ทสโม ปริจฺเฉโท

๑๐. ปเภทกถา

๓๕๒. เอกุปฺปาทา นิโรธา จ, เอกาลมฺพณวตฺถุกา;

สหคตา สหชาตา, สํสฏฺฐา สหวุตฺติโน.

๓๕๓. เตปญฺญาส ปนิจฺเจเต, สมฺปยุตฺตา ยถารหํ;

จิตฺตเจตสิกา ธมฺมา, อฏฺฐารสวิธาปิ จ.

๓๕๔. เอกธา ฉพฺพิธา เจว, จตุธา สตฺตธา ฐิตา;

จิตฺตุปฺปาทปเภเทน, ภินฺทิตพฺพา วิภาวินา.

๓๕๕. อฏฺฐ ธมฺมาวินิพฺโภคา, ภินฺนาสีติ นวุตฺตรา;

สตฺตสตํ ทส เทฺว จ, สพฺเพ โหนฺติ สมิสฺสิตา.

๓๕๖. สนฺตีรณมโนธาตุ, สิตโวฏฺฐพฺพนา ตถา;

อปุญฺญา กามปุญฺญา จ, มหาปากา มหากฺริยา.

๓๕๗. ปฐมชฺฌานธมฺมา จ, โลกุตฺตรมหคฺคตา;

ปญฺจปญฺญาส สพฺเพปิ, วิตกฺกา โหนฺติ เภทิตา.

๓๕๘. วิจาราปิ จ เตเยว, ทุติยชฺฌานนามกา;

เอกาทสาปเร เจติ, ฉสฏฺฐิ ปริทีปิตา.

๓๕๙. อปุญฺญา กามปุญฺญา จ, มหาปากา มหากฺริยา;

จตุกฺกา เจว จตฺตาโร, สิตญฺจ สุขตีรณํ.

๓๖๐. ปฐมาทิติกชฺฌานา, โลกุตฺตรมหคฺคตา;

อิจฺเจวเมกปญฺญาส, ปีติโย โหนฺติ สพฺพถา.

๓๖๑. สิตโวฏฺฐพฺพนา เทฺว จ, สาวชฺชา จานวชฺชกา;

ภินฺนเมวํ ตุ วีริยํ, เตสตฺตติวิธํ ภเว.

๓๖๒. สาวชฺชา จานวชฺชา จ, โมมูหทฺวยวชฺชิตา;

ฉนฺทา ภวนฺติ สพฺเพปิ, สฏฺฐิเภทา นวุตฺตรา.

๓๖๓. สนฺตีรณมโนธาตุ, สิตโวฏฺฐพฺพนา ตถา;

สาวชฺชา จานวชฺชา จ, วิจิกิจฺฉาวิวชฺชิตา.

๓๖๔. อธิโมกฺขา ปนิจฺเจวํ, อฏฺฐสตฺตติ เภทิตา;

ติสตํ นวุติ เทฺว จ, ภินฺนา โหนฺติ ปกิณฺณกา.

๓๖๕. เอกูนสฏฺฐิ วา โหนฺติ, สทฺธาเทกูนวีสติ;

สหสฺสญฺจ สตญฺเจกํ, เอกวีสญฺจ สพฺพถา.

๓๖๖. ญาเณน สมฺปยุตฺตา จ, กาเม ทฺวาทสธาปเร;

ปญฺจตึสาติ ปญฺญาปิ, สตฺตตาลีสธา กถา.

๓๖๗. รูปชฺฌานจตุกฺกา จ, กามปุญฺญา มหากฺริยา;

อฏฺฐวีสปฺปมญฺเญวํ, ฉปฺปญฺญาส ภวนฺติ จ.

๓๖๘. อนุตฺตรา กามปุญฺญา, ติสฺโส วิรติโย ปน;

โหนฺติ โสฬสธา ภินฺนา, อฏฺฐตาลีส ปิณฺฑิตา.

๓๖๙. ปญฺจวีสานวชฺเชวํ, สมฺปยุตฺตา จตุพฺพิธา;

สหสฺสทฺวิสตญฺเจว, ทฺวิ จ สตฺตติ เภทโต.

๓๗๐. จตฺตาโร ปาปสามญฺญา, ภินฺนา ทฺวาทสธา ปน;

อฏฺฐตาลีสธา โหนฺติ, เต สพฺเพ ปริปิณฺฑิตา.

๓๗๑. โลโภ ปนฏฺฐธา ภินฺโน, ถินมิทฺธญฺจ ปญฺจธา;

จตุธา ทิฏฺฐิมาโน จ, จตุธา ทิฏฺฐิโย วิสุํ.

๓๗๒. ทฺวิธา โทสาทิจตฺตาโร, วิจิกิจฺเฉกธาติ จ;

สาวชฺชา สตฺตธา วุตฺตา, ภินฺนาสีติ ติกุตฺตรา.

๓๗๓. อิจฺจฏฺฐารสธา วุตฺตา, เตปญฺญาสาปิ เภทโต;

ทฺวิสหสฺสญฺจ ตุ สตํ, ภวนฺเตกูนสฏฺฐิ จ.

๓๗๔. วิตกฺกวิจารปีติสุโขเปกฺขาสุ ปญฺจสุ;

ภินฺทิตฺวา ฌานเภเทน, คเหตพฺพา อนุตฺตรา.

๓๗๕. อญฺญตฺร ปน สพฺพตฺถ, นตฺถิ เภทปฺปโยชนํ;

อฏฺเฐว กสฺมา คยฺหนฺติ, อเภเทนาติ ลกฺขเย.

๓๗๖. ปฐมาทิจตุชฺฌานา, โลกุตฺตรมหคฺคตา;

อิจฺเจกเมกทสธา, จตุตาลีส ปิณฺฑิตา.

๓๗๗. เตวีส ปญฺจมา เจติ, สตฺตสฏฺฐิ สมิสฺสิตา;

อปฺปนา ตตฺถ สพฺพาปิ, อฏฺฐปญฺญาส ทีปิตา.

๓๗๘. ปญฺจตึเสว สงฺเขปา, โลกุตฺตรมหคฺคตา;

อปฺปนา ตตฺถ สพฺพาปิ, ฉพฺพีสติ ปกาสิตา.

๓๗๙. อิทฺธิวิธํ ทิพฺพโสตํ, เจโตปริยนามกา;

ปุพฺเพนิวาสานุสฺสติ, ทิพฺพจกฺขูติ ปญฺจธา.

๓๘๐. อภิญฺญาญาณมีเรนฺติ, รูปาวจรปญฺจมา;

กุสลญฺจ กฺริยา เจติ, เภทิตํ ทุวิธมฺปิ จ.

๓๘๑. ตํ ทฺวยมฺปิ สมฺมิสฺเสตฺวา, ปญฺจาภิญฺญา จ โลกิยา;

อาสวกฺขยญาณญฺจ, ฉฬภิญฺญา ปวุจฺจเร.

๓๘๒. โลกิยา จ ทสาภิญฺญา, ภินฺทิตฺวา กุสลกฺริยา;

สตฺตสตฺตติ ฌานานิ, อฏฺฐสฏฺฐิ ปนปฺปนา.

๓๘๓. สตฺตสตฺตติ จิตฺตานิ, จตุปญฺญาส สพฺพถา;

ปจิตานิ จ จิตฺตานิ, เอกตึสสตํ สิยุนฺติ.

อิติ เจตสิกวิภาเค ปเภทกถา นิฏฺฐิตา.

ทสโม ปริจฺเฉโท.