นวโม ปริจฺเฉโท

๙. เจตสิกสงฺคหกถา

๓๑๕. สตฺต สาธารณา เจว, ฉ ธมฺมา จ ปกิณฺณกา;

สทฺธาทิ ปญฺจวีเสติ, อฏฺฐตึส สมิสฺสิตา.

๓๑๖. กามาวจรปุญฺเญสุ, ลพฺภนฺติ ปฐมทฺวเย;

สตฺตตึเสว ทุติเย, ปญฺญามตฺตวิวชฺชิตา.

๓๑๗. ตติเย จ ยถาวุตฺตา, ปีติมตฺตวิวชฺชิตา;

ฉตฺตึเสว จตุตฺถมฺหิ, ปญฺญาปีติทฺวยํ วินา.

๓๑๘. มหากฺริยาสุ ยุชฺชนฺติ, หิตฺวา วิรติโย ตถา;

ปญฺจตึส จตุตฺตึสทฺวยํ เตตฺตึสกํ กมา.

๓๑๙. ฐเปตฺวา อปฺปมญฺญา จ, มหาปาเกสุ โยชิตา;

เตตฺตึสา เจว ทฺวตฺตึสทฺวเยกตฺตึสกํ กมา.

๓๒๐. อปฺปมญฺญา คเหตฺวาน, หิตฺวา วิรติโย ตถา;

ปญฺจตึเสว ปฐเม, รูปาวจรมานเส.

๓๒๑. วิตกฺกํ ทุติเย หิตฺวา, วิจารญฺจ ตโต ปรํ;

จตุตฺเถ ปน ปีติญฺจ, อปฺปมญฺญญฺจ ปญฺจเม.

๓๒๒. ยถาวุตฺตปการาว, จตุตฺตึส ยถากฺกมํ;

เตตฺตึส เจว ทฺวตฺตึส, สมตึสญฺจ ลพฺภเร.

๓๒๓. ปญฺจเมน สมานา จ, ฐเปตฺวารุปฺปมานสา;

ภูมารมฺมณเภทญฺจ, องฺคานญฺจ ปณีตตํ.

๓๒๔. อปฺปมญฺญา ฐเปตฺวาน, คเหตฺวา วิรติตฺตยํ;

ฉตฺตึสานุตฺตเร โหนฺติ, ปฐมชฺฌานมานเส.

๓๒๕. วิตกฺกํ ทุติเย หิตฺวา, วิจารญฺจ ตโต ปรํ;

ปีตึ หิตฺวา จตุตฺเถ จ, ปญฺจเมปิ จ สพฺพถา.

๓๒๖. ยถาวุตฺตปฺปการาว, ปญฺจตึส ยถากฺกมํ;

จตุตฺตึสญฺจ เตตฺตึส, ตถา เตตฺตึส จาปเร.

๓๒๗. เอวํ พาวีสธา เภโท, อนวชฺเชสุ สงฺคโห;

เอกูนสฏฺฐิจิตฺเตสุ, อฏฺฐตึสานมีริโต.

๓๒๘. วิรตี อปฺปมญฺญา จ, คเหตฺวา ปน สพฺพโส;

เอกเมกํ คเหตฺวา จ, ปจฺจกฺขาย จ สพฺพถา.

๓๒๙. กาเมสุ สตฺตธา ปุญฺเญ, จตุธา จ กฺริเย ตถา;

รูปชฺฌานจตุกฺเก จ, กตฺตพฺโพยมฺปิ สงฺคโห.

๓๓๐. อิมินา ปนุปาเยน, สมสตฺตติ เภทโต;

อนวชฺเชสุ วิญฺเญยฺโย, จิตฺตุปฺปาเทสุ สงฺคโห.

๓๓๑. อิติ สพฺพปฺปกาเรน, อนวชฺชวินิจฺฉยํ;

ญตฺวา โยเชยฺย เมธาวี, สาวชฺเชสุ จ สงฺคหํ.

๓๓๒. สตฺต สาธารณา เจว, ฉ ธมฺมา จ ปกิณฺณกา;

จตฺตาโร ปาปสามญฺญา, ธมฺมา สตฺตรเสวิเม.

๓๓๓. เอกูนวีสาสงฺขาเร, ปฐเม โลภทิฏฺฐิยา;

ทุติเย โลภมาเนน, ยถาวุตฺตา จ ตตฺตกา.

๓๓๔. อฏฺฐารส วินา ปีตึ, ตติเย โลภทิฏฺฐิยา;

จตุตฺเถปิ วินา ปีตึ, โลภมาเนน ตตฺตกา.

๓๓๕. ปฏิเฆ จ วินา ปีตึ, อสงฺขาเร ตเถว เต;

ลพฺภนฺติ โทสกุกฺกุจฺจ-มจฺฉริยาหิ วีสติ.

๓๓๖. อสงฺขาเรสุ วุตฺตา จ, สสงฺขาเรสุ ปญฺจธา;

ถินมิทฺเธเนกวีส, วีส เทฺววีสติกฺกมา.

๓๓๗. ฉนฺทํ ปีติญฺจ อุทฺธจฺเจ, หิตฺวา ปญฺจทเสว เต;

หิตฺวา วิโมกฺขํ กงฺขญฺจ, คเหตฺวา กงฺขิเต ตถา.

๓๓๘. สตฺตวีสติธมฺมานํ, อิติ ทฺวาทส สงฺคหา;

ทฺวาทสาปุญฺญจิตฺเตสุ, วิญฺญาตพฺพา วิภาวินา.

๓๓๙. หิตฺวา ฉานิยเต ธมฺเม, คเหตฺวา จ ยถารหํ;

จตุตฺตึสาปิ วิญฺเญยฺยา, สงฺคหา ตตฺถ วิญฺญุนา.

๓๔๐. ทฺวาทสากุสเลเสฺวว, ญตฺวา สงฺคหมุตฺตรํ;

เญยฺยาเหตุกจิตฺเตสุ, สงฺคหํ กมโต กถํ?

๓๔๑. สตฺต สาธารณา ฉนฺทวชฺชิตา จ ปกิณฺณกา;

หสิตุปฺปาทจิตฺตมฺหิ, ทฺวาทเสว ปกาสิตา.

๓๔๒. โวฏฺฐพฺเพ จ วินา ปีตึ, วีริยํ สุขตีรเณ;

เอกาทส ยถาวุตฺตา, ธมฺมา ทฺวีสุปิ เทสิตา.

๓๔๓. มโนธาตุตฺติเก เจว, อุเปกฺขาตีรณทฺวเย;

ทส โหนฺติ ยถาวุตฺตา, หิตฺวา วีริยปีติโย.

๓๔๔. สตฺต สาธารณา เอว, ปญฺจวิญฺญาณสมฺภวา;

อิจฺจาเหตุกจิตฺเตสุ, ปญฺจธา สงฺคโห ฐิโต.

๓๔๕. อิติ เจตสิเก ธมฺเม, จิตฺเตสุ คณิเต ปุน;

จิตฺเตน สห สงฺคยฺห, คเณยฺยาปิ จ ปณฺฑิโต.

๓๔๖. อฏฺฐตึสาติ เย วุตฺตา, จิตฺเตน สห เต ปุน;

เอกูนจตฺตาลีเสติ, สพฺพตฺเถกาธิกํ นเย.

๓๔๗. พาวีเสวํ ทส เทฺว จ, ปญฺจ เจติ ยถารหํ;

สงฺคหา สมฺปยุตฺตานํ, ตาลีเสกูนกา กถา.

๓๔๘. วิตกฺโก จ วิจาโร จ, ปีติ ปญฺญา ตถา ปน;

อปฺปมญฺญา วิรตีติ, นว ธมฺมา ยถารหํ.

๓๔๙. คเหตพฺพาปเนตพฺพา, ภวนฺติ อนวชฺชเก;

ปริวตฺเตติ สพฺพตฺถ, เวทนา ตุ ยถารหํ.

๓๕๐. ฉนฺทาธิโมกฺขวีริยา, สทฺธาเทกูนวีสติ;

ผสฺสาทโย ฉเฬวาติ, น จลนฺตฏฺฐวีสติ.

๓๕๑. เตรเสว ตุ สาวชฺเช, ฉเฬวาเหตุมานเส;

น จลนฺติ ทส อญฺเญ, จุทฺทสา ฉ จ สมฺภวาติ.

อิติ เจตสิกวิภาเค เจตสิกสงฺคหกถา นิฏฺฐิตา.

นวโม ปริจฺเฉโท.