๑๐. ยโสธราปมุขอฏฺฐารสภิกฺขุนีสหสฺสอปทานํ

๔๒๖. ‘‘อฏฺฐารสสหสฺสานิ, ภิกฺขุนี สกฺยสมฺภวา;

ยโสธราปมุขานิ, สมฺพุทฺธํ อุปสงฺกมุํ.

๔๒๗. ‘‘อฏฺฐารสสหสฺสานิ, สพฺพา โหนฺติ มหิทฺธิกา;

วนฺทนฺตี มุนิโน ปาเท, อาโรเจนฺติ ยถาพลํ.

๔๒๘. ‘‘‘ชาติ ขีณา ชรา พฺยาธิ, มรณญฺจ มหามุนิ;

อนาสวํ ปทํ สนฺตํ, อมตํ ยาม นายก.

๔๒๙. ‘‘‘ขลิตญฺเจ ปุเร อตฺถิ, สพฺพาสมฺปิ มหามุนิ;

อปราธมชานนฺตี, ขม อมฺหํ วินายก.

๔๓๐. ‘‘‘อิทฺธิญฺจาปิ นิทสฺเสถ, มม สาสนการิกา;

ปริสานญฺจ สพฺพาสํ, กงฺขํ ฉินฺทถ ยาวตา.

๔๓๑. ‘‘‘ยโสธรา มหาวีร, มนาปา ปิยทสฺสนา;

สพฺพา ตุยฺหํ มหาวีร, อคารสฺมึ ปชาปติ.

๔๓๒. ‘‘‘ถีนํ สตสหสฺสานํ, นวุตีนํ ฉทุตฺตริ;

อคาเร เต มยํ วีร, ปาโมกฺขา สพฺพา อิสฺสรา.

๔๓๓. ‘‘‘รูปาจารคุณูเปตา, โยพฺพนฏฺฐา ปิยํวทา;

สพฺพา โน อปจายนฺติ, เทวตา วิย มานุสา.

๔๓๔. ‘‘‘อฏฺฐารสสหสฺสานิ, สพฺพา สากิยสมฺภวา;

ยโสธราสหสฺสานิ, ปาโมกฺขา อิสฺสรา ตทา.

๔๓๕. ‘‘‘กามธาตุมติกฺกมฺม, สณฺฐิตา รูปธาตุยา;

รูเปน สทิสา นตฺถิ, สหสฺสานํ มหามุนิ.

๔๓๖. ‘‘‘สมฺพุทฺธํ อภิวาเทตฺวา, อิทฺธึ ทสฺสํสุ สตฺถุโน;

เนกา นานาวิธาการา, มหาอิทฺธีปิ ทสฺสยุํ.

๔๓๗. ‘‘‘จกฺกวาฬสมํ กายํ, สีสํ อุตฺตรโต กุรุ;

อุโภ ปกฺขา ทุเว ทีปา, ชมฺพุทีปํ สรีรโต.

๔๓๘. ‘‘‘ทกฺขิณญฺจ สรํ ปิญฺฉํ, นานาสาขา ตุ ปตฺตกา;

จนฺทญฺจ สูริยญฺจกฺขิ, เมรุปพฺพตโต สิขํ.

๔๓๙. ‘‘‘จกฺกวาฬคิรึ ตุณฺฑํ, ชมฺพุรุกฺขํ สมูลกํ;

พีชมานา อุปาคนฺตฺวา, วนฺทนฺตี โลกนายกํ.

๔๔๐. ‘‘‘หตฺถิวณฺณํ ตเถวสฺสํ, ปพฺพตํ ชลธึ ตถา;

จนฺทญฺจ สูริยํ เมรุํ, สกฺกวณฺณญฺจ ทสฺสยุํ.

๔๔๑. ‘‘‘ยโสธรา มยํ วีร, ปาเท วนฺทาม จกฺขุม;

ตว จิรปภาเวน, นิปฺผนฺนา นรนายก.

๔๔๒. ‘‘‘อิทฺธีสุ จ วสี โหม, ทิพฺพาย โสตธาตุยา;

เจโตปริยญาณสฺส, วสี โหม มหามุเน.

๔๔๓. ‘‘‘ปุพฺเพนิวาสํ ชานาม, ทิพฺพจกฺขุ วิโสธิตํ;

สพฺพาสวปริกฺขีณา, นตฺถิ ทานิ ปุนพฺภโว.

๔๔๔. ‘‘‘อตฺถธมฺมนิรุตฺตีสุ, ปฏิภาเน ตเถว จ;

ญาณํ อมฺหํ มหาวีร, อุปฺปนฺนํ ตว สนฺติเก.

๔๔๕. ‘‘‘ปุพฺพานํ โลกนาถานํ, สงฺคมํ โน นิทสฺสิตํ;

อธิการา พหู อมฺหํ, ตุยฺหตฺถาย มหามุเน.

๔๔๖. ‘‘‘ยํ อมฺหํ ปูริตํ กมฺมํ, กุสลํ สรเส มุเน;

ตุยฺหตฺถาย มหาวีร, ปุญฺญานุปจิตานิ โน.

๔๔๗. ‘‘‘อภพฺพฏฺฐาเน วชฺเชตฺวา, วารยิมฺห อนาจรํ;

ตุยฺหตฺถาย มหาวีร, จตฺตานิ ชีวิตานิ โน [สญฺจตฺตํ ชีวิตมฺปิ โน (สฺยา.)].

๔๔๘. ‘‘‘เนกโกฏิสหสฺสานิ, ภริยตฺถายทาสิ โน;

น ตตฺถ วิมนา โหม, ตุยฺหตฺถาย มหามุเน.

๔๔๙. ‘‘‘เนกโกฏิสหสฺสานิ, อุปการายทาสิ โน;

น ตตฺถ วิมนา โหม, ตุยฺหตฺถาย มหามุเน.

๔๕๐. ‘‘‘เนกโกฏิสหสฺสานิ, โภชนตฺถายทาสิ โน;

น ตตฺถ วิมนา โหม, ตุยฺหตฺถาย มหามุเน.

๔๕๑. ‘‘‘เนกโกฏิสหสฺสานิ, ชีวิตานิ จชิมฺหเส [จชิมฺห โน (ปี. ก.)];

ภยโมกฺขํ กริสฺสาม, ชีวิตานิ จชิมฺหเส.

๔๕๒. ‘‘‘องฺคคเต อลงฺกาเร, วตฺเถ นานาวิเธ พหู;

อิตฺถิภณฺเฑ น คูหาม, ตุยฺหตฺถาย มหามุเน.

๔๕๓. ‘‘‘ธนธญฺญปริจฺจาคํ, คามานิ นิคมานิ จ;

เขตฺตํ ปุตฺตา จ ธีตา จ, ปริจฺจตฺตา มหามุเน.

๔๕๔. ‘‘‘หตฺถี อสฺสา ควา จาปิ, ทาสิโย ปริจาริกา;

ตุยฺหตฺถาย มหาวีร, ปริจฺจตฺตํ อสงฺขิยํ.

๔๕๕. ‘‘‘ยํ อเมฺห ปฏิมนฺเตสิ, ทานํ ทสฺสาม ยาจเก;

วิมนํ โน น ปสฺสาม, ททโต ทานมุตฺตมํ.

๔๕๖. ‘‘‘นานาวิธํ พหุํ ทุกฺขํ, สํสาเร จ พหุพฺพิเธ;

ตุยฺหตฺถาย มหาวีร, อนุภุตฺตํ อสงฺขิยํ.

๔๕๗. ‘‘‘สุขปฺปตฺตานุโมทาม, น จ ทุกฺเขสุ ทุมฺมนา;

สพฺพตฺถ ตุลิตา โหม, ตุยฺหตฺถาย มหามุเน.

๔๕๘. ‘‘‘อนุมคฺเคน สมฺพุทฺโธ, ยํ ธมฺมํ อภินีหริ;

อนุโภตฺวา สุขํ ทุกฺขํ, ปตฺโต โพธึ มหามุเน.

๔๕๙. ‘‘‘พฺรหฺมเทวญฺจ สมฺพุทฺธํ, โคตมํ โลกนายกํ;

อญฺเญสํ โลกนาถานํ, สงฺคมํ เตหิ โน พหู.

๔๖๐. ‘‘‘อธิการํ พหุํ อเมฺห, ตุยฺหตฺถาย มหามุเน;

คเวสโต พุทฺธธมฺเม, มยํ เต ปริจาริกา.

๔๖๑. ‘‘‘กปฺเป จ สตสหสฺเส, จตุโร จ อสงฺขิเย;

ทีปงฺกโร มหาวีโร, อุปฺปชฺชิ โลกนายโก.

๔๖๒. ‘‘‘ปจฺจนฺตเทสวิสเย, นิมนฺเตตฺวา ตถาคตํ;

ตสฺส อาคมนํ มคฺคํ, โสเธนฺติ ตุฏฺฐมานสา.

๔๖๓. ‘‘‘เตน กาเลน โส อาสิ, สุเมโธ นาม พฺราหฺมโณ;

มคฺคญฺจ ปฏิยาเทสิ, อายโต สพฺพทสฺสิโน.

๔๖๔. ‘‘‘เตน กาเลน อหุมฺห, สพฺพา พฺราหฺมณสมฺภวา;

ถลูทชานิ ปุปฺผานิ, อาหริมฺห สมาคมํ.

๔๖๕. ‘‘‘ตสฺมึ โส สมเย พุทฺโธ, ทีปงฺกโร มหายโส;

วิยากาสิ มหาวีโร, อิสิมุคฺคตมานสํ.

๔๖๖. ‘‘‘จลตี รวตี ปุถวี, สงฺกมฺปติ สเทวเก;

ตสฺส กมฺมํ ปกิตฺเตนฺเต, อิสิมุคฺคตมานสํ.

๔๖๗. ‘‘‘เทวกญฺญา มนุสฺสา จ, มยญฺจาปิ สเทวกา;

นานาปูชนียํ ภณฺฑํ, ปูชยิตฺวาน ปตฺถยุํ.

๔๖๘. ‘‘‘เตสํ พุทฺโธ วิยากาสิ, โชติทีป สนามโก;

อชฺช เย ปตฺถิตา อตฺถิ, เต ภวิสฺสนฺติ สมฺมุขา.

๔๖๙. ‘‘‘อปริเมยฺเย อิโต กปฺเป, ยํ โน พุทฺโธ วิยากริ;

ตํ วาจมนุโมเทนฺตา, เอวํการี อหุมฺห โน.

๔๗๐. ‘‘‘ตสฺส กมฺมสฺส สุกตสฺส, ตสฺส จิตฺตํ ปสาทยุํ;

เทวมานุสิกํ โยนึ, อนุโภตฺวา อสงฺขิยํ.

๔๗๑. ‘‘‘สุขทุกฺเขนุโภตฺวาน, เทเวสุ มานุเสสุ จ;

ปจฺฉิเม ภเว สมฺปตฺเต, ชาตามฺห สากิเย กุเล.

๔๗๒. ‘‘‘รูปวตี โภควตี, ยสสีลวตี ตโต;

สพฺพงฺคสมฺปทา โหม, กุเลสุ อภิสกฺกตา.

๔๗๓. ‘‘‘ลาภํ สิโลกํ สกฺการํ, โลกธมฺมสมาคมํ;

จิตฺตญฺจ ทุกฺขิตํ นตฺถิ, วสาม อกุโตภยา.

๔๗๔. ‘‘‘วุตฺตเญฺหตํ ภควตา, รญฺโญ อนฺเตปุเร ตทา;

ขตฺติยานํ ปุเร วีร [ตาสํ (สฺยา.)], อุปการญฺจ นิทฺทิสิ.

๔๗๕. ‘‘‘อุปการา จ ยา นารี, ยา จ นารี สุเข ทุเข;

อตฺถกฺขายี จ ยา นารี, ยา จ นารีนุกมฺปิกา.

๔๗๖. ‘‘‘ธมฺมํ จเร สุจริตํ, น นํ ทุจฺจริตํ จเร;

ธมฺมจารี สุขํ เสติ, อสฺมึ โลเก ปรมฺหิ จ.

๔๗๗. ‘‘‘อคารํ วิชหิตฺวาน, ปพฺพชิมฺหนคาริยํ;

อฑฺฒมาเส อสมฺปตฺเต, จตุสจฺจํ ผุสิมฺห โน.

๔๗๘. ‘‘‘จีวรํ ปิณฺฑปาตญฺจ, ปจฺจยํ สยนาสนํ;

อุปเนนฺติ พหู อเมฺห, สาครสฺเสว อูมิโย.

๔๗๙. ‘‘‘กิเลสา ฌาปิตา อมฺหํ [มยฺหํ (สฺยา.), อมฺหากํ (ก.)], ภวา สพฺเพ สมูหตา;

นาคีว พนฺธนํ เฉตฺวา, วิหราม อนาสวา.

๔๘๐. ‘‘‘สฺวาคตํ วต โน อาสิ, มม พุทฺธสฺส สนฺติเก;

ติสฺโส วิชฺชา อนุปฺปตฺตา, กตํ พุทฺธสฺส สาสนํ.

๔๘๑. ‘‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’.

๔๘๒. ‘‘เอวํ พหุวิธํ ทุกฺขํ, สมฺปตฺตี จ พหุพฺพิธา;

วิสุทฺธภาวํ สมฺปตฺตา, ลภาม สพฺพสมฺปทา.

๔๘๓. ‘‘ยา ททนฺติ สกตฺตานํ, ปุญฺญตฺถาย มเหสิโน;

สหายสมฺปทา โหนฺติ, นิพฺพานปทมสงฺขตํ.

๔๘๔. ‘‘ปริกฺขีณํ อตีตญฺจ, ปจฺจุปฺปนฺนํ อนาคตํ;

สพฺพกมฺมมฺปิ โน ขีณํ, ปาเท วนฺทาม จกฺขุม.

๔๘๕. ‘‘นิพฺพานาย วทนฺตีนํ, กึ โว วกฺขาม อุตฺตริ;

สนฺตสงฺขตโทสญฺหิ, ปปฺโปถ [สนฺตสงฺขตโทโส โย, ปชฺโชตํ (สฺยา. ปี. ก.)] อมตํ ปทํ’’.

อิตฺถํ สุทํ ยโสธราปมุขานิ อฏฺฐารสภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติ.

ยโสธราปมุขอฏฺฐารสภิกฺขุนีสหสฺสาปทานํ ทสมํ.

กุณฺฑลเกสีวคฺโค ตติโย.