๓๓. กายพนฺธนนิทฺเทสวณฺณนา

๒๓๕. อกายพนฺธโนติ กายพนฺธนํ อพนฺธิตฺวาติ อตฺโถ. ตโต ปฏฺฐาย จีวรํ ปารุปิตพฺพํ, ตโต ปฏฺฐาย เอว กายพนฺธนํ พนฺธิตพฺพํ. ‘‘น ภิกฺขเว อกายพนฺธเนน คาโม ปวิสิตพฺโพ. โย ปวิเสยฺย, อาปตฺติ ทุกฺกฏสฺสา’’ติ (จูฬว. ๒๗๘) หิ วุตฺตํ. ตตฺเถวาสติยา คโตติ อสติยา คโต ยตฺถ สรติ, ตตฺเถว พนฺธิตพฺพํ. สริตฺวา ปน ยาว น พนฺธติ, ตาว ปิณฺฑาย จริตุํ น วฏฺฏติ. ยทิ อนฺโตคาเม สรติ, กายพนฺธเน สติ เอกมนฺเต ฐตฺวา พนฺธิตพฺพํ, อสติ เจ นิกฺขมิตฺวา พนฺธิตฺวา ปุน ปิณฺฑาย ปวิสิตพฺพนฺติ วทนฺติ.

๒๓๖. ‘‘อนุชานามิ, ภิกฺขเว, เทฺว กายพนฺธนานิ ปฏฺฏิกํ สูกรนฺตก’’นฺติ (จูฬว. ๒๗๘) วุตฺตตฺตา ‘‘ทุวิธ’’นฺติ วุตฺตํ. ตตฺถ สูกรนฺตํ นาม กุญฺจิกาโกสกา วิย อนฺเต สุสิรํ กตฺวา โกฏฺฏิตํ. รชฺชุ จ เอกาติ เอกวฏฺฏา รชฺชุ จ. ตทนุโลมิกาติ เตสํ ทฺวินฺนํ อนุโลมิกา.

๒๓๗. มจฺฉกณฺฑกขชฺชุรี-ปตฺตา มฏฺฐา จ ปฏฺฏิกาติ เอตฺถ (จูฬว. อฏฺฐ. ๒๗๘) เอเต มจฺฉกณฺฏกาทโย มฏฺฐา วิการรหิตา ปฏฺฏิกา จ ตทนฺโตคธาติ อธิปฺปาโย. ลพฺภา ทสา จตสฺโสติ เอกาย วา ทฺวีสุ วา ตีสุ วา กถา เอว นตฺถีติ อธิปฺปาโย, ตโต ปรํ น วฏฺฏติ. อนฺเตสูติ อุโภสุ อนฺเตสุ. คุณสุตฺตกนฺติ ทิคุณสุตฺตกํ.

๒๓๙. มกรมุขาทินฺติ อาทิ-สทฺเทน เทฑฺฑุภสีสํ คหิตํ. อุภนฺเตติ อุโภสุ อนฺเตสุ. กสฺสาติ? วิธสฺส. ฆฏกาติ ฆฏกโต. เลขาติ เลขาย. ฆฏกโต จ เลขาย จ อญฺญํ จิตฺตกํ น กปฺปตีติ อตฺโถ.

๒๔๐. เทฑฺฑุภกนฺติ (จูฬว. ๒๗๘; จูฬว. อฏฺฐ. ๒๗๘) อุทกสปฺปสิรสทิสํ. มุรชนฺติ พหุรชฺชุเก เอกโต สงฺกฑฺฒิตฺวา เอกาย รชฺชุยา ปลิเวเฐตฺวา กตรชฺชุ. มทฺทวีณนฺติ ปามงฺคสทิสํ. กลาพุกนฺติ อเนกวฏฺฏํ. เอตานิ ปน สพฺพานิ น กปฺปนฺติ. ทสาสุ เทฺว มชฺฌิมาติ มุรชํ มทฺทวีณนฺติ เทฺว มชฺฌิมา เอว. กปฺปเรติ กปฺปนฺตีติ อตฺโถ.

๒๔๑. คณฺฐิโย จาปีติ (จูฬว. ๒๗๙) จีวรคณฺฐิโยปิ. เวฬุอาทิมยา กปฺปนฺตีติ ปสงฺเคน วุตฺตํ. กายพนฺธนวินิจฺฉโย.

กายพนฺธนนิทฺเทสวณฺณนา นิฏฺฐิตา.

ปฐมภาณวารํ.