๒๙. มิจฺฉาชีววิวชฺชนานิทฺเทสวณฺณนา

๒๐๙. จุณฺณนฺติ สิรีสจุณฺณาทิกนฺติ อตฺโถ. มตฺติกาติ ปกติมตฺติกา วา ปญฺจวณฺณา วา สุทฺธา กุงฺกุฏฺฐอาทิกา วา. กุลสงฺคหาติ เอเตหิ สงฺคหิตานํ สนฺติเก ลาภาสาย กุลสงฺคหตฺถนฺติ อตฺโถ. เอตฺถ ปน อิเมหิ สงฺคหิตานํ สนฺติเก ‘‘กิญฺจิ ลภิสฺสามี’’ติ สงฺฆิกํ วา ปุคฺคลิกํ วา ทาตุํ น วฏฺฏติ เอว. อิมินา ปน นเยน ลทฺธํ ปญฺจนฺนมฺปิ สหธมฺมิกานํ น วฏฺฏติ, มิจฺฉาชีวญฺจ โหติ.

๒๑๐-๒๑๑. ลาภาสาย ทายกานํ ทารเก อุกฺขิปิตฺวา ปริภฏภาโว ปาริภฏกตา, ตาย ปาริภฏกตาย น ชีวเยติ สมฺพนฺโธ. เสเสสุปิ เอเสว นโย. เขตฺตาทีสุ เปสิตสฺส คมนํ ปเหณกมฺมํ. สาสนปฺปฏิสาสนหรณํ ทูตกมฺมํ. เปสิตสฺส เคหโต เคหคมนํ ชงฺฆเปสนิยํ. ลาภาสาย ลญฺชทานมนุปฺปทานํ. อญฺเญน วาปีติ องฺควิชฺชาทินา.

๒๑๒. วิญฺญตฺตีติ (ปารา. ๕๑๕ อาทโย; ปารา. อฏฺฐ. ๒.๕๑๕ อาทโย) อญฺญาตกวิญฺญตฺติ. อเนสนาติ ปุพฺเพ วุตฺเตน ปุปฺผทานาทินา ปจฺจเยสนา. กุหนาทีหีติ (วิภ. ๘๖๑; วิภ. อฏฺฐ. ๘๖๑; มหานิ. ๘๗) กุหนา ลปนา เนมิตฺตกตา นิปฺเปสิกตา ลาเภน ลาภํ นิชิคีสนตาติ อิเมหิ ปญฺจหิ วตฺถูหีติ อตฺโถ. มิจฺฉาชีววินิจฺฉโย.

มิจฺฉาชีววิวชฺชนานิทฺเทสวณฺณนา นิฏฺฐิตา.