จุทฺทสโม ปริจฺเฉโท

๑๔. ราสิสมฺภวกถา

๔๙๐. นเวว เยวาปนกา, อฏฺฐารส จ ราสโย;

นวภึสติสมฺภินฺนา, ทส เทฺว สวิภตฺติกา.

๔๙๑. เอกทฺวยติจตุฉสตฺตฏฺฐานานวชฺชเก;

สตฺตวีสติ สตฺเตโก, ทฺวยเมโก ปุเนกโก.

๔๙๒. ทเสว เยวาปนกา, เอกาทส จ ราสโย;

อฏฺฐวีสติสมฺภินฺนา, ทเสว สวิภตฺติกา.

๔๙๓. เอกทฺวยติจตุกฺกฉฏฺฐานนิยตา ปน;

อฏฺฐารส จ สตฺเตโก, เอโก เจโกว ปาปเก.

๔๙๔. เทฺว เยวาปนกา โหนฺติ, ราสโย จ จตุพฺพิธา;

เตรเสตฺถ อสมฺภินฺนา, ตโยว สวิภตฺติกา.

๔๙๕. เอกทฺวยติกฏฺฐานา, ทส เทฺวโก อเหตุเก;

อิจฺจานวชฺชา สาวชฺชา-เหตุเก โยคนิจฺฉโย.

๔๙๖. สตฺตาปิ นตฺถิ สาวชฺเช, นิรวชฺเช ปกาสโก;

อเหตุเก จ มคฺคาทิราสโย นตฺถิ จุทฺทส.

๔๙๗. อนวชฺชา ตุ สาวชฺเช, สาวชฺชกานวชฺชเก;

จิตฺตุปฺปาทมฺหิ นตฺเถว, นตฺโถภยมเหตุเก.

๔๙๘. สาวชฺชา ปน สาวชฺเช, อนวชฺชานวชฺชเก;

คเหตพฺพา ตุ สพฺพตฺถ, สาธารณา ปกิณฺณกา.

๔๙๙. ฌานปญฺจกจิตฺเตสุ, สตฺตสฏฺฐิสุ นิทฺทิเส;

ฌานงฺคโยคเภเทน, ราสิเภทํ ตหึ ตหึ.

๕๐๐. จตุฉกฺกานวชฺเชสุ, ญาณปีติกตํ ตถา;

จตุวีส ปริตฺเตสุ, จตุธา เภทมุทฺทิเส.

๕๐๑. สราควีตราคานํ, อปฺปมญฺญาปวตฺติยํ;

กรุณามุทิตา โหนฺติ, กามปุญฺญมหากฺริเย.

๕๐๒. อุปจารปฺปนาปตฺตา, สุขิตา สตฺตโคจรา;

ตสฺมา น ปญฺจมารุปฺเป, มหาปาเก อนุตฺตเร.

๕๐๓. โสตาปติตุเปกฺขาสุ, ปริกมฺมาทิสมฺภเว;

ฌานานํ ตุลฺยปากตฺตา, ตปฺปาเกสุ จ ลพฺภเร.

๕๐๔. วิรตี จ สราคานํ, วีติกฺกมนสมฺภวา;

สมฺปตฺเต จ สมาทาเน, กามปุญฺเญสุ ลพฺภเร.

๕๐๕. ตํตํทฺวาริกทุสฺสิลฺย-เจตนุจฺเฉทกิจฺจโต;

มคฺเค จ ตุลฺยปากตฺตา, ผเล จ นิยตา สิยุํ.

๕๐๖. ปวตฺตาการวิสยภินฺนา ปญฺจาปิ สมฺภวา;

โลกิเย ลพฺภมานาปิ, วิสุํ เจว สิยุํ น วา.

๕๐๗. ปาปา ลพฺภนฺติ ปาเปสุ, สตฺต ฉกฺเกกกา กมา;

สรูปเยโวภยกา, นิยตฏฺฐ ฉเฬตเร.

๕๐๘. สาธารณา จ สพฺพตฺถ, ยถาวุตฺตา ปกิณฺณกา;

ตตฺถ เจกคฺคตา นตฺถิ, อินฺทฺริยาทีสุ กงฺขิเต.

๕๐๙. ฉนฺทาธิโมกฺขา เยวาปิ, วีเสกาทสวชฺชิเต;

อุทฺธจฺจเมกาทสสุ, มชฺฌตฺตมนวชฺชเก.

๕๑๐. สพฺพตฺถ มนสิกาโร, ติเทฺวกทฺวิติกาปเร;

อฏฺฐฏฺฐวีสจตูสุ, ปญฺจทฺวีสุ ยถากฺกมํ.

๕๑๑. สมุทายวเสเนตฺถ, อุทฺธจฺจวิรติตฺตยํ;

สวิภตฺติกมญฺญตฺถ, อวิภตฺติกเมว ตํ.

๕๑๒. จิตฺตุปฺปาเทสุ เตเนตํ, วิภตฺติอวิภตฺติกํ;

อิติ สาธุ สลฺลกฺเขยฺย, สมฺภวาสมฺภวํ พุโธติ.

อิติ เจตสิกวิภาเค ราสิสมฺภวกถา นิฏฺฐิตา.

จุทฺทสโม ปริจฺเฉโท.