๔. ปาจิตฺติยนิทฺเทโส

๓๐. สมฺปชานมุสาวาเท, ปาจิตฺติยมุทีริตํ;

ภิกฺขุญฺจ โอมสนฺตสฺส, เปสุญฺญหรเณปิ จ.

๓๑. ฐเปตฺวา ภิกฺขุนึ ภิกฺขุํ, อญฺเญน ปิฏกตฺตยํ;

ปทโสธมฺมํ ภณนฺตสฺส, ปาจิตฺติยมุทีริตํ.

๓๒. อนุปสมฺปนฺเนเนว, สยิตฺวาน ติรตฺติยํ;

ปาจิตฺติ สหเสยฺยาย, จตุตฺถตฺถงฺคเต ปุน.

๓๓. อิตฺถิยา เอกรตฺตมฺปิ, เสยฺยํ กปฺปยโตปิ วา;

เทเสนฺตสฺส วินา วิญฺญุํ, ธมฺมญฺจ ฉปฺปทุตฺตรึ.

๓๔. ทุฏฺฐุลฺลํ ภิกฺขุโน วชฺชํ, ภิกฺขุสมฺมุติยา วินา;

อภิกฺขุโน วทนฺตสฺส, ปาจิตฺติยมุทีริตํ.

๓๕. ขเณยฺย วา ขณาเปยฺย, ปถวิญฺจ อกปฺปิยํ;

ภูตคามํ วิโกเปยฺย, ตสฺส ปาจิตฺติยํ สิยา.

๓๖. อชฺโฌกาเส ตุ มญฺจาทึ, กตฺวา สนฺถรณาทิกํ;

สงฺฆิกํ ยาติ ปาจิตฺติ, อกตฺวาปุจฺฉนาทิกํ.

๓๗. สงฺฆิกาวสเถ เสยฺยํ, กตฺวา สนฺถรณาทิกํ;

อกตฺวาปุจฺฉนาทึ โย, ยาติ ปาจิตฺติ ตสฺสปิ.

๓๘. ชานํ สปฺปาณกํ โตยํ, ปาจิตฺติ ปริภุญฺชโต;

อญฺญาติกา ภิกฺขุนิยา, ฐเปตฺวา ปาริวตฺตกํ.

๓๙. จีวรํ เทติ ปาจิตฺติ, จีวรํ สิพฺพโตปิ จ;

อติริตฺตํ อกาเรตฺวา, ปวาเรตฺวาน ภุญฺชโต.

๔๐. ภิกฺขุํ อาสาทนาเปกฺโข, ปวาเรติ ปวาริตํ;

อนติริตฺเตน ภุตฺเต ตุ, ปาจิตฺติยมุทีริตํ.

๔๑. สนฺนิธิโภชนํ ภุญฺเช, วิกาเล ยาวกาลิกํ;

ภุญฺชโต วาปิ ปาจิตฺติ, อคิลาโน ปณีตกํ.

๔๒. วิญฺญาเปตฺวาน ภุญฺเชยฺย, สปฺปิภตฺตาทิกมฺปิ จ;

อปฺปฏิคฺคหิตํ ภุญฺเช, ทนฺตกฏฺโฐทกํ วินา.

๔๓. ติตฺถิยสฺส ทเท กิญฺจิ, ภุญฺชิตพฺพํ สหตฺถโต;

นิสชฺชํ วารโห กปฺเป, มาตุคาเมน เจกโต.

๔๔. สุราเมรยปาเนปิ, ปาจิตฺติยมุทีริตํ;

องฺคุลิปโตทเก จาปิ, หสธมฺเมปิ โจทเก.

๔๕. อนาทเรปิ ปาจิตฺติ, ภิกฺขุํ ภีสยโตปิ วา;

ภยานกํ กถํ กตฺวา, ทสฺเสตฺวา วา ภยานกํ.

๔๖. ฐเปตฺวา ปจฺจยํ กิญฺจิ, อคิลาโน ชเลยฺย วา;

โชตึ ชลาปเยยฺยาปิ, ตสฺส ปาจิตฺติยํ สิยา.

๔๗. กปฺปพินฺทุมนาทาย, นวจีวรโภคิโน;

หสาเปกฺขสฺส ปาจิตฺติ, ภิกฺขุโน จีวราทิกํ.

๔๘. อปเนตฺวา นิเธนฺตสฺส, นิธาเปนฺตสฺส วา ปน;

ชานํ ปาณํ มาเรนฺตสฺส, ติรจฺฉานคตมฺปิ จ.

๔๙. ฉาเทตุกาโม ฉาเทติ, ทุฏฺฐุลฺลํ ภิกฺขุโนปิ จ;

คามนฺตรคตสฺสาปิ, สํวิธายิตฺถิยา สห.

๕๐. ภิกฺขุํ ปหรโต วาปิ, ตลสตฺติกมุคฺคิเร;

โจเทติ วา โจทาเปติ, ครุกามูลเกนปิ.

๕๑. กุกฺกุจฺจุปฺปาทเน จาปิ, ภณฺฑนตฺถายุปสฺสุตึ;

โสตุํ ภณฺฑนชาตานํ, ยาติ ปาจิตฺติยํ สิยา.

๕๒. สงฺฆสฺส ลาภํ ปริณามิตํ ตุ,

นาเมติ โย ตํ ปรปุคฺคลสฺส;

ปุจฺฉํ อกตฺวาปิ จ สนฺตภิกฺขุํ,

ปาจิตฺติ คามสฺส คเต วิกาเลติ.