๕. ปกิณฺณกนิทฺเทโส

๕๓. สงฺฆิกํ ครุภณฺฑํ โย, เทติ อญฺญสฺส อิสฺสโร;

ถุลฺลจฺจยํ ยถาวตฺถุํ, เถยฺยา ปาราชิกาทิปิ.

๕๔. กุสาทิมยจีรานิ, กมฺพลํ เกสวาลชํ;

สมยํ วินา ธารยโต, ลูกปกฺขาชินกฺขิปํ.

๕๕. สตฺถกมฺเม วตฺถิกมฺเม, สํ นิมิตฺตญฺจ ฉินฺทโต;

ถุลฺลจฺจยํ มนุสฺสานํ, มํสาทิโภชเนปิ วา.

๕๖. กทเลรกกฺกทุสฺสานิ, โปตฺถกํ สพฺพนีลกํ;

สพฺพปีตาทิกญฺจาปิ, ธารยนฺตสฺส ทุกฺกฏํ.

๕๗. หตฺถิสฺสุรคโสณานํ, สีหพฺยคฺฆจฺฉทีปินํ;

ตรจฺฉสฺส จ มํสาทึ, อุทฺทิสฺสกตกมฺปิ จ.

๕๘. อนาปุจฺฉิตมํสญฺจ, ภุญฺชโต ทุกฺกฏํ สิยา;

ยาตานุปุพฺพํ หิตฺวาน, ทกติตฺถาทิกํ วเช.

๕๙. สหสา วุพฺภชิตฺวาน, ปวิเส นิกฺขเมยฺย วา;

วจฺจปสฺสาวกุฏิกํ, วินา อุกฺกาสิกํ วิเส.

๖๐. นิตฺถุนนฺโต กเร วจฺจํ, ทนฺตกฏฺฐญฺจ ขาทยํ;

วจฺจปสฺสาวโทณีนํ, พหิ วจฺจาทิกํ กเร.

๖๑. ขเรน จาวเลเขยฺย, กฏฺฐํ ปาเตยฺย กูปเก;

อูหตญฺจ น โธเวยฺย, อุกฺลาปญฺจ น โสธเย.

๖๒. ทกกิจฺจํ กโรนฺตสฺส, กตฺวา ‘‘จปุจปู’’ติ จ;

อนชฺฌิฏฺโฐว เถเรน, ปาติโมกฺขมฺปิ อุทฺทิเส.

๖๓. อนาปุจฺฉาย ปญฺหสฺส, กถเน วิสฺสชฺชเนปิ จ;

สชฺฌายกรเณ ทีป-ชาลเน วิชฺฌาปเนปิ จ.

๖๔. วาตปานกวาฏานิ, วิวเรยฺย ถเกยฺย วา;

วนฺทนาทึ กเร นคฺโค, คมนํ โภชนาทิกํ.

๖๕. ปริกมฺมํ กเร กาเร, ติปฏิจฺฉนฺนกํ วินา;

กายํ นหายํ ฆํเสยฺย, กุฏฺเฏ ถมฺเภ ตรุมฺหิ วา.

๖๖. กุรุวินฺทกสุตฺเตน, อญฺญมญฺญสฺส กายโต;

อคิลาโน พหาราเม, จเรยฺย สอุปาหโน.

๖๗. อุปาหนํ โย ธาเรติ, สพฺพนีลาทิกมฺปิ จ;

นิมิตฺตํ อิตฺถิยา รตฺโต, มุขํ วา ภิกฺขทายิยา.

๖๘. อุชฺฌานสญฺญี อญฺญสฺส, ปตฺตํ วา อตฺตโน มุขํ;

อาทาสาทิมฺหิ ปสฺเสยฺย, อุจฺจาสนมหาสเน.

๖๙. นิสชฺชาทึ กโรนฺตสฺส, ทุกฺกฏํ วนฺทเนปิ จ;

อุกฺขิตฺตานุปสมฺปนฺน-นานาสํวาสกาทินํ.

๗๐. เอกโต ปณฺฑกิตฺถีหิ, อุภโตพฺยญฺชเนน วา;

ทีฆาสเน นิสีเทยฺย, อทีเฆ อาสเน ปน.

๗๑. อสมานาสนิเกน, มญฺจปีเฐ สเยยฺย วา;

กุลสงฺคหตฺถํ ททโต, ผลปุปฺผาทิกมฺปิ จ.

๗๒. คนฺถิมาทึ กเร กาเร, ชินวาริตปจฺจเย;

ปริภุญฺเชยฺย อพฺยตฺโต, อนิสฺสาย วเสยฺย วา.

๗๓. อนุญฺญาเตหิ อญฺญสฺส, เภสชฺชํ วา กเร วเท;

กเร สาปตฺติโก ภิกฺขุ, อุโปสถปฺปวารณํ.

๗๔. ทฺวารพนฺธาทิเก ฐาเน, ปริวตฺตกวาฏกํ;

อปิธาย วินาโภคํ, นิโยคํ วา สเย ทิวา.

๗๕. ธญฺญิตฺถิรูปรตนํ, อาวุธิตฺถิปสาธนํ;

ตูริยภณฺฑํ ผลํ รุกฺเข, ปุพฺพณฺณาทิญฺจ อามเส.

๗๖. สสิตฺโถทกเตเลหิ, ผณหตฺถผเณหิ วา;

เกสโมสณฺฐเนกสฺมึ, ภาชเน โภชเนปิ จ.

๗๗. เอกตฺถรณปาวุรณา, สเยยฺยุํ เทฺวกมญฺจเก;

ทนฺตกฏฺฐญฺจ ขาเทยฺย, อธิกูนํ ปมาณโต.

๗๘. โยเชติ วา โยชาเปติ, นจฺจํ คีตญฺจ วาทิตํ;

ทสฺสนํ สวนํ เตสํ, กโรนฺตสฺส จ ทุกฺกฏํ.

๗๙. วีหาทิโรปิเม จาปิ, พหิปาการกุฏฺฏเก;

วจฺจาทิฉฑฺฑนาทิมฺหิ, ทีฆเกสาทิธารเณ.

๘๐. นขมฏฺฐกรณาทิมฺหิ, สมฺพาเธ โลมหารเณ;

ปริกมฺมกตํ ภูมึ, อกฺกเม สอุปาหโน.

๘๑. อโธตอลฺลปาเทหิ, สงฺฆิกํ มญฺจปีฐกํ;

ปริกมฺมกตํ ภิตฺตึ, อามสนฺตสฺส ทุกฺกฏํ.

๘๒. สงฺฆาฏิยาปิ ปลฺลตฺเถ, ทุปฺปริภุญฺเชยฺย จีวรํ;

อกายพนฺธโน คามํ, วเช กตฺวาน วจฺจกํ.

๘๓. นาจเมยฺย ทเก สนฺเต, สมาเทยฺย อกปฺปิเย;

เทสนาโรจนาทิมฺหิ, สภาคาปตฺติยาปิ จ.

๘๔. น วเส วสฺสํ วิสํวาเท, สุทฺธจิตฺเต ปฏิสฺสวํ;

วสฺสํ วสิตฺวา คมเน, อนนุญฺญาตกิจฺจโต.

๘๕. วินาปทํ ตรุสฺสุทฺธํ, โปริสมฺหาภิรูหเณ;

อปริสฺสาวโนทฺธานํ, วเช ตํ ยาจโต น เท.

๘๖. อตฺตโน ฆาตเน อิตฺถิ-รูปาทึ การเยยฺย วา;

หิตฺวา มาลาทิกํ จิตฺตํ, ชาตกาทึ สยํ กเร.

๘๗. ภุญฺชนฺตมุฏฺฐเป ตสฺส, สาลาทีสุ นิสีทโต;

วุฑฺฒานํ ปน โอกาสํ, อทตฺวา วาปิ ทุกฺกฏํ.

๘๘. ยานาทิมภิรูเหยฺย, กลฺลโก รตนตฺตยํ;

อารพฺภ วเท ทวญฺญ-ปริสาโยปลาลเน.

๘๙. กายาทึ วิวริตฺวาน, ภิกฺขุนีนํ น ทสฺสเย;

วาเจ โลกายตํ ปลิตํ, คเณฺหยฺย คณฺหาเปยฺย วา.

๙๐. ยตฺถ กตฺถจิ เปฬายํ, ภุญฺชโต ปตฺตหตฺถโก;

วาตปานกวาฏํ วา, ปณาเม โสทกมฺปิ จ.

๙๑. อุเณฺหยฺย ปฏิสาเมยฺย, อติอุเณฺหยฺย โวทกํ;

ฐเปยฺย ภูมิยํ ปตฺตํ, องฺเก วา มญฺจปีฐเก.

๙๒. มิฑฺฒนฺเต ปริภณฺฑนฺเต, ปาเท ฉตฺเต ฐเปติ วา;

จลกาทึ ฐเป ปตฺตํ, ปตฺเต วา หตฺถโธวเน.

๙๓. ปตฺเตน นีหรนฺตสฺส, อุจฺฉิฏฺฐมุทกมฺปิ จ;

อกปฺปิยมฺปิ ปตฺตํ วา, ปริภุญฺเชยฺย ทุกฺกฏํ.

๙๔. วเท ‘‘ชีวา’’ติ ขิปิเต, น สิกฺขติ อนาทโร;

ปริมณฺฑลกาทิมฺหิ, เสขิเย ทุกฺกฏํ สิยา.

๙๕. โย ภณฺฑคาเร ปยุโตว ภณฺฑกํ,

มาตูน ปาจิตฺติยมสฺส โคปเย;

ทวาย หีเนนปิ ชาติอาทินา,

วเทยฺย ทุพฺภาสิตมุตฺตมมฺปิ โยติ.