๒๖. สมานาสนิกนิทฺเทสวณฺณนา

๑๙๕. ติณฺณํ วสฺสานํ อนฺตรํ ติวสฺสนฺตรํ. ‘‘อนุชานามิ, ภิกฺขเว, ติวสฺสนฺตเรน สห นิสีทิตุ’’นฺติ (จูฬว. ๓๒๐) หิ วุตฺตํ. โย ทฺวีหิ วสฺเสหิ (จูฬว. อฏฺฐ. ๓๒๐) วุฑฺโฒ วา นโว วา, โส ติวสฺสนฺตโร นาม.

๑๙๖. มุนีติ พุทฺธมุนิ. สพฺเพเหวาติ อนุปสมฺปนฺเนหิปิ.

๑๙๗. อนฺตนฺติ ปจฺฉิมํ. ‘‘อนุชานามิ, ภิกฺขเว, ยํ ติณฺณํ ปโหติ, เอตฺตกํ ปจฺฉิมํ ทีฆาสน’’นฺติ (จูฬว. ๓๒๐) วุตฺตตฺตา ยํ ติณฺณํ ปโหติ, เอตํ สํหาริมํ วา โหตุ อสํหาริมํ วา, ตถารูเปสุ ผลกขณฺเฑสุปิ นิสีทิตุํ วฏฺฏติ. ทฺวินฺนนฺติ ทฺวินฺนํ สมานาสนิกานํ. ‘‘อนุชานามิ, ภิกฺขเว, ทุวคฺคสฺส มญฺจํ ทุวคฺคสฺส ปีฐ’’นฺติ (จุฬว. ๓๒๐) วุตฺตตฺตา เทฺว สมานาสนิกา สห นิสีทิตุํ ลภนฺติ. อญฺเญหิ อสมานาสนิเกหิ, อนุปสมฺปนฺนาทีหิ วา เทฺว หุตฺวาปิ นิสีทิตุํ น ลภนฺติ. สมานาสนิกวินิจฺฉโย.

สมานาสนิกนิทฺเทสวณฺณนา นิฏฺฐิตา.