་ཐ་ཉྩ, ཝི་སཱ་ཁེ, ཨ་རི་ཡུ་པོ་ས་ཐོ ཧོ་ཏི? ཨུ་པ་ཀྐི་ལི་ཊྛ་སྶ, ཝི་སཱ་ཁེ, ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ [པ་རི་ཡོ་དཱ་པ་ནཱ (?)] ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ཏ་ཐཱ་ག་ཏཾ ཨ་ནུ་སྶ་ར་ཏི – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’ཏི. ཏ་སྶ ཏ་ཐཱ་ག་ཏཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི. ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི, སེ་ཡྻ་ཐཱ་པི, ཝི་སཱ་ཁེ, ཨུ་པ་ཀྐི་ལི་ཊྛ་སྶ སཱི་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ སཱི་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཀ་ཀྐ་ཉྩ པ་ཊི་ཙྩ མ་ཏྟི་ཀ་ཉྩ པ་ཊི་ཙྩ ཨུ་ད་ཀ་ཉྩ པ་ཊི་ཙྩ པུ་རི་ས་སྶ ཙ ཏ་ཛྫཾ ཝཱ་ཡཱ་མཾ པ་ཊི་ཙྩ, ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ སཱི་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཨེ་ཝ་མེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ཏ་ཐཱ་ག་ཏཾ ཨ་ནུ་སྶ་ར་ཏི – ‘ཨི་ཏི་པི སོ བྷ་ག་ཝཱ ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ’ཏི. ཏ་སྶ ཏ་ཐཱ་ག་ཏཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི. ཨ་ཡཾ ཝུ་ཙྩ་ཏི, ཝི་སཱ་ཁེ – ‘ཨ་རི་ཡ་སཱ་ཝ་ཀོ བྲ་ཧྨུ་པོ་ས་ཐཾ ཨུ་པ་ཝ་ས་ཏི, བྲ་ཧྨུ་ནཱ ས་དྡྷིཾ སཾ་ཝ་ས་ཏི, བྲ་ཧྨ་ཉྩ་སྶ [བྲ་ཧྨ་ཉྩ (ཀ.)] ཨཱ་ར་བྦྷ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི’. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཨུ་པ་ཀྐི་ལི་ཊྛ་སྶ, ཝི་སཱ་ཁེ, ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ དྷ་མྨཾ ཨ་ནུ་སྶ་ར་ཏི – ‘སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ ས་ནྡི་ཊྛི་ཀོ ཨ་ཀཱ་ལི་ཀོ ཨེ་ཧི་པ་སྶི་ཀོ ཨོ་པ་ནེ་ཡྻི་ཀོ པ་ཙྩ་ཏྟཾ ཝེ་དི་ཏ་བྦོ ཝི་ཉྙཱུ་ཧཱི’ཏི. ཏ་སྶ དྷ་མྨཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི, སེ་ཡྻ་ཐཱ་པི, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཀཱ་ཡ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཀཱ་ཡ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? སོ་ཏྟི་ཉྩ པ་ཊི་ཙྩ, ཙུ་ཎྞ་ཉྩ པ་ཊི་ཙྩ, ཨུ་ད་ཀ་ཉྩ པ་ཊི་ཙྩ, པུ་རི་ས་སྶ ཙ ཏ་ཛྫཾ ཝཱ་ཡཱ་མཾ པ་ཊི་ཙྩ. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཀཱ་ཡ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཨེ་ཝ་མེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ དྷ་མྨཾ ཨ་ནུ་སྶ་ར་ཏི – ‘སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ ས་ནྡི་ཊྛི་ཀོ ཨ་ཀཱ་ལི་ཀོ ཨེ་ཧི་པ་སྶི་ཀོ ཨོ་པ་ནེ་ཡྻི་ཀོ པ་ཙྩ་ཏྟཾ ཝེ་དི་ཏ་བྦོ ཝི་ཉྙཱུ་ཧཱི’ཏི. ཏ་སྶ དྷ་མྨཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི. ཨ་ཡཾ ཝུ་ཙྩ་ཏི, ཝི་སཱ་ཁེ, ‘ཨ་རི་ཡ་སཱ་ཝ་ཀོ དྷ་མྨུ་པོ་ས་ཐཾ ཨུ་པ་ཝ་ས་ཏི, དྷ་མྨེ་ན ས་དྡྷིཾ སཾ་ཝ་ས་ཏི, དྷ་མྨ་ཉྩ་སྶ ཨཱ་ར་བྦྷ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི’. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཨུ་པ་ཀྐི་ལི་ཊྛ་སྶ, ཝི་སཱ་ཁེ, ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ས་ངྒྷཾ ཨ་ནུ་སྶ་ར་ཏི – ‘སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཨུ་ཛུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཉཱ་ཡ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, སཱ་མཱི་ཙི་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ, ཡ་དི་དཾ ཙ་ཏྟཱ་རི པུ་རི་ས་ཡུ་གཱ་ནི ཨ་ཊྛ པུ་རི་ས་པུ་གྒ་ལཱ ཨེ་ས བྷ་ག་ཝ་ཏོ སཱ་ཝ་ཀ་ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’ཏི. ཏ་སྶ ས་ངྒྷཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི, སེ་ཡྻ་ཐཱ་པི, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཝ་ཏྠ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཝ་ཏྠ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨུ་སྨ་ཉྩ [ཨཱུ་ས་ཉྩ (སྱཱ. ཀཾ. ཨ་ཊྛ་ཀ་ཐཱ་ཡ་མྤི པཱ་ཋ་ནྟ་རཾ, སཾ. ནི. ༣.༨༩ ཁེ་མ་ཀ་སུ་ཏྟ་པཱ་ལི༹་ཡཱ་པི ས་མེ་ཏི.) ཨུ་སུ་མ་ཉྩ (སཱི.)] པ་ཊི་ཙྩ, ཁཱ་ར་ཉྩ པ་ཊི་ཙྩ, གོ་མ་ཡ་ཉྩ པ་ཊི་ཙྩ, ཨུ་ད་ཀ་ཉྩ པ་ཊི་ཙྩ, པུ་རི་ས་སྶ ཙ ཏ་ཛྫཾ ཝཱ་ཡཱ་མཾ པ་ཊི་ཙྩ. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཝ་ཏྠ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཨེ་ཝ་མེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ས་ངྒྷཾ ཨ་ནུ་སྶ་ར་ཏི – ‘སུ་པྤ་ཊི་པ་ནྣོ བྷ་ག་ཝ་ཏོ སཱ་ཝ་ཀ་ས་ངྒྷོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’ཏི. ཏ་སྶ ས་ངྒྷཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི. ཨ་ཡཾ ཝུ་ཙྩ་ཏི, ཝི་སཱ་ཁེ, ‘ཨ་རི་ཡ་སཱ་ཝ་ཀོ ས་ངྒྷུ་པོ་ས་ཐཾ ཨུ་པ་ཝ་ས་ཏི, ས་ངྒྷེ་ན ས་དྡྷིཾ སཾ་ཝ་ས་ཏི, ས་ངྒྷ་ཉྩ་སྶ ཨཱ་ར་བྦྷ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི’. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཨུ་པ་ཀྐི་ལི་ཊྛ་སྶ, ཝི་སཱ་ཁེ, ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ཨ་ཏྟ་ནོ སཱི་ལཱ་ནི ཨ་ནུ་སྶ་ར་ཏི ཨ་ཁ་ཎྜཱ་ནི ཨ་ཙྪི་དྡཱ་ནི ཨ་ས་བ་ལཱ་ནི ཨ་ཀ་མྨཱ་སཱ་ནི བྷུ་ཛི་སྶཱ་ནི ཝི་ཉྙུ་པྤ་ས་ཏྠཱ་ནི ཨ་པ་རཱ་མ་ཊྛཱ་ནི ས་མཱ་དྷི་སཾ་ཝ་ཏྟ་ནི་ཀཱ་ནི. ཏ་སྶ སཱི་ལཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི, སེ་ཡྻ་ཐཱ་པི, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཨཱ་དཱ་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཨཱ་དཱ་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཏེ་ལ་ཉྩ པ་ཊི་ཙྩ, ཚཱ་རི་ཀ་ཉྩ པ་ཊི་ཙྩ, ཝཱ་ལ་ཎྜུ་པ་ཀ་ཉྩ པ་ཊི་ཙྩ, པུ་རི་ས་སྶ ཙ ཏ་ཛྫཾ ཝཱ་ཡཱ་མཾ པ་ཊི་ཙྩ. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཨཱ་དཱ་ས་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཨེ་ཝ་མེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ ཨ་ཏྟ་ནོ སཱི་ལཱ་ནི ཨ་ནུ་སྶ་ར་ཏི ཨ་ཁ་ཎྜཱ་ནི…པེ… ས་མཱ་དྷི་སཾ་ཝ་ཏྟ་ནི་ཀཱ་ནི. ཏ་སྶ སཱི་ལཾ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི. ཨ་ཡཾ ཝུ་ཙྩ་ཏི, ཝི་སཱ་ཁེ, ‘ཨ་རི་ཡ་སཱ་ཝ་ཀོ སཱི་ལུ་པོ་ས་ཐཾ ཨུ་པ་ཝ་ས་ཏི, སཱི་ལེ་ན ས་དྡྷིཾ སཾ་ཝ་ས་ཏི, སཱི་ལ་ཉྩ་སྶ ཨཱ་ར་བྦྷ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི’. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཨུ་པ་ཀྐི་ལི་ཊྛ་སྶ, ཝི་སཱ་ཁེ, ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ ཝི་སཱ་ཁེ, ཨ་རི་ཡ་སཱ་ཝ་ཀོ དེ་ཝ་ཏཱ ཨ་ནུ་སྶ་ར་ཏི – ‘ས་ནྟི དེ་ཝཱ ཙཱ་ཏུ་མ་ཧཱ་རཱ་ཛི་ཀཱ [ཙཱ་ཏུ་མྨ་ཧཱ་རཱ་ཛི་ཀཱ (སཱི. སྱཱ. ཀཾ. པཱི.)], ས་ནྟི དེ་ཝཱ ཏཱ་ཝ་ཏིཾ་སཱ, ས་ནྟི དེ་ཝཱ ཡཱ་མཱ, ས་ནྟི དེ་ཝཱ ཏུ་སི་ཏཱ, ས་ནྟི དེ་ཝཱ ནི་མྨཱ་ན་ར་ཏི་ནོ, ས་ནྟི དེ་ཝཱ པ་ར་ནི་མྨི་ཏ་ཝ་ས་ཝ་ཏྟི་ནོ, ས་ནྟི དེ་ཝཱ བྲ་ཧྨ་ཀཱ་ཡི་ཀཱ, ས་ནྟི དེ་ཝཱ ཏ་ཏུ་ཏྟ་རི [ཏ་ཏུ་ཏྟ་རིཾ (སཱི. པཱི.)]. ཡ་ཐཱ་རཱུ་པཱ་ཡ ས་དྡྷཱ་ཡ ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ [ཏ་ཏྠུ་པྤ་ནྣཱ (སཱི. པཱི.)], མ་ཡ྄ཧ་མྤི ཏ་ཐཱ་རཱུ་པཱ ས་དྡྷཱ སཾ་ཝི་ཛྫ་ཏི. ཡ་ཐཱ་རཱུ་པེ་ན སཱི་ལེ་ན ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པཾ སཱི་ལཾ སཾ་ཝི་ཛྫ་ཏི. ཡ་ཐཱ་རཱུ་པེ་ན སུ་ཏེ་ན ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པཾ སུ་ཏཾ སཾ་ཝི་ཛྫ་ཏི. ཡ་ཐཱ་རཱུ་པེ་ན ཙཱ་གེ་ན ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པོ ཙཱ་གོ སཾ་ཝི་ཛྫ་ཏི. ཡ་ཐཱ་རཱུ་པཱ་ཡ པ་ཉྙཱ་ཡ ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པཱ པ་ཉྙཱ སཾ་ཝི་ཛྫ་ཏཱི’ཏི. ཏ་སྶ ཨ་ཏྟ་ནོ ཙ ཏཱ་ས་ཉྩ དེ་ཝ་ཏཱ་ནཾ ས་དྡྷ་ཉྩ སཱི་ལ་ཉྩ སུ་ཏ་ཉྩ ཙཱ་ག་ཉྩ པ་ཉྙ་ཉྩ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི, སེ་ཡྻ་ཐཱ་པི, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཛཱ་ཏ་རཱུ་པ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཛཱ་ཏ་རཱུ་པ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨུ་ཀྐ་ཉྩ པ་ཊི་ཙྩ, ལོ་ཎ་ཉྩ པ་ཊི་ཙྩ, གེ་རུ་ཀ་ཉྩ པ་ཊི་ཙྩ, ནཱ་ལི༹་ཀ་ས་ཎྜཱ་ས་ཉྩ [ནཱ་ལི༹་ཀ་ཉྩ པ་ཊི་ཙྩ ས་ཎྜཱ་ས་ཉྩ (པཱི. ཀ.)] པ་ཊི་ཙྩ, པུ་རི་ས་སྶ ཙ ཏ་ཛྫཾ ཝཱ་ཡཱ་མཾ པ་ཊི་ཙྩ. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཛཱ་ཏ་རཱུ་པ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི. ཨེ་ཝ་མེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ཀ་ཐ་ཉྩ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི? ཨི་དྷ, ཝི་སཱ་ཁེ, ཨ་རི་ཡ་སཱ་ཝ་ཀོ དེ་ཝ་ཏཱ ཨ་ནུ་སྶ་ར་ཏི – ‘ས་ནྟི དེ་ཝཱ ཙཱ་ཏུ་མ་ཧཱ་རཱ་ཛི་ཀཱ, ས་ནྟི དེ་ཝཱ ཏཱ་ཝ་ཏིཾ་སཱ…པེ… ས་ནྟི དེ་ཝཱ ཏ་ཏུ་ཏྟ་རི. ཡ་ཐཱ་རཱུ་པཱ་ཡ ས་དྡྷཱ་ཡ ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པཱ ས་དྡྷཱ སཾ་ཝི་ཛྫ་ཏི. ཡ་ཐཱ་རཱུ་པེ་ན སཱི་ལེ་ན…པེ… སུ་ཏེ་ན…པེ… ཙཱ་གེ་ན…པེ… པ་ཉྙཱ་ཡ ས་མ་ནྣཱ་ག་ཏཱ ཏཱ དེ་ཝ་ཏཱ ཨི་ཏོ ཙུ་ཏཱ ཏ་ཏྠུ་པ་པ་ནྣཱ, མ་ཡ྄ཧ་མྤི ཏ་ཐཱ་རཱུ་པཱ པ་ཉྙཱ སཾ་ཝི་ཛྫ་ཏཱི’ཏི. ཏ་སྶ ཨ་ཏྟ་ནོ ཙ ཏཱ་ས་ཉྩ དེ་ཝ་ཏཱ་ནཾ ས་དྡྷ་ཉྩ སཱི་ལ་ཉྩ སུ་ཏ་ཉྩ ཙཱ་ག་ཉྩ པ་ཉྙ་ཉྩ ཨ་ནུ་སྶ་ར་ཏོ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི. ཨ་ཡཾ ཝུ་ཙྩ་ཏི, ཝི་སཱ་ཁེ, ‘ཨ་རི་ཡ་སཱ་ཝ་ཀོ དེ་ཝ་ཏུ་པོ་ས་ཐཾ ཨུ་པ་ཝ་ས་ཏི, དེ་ཝ་ཏཱ་ཧི ས་དྡྷིཾ སཾ་ཝ་ས་ཏི, དེ་ཝ་ཏཱ ཨཱ་ར་བྦྷ ཙི་ཏྟཾ པ་སཱི་ད་ཏི, པཱ་མོ་ཛྫཾ ཨུ་པྤ་ཛྫ་ཏི, ཡེ ཙི་ཏྟ་སྶ ཨུ་པ་ཀྐི་ལེ་སཱ ཏེ པ་ཧཱི་ཡ་ནྟི’. ཨེ་ཝཾ ཁོ, ཝི་སཱ་ཁེ, ཨུ་པ་ཀྐི་ལི་ཊྛ་སྶ ཙི་ཏྟ་སྶ ཨུ་པ་ཀྐ་མེ་ན པ་རི་ཡོ་ད་པ་ནཱ ཧོ་ཏི.
‘‘ས ཁོ སོ, ཝི་སཱ་ཁེ, ཨ་རི་ཡ་སཱ་ཝ་ཀོ ཨི་ཏི པ་ཊི་ས་ཉྩི་ཀྑ་ཏི – ‘ཡཱ་ཝ་ཛཱི་ཝཾ ཨ་ར་ཧ་ནྟོ པཱ་ཎཱ་ཏི་པཱ་ཏཾ པ་ཧཱ་ཡ པཱ་ཎཱ་ཏི་པཱ་ཏཱ པ་ཊི་ཝི་ར་ཏཱ ནི་ཧི་ཏ་ད་ཎྜཱ ནི་ཧི་ཏ་ས་ཏྠཱ ལ་ཛྫཱི ད་ཡཱ་པ་ནྣཱ ས་བྦ་པཱ་ཎ་བྷཱུ་ཏ་ཧི་ཏཱ་ནུ་ཀ་མྤཱི ཝི་ཧ་ར་ནྟི; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ པཱ་ཎཱ་ཏི་པཱ་ཏཾ པ་ཧཱ་ཡ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ནི་ཧི་ཏ་ད་ཎྜོ ནི་ཧི་ཏ་ས་ཏྠོ ལ་ཛྫཱི ད་ཡཱ་པ་ནྣོ ས་བྦ་པཱ་ཎ་བྷཱུ་ཏ་ཧི་ཏཱ་ནུ་ཀ་མྤཱི ཝི་ཧ་རཱ་མི. ཨི་མི་ནཱ་པི [ཨི་མི་ནཱ་པ་ཧཾ (སཱི.) ཨ. ནི. ༨.༤༡] ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ ཨ་དི་ནྣཱ་དཱ་ནཾ པ་ཧཱ་ཡ ཨ་དི་ནྣཱ་དཱ་ནཱ པ་ཊི་ཝི་ར་ཏཱ དི་ནྣཱ་དཱ་ཡཱི དི་ནྣ་པཱ་ཊི་ཀ་ངྑཱི, ཨ་ཐེ་ནེ་ན སུ་ཙི་བྷཱུ་ཏེ་ན ཨ་ཏྟ་ནཱ ཝི་ཧ་ར་ནྟི; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ ཨ་དི་ནྣཱ་དཱ་ནཾ པ་ཧཱ་ཡ ཨ་དི་ནྣཱ་དཱ་ནཱ པ་ཊི་ཝི་ར་ཏོ དི་ནྣཱ་དཱ་ཡཱི དི་ནྣ་པཱ་ཊི་ཀ་ངྑཱི, ཨ་ཐེ་ནེ་ན སུ་ཙི་བྷཱུ་ཏེ་ན ཨ་ཏྟ་ནཱ ཝི་ཧ་རཱ་མི. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ ཨ་བྲ་ཧྨ་ཙ་རི་ཡཾ པ་ཧཱ་ཡ བྲ་ཧྨ་ཙཱ་རཱི ཨཱ་རཱ་ཙཱ་རཱི [ཨ་ནཱ་ཙཱ་རཱི (པཱི.)] ཝི་ར་ཏཱ མེ་ཐུ་ནཱ གཱ་མ་དྷ་མྨཱ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ ཨ་བྲ་ཧྨ་ཙ་རི་ཡཾ པ་ཧཱ་ཡ བྲ་ཧྨ་ཙཱ་རཱི ཨཱ་རཱ་ཙཱ་རཱི ཝི་ར་ཏོ མེ་ཐུ་ནཱ གཱ་མ་དྷ་མྨཱ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ མུ་སཱ་ཝཱ་དཾ པ་ཧཱ་ཡ མུ་སཱ་ཝཱ་དཱ པ་ཊི་ཝི་ར་ཏཱ ས་ཙྩ་ཝཱ་དཱི ས་ཙྩ་ས་ནྡྷཱ ཐེ་ཏཱ པ་ཙྩ་ཡི་ཀཱ ཨ་ཝི་སཾ་ཝཱ་ད་ཀཱ ལོ་ཀ་སྶ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ མུ་སཱ་ཝཱ་དཾ པ་ཧཱ་ཡ མུ་སཱ་ཝཱ་དཱ པ་ཊི་ཝི་ར་ཏོ ས་ཙྩ་ཝཱ་དཱི ས་ཙྩ་ས་ནྡྷོ ཐེ་ཏོ པ་ཙྩ་ཡི་ཀོ ཨ་ཝི་སཾ་ཝཱ་ད་ཀོ ལོ་ཀ་སྶ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཾ པ་ཧཱ་ཡ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ པ་ཊི་ཝི་ར་ཏཱ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཾ པ་ཧཱ་ཡ སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ པ་ཊི་ཝི་ར་ཏོ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ ཨེ་ཀ་བྷ་ཏྟི་ཀཱ ར་ཏྟཱུ་པ་ར་ཏཱ ཝི་ར་ཏཱ ཝི་ཀཱ་ལ་བྷོ་ཛ་ནཱ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ ཨེ་ཀ་བྷ་ཏྟི་ཀོ ར་ཏྟཱུ་པ་ར་ཏོ ཝི་ར་ཏོ ཝི་ཀཱ་ལ་བྷོ་ཛ་ནཱ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ ན་ཙྩ་གཱི་ཏ་ཝཱ་དི་ཏ་ཝི་སཱུ་ཀ་ད་སྶ་ན་མཱ་ལཱ་ག་ནྡྷ་ཝི་ལེ་པ་ན་དྷཱ་ར་ཎ་མ་ཎྜ་ན་ཝི་བྷཱུ་ས་ན་ཊྛཱ་ནཱ པ་ཊི་ཝི་ར་ཏཱ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ ན་ཙྩ་གཱི་ཏ་ཝཱ་དི་ཏ་ཝི་སཱུ་ཀ་ད་སྶ་ན་མཱ་ལཱ་ག་ནྡྷ་ཝི་ལེ་པ་ན་དྷཱ་ར་ཎ་མ་ཎྜ་ན་ཝི་བྷཱུ་ས་ན་ཊྛཱ་ནཱ པ་ཊི་ཝི་ར་ཏོ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏི.
‘‘ཡཱ་ཝ་ཛཱི་ཝཾ ཨ་ར་ཧ་ནྟོ ཨུ་ཙྩཱ་ས་ཡ་ན་མ་ཧཱ་ས་ཡ་ནཾ པ་ཧཱ་ཡ ཨུ་ཙྩཱ་ས་ཡ་ན་མ་ཧཱ་ས་ཡ་ནཱ པ་ཊི་ཝི་ར་ཏཱ ནཱི་ཙ་སེ་ཡྻཾ ཀ་པྤེ་ནྟི མ་ཉྩ་ཀེ ཝཱ ཏི་ཎ་ས་ནྠཱ་ར་ཀེ ཝཱ; ཨ་ཧ་མྤ་ཛྫ ཨི་མ་ཉྩ ར་ཏྟིཾ ཨི་མ་ཉྩ དི་ཝ་སཾ ཨུ་ཙྩཱ་ས་ཡ་ན་མ་ཧཱ་ས་ཡ་ནཾ པ་ཧཱ་ཡ ཨུ་ཙྩཱ་ས་ཡ་ན་མ་ཧཱ་ས་ཡ་ནཱ པ་ཊི་ཝི་ར་ཏོ ནཱི་ཙ་སེ་ཡྻཾ ཀ་པྤེ་མི མ་ཉྩ་ཀེ ཝཱ ཏི་ཎ་ས་ནྠཱ་ར་ཀེ ཝཱ. ཨི་མི་ནཱ་པི ཨ་ངྒེ་ན ཨ་ར་ཧ་ཏཾ ཨ་ནུ་ཀ་རོ་མི, ཨུ་པོ་ས་ཐོ ཙ མེ ཨུ་པ་ཝུ་ཏྠོ བྷ་ཝི་སྶ་ཏཱི’’ཏི.
‘‘ཨེ་ཝཾ ཁོ, ཝི་སཱ་ཁེ, ཨ་རི་ཡུ་པོ་ས་ཐོ ཧོ་ཏི. ཨེ་ཝཾ ཨུ་པ་ཝུ་ཏྠོ ཁོ, ཝི་སཱ་ཁེ, ཨ་རི་ཡུ་པོ་ས་ཐོ མ་ཧ་པྥ་ལོ ཧོ་ཏི མ་ཧཱ་ནི་སཾ་སོ མ་ཧཱ་ཛུ་ཏི་ཀོ མ་ཧཱ་ཝི་པྥཱ་རོ’’.
‘‘ཀཱི་ཝ་མ་ཧ་པྥ་ལོ ཧོ་ཏི ཀཱི་ཝ་མ་ཧཱ་ནི་སཾ་སོ ཀཱི་ཝ་མ་ཧཱ་ཛུ་ཏི་ཀོ ཀཱི་ཝ་མ་ཧཱ་ཝི་པྥཱ་རོ’’? ‘‘སེ་ཡྻ་ཐཱ་པི, ཝི་སཱ་ཁེ, ཡོ ཨི་མེ་སཾ སོ་ལ༹་ས་ནྣཾ མ་ཧཱ་ཛ་ན་པ་དཱ་ནཾ པ་ཧཱུ་ཏ་ར་ཏྟ་ར་ཏ་ནཱ་ནཾ [པ་ཧཱུ་ཏ་ས་ཏྟ་ར་ཏ་ནཱ་ནཾ (ཀ. སཱི. སྱཱ. ཀཾ. པཱི.) ཊཱི་ཀཱ་ཡཾ ད་སྶི་ཏ་པཱ་ལི༹་ཡེ་ཝ. ཨ. ནི. ༨.༤༢] ཨི་སྶ་རི་ཡཱ་དྷི་པ་ཙྩཾ ར་ཛྫཾ ཀཱ་རེ་ཡྻ, སེ་ཡྻ་ཐི་དཾ – ཨ་ངྒཱ་ནཾ, མ་ག་དྷཱ་ནཾ, ཀཱ་སཱི་ནཾ, ཀོ་ས་ལཱ་ནཾ, ཝ་ཛྫཱི་ནཾ, མ་ལླཱ་ནཾ, ཙེ་ཏཱི་ནཾ, ཝ་ངྒཱ་ནཾ, ཀུ་རཱུ་ནཾ, པ་ཉྩཱ་ལཱ་ནཾ, མ་ཙྪཱ་ནཾ [མ་ཙྩཱ་ནཾ (ཀ.)], སཱུ་ར་སེ་ནཱ་ནཾ, ཨ་སྶ་ཀཱ་ནཾ, ཨ་ཝ་ནྟཱི་ནཾ, ག་ནྡྷཱ་རཱ་ནཾ, ཀ་མྦོ་ཛཱ་ནཾ, ཨ་ཊྛ་ངྒ་ས་མ་ནྣཱ་ག་ཏ་སྶ ཨུ་པོ་ས་ཐ་སྶ ཨེ་ཏཾ [ཨེ་ཀཾ (ཀ.)] ཀ་ལཾ ནཱ་གྒྷ་ཏི སོ་ལ༹་སིཾ. ཏཾ ཀི་སྶ ཧེ་ཏུ? ཀ་པ་ཎཾ, ཝི་སཱ་ཁེ, མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’.
‘‘ཡཱ་ནི, ཝི་སཱ་ཁེ, མཱ་ནུ་ས་ཀཱ་ནི པ་ཉྙཱ་ས ཝ་སྶཱ་ནི, ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ [ར་ཏྟི་དི་ཝོ (ཀ.)]. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཱ་ནི པ་ཉྩ ཝ་སྶ་ས་ཏཱ་ནི ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’’.
‘‘ཡཾ, ཝི་སཱ་ཁེ, མཱ་ནུ་ས་ཀཾ ཝ་སྶ་ས་ཏཾ, ཏཱ་ཝ་ཏིཾ་སཱ་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཾ ཝ་སྶ་ས་ཧ་སྶཾ ཏཱ་ཝ་ཏིཾ་སཱ་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཏཱ་ཝ་ཏིཾ་སཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’’.
‘‘ཡཱ་ནི, ཝི་སཱ་ཁེ, མཱ་ནུ་ས་ཀཱ་ནི དྭེ ཝ་སྶ་ས་ཏཱ་ནི, ཡཱ་མཱ་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཱ་ནི དྭེ ཝ་སྶ་ས་ཧ་སྶཱ་ནི ཡཱ་མཱ་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཡཱ་མཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’’.
‘‘ཡཱ་ནི, ཝི་སཱ་ཁེ, མཱ་ནུ་ས་ཀཱ་ནི ཙ་ཏྟཱ་རི ཝ་སྶ་ས་ཏཱ་ནི, ཏུ་སི་ཏཱ་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཱ་ནི ཙ་ཏྟཱ་རི ཝ་སྶ་ས་ཧ་སྶཱ་ནི ཏུ་སི་ཏཱ་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཏུ་སི་ཏཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’’.
‘‘ཡཱ་ནི, ཝི་སཱ་ཁེ, མཱ་ནུ་ས་ཀཱ་ནི ཨ་ཊྛ ཝ་སྶ་ས་ཏཱ་ནི, ནི་མྨཱ་ན་ར་ཏཱི་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཱ་ནི ཨ་ཊྛ ཝ་སྶ་ས་ཧ་སྶཱ་ནི ནི་མྨཱ་ན་ར་ཏཱི་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ ནི་མྨཱ་ན་ར་ཏཱི་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡ’’’.
‘‘ཡཱ་ནི, ཝི་སཱ་ཁེ, མཱ་ནུ་ས་ཀཱ་ནི སོ་ལ༹་ས ཝ་སྶ་ས་ཏཱ་ནི, པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ. ཏཱ་ཡ ར་ཏྟི་ཡཱ ཏིཾ་ས་ར་ཏྟི་ཡོ མཱ་སོ. ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ. ཏེ་ན སཾ་ཝ་ཙྪ་རེ་ན དི་བྦཱ་ནི སོ་ལ༹་ས ཝ་སྶ་ས་ཧ་སྶཱ་ནི པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ. ཋཱ་ནཾ ཁོ པ་ནེ་ཏཾ, ཝི་སཱ་ཁེ, ཝི་ཛྫ་ཏི ཡཾ ཨི་དྷེ་ཀ་ཙྩོ ཨི་ཏྠཱི ཝཱ པུ་རི་སོ ཝཱ ཨ་ཊྛ་ངྒ་ས་མ་ནྣཱ་ག་ཏཾ ཨུ་པོ་ས་ཐཾ ཨུ་པ་ཝ་སི་ཏྭཱ ཀཱ་ཡ་སྶ བྷེ་དཱ པ་རཾ མ་ར་ཎཱ པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫེ་ཡྻ. ཨི་དཾ ཁོ པ་ནེ་ཏཾ, ཝི་སཱ་ཁེ, ས་ནྡྷཱ་ཡ བྷཱ་སི་ཏཾ – ‘ཀ་པ་ཎཾ མཱ་ནུ་ས་ཀཾ ར་ཛྫཾ དི་བྦཾ སུ་ཁཾ ཨུ་པ་ནི་དྷཱ་ཡཱ’’’ཏི.
‘‘པཱ་ཎཾ ན ཧ་ཉྙེ [ན ཧཱ་ནེ (སཱི. པཱི.), ན ཧ་ནེ (ཀ.)] ན ཙ་དི་ནྣ་མཱ་དི་ཡེ,
མུ་སཱ ན བྷཱ་སེ ན ཙ མ་ཛྫ་པོ སི་ཡཱ;
ཨ་བྲ་ཧྨ་ཙ་རི་ཡཱ ཝི་ར་མེ་ཡྻ མེ་ཐུ་ནཱ,
ར་ཏྟིཾ ན བྷུ་ཉྫེ་ཡྻ ཝི་ཀཱ་ལ་བྷོ་ཛ་ནཾ.
‘‘མཱ་ལཾ ན དྷཱ་རེ ན ཙ ག་ནྡྷ་མཱ་ཙ་རེ,
མ་ཉྩེ ཚ་མཱ་ཡཾ ཝ ས་ཡེ་ཐ ས་ནྠ་ཏེ;
ཨེ་ཏ་ཉྷི ཨ་ཊྛ་ངྒི་ཀ་མཱ་ཧུ་པོ་ས་ཐཾ,
བུ་དྡྷེ་ན དུ་ཀྑ་ནྟ་གུ་ནཱ པ་ཀཱ་སི་ཏཾ.
‘‘ཙ་ནྡོ ཙ སཱུ་རི་ཡོ ཙ ཨུ་བྷོ སུ་ད་སྶ་ནཱ,
ཨོ་བྷཱ་ས་ཡཾ ཨ་ནུ་པ་རི་ཡ་ནྟི ཡཱ་ཝ་ཏཱ;
ཏ་མོ་ནུ་དཱ ཏེ པ་ན ཨ་ནྟ་ལི་ཀྑ་གཱ,
ན་བྷེ པ་བྷཱ་ས་ནྟི དི་སཱ་ཝི་རོ་ཙ་ནཱ.
‘‘ཨེ་ཏ་སྨིཾ ཡཾ ཝི་ཛྫ་ཏི ཨ་ནྟ་རེ དྷ་ནཾ,
མུ་ཏྟཱ མ་ཎི ཝེ་ལུ༹་རི་ཡ་ཉྩ བྷ་དྡ་ཀཾ;
སི་ངྒཱི སུ་ཝ་ཎྞཾ ཨ་ཐ ཝཱ་པི ཀ་ཉྩ་ནཾ,
ཡཾ ཛཱ་ཏ་རཱུ་པཾ ཧ་ཊ་ཀ་ནྟི ཝུ་ཙྩ་ཏི.
‘‘ཨ་ཊྛ་ངྒུ་པེ་ཏ་སྶ ཨུ་པོ་ས་ཐ་སྶ,
ཀ་ལ་མྤི ཏེ ནཱ་ནུ་བྷ་ཝ་ནྟི སོ་ལ༹་སིཾ;
ཙ་ནྡ་པྤ་བྷཱ ཏཱ་ར་ག་ཎཱ ཙ ས་བྦེ.
‘‘ཏ་སྨཱ ཧི ནཱ་རཱི ཙ ན་རོ ཙ སཱི་ལ་ཝཱ,
ཨ་ཊྛ་ངྒུ་པེ་ཏཾ ཨུ་པ་ཝ་སྶུ་པོ་ས་ཐཾ;
པུ་ཉྙཱ་ནི ཀ་ཏྭཱ་ན སུ་ཁུ་དྲ་ཡཱ་ནི,
ཨ་ནི་ནྡི་ཏཱ ས་གྒ་མུ་པེ་ནྟི ཋཱ་ན’’ནྟི. ད་ས་མཾ;
མ་ཧཱ་ཝ་གྒོ ས་ཏྟ་མོ.