อฏฺฐโม ปริจฺเฉโท

๒. เจตสิกวิภาโค

๘. เจตสิกสมฺปโยคกถา

๒๘๖. อิติ จิตฺตวิธึ ญตฺวา, เทฺวปญฺญาส วิภาวินา;

เญยฺยา เจตสิ สมฺภูตา, ธมฺมา เจตสิกา กถํ.

๒๘๗. ผสฺโส จ เวทนา สญฺญา, เจตเนกคฺคตา ตถา;

ชีวิตํ มนสิกาโร, สตฺต สาธารณา อิเม.

๒๘๘. วิตกฺโก จ วิจาโร จ, ปีติ จ วีริยํ ตถา;

ฉนฺโท จ อธิโมกฺโข จ, ฉ ปกิณฺณกนามกา.

๒๘๙. ปุญฺญาปุญฺเญสุ ปาเกสุ, กฺริยาสุ จ ยถารหํ;

มานเสสุ ปวตฺตนฺติ, วิปฺปกิณฺณา ปกิณฺณกา.

๒๙๐. สทฺธา สตินฺทฺริยญฺเจว, หิโรตฺตปฺปพลทฺวยํ;

อโลโภ จ อโทโส จ, ปญฺญา มชฺฌตฺตตาปิ จ.

๒๙๑. อฏฺเฐเต อุตฺตมา นาม, ธมฺมา อุตฺตมสาธนา;

นิวชฺชาติ ปวุจฺจนฺติ, ยุคฬา ฉ ตโตปเร.

๒๙๒. ปสฺสทฺธิ กายจิตฺตานํ, ลหุตา มุทุตา ตถา;

กมฺมญฺญตา จ ปาคุญฺญ-ตา จ อุชุกตาติ จ.

๒๙๓. อปฺปมญฺญาทฺวยํ นาม, กรุณามุทิตา สิยุํ;

สมฺมาวาจา จ กมฺมนฺตา-ชีวา จ วิรติตฺตยํ.

๒๙๔. ปญฺจวีส ปนิจฺเจเต, อนวชฺชา ยถารหํ;

ปาปาเหตุกมุตฺเตสุ, อนวชฺเชสุ ชายเร.

๒๙๕. โลโภ โทโส จ โมโห จ,

มาโน ทิฏฺฐิ จ สํสโย;

ถินมิทฺธญฺจ อุทฺธจฺจํ,

กุกฺกุจฺจญฺจ ตถา ทส.

๒๙๖. อหิรีกมโนตฺตปฺปํ, อิสฺสา มจฺฉริยนฺติ จ;

โหนฺติ จุทฺทส สาวชฺชา, สาวชฺเชเสฺวว สมฺภวา.

๒๙๗. เทฺวปญฺญาส จตุทฺเธวํ, ธมฺมา เจตสิกา ฐิตา;

เตสํ ทานิ ปวกฺขามิ, สมฺปโยคญฺจ สงฺคหํ.

๒๙๘. สตฺต สาธารณา สพฺพ-จิตฺตสาธารณา ตโต;

จิตฺเตน สทฺธิ อฏฺฐนฺนํ, วิปฺปโยโค น กตฺถจิ.

๒๙๙. วิตกฺโก ปญฺจวิญฺญาณํ, ทุติยาทิวิวชฺชิเต;

วิจาโรปิ จ ตตฺเถว, ตติยาทิวิวชฺชิเต.

๓๐๐. โสมนสฺสยุเต ปีติ-จตุตฺถชฺฌานวชฺชิเต;

วีริยํ ปฐมาวชฺช-วิปากาเหตุวชฺชิเต.

๓๐๑. ฉนฺโท สมฺโภติ สพฺพตฺถ, โมมูหาเหตุวชฺชิเต;

อธิโมกฺโข วิจิกิจฺฉา-ปญฺจวิญฺญาณวชฺชิเต.

๓๐๒. ฉสฏฺฐิ ปญฺจปญฺญาส, สตฺตติ เจว โสฬส;

วีสเตกาทเสวาถ, ปกิณฺณกวิวชฺชิตา.

๓๐๓. มานสา ปญฺจปญฺญาส, สวิตกฺกา ฉสฏฺฐิ จ;

สวิจาเรกปญฺญาส, สปฺปีติกมนา ตถา.

๓๐๔. เตสตฺตติ สวีริยา, สฉนฺเทกูนสตฺตติ;

สาธิโมกฺขา ปวุจฺจนฺติ, อฏฺฐสตฺตติ มานสา.

๓๐๕. ปญฺญาปฺปมญฺญาวิรตี, หิตฺวา เอกูนสฏฺฐิสุ;

ปาปาเหตุกมุตฺเตสุ, สทฺธาเทกูนวีสติ.

๓๐๖. ทฺวิเหตุกาเหตุปาปวชฺชิเตสุ สมาสโต;

ปญฺญา ตุ ชายเต สตฺตจตฺตาลีเสสุ สพฺพถา.

๓๐๗. มหากฺริยากามปุญฺญ-รูปชฺฌาเนสุ ชายเร;

อปฺปมญฺญาฏฺฐวีเสสุ, หิตฺวา ฌานํ ตุ ปญฺจมํ.

๓๐๘. โลกุตฺตเรสุ สพฺพตฺถ, สเหว วิรติตฺตยํ;

กามปุญฺเญสุ สมฺโภติ, ยถาสมฺภวโต วิสุํ.

๓๐๙. วิรตีอปฺปมญฺญาสุ, ปญฺจสฺวปิ ยถารหํ;

กทาจิเทว สมฺโภติ, เอเกโกว น เจกโต.

๓๑๐. อหิรีกมโนตฺตปฺปํ, โมหอุทฺธจฺจเมว จ;

ปาปสาธารณา นาม, จตฺตาโร ปาปสมฺภวา.

๓๑๑. โลโภ จ โลภมูเลสุ, ทิฏฺฐิยุตฺเตสุ ทิฏฺฐิ จ;

มาโน ทิฏฺฐิวิยุตฺเตสุ, ทิฏฺฐิมานา น เจกโต.

๓๑๒. โทสมูเลสุ โทโส จ, อิสฺสา มจฺฉริยํ ตถา;

กุกฺกุจฺจมิติ จตฺตาโร, วิจิกิจฺฉา ตุ กงฺขิเต.

๓๑๓. สเหว ถินมิทฺธํ ตุ, สสงฺขาเรสุ ปญฺจสุ;

อิติ จุทฺทส สาวชฺชา, สาวชฺเชเสฺวว นิจฺฉิตา.

๓๑๔. มาโน จ ถินมิทฺธญฺจ, สห วาถ วิสุํ น วา;

อิสฺสามจฺเฉรกุกฺกุจฺจา, อญฺญมญฺญํ วิสุํ น วาติ.

อิติ เจตสิกวิภาเค เจตสิกสมฺปโยคกถา นิฏฺฐิตา.

อฏฺฐโม ปริจฺเฉโท.