เอกาทสโม ปริจฺเฉโท

๑๑. ราสิสรูปกถา

๓๘๔. สพฺพํ สภาวสามญฺญ-วิเสเสน ยถารหํ;

คตราสิวเสนาถ, อฏฺฐารสวิธํ กถํ.

๓๘๕. ผสฺสปญฺจกราสี จ, ฌานินฺทฺริยมถาปเร;

มคฺคพลเหตุกมฺม-ปถโลกิยราสโย.

๓๘๖. นิรวชฺชา ฉ ปสฺสทฺธิ-อาทิกา จ สตีมตา;

ยุคนนฺธา จ สมถา, ตถา เยวาปนาติ จ.

๓๘๗. ผสฺโส จ เวทนา สญฺญา, เจตนา จิตฺตเมว จ;

ผสฺสปญฺจกราสีติ, ปญฺจ ธมฺมา ปกาสิตา.

๓๘๘. วิตกฺโก จ วิจาโร จ, ปีติ เจกคฺคตา ตถา;

สุขํ ทุกฺขมุเปกฺขาติ, สตฺต ฌานงฺคนามกา.

๓๘๙. สทฺธินฺทฺริยญฺจ วีริยํ, สติ เจว สมาธิ จ;

ปญฺญา จตุพฺพิธา วุตฺตา, มโน ปญฺจาปิ เวทนา.

๓๙๐. ชีวิตินฺทฺริยเมกนฺติ, จกฺขาทีนิ จ สตฺตธา;

พาวีสตินฺทฺริยา นาม, ธมฺมา โสฬส เทสิตา.

๓๙๑. อาทิมคฺเค อนญฺญาต-ญฺญสฺสามีตินฺทฺริยํ ภเว;

มชฺเฌ อญฺญินฺทฺริยํ อนฺเต, อญฺญาตาวินฺทฺริยนฺติ จ.

๓๙๒. ปญฺญานุตฺตรจิตฺเตสุ, โหนฺติ ตีณินฺทฺริยานิปิ;

ติเหตุเกสุ เสเสสุ, เอกํ ปญฺญินฺทฺริยํ มตํ.

๓๙๓. สุขํ ทุกฺขินฺทฺริยญฺเจว, โสมนสฺสินฺทฺริยํ ตถา;

โทมนสฺสมุเปกฺขาติ, ปญฺจธา เวทนา กถา.

๓๙๔. รูปารูปวสา เทฺวธา, ชีวิตินฺทฺริยเมกกํ;

จกฺขุโสตฆานชิวฺหากายิตฺถิปุริสินฺทฺริยา.

๓๙๕. ตตฺถ ชีวิตรูปญฺจ, อฏฺเฐตฺถ น ตุ คยฺหเร;

ตสฺมา นามินฺทฺริยาเนว, ทสปญฺจ วินิทฺทิเส.

๓๙๖. สมฺมาทิฏฺฐิ จ สงฺกปฺโป, วายาโม วิรติตฺตยํ;

สมฺมาสติ สมาธิ จ, มิจฺฉาทิฏฺฐิ จ ธมฺมโต.

๓๙๗. มคฺคงฺคานิ นเวตานิ, ทฺวาทสาปิ ยโต ทฺวิธา;

สมฺมามิจฺฉาติ สงฺกปฺโป, วายาโม จ สมาธิ จ.

๓๙๘. โลกปาลทุกญฺเจว, หิโรตฺตปฺปมถาปรํ;

อหิรีกมโนตฺตปฺปํ, ทุกํ โลกวินาสกํ.

๓๙๙. ปญฺจ สทฺธาทโย เจติ, พลธมฺมา นเวริตา;

กณฺหสุกฺกวเสนาปิ, ปฏิปกฺเข อกมฺปิยา.

๔๐๐. ฉ เหตู เหตุราสิมฺหิ,

โลภาโลภาทิกา ติกา;

โมมูเห กงฺขิตุทฺธจฺจา,

ตตฺถ วุตฺตาติ อฏฺฐธา.

๔๐๑. มิจฺฉาทิฏฺฐิ อภิชฺฌา จ, พฺยาปาโท วิรติตฺตยํ;

สมฺมาทิฏฺฐินภิชฺฌา จ, อพฺยาปาโท จ เจตนา.

๔๐๒. ทส กมฺมปถาเนตฺถ, วุตฺตา วิรติเจตนา;

โลกปาลวินาสาติ, วุตฺตา โลกทุกา ทฺวิธา.

๔๐๓. ปสฺสทฺธิอาทิยุคฬา, นิรวชฺชา ฉ ราสโย;

สติ จ สมฺปชญฺญญฺจ, อุปการทุกํ ภเว.

๔๐๔. ยุคนนฺธทุกํ นาม, สมโถ จ วิปสฺสนา;

ปคฺคโห จ อวิกฺเขโป, สมถทฺทุกมีริตํ.

๔๐๕. เย สรูเปน นิทฺทิฏฺฐา, จิตฺตุปฺปาเทสุ ตาทินา;

เต ฐเปตฺวาวเสสา ตุ, เยวาปนกนามกา.

๔๐๖. ฉนฺโท จ อธิโมกฺโข จ, ตตฺรมชฺฌตฺตตา ตถา;

อุทฺธจฺจํ มนสิกาโร, ปญฺจาปณฺณกนามกา.

๔๐๗. มาโน จ ถินมิทฺธญฺจ, อิสฺสา มจฺฉริยํ ตถา;

กุกฺกุจฺจมปฺปมญฺญา จ, ติสฺโส วิรติโยปิ จ.

๔๐๘. เอเต อนิยตา นาม, เอกาทส ยถารหํ;

ตโต จ เสสา สพฺเพปิ, นิยตาติ ปกิตฺติตา.

๔๐๙. เกจิ ราสึ น ภชนฺติ, เกจิ จานิยตา ยโต;

ตสฺมา เยวาปนาเตว, ธมฺมา โสฬส เทสิตา.

๔๑๐. สตฺตตึสาวเสสา ตุ, ตตฺถ ตตฺถ ยถารหํ;

สรูเปเนว นิทฺทิฏฺฐา, จิตฺตุปฺปาเทสุ สพฺพถา.

๔๑๑. เทสิตานุตฺตรุทฺธจฺเจ, นามโต วิรตุทฺธวา;

ตถานุตฺตรจิตฺเตสุ, นิยตํ วิรติตฺตยํ.

๔๑๒. จิตฺตํ วิตกฺโก สทฺธา จ,

หิโรตฺตปฺปพลทฺวยํ;

อโลโภ จ อโทโส จ,

โลโภ โทโส จ ทิฏฺฐิ จ.

๔๑๓. อหิรีกมโนตฺตปฺปํ,

อุทฺธจฺจํ วิรติตฺตยํ;

โสฬเสเต ยถาโยคํ,

ทฺวีสุ ฐาเนสุ เทสิตา.

๔๑๔. เวทนา ตีสุ วีริยํ, สติ จ จตุราสิกา;

สมาธิ ฉสุ ปญฺญา จ, สตฺตฏฺฐาเนสุ ทีปิตา.

๔๑๕. เอกวีส ปนิจฺเจเต, สวิภตฺติกนามกา;

เสสา ทฺวตฺตึสติ ธมฺมา, สพฺเพปิ อวิภตฺติกาติ.

อิติ เจตสิกวิภาเค ราสิสรูปกถา นิฏฺฐิตา.

เอกาทสโม ปริจฺเฉโท.