๙. ยโสธราปมุขทสภิกฺขุนีสหสฺสอปทานํ

๔๑๑. ‘‘กปฺเป จ สตสหสฺเส, จตุโร จ อสงฺขิเย;

ทีปงฺกโร นาม ชิโน, อุปฺปชฺชิ โลกนายโก.

๔๑๒. ‘‘ทีปงฺกโร มหาวีโร, วิยากาสิ วินายโก;

สุเมธญฺจ สุมิตฺตญฺจ, สมานสุขทุกฺขตํ.

๔๑๓. ‘‘สเทวกญฺจ ปสฺสนฺโต, วิจรนฺโต สเทวกํ;

เตสํ ปกิตฺตเน อเมฺห, อุปคมฺม สมาคมํ.

๔๑๔. ‘‘อมฺหํ สพฺพปติ โหหิ [สพฺพา ปตี โหนฺติ (ปี.)], อนาคตสมาคเม;

สพฺพาว ตุยฺหํ ภริยา, มนาปา ปิยวาทิกา.

๔๑๕. ‘‘ทานํ สีลมยํ สพฺพํ, ภาวนา จ สุภาวิตา;

ทีฆรตฺตญฺจ โน [ทีฆรตฺตมิทํ (สฺยา. ก.)] สพฺพํ, ปริจฺจตฺตํ มหามุเน.

๔๑๖. ‘‘คนฺธํ วิเลปนํ มาลํ, ทีปญฺจ รตนามยํ;

ยํกิญฺจิ ปตฺถิตํ สพฺพํ, ปริจฺจตฺตํ มหามุนิ.

๔๑๗. ‘‘อญฺญํ วาปิ กตํ กมฺมํ, ปริโภคญฺจ มานุสํ;

ทีฆรตฺตญฺหิ โน สพฺพํ, ปริจฺจตฺตํ มหามุนิ.

๔๑๘. ‘‘อเนกชาติสํสารํ, พหุํ ปุญฺญมฺปิ โน กตํ;

อิสฺสรมนุโภตฺวาน, สํสริตฺวา ภวาภเว.

๔๑๙. ‘‘ปจฺฉิเม ภเว สมฺปตฺเต, สกฺยปุตฺตนิเวสเน;

นานากุลูปปนฺนาโย, อจฺฉรา กามวณฺณินี.

๔๒๐. ‘‘ลาภคฺเคน ยสํ ปตฺตา, ปูชิตา สพฺพสกฺกตา;

ลาภิโย อนฺนปานานํ, สทา สมฺมานิตา มยํ.

๔๒๑. ‘‘อคารํ ปชหิตฺวาน, ปพฺพชิมฺหนคาริยํ;

อฑฺฒมาเส อสมฺปตฺเต, สพฺพา ปตฺตามฺห นิพฺพุตึ.

๔๒๒. ‘‘ลาภิโย อนฺนปานานํ, วตฺถเสนาสนานิ จ;

อุเปนฺติ ปจฺจยา สพฺเพ, สทา สกฺกตปูชิตา.

๔๒๓. ‘‘กิเลสา ฌาปิตา อมฺหํ…เป… วิหราม อนาสวา.

๔๒๔. ‘‘สฺวาคตํ วต โน อาสิ…เป… กตํ พุทฺธสฺส สาสนํ.

๔๒๕. ‘‘ปฏิสมฺภิทา จตสฺโส…เป… กตํ พุทฺธสฺส สาสนํ’’.

อิตฺถํ สุทํ ยโสธราปมุขานิ ทสภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติ.

ยโสธราปมุขทสภิกฺขุนีสหสฺสาปทานํ นวมํ.