ปนฺนรสโม ปริจฺเฉโท

๑๕. ราสิสงฺคหกถา

๕๑๓. เตตฺตึส เจว ทฺวตฺตึส, เอกตึส จ ตึส จ;

เอกทฺวตฺตึสหีนา จ, ตึส ธมฺมานวชฺชเก.

๕๑๔. ทส ธมฺมา ตุ สาวชฺเช, ฉปญฺจจตุราธิกา;

เอกาทส ทส นว, สตฺตธาเหตุเก ปน.

๕๑๕. อิตฺถํ จุทฺทสธา ภินฺนา, โกฏฺฐาสา ตุ สรูปโต;

วิภตฺตา เตหิ ยุตฺตา จ, จิตฺตุปฺปาทา ยถากฺกมํ.

๕๑๖. ติกฏฺฐกา ปญฺจวีส, ทส ปญฺจาธิกา นว;

อฏฺฐารเสติ สตฺเตเต, อนวชฺชา ตเถตเร.

๕๑๗. เทฺว จตฺตาโร ฉเฬกํ เทฺว,

ปญฺจาถ ทสธาปเร;

สาวชฺชาเหตุกา เจติ,

โกฏฺฐาสา โหนฺติ จุทฺทส.

๕๑๘. นว จาปิ ฉ จตฺตาโร, จตุปญฺจฉสตฺตกา;

นว เทฺว เทฺว ตเถโก จ, เยวาปนกสงฺคหา.

๕๑๙. เตหิ ยุตฺตา ปนฏฺฐาถ, วีเสกตึส มานสา;

เทฺว เทฺว เทฺว ตีณิ เจกํ เทฺว, อฏฺฐ ทส ยถากฺกมํ.

๕๒๐. สตฺตตึสกโต ยาว, เอกตึสานวชฺชเก;

ติกฏฺฐกาทิเก สตฺต, ฐิตา นิยตสงฺคหา.

๕๒๑. ปาเปสุ วีส เจกูน-วีสฏฺฐารส โสฬส;

จตุธา ทฺวีสุ จตูสุ, จตูสุ ทฺวีสุ จฏฺฐิตา.

๕๒๒. เอกทฺวิปญฺจทสสุ, จ ทฺวิธาเหตุเกสุ จ;

ติกเทฺวกาธิกา ธมฺมา, ทสฏฺฐ จ ยถากฺกมํ.

๕๒๓. ปญฺจเทฺวกทฺวิภิปญฺจ, โกฏฺฐาสา นิยตา ฐิตา;

เตหิ ยุตฺตา ปนฏฺฐาถ, วีส เทฺว เทฺว ติเกกกา.

๕๒๔. ปุพฺพาปรทฺวยาปุญฺเญ, กามปาเก อเหตุเก;

ปญฺจมานุตฺตรารุปฺเป, นตฺถานิยตสมฺภโว.

๕๒๕. ฉตฺตึสมานเสเสฺวว, ลพฺภนฺตานิยตา น วา;

เตปญฺญาสาวเสสา ตุ, สพฺเพ นิยตโยคิโน.

๕๒๖. นิยตานิยเต กตฺวา, ลพฺภนฺโตภยถา ตถา;

สรูปเยโวภยกา, ติวิเธวํ ตุ สงฺคหา.

๕๒๗. เญยฺยา วุตฺตานุสาเรน, เตหิ ยุตฺตาว มานสา;

ตโต ปุน วิภาเวยฺย, สพฺพสงฺคาหิกํ นยํ.

๕๒๘. เอกูนตาลีสกโต, ยาเวกตฺตึสกา ฐิตา;

นวธา อนวชฺเชสุ, เตหิ ยุตฺตา จ มานสา.

๕๒๙. เทฺว จตฺตาโร ทเสวาถ, ติกปญฺจาธิกา ทส;

เตวีส กมโต สตฺต, เทฺว จ ปญฺจทสาปเร.

๕๓๐. เทฺว จ เทฺว ติกเทฺว เทฺวกา, สาวชฺเชสุ จ โสฬส;

เอกูนวีส วีสาถ, วีเสกทฺวิตยาธิกา.

๕๓๑. อเหตุเก ปนฏฺฐาถ, ทเสกทฺวิตยาธิกา;

ทสปญฺจ ทฺวิเกกาติ, ภวนฺเตกูนวีสติ.

๕๓๒. ลพฺภมานานุสาเรน, ธมฺมานํ ปน สงฺคโห;

สกฺกา วุตฺตนเยเนว, วิญฺญาตุํ ปน วิญฺญุนาติ.

อิติ เจตสิกวิภาเค ราสิสงฺคหกถา นิฏฺฐิตา.

ปนฺนรสโม ปริจฺเฉโท.