๔๘. สนฺโตสนิทฺเทสวณฺณนา

๔๕๙. ‘‘จตฺตาริมานิ, ภิกฺขเว, อปฺปานิ เจว สุลภานิ จ, ตานิ จ อนวชฺชานิ. กตมานิ จตฺตาริ? ปํสุกูลํ, ภิกฺขเว, จีวรานํ อปฺปญฺจ สุลภญฺจ, ตญฺจ อนวชฺชํ. ปิณฺฑิยาโลโป, ภิกฺขเว, โภชนานํ อปฺปญฺจ สุลภญฺจ, ตญฺจ อนวชฺชํ. รุกฺขมูลํ, ภิกฺขเว, เสนาสนานํ อปฺปญฺจ สุลภญฺจ, ตญฺจ อนวชฺชํ. ปูติมุตฺตเภสชฺชํ, ภิกฺขเว, เภสชฺชานํ อปฺปญฺจ สุลภญฺจ, ตญฺจ อนวชฺชํ. อิมานิ โข, ภิกฺขเว, จตฺตาริ อปฺปานิ เจว สุลภานิ จ, ตานิ จ อนวชฺชานี’’ติ (อ. นิ. ๔.๒๗; อิติวุ. ๑๐๑) วจนโต ‘‘อปฺเปนา’’ติอาทิ วุตฺตํ.

สนฺตุฏฺโฐติ เอตฺถ ยถาลาภยถาพลยถาสารุปฺปสนฺโตสานํ วเสน เอเกกสฺมึ ปจฺจเย ตโย ตโย กตฺวา จตูสุ ปจฺจเยสุ ทฺวาทส สนฺโตสา โหนฺติ. มตฺตญฺญูติ เอตฺถ (ม. นิ. อฏฺฐ. ๑.๔๒๒; สํ. นิ. อฏฺฐ. ๓.๔.๒๓๙; อ. นิ. อฏฺฐ. ๒.๓.๑๖; อิติวุ. อฏฺฐ. ๒๘; ธ. ส. อฏฺฐ. ๑๒๔-๑๓๔) จตฺตาโร มตฺตา ปริเยสนมตฺตา ปฏิคฺคหณมตฺตา ปริโภคมตฺตา วิสฺสชฺชนมตฺตาติ. อิตรีตเรน ยาเปนฺโต สุภโร นาม. สนฺโตสวินิจฺฉโย.

สนฺโตสนิทฺเทสวณฺณนา นิฏฺฐิตา.